ما لا تعرفه عما ليس من المهم ان تعرفه...

[ايهاب سالم]

بالمناسبه بما إنك في كندا

و بما أني هأحصلك قريب

تعرف يعني ايه كندا ؟ و جت منين ؟

انا عارف  :blush:  :P

<{POST_SNAPBACK}>

بيقولوا سنة 1535 جاك كارتييه المكتشف كان بيتكلم مع إتنين هنادوة من الإيروكوا فشاوروله على مدينة ستاداكونا (إلي هيا مدينة كويبك دلوقتي)وقالولوه "كاناتا"...وهي كلمة في لغتهم تعني القرية أو المدينة...فأطلق عم جاك أسم كاناتا على القرية والمناطق المحيطة...ثم أستخدمه تجار الفرو بعد ذلك وأطلقوه على كل المناطق التي تقع شمال نهر سان لورنس...وأتحور الإسم بعد كده من كاناتا إلى كندا...

<{POST_SNAPBACK}>

تمام

شكلك بتذاكر عشان امتحان الجنسيه

:wub:

بالمناسبه .. حيرتونا

هيه كويبك و الا كيبك

مونتريال و الا موريال

تورنتو و الا تورنو

انا باسمع طريقتين النطق لكل مدينه و من ناس كانت عايشه في كندا

ايه الحكايه .. نطق انجليزي و نطق فرنساوي و الا ايه

تم تعديل 16 يناير 2006 بواسطة ايهاب سالم

[wagdi]

بالمناسبه ..  حيرتونا

هيه  كويبك  و الا كيبك

مونتريال و الا موريال

تورنتو  و الا تورنو

انا باسمع طريقتين النطق لكل مدينه و من ناس كانت عايشه في كندا

ايه الحكايه .. نطق انجليزي و نطق فرنساوي و الا ايه

<{POST_SNAPBACK}>

شوف ياسيدي.... Quebec لو نطقتها بالفرنساوي بتاع فرنسا تقولها كيبك... أما لو بالفرنساوي بتاع هنا يبقى كويبك... ومتسألنيش ليه... بس هو عامة اللكنة هنا في الفرنساوي بتخلي كلمات كتير أوي تحول...

أما Montreal فبالفرنساوي (بتاع فرنسا وبتاع كندا) ال T بتتنطقش... والأصل أن أسمها كان Mont Royale وMont يعني قمة ..(زي Mont Blanc كدة)... وMont تتنطق Mon بس... أما إزاي بقى تحورت الكلمة من Mont Royale ل Montreal فماحدش عارف...

تورنتو بقى ماليش فيها... ممكن حد من الأخوة الي عايشين هناك يفيدنا...

:blush:

[wagdi]

ليه سموا الهامبرجر (Hamburger)... مع إنه معمول من لحمة بقري مش لحمة خنزير....

في أوائل القرن التمنتاشر كان فيه قبائل من اصل تركي عايشة في وسط أسيا...العالم دي كانت طبيعتها قاسية جداً وكان من عادتهم ياكلوا اللحمة نية... ولأن اللحم النئ قاسي صعب في مضغه فتفتقت قريحتهم عن فكرة نميسة وهي وضع شرائح اللحم تحت سرج الحصان... وبالتالي فحرارة جسم الحصان مع ضغط وحركة الراكب فوق السرج يجعل اللحم أكثر طراوة وسهولة في المضغ... وكانوا يضيفون عليه الملح والفلفل...

قوم بقى واحد تاجر من مدينة هامبورج الألمانية في أثناء زيارته للمنطقة في منتصف القرن التسعتاشر يشوف العالم دي وينقل الطريقة إلى ألمانيا ويقدمها تحت إسم "ستيك هامبورج" hamburg steak....

شوية ويقوم واحد طباخ من هامبورج برضه يقرر يشوي اللحمة ويقدمها في مطعمه...وعلى نهاية القرن التسعتاشر كانت الوجبة دي معروفة بإسم "hamburger meat"....

مع هجرة الألمان إلى امريكا في القرن التسعتاشر انتشرت الأكلة في أمريكا وفي المعرض الدولي في سانت لويس سنة 1904 تم تقديم شرائح اللحم في سندوتشات وأصبحت معروفة ب hamburger....

