سؤال هام..عن الزواج

[بنت شعنونة]

اخويا سألني من شوية سؤال وجيه جدا

وقال لي بالنص...

شعنونة... هوا الجواز ب يجيب ورا؟؟

:)

قلتله يعني ايه

قالي يعني هل الجواز حقا ممكن يخلي الرجل يتقهقر في حياته العملية و المادية؟؟

قلتله حسب الطرفين

لو الست كويسة ها يبقى للأحسن

و لو الراجل وحش ها يبقى للأسوأ

يعني مش طرف واحد عليه كل العبء

دي معادلة من طرفين...!!

رفض كلامي كله وردد ثانية

لا انا مش عاوز اطراف

انا بسأل عامة وبجملة واحدة

هل الجواز ب يجيب ورا؟؟

ولو ايوا يبقى ليه

ولو لا يبقى ليه؟؟

لم اجد اجابة

وقلت اسألكم

ربما اجد الاجابة عندكم!!!!!؟؟؟؟؟؟؟؟؟ :)

[wagdi]

الفاضلة شعنونة...

هو الموضوع يختلف حسب الظروف والبيئة والطرفين و و ...

بس لو أخوكي عايز الموضوع كده بصورة عامة....يبقى أه بيجيب لورا...

فطبيعي من يسير وحده خفيف خفيف يكون اسرع ممن يمشي حاملاً اسرة وبيت مفتوح على كاهله...والعازب مثلاً يكون سهل عليه التنقل والسفر لظروف عمله مثلاً بينما يصعب ذلك على المتزوج...ومادياً الأعزب لا يعمل حساب الماديات زي المتزوج...وكفاية مصاريف الزواج وحدها والبيت والمظاهر الفارغة في مجتمعاتنا والتي قد تصل لثروة تكفي لبداية مشروع صغير...ده غير إن اي مشاكل في البيت أكانت من زوجته أو أطفاله سوف تؤثر بشكل أو بأخر على أداءه في عمله....

ده لو بنتكلم عن الحياة العملية والمادية....

بس المتزوج بيلاقي حد مستنيه في أخر اليوم...حد يتكلم معاه ويشكيله همه...حد يسكن إليه ويشاركه حياته...وهذا ما ليس عند الاعزب...

والمتزوج عنده أطفال...والذين مهما ثقل عبئهم أو مشاكلهم فلن تسوى ضحكة أو حضن واحد منهم...وعنده الفرصة أن يرى أمامه طفل من دمه يكبر أمامه ويتعلم الكلام ويتعلم المشي ويقول له يا بابا...وهذا مالا يقدر بنجاح أو مال...وهذا مالا يجده الأعزب...

فالزواج كأي شئ في الدنيا له عيوب ومميزات...وسبحان الله الذي جعل في مميزاته ما يطغى على عيوبه...

ودمتي بخير

[shawshank]

فطبيعي من يسير وحده خفيف خفيف يكون اسرع ممن يمشي حاملاً اسرة وبيت مفتوح على كاهله...

<{POST_SNAPBACK}>

خفيف خفيف ، لكنه يفتقد الاستقرار. و عدم الاستقرار هذا لابد أن يؤثر عليه سلبا إن كان سويا. فهو يفتقد مثلا:

... يلاقي حد مستنيه في أخر اليوم...حد يتكلم معاه ويشكيله همه...حد يسكن إليه ويشاركه حياته..

<{POST_SNAPBACK}>

صح ؟

أنا أرى إن الزواج الناجح بيجيب لقدام مش لورا (مش لورا بوش :) )

لأن الطبيعي هو الزواج . و الزواج في السن المناسبة ، و التي أرى أنها أقل كثيرا مما هو الحال عليه الآن .

تم تعديل 19 ديسمبر 2005 بواسطة shawshank

[صفاء]

اذا كان الزواج مبنى على التفاهم والود والحب بين الطرفين

أكيــــــــــــــــــد هايكون عندهم الرغبة فى انجاح هذا الزواج بشتى الطرق

والنجاح أكيد يتضمنه الارتقاء بالمستوى الاجتماعى والمادى والحرص على تربية الأطفال تربية سليمة

وعلى فكرة ده مش مجرد كلام ولكن دى تجارب كثير أثبتته

مهم جدا الحالة النفسية للزوجين واللى بيتحكم فيها حاجات كتير منها ارتباط الطرفين ببعضهم البعض

ارتباط عاطفى ونفسى واحتياج متبادل لا ينتهى

تكميل كل فرد للآخر

وده هايدفعهم لبذل كل ما يمكن من مجهود لإنجاح الزواج والإيفاء بالغرض منه

وهو بناء أسرة سليمة

[محمدمحمودالمرادنى]

الاخت العزيزة الشعنونة تحية لك ولاخوكى اللى زى السكر وسأل سؤال بجد بيعكس مشكلة وسؤال بين الشباب لكن لى تعليق ارجو قرائتة ونقلة لأخوكى اذا اتبع الشاب الاختيار الصحيح فى انتقاء بنت الحلال التى ستشاركة حياتة وتربية اولادة وتكون سكن لة فى الضر قبل الفرح ومن منا لا يخطئ فى هذا الاختيار اذا ما ابتعد عن قواعد الدين فى اختيارة فأنظرى الى الرسول صلى اللة علية وسلم عندما اوصى بأختيار الزوجة عندها ستكون زوجة اخيكى دافعا لة للامام ان شاء اللة وارجوكى تعتبرينى اخ لكى وتبحثى معى عما يبحث عنة اخوكى :) لانى انا كمان عازب :D

[khedr]

الاخت الشعنونه الاخوه والاخوات :

ممكن اسأل حضراتكم وقبلها نفسي...ايه الفرق في منظومه الزواج علي ايام ابائنا واجدادنا..... ..... وهل كان فيه الشكوي المستمره التي نسمعها من الكل الكبير والصغير والغني والفقير والمتعلم والغير متعلم.....

...نقدر كده مع بعض ...نفكر....... ونقارن ....... ونقول..

الموضوع ده هام للكل ...عايزين نسمع وخصوصا اساتذتنا الكبار..

واخواتنا( اللي طبعا مش كبار في السن ) من وجهه نظرهم.....

نسمعععععععععععععععععععععععععع

اتفضلواااااااااااااااااااااااااااااااااا

كل وجهات النظر مسموح بها بعد اذن اختنا الشعنونه..

[مصرية الهوى]

وراء كل رجل عظيم امرأة ..

أنا بصراحة من أشد المؤمنين بهذه المقولة ...

[Alshiekh]

شعنونة... هوا الجواز ب يجيب ورا؟؟

الجواز الناجح لازم يجيب قدام

واقصد بالجواز الناجح ان يتفهم كلا الزوجين الآخر ويساعده ويدفعه للأمام سواء كان الزوج او الزوجة ، فالمفترض ان نجاح احدهما هو نجاح لكلاهما .

وكم نرى من قصص نجاح تتباهى الزوجة فيها بنجاح زوجها والعكس يتباهى الزوج بنجاح زوجته.

اما اذا كان الزواج من ذلك النوع الذى يحاول فيه كل طرف ان يثبت نجاحه وتفوقه على شريك حياته ، فلا شك ان هذا النوع من الزواج " بيجيب ورا "

والاسباب كثيرة ، الانانية ، الغيرة الزائدة ، التسلط ، البخل ، الغرور ... أشياء كثيرة يمكن ان تجعل الزواج " يجيب ورا " وتخلى شريك الحياة يكلم نفسه فى الشوارع لغاية النهاية المحتومة " السرايا الصفراء " والتى غالبا ماتكون من نصيب الرجل :P :P :rolleyes:

وبعدين ياجى جى

المثل مفروض يتغير ويبقى " وراء كل رجل مجنون أمرأة "

لا بصراحة المثل ممكن يبقى " وراء كل رجل ناجح او امرأة ناجحة شريك حياة بيفهم "

تحياتى

[se_ Elsyed]

قمت بتعديل بسيط في عنوان الموضوع

----

أما عن رأيي في الموضوع فأحب أقول إن الزواج هو اعظم خطوة بيخطوها الإنسان إذا كانت نيته سليمة ويبتغي فيها وجه الله .. يعني يتزوج عشان يستقر ويعف نفسه ويبني أُسرة ،ولوكان إختياره سليم وكان هناك إتفاق بين الطرفين ... ساعتها العربية ترمي لقدام وتفتح على الرابح كمان :excl: ..

