نخصخص ولا ما نخصخصش

[se_ Elsyed]

باديء ذي بدء - جامده دي - أنا لست إشتراكياً ولا من الإخوان الشيوعيين ولا لدي أي ميول كوميونيزمية روسية ماركسية مُتعفنه ... وبالتالي أنا ضد إمتلاك الدولة لكل أدوات الإنتاج وبالتالي عدم إتاحة الفرصة للقطاع الخاصة للمشاركة في الإنتاج ..

ولكني في نفس الوقت ضد الخصخصة والبيع العشوائي لتلك الأدوات ... وهو بالضبط ما يحدث في مصرنا الحبيبة في عملية أشبه بالسرقة والنهب المُنظم - الحرامية مجهولي الهوية حتى الآن .. عشان ماحدش يفهمني غلط أو يقولي قصدك إيه ياد ؟ ولا أنت بتعيب في الزيت المليكة يا فسل ؟ أو إنت بتتهمنا في شرفنا يا رعديد ؟ -

فعندما أقرأ خبراً إقتصادياً أول امس يقول بإن حصيلة الخصخصة وبيع القطاع العام خلال الستة شهور الماضية فقط بلغت 1.9 مليار دولار أي حوالي 11 مليار جنية .. يبقى لازم أقلق ...

فالستة شهور دول لا يعتبروا شيئاً على الإطلاق جنب ما فعله عاطف عبيد - طبعاً هو ما بيتصرفش من نفسه - اللي باع البلد كلها ....

نرجع ونقول ... البيع حلو والخصخصة مش حرام ..

لكن تعالى قولي بقى يا حلو انت عملت إيه بالمليارات دي ؟

لو كنت يا سيادة الرئيس ومن وراءك السادة الوزراء صرفتوها على بطوننا - قالوا أبو فصادة بيعجن القشطة برجليه ... قلنا كان بان على عرقوبه - يبقى عليه العوض ومنه العوض على مستقبل أولادنا اللي هايكبروا ومش هايلاقوا لهم بلد أصلاً .

ولو كنت يا فخامة الرئيس صرفتهم على أدوات أخرى للإنتاج - حاشا لله - برضوا كان بان على عرقوبنا وكنا شوفنا مصانع جديدة وأراضي مستصلحة وحراك إقتصادي ومحاولة جادة للخروج من رقبة القزازة - عُنق الزجاجة - اللي سعادتك حشرنا فيها من ربع قرن لحد ما قروننا وقعت ...

ولو كنت سعادتك سددت بهم ديون مصر اللي بقت عامله زي الحيل اللي بيطلع للبني آدم مننا في رقابته لما يكون عنده تضخم مُزمن في الغدة الدرقية وما تحركتش عن 35 مليار دولار حتى بعد القرشين اللي هلبناهم مقابل إرسالك للمرتزقة المصريين لتحرير الكويت الشقيقة وبعد ما فاعلي الخير أسقطوا عننا جزء كبير من الديون عشان طلعنا مؤدبين وبنمسع كلام الألهة الأمريكية العُظمى .. لكن بعد ده كله المعجزة حصلت وسبحان الله ربنا بارك في الديون دي ببركة مبارك وما نقصتش يا أخي حتى بعد ما بنسدد خدمة الدين كل سنة !!!!! على اساس إن الناس اللي مسلفنا دول ناس بركه وقرشهم حلال ..ز والقرش الحلال عمره ما ينقص ولا يضيع ..

