كحك و غريبة و بيتى فور مامتى ..

[عطر الجنة]

الشبكة العنكبوتية بها الاف الوصفات لكن قلما المقادير المظبوطة ..

السنة دى قررت اعمل حاجة العيد فى البيت لاسباب خاصة و عامة ..

احترت فى وصفات الشيفات .. لكن مامتى الحاجة جى جى قالت هى الحجات دى محتاجة شيفات ..

خدى مقادير الكحك و عليها ..

2 كيلو دقيق ..

1 كيلو سمن بلدى بقرى او جاموسى ..

2 كيس صغير خميرة فورية ..

2 ملعقة صغيرة ريحة كحك  ..

4 ملاعق كبيرة سمسم ..

نصف ملعقة صغيرة ملح ..

نص كوب لبن حليب فاتر ..

الطريقة ..

- لمى شعرك بطرحة و سمى الله ..

- بحلة متوسطة الحجم ضعى السمن و ارفعيها على النار حتى تقدح و حذارى تتحرق حتى لا يظهر طعمها بالكحك و يغمق لونه ..

- بسلطانية صغيرة ضعى الخميرة مع 3 ملاعق صغيرة سكر و نص كوب صغير ماء فاتر وقلبى حتى تذوب ..

- بالاثناء دى هاتى وعاء مناسب لكمية الدقيق و ضعيه فيه و رشى فوقه السمسم و ريحة الكحك و الملح و قلبى حتى يتم الخلط ..

- اعملى حفرة بوسط خليط الدقيق .. و ابعدى اى اطفال بطريقك .. و بكبشة و ضعى السمن المقدوح على الدقيق .. حتلاقى الخليط شبه بيغلى ..

- بعدها قلبى بالكبشة حتى تهدأ حرارة الخليط و تتحمله يدك ..

- ابتدى بسى الخليط بمعنى خدى كمية عجين و اضغطيهم بين راحتى اليد مع انزلاق احداهما فوق الاخرى  .. حتى يتشرب الدقيق السمن و يتوزع بالتساوى ..

- ستجدى الخميرة المذابة زاد حجمها اضيفيها للعجين و قلبى بيدك حتى تتوزع صح ..

- اضيفى الحليب و اتمى العجن و لملمى العجين ..

- قطعى العجين كور صغيرة و افرديه دائرة 3 سم و سمك 1 سم و انقشيه و ضعيه فى الصاج و اتركى مسافة 2 سم بين كل كحكة و التانية

- اتركى الكحك حوالى ساعتين حتى يخمر فى مكان دافئ ..

- و لعى الفرن حتى يسخن بعدها ضعى الصاج على الرف الاوسط .. مع ملاحظته لانه مش بياخد وقت كبير فى الفرن .. يدوب قعدة الكحكة تحمر .. و الوجه يبتدى يتغير لونه ..

- بعد خروج الكحك من الفرن نتركه يبرد على الصاج .. بعدها رشة سكر ناعم و الف هنا ..

ده كحك سادة ..ناعم و رائع ..

انا كتبتها هنا عشان لو لى عمر اجدها العام القادم ..

 

 

 

[suma]

 صباح الأنوار والكحك والسكوت والشاي باللبن.

 إن عمايل الكحك في البيت وطقوسه التي لا تتغير في كل البيوتات في مصر  شيء جميل ومبهر حقا. 

انا مولعة بعمل الاشياء بيدي..كنت..وابنتي الكبري لما كبرت كانت المعين لي  كنا نعمل كل الانواع ونسويه في البيت  ..كنا نتفنن ونخترع الانواع ولازم نوزع منها على الصحاب..استمرينا هكذا سنوات وسنوات .

  لكن للأسف جاء موجة الجاهز مع انحدار صحتي معينا كي اكف عن تلك العادة الجميلة خاصة وانني كنت أعمل كل حاجة بلا مقادير كله بالويم كما يقولون!!!!

..ومع هذا انا ادعوا كل النساء والفتيات ان تعمل بيدها تلك الأشياء ولو بكميات قليلة على ان يكون الأطفال شاهدين ومشاركين ايضا لأنها جزء أصيل من طقوس العيد.

 

           كل سنه وانتم طيبين .

              سومه

[عطر الجنة]

39 دقائق مضت, suma said:

 صباح الأنوار والكحك والسكوت والشاي باللبن.

 إن عمايل الكحك في البيت وطقوسه التي لا تتغير في كل البيوتات في مصر  شيء جميل ومبهر حقا. 

انا مولعة بعمل الاشياء بيدي..كنت..وابنتي الكبري لما كبرت كانت المعين لي  كنا نعمل كل الانواع ونسويه في البيت  ..كنا نتفنن ونخترع الانواع ولازم نوزع منها على الصحاب..استمرينا هكذا سنوات وسنوات .

  لكن للأسف جاء موجة الجاهز مع انحدار صحتي معينا كي اكف عن تلك العادة الجميلة خاصة وانني كنت أعمل كل حاجة بلا مقادير كله بالويم كما يقولون!!!!

..ومع هذا انا ادعوا كل النساء والفتيات ان تعمل بيدها تلك الأشياء ولو بكميات قليلة على ان يكون الأطفال شاهدين ومشاركين ايضا لأنها جزء أصيل من طقوس العيد.

 

           كل سنه وانتم طيبين .

              سومه

اسعد الله صباحاتك ..

احنا المصريين اصحاب طقوس بكل المناسبات ..

يمكن لاننا شعب كان مترابط فكنا بندور على شئ يسلينا قبل وصول الفضائيات إلينا ..

فإبتكرنا حجات نتجمع ونتشارك بعملها ..

و لما قل وقت فراغنا و اخدتنا الحياة لجأنا للجاهز ..

السنة دى اتجمعت و مامتى و ابنتى .. ماما كانت مبسوطة اننا فعلنا طقس قديم ..

انا فرحت لخلق ذكرى ستدوم معى ما حييت و تذكرت ايام كنت ببيت ابى ..

ابنتى فرحت ايوة .. لكن قالت ماله الجاهز .. زى الفل ..

يا رب يديم عليكى الصحة و العافية و تفرحى دوما بالاولاد و الاحفاد ..

و يديم علينا طقوس الفرحة ..

[حسين امبابي]

         بالهنا على القلب   

[عطر الجنة]

9 ساعات مضت, حسين امبابي said:

         بالهنا على القلب   

الله يهنيك ..

كل عام و انتم بخير ..

[عطر الجنة]

الغريبة هانم ..

ايوة و ست الهوانم كمان .. لانها مش بتستحمل تقعد فى النار وعاوزة الواحد ياخد باله منها ..

من الملاحظ ان الغريبة و الكحك مقاديرهم وزنية لكن البيتى فور مقاديره مكاييل ..

ايضا الغريبة و الكحك لازم سمن لكن البيتى فور ممكن سمن او زبد ..

المقادير ..

وحدة وزن دقيق ( 1 كيلو )

نص وحدة الوزن سمن بلدى ( نص كيلو )

ربع وحدة الوزن سكر بودرة ( ربع كيلو )

فانليا

لوز و عين جمل و لولى للتزيين

كاكاو

الطريقة ..

- بوعاء عميق مناسب للكمية اضع السمن و السكر و الفانيليا و ابدأ الخفق بالرباب الكهربائى حتى احصل على قوام هش يشبه القشدة ..

- اضيف الدقيق و اقلب باليد حتى احصل على  عجينة شبه متماسكة ..

- افصل جزء من العجين بوعاء اخر و اضيف ليه كاكاو ..

- ابتدى اعمل كور من العجين بقطر 1سم و اضغط عليها باصبع اليد لتصبح دائرة قطرها 1.5 سم ..

- ارص الغريبة بالصاج و اترك مسافات بينها ..

- اغرز اللولى و اللوز و قطع عين الجمل للتزيين ..

- اسخن الفرن و اضعها بالرف الاوسط حتى يتغير لون قاعدة الغريبة ..

- تتركك بالصاج حتى تبرد و تتشال بحرص ..

الف هنا و شفا ..

 

 

[عطر الجنة]

ياه ..

مرت سنة ..