لو غير كده بقى يبقى تجيب مارش دير وتخبط في البشر ...

[ايهاب سالم]

والمتزوج عنده أطفال...والذين مهما ثقل عبئهم أو مشاكلهم فلن تسوى ضحكة أو حضن واحد منهم...وعنده الفرصة أن يرى أمامه طفل من دمه يكبر أمامه ويتعلم الكلام ويتعلم المشي ويقول له يا بابا...وهذا مالا يقدر بنجاح أو مال...وهذا مالا يجده الأعزب...

<{POST_SNAPBACK}>

أحسنت يا سيد / وجدي

الجمله دي فيها الخلاصه يا شعنونه

[عصام]

وراء كل رجل عظيم امرأة

تقول .. أن وراء كل رجل عظيم امرأة

:wub:

[بنت شعنونة]

الردود كلها عاجباني اووووووووي وكلها في الجون الصراحا

بس مش ملاحظين حاجا؟

حنية المراة وضحكة الطفل حاجات صعب اوي الشاب يحس بقيمتها دلوقتي

خاصة لو كان في عنفوان الشباب يعين سن ال 22 - 30 مثلا

لآنه مشغول ب الف حاجا وحاجا اهم بالنسبة له من الضحكة و الونس

حاجات مادية وناجاحات و فلوس وشغل

حاجات هوا لامسها وحاسسها على ارض الواقع

لآنه طالع من الصفر ف عاوزي يبني نفسه ك "رجل"

و في مجتمعنا الرجل = شغل وفلوووووووووووووووووس و فلوووووووووووووس و فلووووووووس ومركز اجتماعي

يعني من الأخر هوا بيبني نفسه عشان يدي نفسه الشكل اللي من ساعة ما اتولد وهوا بيحلم بيه

بععععععععععععععععد ما يوصل بقى للنقطة اللي نفسه فيها ساعتها ها يحس ب احتياجه للونس و ضحكة الطفل اللي انتوا بتتكلموا عليه دلوقتي

انما قبل كدا ما اعتقدش

واعتقد انه ها يفضل شايف انه الجواز يجيب ورا

حاصة لو كان مرتبة 800 جنيه مكفينه بالعافية ك فرد واحد يبقى ها يكفوه ازاي لو فردين

ولو حلفنا ع المية تجمد انه لو اتجوز مدبرة ها يعيش سعيد ف مش ها يصدق لآنه عايش بالورقة و القلم

يبقى اعتقد " و العلم عند الله" انه لالالالالالالازم نحل المشكلة دي

اننا نفهم الشباب ان اللي عايش فيه بالورقة و القلم كل يوووووووووم من ساعة ما اتخرج مش هوا نفسه لو زاد واحد ع المجموع

وانه الموضوع ها يختلف!!!!!!!

حاسا انها فكرة الديناصور الأخضر المحلق؟؟؟؟؟؟؟ :ninja: :blush:

[هادي]

عزيزتي دكتورة أوشا

كلمتين و بس - على رأي فؤاد المهندس

اجباتي لاخوكي الموقر هي : ده سؤال افتراضي جدا

حاجه كده زي الديناصور الاخضر المحلق

ليه

لانه لو حب

هيكسر كل القواني النظرية الجامدة والقناعات المتحفية

وهيضرب بكل ما تم هضمه في أمسه القريب - عرض الحائط

لان الراجل مننا بيكون زي الطفل الشبطان ادام حكاية الحُب دي

ومن ناحية تانية

لو افترضنا ان مفيش كصة حب رومانتكية - من بتوع حشيش -

يبقى السؤال برضه لا محل له من الاعراب

نظري وجدلي

ليه (هو بيسأل) :wub:

أقول لك ( ان احب الشاب اللي يسأل) :blush:

لان اللي عاوز حاجه بيعملها

عاوز تنجح

هتنجح

لو بتذاكر على لمبة نمرة خمسة ومن غير جاز كمان ، أو بتسرح تحت عامود نور

هتذاكر وهتنجح .. طلما فيه إرادة

خلطة النجاح - من وجهة نظري المتواضعة -

هي صفات شخصية (90%) و ظروف و عوامل خارجية مساعدة (10%)

وعلى رأي المحروس حسين فهمي ف "خلي بالك من زوزو"

لما قال : " حتى لو هابيع فجل !!!

راح اهندمه و ازوقه وابيعه بفيونكات ..

و انجح "

انتهى كلامى نفعنا الرب بعلمه

يعني الناجح ف السودان

ناجح ف مصر

ناجح ف امريكا

دايما على طول

يبقى مش الجواز هيجيبه ورى

ولو شعر الراجل الناجح ان مفيش فايده من مراته

وانها هتجيبه وري

هينساها ويحطها ف حجمها ويبص برضه ادامه وينجح

الراجل = إرادة (وليس فلوس)

ملحوظة

انا باتكلم عن الراجل :wub:

ومليش دعوه بـ .. اللي مش راجل

بادعى ربنا ربنا يوفقني ف نمرتي - من اقوال الست فيفي -

قصدي .. :wub:

اتمنى اكون وفقت ف عرض وجهة نظري

تحياتي

إيه القصيده المفتكسه دي !!! إنما - بينما - كيفما - ربما - حيثما

ربنا يزيدك .. نما .. (أصلها نماء وحذفت الهمزة - بمعرفتي - للتخفيف)

تم تعديل 1 يناير 2006 بواسطة هادي

[Sherief AbdelWahab]

أدام ..وورا .. سؤال وجيه جداً جداً..

الجواز في مجتمعاتنا تباديل وتوافيق ، ونادر قوي تلاقي جوازة عن حب ، وأندر تلاقي جوازة عن تفاهم..

الراجل ، ربان السفينة ، عمود البيت .. الخ عايز ينجح ، والست كمان من حقها تنجح ..

إيه اللذيذ في الموضوع؟

إن الراجل بيعتبر أي تعاون مع الست علشان تنجح تقليل من كرامته وكبريائه..

إيه بقى الألذ في الموضوع؟

إن الست بتعتبر أي تعاون أو مشاركة تنازل لا يجوز تقديمه ، مش انت بقى عمود البيت ، شيل بقا يا عم العمود! :D

محدش عايز يتحرك (اتفضل حضرتك ، لا حضرتك الأول ، لا معلش حضرتك الأول ، لا سيادتك الأول سايق عليك النبي..).. حاجة تشبه طشاش لحاجة مريت عليها أيام الدراسة اسمها "معضلة السجين"..the prisoner dilemma كل طرف مستني التاني ، مش متطوع يتحرك ويحرك التاني..

ولو حصل وتحرك طرف ، حتفضل مشكلة التنكر للطرف التاني!.. يعني ان الست تساعد الراجل على النجاح ولما الراجل ينجح يستندل ، كذلك لما الست تنجح وتخلي جوزها على الهامش على حساب مستقبلها المهني..

عرفتوا ليه ساعات الجواز بيجيب ورا؟ .. اسألوا الطرفين وحتعرفوا الإجابة! :D

التفاهم الحقيقي بس يقدر يخلي الطرفين يتحركوا ، وينجحوا ، والجوازات الناجحة في الأجيال اللي قبلينا كثيرة ، وممكن تلمسوا الدرس دة بنفسكم..

التفاهم والاحترام المتبادل يا جماعةالخير..

خلص الكلام

[Diab]

اخويا سألني من شوية سؤال وجيه جدا

وقال لي بالنص...

شعنونة... هوا الجواز ب يجيب ورا؟؟

بيتهيألي ده لما يكون الفتيس فيه مارشيدير بيجيب ورا :)