ولو كنت سعادتك مش عارف - مثلاً مثلاً - إن فلوس البيع إتقلبت وإتصادرت في جيوب السادة المسئولين .. يبقى عليه العوض في البلد ( أنظر الكتاب صفحة بيع شركة الأهرام للمشروبات .. اللي تمت في صفقة مُريبة بين عبيد والزيات وثمنها ما جبش ثمن الأرض

خصوصاً بعد التصريحات النارية لوزير الإستثمار بإن الفترة القادمة ستشهد مزيداً من بيع شركات الدولة ومزيداً من الخصخصة ( آلآونا .. آلادوي .. آلا تريه .. معانا دلوقت هرم الملك خوفو .. تحفة فنية فرعونية أثرية ... هانفتح المزاد على 450 جنية .. مين يزود يا بهوات )

بس أنا بأحذر من دلوقت أهو ... أي حد هايقرب من بيتنا وينزله في المزاد عشان يتخصخص .. هاروح فيه في داهية وهابطحه .. وماحدش يقولي إنت واقف في شارع الحكومة .. وبيتكم مبني على شارع الحكومة .. يبقى الحكومة لها الحق إنها تبيعه - للمصلحة العامة يابو العلا وأطيعوا الله وأطيعوا الرسول وأولي الأمر منكم -

حسبنا الله ونعم الوكيل

حسبنا الله ونعم الوكيل

حسبنا الله ونعم الوكيل

[khedr]

اخونا اسمح لي بالمداخله ولك كل الحق في الغائها..تعديلها....ارسالها الي ..؟؟؟

الاشتراكية: أن تكون لديك بقرتان تعطي واحدة لجارك‎.

الشيوعية: أن تكون لديك بقرتان فتأخذ الحكومة الاثنتين وتمنحك بعض اللبن‎.

الفاشية: أن تكون لديك بقرتان فتأخذ الحكومة الاثنتين وتبيع لك بعض اللبن‎.

النازية: أن تكون لديك بقرتان فتأخذ الحكومة الاثنتين وتعدمك‎ .

البيروقراطية: أن تكون لديك بقرتان فتأخذ الحكومة الاثنتين وتقتل واحدة وتحلب الأخرى وتلقي باللبن بعيدًا‎.

الرأسمالية: أن تكون لديك بقرتان فتبيع واحدة وتبتاع ثورًا، من ثم ينمو القطيع فتبيعه وتتقاعد معتمدًا على الدخل‎.

شركة أمريكية: أن تكون لديك بقرتان فتبيع واحدة وترغم الأخرى على أن تعطيك لبن أربع بقرات ثم تستأجر خبيرًا استشاريًا لفهم لماذا ماتت البقرة‎.

شركة فرنسية: أن تكون لديك بقرتان فتعلن الإضراب لأنك تطالب بثالثة‎.

شركة يابانية: أن تكون لديك بقرتان. تعيد تصميمهما جينيًا بحيث تصيرا عشر حجم البقرة العادية، مع مضاعفة اللبن عشرين مرة. ثم تبتكر شخصية بقرة للرسوم المتحركة اسمها (كاوكيمون) وتسوقها في العالم كله‎.

شركة ألمانية: أن تكون لديك بقرتان. تعيد تصميمهما جينيًا بحيث تعيش الواحدة مائة عام وتحلب نفسها وتأكل مرة كل شهر‎.

شركة إيطالية: أن تكون لديك بقرتان لكنك لا تعرف أين هما ثم تكف عن البحث لأن ساعة الغداء حانت‎.

شركة روسية: أن تكون لديك بقرتان تعدهما فتجد أن لديك خمس بقرات‎. تعد من جديد فتجد أن العدد 42 تعد من جديد فتجد أنهما بقرتان تتوقف لتفتح زجاجة فودكا أخرى‎.

شركة سويسرية: أن تكون لديك 5000 بقرة لا تملك واحدة منها. لكنك تتقاضى من الآخرين ثمن الاحتفاظ بها‎.

شركة صينية: أن تكون لديك بقرتان ولديك 300 واحد لحلبهما. تنشر أخبارًا عن انعدام البطالة وتقدمُ صناعة الألبان وتعتقل الصحفي الذي نشر الأرقام الحقيقية‎.

شركة هندية: أن تكون لديك بقرتان وأنت تعبدهما‎.

شركة بريطانية: أن تكون لديك بقرتان مجنونتان‎!

شركة مصرية: أن تكون لديك بقرتان كلتاهما ذهبتا لمبايعة .. .. ..

