يا محاوراتيين .. عندي اقتراح ثمين !!

[مصرية الهوى]

ولا ثمين ولا حاجه .. بس عشان الوزن يضبط :) !!

ويمكن يبقى طين :) ..

لا صحيح .. هو اقتراح بقترحه على حضراتكم .. وقولولي ايه رايكم .!!

وطبعاً بعد إذن وموافقة السادة مشرفي المنتدى الأفاضل ..

ايه رأيكم لو نعمل مسابقة على كل باب .. يعني ايه ؟؟

أقولكو ..

ايه رأيكم لو نعمل مسابقة تكون شهرية مثلاً ، لكل باب من أبواب المنتدى ، مثلاً باب الأسرة ، ناخد اقتراحات الأعضاء لمشكلة معينة .. نطرح المشكلة.. نحدد مدة معينة .. اسبوعين مثلاً .. يجينا كذا حل .. المشرفين ينقوا أفضل مثلاً خمس ردود .. الأعضاء يصوتوا .. ايه أفضل حل من دول؟؟

باب الصور مثلاً .. نطرح موضوع للتصوير .. تجينا صور كتير .. المشرفين ينقوا خمس .. تطرح للتصويت .. عشان نطلع الأول ..!!

باب الأدب .. كتابة قصة عن موضوع معين .. مقال عن مشكلة معينة .. نحط صورة مثلا نقول عبر عما في الصورة بأبيات شعر .. كده يعني .. بعدين تصويت لاختيار الأفضل ..

باب الكمبيوتر .. شرح موضوع معين في الكومبيوتر .. تصميمات جرافيكس وانيميشين عن حاجه معينة ..

وهكذا في كل باب من أبواب المنتدى ...

( أنانية مش كده كتبت بس عن الأبواب اللي أنا مهتمة فيها :) )

باب الاجتماعيات مثلاً .. عندنا مناسبات خطوبة وزواج وولادة وأعياد ميلاد .. نشوف أحلى واحد يعمل حفلة ويعزمنا :P .. ونصوت له عشان يبقى الأول :D ..

يلا بقى قولوا ايه رأيكم في الاقتراح .. لو بايخ محدش يتريق الله يخليكم .. يقول بايخ ويمشي من غير تريقة :blush: ..

ولو عجبكم مخمخوا معايا وفكروا أفكار حلوة .. عشان الروتين يتغير .. ويبقى فيه اكتيفتي في المنتدى ..

ومن غير جوايز طبعاً .. إلا لو فيه حد عايز يتبرع .. يبقى كتر خيره وربنا يبارك له :P ..

تحياتي .....

تم تعديل 22 ديسمبر 2005 بواسطة مصرية الهوى

[شارب المر]

بارك الله فيكي اقتراحك يمكن ان يثمر عن نتاج ثقافي او فكري متميز ..

[الأفوكاتو]

مرحبا بشارب المر,

و أتمنى أن أراك تشرب رحيق العسل هنا فى المحاورات.

تحياتى.

[وائل ثابت عبد الرحمن]

السلام عليكم

إقتراح جيد .

[se_ Elsyed]

إقتراح 10/10..

بس عايز مُتابعة من نار وناس نشطيين .. مش بيرموا الكرة في ملعب غيرهم عشان ما يتحملوش المسئولية .

[وليد صفوت]

و ممكن الاقتراح الجميل يتحول لما يشبه الترتيب الدورى لأجمل موضوع فى كل باب ...

يعنى كل باب يحمل بداخله العديد من الموضوعات , من الممكن اننا نقيم الموضوعات مثل معظم المنتديات ( التقييم بيكون على شكل خمس نجوم فى أعلى الموضوع و كل عضو و تقييمه من نجمة ألى خمسة ) ثم تجمع النجوم بشكل اتوماتيكى ليترقى الموضوع و يكون الموضوع الذهبى فى الباب ) ..... و ده ممكن يكون بشكل إسبوعى .

حد فهم حاجة ؟؟؟

سلام عليكم , انا شكلى خرفت :)

[وليد صفوت]

ملحوظة لـ س س ...

صورتك وقعت من الأفاتار يا ابيه يا ريت تلحق الواد قبل ما يتوه :)

[وليد صفوت]

بارك الله فيكي اقتراحك يمكن ان يثمر عن نتاج ثقافي او فكري متميز ..

<{POST_SNAPBACK}>

مرحباً بشارب المر ... :)

عندنا أيس كريم . :) .... ينفع ؟

[وائل ثابت عبد الرحمن]

السلام عليكم

أقتراحك أيضا جيد يا فايولينكينج , انا موافق عليه

[شاعرالرومانسية]

اقتراح كويس جدا يا مصرية الهوى ...( تسلم الدماغ اللى فكرت :blush: )

ويزيد من تفاعل ونشاط الاعضاء ...

ويحفز كذلك دخول جميع الاقسام..

وكما تفضل اخونا Violinking وازاد من الاقتراحات ..

وكدة ممكن ينتج عنه عدة اقتراحات تزيد الفكرة ثراءا..

يعمى ممكن بعد كدة يبقى فية لوحة شرف لاحسن الموضوعات الفائزة واصحابها

وممكن اللى يفوز باحسن موضوع او رد فى اكثر من قسم فى نفس الشهر ... يبقى عضو متميز

وممكن اللى يفوز فى نفس القسم لمرات متتالية برضة...

المرة دى بقى .. :)

اكيد محدش فاهم حاجة .. :)

ربنا يستر :)

[مصرية الهوى]

شكل الاقتراح كان مش ولا بد :excl:

مش مشكلة ،

بس انا مكنش قصدي ياسي السيد إن احمّل الناس المسئولية واهرب ..

لا أنا عايزه كلنا نشارك وانا اولكم ..

بس لازم حد يتحمس معايا بجد

لان ايد لوحدها متصقفش ..

[وليد صفوت]

شكل الاقتراح كان مش ولا بد  :excl:

مش مشكلة ،

بس انا مكنش قصدي ياسي السيد إن احمّل الناس المسئولية واهرب ..

لا أنا عايزه كلنا نشارك وانا اولكم ..

بس لازم حد يتحمس معايا بجد

لان ايد لوحدها متصقفش ..

<{POST_SNAPBACK}>

متصقفش دى مشتقة من ( الصقافة ) ؟

ما علينا ... إقتراحك يا جى جى بالفعل يتم التشاور بخصوصه مع فريق الأشاكيف ( جمع اشكيف الوحش المفترس بتاع الف ليلة و ليلة عارفاه ؟ ) و بإذن الله نرسى على حل يرضى الجميع ... و ربنا يستر طريقنا ! :rolleyes: