قصيده العام الجديد (وكل عام وانتم بخير...)

[هشام الجنيدى]

بعد كام مليون سنه وبعد ما فات اللى فات

وعام جديد لساه بيبدأ يا بلادى من سكات

بكره يبقى زى غيره يعنى يصبح ذكريات

وانتى كده .....

مكتوب تعيشى منكده

ومتهدده

مكتوب تعيشى جوه سجنك...

والايدين متأيده تستنى دورك فى الموات

مفتاح قيودك كان معايا لكنّه راح

اخده سجانك بجبرى....

تحت تهديد السلاح

وقنابل الدخّان عمتنى ...

وتوهتنى عن الصباح

كنت عاوز حتى اصرخ اجبرونى على السكات

اه واه واه واه ...

جرح منّى ومن سنينى بينتقم

جرح متلوث خيانه ...

يعنى عمره ميلتئم

يا هل ترى يا عام جديد فيك وردنا راح يبتسم

ولا فيه من لسّه عاوز يقطفه ....

ويسيبه يدبل فى الفازات

يا هل ترى فيك التفاؤل والامل

ولا الخيانه داء وباب لن ينقفل

يا هل ترى يا عام جديد هتكون سعيد

ولا جيّلنا وجايب كاس هموم مليان اهات

يا هل ترى يا نيل هتفضل

زى ما انتا ولاّ حر

بطئ سريانك وعجزك....

خلاّ طعم الميه مر

بس انا مضطر اشرب

اصل لو ما اشربش اموت...

زى غيرى فوق ترابك من جميع المخلوقات

خايف يا نيل ....

العام ده يبقى عام خراب

يبقى عام غربه وضياع

واقرا يافطه فوق ضفافك ...

يا بلد نيلك مباع

والتمن رخص التراب

والمشترى ....

هوه نفس المشترى اللى اشترى....

بفلوس ابونا نهر دجله والفرات

خايف اصبح والقى اسمك يا بلادى

عرض مغرى جوه جرنان اعلانات

خايف اصبح القى انى مليش وطن

انام فى حضنه بعد لفّى بالسعات

وكل خوفى لما اموت....

اسّاب اعفن فوق ترابك

زى كلب حقير وماااااااااات ......

بجد خايف من اليوم ده واعذرونى لانى كئيب بس فعلا مش قادر اتصور ازاى اقوم الصبح والاقى بلدى مش بلدى

وربنا يستر ......

[khedr]

نجيب سرور بمشاعره واحاسيسه و......واحزانه

http://www.wadada.net/surur/index.html

[الآسر]

لا أريد أن أطلب منك أن تظل مكتئبا علي طول لكي تكتب مثل هذه الابداعات

تهامس معك قلمك في مناقشة خفيفة .. انطلق بعدها راسما كلمات وأفكار جميلة واقعية

فهي ليست كلمات مثل الكلمات .. انها لوحة جميلة تغرب فيها الشمس

فهل ستشرق من جديد؟؟

لا داعي لهذا الخوف لأن هذا اليوم آت آت لا محالة كما ذكر القرأن العظيم

سيعلون علوا عظيما .. وقد علوا وتفحشو ونحن ضعفنا وذبلنا مثل أوراق الأشجار في الخريف

وبعدها نعود أقوياء .. وتكون النهاية

[هشام الجنيدى]

شكرا يا ميدو بس دى مشاعر كل المصرين اللى واحد منهم

اننى انتظر هذا اليوم بفروغ الصبر اخى الاسر ........

وربنا يستر :blush:

[إبن طيبة]

أخي الكريم هشام

أدمعتني كلماتك وأبهرني اسلوبك الجميل وإنتقائك لكلماتك التي جاءت كسلسلة متصلة زادت من حلاوة قصيدتك ...

تقديري لشخصك النبيل

[رعد الاسكندرانى]

كل سنة وانت طيب يا فنان وعايز اقولك ان الصورة الوان رغم ان فيها غيام

لكن رغم كل شئ الأمل موجود حقيقى لو جه يوم زى كده و كنت عاجز عن حمايتك يا مصر يبقى اتمنى اموت قبل ما أشوفه

تسلم ايدك يا هشام وان شاء الله الحالة تتحسن قبل ما نتزل

[صفاء]

العام ده يبقى عام خراب

يبقى عام غربه وضياع

واقرا يافطه فوق ضفافك ...

يا بلد نيلك مباع

والتمن رخص التراب

حميل يا هشام ولو قدرت تستغنى عن بعض حروف الجر أو بعض الكلمات الزائدة التى لا تفيد النص كثيرا يكون أفضل حتى تحافظ على الوزن أكثر من ذلك

سلمت يداك

تحياتى واحتراماتى

[الطيار المصرى]

رائع ..رائع..رائع..

رائع في كلامك ..في الفاظك .. في تعبيراتك.....

رائع في خيالك..في احاسيسك.. في شجونك....

رائع في تأملاتك .. في وطنيتك......

بس عندك حق.......وانا حاسس ان اليوم اللي انت خايف منه........