منقول بتصرف

[se_ Elsyed]

قرأت في اليومين الماضيين خبرين بيؤكدوا الفساد العفن المحيط ببيع ممتلكات الدولة وتورط الوزراء والسادة كبارات رجال الدولة - ربنا عالم اللي في نيتي - في تلك الصفقات المشبوهة :

الغموض يحيط بصفقة بيع البنك المصري الأمريكي:

شركتان تشتريان 5.2 مليون سهم في 4 أيام بسعر 50 جنيهاً

كتب سليمان فؤاد:

استمر الغموض حول صفقة بيع البنك المصري الأمريكي لبنك "كاليون" الفرنسي... قامت شركتا "التجاري الدولي" و"نايل" بشراء أكثر من 5.2 مليون سهم من المساهمين في 4 أيام. بسعر يتراوح بين 88.49 جنيه و50 جنيها رغم أن عرض "كاليون" الفرنسي 45 جنيها للسهم و5 جنيهات لصندوق العاملين. وتبلغ 330 مليون جنيه.

أكد خبراء البورصة أن جمع حصة المساهمين وشراءها من البورصة ويبلغ عددها 12 مليون سهم يضع علامات استفهام كثيرة حول الصفقة. خاصة وأن السهم كان يطرح قبل الصفقة بساعات بسعر 56.58 جنيه.. كما أن أحد الصناديق المملوكة لأحد البنوك المساهمة بحصة كبيرة في البنك قد طرحت كميات ضخمة للمستثمرين خلال المفاوضات مع "كاليون" الفرنسي مما يخل بنظام الشفافية واستغلال المعلومات في حصد الملايين من المستثمرين.

أثار العرض الفرنسي استياء المستثمرين. الذين اشتروا السهم منذ 3 شهور بنحو 72 جنيهاً. مما يسبب لهم خسائر كبيرة.

الخبر الثاني يقول بإنه تم إيقاف صفقة بيع بنك الإسكندرية بعد أن تقدم إثنان من أعضاء مجلس الشعب بطلب لإيقاف الصفقة لتورط إثنين من الوزراء الحاليين فيها ....... لا تعليق

[أبو محمد]

نرجع ونقول ... البيع حلو والخصخصة مش حرام ..

لكن تعالى قولي بقى يا حلو انت عملت إيه بالمليارات دي ؟

عندك ألف حق فى السؤال ده يا سى السيد وفى كل الأسئلة التى طرحتها كفروع للسؤال الكبير ... ولكن هناك سؤال آخر لابد من توجيهه :

لما نيجى نبيع (والإسم الشيك للبيع هو الخصخصة) .. نبيع إيه .. المؤسسات اللى بتجيب لنا دخل ولا اللى بتخسر؟ .. المنطق بيقول طبعا اللى بتخسر .. طيب وهى شركة الاتصالات بتخسر ؟ ... الشركة الشرقية للدخان بتخسر ... ده الاتنين دول بس بيدخلوا للدولة زى قناة السويس ويمكن أكتر

أنا زيك مش ضد الخصخصة .. بل ممن ينادون بها لإيمانى أن الدولة شغلها الأساسى (داخليا) هو وضع السياسات والإشراف على تنفيذها بما يضمن صحة وعافية الاقتصاد وتقديم الخدمات العامة (بنية تحتية - تعليم - صحة - وخلافه) لتحقيق مستوى معيشة كريم لأبناء الوطن .. هذا هو الشغل الأساسى للدولة وليس بيع السجائر والمفروشات والمشروبات للشعب

ولكن يجب أن نبدأ ببيع المؤسسات الخسرانة .. أو اللى يادوب بتغطى تكاليفها أو اللى ربحها مش جايب همه .. أما الشركات اللى بتكسب فلازم تتباع بيع غناوة .. وبمنتهى الشفافية ، سواء فى عملية البيع أو فى توظيف عائد البيع ..

ولا ننسى أن هذه الشركات كان أساسا غير مملوكة للدولة بل لأفراد سواء مصريين أو أجانب .. وقامت الدولة بتأميمها وشغلت نفسها بيها وأدارتها بأسلوب المال السايب اللى يعلم السرقة فانخفض مستواها ومستوى العاملين بها .. وبدلا من صرف عوائدها على تطويرها وتطوير العاملين بها .. تم إنفاق تلك العوائد على تحرير الجزائر واليمن ومناصرة لومومبا ضد تشومبى وحاجات خايبة كتير معروفة وحكاياتها أصبحت ملتوتة

[se_ Elsyed]

عايز أوضح نقطة مهمة هنا يا أبو محمد

الخصخصة تختلف تماماً عن تحويل الشركة العامة المملوكة للدولة إلى شركة مُساهمة تُداول أسهمها في السوق..

أما الخصخصة فهي بيع الشركة لمستثمر واحد أو لمجموعة ... وده الحب كله .. واللعب على أصوله والعمولات اللي بالمليارات ... تصور يا راجل يا مؤمن لما بيبيعوا الشركة من دول ما بيحطوش ثمن الأرض ضمن قيمتها ... إوعى تضحك أنا شايفك من وراء الميكرفون

وتصور بقى إن أراضي بعض تلك الشركات بتصل قيمتها إلى مليارات خصوصاً بقى لو موقعها مميز على النيل مثلاً أو بحري وعلى ناصية :wub:

لكن كله بيمشي من فوق وشغال ياريس وكله تمام ...

تصور بقى كمان - هاتتصور إن شاء الله - إن شركة الأهرام للمشروبات إتباعت من غير ولا مليم .... آه والله يا عم أبو محمد وما تقولش كده قدام محمد عشان الولد ما ياخدش بعضه ويهج ويسيب البلد ..

تقولي إزاي ( قولي إزاي بسرعة )

عمنا أحمد الزيات ( المُشتري إبن رئيس الوزراء السابق ) وهو بيخلص الصفقة أخد قرض من البنك بضمان الشركة اللي لسها ماشترهاش lol B) يعني من دقنه وإفتله وخد فلوس البنك ودفعها للحكومة - ركز معايا - وبعد كده باع الشركة لشركة هاينيكن الأمريكية " بأضعاف أضعاف ثمن الصفقة ... طبعاً اللي لهم في البيره عارفين الشركة دي كويس .. وخدوها يا ريس وراحوا مغييرين شكل عبوات البيرة ( ستيلا ) على فيروز ( التطور الطبيعي للحاجة الساقعة ..

إوعي تفتكر إن الزيات ده راجل سوبر أو خارق للعادة .. أبداً ده واحد عادي زي وييك .. لكن لما يكون مسنود من اللي فوق وعلى رأسهم ملك البيع وإمبراطور المانجا قصدي الخصخصة السيد اللواء الوزير الدكتور / عاطف عبيد - طيب الله ثراه - يبقى أبو 100 يبقى بمليم .. والبنوك تتفتح على مصراعيها للقروض .. والصفقات تمشي زي الحلاوة ....

