أنا هولع الدنيا ببرنامج أطفال جديد..ساعدووني

[Guest النسر المصري]

اخواني وأحبائي في الله ..اساتذتي وآنساتي سادتي

بحكم اني خريج فنون جميلة

وبحكم اني بحب الأطفال جدا...

فانا قررت اقدم نفسي في قناة الراي الكويتية عشان اعمل برنامج أطفال مميز جدا والاول من نوعة في االعالم

المهم ان كل واحد فينا فاكر ماما نجوى وافتح ياسمسم والمناهل وغيرها من برامج الاطفال الجميله البسيطة القيمة

ومن كتر ما انا بموت في البرامج دي...وعشان انا عندي لغة حوار عاليه مع الاطفال..

لقيت نفسي عمال بضخ افكار لبرنامج جديد للطفل يقدم له معومات وثقافة وينمي مواهب

بس واقع في مشكلة الشخصية الجديدة واسمها

يعني عايز اتلبس بشخصية لها اسم رنان يكون سمته الاساسية انه رسام ومثقف ومضحك

وانا اساسا عندي موهبة تمثيل وكنت من ضمن فريق مسرح الجامعه

الفكرة بتاعتي بتقوم انه شخص اسمه عمو شيكو

عنده بيت صغنون وفيه ورشه ومجموعة حيوانات زي قطة وعصفور عالشجرة حر وسمكة

المهم الالوان بتاعت الشجرة اللي هي حقيقية مش طبيعية

هتلاقيها شجره حمرا ولها ورق اصفر وازرق واخضر والبيت الوان وشكله عجيب والورشه كمان

ومش هيكون في شخصيا ت عرايس ولا ضيوف لكن هيكون فيه ضيف مميز هيتم انتقاءه بعنايه

طفل شاطر مثلا اوي عنده مواهب غريبة جديدة وهكذا

ويبقى في مراحل للبرنامج

فالول مثلا هحكي ن فكره النهاردة..ويكون مثلا عن سمك

وهبدأ اذكر فوايد السمك واشكاله والوانه بشكل مبسط

ثم اخدهم على الرحله اللي جوه بيتي ...فهبدأ اوريهم حوض السمك بتاعي وب واتكلم عنه وبعدين ندخل عالورشة واعملهم رسمه جديدة للسمك وانهم ازاي ممكن يرسموها..وبعدين نتنقل نتفرج سوى على برنامج علمي عني السمك تحت الميه...واذكرلهم احلى شخصيات السمك الكارتوني زي نيمو..ونتقل عند المطبخ عشان اعمله م اكله جميله للسمك...واخيرا اقدم لهم اختراع في الورشة اني اعمل سمكة من خامات غريبة...وممكن اني في الآخر اقفل البرنامج بحدوته جميله عن سمكه ظريفة يتعلموا منها درس مفيد...

اية رايكم واية مقترحاتكم وافكاركم واللي بتتمنوه انكم تشوفوه في برنامج اطفال مميز...

ارجوكم تردوا وتحطوا افكاركم..ماعندناش برنامج عربي واحد مميز...كله هبل ويجيب التخلف العقلي للطفل...انا عاوز اقدم هديه للطفل..والقنوات المصريه كلها عبيطه وترجع للمحسوبية...ساعدوني اني اقدملكم حاجة ليها قيمه واحترام وتنبسطوا منها...

[Folana]

السلام عليكم ورحمة الله .....

النسر الطيار...فكرة جميلة جدا ربنا يوفقك ..بس ابقى اكتب لنا على مواعيد البرنامج علشان انا عندى اطفال وانا اولهم ... :)

بس حيث انك خريج فنون جميلة فياريت تستغل الموضوع ده فى برنامجك ..يعنى مرة تقولهم معلومة عن السمك او اى كائن او الفضاء او اى حاجة ..وحلقة تعلمهم الرسم فيها ..يعنى ازاى يستخدموا الالوان ..وازاى ممكن يكونوا لوحة مجسمة ثلاثية الابعاد ..وهكذا ...كمان تضيف لهم لمسة جمالية فى ذوقهم وفى طريقة ترتيب حجراتهم ...انت اصلك حتكون فى موقع خطير ومؤثر فاستغله كويس ..وطبعا انت فاكر كنا بنتأثر بماما نجوى ازاى ...

انا بنتى الكبيرة غاوية فن جدا ...وبتتفرج على برنامج اوربى الحقيقة مش فاكرة اسمه يمكن fingers tips ..او حاجة تانية مش فاكرة ...بيعلمهم ازاى يرسموا وازى يلعبوا بالالوان ...تعرف كمان الاولاد فى مصر يستفادوا جدا من كده ..لان مادة الرسم ضمن المجموع ياحرام ..وانت عارف بقى انها موهبة ..بس لو اتعلموا الاساسيات ممكن يعنى يستفادوا ...وفيه افكار كتير ..اكيد الاخوة حيعرضوها بالتتابع ...ربنا يوفقك مرة اخرى ...

[هشام الجنيدى]

اخى النسر المصرى ربنا يوفقك لما فيه خير للجميع وصدقنى انا هفكر فى الموضوع ده واحاول الاقى افكار ربنا يسهل وتنفع للبرنامج ده

:)

[Guest النسر المصري]

استاذ هشام منتظر افكارك يامعلم الافكار...وكله بحسابه :blush:!!!

العزيزة الغالية فولانة

رائعة جداً فكرة ترتيب الحجرات دي...عجبتني اوي...يعني انا كدة ممكن اقولهم ازاي يخلوا حجراتهم تجنن وجميله ومرتبه بشكل ملفت لو اضافوا لمسات من صنع ايدهم..زي ابجوره غريبة ...مفرش تعملوا البنت بايديها...حاجات كدة فنية راقيه لذيذة...

بس المهم اني عايز اكون عمو شيكو العجيب..اللي بيطلب منه اي حاجة يعملها....يعني مش عشان انا ولد يبقى مااطبخش مثلا...لا انا عايز اكون ليهم بابا وماما وكل حاجة...

فيبقى موضوع الطبخ والديكور والمهارات التانيه زي النجاره والدهانات وغيره وغيرة..

وعموما يافولانه انا فعلا هاذكرلهم كل مره معلومه جديدة بس انا فكرتي زي ماقلت انا هختار كل مرة عنوان جديد للحلقة..زي ماقلت حلقة السمكة امبارح..المرة دي هتكون حلقة الفضاء

وارسملهم كائنات فضائية وكواكب ونتفرج على برنامج علمي عن الفضاء...ونطبخ لهم اكلة فضائية(غريبة دي مش كدة)

ونستضيف بقى الضيف المميز ونخلية يكلمنا عن افكاره للفضاء وكدة...واوريهم ازاي ممكن يضيفوا افكار حلوه لغرفتهم من وحي الفضاء...ومن ثم نختم الحلقة بحدوته فضائية

بس انا فعلا محتاج منك تلاقيلي اسم يحبوا الاطفال...ولا شيكو دة حلو؟؟؟!!!

[مصرية الهوى]

الأخ الكريم .. النسر المصري ..

والله فكرتك جميلة جداً جداً .. أنا خلاص تبنيتها mfb:

لأن فعلاً أدب الطفل العربي بشكل عام ( كتب ، برامج ، أفلام كارتون، مجلات .....) صعبان عليا جدا ..

لا يوجد اهتمام واضح بتكوين شخصية الطفل وعقله في العالم العربي ، قنوات الأطفال كلها هبل على رأيك ، كلها مراهقات بتتنطط ، والا أفلام كارتون مترجمة ومدبلجة وأغلبها عنف وكلام فارغ ... <<<<<<<<< باستثناء " كونان " :blush:

مع إن مرحلة الطفولة من أهم المراحل اللي لازم نهتم فيها عشان نبي جيل نافع يكبر وعنده أهداف ويعرف هو عايز يعمل ايه ....

أنا برأيي إن مرحلة إعداد برنامج وخاصة إذا كان هيخاطب الأطفال مرحلة صعبة جداً ومحتاجة تحضير دقيق ..

اول حاجه إنت لازم تقرأ ثم تقرأ ثم تقرأ ، عن شخصية الطفل وتكوينه .. ساعات خبرتنا وممارستنا تكون محتاجة خلفيات أكاديمية ونظرية ... حاول إنك تدور على كتب ، دراسات أو أي حاجه تتكلم عن مخاطبة الطفل ، ترفيه الطفل ، تشكيل عقلية الطفل عن طريق الترفيه .. صحيح إنك صعب هتلاقي حاجه للطفل العربي وأكيد الطفل العربي غير الغربي .. بس لو مفاهيم رئيسية يعني ..

حاول تدور دراسات عن طريقة إعداد برامج الأطفال ومراحل الإعداد .. الخ ...

ثاني حاجه بعد ما تفهم يعني ايه طفل ؟ .. ويعني ايه برامج طفل ؟؟ ..

حدد أنت عايز تخاطب انهو طفل .. !!

طفولة مبكرة ( 3- 6) (حضانة) وإلا طفولة متوسطة (6-9) ( ابتدائي صفوف دُنيا) وإلا طفولة متأخرة (9 -12) ( ابتدائي صفوف عُليا)...

لأنه تقريبا كل فئة من دول لها طريقة تفكير ، قدرات، استعدادات ، احتياجات ، مختلفة عن الفئة الثانية ..

يعني مثلاً الفئة الأولانية التعامل معاهم بسيط وممتع ومن السهل إنك تشكلهم ..تحسهم أطفال بمعنى الكلمة ..

انما الطفولة المتأخرة دي .. التعامل مع هذه الفئة صعب شويا .. لأنهم على مشارف المراهقة .. فبتلاقي اهتماماتهم كبيرة شويا وتفكيرهم برضه ..وبيعتبروا نفسهم مش عيال .. واغلبهم اهتماماتهم التلفزيونية مش برامج أطفال .. لا .. ماتشات ، مسلسلات ، برامج المفروض تكون للكبار .. الخ

بعد ما تحدد الفئة ، لازم تعمل دراسات على الأطفال نفسهم ، لازم تنزل للميدان وتخاطب الأطفال اللي هتعملهم البرنامج ( روح مدارس ، نوادي ، حدايق ، ملاهي أي مكان تلاقي فيه أطفال .. اجري وراهم واسألهم ..

انتو عايزين ايه ؟ .. بتحبوا ايه ؟ ... لو تفتح التليفزيون وتشوف برنامج بيتكلم عن كذا هتتفرج عليه والا تقفل التليفزيون؟ ..

طيب ايه الشو اللي بتابعه دايما ؟؟ .. ايه اللي يعجبك فيه ؟؟ ...

طيب تحب البرامج اللي فيه امكانية انك تتكلم فيها والا واللي مفيهاش ؟؟ ..

طيب تحب البرامج اللي يجي فيها واحد كبير .. والا كله يكون اطفال ؟؟

طيب لو واحد كبير اللي بيقدم تحب يجيب معاه ولد وبنت مثلا والا جروب ؟؟

طيب تحب الشو اللي يجي فيه واحد لابس ماسك ولا يجي عادي ؟؟ .... الخ من الأسئلة الدقيقة ..

وطبعاً الأطفال لا يستطيعون الإجابة على كل الأسئلة بطريقة تخيّل .. !!

يعني لازم حاجه تبقى قدامهم يعني تعرض عليهم برنامج وتقولهم ايه اللي يعجبك في ده .. وايه اللي ميعجبكش ..!!

برضه أنت محتاج مدة تلات اربع شهور أو أكثر .. انك تتابع قنوات الأطفال .. ولا اجدعها عيل ... تتابع بشغف ..

برضه فيه حاجة ممكن تساعدك على فهم عقليات الأطفال ، مجلات الأطفال ..

حاول مثلاً أنك تتكلم مع المسئولين في أحد مجلات الأطفال ، " مجلة ماجد " مثلاً ، لأني شايفه الإقبال عليها كبير .. حاول إنك تطلب منهم يتعاملوا معاك .. مثلاً تنشر استفتاء في المجلة .. حاول .. يمكن محدش يعبرك .. بس يكفيك شرف المحاولة ..

بصراحة أنا اتحمست فعلاً للموضوع .. انت شد حيلك .. وانا هابقى اول طفلة ضيفة في البرنامج ( يعني .. أنا يادوب 8 سنين :blink: )

بس بجد الموضوع شدّني .. رغم إن العلاقة بيني وبين الأطفال مش ولا بد ..

