اكتر حاجه بتحبها

[khedr]

بعد اذن اخونا الكبير الاستاذ شريف

ايه رأيكم ..

كل واحد يكتب علي اكتر حاجه بيحبها....وليه ...او من غير ليه

وخلص الكلام(. . .)

تم تعديل 13 يناير 2006 بواسطة medeokhedr

[مصرية الهوى]

ياااااااااه .. حاجات كتير بحبها :blush: .. خد مثلا

أحب البحر جداً جداً .. والتمشية على الشاطئ حافية القدمين وخاصة وقت الشروق ..

أحب البساطة والعفوية والتلقائية وعدم التكلف ...

أحب الاجتماعات العائلية والضحك والونس ..

أحب اللون الوردي والسماوي ..

أحب الناس الطيبيين والفرفوشين والمرحين ..

أحب أغاني الأطفال ..

أحب الرغي مع الناس اللي بحبهم ..

:)

ولما افتكر هأقول تاني ..

:D

[mb14]

اكتر حاجه بأحبها

انى اقعد فى الركن المفضل بتاعى فى غرفة الانتريه وأشرب كوباية شاى واسمع اذاعة لندن بس كل دى ويكون الدنيا هاديه فى البيت بعد 11 بالليل لغاية 2-3 الصبح ولو فى حاجه مهمه اقعد أقرأها أفضل عندى من التليفزيون والدش والكمبيوتر والنت .

[الآسر]

عزيزي ميدو

موضوع جميل ولكنه صعب جدا .. الانسان بطبعه أناني ودايما يفكر في الحاجات اللي تزعله وتضايقه بس

أنا عن نفسي بحب أأقرب من الله - علي الرغم اني مش ملتزم جامد - وأحب أكون قريب ومحبوب من الناس

وأحب أكون أمتلك شيء مميز في حياتي .. في شخصيتي .. في اهتماماتي .. في عواطفي

وفي صداقاتي

ويا تري شربت قرفة تاني :blush:

[khedr]

هو فعلا الواحد لو كتب عن الحب ..يكتب ايه والا ايه..لكن

احب ابص للسماء وهي صافيه بالنهار

واعشقها بالليل في يوم 14 الشهر العربي والنجوم تتلألأ..والقمر وسطهم كليله العرس

بس يكون اضواء المدنيه والمدينه بسيطه

[abofasad]

مصرية الهوى

ولما افتكر هأقول تاني ..

هو لسه في تاني؟؟

[سهيلة]

احب البرد واحب ابص للسحب البيضاء واراقبها وهية بتتحرك واقول سبحان اللة

ممكن اقعد اراقبها اكتر من نص ساعة وما ازهقش

احب المطر وممكن امشى تحتة واكون مبسوطة اوى واحب كمان ريحة المطر راءعة

[مصرية الهوى]

هو لسه في تاني؟؟

:P :D :D

ايه يا جدو .. كسفتني :wub: B)

ما هو أنا في أول حاجه كتبت :

ياااااااااه .. حاجات كتير بحبها

يعني لسا فاضل حاجات :P

[الرافعي]

أحب البحر جداً جداً .. والتمشية على الشاطئ حافية القدمين وخاصة وقت الشروق ..

<{POST_SNAPBACK}>

طبعاً يا أخت جيجي التمشية على البحر شيء جميل جداً، وخاصةً وقت الشروق، لكن الاثنين دول مع المشي حافية القدمين، مع مفيش شاطئ في القصيم ... الموقف صعب جداً

لكن على كل حال جو عنيزة رائع، أفضل من جو الشواطئ مثل جدة مثلاً المعبأ بالرطوبة ورائحة السمك مع لا مؤاخذة (الصرف الصحي) :wub:

[مصرية الهوى]

ههههههههههههههه ..

ايه يا أستاذ حلاوة بتعرف عنيزة :D

عارف بنسمي عنيزة ايه ؟؟ .. باريس نجد :D

صحيح معاك حق .. جو جدة - مع الاعتذار لأهلها - مقرف .. واساسا انا مبحبش جدة ..

عايز الجمال والحلاوة تلاقيها في الشرقية وفي الخبر بالتحديد :wub:

وبالتحديد الشاطئ اللي عند القاعدة الجوية .. رااااااااااااائع ..

وكمان شاطئ الفناتير في الجبيل ..

ولو على البحر الأحمر .. ينبع .. فيها شواطئ تجننن ..

انت بس خلك بعيد عن جدة :D

[Reham]

بحب مصر وصعبانة اوي عليا

بحب منظر النيل في الغروب

بحب صيد السمك

بحب اهلي وصحابي

بحب الطفوله والبراءه

بحب النسيم البارد

بحب الوان الشروق والغروب في المطر

بحب الشيكولاتة

بحب حاجات كتير اوي .........مش لاقياها دلوقت

[Proud Muslim]

بحب الصحراء جدا جدا .. ربما تكون الصحاري هي أجمل مناطق العالم في نظري .. خصوصا الصحاري الرملية ..

بحب الفخذة الضاني في الفرن و معاها محشي ورق عنب و سلطة زبادي !! :D

بحب اقرأ أي حاجة و عن أي حاجة .. فكل ما كتب إنما كتب ليقرأ !!

بحب اصحابي جدا .. لدرجة ان الموضوع عامل مشاكل جامدة مع خطيبتي :wub: ( و عموما انا مش عارف ايه مشكلة المرأة مع اصدقاء الرجل ؟؟ )

[NoorJehan]

أظن أن كاتب الموضوع يبحث عن أشياء نحبها الى جانب ما يشترك فى حبه معظمنا من حب لله وللدين والأسره ومصر وبراءه الأطفال...

أحب موقع جوجل وخدماته الإعجازيه فى البحث عن الأشياء

أحب الحلويات...ياه لو أسكن فى محل تسيباس اللى فى جنينه مول

أحب الليل والسماء الممتلئه بالنجوم

أحب الضحكه من القلب

أحب الألعاب الناريه فى السماء وقت المناسبات (fireworks)

أحب النور الذى يزين بعض الشجر فى النوادى مثلا..

أحب الناس الذى يتركون علامه فى الآخرين والحياه

أحب القهوه ذات نكهه..يا سلااااام

أحب الناس الجميله روحا

أحب الكاريكاتير السياسى المعبر وتلاقى نفسك بتقول تلقاءيا

"فى الجووون"

أحب ألعاب الملاهى الشديده

أحب حياه المدينه وأضواءها

أحب العلم والتعلم

أحب قناه إقرأ

أحب صينيه قرع العسل

أحب لعبه الهوكى على الطاوله air hockey

أحب المثاليه وإن كانت غير واقعيه

أحب صفه الحب بأنواعه ومشاعره وفرحته وأنينه

أحب وأعشق الكلمه..بمفردها او سطر فى مقاله او كتاب بأكمله

أحب السينما والأفلام التى تمتعك بدون خدش للحياء(شئ منقرض حاليا)

أحب المطار (أكيد ليس مطار القاهره) :D والسفر

كفايه كده النهارده :wub:

بحب حاجات كتير اوي .........مش لاقياها دلوقت

عجبتنى دى جدا يا ريهام

[NoorJehan]

بحب اصحابي جدا .. لدرجة ان الموضوع عامل مشاكل جامدة مع خطيبتي  ( و عموما انا مش عارف ايه مشكلة المرأة مع اصدقاء الرجل ؟؟ )

ليست هناك مشكله للمرأه مع أصدقاء الرجل..

بالعكس هو شئ صحى..

ولكن ربما المشكله تكمن فى عدم إعطاء كل ذى حق حقه؟

إعترف :wub:

أى مرأه خاصا فى بدايه علاقه جديده تحب أن تشعر بالأهميه حتى وإن إحتل الأصدقاء مرتبه عاليه فى حياه الرجل...

إضحكوا علينا شويه يا رجال حتى :D

وفقكم الله للخير..