وخد وا الحتة اللي جاية دي وكفايه عشان نفسي غمت عليه

الوصلة

العربى تواصل فتح ملف فضائح الخصخصة

المستثمر المصرى محلل لشركة البيرة فى الأهرام

الشركة المصرية تحولت لعزبة خاصة فى يد الإدارة

الحكومة باعت الشركة ب 231 مليونا والمركزى للمحاسبات يقيمها ب 500 مليون جنيه

فصل وتشريد العمال لأتفه الأسباب

الضجة الإعلامية التى صاحبت بيع شركة الأهرام للمشروبات مازالت أصداؤها تلاحق العمال حتى الآن، فقد اعتبرها البعض نموذجا ناجحا للخصخصة ومع ضعف موقف العمال وقعوا ضحية للكبار الذين يعرفون وحدهم أسرار اللعبة فبعد أن بيعت الشركة لمجموعة الأقصر المحدودة كمستثمر رئيسى وهى شركة أمريكية تم تأسيسها وفقا لقوانين ولاية نيويورك ويمثلها أحمد الزيات رئيسا لمجلس الإدارة ويحمل جواز سفر أمريكيا برقم 111332116 كان قد قدم وديعة لضمان حسن النية فى الشراء بمبلغ مليونين و 497.500 جنيه ليتم تعديل عرض الشراء بواقع 75% تقريبا كأسهم اسمية من رأسمال الشركة لتصل إلى ثلاثة ملايين و373 ألفا و 520 سهما ليستقر سعر السهم عند 67 جنيها بحيث تبلغ القيمة الإجمالية 231 مليونا و 86 ألف جنيه كقيمة نهائية لشراء الشركة وبالفعل تم تكوين مجلس إدارة من الأمريكان ويضم أحمد علاء الزيات مصري، وشريف علاء الزيات مصري ودان بيرو أمريكى، وعمر يوسف سعد الدين مصرى ومحمد أنور جمال مصري وأندور كابيتنمان أمريكى وعلاء الدين جمال مصري ومحمد محمد أحمد الطير من شركة مصر للتأمين ومحمد محمد سليمان الهضيبى ممثلا لاتحاد العاملين المساهمين.

فقد طرحت الشركة لمستثمر رئيسى للمرة الأولى رغم بيع 17 مجموعة مستندات طرح الأشخاص الشركات والبنوك المختلفة ولكن العروض رفضت لتدنى القيمة، وتم طرح الشركة مرة أخرى للبيع واقتصر المستثمرون المتقدمون للشراء على عدد قليل انتهت معه اللجنة الوزارية للخصخصة واجتماعها على طرح أسهم الشركة من خلال بورصة الأوراق المالية بعد نقل ملكية أراضى ومبانى مصنعى الجيزة والإسكندرية إلى حوزة الشركة. عيد جمعة محمد سلامة أمين عام اللجنة النقابية بالأهرام للمشروبات أشار إلى أن عدد العمال فى ظل القطاع العام كان 4 آلاف عامل وبعد الخصخصة خرج البعض منهم للمعاش والمعاش المبكر وتصرف الحوافز للعمال بنسبة 100% ويحصلون على ساعات عمل إضافية رغم أن هناك العديد من العمال المؤقتين بالشركة. لطفى إسماعيل الجداوى رئيس اللجنة النقابية بشركة الأهرام للمشروبات سابقا أضاف أن عدد العمال زاد بعد بيع الشركة بالإضافة إلى طرح ثلاثة أنواع من البيرة.

فالمذكرة رقم 98 التى عرضت على مجلس الإدارة بشأن المركز المالى للشركة وضح تلخيصا حقيقيا لقيمة الصفقة بالمقارنة بتقديرات الجهاز المركزى للمحاسبات وما تم بيعه من خلال سوق الأوراق المالية فقيمة الشركة قدرها الجهاز بمبلغ 489 مليونا و 821 ألف جنيه وقيمة الشركة بدون أراض ومبانى مصنعى الجيزة والاسكندرية بمبلغ 253 مليونا و 688 ألف جنيه وقيمة الشركة بدون الأراضى والمبانى وفقا للطرح العام بسعر السهم 67 جنيها بمبلغ 301 مليون ونصف المليون جنيه ولكن الحكومة باعت بأبخس الأسعار بمبلغ 231 مليونا و 86 ألف جنيه طبقا للعقد الذى حصلت عليه العربي.

  وبعد عدة سنوات تم بيع الأهرام للمشروبات لشركة هاينيكن الأمريكية من مجموعة الأقصر وهللت وسائل الإعلام لعملية البيع باعتبارها أكبر الشركات العالمية على اعتبار أن لديها القدرة على تحقيق الأرباح بالملايين ونسى الجميع أن الشركة تضم 1450 عاملا مصريا قاموا ببناء الشركة على أكتافهم على مدى أكثر من 15 عاما مقابل تقاضيهم الملاليم، فبعد إنهاء عمليات توسعية بمصانع الشركة وإعادة ترتيب السوق الداخلى طرح مشروع المعاش المبكر على العاملين فى محاولات هستيرية لاقناعهم بالمعاش واستقدام غيرهم من الأجانب وتلقت إدارة الشركة المصرية الأوامر بتطفيش العمال، وتعذيبهم ورغم أن حالة منتجات الشركة مستقرة فى السوق فقد أصرت الإدارة على تطفيش العمال فقد قامت بإيقاف اللجنة النقابية وتكوين لجنة إدارية مكانها طبقا لقرار النقابة العامة للصناعات الغذائية والتى قررت أيضا الموافقة على نقل المصنع إلى مدينة العبور كما فضت الإدارة صندوق الزمالة للاستمرار فى تطفيش العمال رغم أنه كان يضم 8 آلاف جنيه طرف النقابة العامة واستمرارا لذلك بدأت الإدارة التعسف ضد العاملين بشكل مستفز وهو ما دفع العمال لرفع دعوى قضائية ضد الشركة بسبب عدم صرف مستحقاتهم عند الخروج على نظام المعاش المبكر وتم إجبارهم على تقديم استقالاتهم أحد أعضاء اللجنة النقابية المنحلة قال إن ممارسات الشركة الهولندية اسفرت عن خطط جديدة لتطوير الشركة وكانت البداية التخلص من العمال ولكن عمال الشركة رفضوا المعاش المبكر عام 2003 وبدأت معها قرارات الجزاءات وفجأة حدثت عمليات نقل واسعة للعديد من العمال بعضهم نقل للاسكندرية ثم عودتهم للجيزة وبعضهم نقل إلى 6 أكتوبر والعبور وكان الهدف هو إجبار العمال على قبول المعاش المبكر. ولم تتوقف المهزلة عند هذا الحد وإنما تعمدت إدارة الشركة تشريد العمال فى شهر يوليو من كل عام على أتفه الأسباب والاعتراض يواجه باجتماع للجنة الخماسية التى توافق مباشرة على الفصل.

ورغم شكاوى العمال المتلاحقة والتى يتلقاها مكتب العمل ووزارة القوى العاملة إلا أن أحدا لا يتحرك فتحولت الشركة إلى عزبة خاصة بعد إعلان عبدالحميد إبراهيم رئيس هيئة سوق المال آنذاك أن الصفقة تعكس الثقة فى الأوضاع الاقتصادية فى مصر وهو ما أكده أحد أعضاء اللجنة النقابية السابقة أن الحسبة ليست شركة وبيع وتشريد عمال بقدر ما هى أموال يتم اللعب بها فى هيئة سوق المال فالزيات اشترى الشركة ب 231 مليون جنيه وبعد أربع سنوات باعها ب 1.4 مليار جنيه للشركة الهولندية ووصل حجم الاستثمار فى الشركة خلال أربع سنوات إلى 925 مليون جنيه اشترى الزيات مصنع العبور وحده ب 53 مليون وشركة الجونة ب 255 مليون جنيه، كما اشترى مصنع جناكليس ب 3 ملايين ومصنع بدر بما يعادلها وأنشأ 50 منفذا جديدا للبيع، وأسس شركة للتوزيع وأضاف 12منتجا جديدا وزادت المبيعات السنوية من 240 مليون إلى 597 مليون جنيه بزيادة وصلت إلى 249% وارتفع التصدير من 93 ألفا إلى 500 ألف صندوق بزيادة 436%.

[alshorok]

