الستات والطيبة .. وحكاويهم الحلوة ..!!

[مصرية الهوى]

أكيد كلكم عارفين يعني ايه ست طيبة .. ست بريئة .. على نياتها :) ..

ست بسيطة .. علامها بسيط .. ومعلوماتها على قدها ..

ست كل همها في الدنيا بيتها وزوجها وأولادها ..

النوعية دي من الستات .. اللي بتحس إنهم إن شاء الله هيدخلوا الجنة عدل ..

من شدة الطيبة والحنية والصفاء والنقاء اللي في قلوبهم :) ..

الستات اللي لابيعرفوا يعني ايه عولمة .. والا ديموقراطية ..

ميقدروش يستوعبوا بسهولة الموبايل والكمبيوتر والحاجات دي ..

انا معايا حكاوي عن الستات الطيبة دي ....

..................

.........

أيام الانتفاضة الفلسطينية .. كنا في عزومة .. وطبعاً أكيد السياسة لازم تعدي من جنبنا .. كان فيه وحده ست من النوعية دي .. البرئية .. الست دي قالت : أنا بصراحة مش فاهمه الفلسطينيين عايزين :blush: ؟ ما هو هما اللي يجيبوا لنفسهم القتل .. بيروحوا يتحرشوا باليهود ويستفزوهم .. أكيد لو هو رمى عليه الطوب .. أكيد اليهودي مش هيسكت .. أنا لو كنت مكان الفلسطينيين كنت روحت السوق واشتريت أكل يكفي شهر والا شهرين .. وقفلت على نفسي وقعدت في بيتي .. وسبت اليهودي في الشارع يتمشى زي ما هو عايز .. لحد مايزهق ويمشي :P ..

طب دي هأفهمها ازاي .. النكسة والنكبة والاحتلال والأرض والوطن وميتشيل وتينت وخارطة الطريق والكلام ده ..

..................

.........

ست تانية .. ابنها ضابط ،كان في إجازة ، ولما حصلت الحرب في أفغانستان والعراق ، لغوا كل إجازات العسكريين ، ومن ضمنهم ابن الست دي سابها ورجع الشغل ، فوحده بتسألها عن ابنها عامل ازاي ؟ .. فبتقول : ياروح قلبي ده الشغل اتصلوا بيه قالوا لازم ترجع .. مفيش اجازات .. أصلهم بيقولوا إن فيه واحد عامل بلاوي سوداء وهربان ومتخبي في الجبال (تقصد أسامة بن لادن :D ).. فهما بيدوروا عليه .. إن شاء الله أول ما يلاقوه ابني هياخد إجازة ويجي ..

يا حبيبتي ... !!

..................

.........

مرة كنت قاعدة مع عمتو (الله يرحمها ) فقاعده بتتكلملي عن ابنها .. بتقول : اصله يا عيني مموت نفسه في المذاكرة عشان يجيب الماسجتير (خلوا بالكم مش خطأ مطبعي ).. قلتلها وأنا بضحك : طب ياعمتو يعني ايه ماسجتير ؟؟ .. قالت : أنا عارفه .. شهادة كبيرة بتيجي بالمذاكرة ليل ونهار :D !!

..................

.........

والا فيه ست .. دي ست رهيبة .. ليها حكاوي جميلة اوووووي .. الست دي أولادها اشترولها موبايل .. عشان يكلموها في زياراتها الكتيرة للناس .. المهم مرة كانت عند جارتها .. فبنتها اتصلت على الموبايل .. ردت عليها وهي في منتهى الاندهاش : الله :P !!!! أنتي ايش عرفك أن أنا عند الجيران .. البنت ماتت من الضحك قالت: بجد يا ماما انتي عند الجيران .. قالتها : آمال كلمتيني ازاي ؟؟؟ .. وقعدت ساعة تفهمها انها لما تكلمها على الموبايل متعرفش هي فين ....!!!!

..................

.........

شاركوني ..

فيه ملاحظة : أنا عمري ما قابلت راجل كده .. دايما بيطلعوا فاهمين كل حاجه :) ..

يعني الطيبة والبراءة خاصة بالستات بس !!

[dr khaled]

فيه ملاحظة : أنا عمري ما قابلت راجل كده .. دايما بيطلعوا فاهمين كل حاجه ..

يعني الطيبة والبراءة خاصة بالستات بس !!

ياعزيزتى الرجالة طيبين جدا و اكبر دليل ان الرجالة فاكرين انهم فاهمين الستات

[صفاء]

الموضوع فكرنى بجمالات زايد فى جرء من الثلاثية ..

ابنها بيقولها قبضوا على فلان

قالتله ليه يابنى عمل ايه ؟

قاللها أصله شيوعى

قالتله طب وماله يقبضوا عليه ليه ؟ ... مش الشيوعيين دول اللى بيحبوا سيدنا على :)

[se_ Elsyed]

تعتبر شخصية أمينة في ثُلاثية نجيب محفوظ نموذج الست اللي على نياتها بالقوي ..

وفي مشهد مُعين كل ما أتفرج عليه أموت على نفسي من الضحك

فأمينة بعد ما عرفت إن إبن من أبنائها بيشارك في مظاهرات طرد الإنجليز .. قعدت توبخه وتقوله " ليه كده يابني .. بقى بعد العمر ده كله عايزين تطردوا الناس اللي بقى بينا وبينهم عِشرة .. ده حتى العِشرة ما تهونش الا على ابن الحرام "

[khedr]

اختي الكريمه....فعلا كل الستات طيبين....