تم تعديل 18 يناير 2006 بواسطة wagdi

[wagdi]

ليه الكاشيير في المحلات بتطلع صوت جرس اول ما تتفتح...وليه سموها كدة...

الاصل إن البائع كان بيحط الفلوس في درج قدامه...ولكن مع تزايد حالات سرقة الموظفين للنقود من الدرج من غير ما صاحب العمل ياخد باله تم إختراع أول ماكينة، والفكرة إنها تعمل صوت جرس أول ما تفتح عل اساس صاحب المحل ياخد باله ويعرف إن الموظف فتح الدرج ويقدر يوصل للفلوس...

أما الإسم فعلشان أول ماكينة تم تسويقها كانت تسمى "thief catcher"... ومع الوقت بقى إسمها catcher بس، وبعدين إتحورت وبقت cashier...

[wagdi]

بمناسبة الكاشييرات والسوبرماركتات...

عمركومش لاحظتوا إنك عادة بتلاقي نفسك بتلف السوبرماركت كله حتى لو كنت داخل تجيب حاجة أو حاجتين بس... وإن دايماً بتلاقي نفسك اشتريت حاجات أكتر من إلى إنت داخل تشتريها...

أنا كنت فاكر الموضوع مجرد عادة رمرمية بشرية... وبعدين وقعت على كتاب بيشرح أسرار إدارة السوبرماركت...

هو الكتا الصراحة خضني...يعني مثلاً بعد كميات هيستيرية من الأرقام والإحصائيات والدراسات والكلام العك ده وصل الكتاب في الأخر لمجموعة من الحقائق أو الخطوات التي يجب على السوبرماركت أن يفعلها لزيادة مبيعاته...

يعني مثلاً...

- مجرد إن الزبون –إلى هو إحنا- يدخل السوبرماركت يلاقي ستارة تكييف "الهوا الساقع الي بيطس في وشك اول ما تفتح الباب" ويلاقي الارض سيراميك لونها فاتح وبتلمع أول ما يدخل ده بس بيهيئه نفسياً إنه يتقبل 5% زيادة في سعر البضائع عن اسعار عم عبده البقال..

- دايماً المنتجات الورقية ومستلزمات المطبخ والحمام بتبقى في أخر المكان أو مكان يخليك علشان توصله تلف على المحل كله... وكذلك اللبن...دايماً مستخبي ومكانه مش ظاهر أو مش في أول المحل لأن هذه المنتجات (اللبن وحاجات الحمام والمطبخ) لا تخلو منهم قائمة مشتروات... طب هما عايزين يعطلونا ليه؟... لأن كل دقيقة زيادة بتقعدها داخل السوبرماركت معناها 1.7 دولار مشتروات زيادة... وحتى لو نجحت في إنك تمشي بسرعة حتلاقي نفسك واقف في طابور علشان تدفع... والطابور ده مقصود لحد ما... أولاً لأن 18% من الناس بتفتكر حاجات نسيت تجيبها... ثانياً وانت واقف زهقان في الطابور حتبص يمين حتلاقي ستاند بيعرض امواس ومكن حلاقة، وعلى الشمال بطاريات...فتقوم تقول بالمرة...وعادة اسعار الحاجات دي بتبقى أغلى من 5 إلى 15% من سعرها برة...ده غير تشكيلة الشوكولاتات والحلويات والحركات إلى تخلي اي عيل يزن لحاد ما أمه أو ابوه –درءاً لوجع الدماغ- يجيبله حاجة منهم...

على فكرة..فيه تحقيق وثائقي عملته القناة الرابعة الانجليزية على عالم السوبرماركت... الفيلم كامل في الموقع ده...هو له جزء تاني بس مش عارف اعتر عليه...الفيلم مدته 49 دقيقة وحايعذبك شوية لو عندك خط إنترنت عادي بس حقيقي يستاهل...

http://video.google.com/videoplay?docid=7161202110525026493

[أسد]

تصحيح بسيط .. تسمية الوانيت لها علاقة بالرقم 18 ولكن بشكل مختلف شوية ..

