الرسول ذنبه ايه

[asm504]

الزمان : 31/12/2005 9:35 صباحا بعد بداية اللجنة بخمس دقائق تقريبا

المكان : جامعة الأزهر / كلية اللغة العربية / الدورالثالث / طرقة ؟ / لجنة ؟ -اللجنة فى الطرقة, مش غريبة ولا حاجة-

اللى حصل من طقطق لسلامو عليكو:

استلمنا ورقة الأجابة والأسئلة وبنقول يا هادى, واحد جاى من أول الطرقة, بيزعق بكلام..., طبعا انا مش مركز معاه , انا فى ايدى امتحان , لو كل واحد زعق سبنا اللى فى ايدينا وقعدنا نسمعه يبقى مش حنجاوب, وبعدين احنا خدنا على كده

وصل عندنا اللجنة ... قصير , تخين شوية , ملتحى ..

وطبعا هو عرفنا بمنصبه من قبل ما نشوفه, من صوته وأسلوبه , وطبعا مش قدرات ذهنية كبيرة عشان تحكم على حد لما تشوفه ماشى بكرشه بيشخط وبينطر وماحدش قادر يبرفع عينه قدامه انك تحكم عليه انه لو ما كانش المدير يبقى حد من الروس الكبيرة, وبما اننا فى الكلية فهو ان لم يكن العميد فهو دكتور كبير, بس ما كانش هو العميد .. المهم

السيد الموقر: ايه ده يا استاذ , احنا مش قلنا مفيش حد من الطلبة يجيب معاه اى ملازم او مذكرات داخل اللجنة

الملاحظ : انا أسف يا فضيلة الشيخ , اصل انا لما قلت للطلبة اللى معاه حاجة يطلعها...

السيد الموقر - مقاطعا - : ايه .. أصل, اصل ايه يا افندى انت حتناقشنى كمان, اتفضل يا استاذ طلع الحاجات دى بره اللجنة

ولا أدرى اين هو هذا ال " بره ", دا احنا فى الطرقة

إلا ان الملاحظ بدا محنكاً فى التعامل مع أمثال هؤلاء السادة المشايخ فقد اجاب بكل احترام واجلال : حاضر يا مولانا

ونقل المذكرات اللى بجانبه مسافة متر بالظبط

هذه المذكرات التى نأكلها طوال ليلة الامتحان , ونظل نأكلها طوال الطريق الى الامتحان حتى يطلب الملاحظ تسليمها اليه عند بداية وقت الامتحان لنتقيأ ما اكلناه فى ورق الإجابة

ناهيك عن المذكرة نفسها : ليس لها غلاف, ورق ردئ , طباعة غير واضحة , تعقيد لفظى + غلطات مطبعية = " لو عرفت تشوف ابقى قابلنى لو عرفت تقرا " , تعقيد معنوى= " لو قدرت تشوف وتقرا ابقى قابلنى لو عرفت تلخص مضمون او تقف على عنصر او حتى تعرف هو عايز يقول ايه "

الاخوة الزملاء اللى بيحضرو وبيفهمو من الدكاترة بيقولو ان كله كلام انشاء, والكلام الأكاديمى اللى فيه لا يمت للواقع بأى صلة

"التليفزيون والدش والفيديو والانترنت : اختراعات مستحدثة من وسائل الاعلام " كأنهم لسه مختريعينهم امبارح.. ده اللى احنا بندرسه

وعلى فكرة انا فى قسم الصحافة والاعلام التابع لكلية اللغة العربية..احنا اللى المفروض نوجه الرأى العام .. المهم

فجأة .. : ايه يا فندى انت ماشى فى وكالة ؟!!

التفتنا لقينا كان فيه واحد معدى

كان واضح عليه انه فى أواخر التلاتينات من العمر , وإمضاء الزمن واضع على شكله, وجهه , ملابسه,..

رد عليه : انا أسف

السيد الموقر: انت طالب هنا ولا ملاحظ ولا شغلتك ايه بالظبط ؟؟!

الرجل الغلبان : يا فضيلة الشيخ , ده منظر طالب

وهنا كانت الطامة الكبرى

_: انت تطول تبقى طالب , "اطلبو العلم من المهد الى اللحد" !!!!! .

