إمبارح كان التغيير الوزاري . وبكرة تغيير المحافظين

[se_ Elsyed]

بغض النظر بقى عن إن التغيير الوزاري كان لا يُسمن ولا يُغني من جوع .. إلا إن حركة المحافظين اللي هايُعلنها بكرة أحمد نظيف ستكون قاسية جداً .. والشلاليت فيها هاتبقى للصبح .. خصوصاً في المحافظات اللي إنسحق فيها الحزب الوطني في الإنتخابات البرلمانية الأخيرة أمام الأخوان المسلمين .. واللي قيادات الحزب الوطني وجهت إتهامات مباشرة لهؤلاء المحافظين بالتقاعس والنوم في العسل وخروج تلك المحافظات عن نطاق سيطرتهم الحزبية ..

وتوقعاتي إن أول هذه المحافظات ستكون :

1- الإسكندرية

2- المنوفية

3- بورسعيد ( ده أول واحد هايطير )

4- بني سويف

5- المنيا

6- الإسماعيلية

7- السويس

8- واللي أتمناه تكون القاهرة بالمرة خليها تنضف ..

9- سينا شمال وجنوب ولازم المحافظ الجديد اللي ييجي يكون لومانجي وبتاع أمن دولة لإن شكلهم بقى وحش هناك حيث الإنفلات الأمني .

فمش معقول بعد ما مبارك - يييييه قصدي نظيف - يختار المحافظين من رجال الشرطة والجيش الذين يدينون لفخامة معالي الرئيس بالولاء والطاعة العمياء .. وبعد كده ييجي شوية عيال من الإخوان يتغلغلوا إلى صفوف أبناء تلك المحافظات ويكسبوا تأييد وتعاطف الشعب ...

إذا فالمرحلة المُقبلة لا تحتمل التهريج ... آه ... الواد هايضيع مننا ... ولازم نعمله فرشه نضيفة وشعبية بره القاهرة .. ما هي مصر مش القاهرة بس ...

فهيبة الحزب الوطني قد تمرمغت في الوحل .. وخصوصاً في المحافظات الساحلية وأولها إسكندرية اللي نوتها خدت الحزب الفاشي ورجالاته في رجليها ..

وزي ما جدد لفتحي سرور رئاسة مجلس الشيعب :wub: في الفترة الحساسة اللي جايه على أساس إنه يلعب دور عم حسني البارودي في فيلم الزوجة الثانية واللي هانلاقيه قريب بيقول للشعب المصري " إمضي يابو العلا يا بني وأطيعوا الله وأطيعوا الرسول وأولي الأمر منكم " وبعدين جمال هايحطكوا في عينه .. إمضي يابني الله لا يسيئك .. وخد لك سيجارة يابو العلا " لازم برضوا يبقى في بطانة بتسقف لعم حسن البارودي ومحوطة على الشعب في باقي المحافظات وهما المحافظين طبعاً