السلام عليكم ورحمه الله

الموضوع رائع من الاستاذ/سى السيد ومهم جدا

أنا ليا راى ياجماعه فى موضوع الخصخصه ده .؟

الخصخصه فى حد ذاته وهى كما اوضح الاخ العضو نقل ملكيه الشركات من الحكومه الى الافراد والشركات وذللك بطرق شتى كما اوضح (مستثمر رئيسى-اسهم بالبورصه من خلال الاكتتاب.. الخ) وذلك شىء طبيعى يتوافق مع انتهاء عصر الاشتراكيه من زمن بعيد ويتمشى مع السياسه الراسماليه التى اصبحت واقع موجود وقائم ومسييطر لا يستطيع احدنا انكاره. وهذهالسياسه تتعارض بالطبع مع ملكيه الدوله للمشروعات وبالذات الانتاجيه منها(المصانع) واثبتت اغلب دول العالم فشل فى اداره هذه المشاريع بنجاح . واعتقد ان اغلب دول العالم قد قامت بصوره اوبأخرى بييبع المشاريع الموجوده فيها للقطاع الخاص وهناك بعض الدول باعت الطرق والكبارى ومشاريع الخدمات الجماهيريه حتى يستطيع القطاع الخاص اداراتها بطريق احترافيه تساهم فى تقديم ارقى الخدمات للناس مقابل مبالغ زهيده(رايت مثال ذلك فى دول كانت من مستوانا) مثل تركيا و رومانيا والبرازيل......

ولكن اعتراضى الكبير طبعا والواضح والاساسى على غياب الشفافيه..... والله ما انا عرف اقول ايه ولا ايه؟؟؟

كذب فساد رشاوى انعدام الشفافيه تمويل هذه الصفقات بمال البنوك التلاعب بمقدرات العمال

تحياتى

الشروق

[أبو محمد]

تصور يا راجل يا مؤمن لما بيبيعوا الشركة من دول ما بيحطوش ثمن الأرض ضمن قيمتها ... إوعى تضحك أنا شايفك من وراء الميكرفون

الظاهر إن أنا شكلى بقى كده .. اللى يشوفنى باعيط يقول علىّ باضحك .. والله يا سى السيد هم يضحك وهم يبكى .. بس فى النهاية كله هم

تصور بقى كمان - هاتتصور إن شاء الله - إن شركة الأهرام للمشروبات إتباعت من غير ولا مليم .... آه والله يا عم أبو محمد وما تقولش كده قدام محمد عشان الولد ما ياخدش بعضه ويهج ويسيب البلد ..

محمد بيتلكك ياسى السيد ومش ناقص إنى أقول قدامه أى حاجة .. الشاب المسكين لقى شغلانة فى بنك راح طالع له اللى يقوله الشغل فى البنوك حرام ... يقولهم أنا مهندس كومبيوتر وماليش دعوة بالمعاملات البنكية ... يقولوله .. يكفى أنك بتعينهم على الربا وبتقبض من أموالهم ... اللى مش لاقى شغل عاوز يهج واللى لقى شغل برضه عاوز يهج

عمنا أحمد الزيات ( المُشتري إبن رئيس الوزراء السابق ) وهو بيخلص الصفقة أخد قرض من البنك بضمان الشركة اللي لسها ماشترهاش lol  يعني من دقنه وإفتله وخد فلوس البنك ودفعها للحكومة - ركز معايا - وبعد كده باع الشركة لشركة هاينيكن الأمريكية " بأضعاف أضعاف ثمن الصفقة ... طبعاً اللي لهم في البيره عارفين الشركة دي كويس .. وخدوها يا ريس وراحوا مغييرين شكل عبوات البيرة ( ستيلا ) على فيروز ( التطور الطبيعي للحاجة الساقعة ..

والله فكرتنى بسبوبة مشروعات ال B.O.T اللى الغرض الأساسى منها استخدام رأس المال الأجنبى فى الاستثمار لتغطية النقص فى رأس المال المحلى ... يقوم الحيتان يجيبوا خواجه "كللشينكان" وياخدوا قروض من البنوك المصريه (آه والله بجد) ... ولما الريحة تطلع .. مش يصدر قرار أو تشريع يمنع تمويل مشروعات ال B.O.T من البنوك الحكومية المصرية ... لأ يصدر قرار بمنع مشروعات ال B.O.T .. كنت فى البداية أقرأ مثل هذه الأخبار فيتملكنى الغيظ ... أما الآن فإننى أحاول أن أمنع نفسى من الضحك ... تفتكر الضحك يفرق كتير عن البكا فى المواقف اللى زى دى يا سى السيد ؟؟؟ سلم لى على ملكات الشفافية فى المحروسة .. دينا وأخواتها

تم تعديل 19 يناير 2006 بواسطة أبو محمد