إعلان الحرب على القُبلات

[se_ Elsyed]

إوعى وشك ...

موضوع القبلات المبالغ دي من الحاجات اللي بتنرفزني .. خصوصاً عندما تتعلق بمجاملات الستات لبعضهم .. فبدون مبالغة ممكن الواحده تكون لسه سايبه صديقتها من 5 دقايق ولفت ودخلت من الباب التاني وشافتها - تاني برضوا - وتنزل فيها بوس ....

وكمان موضوع الحالة الصحية للمبووس أو البايس .. مش مهم بقى إذا كان عيان ولا عرقان ولا عنده إيدز حتى .. وتلاقي الناس عارفه ده بس ولا يهمه فهو عايز يعبر له عن شعوره الجياش إتجاهه .. يبقى إزاي ؟

عليكوا نور بالبوس ..

الأهرام 8/1

في القبلة سم قاتل‏,‏ وزارة الصحة تحذرك من أضرار التقبيل‏,‏ يبدو أن هذه الجملة ستكون شعار المرحلة المقبلة في وسائل الإعلام المختلفة‏,‏ لمواجهة تلك العادة السيئة‏..‏ فنحن لا نتبادل القبلات فقط عندما نلتقي بعد غياب‏,‏ بل نفعلها في مصافحاتنا صباحا ومساء‏,‏ ليس تدليلا علي الأشواق‏,‏ وإنما نفعلها كما نفعل أشياء كثيرة في حياتنا بحكم العادة دون أن نعي أننا نشارك في نقل أمراض عديدة باسم الحب‏.‏

وليس شرطا وجود مناسبة‏,‏ فمجرد اللقاء مبرر للقبلات التي تتكرر مرات في اليوم الواحد‏,‏ فإذا كانت هناك مناسبة مثل فترة الأعياد التي يعيشها المصريون هذه الأيام‏,‏ فإن الحظ سيكون وافرا من القبلات المحملة بالرذاذ المشبع بالفيروسات‏.‏

القبلات تحمل مخاطر صحية عديدة دفعت وحدة الطوارئ بالمركز القومي للبحوث لإطلاق حملة توعية صحية ضد مخاطر القبلات عند المصافحة واللقاء‏.‏

الأبحاث العلمية التي أجرتها الوحدة علي آلاف المترددين عليها أكدت أن هذه العادة تمثل سببا مباشرا لنقل العديد من الأمراض الخطيرة‏,‏ مثل الإنفلونزا البشرية‏,‏ والحمي القرمزية‏,‏ والحصبة‏,‏ والجديري المائي‏,‏ والدرن‏,‏ والنكاف الغدة الدرقية‏,‏ والحمي الشوكية‏,‏ والهربس الجلدي‏.‏

وليس من الضروري أن يكون المتصافحان أو أحدهما مصابا فعلا بالمرض‏,‏ ولكنه قد يكون حاملا للميكروب‏,‏ وهو سليم أكلينيكيا‏,‏ وعندئذ يكون قابلا لنقل العدوي إلي غيره‏,‏ كما يمكن أن يكون الإنسان في فترة حضانة مرض‏,‏ وينتظر ظهور الأعراض عليه خلال أيام‏,‏ أو في فترة نقاهة من مرض سابق لم يتخلص جسمه من الميكروب المسبب له‏.‏

الدكتور عادل عاشور مدير عيادة الطوارئ بالمركز‏,‏ قال ـ في تصريحات لمندوب الأهرام حاتم صدقي ـ إن آليات تنفيذ هذه الحملة تتضمن عدة محاور تبدأ بإعداد رسالة إعلامية موجهة إلي مجلس الأمومة والطفولة‏,‏ ووزارة الإعلام لبثها عبر الوسائل المرئية والإذاعية‏.‏

طب مش بدل المصاريف دي كلها .. كانوا يقعدوا يذيعوا أغنية اللواء الدكتور محمد عبد الوهاب ( بلاش تبوسني في عينيا ده البوس في العين تخليني أرجع )

بس بجد بقى بيعجبني الإخوه السودانيين .. خبطتين تلاتة على الكتف وخلص الموضوع ..

جماعة الخليج بقى .. أساتذه بوس ... واحده يمين وتلاتة ورا بعض على الشمال .. وساعات على الخشم ( المناخير ) لو من واحد صغير - في السن أو المقام - للأكبر منه ... وماليش دعوه بحالة مناخيره كانت عامله إزاي . :rolleyes:

أخيراً : ياريت نُعلن جميعنا الحرب على العادة المنيلة دي ... اللي أنا شخصياً بأعاني منها لما ناس كثيرة بتزعل مني لما بأكتفي بالسلام بس وبوس لأ .. بوس لأ .

[MZohairy]

ياعم بوس انت خسران حاجه؟

بس فعلا حكاية المناخير دي وحشه أوي خصوصا في برد الرياض وازدياد السيوله عموما

[mb14]

فعلا يا س س موضوع يستحق لفت الانتباه اليه هو موضوع البوس ما كفايه السلام باليد او عند اللزوم الاحضان فقط بدون بوس . انا مش عارف العاده دى جات منين للمصريين مع ان الغرب بيعتبر القبلات بين الرجال حاجه مش كويسه (او علامه مش كويسه ) .

ممكن الواحد يعلق علامه معينه على جاكتته او قميصه يتعرف منها انه مش بيحب يبوس حد او يتباس من حد . س س فكر فى علامه كدى وركز وافتكس حاجه ليها القيمه مثلا زى علامة المرور "الطريق مغلق " او ممنوع الانتظار" :rolleyes: .

[se_ Elsyed]

ممكن الواحد يعلق علامه معينه على جاكتته او قميصه يتعرف منها انه مش بيحب يبوس حد او  يتباس من حد . س س فكر فى علامه كدى وركز وافتكس حاجه ليها القيمه مثلا زى علامة المرور "الطريق مغلق " او ممنوع الانتظار" :rolleyes:  .

<{POST_SNAPBACK}>

خليني أفكر كده وهاخرج لك بكام فكره برلنت

أمممم

أمممم

أمممم

بس لقيتها ممكن مثلاً الواحد لو حاسس إنه داخل على مبوسه يروح ملغمط وشه طبيخ فاللي قدامه يقرف يقرب له ..

طب يا فالح لو واحد نفسه حلوه وما بتفرقش معاه الحاجات دي ؟

آه صح

...

طيب

ممكن أعلق لوجو على صدري مكتوب عليه " متبوسنيش بعين راضيه .. وكفايه تسلم عليه "

طب لو حد من قرايبكوا ماكنش بيعرف يقرأ عربي .. روسي مثلاً ؟

يا دي النيلة

----

طب منكن أعمل زي صدام حسين وأقوم متربس إيدي من بعيد وبلاها بوس ؟

ممكن يطلع لك واحد زي ا ياسر عرفات ويقوم واخدك مقص حراميه وهاتتباس يعني هاتتباس يا عباس

-----

بس وجدتها وجدتها

الواحد يعلق يافطة صغيرة مكتوب عليها " المذكور يعاني من إنفلونزا الطيور "

أظُن دي بقى مالهاش مخرج إلا إذا كان الحظ العكر يعترنا في واحد واخد فاكسينيشن ضد المرض ده

...

يعني متقفله يا حلو وهاتتباس هاتتباس .. فأستسلم أحسن لك .

[مصرية الهوى]

والله معاك حق ..

حكاية البوس دي تقرف بجد ..

اكره حاجه عندي في الدنيا لما اروح للكلية بعد اجازة ..

وشي بيتهرى بوس mfb: ..

ياجماعة قرفتووووني :blink:

بس الحمد لله انا معنديش مجاملة .. لما حد يجي يبوسني ازقه بس بزوق شويه :lol: : معليش اصلي مبحبش حد يبوسني :wub:

والحمد لله صحباتي عرفوا الحكاية .. محدش بقى يبوسني ..

ولما اروح انا وصاحبتي نسلم على وحده تعرفها وانا معرفهاش.. وتيجي تبوسني تقولها صاحبتي : معليش اصل جيجي مبتحبش حد يبوسها :o ..

ودايما لما باجي اصافح حد من بعيد لبعيد .. عشان ميبقاش فيه مجال للبوس ...

انا مش عارفه التبويس لازمته ايه .. ما انا كنت معاكي امبارح وهابقى معاكي بكرى ..

التبويس لما حد يبقالي سنتين تلاتة مشفتوش .. انما كل يوم ..

قرررررررررررف ..

بس المصيبة لما بروح مع ماما لصحباتها ولا لقرايبها .. بصافح بس ..

ماما بقى تقولي : بوسي .. اصلها بتعبر المصافحة بس قلة زوق ..

يعني لازم بوس ..

:blush:

بس الموضوع بجد بقى خطير .. طالما الحكاية وصلت لأمراض وبلاوي سوداء ..

الحل ياسي السيد انك تحط على وشك صورة شفايف وعليها اكس :D

اكيد الكل هيفهمها ..

بس برضه هتتباس .. والراجل هيعمل نفسه مش فاهم :blink:

[khedr]

كل عام وانتم بخير

كان فيه موضوع كان من يومين في الجرايد

ونقلته علي الصفحه التاليه ...وينفع معانا في الموضوع ده

وكان اسمه قبلات السياسيين

http://www.egyptiantalks.org/invb/index.php?showtopic=18361

[NoorJehan]

بصراحه، أشعر بالإحراج الشديد عندما تقبل على شخص لتقبله وتبعدك عنها بحجه الإنفلونزا...خلاص يعنى الميكروب قاعد مستنى حد ينط عليه علشان يعديه :lol:

مع إحترامى للحقائق العلميه والصحيه، ألا إن أجدنى أكثر تقديرا للمشاعر الإنسانيه (بإستثناء قبلات خالتى السبعه المتتاليه) :wub:

مش أحسن من الشعوب الجافه المشاعر...

فدفء المشاعر هو ما يميزنا وبشهاده الكثير من الجنسيات..

ولكن إحقاقا للحق، سمعت من إحدى الأخوات إنه من السنه ان تمد يداك للمصاحفه ...أتمنى أن يفيدنا أحد عن صحه هذا الموضوع...ولا كانت الاخت تحاول تفادى قبلاتى بطريقه شيك ؟ :lol:

وقتها وجدتنى أقول سبحان الله ان السنه تتماشى مع نتائج الأبحاث العصريه عن الصحه العامه (لا ينطق عن الهوى)..

وساعات على الخشم ( المناخير )

تقبيل الخشم ده اللى صعب أوى وممكن أشارك فى إعلان الحرب عليه :lol:

[se_ Elsyed]

أمانة عليكو لو ما ظهرتش خلال التلات أربع ايام الجايين .. يبقى تأكدوا إني روحت شهيداً للقبلات الحارة ..

فده الموسم بتاع البوس يعني الـ peak season ..

لسه راجعين الشغل النهاردة بعد أجازة طويلة .. ولازم زملاء العمل يوجبوا مع الواحد ..

والأدهى والأمر بقى هم العائدون من أفغانستان .. قصدي الحج ... فهم قنابل موقوته مُحملة بجميع أمراض الجهاز التنفسي ومع ذلك لابد أن يهجم عليك الشخص من دول وينهال عليك تقبيلاً يمنتاً ويساراً حتى الثُمالة غير عابئاً بالعدوى أو الأمراض التنفسية ..

أول إمبارح حاولت أتبع الطريقة اللي قالت عليها جيجي .. وقابلت واحد من دول وهو صديق وأول ما لقيته جاي من بعيد روحت مجهز نفسي وقولت إثبت يا سين سين وتمترس في مكانك وروحت ومصدر إيدي لقدام عشان أسيب مسافة تمنعه من الإنقضاض على الفريسة - اللي هو أنا - لكن على مين ؟ دي عيال متدربه على فنون القتال .. وراح واخدني مقص حرامية وهاتك يا بوس ...