كانت السيارات البيك أب تصنع قديماً بمحركات سعة 1.8 ليتر .. وكان مكتوب عليها 1.8 خلف السيارة .. وفي المنطقة الشرقية من لاسعودية كانت هناك شركة أرامكو للبترول وكانت شركة أمريكية ويعمل أمريكان كثيرون في تلك المنطقة ..

وبالطريقة الأمريكاني كانوا يطلقون عليه One, eight car وانتشر الأمر بين سكان المنطقة الأصليين .. واستمرت التسمية وانيت حتى الآن. والبدو يطلقون عليها اسم "دتسن" هكذا ينطقونها .. حيث أن كانت من إنتاج شركة داتسون DATSUN اليابانية والتي هي نيسان حالياً ..

ولازال بعض سكان المنطقة الشرقية يطلقون على يوم العطلة OFF ويقولون (اليوم أوف ، وماحنا بطالعين الدوام).

[أسد]

وفي مصر يطلقون على عجلة أجزاء السيارة .. الدركسيون والفتيس والدبرياج والمارش والمارش دير والجربوكس .. وكلها تسميات ذات أصل إنجليزي أو فرنسي أو إيطالي بعد تحويرها باللهجات المحلية.

[wagdi]

عدنا...

ليه الاسعار دايماً بتبقى رقم مكسور مش صحيح...يعني مثلاً 5.99 مش 6...

هو طبعاً لو سألت أي حد بتاع تسويق حايقولك ده سعر نفسي...يعني مثلاً لما تقول تلفزيون ب699 جنيه غير لما تقول 700...فالرقم الأول بيوحي أن السعر لازال في نطاق الستميات...

بس في الأصل ماكنش ده السبب الحقيقي...

وإلى حصل إن ملفيل ستون مؤسس جريدة "شيكاجو دايلي نيوز" عندما بدأ توزيع جريدته عام 1875 كان سعرها بنس واحد... وأستمرت مبيعات الجريدة في الصعود ثم توقف نمو المبيعات تدريجياً وبدأت في التراجع... وبالبحث وجد ملفيل ان الأمر لا علاقه له بجودة الجريدة بل بنقص حاد في عملة البنس المعدنية...

وكان أن سافر ملفيل إلى مصلحة سك العملات المعدنية في فيلادلفيا ونقل عشرات الصناديق من عملة "البنس" إلى شيكاجو... ثم كانت المشكلة هو كيف يجعل هذه العملات تدور في السوق باستمرار يجعلها في متناول أيد العامة ليشتروا بها جريدته... فبدأ بتشجيع التجار في المدينة بتقليل أسعار بضاعتهم بنس واحد على اساس ان 49 بنس مثلاً أكثر تشجيعاً من 50 بنس... ولاقت الفكرة إقبالاً عند التجار... وضمن بذلك ملفيل وجود بنس على الأقل في جيوب الناس ليشتروا بها جريدته...

وأنتشرت هذه الفكرة سريعاً في العالم كله وتبنتها النظم الاقتصادية كوسيلة مضمونة لبقاء العملات الصغيرة في الدوران بين أيد المواطنين...

[wagdi]

ليه الجماعة –لمؤاخذة- الخامورجية بيخبطوا كاستهم في بعضها قبل ما يشربوا...

اصل الحكاية يعود إلى القرون الوسطى عندما كان من المعتاد وضع السم في الشراب أو في الخمر للتخلص من شخص معين... واصبح من المعتاد عندما يقدم لك أحد كاساً أنك تصب قليل من الخمر من كأسك في كاسه ثم تشربا في وقت واحد... وكان إذا اردت ان تظهر لمن يقدم لك الكأس انك تثق فيه بأن تكتفي فقط بتلمس أو تخبط كاسك بكأسه بدون أن تصب فيه شيئاً...ومع الزمن أصبحت هذه العادة دليلاً على الثقة المتبادلة بين الشاربين... واستمرت إلى يومنا هذا...

[wagdi]

ليه حرف X في أخر الجواب معناه قبلة...وإشمعنا الحرف ده...