كان عندنا في الحي واحد من الاخوه اللي كل شويه المباحث وامن الدوله ...وماشابه..بيسألوا عليهم كل شويه

المهم مره وقعوا في الست الطيبه ..وسألوها عن فلان ...

وقالت :

الشيخ محمد ايوه يا ابني يخليه ويبارك فيه الناس كلها تنام وهو يا عيني يدور يصحيهم لصلاه الفجر....

الناس كلها مع عيالها في بيوتها وهو يطلع الجبل يودي لزمايله الاكل

وبعد كده عينك ماتشوف الا ......... ..... النور

اتقبض عليه وعليها وعلي زمايله وعلينا...........................واه

[Folana]

السلام عليكم ورحمة الله ....

بت بت بت بنتى مصرية الهوى (وش طنط أطاطا).....موضوعك جميل كالعادة ...بأحس انك بتفكرى كتير وتطلعى بمواضيع كده مستخبية ....طبعا الستات طيبيبن مش كلهم يعنى ...تعرفى انا زمان كنت من صنف الستات ده ..بس كنت لسه مش اتجوزت يعنى ..طول عمرى يعنى كده غلوبة وفى حالى ..ولا افهم الكلام ولا اعرف اتكلم ...واخدت شلالايت واقلام على قفايا لما قلت يابس (سيكولوجيا طبعا ).....يعنى شلوت سيكولوجى بالمايونيز وحاجات كده ...دلوقت بقى اياك حد يقول على طيبة ...لو سمعت حد بيقول دى فلانة دى طيبة اتعدل له وبالبوكس فى وشه واقوله بس ماتقولش طيبة ...ده انا عتريس ده انا بلوى سودة حتى بصوا حتى شوفوا ... ;) :)

: نرجع لموضوعك ...تصورى انا شايفة ان الرجالة اطيب من الستات ....اصل اى ست فى الدنيا مهما ارتقت اجتماعيا او ادبيا بتلاقى لسانها عمال يعض هنا وهنا :)....انا يصعب على جدا الرجل لما يجى يأكل ..اه والله وخصوصا لو فقير ...بأحس ان قلبى بيوجعنى ...ولو شفت رجل بيبكى كمان بازعل جدا ..يمكن دموع الاطفال مش بتأثر فى زى دموع الرجال.....بتحسى كده انهم عزيز قوم ذل.....

(الاخوة الرجال فى المنتدى ...حاكتب لكم رقم حسابى علشان اللى عايز يكافئنى بقرشين ...نحن نقبل التبرعات )... :D

[abofasad]

يا ست يا فلانة، فكافأة لك حبعتلك زلمكة الديك الرومي اللي وصفتيلي حشوته امبارح وطلع طعمه أحلى من العسل

ام فصاد بتشكرك جدا وبتقولك ياريتك كنتي نورتي سفرتنا

على العموم ملحوقة.. والمناسبات الحلوة جاية كتير

جدو ابو فصاد

[Folana]

جدو ابو فصاد....بالف هنا ...الحمدلله ان الوصفة عجبتكم وماطلعتش زى اللفت بتاع شاعر الرومانسية ...تحياتى لك ولام الفصاد ....

[Abofady]

:) والله فية ستات طيبين . خدى دى:

فى احدى المرات وانا عائد للسعودية بعد قضاء اجازتى بمصر. جاءت جارة لوالدتى ترجوها ان اخذ معى بعض الاشياء لابنها الذى يعمل فى الخليج, وكنت مترددا فى ذلك , وبعد الحاح من امى ,والناس لبعضيها, والست جارتنا , سالت الجارة هو بيشتغل فين .. قالت جنبك ..قلت فين يعنى ..قالت جنبك فى الكويت .

[shahd]

في واحدة من ستات زمان قلبها زي العسل الست دي لما بتخرج وهيا في العربية بتحط اديها على اتجاه القبلة الي كانت بتصلي بيها في الجامع واول ما توصل على البيت الي هيا عايزاه تقلهم هو ده الأتجاه الصح وتصلي يقلولها طب عرفتي ازاااااااااااي

تقلهم ماانا طول ما انا في العربية وانا موجهه ايدي على جهة الجامع

ولا التانية تشوف عبد الحليم في التلفزيون تقول الله هو الراجل ده مش مات طب بيغني ازااااااااااااي؟؟؟؟؟؟؟؟؟

[KANE]

:blink: والله فية ستات طيبين . خدى دى:

فى احدى المرات وانا عائد للسعودية  بعد قضاء اجازتى بمصر. جاءت جارة لوالدتى ترجوها ان اخذ معى بعض الاشياء لابنها الذى يعمل فى الخليج, وكنت مترددا فى ذلك , وبعد الحاح من امى ,والناس لبعضيها, والست جارتنا , سالت الجارة هو بيشتغل فين .. قالت جنبك ..قلت فين يعنى ..قالت جنبك فى الكويت .

<{POST_SNAPBACK}>

:mellow:

:blink:

طيب وخرجت من المطب ده ازاي يا معلم :blush:

[Abofady]

والله يا اخويا يا kane ظللت اضحك .. واضحك .. اروح أبوس امى شوية ,وابوس الست جارتنا شوية .. وسمعت امى بتقول للجارة هو الواد مخه اتلحس والا ايه ......والاخر جابت جواب .اخذته معى وارسلته من السعودية