أمنيات أعضاء المحاورات

[se_ Elsyed]

بمناسبة إنقضاء سنة 2005 بما فيها من مأسويات وكوارث وبلاوي زرقا – فعلاً أهي دي اللي يتقال عليها سنة سودا – ها هو العام الجديد يطُل علينا بما يحمله لنا من مفاجآت ... نتمنى أن تكون جميعها أو حتى أغلبها سارة ونضيفة ...

فيُسعدنا أن نفتح موضوع لتلقي أمنيات السادة والسيدات والولاد والبنات أعضاء المحاورات .. وبإذن الله سنحاول على قدر المستطاع المساعدة في تحقيقها أو على الأقل سنحولها للسادة المسئولين لتحقيقها والتحقيق فيها – خلوا بالكو من الكلمة دي - وكل واحد وضميره وكل واحد وشكل المسئول اللي هاتروح له بقى .......

------------------------

تلقينا الرسالة الأولى من العضو – الغير فاسد – سين سين .. بيقول فيها :

" يارب يارب أتمنى في سنة 2006 .. اشوف مارينجوس هو وعياله والشعب بيجري وراهم في الشارع وبيزقلوهم بالطوب وهما بيحاولوا يلحقوا أول قطر مسافر بره مصر .. وفي حين إنشغال الناس أهجم أنا على القصر السلطاني بتاعه وأنط من فوق السور .. وأدخل أشيل ما خف وزنه وغلى ثمنه وما تكونش فيه كاميرات قناة الجزيرة عشان ما يصورونيش "

وده بنقوله : يا أخ سين سين إن شاء الله سيتم تحويل أُمنيتك إلى مباحث أمن الدول لعمل اللازم

خدووووووووووووووه ...

-----------------

الرسالة الثانية تلقيناها من العضو – العامل – عصام شوقي ( 7 ش إسو سابقاً ) والعجيب إننا وجدناها خاليه إلا من الصورة التالية

وكان توقيعه

هو عالم بحالي وغني عن سؤالي

----

وده بنقوله : ليه تكتم في نفسك كده يا عصام يابني ؟ ده حتى وحش على العقل الباطن .. على العموم هاقولك كلمتين بس " منه له .. منه له .. جاي رايح منه له "

------------------

الرسالة التالية وصلتنا من أ/ عادل أبو زيد .. وبدأها بكلمة واحده فقط وهي " النزاهة " طبعاً ما فهمناش حاجة .. وردينا عليه وقولنا له تقصد إيه يا حاج عادل ؟

فأرسل لنا رسالة طويلة عريضه .. قال فيها :

أتمنى في سنة 2006 أشوف الشعب المصري نُزهي ( بس مش أقرع ونُزهي عشان الحلاقين يسترزقوا ) وأتمنى أشوف النزاهة في كل حته ... في البيت في الشارع في الحارة.. ده أنا حتى هاقترح على الحكومة تخلي أسامي المصريين كلها تبدأ بـ " نزيه .. للرجاله ... أو نزيهه للستات " يعني هايكون عندنا نزيه سين سين ... نزيه فيولين ... نزيه عطيه ( بس نزيه عطيه ده كان لعيب كوره ... يالله ما علينا ) .. وكمان هاقترح عليهم يغيروا أسامي الشوارع ويبقى عندنا شارع واحد بس واخد مصر من أولها لأخرها .. وهانسميه " شارع النُزهة " ... فرديت عليه وقولت له : أهي دي بقى أموت وأعرف تبقى إزاي ؟ فرد وقال : يابني إفهم .. إنت درست جغرافيا ؟ قولت له أيوه .. ده أنا كنت أدبي .. فقال : حلو : وشفت خريطة مصر ؟

قولت : اللهم طولك يا روح – في سري طبعاً – قولت ايوه ... قال لي : جميل .. شفت إيه فيها ؟.. قلت له شفت ودن أرنب ناحية اليمين والنيل في النص شكلة أرزق عامل زي الطريق السريع اللي مالوش أول ولا أخر .. فقالي : بس أهو ده الإستهلال اللي لابد منه .. أهو أنا بقى هافترض إن النيل ده شارع .. وهاسميه شارع النزهة .. وهاقترح إن الشعب المصري كله يسكن على النيل من أول مصر لأخرها عشان ما يبقاش في تفرقه ونعيش كلنا في نزاهة .. ...

إيه رأيك ؟

أنا قولت : خير إن شاء الله .. هانحول أُمنيتك لهيئة المجتمعات العمرانية .. وهما يتصرفوا ..

---------------

وجاءتنا رسالة مُعطرة برائحة اللافندر والزنجبيل وكانت الرسالة بتعمل مزيكا أول ما تفتحها زي الحاجات بتاعت عيد الأم .. وكانت من الزميل " مهيب " وقال فيها .. : أتمنى في العام الجديد أن أبني قصراً من الزجاج الوردي في صحراء النقب المترامية الأطراف .. وما يكونش في بلاط في القصر .. يعني يكون على الرمله .. سألته : طب ليه يابني ؟ : عشان الرملة السخنه تلسع رجلي وأحس بلوعة الهجر ... وأقعد بقى في القصر مشغل مزيكه هادية – سلو – طول النهار وأجيب قفص – مش فراخ – عصافير وأفضل أكتب في شعر وزجل وقصص قصيرة وأحلم إني طاير .. طاير .. طاير من غير جناحات عشان الريش ما يوسخش القصر ...

وكان ردنا عليه : شاعرنا المرهف الإحساس مهيب ... سيتم تحويل رسالتك إلى العصفورية – محل بيع العصافير ... مشوها كده المره دي – لتزويدك بعدد واحد قفص عصافير كناريا ... وبالنسبة لموضوع صحراء النقب فده عايز قاعده لإن شارون طرف في الموضوع ...

-------------------------------

الرسالة اللي جايه دي وصلتنا على هيئة ملف فيجول بيزك ... وهي من الزميلة العزيزة جيجي الشهيرة بمصرية الهوا – هوايا – وقالت والدمع في عينيها :

أتمنى في سنة 2006 إني ألاقي طاقية الإخفاء .. وروح لابسها وما حدش يشوفني .. وبعدين أروح طالعه على أول الطريق الزراعي اللي بيوصل بين الرياض والقصيم .. وبعدين لو لقيت عربية الدكتور بتاع نُظم التشغيل جاي من بعيد أروح رامية خشبة فيها مسامير تحت العربية .. هايروح العجل مبنشر .. هاينزل هو ومعاه الكوريك عشان يغير العجله .. أروح خطفه منه الكوريك وخبطاه واحده على نفوخه أعمله تربنه .. وبكده هاينجحونا بالتزكية في المادة دي .. وبكده برضوا أقوم متخلصة من الدكتور الغلس أبو دم تقيل على قلبي .. ولا من شاف ولا من دري .

----------------

أما الرسالة التالية .. فجاءتنا مكتوبة على ورقة لحمه .. طبعاً عرفتوا هي من مين ؟ وقال فيها :

أتمنى تيجي فِره تاخد الفراخ البيضا اللي في مصر كلها .. عشان الناس ما يبقاش قدامها إلا إنها تاكل لحمه .. وساعتها أحتكر السوق ... وأرفع سعر البتلو من 28 إلى 45 .. والضاني أبو عضم من 25 إلى 32 والمشفي من 29 إلى 41 ... وأحط رجل على رجل وألم الغله بقى ...

وكان ردنا عليه : زميلنا العزيز المعلم تابلي ... ربنا ما يحكمك على ولايه ... يا معلم الضرب في الميت حرام .. هي الناس لاقيه رجول الفراخ لم هاتورح تشتري لحمه من أم 45 .. ده ساعتها ممكن تلم فلوس من الناس اللي هاتبقى نفسها تتصور جنب الفخدة من دول ..

يُتبع

[se_ Elsyed]

أما الرسالة الحمراء التالية فقد وصلتنا من الزميل ماركيز .. وقال فيها :

" أتمنى أن يعُم المد الثوري الشيوعي أرجاء المعمورة .. وأن أرى المطرقة والسندان فوق نافوخ كل نفر

.. وأن يعتلي الرفيق فلاديمير بوطين سُدة الحكم في مصر .. وأن تقوم الدولة بحملة تأميم لممتلكات الرأسماليين البورجوازيين المتعفنيين وإنت عارفهم هما مين يا سين سين "

وكان ردنا عليه : أيها الرفيق ماركيز .. لقد دقت ساعة العمل الثوري .. وبإذن الله ربنا يحقق لك أمانيك ......بس تكون بعيد عن مصر .. فالمشرحة مش ناقصة قُتله .

----------

أما الرسالة الظريفة التالية .. وصلتني وهي مكتوبة على ورقة كراسة ... وكان مُرسلها .. إبننا الغالي فيولين كنج وكتب فيها

" أونكل ثين ثين ... أتمنى السنة الجاية إني أتخرج من المعهد العالي للعزف تحت الماء .. وأبقى قائد أوركسترا آلات نحاسية .. وأجيب بدلة بديل زي بتاعت سليم سحاب .. وأمسك في إيدي شومه أقود بها الأوركسترا .. واعمل حفلات بقى في الفنادق والنايت كلبس وكده وأتشهر .. والبنات ترمي عليه دباديب وأرانيب زي كاظم .. ويتهبلوا عليه ويغم عليهم أول ما يشوفوني جاي من بعيد لابس البدلة أم ديل ... وأعيش بقى ..

وكان ردنا عليه : إبننا فيولين ... لازم تبدأ السلم واحده واحده .. يعني الأول تبقى ظابط – إيقاع – وبعد كده رقاق .. وبعد كده بودي جارد ورا أي مُطربة .. ولما تاخد خبرة تبقى تفكر في البدلة أم ديل ... على العموم رسالتك دي هانوصلها لطنط رتيبة الحفني اللي أنا متأكد إنها مش هاتدخر جُهد عشان تظبطك .

------

أما الرسالة الدسمة التالية فكانت مشتركة .. يعني في إتنين مخمسين في كتابتها .. وهي من بودا وشاعر الرومانسية وقالا فيها :

نتمنى في العام الجديد أن يتوصل علماء الهندسة الوراثية إلى تهجين ديك رومي يكون بتلات أوراك .. ويكون في حجم الخروف ... وكمان لما ندبحه يكون في طعم البطاطس .. وساعتها بقى نهيص ونعمل صواني رقاق بالديك الرومي المُعدل ده مع شوية رز بالشعرية جنب طبق شوربة باللمون مع حتتين بتنجان مخلل من اللي ما بينمناش بالليل وجنبه صنية كنافة بالقشطة ... يا عيني يا عيني ...

وكان ردنا عليهما : سامحكما الله يا بودا أنت وشاعر الرومانسية ياللي بتجروا ريقنا وتخلونا نجري وراه لحد ما يتقطع نفسنا ..

يُتبع

[se_ Elsyed]

أما الرسالة الحالمة التالية فوصلتنا من الشاعر " هشام الجنيدي " وقال فيها :

" نظرة يا وزارة الثقافة .... نظرة يا أم هاشم .... يا عالم ياهوووو .. هامووووت والاقي ديوان من دواوويني مطوبعين يا ناس ..... إن شالله يتلقحوا على الأرصفة وما حدش يشتريهم .. بس تنطبع لي حاجة ... أأأأأأأأأأف "

وكان ردنا عليه : حنانيك يا أستاذ هشام .. بإذن الله نتوقع أن ينكشح فاروق أبو حسني وييجي بداله وزير ثاقفة مُحترم ويطبع لك كل دواوينك .. مش بس كده .. دي الأشعار بتاعتك لو كانت جامده ممكن يدرسوها للعيال في المدارس كمان ... إبسط يا عم

-------------

أما هذا الإيميل فجاءنا من أختنا بنت مصرية وقالت

" نفسي أغمض عيني وأفتحها الأٌقي مادا كِبر .. وبيقولي يا ماما قومي إلبس وتعالي عشان عايز أخطب بنت زميلتي في الحضانة .. وقلبي يزقطط من الفرحه .. وأروح معاه ونخلص الموضوع في قاعده واحده .. وبعد شهر يتجوزوا .. ويعيشوا معايا في الشقة .. وأعيش أنا في دور ماري منيب وأمسك البت أعذبها وأوريها القرد مخبي إبنه فين ... أيوه ما هو مش بعد ما أسمن وأزغط وأكبر تيجي واحده تاخد الواد مني عالجاهز "

وكان ردنا عليها : يا ست ماري .. قصدي يا أم حماده .. تلك هي سُنة الحياة يا أختاه .. خلي الواد يعيش حياته .. وإنتي كمان عيشي حياتك .. ويا بخت من زار وخف ...

--------

الرسالة التالية وصلتني في أربع صُفح فلوسكاب من الحجم الكبير A3 وكانت من زميل الكفاح الدكتور محبط الشهير بملك المنتديات .. وقال في تلك العريضة

" أنا نفسي ييجي عليه عام 2006 وأنا ضارب بتاع 22 منتدى إيشي فكاهة على سياسية على إقتصاد .. كله كله .. وأقعد أنا بقى حاطط رجل على رجل ومعايا الشيشة وأعمل فيها ملك زماني .. وهاخلي دخول المنتديات دي مجاناً .. لكن الخروج بخمسة جنيه ...

-----------------

أما الرسالة التالية فلم أستطع أن أتبين كل ما فيها لإنها كانت مبتلة بالدمع ولكن بالخبرة إستنتجت فحواها - حلوه فحواها دي - وكانت من زميلي الضرب الباشمهندس موديست .. الذي قال وعيناه تغرورق بالدموع :

" ما تتلأمش عليه يا سين سين .. إنت عارف أنا بأتمنى إيه ... يارب يارب يا منتقم يا جبار .. نفسي أشوف في الأهلي يوم زي يوم الـ 6/1 .. وساعتها ندراً عليه دستتين شمع لمقام سيدي مرتضى .. وكمان هانزل بعربيتي شارع التحلية وأخده تفحيط رايح جاي وأنا معلق علم الزمالك فوق الكبوت "

ورددنا عليه وقلنا له : عزيزي موديست .. ما فيش حاجة بعيدة على ربنا .. وخلي إيمانك قوي ... ويا سيدي أهو لو غلبتونا مره ( بعد الشر بعد الشر ) .. أهو يبقى من الرصيد .. فحسابكو تقل قوي يا مودي :)

يُتبع

[الرافعي]

أما الرسالة التالية .. فجاءتنا مكتوبة على ورقة لحمه .. طبعاً عرفتوا هي من مين ؟ وقال فيها :

أتمنى تيجي فِره تاخد الفراخ البيضا اللي في مصر كلها .. عشان الناس ما يبقاش قدامها إلا إنها تاكل لحمه .. وساعتها أحتكر السوق ... وأرفع سعر البتلو من 28 إلى 45 .. والضاني أبو عضم من 25 إلى 32 والمشفي من 29 إلى 41 ... وأحط رجل على رجل وألم الغله بقى ...

وكان ردنا عليه : زميلنا العزيز المعلم تابلي ... ربنا ما يحكمك على ولايه ... يا معلم الضرب في الميت حرام .. هي الناس لاقيه رجول الفراخ لم هاتورح تشتري لحمه من أم 45 .. ده ساعتها ممكن تلم فلوس من الناس اللي هاتبقى نفسها تتصور جنب الفخدة من دول ..

يُتبع

<{POST_SNAPBACK}>

ترررررم ترررررررررررررم

آلو ... معالي الباشا

مساء الخير يا باشا

أهلاً يا معلم .. فينك وفين التموين الأسبوع ده

تحت أمر معاليك يا باشا ،

أنا بس كنت مكسوف من سعادتك عشان اللحمة آخر مرة ما عجبتكش

لا ابعت انت ومالكش دعوة

من عينيا يا باشا .. المهم الست تكون مبسوطة وراضية علينا

آه يا سيدي.. بس مش راضية علينا إحنا

(يضحك تابلي في خبث) ثم يسعل سعلة خفيفة ليداري الضحكة (الظاهر مفيش نتيجة)

بتقول حاجة يا معلم

.. ما نستغناش يا سيدنا وتاج راسنا .. بس كان فيه طلب صغير

اأمر يا سيدي .. ما انت اللي مرضيتش تترشح المرة دي على مبادئ الحزب

لا يا سيدنا الموضوع مش كده

هو في الحقيقة .. أنا كنت بالف طلب (مواسير) لواحد من محدودي الدخل الجرابيع

ولقيت مكتوب عليه موضوع ولا مؤاخزة عن سعادتك

وكاتبه واحد من العيال ، اللي طالعين اليومين دول قال إيه في مجاورات ، مجاوزات ، جوزات المصريين

مين ده يا معلم .. وقال إيه انطق بسرعة .. المدام سامعانا على الخط التاني (زي العادة)

بيقول يعني ولا مؤاخذة .. ولا ماخذة يعني .. آآآآآ بيقول ....

ما تنطق يا بني آدم

بيقول لا مؤاخذة كلام كده ما يتقالش على آل إيه الكنترول وعمليات الكنترول ...

...يصمت الباشا ... ويفرك في ذقنه ... ويغلق السكة في وجه المعلم

وعلى الخط التاني يتصل بواحد من تلاميذه القدامى المخلصين

ويكلفه بمهمة عاجلة ...

(عملية كنترة عاجلة للمدعو س.س)

[bentmasria]

أما هذا الإيميل فجاءنا من أختنا بنت مصرية وقالت

" نفسي أغمض عيني وأفتحها الأٌقي مادا كِبر .. وبيقولي يا ماما قومي إلبس وتعالي عشان عايز أخطب بنت زميلتي في الحضانة .. وقلبي يزقطط من الفرحه .. وأروح معاه ونخلص الموضوع في قاعده واحده .. وبعد شهر يتجوزوا .. ويعيشوا معايا في الشقة .. وأعيش أنا في دور ماري منيب وأمسك البت أعذبها وأوريها القرد مخبي إبنه فين ... أيوه ما هو مش بعد ما أسمن وأزغط وأكبر تيجي واحده تاخد الواد مني عالجاهز "

وكان ردنا عليها : يا ست ماري .. قصدي يا أم حماده .. تلك هي سُنة الحياة يا أختاه .. خلي الواد يعيش حياته .. وإنتي كمان عيشي حياتك .. ويا بخت من زار وخف ...

ططااااايب ياسى السيد

لا ححمر لك عنيا ولا حتى فرخة نيه

وحعتبر كل اللى فات ده ولا حصل من اصله وبكره نشوف ام عمر وعلى حتعمل ايه فى عرايس الامامير وانت شخصيا حتغير من عرايس بناتك عليهم وموش بعيد تعمللهم زيارات مطوله عشان تطمن على طريقة الطبخ واسلوب التقديم

بس بصراحة كأنك دخلت قلبى

نفسى اشوف حماده بخير وعافيه ولو طلبت العمر من ربنا يبقى عشان اشوفه ولد صالح يدعى لى يارب بعد وفاتى المهم كل سنة والجميع طيب وبخير ويارب ياسى السيد انت وكل الغاليين تتحقق امانيهم للسنة الجديدة ربنا يسعدكم يارب

[صفاء]

يا سلام يا واد يا عبد الظاهر لو كنت نجحت فى الابتدائية واخدت الاعدادية ونجحت فى الثانوية ودخلت كلية التب

كان زمانك بقيت داكتور بصحيح مش تومرجى فى العويادة :)

الحقيقة انا اتمنى انى اناقش بقى يا عاااااااااااااااالم الدكتوراة فى يوليو الجاى

وكمان ابنى حودة يبطل زن أحسن قربت يجيلى صرع " خمس سنين على الحال ده "

وكمان بقى ايه بقى اتمنى كده ان فجأة نصحى نلاقى شوطة اخدت البعدا مرة واحدة

وكمان .... وكمان ... يهد اللى فى بالى " ودول كتير "

وينزل عليا بتاع 10 مليون جنيه ولا خليهم 15 عشان الدنيا غليت قوى

ونفسى كمان انشرلى حتة ديوان صغنن من غير ما ادخل بسببه ابو زعبل

وكفاية كده عشان القناعة كنز لا يفنىىىىىىىىىى

:D

[سهيلة]

انا بقى نفسى جورج قرداحى يحن علية ويبعت لى ف مسايقة من سيربح المليون

لا دول بقوا 2 مليون دلوقتى

واكسبان شاء اللة مليون ونص كفاية اوى

واعمل المستشفى الخاص اللى نفسى فيها وابقى اخد الباقى قروض من البنوك مش مهم :)

واجيب جهاز الليزر اللى هيجننى دة :)

ووعد هعالج كل الفقرا والمحتاجيين ببلاششششششش

[سيزيف]

الاخ العزيز سى السيد

على الرغم من اهميه موضوع الامانى الا ان حضرتك قلبته تهريج

و انا مضطر عشان اضفى على الموضوع بعض الجديه ان اعبر عن بعض الامانى البسيطه السهله التى اتمنى ان تحدث فى عام 2006

--------

- سداد جميع ديون مصر و انقلاب الميزان التجارى بين مصر و بين كل من امريكا و اليابان و جميع دول الاتحاد الاوروبى لصالح مصر

- نشر الخبر التالى فى جريده بنج هنج فنج الصينيه : استقاله وزير الصناعه الصينى نتيجه فشله فى مواجهه اغراق السلع المصريه للاسواق الصينيه

- الحكومه المصريه توجه نداء الى المواطنين : الاخوه المواطنين نرجوكم بشده التخفيف من انكبابكم على العمل - " حلوه اكبابكم دى ؟؟ " - و نرجوكم الحصول على اجازات اكثر حيث بينت الدراسات ان متوسط ساعات عمل المواطن المصرى ثمانى ساعات فى اليوم

- مصر تكتسح عالم الفضاء بعد تمكنها من ارسال اول رواد فضاء مصريين الى كوكب المريخ

- الكونجرس الامريكى يطالب الحكومه المصريه بزياده المعونات المصريه

- فوز مصر بكاس العالم لكره القدم 2006 المقام فى المانيا " ملحوظه للاخوه غير المتابعين لكره القدم : مصر لم تتاهل لكاس العالم 2006 اساسا

---

شفت بقى يا سي السيد الامانى الامانى بتاعتى متواضعه قد ايه ؟

اشوفك بين القصرين ان شاء الله

:)

[se_ Elsyed]

ووعد هعالج كل الفقرا والمحتاجيين ببلاششششششش

<{POST_SNAPBACK}>

أهو عشان كده جورج لا هايبعت لك ولا حتى هايصبح عليكي ...

إنتي ناسية يا دكتورة إن ورانا مصاريف تشغيل وإيجار بيندفع أول كل شهر وفواتير كهرباء وأجور السباكين اللي بييجوا يعملوا صيانة لأسلحة الليزر ...

طب قولي نعالج الناس بتكاليف مخفضة ؟

وبعدين خلي بالك أنا بقى لي 4 شهور شغال تومرجي معاكي وما قبضتش وسيادتك عماله تصرفي على الفقراء وناسية إن معاكي واحد قرب يبقى صومالي من كثر الفقر ..

-----

شاين كورنر يا حبيبي ... علي صوتك بالغُنا لسه الأماني ممكنه ..

فوز مصر بكاس العالم لكره القدم 2006 المقام فى المانيا " ملحوظه للاخوه غير المتابعين لكره القدم : مصر لم تتاهل لكاس العالم 2006 اساسا

ما فيش حاجة بعيده عن ربنا

فمن هنا لحد شهر 6 .. يحلها الحلال ... فممكن ساحل العاج تُعلن الحرب على الكاميرون .. عشان فيه واد كاميروني إصطاد فيل عاجي من مزرعة واحد جاره ... والإتنين ينزلوا عجن في بعض وتقوم القوات المسلحة من الدولتين مستدعية قوات الإحتياط اللي من بينهم اللعيبه .. يقوموا الإتنين يعتذروا عن الذهاب لألمانيا .. يقوم الدور ييجي علينا .. نقوم رايحين وفايزين بكأس العالم ... زي الدنمارك ما عملتها في أمم أوروبا 92 بعد ما استبعدوا صربيا بسبب العقوبات ولموا اللعيبه الدنماركيين من على القهاوي وراحوا شالوا الكاس ..

تيجي بقى إنت تمثل دور الكاميروني ..وأنا أمثل دور الفيل أبو زلومه وأتبلى عليك وأقل إن شاين كورنر قتلني عشان ياخد الأنياب بتاعتي يعملها تمائم وأيادي سكاكين ؟ وبكده نكون وقعنا الدولتين في بعض

[سهيلة]

وبعدين خلي بالك أنا بقى لي 4 شهور شغال تومرجي معاكي وما قبضتش وسيادتك عماله تصرفي على الفقراء وناسية إن معاكي واحد قرب يبقى صومالي من كثر الفقر ..

حضرة الحكيم باشا سى السيد

تعالى هنا

انت قاعد تشنع على العيادة وتقول ان مش بديك مرتب

وانت زى القطط بتاكل وتنكر :)

قاعد طول النهار تقبض من العيانين اشى مستعجل واشى عادة واشى ابيض واسود واشى ملون

وكل دة بيوصلنى اول باول

بقولك اية كلام ف سرك

احنا لازم نقسم بالنص mfb:

[وليد صفوت]

أما الرسالة الظريفة التالية .. وصلتني وهي مكتوبة على ورقة كراسة ... وكان مُرسلها .. إبننا الغالي فيولين كنج وكتب فيها

" أونكل ثين ثين ... أتمنى السنة الجاية إني أتخرج من المعهد العالي للعزف تحت الماء .. وأبقى قائد أوركسترا آلات نحاسية .. وأجيب بدلة بديل زي بتاعت سليم سحاب .. وأمسك في إيدي شومه أقود بها الأوركسترا .. واعمل حفلات بقى في الفنادق والنايت كلبس وكده وأتشهر .. والبنات ترمي عليه دباديب وأرانيب زي كاظم .. ويتهبلوا عليه ويغم عليهم أول ما يشوفوني جاي من بعيد لابس البدلة أم ديل ... وأعيش بقى ..

وكان ردنا عليه : إبننا فيولين ... لازم تبدأ السلم واحده واحده .. يعني الأول تبقى ظابط – إيقاع – وبعد كده رقاق .. وبعد كده بودي جارد ورا أي مُطربة .. ولما تاخد خبرة تبقى تفكر في البدلة أم ديل ... على العموم رسالتك دي هانوصلها لطنط رتيبة الحفني اللي أنا متأكد إنها مش هاتدخر جُهد عشان تظبطك .

[ناصر الملك و الملكية]

نفسي ربنا ياخد ***** و شلة الألاضيش الحواليه :)

و أصحي ألاقي مهدي عاكف قاعد علي الكرسي mfb:

إيه يا ناصر .. إصحى شويه

سي السيد

تم تعديل 29 ديسمبر 2005 بواسطة se_ Elsyed

[KANE]

انا حلمي بسيط

نفسي اسهال محطات الإغاني واسهال المحطات العراقيه على النيل سات يقف

نفسي اشوف محطه عربيه زي دسكفري

نفسي اشوف حريه بجد

نفسي اشوف عمل بجد

نفسي العدل يرجع تاني على المستوى المحلي والدولي

نفسي اشوف مائة مدينه جديده في مصر زي مدن الناس مدن فيها شوارع واسعه والبيوت دورين بس وفيها جناين

نفسي ......

نفسي اعيط :)

[KANE]

[khedr]

نفسي اعيط  :mellow:

<{POST_SNAPBACK}>

وانا كمان ....

عايز اعيط

بس دموعي تنزل...!