وإنا لله وإنا إليه راجعون

[صفاء]

س س أولا اشكرك على المعلومات المفيدة اللى أول مرة ـعرفها ان الخشم يعنى مناخيــــــــــــــر

انا لو اعرف ان المناخير يعنى خشم انا كنت استأصلت مناخيرى من زمان

ثانبا وده الأهم

طالما الموضوع وصل لحد الهربس ... يبقى لا قبلات بعد اليوم

بس احلى حاجة بقى اللى تيجى تبوس وتعمل صوت

مش طرقعة ... ولكن تأكيد انها بتبوس ... يعنى مع كل بوسة تسمع اهى ... اهى

زى اهو اهو انا ببوس اهو !!!!

ولازم اربع مرات ...مرة عالشمال ومرة عاليمين ونرجع نعيد الكرة تانى ليه معرفش

الله يسامحك يا وردة الجزائرية انتى السبب :lol:

أما كانت تغنى ...

بوسةةةةةةةةةةةةةةةةةة عالخد دااااااااااااااااااا

و بوسةةةةةةةةةةةةةةةةةة عالخد دااااااااااااااااااا

واحدة عالشمال والتانية عاليمين والتالته عالجبين

الحمد لله ان أيامها مقالتش واحدة عالخشم داااااااااااااااااااا :D

تم تعديل 16 يناير 2006 بواسطة صفاء

[khedr]

حرام عليكم كفايه مش عارف لا اسلم ولا استلم

كل ما اسلم علي حد وخصوصا زي ما قال عمنا سي السيد بعد الاجازات

افتكر....

وكانو ليه بيفكروني..

وعندنا زميل ... لا فض فوه...( هي بتتقال كده)

في العمليه دي ( عمليه القبلات)....بيهجم عليك ومش ممكن

بتبقي عايز تروح بعد سلامه.... بالسلامه ...المطافي

الخشم علي فكره في الصعيد يعني بؤ...فم يعنيMOUTH

[الآسر]

العادة دي فعلا مهببة ومنتشرة جدا في مجتمعنا

بس زي ما ظهرت فجأة أو علي مهل ممكن تنتهي برضة علي خير

بس لازم نعمل دراسة ازاي نقضي عليها

وفكرة التوعية الصحية دي صعبة قوي

لأن لو حد جيه يبوسك وقلتله معلش علشان الأمراض لا ببوس ولا بتباس

في نهاية الشهر ستجد أنك قد خسرت نصف الكرة الأرضية

أنا فعلا أعاني من هذه الظاهرة وخاصة في العمل

حيث ينقلنا الي العمل أتوبيسين .. بيتقابلو في مكان العمل

وينزل الركاب من هنا ومن هنا وهاتك يا بوس وبتبقي مبوسة

وزغاريط وأصوات غريبة .. مع انهم بيشوفو بعض كل يوم :blush:

وأنا في هذه الأثناء بشوفلي أي شجرة أداري وراها لحد ما المعركة تخلص

وبعدين ظاهرة البوس دي ظاهرة عالمية

يعني في أوربا وأمريكا العملية متحضرة علي الآخر الرجالة تبوس الستات بس :wub:

وفي برنامج ستار أكاديمي البوس شغال علي ودنه .. لا مش بس كده

ده الحكاية أحلي ... البنات والولاد عايشين مع بعض زي السكينة في الحلاوة

علي رأي الأستاذ الكبير " اللمبــي "

[مصرية الهوى]

وفي برنامج ستار أكاديمي البوس شغال علي ودنه .. لا مش بس كده

ده الحكاية أحلي ... البنات والولاد عايشين مع بعض زي السكينة في الحلاوة

علي رأي الأستاذ الكبير " اللمبــي "

سكينة في الحلاوة وبس ..

على الاقل اللمبي كان عنده غيرة مسابش فيحا تخرج بالدراعات الملط .. :wub:

بس فعلاً الجماعة دول أنا نفسي افهم مالهومش اهل ..