[سيزيف]

اكتر اربع حاجات بحبها 00

عباره عن تلات حاجات00

الميه و الهوا

:D

[alshorok]

اكتر حاجه بحبها

1- منظر الغروب على البحر...... عشان التأمل مهم جدا للا نسان يا جماعه فى الصفاء والنقاء بتاع الساعه دى

2- منظر البحر وهو ثائر جدا....... بصؤاحه بيفكرنى بتفاهه الانسان وعبطه امام القدره الذى اودعها الله سبحانه وتعالى فى الطبيعه

3- ابتسامه طفل ......... بعد حزن كان موجود على وجهه وقدرت باى صوره اشيل الحزن ده منه...

تحياتى

الشروق

[مريوم المصرية]

بحب مصر وصعبانة اوي عليا

والله معاك حق يا ريهام B)

أنا: بحب منظر الشروق بس(الغروب بيجيبلي اكتئاب).

بحب الناس الطيبين بالذات صاحبتي وبحب أخرج معاها.

بحب (بعض)المطربين اللي بيقدموا فن محترم سواء أغاني أوأفلام.

بمووت ف جو مصر في الشتا.

بحب الشكولاتة بس بطلتها عشان ما اتخنش B) .

بحب النسكافيه بالحليب الصبح عشان أنا والشاي مش صحاب أوي

بحب أعمل shopping. B)

كتيير .لما افتكر هكتب تاني.....

تم تعديل 9 فبراير 2006 بواسطة مريوم المصرية

[احمد هادي]

:blush: :wub: الستات والفلوس :P :P

تم تعديل 9 مارس 2006 بواسطة احمد هادي

[Lembic]

أحب البحر جداً جداً .. والتمشية على الشاطئ حافية القدمين وخاصة وقت الشروق ..

<{POST_SNAPBACK}>

طبعاً يا أخت جيجي التمشية على البحر شيء جميل جداً، وخاصةً وقت الشروق، لكن الاثنين دول مع المشي حافية القدمين، مع مفيش شاطئ في القصيم ... الموقف صعب جداً

لكن على كل حال جو عنيزة رائع، أفضل من جو الشواطئ مثل جدة مثلاً المعبأ بالرطوبة ورائحة السمك مع لا مؤاخذة (الصرف الصحي) :huh:

أنا مرة زرت عنيزة من زمان وأنا صغير وإضطرينا نبات فى العربية علشان مكنش فيها فنادق ولم يكن فيها "عنيزة" لمبة واحدة منورة! الكلام ده كان فى 1972 !

[nancy]

انا بحب الدنيا كلها بالكويس والوحش

احب الشاى بلبن والعيش السخن واى نوع جبنات شغالة معايا مش مشكلة

احب القاهرة القديمة والبيوت الاسلامى زى السحيمى والكرتلية تقعد وتسمع صوت العصافير ولا كان فى ناس برة المكان

احب اخد مركب فى النيل واسمع صوت المية

احب ريحة الشيشة فى الفشاوى

احب الفضة القديمة موتتتتتتتتتتتتتتتتتتتتتتتتتتتتتتتتتت

احب العيون الى بتضحك

احب الى لما يسمع الدان يدور على اى مسجد

احب اللبس الشيك

احب العربيات الجيب

احب اكون انا مش حد تانى

واكيد باموت فى البحر والرمل فى اسكندرية

احبها فى الشتا والدنيا بتمطر احب امشى على البحر فى المطر وتحس انك ملك البحر لان محدش عبيط يعمل كدة فبيكون فاضى

احب الترام اخدها نص الخط لحد محطة الرمل على الساعة خمسة بتكون فاضية

احب اهلى واصحابى وعيلتى ودنيتى

احب اسمع موسيقى الشعوب الى من فلكلور كل بلد

احب السنيما والمسرح

احب الكتب ورحتها وكل ما تكون قديمة او سلفها وناية اضرب عليها

احب المتاحف والمعارض الفنية

احب البحث فى النت

احب الافكار الجميلة والجريئة

احب الناس الى مش بتكذب

عندكم وقت انا ممكن اكتب للصبح