عدو المرأة

[الآسر]

دائما يكون الأستاذ أنيس منصور رائعا .. متجددا .. ثائرا وأنا وارث هذا من أمي

أحب كتاباته وهذا جزء من أقواله في الحب والحياة

.........................................

-الحب:روح واحدة في جسدين... والزواج:روح واحدة خرجت من جسدين

- لكي تحتفظي بالرجل اجعليه يغار قليلا... ولكي تخسريه نهائيا اجعليه يغار كثيرا.

-الانسان حيوان اجتماعي ولهذا يكره الذين حوله.

- القانون الأساسي للرأسمالية هو أنا وأنت وليس نحن.

- المرأة التي تحبك تغفر لك كل خطاياك إلا خطيئة الخيانة.

- الشطارة أن تقول كلاما تافها بصورة أنيقة.

- السيدة الأنيقة أكثر الناس عشقا لنفسها.

- أحسن طريقة للزواج .. ألا تتزوج .

- أن تحب هذا مؤلم ألا تحب هذا مؤلم أكثر أن تحب ثم لا تتزوج من تحب هذه مأساة

- افتح عينيك قبل الزواج وجيوبك بعده.

- اذا كان الحب مرضا فالزواج هو الموت الرحيم.

- الحب ينظر اليك من تلسكوب .. الكراهية تنظر اليك من ميكروسكوب.

- احبها وتحبني :حب .. لا أحبها ولا تحبني :زواج.

- الحب لا يشتري بالفلوس ولكن الكراهية مجانا.

[bentmasria]

افتح عينيك قبل الزواج وجيوبك بعده.

كل سنة وانت طيب يا آسر

اكيد انك بتحب انيس منصور بس اوعى تصدقه فى النقطة دى بالذات

غالبا

:) :D :lol: :lol:

احتفظى بشنطتك فى يدك اثناء الخطوبة وخبيها عند ماما بعد الجواز

للاسف ده اصبح الواقع المر

وتحياتى لعمو انيس

:blush:

[الآسر]

كل سنة وانتي طيبة يا بنوتة

وقولي لمحمد " كل سنة وهو طيب ويبطل أكل لحمة بقي "

الواقع يا مصرية يا بنوتة ان الجواز ده مشروع خسران ماديا 100%

مهر .. شبكة .. شقة .. عفش .. تشطيب..فرح..الخ

ولكن ممكن يكون عاطفيا فيه مكسب ودينيا أكيد فيه عفة وستر

وبعدين عندي سؤال

هو في بنت بتخرج من غير شنطتها أبدا؟ :blush:

[مصرية الهوى]

كثيراً ما تعجبني كتابات الاستاذ أنيس منصور ومقالاته في الشرق الأوسط ...

رغم إني لا اؤيده على طول الخط .. بس يعجبني :lol:

.....................................................

عندك مثلاً من أقواله :

الله خلق المرأة لنحبها :D ، لا لنفهمها ..!!<<<<<<< اللي فهمته إنه يعني نأخد الست على قد عقلها :blush:

التفاهم هو (أُم) الحياة الزوجية ، أما الحب والحظ فهما من الأقارب ..!!

الزواج قائم على سوء التفاهم المتبادل ..!!

شعارنا في الحياة الزوجية : الحياة والحرية والهرب ..!!

الشباب: نزوة

الرجولة: كفاح

الشيخوخة: ندم !

طبيعي جداً ألا يتفاهم الرجل والمرأة : إنهما من جنسين مختلفين ..!!

الزواج مغامرة خطيرة : يفقد فيها الرجل حريته والمرأة سعادتها .. !!

المغامرة الوحيدة أمام أي إنسان جبان :lol: : أن يتزوج ...!! >>>>>> دي اكتر وحده عجبتني :D

...........................................................

الواقع يا مصرية يا بنوتة ان الجواز ده مشروع خسران ماديا 100%

مهر .. شبكة .. شقة .. عفش .. تشطيب..فرح..الخ

ولكن ممكن يكون عاطفيا فيه مكسب ودينيا أكيد فيه عفة وستر

وبعدين عندي سؤال

هو في بنت بتخرج من غير شنطتها أبدا؟

ليه هو انت عايز استقرار وعفة وستر وحد يدلعك ويأكلك ويشربك ويقرفك أحيانا :) ببلاش ...

يابني احنا في زمن سلم واستلم :D

مفيش حاجه لوجه الله أبداً ....

وبالنسبة لسؤالك :

آه لما يبقى معايا جيوب كفاية احط الموبايل والمشط والمراية والروج والكحل والبرفان واللبان واللب ...

يبقى ايه لازمتها الشنطة :D

تم تعديل 15 يناير 2006 بواسطة مصرية الهوى

[الآسر]

صديقتي مصرية الهوا

شكرا للهوا الذي حملك علي مهل لتدلفي علي موضوعي وتضيفي كلمات أنثوية

رقيقة علي كلمات كاتبنا العظيم أنيس منصور وأنا ألاحظ أن كل الردود من أقلام

وعقول أنثوية :blush:

وبعدين انتي علشان تلاقي جيوب لكل الحاجات دي .. انتي محتاجة البالطو بتاع

سمير غانم في مسرحية " المتزوجون " اللي بقاله 7 سنين :lol:

الشنطة أرحم يا جميل وبعدين مش المشكلة في احتياجات الجواز نفسه

المشكلة في العصر اللي بنعيشه

زمان أعتقد ان الزواج كان بسيط جدا مش مكلف بالشكل ده لكن تقدم وتعقد الحياة وصل بنا الي هذا الشاطيء

حيث أصبح الزواج اتفاق وكتابة عقد وبيع وشراء (تجارة انسانية)

والد العروسة يملي شروطه والعريس يتقبل أو يتقبل برضه :D

ومش كل الأباء كده فيه ناس طيبين وبترضي بقليلها علشان خاطر سعادة بناتهم

شكرا ................. مصرية ................ الهوي

[yanoss80]

واضح يا اوس اوس انك عندك عقدة من الجواز و تكاليفه ياترى ايه السبب

[الآسر]

ولا عقدة ولا حاجة يا عم أنوس .. انا بكلم عامة والحمد لله حمايا زي الفل

وعاوزني بشنطة هدومي هاهاا :D :blush:

ويا تري رديت عليا في المنتدي الاقتصادي

وشكرا لك علي ردك الذيذ يا جميل :lol:

[yanoss80]

ادخل على النتدى الافتصادى تلاقى الرد جاهز يامعلم و مستنيك

[مصرية الهوى]

ربنا يخليك يا آسر ...

فعلاً زي ما قلت ..

مشكلة عصرنا .. مشكلة ..!!

زمان كان الزواج بسيط ومش مكلّف لأن الدنيا كانت بسيطة ومش معقدة زي دلوقتي ..

والبنت كانت قنوعة جداً ..!!

انما دلوقتي عصر الانفتاح .. وعصر الطمع ..

كله عايز ياخد .. ياخد .. ويكوش على كل حاجه ..

وأنا أقولك مشكلتنا احنا البنات .. الأغلب مش الكل ..!!

إن احنا بنتأثر بكلام البنات والستات اللي حوالينا .. البنت أسهل بكثير إنها تتأثر بالكلام من الراجل ..

فتلاقي صاحبتها تقولها : ازاي .. انت مش اقل من غيرك ..

اعملي في فرحك في فندق فايف ستارز .. انت مش اقل من فلانة ..

ده مستواكم اعلى من مستواهم .. وجوزك اغنى من جوزها ..ومع ذلك عملت فرحها في فندق فايف ستارز ..

والبنت غالباً مش دائماً بكرر مش دائماً أكثر حاجه تهمها الشكليات .. مكان الفرح ،فستان الفرح ، الشبكة ، الشقة ...

عايزه كل العيون تكون عليها .. وعايزه تسمع من صاحباتها .. ده فرحك كان هايل .. ده فستانك كان بيجننننن ...!!

أكيد فيه بنات قنوعات .. ومبتهتمش بالمظاهر ولا الشكليات ..

بس للأسف الأغلبية من فئة الفشخرة والمنظرة ..!!

فعشان كده الجواز اتعقد دلوقتي .. لأن تفكير البنات اتغير ...

أقولك مثال على البطر الحقيقي الحقيقي ..

فيه واحد من عيلة ثرية .. وراح يخطب بنت من عيلة نفس مستواه ... البنت دي اتولدت وفي بؤها مش معلقة دهب .. لا دي قديمة ..

معلقة ألماظ .. ودلووووعة آخر دلع .. وكل طلباتها مجابة ..

الشاب .. ابن حلال وطيب ..

عارف البنت طلبت منه ايه ؟؟

المهر أكثر من 100 الف .. الشبكة الماظ .. فيلا مش عارفه فين.. شهر العسل في اوروبا .. طبعا دي حاجات مفروغ منها عند بنات الطبقة المخملية ..