قرب..قرب أوي.......و ادينا احنا عمالين نتفرج و احنا ساكتين.......

مش عارفين امتي هنفوق.......

امتي هنصحي من نومنا اللي طول اوي اوي اوي........

ادي العراق و وراها سوريا وبعدين ايران......و مش عارفين الدور بعد كده هيبقي علي مين.. هيقي الدور علينا ......ولا هيجنوا بجشعهم و طمعهم علي ناس تانيين.........

دمت لنا بالف خير........

الطيار المصري....ثانوية عامة

[ابو احمدين]

القصيدة اكثر من رائعة ياهشام وانا سعيد بها جدا وربنا يوفقك .. ونصيحة مخلصة من صديق الا تلتفت لمن يعطون لانفسهم حق النقد وهم غير مؤهلين لذلك ولا يملكون ادواته ولكنها مجرد فذلكة كاذبة ويفسرون الماء بعد الجهد بالماء او بالعامية يجوا يكحلوها يعموها .. حبي وتحياتي .

ابواحمدين .. شاعر عجوز

[صفاء]

القصيدة  اكثر  من  رائعة  ياهشام  وانا  سعيد  بها جدا  وربنا  يوفقك  ..  ونصيحة  مخلصة  من  صديق  الا  تلتفت  لمن  يعطون  لانفسهم  حق  النقد  وهم  غير  مؤهلين  لذلك  ولا يملكون  ادواته  ولكنها  مجرد  فذلكة  كاذبة ويفسرون الماء  بعد  الجهد  بالماء  او  بالعامية  يجوا  يكحلوها  يعموها  ..  حبي وتحياتي .

ابواحمدين  ..  شاعر  عجوز

<{POST_SNAPBACK}>

والنبى يا هشام تعالى انت على جنب عشان متتعورش الله يخليك انت راجل طيب

أما الأستاذ أبو أحمدين ...

أولا يا أخى فى طريقة وأسلوب مهذب تبدى بيه رأيك من غير ما تجرح فى الآخرين

ثانيا مش لازم الناس كلها تكون بنفس مستوى التذوق وأكيد مش شرط ان اللى يعجبك يعجبنى أو العكس

ثالثا ... القارىء مهما كان بسيط حنى لو غير متعلم ولكن يمتلك الحس الفنى والتذوق الشعرى

يقدر يحكم على أى قصيدة يقرأها أو يسمعها ان كانت موزونة أو لا

أنا عندما أقرأ الشعر لا أقرأه تأدية واجب لأصفق فى النهاية

لمراعاة خاطر زميل أو ليضاف رد إلى ردودى بالمنتدى

بل أقرأها بعينى وأسمعها بأذنى ... فإن كان هناك شذوذ ما .. لا ضرر أن أنبه

أنا اتذوق الشعر بدرجة جيد جدا وبشهادة شعراء كبار التقيتهم وأول من أنقدها نفسى

ولا أكرر على مسمعى الكلمات الخائبة التى نصحت بها حضرتك الأخ العزيز هشام

لا ضرر أبدا من النقد الأمين بل بالعكس فيه إفادة كبيرة

ثم أنى عندما أقول رأييى لا التفت لآراء الأخرين

أنا لا أتربص لأحد ... يهمنى أن أقوا رأيى بأمانة وصراحة

وعلى صاحب الموضوع الأخذ به أو لا فهو بالتأكيد حر وله وجهة نظره

يا هشام انتبه جيدا لكل كلمة نقد توجه لك ... انت مثقف وبالتالى تعى ما يعنيه النقد من معنى وهدف وأهمية

ولا تتعجل فى عمليه النشر

يا أخى لقد حضرت أمسيات شعرية كثيرة يحضرها العديد من الهاوون والمحترفون وذهلت لمستويات وقدرات جبارة ولكنها مدفونه منذ سنين وعندما تعجبت من عدم نشرهم ولو قصيدة واحدة من قصائدهم ...

أجابونى بأن العجلة نهايتها الفناء السريع

عن نفسى كتبت زجليات أكثر من الخمسين

وبالطبع لا أستطيع نشرها كلها فى المنتدى لأننى تعرضت لسرقات كثيرة

وعرض على أكثر من مرة النشر فى جرائد محليه وقمت بالرفض لأننى لا أريد التعجل بل سأصطبر على نفسى حتى أصل للمستوى الذى أتمناه

واستمع جيدا لكل كلمة نقد توجه لى ولا أنكر أننى قد استفدت استفادة كبيرة رفعت من مستواى وارتقت بأسلوبى

يا أخى لا يعجزنى أبدا أن أصفق أو أقول الله عليك ولماذا لا تنشر

لكننى أبدى رأيى بصراحة شديدة دون تملق أو خجل

فنحن هنا لنستفيد من بعضنا البعض ولنكتسب خبرات متبادلة

أنا لا أنزعج باعترافى بأخطائى وكشف عيوبى

ولكن أكثر ما يزعجنى هو النفاق .... لا أنافق أحدا ولا أحب ان ينافقنى أحد

وفى الأخير أنا متأكدة أنك تفهمت ما أقصده يا هشام

أنت أخ كريم وأنا يعلم الله لا أريد لك إلا الخير والتوفيق

انما أحببت أن أوضح بعض الأمور على الأستاذ أبو أحمدين اللى بيقول " لمن يعطون لانفسهم حق النقد وهم غير مؤهلين لذلك ولا يملكون ادواته ولكنها مجرد فذلكة كاذبة"