- "لا حول ولا قوة الا بالله ", وانصرف

كانت صفعة لكيانى .. كانت آخر رد أتوقعه من الشيخ الجليل وإن لم أتوقع منه خير

"اطلبو العلم من المهد الى اللحد" ده حديث

لكن الرسول - صلى الله عليه وسلم- ذنبه ايه .....؟؟؟؟؟؟؟

حد مش فاهم؟؟!

طيب بالبلدى كده : لما الشخص اللى كان معدى حب يحرج الدكتور بالأدب ؛ الدكتورلحقه , وهو اللى أحرجه " بالدين "

ودى بنقول عليها بلغة الشباب : لبسه بكلمتين

ومعرفش الكلمة دى احنا اقتبسناها منين , ولا أعرف اذا كان فيه قرينة بينها وبين قوله تعالى"يا أهل الكتاب لم تلبسون الحق بالباطل..." ولا لأ, انا مش من العلماء

المقولة معروفة طبعا " العلماء ورثة الأنبياء"

من هذا المنطلق فإنه يمكن لأى حاقد على الإسلام ان يقول : هذا ما أورثه محمد

لكن محمد لو يورث هذا ال(....)

هذا ما تعلمناه فى الأزهر

بسم الله الرحمن الرحيم "...ولو كنت فظا غليظ القلب لانفضوا من حولك..."

"انك لعلى خلق عظيم"

وحينما اخبرنا - صلى الله وسلم - عن نفسه قال "أدبنى ربى فأحسن تأديبى"

انا لن أسمى ما حدث من الدكتور الفاضل ولكن هذا لم يكن ليحدث من النبى لو كان الدكتور يتكلم بلسانه

يفترض بهذا العالم الذى يتشدق بالقرآن والسنة ان يتكلم بأسلوب معين , لكن فى الواقع انه تكلم بأسلوب آخر

إنه الفرق المعروف بين ما يفترض ان يكون وما هو كائن فعليا

لكن الجريمة الابشع هى "تبرير" العالم الجليل - فرزدق عصره - لسلوكه بالحديث الشريف , فيا حسرة على العلماء والأئمة والمشايخ

لكن واضح طبعا انى متحامل , وان الموضوع صغير , وان ده حدث شاذ وليس قاعدة ولا يصح القياس عليه ولا يجوز التعميم

يمكن ده رأيك , لكن انا عرضت رأيى . كلها آراء , يبقى لا رأيك ولا رأيى , تعالى ننزل للواقع...

لما تلاقى واحدة مذيعة ... فى برنامج .. قنوات ليس لها ادنى علاقة بالدين ... تستضيف شوية مشايخ ... يقعدو يغالطو بعض ويتكلمو بأسلوب همجى فى حاجة ليست فى عصرنا وان كانت فهى من فرعيات الفرعيات ... ويظهرو بشكل مخجل او ممكن يكون مضحك وأحيانا يقطع القلب ... وحلقة البرنامج تقلب الدنيا ... لدرجة انك مرة بعد مرة تبدأ تشك ان المعدين بتوع البرامج الحوارية بيدورو على اى ثغرة خلاف فى الدين عشان يجيبو الدراويش ينصبو الحضرة بتاعتهم ..... يبقى الموضوع صغير!

ولما يبقى تناول السينيما والمسرح للشخصيات الدينية الاسلامية - طبعا دون غيرها - بالشكل اللى انت عارفه .... بيقى برده الموضوع صغير !!

ولما يطلع من تحت ظل الظروف دى ... من الأزهر... حالة زى كريم عامر... - مش عارفه ؟ , ولا نسيته ؟ ! - ...يبقى الموضوع صغير!!!

وهل فيه علاقة بين الكلام ده وبين الغرف المخصصة لسب الرسول - صلى الله عليه وسلم - وسب الإسلام بحجة " اين ما تدعون ان محمد علمه لكم " و " ماذا بعد 1400سنة إسلام" , هل كلام الناس دول فيه شئ من الصحة .....ولا لسه الموضوع صغير !!!!!

ولا لما يبقى الموضوع صغير فى نظرك - فى قلبك -..... يبقى لسه الموضوع صغير !!!!!!!!

اسأل نفسك بالله عليك هل الموضوع صغير؟, وما هو ذنب الرسول - صلى الله عليه وسلم - فيما يحدث الآن؟؟؟

[shawshank]

أخي asm504

أولا : حسب معلوماتي المتواضعة ، فإن "اطلبوا العلم من المهد إلى اللحد" موضوع ليس له أصل .

ثانيا : أشعر بغضبك لتصرف ذلك الرجل . لكن عنوان موضوعك و تكراره في المحتوى لا يليق أبدا بخير خلق الله ، صلي الله عليه و سلم .

شكرا جزيلا .

[asm504]

الأخ الكريم , الأستاذ الفاضل / شاوشانك

أشكرك على ردك لى فى خطئى , فبعد ما بحثت - طيلة الليل - عن مدى صحة حديث " اطلبو العلم من المهد الى اللحد " لم أجد له اى أصل فى الأصحاء الستة , وعندما سألت الأخوة فى غرف الدعوة و الدروس قالو انه ليس بحديث وإنما مقولة .

وأعوذ بالله من ان اكون ممن قال فيهم رسوله - صلى الله عليه وسلم - :" من تعمد على كذبا فليتبوأمقعده من النار " (صحيح البخارى - 108), وكفانى بجهلى عذرا , وجزاك الله عنى وعن الإسلام خيرا, ونفعك بما علمت وعلمك مالم تعلم .

واما من الناحية الأخرى , فوالله ما قصدت ابدا الإساءة الى النبى - صلى الله عليه وسلم -, وما كان استيائى إلا من سياسة التبرير, من تصرف هذا الرجل خاصة , وكثير من أمثاله عامة فإنهم يمثلون واجه الأزهر من الداخل والإسلام من الخارج .

وإنما حملنى على كتابة هذا الموضوع - بعنوانه او بشكله او بمضمونه - ما يعتصر قلبى اسفا من ان بعض الحاقدين على الإسلام يستغلون إساءة تصرفات رجال الدين فى تشويه صورة الإسلام ورسول الله - صلى الله عليه وسلم - , فإن كان غرضهم الدنئ معروف بالنسبة لنا , الا اننا مسؤولون - صغيرنا وكبيرنا - عن الأخذ على ايدى بعضنا بعضا لما فيه مصلحة الإسلام , ولا خلاف طبعا على ان يكون ذلك من خلال الكلمة الطيبة والموعظة الحسنة

فالعلماء بشر وقد يخطؤون , والعلم وان كان من المفترض ان ينعكس على السلوك وبخاصة علمنا الشرعى وما يوليه للأخلاق والمعاملات من اهتمام , الا ان الامر لا يخلو من بعض التجاوزات , فمن منا يجرؤ على ان يقول للشيخ او للعالم : كان من الافضل كذا وكذا؟؟؟

فهذا هو ما أردت ان اقوله من ان تخاذلنا تجاه هذه المسؤولية سبب لكثير مما نحن فيه اليوم

ولو علمت بأنى عاقبت نفسى على سكوتى ساعتها بأنى تركت الامتحان - فهو ما كنت أحرص عليه وما دفعنى الى السكوت - دون ان اكتب كلمة واحدة , لقلت اننى مجنون

معروف ان اخطاء التطبيق لا تسيء الى المنهج , وانه مهما ساءت احاول المسلمين فإنه لا يمس الإسلام او الرسول صلى الله عليه وسلم بسوء , وقد استشهدت على رفعة وعلو شأن الرسول (ًص) عن ذلك من الكتاب والسنة

فإن كان من الأفضل تعديل عنوان الموضوع او تعديل ما يستحق التعديل فيه او شطبه كلية , فهناك مشكلة بسيطة : انى لا أعرف كيفية الاتصال بالإدارة لإتمام ذلك

سبحانك اللهم وبحمدك, اشهد ألا إله إلا أنت , استغفرك وأتوب إليك

[maxpayne_007]

انا مش عارف ايه العلاقة بين الدراسة والجامعة وما بين العلم؟؟!!

هيا الناس دى عايشة معانا هنا فى مصر ولا فى بريطانيا ولا اليابان؟؟!!

معنى كدة بقى ان طالب الجامعة اللى بيخش يرمى الكلمتين اللى حفظهم على ورقة الامتحان يبقى من طلاب العلم ! ومعنى كدة كمان ان الدكتور اللى بيتاجر فى الكتابين اللى نقلهم من كتب تانية اللى هيا اصلا ملهاش لازمة -يبقى راجل عالم !!

ومعنى كدة كمان ان الحسن بن الهيثم والفارابى وابن سينا وابن خلدون والبصرى دول كلهم هيخشوا النار عشان ماخدوش شهادة من جامعاتنا العريقة!!!!!!