الأصل أن في القرون الوسطى ووجود اعداد كبيرة من الناس لا يستطيعون القراءة والكتابة كانوا يستخدمون حرف X كإمضاء في الوثائق... وكان من المتعارف عليه أن تقبيل الشخص لهذا الحرف يعد بمثابة قسم وتعهد بتنفيذ ما جاء في هذه الوثيقة... ومع الوقت أقترن حرف X والقبلة وأصبح رمزاً لها في نهاية الخطابات...

[وليد صفوت]

العزيز جدا وجدى ...

موضوع رائع , ارجوك إستمر

[wagdi]

العزيز جدا وجدى ...

موضوع رائع , ارجوك إستمر

<{POST_SNAPBACK}>

ماهو مش حاينفع لوحدي... لازم تزقوا معايا...أنا عارف إنه موضوع مش تفاعلي بالدرجة الأولى بس بيعتمد على الأفكار...

يعني الإجابات مقدور عليها مع بعضنا...المهم الأسئلة...

طب ندندش الموضوع علشان الناس تسخن معانا...

:wub:

ليه البيكيني سموه كده...؟

تصميم البيكيني يعود لعام 1947 وكان من الإثارة حتى إن الإقبال على شراءه إنتشر بسرعة رهيبة... وأحتار مصممي الأزياء في إسم مناسب له... وتزامن ذلك مع بداية العصر النووي وإنبهار العالم بالقنبلة الذرية... وكان أن قامت الولايات المتحدة بإخلاء 167 مواطناً من سكان أحد جزر المحيط الهادي تدعى "بيكيني" لإجراء أحدى التفجيرات الذرية التجريبية على الجزيرة...

وحدث أن علقت أحد مجلات الأزياء على المايوه الجديد قائلة إن تصميمه له فعل القنبلة الذرية على الرجال... ومن هنا فكر مصممي الأزياء بإستغلال الضجة الإعلامية المصاحبة للتفجيرات في جزيرة بيكيني بإطلاق إسم الجزيرة على المايوه الجديد...

[أسد]

عندي سؤال .....

لماذا نتثاءب .... حسب علمي أنه يحدث بسبب نقص الأكسجين بالدم فتحدث تلك الحركة اللاإرادية للحصول على أكبر كمية من الهواء لتعويض الأكسجين الناقص في الدم ..

ولكن لماذا يحدث نقص الأكسجين في الدم .. بالرغم من أنه يمكن أن يحدث لك وأنت جالس على البحر أو في الحديثة في وسط الأكسجين والهواء ..

وقد يحدث لك عندما تكون في مكان مغلق أيضاً .. ويحدث لك وأنت في الصلاة .. أو وأنت تقرأ ..

هل للموضوع بعد نفسي .. ؟؟؟؟

تشاهد شخصاً يتثاءب فتتثاءب أنت أيضاً ..

[wagdi]

الفاضل أسد...

موضوع التثاؤب ده مالوش إجابة علمية ثابتة...

وأشهر التفسيرات العلمية هي ما أشرت إليه بأن التثاؤب هو محاولة من الجسم للحصول على أكبر قدر من الأكسجين...والأصل أن الإنسان في حالة الإرهاق أو الملل أو الخمول يقل معدل التنفس وتقل كمية الأكسجين التي تصل للرئة...لذلك فعند التثاؤب يزداد إنتباه الجسم ويزداد خفقان القلب ويتخلص الجسم من ثاني أكسيد الكربون المتراكم في الرئة والأوعية ويدفع بالأكسجين إلى المخ...

لكن هذه النظرية وإن كانت منطقية ولها أسانيدها العلمية إلا أنها لا تشرح لنا لماذا التثاؤب معدي...فلو كان الموضوع مجرد تغيرات في جسم شخص ما فما الذي يدفع من حوله للتثاؤب...وإن كان الموضوع نفسي أو تأثر بالمحيطين فلماذا الجنين في بطن أمه يتثائب ومن المعروف أن الجنين لا يحصل على الأكسجين من رئتيه وليس معه أحد يتثائب أمامه...

والتثاؤب كالعطس..من الأمور التي لا يستطيع العلم حتى اليوم تفسيرها بشكل كامل... ولو فسرت منه جزئية تعارضت مع جزئية أخرى...