وبالذات البنات .. فين على الاقل الغيرة العربية ؟؟؟

يعني بباها والا اخوها يشوفها مقلعة الهدوم .. و بين الشباب ..

وعلى مرأى ملايين الناس ..والبوس والاحضان على ودنه !!!!!!!

وميغيرش :blush:

دول مش رجالة والله !!!!

وحسبنا الله على من يريد اشاعة الفحشاء في الذين امنوا ....

[صفاء]

فى أوروبا والدول المتقدمة لا يبوسوا بعض

[Pianist]

أنتو بتتكلموا في ايه؟

انتو عارفين إن السلام باليد بينقل جراثيم و ميكروبات أضعاف أضعاف التقبيل؟

للأسف دي معلومة حقيقية :wub:

[NoorJehan]

السلام عليكم الإخوه المحاوراتيه،

اعتذر مقدما إنى أكتب خارج الموضوع والمكان الصحيح ولكن محتاجه مساعده وده التوبيك الوحيد اللى فتح...اى توبيك تانى أدوس عليه بيدينى صفحه فاضيه....ليه كده؟ حد عنده فكره؟

مش عارفه أشارك...الغوووووثثثث B)

ممكن حد يتكرم بالنيابه عنى ينقل هذه المشاركه فى مكانها الصحيح حيث يمكننى المتابعه

وجزاكم الله خيرا مقدما

==============

إضافه: لا أدرى كيف سيمكننى المتابعه لأن اى باب تانى لا يفتح

إذن فهو الوداع؟ :P

كانت فرصه سعيده جدا لقاؤكم :wub:

وسلامى للأولاد :P

تم تعديل 18 يناير 2006 بواسطة NoorJehan

[مسافر زاده الخيال]

:wub:

حتتباس يعني حتتباس

[se_ Elsyed]

للرفع

بمناسبة أنفلونزا الطيور والخنازير وكافة أنواع البلاوي الزرقا

[MZohairy]

مش عارف ليه الناس كلها نيتها وحشه

البوس مش كله عاطفي

و مش كله معدي

فهناك بوس اليد للتعظيم

و هناك بوس الرأس للتفخيم

و هناك بوس الجزمه للتهزيئ

و هناك بوس الجبين للتصالح

و انواع كتيره للبوس

مش عارف ليه دماغكم جابت بس البوس العاطفي؟!؟ :lol:

[kokomen]

ومن القبلات ما قتل ... هذا المثل المستحدث أصبح صحيحا إلى حد كبير

بعد إنتشار إنفلونزا الطيور وتوطن فيروسها في مصر المحروسة نظرا 

للعادات المصرية التي يصعب تغييرها من تربية الطيور وكذلك محلات ذبح

الطيور الحية التي يفضلها الناس عن الطيور المبرده أو المجمده .. وإن حدث 

أخيرا تغير ملحوظ في هذا الإتجاه بعد إنتشار الإصابات بشكل كبير وبعد أن إستطاع

فيروس إنفلونزا الطيور من تطوير نفسه فأصبح فيروسا جديدا يتميز بخصائص جديدة

أما وقد هاجمتنا أنفلونزا الخنازير .. فقد أصبح الأمر أكثر قلقا من ذي قبل .. خوفا من 

يجتمع الفيروسان ( إنفلونزا الطيور وإنفلونزا الخنازير ) وينتج فيروس جديد يطور نفسه

وينتشر بين الناس ويصعب السيطرة عليه ... وهذا أن حدث لا قدر الله .. سيسبب وفيات 

بين البشر لا يعلم مداها إلآ الله .. وتقع المسؤولية الكبرى على الناس في إتباعهم الوسائل

الصحية الوقائية حتى لا يحدث إندماج بين الفيروسين ... اللهم   سلم.. سلم

 مرض فى كل بيت

  بقلم سليمان جودة ١٠/ ٦/ ٢٠٠٩

انتظرنا أنفلونزا الخنازير فى المطار، فظهرت فى الزمالك، وأصبح علينا أن نتخلى، رغم أنوفنا، عن عادات مقرفة تلازمنا، ولا يعرفها أى شعب آخر!..