زمان كنت بأحبهم وأهتم فعلاً فعلاً إني أتكلم معاهم وألعب معاهم وأحكيلهم وأحاول أبسط كل حاجه وأشرحها لهم ، بس بيني وبينك السنتين الأخرانيين تقريبا مش عارفه ايه اللي قلبني عليهم .. بقيت مبطيقهمش.. يعني بوسة بوستين من بعيد لبعيد وسلام عليكم :wub: .. بدأت دلوقتي علاقاتي مع المراهقين .. وشكلي عشر سنين وهأقلب عليهم وأبدأ مع العواجيز .. وهكذا :D ..

بس مع ذلك والله الأطفال بيصعبوا عليا جدا جدا .. ونفسي نفسي يبقوا جيل صاعد و بقووووووووووة ....

عيالنا مش أقل من الأمريكي والا البريطاني والا الياباني ... كله الحكاية انه مظلووووم فقط .. ومفيش حد بيهتم بيه بجد ..!!

فعلاً .. فعلاً .. نحن بأشد الحاجة إلى أن يفهم أبنائنا معاني كثيرة : النظافة ، النظام ، احترام الآخر ، الذوق في الكلام والتعامل ، تنظيم الوقت، التعاون ، حب الآخرين ، تذوق الجمال من حولهم وكلها معاني محتاجة فن في الاسلوب عشان نغرسها في الطفل ولازم الأسلوب يكون غير مباشر و محبب للطفل ... وأهم قيمة فعلاً محتاج نعلمها لأبنائنا " حب العلم لأجل العلم " ..

على فكرة مش معنى كلامي إن فكرتك وحشة لا سمح الله ، بالعكس جميلة جداً .. بس لازم تعمقها أكثر ، وتحط لها خطوط عريضة أكثر ، وتأخذ رأي الأطفال فيها ، اعتقد إنك محتاج أكثر من سنة من الدراسة والإعداد عشان تعمل برنامج ناجح بكل المقاييس ..

وإن شاء الله بعد عشر سنين هيبقى عمو شيكو مكسر الدنيا ، ومفيش سيرة على لسان عيالي والعيال كلها في العالم العربي غير عمو شيكو :D ..!!

وتيجي أمريكا واليابان ياخدوا البرنامج يترجموه لعيالهم ..

مش بهزر والله :lol: ..

بحلم ..

و خلينا نحلم قبل ما الحلم يغلى ..

ودائما الأشياء العظيمة تبدأ بفكرة صغيرة ، ومشوار الألف ميل يبدأ بخطوة ..

ومفيش حاجة بعيدة على ربنا ..

ربنا يوفقك ويحققلك كل أحلامك يا عمو شيكو ..

:o

مستنية حساب الروشتة ..

على بنك زيورخ ... الله يكرمك ..

:blink:

[Guest النسر المصري]

ياسلااااام عليكي ياجيجي ياسكر انت...والله كلامك صوح الصوح

بس الحقيقة ياجيجي اا ماوريش حاجة غير الأطفال

انت عارفة اني درست جرافيك فنون جميلة...ودرسنا علم نفس الأطافل وعلاقتهم بالرسوم المتحركة

ودرست انا من عندي علوم النفس البشرية بزيادة لحبي لذلك المنهج

وطول عمري بانشد لحديث الأطفال وحاري معهم واتفرج معاهم على البرامج سوا سوا ...ده غير اني لما اشوفهم مابطلش لعب معاهم إلى اليوم

ثم نيجي لمجال عملي اللي انت عارفاه كويس

حيث اني كنت بشتغل في كارتون الأطفال منذ ثلاثة عشر عاما ...عام ينطح عام

ومنهم ثلاث سنوات في مجلات ميكي وبطوط وميني وسوبر ميكي وميكي جولد و ديزني ماجزين وديزني عربي ......وكان ذلك عندما كنت مصمم تلك المجلات ومخرجها ومنفذها في مطابع جريدة القبس الكويتية...حتى أنني كنت كاتب لكثير من المقالات الطفولية رغم وجود محرر..وكانت تلك المجلات تصدر لدول الخليج العربي والشام...( هذا لأن مصر كانت ومازالت لها ميكي خاصة لوحديها)

ثم انتقلت منذ ثلاثة سنوات إلى مقري الأخير حيث أعمل مديرا فنيا ومخرجا ومصمما لبرامج الأطفال الحاسوبية في المنظمة العربية لتطوير البرامج التعليمية ...حيث تحويل المناهج الدراسية إلى برامج حاسوبية كارتونية علمية مشرف عليها من كبار موجههين الدول العربيه في شتى المجالات الدراسية...وكان منهج العلوم بأكمله من نصيبي لإدارته فنيا

ولكن حلم برامج الأطفال مازال مسيطراً على عقليتي ونفسي ...وتلك الفكره التي وضعتها هي ناتج تلك التفاعلات مع أحبائي الأطفال

فول يعني حد يعيرني اهتمام من عنده ويقولي هل عنده إضافات..هل عنده تغيرات على فكرة البرنامج دي....قولولي إيه رأيكم بكل صدق...اسألوا ولادكم.....بليز ياجماعه اهتموا شويه للموضوع الحلم ده

[قهوجى]

طفل النهارده اللى بيعرف يستعمل الكمبوتر و الأنترنت و الجايمس و بتفرج على الدش و ممكن يكون شايل موبايل عارف كويس فوايد السمك و أسمائه و يمكن كمان عارف أن السمك لو طلع من الميه بيموت ..

برامج ماما نجوى البلهاء و ماما سلوى الشهيده و أبله فضيله العبيطه كانت بالنسبة لجيلى و ما بعده هى النافذة و المنهل الذى ننهل منه المعرفة ..

طفل اليوم متطور و ديناميكى و واعى و لبط و صارت اٍهتماماته المعرفيه أشد تعقيدا عن ذى قبل .. و قارن بين طفل الغرب الذى يحدثك عن نظرية أينشتاين و جان بول سارتر و الحياة على المريخ و طفلنا اللى لما يتكلم تحس أنه خريج التأهيل الفكرى بسبب ضحالة الوجبة الثقافية التى تقدم له فى المدرسة و البيت و الشارع ..

أعتقد أطفالنا فى حاجة لبرامج تناغش و تداعب الفكر المتطور العالمى اللى بيتكلم لغة العلم و التكنولوجيا و الفيمتو ثانيه بتاعت المعلم زويل اللى حاليا بيشتغل فى اٍسرائيل بعد ما طلع 3 عينه من وعود مصر له باٍحتضانه ..

[Guest النسر المصري]

شكراً ياقهوجي على اقتراحك....واعتقد أن فكرة البرنامج بأن تكون كل حلقة لها عنوان محدد هي فكره ممكن تضيف لها أي عنوان..

.فممكن اليوم ان نتكلم عن انيشتاين والنسبية والذره ...

وغدا عن الكمبيوتر واستخداماته وتاريخ صنعه...

ويوم آخر عن الإسلام والصحابة والموتيفات الإسلامية والحضارة الإسلامية وهكذا..

وعنوان حلقة السمك كانت احدى عناوين تلك الحلقات وليست معناها ان البرنامج هيبقى كله سمك في سمك :blink: (ولا انت نسيت الفضاء ) :blush:

ده برنامج علمي ثقافي في مرح أيضاً ياقهوجي...يعني قابل لوضع كل المواضيع العلمية.... لكن انا بتكلم على شكل البرنامج اللي هيتكلم عن مضمون البرنامج...

فهل ياترى عندك أفكار :blink:

[nancy]

شوف يا عمرو

انا حاكتبلك ملاحظاتى كام عندها اطفال من 10 الى 13

السن دة سن تكوين الشخصية وبيكون محتاج لتوسيع المدارك

وبينقصم نقاط مهمة فى معرفة العالم المحيط

1- معلومات عن دول العالم بداء بمعنى العلم بتاعها ثم مساحتها وعدد سكنها ومميزتها موقعها من العالم اكبر حدث حصل فيها

2-برنامج بسيط فى الكمبيوتر ومن اين نضعة على الجهاز من النت وكيفية عاملة ومسابقة لاختيار احسن تطبيق ولينك لمعرفة حلول المشاكل حتى اجادة الرنامج حتى لو برنامج جديد كل شهر

3-اختراع افاد العالم اسم المخترع وكل المعلوامت عن فوائد الاختراع وتطوراتة

4- معلومة تاريخية عن تاريخ احد الشعوب

5- زى الشعوب وارتباطة بثاقفة الدولة الخاصة بية

6- الة موسيقية شرح لها واسلوب عملها ومنشاها

7- رسم مبسط بالخطوات للاطفال

8-عمل فنى باليد كعلبة تستعمل فى شىء لغرفتهم او ماشابة

9- ممكن التعرف على الخامات مرة عن الحديد او عن الخشب واستغلالة فى اية حولنا

10 -موقع للبرنامج على الكمبيوتر وتنزل فية كل الفقرات ليكون كل خط فيها موسوعة فى حد ذاتة

هه اية رايك

[Guest النسر المصري]

رائع يانانسي رائع اهي دي أفكار رائعه الصراحة....بس انا عاوز مساعدتك في حاجة...كنت عاوز أعرف رقيك في طريقة الإلقاء وشكل البرنامج

يعني كنت بقول انه هيبقى بللغة العربية...وكنت بقول الخطوات بتاعته ماشي كذا وكذا....وانه ينتهي بحدوته علمية....وإن يكون في ضيف لطفل واحد بس وينتقى بعناية تامة

كنت بتكلم عن الديكور....وكنت بتكلم عن فكرة البرنامج نفسه انه يبقى ليه عنوان حلقة كل مرة

زي شعوب.....آله موسيقية......وهكذا.....

[yacho]

معلش يا نسر انا جايه متاخره شويه .. وبصراحه ما عنديش وقت اقرا المداخلات اللى ف موضوعك ده ولو ان فى لمحه

سريعه استنتجت ان فى افكار كتير شيقه ولذيذه ..

انا عايزه اعرف ازاى حتخللى الاطفال اللى معاك فى البرنامج سواء الضيوف او اللى بيتفرجوا ف البيت متلقين ايجابيين

للمعلومه وده فى اعتقادى اللى بيفرق بين برنامج اطفال نقفله اول ما التتر يبدا وبرنامج تانى بنستاناه بالثانيه .. الاطفال

بيزهقوا بسرعه لازم يكون فى طريقه تخلليهم يتفاعلوا معاك وما يقوموش من ادام التليفزيون :P

شوف انا عندى اربع ولاد حاقعد معاهم وحاسالهم ايه المواضيع اللى بيحبوا يشوفوها فالتليفزيون .. وليه فى برامج معينه

بيقعدولها متنحين :huh: وبرامج اعوذ بالله .وانا عن نفسى حاعصر الجمجمه وحافتكس لك كام افتكاسه على مزاجك. :closedeyes:

[ابن بلد]

الاخ النسر المصرى

اولا/ اقدم لك خالص التحيه والاحترام

ثانيا/ من خلال متابعتى لمداخلاتك وجدت ان لديك اكثر من موهبه غير موضوع الرسوم المتحركه اتمنى ان تستغلها فى اخراج شكل لفكره برنامجك الرائعه المرنه والتى تقبل الدخول فى موضوعات كثيره ومختلفه......فعلى سبيل المثال استغلال الاحتكاك الدرامى ايام الجامعه فى كتابه مشاهد دراميه كوميديه او فكاهيه كما يقول اهل الخليج وتحمل تلك المشاهد مضمون فكرتك او الاستعانه باحد كتاب كوميديا الاطفال رغم انى اظن مما قراته من كتاباتك ان لديك موهبه جيده فى الكتابه ولن تحتاج للاستعانه بكاتب اخر واوصيك بالافيهات الحركيه الكوميديه لانها اكثر شىء يعجب الطفل الخليجى ويستوعبها اغلب المراحل العمريه المختلفه للطفل

هناك شكل اخر اتخيله لفكره برنامجك وهوالتحدث عن موضوع الحلقه فى شكل فزوره او مسابقه وفتح خط التليفون لمن يعرف ما هو ما تتحدث عنه ويتم مكافاه الفائز باى صيغه انتاجيه توافق عليها القناه وهذا ايضا اسلوب مشوق جدا للطفل الخليجى وقد تكون معلومه عن حيوان او شخص او مهنه

مش عارف كده عرفت قولت ليك حاجه مفيده ام لا

تمنياتى لك بالتوفيق

[nancy]

شوف ياعمرو انا الفكرة عجبانى جدا

وطبعا حتة الديكور وانة كمان ديكور استوديوا دة تخصصى

فمن ناحية تخصصى دى

اولا حضور طفل واحد دة مش حيكون مؤثر اوى بس ممكن تعمل حاجة تسميها لقاء اسبوعى او شهرى

يعنى الاطفال الى شافوا البرنامج طول الشهر واتعلموا كل الى انت عرضة وعملوا بحث فى المواضيع الى عرضتها وجابوا معلومة عنة ورسلوا الموقع اكتر من مرة سواء بعرض الى وصلوا لية او الىبيسالوا عنة

يعنى الطفل بيعمل ريبورت عن الى طلع بية طول الشهر من البرنامج وبتتعملهم دعوة لتبادل المعلومات الى وصلوا لها

وبالشكل دة بتشجع الولاد على انهم يتبعوك بحماس وكمان يفكروا ويستنتجوا وكمان يكونا حافز لاطفال اخرين

بالنسبة للاستوديوا افضل ان الكاميرا تكون يتتحرك فى كدرات تبع كل موضوع يعنى جزء الرسم لة ثلاث اضلاع

والكاميرا تخدة هو بس وبعدين فاصل وتنقل على كدر تانى

يعنى الاستوديوا يكون فية اكتر من كدر حوالى خمسة او ستة دة غير كادر النادوة الى بيتعمل كل شهر لازم تكون كراسية متنوعة الاشكال والاحجام والارتفاعات علشان يكون فية دناميكية فى الحركة

بالنسبة للغة انا معتقدش انها ممكن تشد اوى لو باللغة العربية بس خلى اللهجة معاك مفتوحة يعنى انا اعتقد من كتر غربتك انت ممكن تتكلم سورى ولبنانى وكويتى وتونسى ومصرى

يعنى خليك حر فى الحوار والولاد حتفهمك

وعموما انا حبة الموضوع واحب جدا ان اشارك فية حتى من مكانى

دى كمان نقطة ممكن تكون 11 فى الى بعتهملك قبل كدة

-الى هو خطوات تصنيع حاجة زى القلم الرصاص زى الشكولاتة زى علب اللبن

تصور خطوات انتاج مع تعليق وتتعرض

[سمـ مصر ــا]

النسر المصرى

أهلا بك محلقاً فى سماء الأطفال

كل الإقتراحات التى قدمها الأعضاء ما شاء الله جميلة ولا جديد لأضيفة اليك وممن الواضح ان لديك الأستعداد الذى يؤهلك للعمل فى مثل ذلك

ولكن هل فى بلد العرب يكفى الإستعداد والأفكار

للأسف لا.. لابد أن يكون لديك جواز سفر للمرور إلى قناة الرأى وهذا الجواز هو الواسطة

هل لديك وسطة يانسر فى قناة الرأى ... لا تقل لى أن الأمر لايحتاج اليها ..

وهل كل من فى الرأى كفاءة بدون واسطة .... ؟

طيب منيرة عاشور اية رأيك فيها كمذيعة كويتية

والتى لانسمع منها عبر الأثير الا اعلانات عن صالوناتها

عموما لا املك الا الدعاء ربنا يوفق

تم تعديل 27 أبريل 2006 بواسطة سمـ مصر ــا

[Guest النسر المصري]

الغالية ياشو

طبعا عناصر التشويق الجهنمتية لابد من وجودها من أول التتر البداية لغاية النهاية

يعني انا لابد اني أخلي الطفل ينهج من كتر التشويق والبحلقة في التلفزيون

ودي سهله لو اعتمدت أفضل الكوادر الفنية في كل شيء...من إخراج لموسيقى لديكور لأضواء لتجديد (حلوه تجديد دي يعني ممكن أعمل مفجأه كل حلقة)

شوفيلي بقى ولادك هيقولو ايه ويازيت لو عرضي عليهم الأفكار دي ويقولوا رأيهم ياياشو...دول ولاد الغالية أم الغالين :angry:

العزيز ابن البلد

انت طول عمر كلامك ليه فوايد يا اجدع ابن بلد في الدنيا

الحقيقة اني هاقدم البرنامج ده للطفل العربي وليس الخليجي...واذا كانت الراي هتحلق للحته دي فانا خاحلقلها انا كمان...

بس الاهم دلوقتي ان البرنامج يخرج للنور وقول يارب

يانانسي ياجميلة

اية دة يابنتي...انتي مخزن أفكار

بصي من الآخر انت لازم يكون بيني وبينك تعاون آخر...يعني لازم يكون تكوني شريكة في وضع الأفكار وعمل الرنامج...وده يتتطلب ان يكون في اتصال بينا اقوى من كده

لان مش ممكن دي أفكار..انت كأنك بتكملي نصفي المفقود في الأفكار دي

فعايزين نشتغل شغل بجد بقى (وماتخافيش حقك محفوظ وهنشوفك يعني :P ....تلاته جنية وربع في الشهر..ها قلت اية :wub: )

سما مصر العزيزة

والله كلام حكم ياسما...فعلا لازم واسطة...بس مش عشان ادخل بيها في البرنامج

انما عشان اضمن انه مايتسرقش

وده بقى مكتوب علينا في زمنا ده...المحسوبية والوسايط

عموما ياجماعة انا شغال عليها بس كان عندي مقابلة مع واحد في قناة الراي الاسبوع الجاي ولكن كله إتأجل بسبب مناخيري

آآآّ يامناخيييري

B) :P

[Sherief AbdelWahab]

شوف يا عم إيجل .. نسر يعني :angry:

من المهم وانت بتعمل برنامج أطفال إنك تذاكر التجارب السابقة سواء في التليفزيون ختم النسر أو القطاع الخاص أو الفضائيات ، وتشوف إيجابياتها وسلبياتها..

لو عايز لوك كويس للبرنامج ، فيه شركات القطاع الخاص زي "كرمة" اللي سبق لها إنتاج برنامجين ، هما "عالم سمسم" كمنتج منفذ ، و "ياللا بينا" واللي كان نقلة نوعية في برامج الأطفال في مصر رغم توقفه حالياً..

من التجارب الكويسة في المجال دة واللي تستحق الدراسة برنامج "كيف وليش" على الـ lbc .. ويشترك مع ياللا بينا إنه برنامج "ملون" مليان بالألوان ومليان بالبهجة الأمر اللي بيعمل شيء من الجاذبية للسن الصغير..

هي عملية تحدي .. بس ممتعة..

خلص الكلام

[nancy]

اولا حمدللة على سلامتك

قلقتننا عليك

بالنسبة لموضوع البرنامج

انا كمان فكرت فى كدة

وشوف تفاصيل الشركة بنا تكون ازاى

من اول ماديا لحد الاعداد والتصميم وكل حاجة

وتاكد معاك شريك راجل بجد الجد

وانا كمان كلمت زوجى فى الموضوع وقالى اوكى

فانا دلوقت معايا كارت اخضر منه

فيلا نبتدى

[Guest النسر المصري]

نانسي ...بجد مش ممكن على ده تشيجيع...انت فعلا بألف راجل (مع الاحتفاظ بحقك كبنوتة)

طيب دلوقتي هابدي بتجميع الأفكار وأكتبها لك وهأقسمها لأجزاء وهنكتب فيها بتفاصيل مملة وهيكون

الفكره العامة

وقت البرنامج

فكرة التتر

الشخصية (عم شيكو)

الديكور

مراحل البرنامج

أفكار الحلقات الثابته

أفكار الحلقات المتغيره

وأنا هابتدي بالفكره العامه اللي هنجمعها من الأفكار اللي اتطرحت من زملاءنا الأعزاء هنا في المنتدى.......

بس استنيني لما اخرج من أم المكان الممرض ده...قرفت من البالطو الابيض والنظارات الشفافة وعنطزة الدكاتره....نفسي أشم الهوا بره بقى (ولو ان قدامي وقت على مااشم) :angry:

[nancy]

اطلع كدة بالف سلامة

ومناخيرك ترجع لطبعتها وتصغر تانى

وتشم الورد والهواء والملوخية كمان

وبعدين نبحث التفاصيل

:angry:

[نورية]

انتوا نسيتونى ولا ايه بقى :ph34r:

ما انا بردو فنون زيكم .. يعنى اقدر اساعد بردو معاك يا نسر انت و نانسى الجميلة :D

و باتكلم جد والله... ديكورات ....تصميمات.. تصميمات ملابس... اى حاجة انا فى الخدمة حقيقى

ربنا بس يقومك بالسلامة و انا تحت امركم

كفاية انى السبب فى الخناقة اياها اللى حصلك فيها اللى حصل ( الفتوات اياها ) :P