بس الطلب اللي فعلا بينرفز ..

الفرح عايزاه فين يا هانم ؟؟

الطبيعي انها هتقول فندق فايف ستارز ..

عارف قالت ايه ؟؟

فندق فايف ستارز بس فين.. في بيروت :D ..!!

بيروت ايه يا هانم .. :D

اشمعنى مش عارفه مين عملت فرحها في بيروت ؟؟

واحنا مالنا احنا ؟؟

قالت : عيلتك غنية وعيلتي غنية .. كلهم هيقدروا يسافروا بيروت .. واللي مش عايز يسافر بلاش يحضر ..

احنا مبنغصبش حد انه يجي ..

بطر فظيييييييييييع !!!

قالها : طب اتلقحي في بيت اهلك .. لحد ما يجي مجنون .. يوديكي تتجوزي في بيروت !!

أنا مش عارفه البنت دي بتفكر ازاي ..!!

والله العظيم يا احنا بنسمع بلاوي .. ومصايب .. عن الافراح وشهر العسل والمهور ..

بطر وكفر بالنعمة مش طبيعي ..

بس للحق ...بنات كثير دلوقتي مؤمنين إن الفلوس والماديات مش كل حاجه في الدنيا ...

وبالعكس تحب إنها تبدأ مع جوزها من الصفر ويبنوا طوبة طوبة عش حبهم :blush: ...!!

صدقني اصل الحكاية راجع للتربية ...

تربية الام والاب ..

فيه ناس بتلاقيهم يربوا اولادهم على القناعة والرضا بما قسمه الله .. وان الفلوس مش كل حاجه ف الدنيا ...

وناس لا.. اولادهم بيتربوا على الطمع وانك حاولي تمتصي كل الفلوس اللي مع جوزك والا خطيبك .. يعني تتجوزي الفلوس

مش الراجل ..

يلا بقى أنا قلبت الموضوع :lol: .. من أقوال أنيس منصور ..

إلى مشاكل الزواج في العصر الحديث.. !!

بس انت اديتني الضوء الاخضر B)

[مصرية الهوى]

- لكي تحتفظي بالرجل اجعليه يغار قليلا... ولكي تخسريه نهائيا اجعليه يغار كثيرا.

نقلب على الصفحة التانية .. الغيرة ..

ما هو الأقوال اللي انت كاتبها كل واحد محتاج فصفصة اكتر من التاني ..

طبعاً الغيرة دليل الحب .. وعشان كده الست بتستمتع بإثارة غيرة زوجها .. عشان تعرف انه بيحبها ..

بس ساعات الراجل بيغير على مواضيع سخيفة :lol:

مرة وحده قريبتي رايحة تتعشى برا البيت هي وجوزها ..

بعد ماخلصوا متعشين .. كان فاضل كمية كبيرة من الأكل ..

قالت مش هنسيبها يرموها ..

هناخدها معانا نديها اي مسكين في الشارع ..

المهم خدوا العشاء وخرجوا .. وهما واقفين عند الاشارة .. عدى من جنبهم واحد زبال شكله غلبان اوي ..

قامت قريبتي قالت : ياروحي ياعمري .. ده شكله غلبان خالص .. خلينا نديه الاكل ..

تقول: خلصت كلامي .. لقيت جوزي بيبصلي نظرات مرعبة .. الشرر يتطاير منها :D ..

تقول تفاجأت .. قلتله : فيه ايه ؟؟؟؟

قالها : روحك .. عمرك ..

طب والله العظيم مش هأديله ولا لقمة .. يغوووووور ...

ومشي بالعربية ..!!

وفضل يومها زعلان ..

سألته طب ايه اللي زعلك .. ده مجرد كلام عادي .. يعني دائما على لساني ياروحي ياعمري ..

قالها : انا راجل وبأغير .. مش متخيل اني اسمعك تقولي لراجل غيري ياروحي ياعمري ..

