هل أتزوج من مطلق له أطفال .... أشيروا على

[سهيلة]

وحشتونى جدااااااااااااااااا

انا بصراحة حيرانة ف موضوع ومحتاجة رايكم اوىىىىىىىىىىىىىى

بصراحة انا كنت مضربة عن الزواج ليس لوجود عقدة فية انا ولكن لانى مومنة

ومقتنعة انى مش هتجوز غير واحد مقتنعة بية مية ف المية وانسان خالى من العيوب تفاديا لحدوث فشل مستقبلا ف العلاقة الزوجية

لكنى اكتشفت ان الموضوع مش كدة خالص وان الموضوع مش بيتحسب بالورقة والقلم زى ما كنت بفكر

كمان لاقيتنى ان بدور على ابرة ف كوم قش

بمعنى اخر كنت ابحث عن عقلية معينة مع قلب نابض حنون وهذة معادلة صعبة لم اجدها ف انسان قابلتة

حتى وقت قصير

مش هتصدقوا وجدت هذا الشخص

لكنها الحياة ...........اوكما قال الشاعر

ليس كل ما يتمناة المرء يدركة

مش هطول عليكو

الانسان دة اتقدم للزواج منى فعلا واعترف لى بانة كانت لة تجربة زواج ف الماضى وانة مطلق الان ويعول طفلين

عندها توقفت مع نفسى وتسائلت

لما اعرض نفسى للدخول ف مشاكل حياتة الماضية؟؟؟؟

وتساءلت ايضا؟؟

اليس من حق من فشل ف زواجة الاول ان يبدا حياة جديدة ؟؟؟؟

ام اقف وقفة عند هذا الاعتراف واعتبرة عيب بة؟؟؟وابعد عن المشاكل

رغم انة اعترف لى انة لم يظلم الزوجة الاولى ف شىء وان انفصالهم كان بمودة وسلام لاستحالة التفاهم بينهما وليس لعيب باحدهما؟؟؟؟؟؟؟؟؟؟؟؟

ماذا افعل؟؟؟؟

علما بان هذة الشخصية هى ما كنت ابحث عنها طوال حياتى؟؟؟

تم تغيير العنوان ليعبر عن محتوى الموضوع

تم تعديل 24 ديسمبر 2005 بواسطة عادل أبوزيد

[se_ Elsyed]

حمد الله على السلامه يا دكتورة ..

معليش شوية أسألة على الماشي : موقف الأولاد هايبقى إيه ؟ يعني هايعيشوا مع والدهم .. يعني معاكوا لو فكرتي تقترني به ؟ أم مع والدتهم ؟ ويا ترى ممكن تسأليه هايبقى إيه تصرفه لو زوجته السابقة تزوجت بأخر .. فهل هايترك لها الأولاد ولا هاياخدهم في حضانته ؟ وأخيراً موقف عائلتك وخصوصاً والديك إيه من الموضوع ده ؟

[سهيلة]

سى السيد متشكرة اوى على ردك

انا كمان نفس الاسءلة خطرت ببالى وفعلا سالتها

وكان الجواب ان دى مش مشكلة خالص لان الاولاد ف حضانة الام حاليا وهية وعدتة انها مش هتتزوج ف المستقبل ابدا وهى كرست حياتها لتربية الاولاد

لكنى هذا الموضوع يقلقنى بعض الشىء لان لا احد يعلم متغيرات الحياة التى تتغير بين اليوم والليلة

ولا احد يضمن شىء فى هذا الزمان

حيرانة جداااااااا

اما لراى اهلى فهم لم يعلموا حتى وقتنا هذا لانة منتظر موافقتى انا اولا ثم يتقدم للاهل

وانا اعلم انهم ف البداية سيرفضوا ولكن لو وجدوا عندى القبول سوف يوافقون ولكنهم سيتركون المسولية على عاتقى

لان من مبدا العاءلة عندنا

كل مسؤل عن تصرفة

لذا افكر مليا ف الموضوع وكلى حيرة وخوف من حدوث مشاكل ف المستقبل

[dr khaled]

عزيزتى سهيلة

انا عندى نفس المشكله فانا مطلق و عندى طفل

اهم سوال

اسالى نفسك لو جم يعيشوا معايا هقدر اراعي ربنا و اربيهم كويس

[مصرية الهوى]

السلام عليكم ..