فأنت لا تكاد تمد إحدى يديك إلى أحد، لتصافحه مبتسماً حتى تفاجأ بأنه قد هجم عليك، ممطراً إياك بالقبلات، مع أنه لا شىء فى الغالب يبرر هذا التصرف السخيف..

فلا أنت وحشته إلى هذه الدرجة ولا حاجة أبداً، وإنما هو نشأ مع غيره، على سلوك هابط استقر بين الناس، ولم يعد له أى معنى، فضلاً عن أنه يخفى فى أحيان كثيرة، قدراً هائلاً من الكراهية والنفاق الرخيص!

كان المصرى ـ زمان ـ إذا أراد أن يبدى التحية الواجبة لشخص فى الطريق، رفع إحدى يديه إلى أعلى، ملوحاً بها، ومشيراً، فى الوقت نفسه، إلى معنى عميق، وهو أن هذا الشخص فوق رأسه..

وليس هناك، فى الحقيقة، ما هو أكثر صدقاً من حركة كهذه، فى التعبير عما يريد أى إنسان أن يظهره، من حفاوة تجاه إنسان آخر!.. ولم يكن بيننا عناق ولا أحضان ولا قبلات، ومع ذلك كان الود واصلاً بأكثر مما هو واصل الآن!

ولايزال السودانى، إذا التقى سودانياً آخر، لمس أحد كتفيه بأطراف أصابعه، ليفعل الشخص الآخر الحركة ذاتها، فى توقيت متزامن، تعبيراً عن حميمية لا تكون فى حاجة إلى أحد يهجم على أحد، ويظل يقبل خديه، يميناً وشمالاً، بينما المسكين يتأفف دون جدوى!

والهندى يرفع يديه، بمساواة أنفه، وقد ضم الكف إلى الكف، وأحنى رأسه دليلاً على عمق التقدير!

ولا أحد يعرف منذ متى توطنت هذه العادة المستفزة عندنا.. فهى إلى خمسين عاماً مضت، لم تكن موجودة بهذا الشيوع، ولا كانت شائعة بهذا الانتشار، وفى الأفلام القديمة، التى تصور حياة المصريين فى مرحلة من مراحل حياتهم، لا وجود لها إذا التقى شخصان..

وليس هناك شك، فى أن بعضنا يمارسها، وهو كاره لها، ويكاد يلعن الذى يرغمه عليها فى سره!.. وفى الأرياف، إذا أقيم عزاء فإن الذين يذهبون إليه، يرفعون أياديهم من بعيد، فى مواجهة أصحاب المناسبة، دخولاً وخروجاً، ليكونوا قد أدوا الواجب، على أفضل ما يكون..

ولكن العزاءات فى القاهرة تحولت إلى حفلات جماعية للقبلات، والعناق، والأحضان! وفى رحلته الأخيرة بالمنطقة، فإن «أوباما» كاد يمارسها إلا قليلاً، حين جاء القاهرة، وذهب إلى الرياض!

وما لم نتخلص سريعاً من هذا المرض اليومى، فسوف تنتقل الأنفلونزا من الزمالك إلى كل بيت.. وما لم يحرص كل واحد فينا، على أن يكون راقياً فى تحية الآخرين، وأن تخلو التحية من القبلات والمصافحات، التى تبدو من الإفراط فيها، وكأننا تركنا أعمالنا وتفرغنا لها، فسوف نكون فريسة سهلة لأنفلونزا الخنازير.. وربما الخيول والحمير!!

 

 

[سهل جدا]

من الغرائب إن البوس عند الغرب للجنسين المختلفين فقط

يعني راجل بيسلم على ست أو العكس مش مهم بقى الست دي مراته ولا صاحبته ولا مرات صاحبه ولا أي واحدة غريبة

المهم إنه يبوس وخلاص

إنما لو الراجل مثلا باس راجل زيو يستغربو , ويقولوا عليه شاذ