وهو بالطبع يقصدنى لأنى الوحيدة التى أبدت بعض الملاحظات

وأنا أقول للأستاذ أحمدين ... من أنت وما مؤهلك الذى أعطاك حق نقد آراء الأخرين ؟؟؟؟

وهل تفهم ما معنى نقد ؟

ولا ضرر أن تدلى برأيك ولكن دون ان تتحرش بـ آراء الآخرين

وشكرا

[Eng_Willo]

اعذرنى اذا قولتلك انى مابفهمش فى الشعر ولا بعرف اكتبه بس اول ما قريت القصيدة قلت لازم ارد.

القصيدة هايلة و جميلة و بجد كل ما اقرا سطر فيها بحس ان انا اللى بتكلم و بتعبر عن اللى جوايا,

اعتقد ان دى مهمة الشعر, التعبير عن اَراء الناس بصورة جميلة, يعنى مثلا واحد زى حالتى لو وقف على راسه مش هيعرف يعبر زى ما انت كاتب بس لما قريت القصيدة ماتصورتش ان ممكن اللى نفسى اقوله مكتوب قدامى و زى ما انا عايز اقوله.

اهنيك تانى و يا رب يكون ردى عبرلك عن مدى اعجابى بالقصيدة.

[Alshiekh]

هشام ..... قلبت المواجع ..... صحيتنا مالغفلة

[هشام الجنيدى]

السلام عليكم جميعا واعتذر عن تاخرى فى الرد .........

اخى ابن طيبه شكرا على مرورك وشكرا على تقديرك لى واتمنى ان يكون فى محله

رعد الاسكندرانى سعدت جدا جدا بمروركم الذى عطر صفحتى واتمنى ان اقرأ لك عملا قريبا لانك بخيل علينا شويتين ;)

دكتوره صفاء اقدر لك نقدك واننى استفيد يوما بعد يوم بما ينقد فى اعمالى لكى منى كل التحيه وبالنسبه لموضوع حروف الجر انا لاحظت ان فيه جمله ( العام ده يبقى عام خراب )بعدما كتبتها هنا وروحت البيت واعدت قراءه القصيده ان بها كسره خفيفه واردت ان اغيرها الى (عامنا يبقى عام خراب )ولكن لم تتسن لى الفرصه فى وقتها

الاخ الطيار المصرى اسعد كلما وجدت اسمك فى من يردون ويتابعون اعمالى معرفش ليه يمكن بحس ان لسه فيه امل وفيه ناس بتفهم وبتحب البلد دى لسه والله بفرح ربنا يوفقك فى الثانويه العامه وتجيب مجموع كبير وتبقى نواه لجيل جديد بيحب مصر ...........

الاخ ابو احمدين اهلا بك فى منتدانا المتواضع وشكرا على النصيحه التى احب ان افهمها على انها من باب التشجيع لا التهكم على احد من الاعضاء الكرام فى منتدانا الجميل واتمنى ان نكون جميعا اصدقاء ولك منى كل التحيه والتقدير ........اخوك الصغير هشام

eng_willoان هذا ما اريده بلطبع ان تصل كلماتى الى القلوب وان اعبر عما يجول بنفس من يقرأ والا اكون كمن يتكلم عن الجاتوه فى بلاد لا تعرف طريق رغيف الخبز وهذه هى موهبه الشعر ان تعبر عما يريد الناس التعبير عنه ولكن لايستطيعون باسلوب جميل وكلام سلس خالى من التعقيد اسعدنى جدا مرورك واضافه البهجه الى نفسى :blink:

الاخ محمد شكرؤا على مرورك الكريم ولكن المواجع لم ترسب فى القاع كى اقلبها انا اننا فقط تعودنا عليها وتعايشنا معها وتكيفنا مع وجودها فى حياتنا ولكنى فقط احببت ان اذكر بها كى لا نموت ونحن نعتقد اننا عملنا اللى علينا واحنا معملناش لسه اى حاجه من اللى علينا

وشكرا

[shahd]

هشام اسلوبك دائما راقي وممتع ففي كل كلمة من كلماتك تكمن بسمة تخفي الما تظهر وجعا

اخي سلمت اناملك الذهبية

اسفة على تأخري في الرد ولكن لي عذري :angry2:

[سيزيف]

عزيزى هشام

برافو

القصيده اكثر من رائعه

---

عزيزتى صفاء

برافو

حق النقد يستحق الدفاع عنه

[هشام الجنيدى]

شكرا على اعجابكم بما كتبت وارجو دائما ان اكون عند حسن ظن الجميع

وشكرااااا :sad: