الرزالة التليفونية

[Sherief AbdelWahab]

عشرين مرة في اليوم يتكرر مشهد ما :

شخص يرن عليك التليفون ، تفتحه ، يغلق السكة؟

اتعملت فيك قبل كدة؟

مين اللي عادة بيعمل كدة؟

خلص الكلام

[Reham]

تفتكر ياعم شريف مين اللي عادة بيعمل كده :D

ياإما واحد بيعاكس

او واحدة برده بتعاكس :ninja:

طب انا عندي فكرة كويسة

فيه اختراع جديد نزل الاسواق اسمه كاشف رقم المتصل

caller id

يعني اللي بيتصل يظهر لك نمرته

فتقوم تبقي عارف مين قبل ماسيادتك ترد

فترد أو تطنشه :blush: نزل عندكوا ولا لسه :D ؟؟؟؟؟؟

ايه رأيك بقي

سهلة ...صح B)

انا مش عارفة والله الناس اللي بتعاكس دي بتبقي عايزه ايه

انا بعتبر ده هبل

[khedr]

الاظهار.............

عليك بالاظهار.......فهو السيف البتار

لكل مختل غاوي معاكسه بالليل والنهار

اظهارالرقم

[Reham]

الاظهار ...الاظهار

لنخلي عيشتكوا خيار

[khedr]

لأ ...ده المشكله اللي يرفع السماعه وتسمع...

ْْواحد بياكل ...ايوه بياكل!!.....او بيتاوب!!!...او بيكح!!!....او يعطس!!!!

وبعدها يقفل السماعه...

[shahd]

تفتكر ياعم شريف مين اللي عادة بيعمل كده ;)

ياإما واحد بيعاكس

او واحدة برده بتعاكس  :D

طب انا عندي فكرة كويسة

فيه اختراع جديد نزل الاسواق اسمه كاشف رقم المتصل

caller id

يعني اللي بيتصل يظهر لك نمرته

فتقوم تبقي عارف مين قبل ماسيادتك ترد

فترد أو تطنشه :blush:    نزل عندكوا ولا لسه :D ؟؟؟؟؟؟

ايه رأيك بقي

سهلة ...صح :D

انا مش عارفة والله الناس اللي بتعاكس دي بتبقي عايزه ايه

انا بعتبر ده هبل

<{POST_SNAPBACK}>

قلبك ابيض ياريهام ده الكاشف بقى موضه قديمه وما بقاش يهمهم اصلا يعني مرة تلاقيه طالعلك رقم خاص ومرة يرد عليكي ولا كأنه عمل حاجة

زي مايكون بيقلك طب عرفتي النمرة وريني حتعملي اييييييييييه :P

ولا الغريبة في الموضوع لما واحد بيعاكس ويديك رنه على الموبايل ويقفل عشان انت الي تتصلي بيه B) يا عيني على العبقريه خايف على الفاتورة اوي يا ابني :ninja:

تم تعديل 30 ديسمبر 2005 بواسطة شهد

[صفاء]

عشرين مرة في اليوم يتكرر مشهد ما :

شخص يرن عليك التليفون ، تفتحه ، يغلق السكة؟

اتعملت فيك قبل كدة؟

مين اللي عادة بيعمل كدة؟

خلص الكلام

<{POST_SNAPBACK}>

واحد فاضى او هايف

تم تعديل 30 ديسمبر 2005 بواسطة صفاء

[Folana]

عشرين مرة في اليوم يتكرر مشهد ما :

شخص يرن عليك التليفون ، تفتحه ، يغلق السكة؟

اتعملت فيك قبل كدة؟

مين اللي عادة بيعمل كدة؟

خلص الكلام

<{POST_SNAPBACK}>

السلام عليكم ورحمة الله ...

ده بقى موضوع عادى جدا وخصوصا على الموبيلات اللى من المفروض ان نمرها خاصة جدا ومش بيعرفها الا المقربين ...مابقاش فيه معاكسات على التليفونات المنزلية دلوقت نتيجة لوجود تكنولوجيا اظهار الرقم ...لكن العجيب انها بتكون على الموبيلات ...ماتنساش حضرتك ان الموبيلات دلوقت اصبحت وسيلة للكسب يعنى بتكون فى الشوارع وللاستخدام العام ...او من السنترلات المنتشرة بطريقة غريبة دلوقت ..ممكن يكون حد اتصل بسيادتك من موبيل عام ..واللى بعده اخد النمرة وبدأ ينفث عن عقده النفسية بهذه الطريقة الغريبة ...

انا حصلت لى كتير مع ان موبيلى ماحدش يعرفه الا اولادى وزوجى واخواتى ...لكن فوجئت بواحدة بتتصل بى وقفلت ولما اتصلت انا ردت بمنتهى السخافة وقالت لى حاتصل بك ؟انت مين ؟ده انا كنت نايمة ..وفضلت على اللحال ده اسبوع ...تتصل ولما ارد تقفل ولما اتصل تقولى انت مين انا ماتصلتش ..لحد بقى ما خرجت عن شعورى وكلمتها بالاسلوب اللى تستحقه ..عايزة اقول انه كل شىء اصبح عادى جدا ومباح ...احسن حل انك تتجنب الرد خالص لحد الطرف التانى مايزهق ....والله المستعان

[Eng_Willo]

قلبك ابيض ياريهام ده الكاشف بقى موضه قديمه وما بقاش يهمهم اصلا يعني مرة تلاقيه طالعلك رقم خاص ومرة يرد عليكي ولا كأنه عمل حاجة

زي مايكون بيقلك طب عرفتي النمرة وريني حتعملي اييييييييييه :D

ولا الغريبة في الموضوع لما واحد بيعاكس ويديك رنه على الموبايل ويقفل عشان انت الي تتصلي بيه :D يا عيني على العبقريه خايف على الفاتورة اوي يا ابني :)

<{POST_SNAPBACK}>

والله حتى دى ما بقتش تهمهم , انا بقالى تقريبا 3 شهور فيه نمرة بتتصل بيا على الموبايل و كل ما ارد يفضل شوية و بعدين تقفل.

اعتقد ان دى بقى تفرس بجد....

[Diab]

علي فكرة أنا إتعرضت للموقف ده قبل كده بس الحمد لله لقيت حل

إزاي ...؟

في برنامج أسمه easy call تابع للمصرية للإتصالات وهو عبارة عن دليل التليفونات

و بيتحدث كل سنة

كان في واحد عمل الفصل ده فيه رحت حطيت رقمه في البرنامج راح جايب صاحب التليفون اسمه وعنوانه

طبعا لما أتصل تاني رحت مهدده بأني حأبلغ عنه ورحت أديته البيانات

الراجل خاف وبطل يتصل تاني

ســـــــهــــــــــلــــــــــــــــة مش كده :wub:

[se_ Elsyed]

أكثر ما يُثير أعصابي سواء كانت مكالمة شخصية أو مكالمة عمل هو الشخص اللي يتصل بك ورقمه لا تعرفه بالمرة وأول حاجة يقولك : مين معايا ؟ ..

شوفت الذكاء ؟.. يعني هو اللي متصل - حتى لو بالخطأ ويقولك إنت مين ؟

ثانياً : من خلال تجربة .. إن اللي بيتصل عشان يعاكس أو خطأ فلا تأخذ وتدي معاه في الكلام لإن ممكن يكون شخص مُختل ويستلمك ويقرفك .. فبالتالي التقصير مع الأشكال دي أحسن ولقيت ناس كثير ما بيستنوش ويروح داخل شمال وشاتم اللي تصل خطأ وبالتالي ممكن يكون شخص قليل الأدب فيحدث تبادل للكمات والشتمات ويبقى الموضوع ليس له نهاية .

وأخر العلاج الكي .. لو تمادى في عبثه فهناك مباحث التليفونات ممكن تبلغ عنه وتخلص خصوصاً لو عندك كاشف ..

---

أما بخصوص المكالمات التليفونية من أشخاص أعرفهم ويعرفوني ولكن بأصمم أقفل السكة في وشهم .. لما تلاقي واحد أتصل بك وأنت لم تتمكن من تمميز صوته وتلاقيه يقولك : حذر فزر مين معاك يا عكروت ؟ وكإن مخ الواحد بقى لاب توب فبيستطيع تمميز وفرز أصوات آلاف الناس اللي بيعرفهم .. من سكات بأقوم قافل السكة وأجبرة على إنه يعرف نفسه الأول بدل الدخول في حواديت وفوزاير رمضان ..

------

بصراحة أنا أول ما بالأقي رقم تليفون ما أعرفوش من مصر بأشعر بإنزعاج .. خصوصاً لو كان ميسد على الطاير ..

والعام الماضي في رقم إستلمني ميسدات ورا بعض ورا بعض .. فقولت أرد وامري لله فأتصلت طلعت واحده فلبينية - آه والله - فبأسأل بالعربي : إنت مين وإيه الميسدات دي كلها ؟.. ردت بالإنجليزي : فقولت لها : عايزه إيه يا صديجه .. فقالت لي معليش النمرة غلط ... يا بنت الذين ( وأدي مكالمة بخمسة ريال راحت في الأرض mfb: )

قفلت ... شويه وخمسين ميسد تاني : روحت متصل : عايزة إيه بت وبتكلفيني مكالمة دولية ليه هو أنا ناقصك ؟.. مانتو ملقحين بالملايين هنا وما حدش فيكوا إفتكر مرة يعبرني بميسد من أبو بلاش ؟ :) فقالت ملعيش النمرة غلط ... قعدت طول النهار تتصل روحت عامل الموبيل على الصامت لحد ما زهقت وبطلت ...

