رحلة فى ساعة زمن

[الأسطى أنكل عزت]

رحلة فى ساعة زمن

الحلقة الأولى

كانت عقارب الساعة تشير الى التاسعة صباحا عندما قمت من سريرى وانطلقت باقصى سرعة نحو البلاكونه وصرخت بأعلى صوتى : يافوزى يا ساعاتى انت ياراجل يا متأخر عن ركب الحضارة

خرج فوزى من محله الموجود أسفل العمارة التى امامنا وهو يضع على عينه تلك العدسة المكبرة التى تذكرنى كثيرا بالقرصان أبو عين واحدة قائلا فى برود : فيه ايه يا اسطى أنكل عزت باشا

الأسطى أنكل عزت : ياعم قوللى يا أسطى أنكل عزت وخلاص انت لسه هتحشى فى ألقاب!! مالغوها من أيام الثورة.

فوزى الساعاتى : معليش يا باشا العين برضه ماتعلاش على الطربوش.

الأسطى أنكل عزت : لا يا سيدى بتعلى. انت ماشفتش الكارتون بتاع الجوز الخيل والعربيه الراجل كان بيرقص حواجبه فوق الطربوش.

فوزى الساعاتى : والله يا باشا ده زمن ...........

قاطعته بعنف قائلا: اه بمناسبة الزمن تقدر تقوللى احنا دلوقت امتى؟؟؟

قال الرجل وهو يضرب كف بكف : لا حول ولا قوة الا بالله هو الزهايمر وصل عندك ، مع انك ساكن فى دور عالى. احنا دلوقت اتنين الظهر

الأسطى أنكل عزت: واما هى الساعة اتنين الظهر الساعة اللى اشتريتها منك امبارح ليه بتشير الى التاسعة صباحا.

فوزى الساعاتى: بتشيرايه و تباشيرايه!!! انا ماليش دعوة انت اشتريتها منى امبارح وهى مظبوطة على التوقيت المحلى لمدينة القاهرة والجيزة وعلى المقيمين خارجها مراعاة فروق التوقيت.

الأسطى أنكل عزت: ماشى يا عم مدفع الافطار. بقى بتلبسنى العمة وتقولى باشا وبيه ومولانا الخديوى وانت شكلك بايعلى ساعة بج بن.

صرخ فوزى : اخرس انا مش حرامى ولو كان الراجل ده اللى بتقول عليه ساعته مسروقة يروح يدور عليها انت فاهم.

الأسطى أنكل عزت: اقولك ايه مانت راجل متأخر زى مانا ماقلت....

بج بن ده مش راجل دى ست يا عديم الذوق.

فوزى الساعاتى: انا عديم الذوق طب لو انت راجل انزلى.

الأسطى أنكل عزت: انا نازلك اوريلك شغلك

فوزى الساعاتى : ياجبان انت لسه هتنزل على السلم علشان الموضوع يكون اتنسى لو راجل بجد نطلى من البلاكونه

الأسطى أنكل عزت : اقلع العدسة المكبرة اللى انت لابسها دى يا بنى ادم انا فى الدور الخامس اللى فوقيه السطوح مش فى الأرضى

فوزى الساعاتى: انت هتسمعلى جواب الترخيص بتاع العمارة انزل رينى نفسك.

وفى غضون سته وخمسين دقيقة كنت تحت امام العمارة اقف فى شموخ بينما وقف فوزى امام محله فى وضع الاستعداد للقتال وربط فوق جبهته استك بنطلون بيجامة فهتفت: أنا جيتلك يا فوزى يا ساعاتى جاهز للقتال حتى الموت

قال فوزى وهو يخرج من خلفه بندول ساعة كبير : حتى الموت!!! أنا مش ناوى اجيب اجلك انا بس هاعرفك غلطك.

قلت وانا اجرى عليه رافعا كبشة كنت اخذتها من المطبخ قبل مانزل وانا بادوق حلة الملوخية : سوف اشرب من دمك بهذه الكبشة نيااااااااااااااااااا

وتلاقت سيوفنا اقصد الكبشة والبندول فسطعت شرارة من اثر ارتطامهما وللحظات كنت اشعر باننى الفارس انكل عزت واواجه كتبغا ساعاتى التتار

اخرجنى من هذه الاوهام ضربه من بندول فوزى اصابت كم القميص فصحت بقوة: كده نتشت القميص الجديد يا وغد الويل للغزاه

ورحت اضرب بالكبشه بكل قوة حتى اطحت بالبندول من يده ووضعت الكبشة على رقبته وقلت فى ثقة : انت انتهيت يا فوزى استسلم والا هاطير رقبتك من على ياقة القميص

صرخ فوزى فى هلع: ابوس ايدك يا اسطى انكل عزت اعقل وابعد الكبشة عن رقبتى لأنها سخنة وبتلسع وريحتها ملوخية حمضانة وانا عندى حساسية.

قلت وانا ابعد الكبشة فى هدوء : انا برضه قلت انها حمضانه لما دقتها.

ودلوقت انا عايزك تعترف بجريمتك امام الشعب وانا هاعفى عنك وهاحكم عليك بالاعدام خمسة وعشرين سنه مع الشغل.

وقف فوزى وسط الناس الذين تجمعوا حولنا للاستمتاع برؤية خناقة فى الشارع حيث تعتبر مشاهدة الخناقات فى شوارعنا اول علامات الشهامة المبكرة.

وقف فوزى وقال : يا شعب قصدى يا اخوانا انا محقوق للاسطى انكل عزت وليه عليه اديله ساعة مافيش زيها ولو شافوها بتوع الساعات فى سويسرا هيغيروا نشاطهم ويعملوا فوانيس رمضان.

قالها ودخل المحل ثم خرج حاملا ساعة كاتينه فى حجم ساعات الحائط وقاللى: اتفضل يا معالى الباشا دى ساعة محترمة وليها وزنها بتاع نص طن اصلى وزنتها عند بتاع الخردة اللى فى السبتيه.

تجمع الناس حولى واخذوا يقبلونى من هنا ومن هنا وانا ارفع الساعة بالعافيه امام الناس كانى فى برنامج كلام من ذهب وانتهى بى الامر بالساعة فى المنزل بعد ما اجرت تلاته شيالين يشيلوها لحد فوق

يتبع

[سهيلة]

اولا ارحب بيك ف المنتدى ياالأسطى أنكل عزت

بجد انا وقعت من الضحك يا ريت تكمل :wub: :) ;)

وبعدييييييييييييييينن

[الأسطى أنكل عزت]

اولا ارحب بيك ف المنتدى ياالأسطى أنكل عزت

بجد انا وقعت من الضحك يا ريت تكمل :wub:  :)  ;)

وبعدييييييييييييييينن

<{POST_SNAPBACK}>

أنا متشكر جدا على ترحيبك ده يا سهيلة

وعايز اقول انى سعيد جدا انى باشارك فى المنتدى

أنا بأحضر للحلقة التانية بس احتمال تتأخر شوية علشان العيد بقى انتى عارفة فته ولحمة والأكل لما بيكبس على أنفاس الواحد مايفرقش بين الكى بورد والريش الضانى.

بس ان شاء الله هاحاول اخدلى قرصين فوار مهضم وأكتب على طول

وكل سنة وكل أعضاء المنتدى طيبين