أنا سألتها : طيب اقلبي الحكاية .. تخيلي جوزك قال لست غلبانة في الشارع ياروحي ياعمري

قالت : كنت أخنقه :blush:

[الآسر]

ياااااااااااااااااااه

ده انتي شايلة جواكي كتير قوي .. انتي الأمثلة التي ذكرتيها دي أعتقد اني ممكن أشوفها

بس في أفلام اسماعيل يس وميمي شكيب الي فيها المخرج بيعمل أي حاجة

تيجي علي باله وليدة اللحظة

كلامك مظبوط عن التربية .. 100% صحيح ولكن فيه جانب تاني جنبه وهو

ثقافة النفس وبناء الشخصية

كل منا بعد العشرين يتطور ويطور من نفسه ويبدأ في بناء شخصيته المستقلة

وتذخير ثقافة النفس .. ليس كل الأغنياء سطحين .. وليس كل المساكين جاهلين

يتأثر الانسان كثيرا بثقافة وشخصية والديه

ثم بعد ذلك بثقافة وشخصيات الأصدقاء

ثم بعد ذلك بثقافة تعليمه (جامعي - متوسط - أمية )

ثم بعد ذلك برغباته وميوله وحبه لأشياء اكتشفها علي مر سنين حياته

والملاحظ الأن أن أغلب الشباب .. لا مؤاخذة "" هايف ""

لا ثقافة ولا قوة ويغرق في بحور من التفاهة والملذات

شباب يستمتع بحياته أكثر مما يفكر بها

وفتيات مغرورات أكثر ما يتمنين أن تكون ملكة وسط صديقاتها

ولكن هناك فتيات ليسو بالقنوعات ولكهن ذو فكر وثقافة وحكمة

يتنازلن عن المظهر في سبيل الجوهر .. وهن نواة لبيت متماسك يدوم

أما التافهات فهن نواة لقنبلة هيدروجينية .. تنفجر من شكة دبوس :D

وياريت لما ميعاد الفرح يتحدد في بيروت .. ابقي اديني رنج علشان أعزم

كل اصحابي من " قرية المقدام " و " سور مجري العيون " و " التبين "

دول هيفرحوا قوي وهيركبوا المكن (الموتسيكلات يعني ) ويجوا قوام

ربنا يحميكي من كل شر وغرور ومر

استفسار بسيط ---------------> هل أنتي مخطوبة أو متزوجة أو ... ؟ :lol:

تم تعديل 16 يناير 2006 بواسطة الآسر

[مصرية الهوى]

ولا اسماعيل يس ولا ميمي شكيب .. انه الواقع

واللي يعيش ياما يشوف .. :blush:

وان شاء الله هأبقى احكي عن زواجات الف ليلة وليلة الي بسمع عنها ..

انا مقلتش ان كل الاغنياء سطحيين والا كل المساكين جاهلين ... لا بالعكس

زي المثال اللي قلتلك عليه .. مع انهم من نفس المستوى الاجتماعي والمادي ..

بس الشاب كان انسان عاقل .. والبنت طايشة ..

B)

ماشي لما معاد الفرح يتحدد هأرنلك .. بس اوعى تفتح عليا :D ..

على الله بس ما يطردوني ويقولوا فلاحة :lol:

واستفسارك البسيط ..

بص لو عندك عريس ..

بحري العينين ..

خوخي الخديين ..

كرزي الشفتين ..

عريض المنكبين ..

مملوء الجيبيين ..

هيعملي فرح في بيروت ..

وشهر العسل في جزر سيشل والا المالديف ..

يبقى انا لا مخطوبة ولا متجوزة ولا مرتبطة ..

:D

[الآسر]

أنا عندي عريس زي الفل فيه كل المواصفات دي

بس عيبه حاجتين

واحد: انه مصنوع من البلاستيك!!!! :blush:

اتنين: انه عصبي جدا :wub:

وبالنسبة لحكايات ألف ليلة وليلة ..

اعتبريني شهريااااار واحكيلي

بجد أحب أعرف وأعرف كمان الأماكن الي الناس دي بتسكن فيها

وزي ما انتي بتقولي اللي يعيش ياما يسوف .............. وعجبي

[مصرية الهوى]

بلاستيك ..!!

مش مشكلة نمشيها ..

بس عصبي ..!!

دي صعبة شويا ..

أنا عايزه واحد فريزر .. :P

------------------------------------

طبعاً الناس الهااااااي كلاس أفراحهم لو مكنتش في بيروت .. بتبقى في أفخم قاعات فنادق البلد اللي ايجارات القاعة بس تبقى اكتر من 20 الف دولار .. ده غير الضيافة (العصاير والشوكولاتات والحلويات الشرقية ) والاوبن بوفيه والفرقة الموسيقية والذي منه يعني ..

فأغلب البنات بيتنافسوا من تعمل حركات في الفرح احلى من التانية ...

