دعوة للمشاركة فى التأمين الصحى بالنقابات

[عادل أبوزيد]

الإشتراك فى المشروعات الصحية أو العلاجية بالنقابات يبدو غير مغرى للكثير من الناس من ناحية فرق التكلفة أو نسبة مشاركة النقابة فى تغطية مصاريف العلاج.

الحقيقة غير ذلك بالمرة ....

ما سبق كان إستهلالا لابد منه

و الواقع أن معظمنا - بما فيهم أنا إلى عهد قريب - كنت أقول ماذا تعنى 20% تخفيض فى تكلفة أشعة مثلا تكلفتها 150 جنيه - مجرد مثال - مع ضرورة الحصول على موافقة أو تحويل من طبيب مشترك فى النقابة ؟

ببساطة "العملية ما تستاهلش"

لكن الحقيقة أن النقابات تستخدم قوتها التعاقدية فى الحصول على أسعار منخفضة لأعضائها من المستشفيات و مراكز التحليل و الأشعة

ففى مثالنا السابق لمجرد أنك عضو فى النقابة و مشارك فى مشروعها الطبى يكون سعر الأشعة لك 80 جنيه بدلا من 150 جنيه و إذا ذهبت لعمل الأشعة بتحويل من طبيب أو مستشفى مشاركة فى النقابة يتم خصم ال 20% من هذا السعر الخاص بأعضاء النقابة فتكون الأشعة بالنسبة لك هى 80 جنيه - 20% = 64 جنيه بدلا من 150 جنيه

هذه المعلومة لا يعرفها الكثيرين و أدام الله عليكم نعمة الصحة و حرصت أن أنقلها لكم

و أدعوكم للحرص على المشاركة فى التسجيل فى المشروعات الصحية للنقابات و كذا المشاركة للوالدين و الأسرة كلها لأن مشاركتك تساهم فى مقدرة المشروع على تقديم خدمات لأعضاء النقابة و فى نفس الوقت تستفيد من القوة التعاقدية للنقابات.

[ريمونتى]

انا فعلا مشتركة

بس حد يعرف لو ليا خصم تبع نقابة زوجى 50%

و تبع نقابتى 60%

ممكن يتعملى خصم من الجهتين على نفس الحاجة؟

يعنى فى حالة ولادة مثلا المستشفى ترضى تعملى خصم كزوجة و ترجع تعملى خصم كعضوة؟؟؟؟

[سكر]

المشكله مش فى نسبه الخصم اعتقد لو حتى الخصم 5% فانت اولى به واديك بتدفع التامين كل سنه وخلاص

المشكله الكبرى هى اجراءات هذا الخصم

اجراءات معقدة للغايه ممكن تخليك تكره اليوم الى فكرت فى التامين اصلا

لانها بتتعامل مع المواطن على انه فاضى مفيش حاجة غير انه يجرى روح لده وهات امضى من ده عشان خاطر 20%

وفى الاخر تكتشف ان اتحرق دمك وضيعت وقت اكثر بكثير من 20% غير انك لازم تكون تبع جهات محده بالاسم

السوال الى نفسه اساله بقى

ليه التامين فى السعودية وخاصه وانا مشترك مع شركة بوبا بيوفر الخدمة بانك تدفع فقط 20% من الخدمة والعكس صحيح فى مصر

يعنى انت فى مصر بتدفع 80% ليه

الصراحة تجربه التامين الصحى لى فى السعودية اكثر من رائعة بحس بامان وسهوله فى الاجراءات وبكون عارف هدفع كام فى الكشف

بغض النظر عن كفائه الاطباء

فى مصر الموضوع معقد بشكل رهيب مش عارف ليه ؟؟؟؟؟؟؟؟؟؟؟؟؟؟؟؟؟؟؟؟؟؟؟

واخر معلومه عرفتها من نقيب الاطباء ان مشروع التامين الصحى فى مصر بدات مناقشته فى مجلس الشعب من الستينات

على العموم هانت

[Handasah]

التأمين الصحى للنقابات روتينى الى حد ما ولكنة مفيد فى احيان كثيرة ويشمل عضو النقابة وايضا الزوج او الزوجة والاولاد وايضا الأب والأم ولكن تتبع النقابات اجراءات معقدة جدا و تكون تبع جهات محده بالاسم لكن من ناحية الاسعار والقوة التعاقدية فهم يعملو جاهديين على تقليل الاسعار لاعضاء النقابات لكن المشكلة الكبرى ان فى اشياء كثيرة تكون خارج تغطية النقابة . لكنها بوجه عام مفيدة لعضو النقابة جدا .

[sarmar]

لاخوة الافاضل / السلام عليكم

نعم ان موضوع التامين الصحى فى مصر يحتاج الى تطوير ومفاهيم جديدة غير المعقدة التى نتحرك من خلالها سواء كان التامين الصحى تابع للحكومة او تامين خاص او تبع نقابات او مؤسسات

لوايح وقوانين التامين الصحى منذ ان صدرت اعتقد منذ اكثر 30 عاما وهى لم تتغير وايضا ظل التامين الصحى الحكومى فى مكانة منز ان تم انشاؤة نعم انة يتوسع كما ولكنة لم يتطور كيفا ولا الوم علية فمهما كان قيمة اشتراكنا الذى يستقطع من رواتبنا فانة لايكفى اى شىء لايكفى ان يفى التامين نحونا باى شىء طبى بل اوجة الشكر للقائمين علية انة للآن مازل يقوم بعمل شىء

نعم نحن غير راضون عن هذا الشىء وانة مثل عدمة ولكن عندنا قاعدة وركيزة ممكن ان نبدأ فى تطويرة

ان التامين الصحى منذ ان بدأ الزعيم اراحل جمال عبد الناصر والى الان يعتبر من اقدم الانظمة التامينية بمنطقة الشرق الاوسط بل وكان رائد فى هذا المجال

الان للاسف اصبح لاتامين ولاصحى ولن تقوم لة قوامة الا بالدعم المادى تعالى نتحدث بصراحة بدون الاعتماد على الحكومة فى شىء تعالوا نعتمد على انفسنا حتى نستطيع انقاذ هذا الصرح الذى يكاد ان يتهاوى

لابد من المطالبة بدعم التامين الصحى ولن نمانع فى ان نشارك نحن ايضا بدعمة بالصورة التى تراها جهات الاختصاص مناسبة

ياخواننا اذاكان التامين الصحى الخاص بالنقابات موجود فانة يخدة فئة بسيطة جدا بجانب تعداد الشعب المصرى

ياخواننا ان اهم شىء هو الصحة فعلا اهم من كنوز العالم لماذا لانساهم جميعنا فى تنمية وتعضيد التامين الصحى وجعلة على اعلى مستوى

اذا عينتم اعتى الاشخاص سواء كان وزير او غيرة لن يستطيع تطويرة الا بالتصريحات فقط ان اى انسان مسؤؤول عن هذا الصرح المفترض ان يكون على خبرة جيدة ومهارة بادارتة نطلب لة دعما او ترعا او اى شىء تريدون تسميتة حفاظا على انفسنا وحفاظا على صحتنا

الموضوع جدا خطير ياحبابى و للعلم مافى منا احد لايعرف ناس يمرضون ولايملكون اجرة اى طبيب يذهبوا الية فى الوقت التى انهالت علينا فية الاوبئة والامراض من كل حدب وصوب

تعاونوا واشتركوا على دعم وتقوية تاميننا الصحى لانة ملكنا جميعا وملاذنا ايضا

[ريمونتى]

التأمين الصحى ؟؟؟

انا مش ممكن اصلا أروح التأمين الصحى بتاع الجامعات و المدارس و كده

ده اذلال فى حد ذاته

ممكن تقولوا اصل انتى عندك فلوس تتعالجى

غيرك لأ

صحيح انا اقدر اتعالج خارج التامين بس فى حدود يعنى

و بعتمد على التامين اللى تبع النقابة فى تخفيض سعر التحاليل و الأشعة بصراحة

بتفرق معايا كتير

لكن التأمين الصحى التانى ده

ربنا ما يكتب عليا اتعامل معاه

[doha]

التامين الصحي على حسب النقابة نفسها الي مشترك فيها ..

مثلا نقابة الاطباء بتدي تامين صحي ( مشروع علاج الاطباء واسرهم ) فوق الممتاز وبيخفض فعلا من تكاليف العلاج خاصه بالنسبة للاشعات والتحاليل .. يستحق ان الواحد يشترك فيه ..

بينما نقابات ثانيه زي التجاريين مثلا او الزراعيين الي الاشتراك فيها مش اجباري بالمناسبة وبالتالي فالخدمات الي بتقدمها تكاد تكون غير موجوده اصلا دول مفيش فائده بتعود من التامين الخاص بيهم الا خصم كام جنيه من ثمن التحاليل ..

اذكر من كام سنة كنت بشترك في النقابة وسألت الموظف هناك عن الفائده الي هتعود علي من التامين فقالها لي على ( بلاطه ) احنا بنخفض نسبه من تكاليف العمليات مثلا نقول 30 في المية وبالتالي فالمستشفى اصلا هتكتب لك فاتورة زايده 30 في المية عشان تاخذ حقها في النهاية وهو مبلغ العملية زي ماهو ..

الحكاية دي كانت موجوده في النقابات ( الصغيره ) بس مش موجوده في نقابة الاطباء او المحاميين او المهندسين ( الثلاث نقابات المحترمين في مصر من ناحية المزايا المقدمه للاعضاء ) لان النقابات الاخيرة دي بتدفع فعلا للجهات الفرق مابين تكلفة العلاج والمدفوع من قبل المريض . . معرفش الوضع في النقابات التانية مازال هو نفسه ولا لاه لاني بصراحه بطلت ادفع الاشتراك من يجي عشر سنين لما اكتشفت اني مش بستفيد شيء نهائي منه ( 80 جنيه كل سنة من يوم ماتخرجت وباذن الله هيصرفوا لي معاش بتاع 70 جنيه كده كل شهر لما يبقى ربنا يأذن واطلع معاش )

برضه هنلاقي بعض النقابات بتشترك في اماكن ( نظيفة ) كده كده كنت هتروح تتعالج فيها والبعض التاني بيشترك مع اماكن مغموره عمر ماحد يفكر يروحها اساسا وفوق كل ده نسبة الخصم الي هتحصل عليها ( كلام فاضي ) مقارنة بالدعاية الي بتحصل للاماكن دي لما تاخذ الحق الحصري لعلاج الاعضاء ..

الآلية الي بيتم بيها التامين ان العضو يدفع اشتراك النقابة اولا ومن ثم مبلغ بسيط كاشتراك في التامين .. العضو نفسه بياخذ نسبة خصم كبيرة على حسب النقابة بتاعته كذلك زوجته لها تقريبا نفس النسبة .. برضه الام والاب بياخذوا نسبة خصم اخرى اقل شويه كذلك الابناء لهم نسبة خصم ولكن اقل من نسبة الخصم للعضو نفسه .. بيسلم للعضو كارنية عضوية بصورته وبعض الاستيكرات الخاصه بالكشف في عيادات الاطباء الخاصه ( يعني عدد محدود من مرات الكشف لكل عضو )

الي محتاج تحاليل او اشعات لا قدر الله بيروح على معمل التحاليل المعتمد ويقدم كارنية العضوية في مشروع العلاج وبياخذ الخصم فوري .. اما في حاله الكشف في عياده فكل مرة بيروح العضو يكشف بيدفع جزء من ثمن الكشف فقط والباقي بيسلم بداله احد الاستيكرات او ( تذاكر ) الكشف الي سلمت له .. في حالة العمليات لا قدر الله بيتم اخذ موافقة من النقابة اولا على تحملها تكاليف العلاج .. وكل ده طبعا لمنع التلاعب من قبل الاعضاء انهم يعملوا زيارات وهمية للاطباء مجاملة لهم بحيث يحصل الطبيب ثمن كشوفات هو مقامش بيها ..

عن نفسي ( بحلم ) باليوم الي يطبق فيه التامين الصحي في مصر على الشعب كله مش عن طريق نقابات .. التامين عشان يتقدم صح ويعمل نسبة خصم تستاهل يبقى لازم يكون العدد المشترك فيه كبير بل وهائل عشان تغطي قيمه الاشتراكات تكاليف العلاج .. لو تم انشاء نظام تاميني بيحصل اشتراكات من ملايين المصريين اعتقد ساعتها ممكن تبقى الخدمه الطبية المقدمه بسعر في المتناول وجوده تخلي الواحد ( يعيى وهو مطمن ).

[rewsha]

انا فعلا مشتركة

بس حد يعرف لو ليا خصم تبع نقابة زوجى 50%

و تبع نقابتى 60%

ممكن يتعملى خصم من الجهتين على نفس الحاجة؟

يعنى فى حالة ولادة مثلا المستشفى ترضى تعملى خصم كزوجة و ترجع تعملى خصم كعضوة؟؟؟؟

الاخت ريمونتى

معلش احنا بنتكلم ........

هل قصدك انك تاْخدي نسبة خصم نقابتك اللي هيه 60% +نسبة خصم نقابة زوجك اللي هيه 50% مع بعض؟

بمعنى؟

60% +50% =110%

يعني افهم من كده انك تروحي المستشفى تولدي و بعد ما تقومي بالسلامه تقوليلهم .....انا عاوزه ال10% الباقيه اللي ليه عندكم؟؟؟؟؟؟؟؟؟؟؟

وله انا فهمت غلط!!!!!!!!!!! :)

[ريمونتى]

الأخت روشا

هههههههه

لأ انا متنازلة عن ال 10 % بس خلاص وجهة نظرك وضحت لى خلاص

و شكرا على ردك يا قمر

:rolleyes:

[بندق أفندى]

بنفس الفكر كنت أشترك فى صندوق اجتماعى للشركة التى كنت اعمل بها .. وانا أعرف انى لن استفيد منه .. وكان يخصم على مبلغ شهرى لمدة عشر سنوات لم استفد منها شيئا .. ونفس الشئ أشترك التامين الصحى لنقابتى فى مصر وانا لدى تامين طبى شامل تبع جهة عملى .. لكن الفكرة انها حاجة تعاونيه تقدم لغيرك حتى لو لم تستفد طالما انت قادر

[عادل أبوزيد]

.. لكن الفكرة انها حاجة تعاونيه تقدم لغيرك حتى لو لم تستفد طالما انت قادر

أتفق معك تماما و هذا هو محور الموضوع من البداية من خلال النقابة تحصل على أسعار منخفضة أنت و غيرك من أعضاء النقابة و هذه الأسعار المنخفضة هى إنعكاس للقوة التعاقدية للنقابة هذه القوة التى تتمثل فى عدد أعضاء النقابة ، و بالنسبة للمشروعات الطبية للنقابات فإنها تحدد سعرا معينا للكشف عن كل مستوى من الأطباء كما أنها تحدد سعرا معينا لكل من الخدمات الطبية الموجودة فى السوق و تحدد قيمة مساهمة المشروع الطبى للنقابة فى هذه الخدمات.

و لاحظ أننا نتكلم هنا على مستوى أعضاء النقابات و على مستوى المشروعات الطبية للنقابات.

بالنسبة للتأمين الصحى العام فى مصر فإن هناك مبلغ أو نسبة معينة من المرتب تستقطع إجبارا من كل من العاملين فى الدولة أو القطاع العام و هذه النسبة يتم لتغطية معاش نهاية الخدمة و كذا الخدمات الصحية و إسمها تأمينات إجتماعية و أظن أن صاحب العمل يدفع ما يوازى ضعف ما يدفعه العامل و فى مقابل ذلك فإن العامل يتقاضى معاشا عند إحالته للمعاش و هذا المعاش - معاش التقاعد - يتزايد بمعدل 10% سنويا !! و هذا التزايد السنوى لا أعتقد أنه موجود فى أى نظام تأمينى فى العالم ..... لأن ما يحكم النظم التأمينية فى العالم هو الرياضيات الإكتوارية التى تحسب قيمة المعاش التقاعدى على أساس الأقساط المدفوعة و العمر عند دفع هذه الأقساط..

[miramikhail]

أنا الحقيقة قرأت الموضوع ده من أول ما أنحط و عجبنى جدا و قلت أستنى أبقى فى البيت و رايقة عشان أقول تجربتى

أولا الحقيقة أنا و جوزى أشتركنا فى التأمين الصحى فى نف\قابة المهندسين من أول ما أتعمل و عن بأسم زوجى مع أنه يدفع أكتر عشان يقدر يدخل والدته وده لأنى وقتها كنت فى الحكومة و بصراحة كنت بدفع التأمين الصحى مساهم لا أكتر لأنى عمرى ما فكرت أستعملة ولا حتى عشان أخد أجازة مرضى .

المهم الحقيقة مش حقول التأمين دة نفعنا أد أية بدأ من ولادتى لحد دكتور الأطفال بتاعهم اللى كنت بروح عنده دخل فى النقابة فكنت بدى كابون وخلاص و أكشف لحد حماتى الله يرحمها فى أخر حيتها دخلت أسبوعين المستشفى مش حقول وفرت النقابة أد أية فى مصاريف المستشفى و تأكدت من كده لما أحتجت جلسات علاج طبيعى و أخدت 12 جلسة على حساب النقابة و دفعت طبعا جزء و أحتجت 12 جلسة تانى لكن النقابة وافقت على 6 جلسات و دفعت الستة التانين بالكامل مش حقول أنى اللى دفعتة للست جلسات أكتر من اللى دفعته 18 جلسة اللى النقابة مساهمة فيهم و نفس الحكاية لأسعة لأبنى على ركبتة كان فية مشكلة عملناه فى أحسن مركز و دفعنا تقريبا نصف التمن لو كنا أحنا اللى دفعنا.

هو بس حصل حاجة دلوقتى بقالها كام سنة أنهم بقو يدوا كابونات بقيم معينة أدى الدكتور الكابون و يأخد منى جزء من الكشف ودية حاجة جديدة زى تقريبا نظام نقابة الأطباء طبعا حتقولوه طب و أية يعنى لأن فى الأول كانت النقابة بتدى مثلا 5 كابونات أستاذ و خمسة أستشارى و أروح عند أى دكتور أستشارى تبع النقابة و أدية الكابون بس و مادفعش حاجة أو ممكن أدية كابون أقل و أدفع عشرين جنية حاجة كدة يعنى أنا مدفعتش ولا كشف لدكتور أطفال أولادى ألا الكشف الخاص بالتطعيم

فالحقيقة مشروع الرعاية الصحية فى نقابة المهندسين و بالرغم من التعديل بتاع الكابونات ده ممتاز و كمان عارفة أن برضة نقابة الأطباء ممتازة لين قرايب فيها أما بقيت النقابات فمعنديش أى فكرة

[Advisor]

أعباء العلاج و التداوي تتزايد بإستمرار ، و المشاريع العلاجية للنقابات إضافة تستحق الدعم من الجميع