تم تعديل 28 يناير 2006 بواسطة wagdi

[wagdi]

ليه شعرنا بيشيب لما بنكبر...

لون الشعر سببه مخضب (بيجمنت) إسمه ميلانين...والميلانين نوعين: فيوميلانين (وهو يأخذ درجات الألوان من الأحمر إلى الأصفر) و اليوميلانين (ويبدأ من البني الغامق إلى الأسود)...وإختلاف تركيز النوعين يسبب إختلاف ألوان شعرنا عن بعض... وكون اللون فاتحاً او غامقاً يعتمد على التركيز الكلي لهذا المخضب في الشعر...طبعاً هذا المخضب موجود في أماكن أخرى كثير في أجسامنا وله وظائف أخرى أهمها تحديد لون الجلد...مع السن يقل إنتاج الجسم تدريجياً للميلانين حتى يتوقف تقريباً تاركاً الشعر بلا لون فيبدوا أبيض أو رصاصي فاتح...

[wagdi]

ليه في الإنجليزي بنقول "blackmail" للإشارة للأبتزاز...

في القرون الوسطى عندما كان الإنجليز يسيطرون على معظم أراضي أسكتلندا، كانوا يفرضون على المزارعين ضرائب وإيجارات، وكان الإسكتلنديين يطلقون عليها "mail"...

وكانت هذه الضرائب تدفع فضة...ولذلك كان تسمى "white mail"...

عندما كان يعجز المزارع عن دفع الضريبة أو الحصول على الفضة فكان المالك يقتطع من المحصول أو من الماشية... وكان ذلك يسمى "black mail"... ولأن الأمر كان يخضع لتقييم المالك، فكان عادة يبخس من قيمة المحصول أو الماشية ليحصل على أكثر من مبلغ الإيجار أو الضريبة...ومن هنا أقترن مصطلح "blackmail" بالابتزاز...

[wagdi]

عدنا...

تاني...

ونظراً لإنخفاض نسبة المتفرجين...

قررنا العودة بنيو لوك...بالألوان الطبيعية...

(وراكم لحد ما تزهقوا :blush: )

إلى محبي الكوتشينة نقدم إليكم....

ما لا تعرفه عما ليس من المهم أن تعرفه عن الكوتشينة (وكده يعني...)

اصل الكوتشينة أو ورق اللعب عليه إختلاف...فالبعض يرجعه للعرب والبعض يرجعه للصينيين...والشاهد أن كلتا الروايتين لا يمكن التأكد من صحتهما لعدم العثور على ورق لعب فعلي يعود لهذه الفترة وإنما هيا إشارات في كلا من الأدب الصيني والعربي تشير إلى وجود هذه اللعبة...ولكن ما نعرفه أن الكوتشينة عرفتها أوروبا في بدايات القرن الرابع عشر... وطريقة وصول الكوتشينة للأوروبيين برضه فيها نظريتين... نظرية تقول أن أحد التجار كان في رحلة لبلاد العرب ورأى هناك العرب يلعبونها في الأسواق فعند عودته بدأ في صنع نموذج من الذاكرة مماثل لما رأه، والنظرية الأخرى تقول أن بعض الرحالة سافروا للصين واستقروا هناك فترة وعرفوا اللعبة هناك وعند عودتهم أتوا بها كما هيا إلى أوروبا...

وهنا نرى صور لمجموعة كروت عربية تعود للعصر المملوكي... ونلاحظ هنا أن التقسيمات الأربعة هيا العملة – والسيف – والكاس – و العصا...بالإضافة إلى الملك و"الوزير الأول" و"الوزير التاني" (إلى هما الولد والبنت)... وطبعاً الكروت العربية لم تكن تحمل صوراً لأشخاص وإنما كانت تعتمد على رسومات هندسية مشابهة لما نراه في السجاجيد الشرقية للتفرقة بينهم...

وبسبب ولع الأوروبيون بالطبقية في هذا الزمن فقد قسموا الكروت تقسيم "طبقي" في البداية على أن يندرج الترتيب بداية من الملك ثم الوزير ثم الفارس...ونهاية بالجندي العادي... وكانت الرسومات كلها لرجال في أوضاع مختلفة ويحملون أدوات أو اسلحة مختلفة...