يقوموا يغيروا ديكور القاعة كلللللللله .. تخيّلوا !! .. وطبعاً يبقى على حسابها ..

واحده تعمله ادغال .. اه والله .. زي ماتكون داخل جوا غابة .. بس حاسب لا يخبطك طرزان وانت مش واخد بالك ..

ووحده تعمله زي فرح سندريلا .. وغيره وغيره ..!!

أول حاجه الناس تدخل ويقعدوا على الطربيزات .. والطربيزة مش مفرش أحمر وشمعدانات وبس ..

تلاقي فازات وورود في منتهى الجمال وشمعدانات وافخم انواع الشوكولاتات والمفرش لوحده يبقى في منتهى الفخامة ..

والحركة اللي دايما يعملوها انهم يحطوا صور العروس والعريس على كل حاجه .. على غلاف الشوكولاته وعلى ازازات الميه وعلى علب المناديل وفي كل مكان ..

بعدين يعملوا زي عروض البروجيكتور .. ويحطوا صور العريس والعروس .. من وهما صغيرين .. ويكبروا .. يكبروا .. لحد صور الخطوبة وكتب الكتاب ..

وبعدين تبدأ الزفة .. يلا كل وحده تتفنن تعمل في زفتها حاجه فظيعة ..

محدش عملها قبل كده.. وساعات العروس بتلبس اكتر من فستان ..كل شويه بتطلع بفستان جديد !!

ولازم طبعاً في الزفة كل وحده تعمل اغنية مخصوص .. يغنوا باسمها واسم جوزها ..

طب تصدق بالله وحده عملت زفتها ايه !!

القاعة كانت ضلمه .. والموسيقى حزينة وجنائزية ..

بعدين دخلوا بنات صغيرين لابسين اسود .. وشايلين ورد دبلان .. والحزن على وشوشهم ..

بعدين دخلوا ناس شايلين تابوت .. ومشيوا لحد ماوصلوا الكوشة .. وحطوا التابوت ..

فتحوا التابوت لقوا العروسة نايمة .. زي حكاية الاقزام السبعة !!

جه العريس فتح التابوت وشال العروس وباسها .. وفتحت عينيها .. وقامت .. وبدأت موسيقى فرح ..

وقعدوا يرقصوا ..!!

وفيه زفات تانية ياما ..

وطبعا الكوشة مش بتبقى كرسين ووراهم ورود وخلاص ...

كل وحده كوشتها على حسب ديكور القاعة .. حاجه ابهه ..

وبعدين لما يجوا يقطعوا التورتة .. التورتة لوحدها دي حكايتها حكاية ..

10 أدوار والا اكتر ..

دي مبقتش تورتة دي بقت عمارة :blush:

والتورتة لوحدها بالالوفات .. واخر حاجة مصيرها تترمي في الزبالة ..!!

وبعدين العشاء .. يعملوا اوبن بوفيه .. يكفي العااااالم كله ..

وطبعاً لازم فيه حاجه اسمها تذكارات الزواج ..

دي حاجه عادية احنا بنعملها في افراحنا .. بس تبقى حاجه بسيطة و رمزية ... يعني مثلا صندوق صغير فيه ورد وعليه اسم العريس والعروس وتاريخ الفرح .. والا مراية صغنونة وعليها اسم العريس والعروس وتاريخ الفرح ..

بس الناس الابهة بيعملوا حاجات محصلتش .. تذكارات فظييعة ..تكلفهم الوووفات ...

واكيد ده كله يبقى متصور .. فيديو وفوتوغرافي .. و شوف المصورين بياخدوا كم !!

تعالى بقى للناس اللي بتحضر الفرح ..!!!

منظرة وفشخرة محصلتش ..

والله العظيم مرة وحده تحكيلي عن وحده اشترت فستان عشان تحضر بيه فرح ب30 الف ريال (8000 دولار) .. تخيّل !!!!!

أنا قلتلها يعني ايه ؟؟ مطرز بالالماظ مثلا :D !!!!

ده غير اطقم الالماظ اللي بيلبسوها وساعات الالماظ واسعارها بالاف الدولارات !!

مرة شفت اعلان طقم الماظ .. قمت كلمت على النمرة اللي كانت موجودة .. قلت بكل براءة لو سمحت بكم الطقم ؟؟

قالي ب250 الف ريال (اكتر من 65000دولار) بعد الخصم (خلي بالك بعد الخصم )... قلتله : أفندم :D !!!!!!!!!!!!