---

اغرب موقف لن أنساه في حياتي حدث مع الأخ المجاهد الأشكيف الأكبر / أحمد محمود ( 10 ش إبن مصر سابقاً )

عمركو شفتوا واحد يتصل بك على الموبيل تقوم مسجل تليفونه زي ما هو من غير حتى ما تُعيد كتابة الرقم وتروح متصل به في نفس اليوم .. ترد عليك واحده وتشتمك وتتهمك بإنك بتعاكس ؟

آه والله : وأنا متأكد 100 % إن ده مش فصل بارد من فصول أحمد إبن مصر .. المهم إتصل هو تاني فقولت له إنت في حد بيرد على موبيلك ؟ .. قال لي لأ !!!! فكبرت في دماغي .. قولت له طب إقفل وأنا هاعمل reply للمكالمة الأخيرة بتاعتك .. ردت نفس الست تاني .. فقولت لها : حضرتك قبل ما تشتمي .. عمرك شفتي حد بيعاكس من تليفون دولي ( غير الخدامة الفلبينية اللي من الواضح إن التليفون كان عندها ببلاش ؟ :) ) فقالت لأ : فقلت لها والله العظيم ده تليفون واحد صديجي وأنا مسجله عندي زي ماهو وبأعمل إعادة إتصال فقط .. وعلى العموم توبة من دي النوبة لا هاتصل بأحمد محمود ولا عايز أعرفه من الأساس ...

بس العجيب بقى إن ده حصل في ذلك اليوم فقط ومن الواضح إن الدنيا كانت داخله في بعضها وموبيل الأشكيف كان معلق مع خط في مرسى مطروح وسنترال النزهة دخل في تليفون عمدة كفر البطيخ ...

ومنك لله يا أشيكف ..

[مصرية الهوى]

ولما يكلم ويحط اغنية والا يقعد يبوس .. منتهى قلة الأدب والفراغ !!

افضل حل مع الناس دول تقفل الموبايل او تفصل فيشة التليفون وتطنشهم لحد ما يزهقوا ...

انما حكاية الصديجة دي والله رهيبة يا سي السيد .. على سيرة الصديجة..

بيقولك فيه واحد سعودي راح لباكستان اول ما نزل في المطار .. كان عاوز يسأل على حاجه فلقى باكستاني معدي جنبه ..

قاله : صديج .. لوسمحت ..

الباكستاني زعق في وشه قاله : أنت هنا صديج .. أنا هنا كفيل :wub: !!

لا انا بقى مرة كانت بتجيلي ميسدات ومسجات من نمرة غريبة في مصر .. صحباتي دايما اول ما يغيروا نمرتهم يبلغوني .. المهم النمرة دي قرفتني بجد .. وابعتله : مين ؟؟ .. ومفيش فايده .. يرن ويبعت .. لحد مازهقت قمت كلمت عليه .. رد واحد .. قلتله: مين حضرتك ؟ .. قالي : شو انتي من السعودية ؟ قلتله : اه بس حضرتك مين .. قالي : على فكرة انا سوري بس عايش هون في مصر .. كيفك ؟؟ وكيف السعودية .. وكان بدي احكي انو انا ... وقعد يحكيلي سيرة حياته .. وانا مالي انا :) .. قلتله ياعم معليش بس انت مسببلي ازعاج .. وانا بتكلم دولي و مش فاضيالك .. وقفلت .. والحمد لله بطل يرن ..

ومرة نمرة غريبة جتلي رديت عادي: نعم .. سمعت صوت حالم وبيتنهد :P مساء الفل والورد والياسمين ( عرفت انه واحد بيعاكس )

قلتله : مين ؟؟

قالي : طب بالراحة عليا .. انا عبد الرحمن ..

قلتله : معرفش حد بالاسم ده

قال : وماله نتعرف .. ونبقى اصدقاء .. صداقة بريئة والله ..

قمت قفلت السكة في وشه ...وقفلت الموبايل ..

فضل ايام بيكلم ويبعت مسجات .. وكل يوم بيرن من نمرة جديدة ..

المهم مرة كلم وكان عندي خالي .. قمت اديته الموبايل .. رد عليه خالي قاله: ايوى .. مين ؟؟

قال : معليش شكلي غلطان ..

طبعاً خالي هزئه تهزززيء محترم ...

الولد قعد يتأسف من خالي ويعتذر .. معليش والله آسفين ومش هأكررها تاني ..

والحمد لله بطل ..!!

[abofasad]

الأخ العزيز دياب

فرأت ردك، وأرجو أن تفيدني أكثر عن موضوع " easy call"

الاسم الكامل للبرنامج، كيفية الدخول أي بيانات قد تفيد باقي الأعضاء

تحياتي

[سمسمة]

على فكرة برنامج easy call دة برنامج عاملاه الشركة المصرية للاتصالات مع شركة فايزر و رعايا أخرين sponsers و هو يباع فى السنترالات الكبرى فى مصر مثل سنترال الأوبرا على اسطوانة سى دى و بيتحدث كل سنة,

و البيانات بتاعته بالضبط هى الموجودة على موقع www.140online.com أى يمكن الاستغناء عن السى دى باستخدام الموقع.

لكن المشكلة انه أصلا ممكن يكون الشخص مسجل رقمه على انه سرى فلا هينفع easy call و لا 140online. لكن فعلا عليكم و على مباحث التليفونات أحسن على الأقل الشخص السخيف الفاضى دة يتأدب و مايعملش كدة تانى لا معاك و لا مع غيرك.

على العموم هى المشكلة فعلا فى الفراغ و سوء التربية و الفاضى يعمل قاضى زى ما بيقولوا.