وكان على اللاعب أن يكون على دراية بكل شخصية وترتيبها...ثم كان أن تزايدت الأشكال المختلفة والرسومات على حسب الصانع أو الرسام واختلط الأمر على اللاعبين فقرروا أن يجعلوا الترتيب رقمياً من واحد إلى عشرة ثم الحاجب فالفارس فالملك... (وكانت الأرقام تمثل بعدد من الكئوس أو الزهور أو ما شابه...)

في القرن الخمستاشر ولسبب مجهول إستبدل الفرنسيون الفارس بالملكة، ثم كان أن انتشرت الكروت الفرنسية في إنجلترا وباقي أوروبا وتم إستبدال الفارس بالملكة...

وكان من احد الألعاب التي أنتشرت في هذا الوقت لعبة يكون الحاجب (الولد) هو الكارت الغالب وكانوا يسمون النقطة التي يحصل عليها اللاعب عند إستخدامه للولد (Jack)...

ثم كان أن أراد صانعوا الورق ان يضيفوا رقم الكارت في الركنين المتقابلين من الكارت... وكان من الطبيعي أن يكون رمز الملك king هو حرف الk، والملكة queen هو حرف الq، ولكن المشكلة كانت في الولد (Knave)...فلا يمكن إستخدام أول حرف لأنه سيتعارض مع رمز الملك...لذلك لجأ الصانعون لحرف J كأول حرف من Jack.... ومن هنا جاءت تسمية ولد الكوتشينة بالjack...

ومع تطور المجتمعات وإنخفاض النزعة الطبقية قليلاً أقترح الفرنسيين ان تكون تقسيمات الكوتشينة الاربعة تمثل طبقات الشعب... فكان القلب ليمثل العائلة المالكة والكنيسة، والspade وله شكل السيف ليمثل الجيش والdiamonds (على شكل بلاطات كان تجار أوروبا يزينون بها أرضيات وحوائط دكاكينهم) وتمثل التجار

وأخيراً الclubs على شكل الزهرة وتمثل الفلاحين...

نيجي بقى على الواحد أو الأس (Ace)... نلاقي إن الواحد أعلى من الملك في اللعب... وهذا يرجع أساساً لأيام الثورة الفرنسية وسقوط الملكية... وكان أن اراد العامة أن (يطلعوا عقدهم) فجعلوا الواحد أعلى وأقوى من الملك في اللعب (نظام أصغر ورقة في الكوتشينة احسن منك يا كلب)...

طبعاً الأمريكان لازم يزودوا حاجة من عندهم...وده في سنة 1860 عندما قرر اللاعبون الأمريكان أنهم بحاجة لكارت زيادة يكون مميزاً عن بقية الكروت ويستطيع أن يحل محل أي كارت أخر...فأضافوا كارت الجوكر... وفي البداية كان أسمه The Best Bower" وبعدين إتعدل الاسم فاصبح The Jolly Joker"...وبعدين –كالعادة – تم إختصاره ل Joker...

ونختم بسؤال الحلقة للسادة المشاهدين في المنازل...(جائزة ألف دولار بشيكات بنكية تستحق 31 فبراير)

ليه دايماً الاس الSpade في الكوتشينة تلاقي رسمته كبيرة وحلوة غير بقية الاسات الغلابة؟...

[wagdi]

طب حتى حد يسأل ليه....

منظري بقى وحش أوي... :D

[مصرية الهوى]

ولا تزعل ..

ليه :angry2: ؟؟

لا بجد والله انا متفعلة جداً مع الموضوع .. أقرأ بس من غير تعليق ..

[MZohairy]

وجدي

في حاجه مصيريه ومهمه جدا مش عارفها

ليه الطعميه بتاعة الشارع بتبقى أحلى من طعمية البيت مهما عملت؟

انا سمعت أن كل الزيت ما كان أقدم وطلع عين اللي جابوه غليان كل الطعميه ما تكون أطعم

الكلام ده صح؟ :angry2:

تم تعديل 4 فبراير 2006 بواسطة mzohairy