طب بذمتك فيه حد يشتريه ... قالي: لو مكنش فيه حد يشتريه مكناش عرضناه !!!

طبعا مش كل الاغنياء بيعملوا كده .. فيه ناس معروفة هنا في السعودية .. من كبار الاغنياء .. بس منتهى التواضع ومعندهمش خالص البطر بالنعمة والبعزقة دي ..

الفلوس دي بتبقى احيانا نقمة على البني آدم .. بتلهيه في دنيته عن الاخرة ..

يصرف . يصرف .. وهو مش واخد باله انه هيتحاسب على كل قرش صرفه ..

وسبحان الله ربنا يشيل البركة من جوازات البطر دي .. والرسول صلى الله عليه وسلم قال : ( أكثرهن بركة ، أيسرهن مهورا) ..

وحده اعرفها عملت فرحها من الافراح اياها .. وبعد شهر اتطلقت .. اللهم لا شماتة ..

فيه في التاريخ فرح اعتقد بنت احمد بن طولون وانا مش فاكره والله اللي فرشوا السكة من بغداد الى القاهرة .. وكان فرح في منتهى الابهة والناس كلها كانت بتتكلم عنه !!

يعني معروف عن الاغنياء على مر التاريخ طبعا مش كلهم ..ان افراحهم دايما تبقى الف ليلة وليلة ..

عندها أدرك شهرزاد الصباح ..

فسكتت عن الكلام المباح ..

وذهبت شهرزاد عشان تذاكر :wub:

[الآسر]

يعني كل الكلام ده وحواديت ألف ليلة وليلة بتحصل في السعودية

مش معقول!!!

أنا أعرف لما كنت صغير وكنا في السعودية ان أفراح السعودية منفصلة بمعني

الستات والبنات لوحدهم والرجالة والشباب لوحدهم

لكن لدرجة ان العريس يبوس العروسة ويشيلها :wub: :P

فده يعني ان السعودية عديت مصر بمراحل

وبعدين مفتي السعودية كان قال ان فلوس شراء اللاعبين حرام لأن فيه لاعب

اسمه ياسر القحطاني اتباع بمبلغ

30 مليون ريال .... 30000000 ريال

طيب ليه سكت علي اخوانا الفقرا دول بتوع الافراح الأبهة

عالم غريب مجنون مش موزون :blush:

وبعدين أنا عندي ليهم فكرة جديدة

العروسة تجيب أسد يحاول ياكولها والعريس اسم النبي حارسه يعمل سوبرمان

أو بات مان أو حتي سمن مان ويضرب الأسد ويتجوزها

والأحسن ان الأسد ياكلهم ويحلي بالمعازيم

والجماعة اياهم ان انا قلتلك عليهم بتوع سور مجري العيون

ممكن مش ياكلو العرايس بس لاااااااااااااااا .. ده ممكن ياكلو الأسد نفسه

أنا اعتقد انك تنزلي الموضوع ده كموضوع مستقل لأنه غريب وهام :D

[سيزيف]

مش مشكلة فيه في التاريخ فرح اعتقد بنت احمد بن طولون وانا مش فاكره والله اللي فرشوا السكة من بغداد الى القاهرة .. وكان فرح في منتهى الابهة والناس كلها كانت بتتكلم عنه !!

يعني معروف عن الاغنياء على مر التاريخ طبعا مش كلهم ..ان افراحهم دايما تبقى الف ليلة وليلة ..

  :blush:

<{POST_SNAPBACK}>

----

على ما اتذكر كان اسمها قطر الندى

و كان فرحها اسطورى فعلا

و قيل انه استمر اربعين يوم و ليله

[مصرية الهوى]

اه هي الافراح في السعودية بتبقى منفصلة .. بس العريس ووالده وأخوات العروس واخوالها واعمامها ..

لازم يدخلوا ويرقصوا قدام العريس والعروس ..

دي في الافراح الهااااي كلاس بس ..

وعلى فكرة الخافي اعظم ..

أنا حكيتلك على اللي اعرفه بس ..

وياسيدي الناس الكبار دي .. محدش يقدر يتكلم عليها .. :wub:

وصفقة ياسر القحطاني .. بتتسمى ايه دي ؟؟

جنون ..

والا يمكن جنون !!!!

يلا ربنا يحفظنا ويرزقنا شكر نعمته ..

شكرا يا shinercorner على المعلومة ..