حبيبتي سهيلة ،،

صحيح أنا مش بأيّد زواج البنت من مطلق ، لكن طالما اقتنعتي بهذا الإنسان وشايفه إن الطلاق مش بيعيب ، فخلاص المشكلة اتحلت من هذه الناحية .. المشكلة اللي تؤرقك الآن حياته الماضية ، على ما فهمتك يعني ، ووجود أولاد معه ..

لازم تتفقي أنتي وهو على هذا الموضوع قبل أي كلام رسمي ، مستقبل أولاده ، وطالما زوجته السابقة قررت أنها لن تتزوج وستربي أولادها اللذين هم في حضانتها الآن ، فهذا كويس ، بس زي ما قلتي الواحد ميضمنش المستقبل ، عشان كده لازم تفكري بكل الاحتمالات اللي يمكن تحصل ، يعني يمكن الزوجة تحصلها ظروف وتتزوج ، ساعتها الأولاد حضانتهم هتنتقل لوالدهم .. هل أنتي مستعدة لتحمل مسئوليات طفليّ زوجك ؟ .. وبرضه وهم الآن مع والدتهم لازم تحطي في بالك إن زوجك يظل ابو الأولاد ، يعني يزورهم ويجيبهم لبيتك أحياناً .. يعني مش هتبقي أنتي الاهتمام الوحيد في حياته .. هل الموضوع ده مش هيسببلك أي مشكلة ؟؟ ..

لازم يا حبيبتي تفكري بكل الاحتمالات ،، ولو أي واحد من الاحتمالات دول حصل ، كيف ستتصرفين وقتها ؟؟

وحطي في بالك إنه حياتك هيبقى فيها صعوبات في أولها ودي طبعاً تحصل لكل اتنين متجوزين .. بس في حالتك فيه أطفال .. يعني المشاكل أكتر شويه ...

بس طالما الانسان ده هو فارس أحلامك .. فأنتي فكري تفكير كويس وصلي صلاة استخارة وادعي ربنا إنه ييسر لك الخير .. وحاولي استشارة من تثقين برأيهم وحكمتهم كأصدقائك أو أحد من أقاربك .. وبرأيي إنك لازم تحكي للست الوالدة وتأخدي رأيها لأنه من أهم الآراء في العائلة ..

وربنا يوفقك ويقدملك ما فيه الخير ... ونشرب شرباتك قريب إن شاء الله :rolleyes: ..

[الاسكندرنى]

السلام عليكم

لان اطول كثيرا فقط اريد ان الفت نظرك الى اهم شى الزوج

هل هو على استعداد بناء حياة اسريه جديدة ام انه سوف يظل بين اطلال ماضيه

هل ناقشتيه فى اسباب انفصاله لان ذلك سوف يعطى لكى انطباعا عنه

[shawshank]

لازم تفكري بكل الاحتمالات اللي يمكن تحصل ، يعني يمكن الزوجة تحصلها ظروف وتتزوج ، ساعتها الأولاد حضانتهم هتنتقل لوالدهم .. هل أنتي مستعدة لتحمل مسئوليات طفليّ زوجك ؟ .. وبرضه وهم الآن مع والدتهم لازم تحطي في بالك إن زوجك يظل ابو الأولاد ، يعني يزورهم ويجيبهم لبيتك أحياناً .. يعني مش هتبقي أنتي الاهتمام الوحيد في حياته .. هل الموضوع ده مش هيسببلك أي مشكلة ؟؟ ..

<{POST_SNAPBACK}>

طالما قلت "كل الاحتمالات" ، يبقى فيه كمان احتمال انه في يوم من الأيام يفكر يرد أم أولاده .

تم تعديل 24 ديسمبر 2005 بواسطة shawshank

[Folana]

السلام عليكم ورحمة الله ....

الاخت الفاضلة سهيلة ....اضافة الى كل ما أشار اليه الاخوة الافاضل ...بأقول ده مش كده وبس ...حتى لو الاولاد عاشوا مع والدتهم ...لازم تعرفى ان الاتصال مش حينقطع بينه وبين ام الاولاد حتى لو تزوجت .....وخصوصا مع مرور السنين ...يعنى لازم تكونى مستعدة ومتقبلة انها كل شوية حتتصل به فى اى وقت واى مكان ...الولد سخن النهاردة ..البنت عاملة لى مشاكل ..الاولاد بتتاخر بره ..يعنى حيفضل على صلة دائمة بها لمباشرة امور اولاده ....وفى الحالات اللى زى دى ...المطلقة او ام الاولاد مش بتفوت فرصة الا وتشرك فيها زوجها السابق فى مشاكل الولاد ...يمكن حيلة لا شعورية منها انها تنغص عليك عيشتك ويفضل هو ملخوم فى المشاكل ...وحتى لو اتوا للعيش معاكم ...حطى فى اعتبارك انك مش امهم ...يعنى لو ولعتى صوابعك شموع لهم زى مابيقولوا ..حيجييوا عند اول موقف منك ضدهم حتى لو باعتبارك امهم وحتلاقى النار اتفتحت عليك من كل ناحية ..باعتبار انك بتكرهيهم وانك مرات ابوهم و..و... حاجات كتير جدا لازم تعرفيها قبل الاقدام على هذه الخطوة .....

وفى غمرة الاحداث حتلاقى نفسك بتضحى بكل حاجة حتى سعادتك من اجل ارضائهم وارضاء زوجك و انك جديرة بالحياة دى .....ولما انشاء الله ربنا يرزقك بالاولاد حتبدأالغيرة تشعلل ومشاعرك حتتغير تجاه اولاده وتجاه موقفه منهم ...وحتبدأى تقولى اشمعنى ما هو عنده ولاد تانين منى ....

وسيبك من كونها وعدته بانها مش حتتجوز ...ده اول مايتجوز حتبدا هى تفكر انها ترد له القلم ده وتتجوز هى كمان ...النفس البشرية ياعزيزتى مليئة بالتناقضات .....

فكرى كويس جدا ...واعطى نفسك قدرها ووواجهى نفسك بصراحة مطلقة ..هل انت على استعداد لتحمل كل ماسوف ينتج عن هذه الزيجة ....وامسكى ورقة وقلم واكتبى المميزات والعيوب ...بمنتهى الصراحة والدقة ...وحددى بقى انت موقفك ايه .....

وعلى النقيض ..ممكن تعيشى معاه فى سعادة اكتر ما كنت تتوقعى ......انت لوحدك اللى تقدرى تحددى .....

مع الوضع فى الاعتبار ان فيه مبدأ كده عند بتوع علم النفس بيسموه قهر التكرار ...بمعنى ان الانسان ممكن جدا لما يمر بموقف ..بيكون سهل عليه ان يعيده تانى فى ظروف تانية ......

اعملى استخارة فعلا وفكرى كويس ...وربنا يوفقك ونسمع عنك كل خير ....

[هادي]

اختنا العزيزية سهيلة

تحية طيبة

لو أذنت لي ..

سأتحدث معك بشكل مباشر جدا

حصل عندي حالة معدنية :) .. عندما قرأت مداخلتك ..

ليه ..

لان شخصيتك ونظرتك للحياة واختيارك للشريك القادم تغير 180 درجة .. فجأة

يعني من فتاة تبحث عن شخص مثالي

الى .. أن أن آآآآآآن .. كرسي ف الكلوب

مطلق ولديه طفلان !!!!!!!!!!!

فيه إيه ..

تغير شخصيتك انت هو اللي محتاج وقفة

ومحتاج مليون تفسير

مش لشخصي الضعيف - لاسمح الله -

بل لشخصك المحترم

ايه اللي حصل ؟!!!!

ايه اللي غيرك

وهل انت سهلة الاستقطاب ..

وبعدين ..

من نظرتك الى قضية الزواج من أقصى اليمين الحالم المثالي

الى أقصى اليسار .. متزوج ولديه طفلان ..

دي عملت لي ربكه ف الدركسيون فعلا !! :)

أما عن كون الانفصال حدث بشكل هاديء و بالمعروف

فهذا شيء جميل .. وهل هو متوقع يقول عن نفسه انه وحش وانه سبب المشاكل وان زوجته طيبه و صبورة وياما استحملت منه ؟! لأ طبعا

سؤالي :

انت شفتي مراته وقعدتي معاها وكلمتيها

يعني انت بتحكمي على حياته السابقة من كلماته فقط

طب بذمتك انت

وأنا راضي ذمتك

هيكون حكمك عليه أو عليها ، أو على حياته الماضية .. عادل ومنطقي و موضوعي

وانت سمعت من طرف واحد ؟!

نقطة .. لدية طفلان

في أي مرحلة عمرية .. عايشين ازاي .. بيصرف عليهم ازاي (كريم/ بخيل ) بيزورهم إزاي وامتى .. علاقته بعائلة زوجته ايه .. بل علاقته هو بعائلته ايه

هل جلست مع والدته مرة

هل تحدثت مع والده

مئات الاسئلة لابد من الاجابة الصادقة عليها

انت لازم تتعبي عشان تجاوبي عليها

ولن تجدي في أي مداخلة الحل السحري

فكلنا نحاول أن نفكر معك بصوت عال

ونحاول استكشاف الامر .. مثلك تماما

لنصل الى شيء مفيد

وقرار رشيد

وان كان رأيي الشخصي

بلا ها المشوار ده

انا مش مرتاح خالص

تحياتي وتقديري

تم تعديل 28 ديسمبر 2005 بواسطة هادي

[shawshank]

هادي ... نسيت قول الأخت سهيلة:

مش هتصدقوا وجدت هذا الشخص

...

علما بان هذة الشخصية هى ما كنت ابحث عنها طوال حياتى؟؟؟

تم تعديل 28 ديسمبر 2005 بواسطة shawshank

[سهيلة]

اخى العزيز هادى

حصل عندي حالة معدنية  .. عندما قرأت مداخلتك ..

ليه ..

لان شخصيتك ونظرتك للحياة واختيارك للشريك القادم تغير 180 درجة .. فجأة

يعني من فتاة تبحث عن شخص مثالي

الى .. أن أن آآآآآآن .. كرسي ف الكلوب

مطلق ولديه طفلان !!!!!!!!!!!

فيه إيه ..

ولا اتغيرت ولا حاجة

بصراحة انا اللى جذبنى فى شخصيتة حاجة واحدة انها شخصية رزينة ومتزنة اوى

وانا لما كنت بفكر لوحدى قولت ان الشخصية دى هية اللى كنت بدور عليها بس كلامكم دة فتح لية ابعاد تانية خالص وبالفعل لما دورت على اسباب الانفصال وحاجات تانية كتيرة لاقيت ان الموضوع مش مريحنى خالص

بالصراحة انتم نورتم المحكمة ومتشكرة ليكم خالص مش عارفة من غيركم كان ممكن يحصل اية

انتم عيلتنى التانية وربنا يخلينى ليكم

مش بيقولوها كدة برضة :mellow:

[KANE]

باعتقدي ان التعميم في مثل هذه الحالات لا ينفع

وكل واحد سيحكي من خلال ماشاهده من تجرية شخصيه أو أحد معارفه

ولا يوجد ما يمكن تسميته بالوصفه البلدي في هذه الحاله

لا حل سوى التفكير بعمق

في ورقه اكتبي نصف الورقه مزايا والنصف الآخر عيوب

يجب أن تكون كل الأمور واضحه لا لبس فيها أو تأويل

يجب أن تعرفي ايضا شئت أم رفضت أو شاء هو أو رفض سيظل هناك خيط يربط بينه وبين مطلقته

الزواج هو علاقه خاصه بين طرفين

سيفيدك رأي من تثقي برأيه (من المفيد أن تأخذي رأي واحد بينه وبين الحدث مسافه لكي يستطيع الحكم بدقه وحياديه)

وربنا معاكي :mellow:

ملحوظة

من وقع خبرتي -المتواضعه- في الحياه لا أحد يتكلم بصراحه عن اسباب الطلاق إلا فيما ندر للغايه

[بنت شعنونة]

هادي

انت في الجووووووووووووووووووووون B)

سهيلة

ها ارد عليكي بكلمة واحدا ردا على كلامك انتيييييييييي

لالالالالالالالالالالالالالالالالالالالالاءءءءءءءءءءءءءء طبعاااااااااا

ليه بقى...

1- تعرفيه بقالك قد ايه عشان تضحي بعمر بحالة عشانه؟

2- دا اعجاب غالبا وليس حب.. يعني مش ارتباط كافي للدرجة اللي يتخليه يتحمل الأعباء الكتير الجاية

3- مطلق و اولاد مش عيب ابدا لكن حمممممممممممممممممممل كبير جدا وانتي بنت بنووووووووووووووت دا مش حملك ابدا.. دا حمل اكبر منك..

4- لو خدتي راي اهلك بعد ما يشوفوا الشخص من غير ما يعرفوا انه متجوز ومطلق وبعدين قوليلهم على ظروفه بس يكونوا قعدوا معاه الأول وخليهم يحكموا بالعدل واسمعي واحكمي

5- فرصك كتير في الحياة ليه نقيتي دي؟ ها تقوليلي مش لاقيا وبتاع.. كلللللللللننننننننا خدنا وقت طووووووووويييييييييييييل على مالقينا اللي نرضى بيه ويرضى بينا اصلالالالالالالا ما تستعجليش وترجعي تندمي على الشيلة اللي شيلتيها لنفسك..

6- مش ها اعيب في الراجل بس معلش هوا طلق ليه؟ نقطة مش في صالحه نوعا ما..

ابعدي

ودوري تاني

:ninja: ما تستعجليش

انا استعجلت في ايام وكنت ها اودي نفسي ورا الشششششششششمس :blush:

[سيزيف]

الاخت الفاضله سهيله

فى مجتمعاتنا الشرقيه الزواج له ميزان دقيق

الشاب او الفتاه يتم تقييمهما عند الزواج بجموعه من المعايير الاجتماعيه : السن - الثروه - الوسط الاجتماعى - الشكل - السمعه - سبق الارتباط سواء بالخطوبه او الزواج

و عندما يتقدم شاب لفتاه يزن كل منهما الاخر بحيث يضاف لكل منهما او يخصم منه نقاطا على اساس المعايير سالفه الذكر

و انا لا ازعم ان المجتمع كله يسير على تلك الوتيره و لكن اعتقد ان الغالبيه العظمى تقوم باجراء ذلك الوزن بشكل او باخر

عوده الى موضوعك يا سهيله

بصراحه انا لا اعتقد فى عمليه الوزن الاجتماعى و لذا فانا لا اطلب منك ان تزنى فتاك و انما اطلب منك ان تتخيلى كيف سيكون شكل الحياه معه

اعلم ان حمله ثقيل

و لكن ما ذنب رجل مطلق او ارمل - قد يكون انسانا رائعا - حتى لا يجد انسانه فاضله ترضى به

ما هو الحب ؟

اوليس عطاءا و تضحيه ؟

هل تستطيعين ان تحبيه بشكل كاف لتتغاضى عن عيوبه - الاجتماعيه - ؟

تذكرى انك ايضا لست كامله و لابد ان بك عيوبا سيرضاها هو

انا لا انصحك بان تاخذيه او تتركيه

انا فقط ارجو الا تحكمى عليه حكما مسطحا

هل يمكن اختزال انسان - بكل صفاته و طباعه و ثقافته - فى كونه شخص سبق له الزواج و فشل و خرج منه بطفلين و سنوات ضائعه ؟؟

انت فقط صاحبه القرار

[ام البنات]

السلام عليكم ورحمة الله وبركاته

سؤال

انت صغيوره

والدنيا ان شاء الله امامك

ليه تاخدى واحد مر بتجربه هتخليه دايما"

يقارن بينك وبين زوجتة السابقه فى المواقف التى لا تعجبه فيك

ليه تاخدى واحد صفحته متشخبط فيها

خدى واحد انت تشخبطى فى صفحته

امال فين السبق

متخديش حد غلس عليه حد قبلك

خليك دائما الاولى فى كل حاجه

ابنتى سهيله

الزواج من مطلق صعب عليه وعليك

التجربه السابقه ستظل بينكم

رأى الفقير

بلاش المطلق صاحب الاطفال

ليه تعملى نفسك مرات أب

ليه

لا تبداى حياتك وانت عندك طفلين غالبا" سيكرهوك من مبدأ (مرات ابوك بتحبك يا جحا قال لهم تبقى اتجننت)

يعنى من الاول عندك مشكلتين

اتوكلى على الله

نصيب لم يصيبك بعد

واعتقد ان فى البيت عندك مش هيرضوا ليس لكونه مطلق ولكن لكونك هتكونى مرات اب

نصيحه من ام

ربنا يكرمك يارب بعريس تشخبطى وشه ااقصد صفحته

سلام

[الآسر]

أنا مش هاقدر أضيف شيء علي كل ما قالة الأصدقاء الأعزاء

لكن عاوز أعبر عن سعادتي بالمشاعر والحب المتبادل بين الأعضاء في المنتدي

شيء جميل أن تكون الكلمة .. مجرد الكلمة ترسم لوحات انسانية فيها كل هذا الكم من الحب

بارك الله فيكم جميعا ولن أتردد في عرض مشاكلي عليكم

لأن هذه العقول جديرة بالاحترام وهذا الحب جدير بالنهل منه والذوبان فيه

ونصيحة لكي يا سهيلة بعد دراسة كل ما قيل ان تستخيري الله رب العالمين

فلربما نكون علي حق ولربما العكس .. الله أعلم

وأنا مؤمن انه طالما لم يطرق الحب بابك فالفراق أسهل والعقل يعمل