مصادر مطلعه !!!!

[هادي]

مرة سألت نفسي

يعني إيه مصادر مطلعة ؟؟؟ !!!!

:lol:

الكلمة العجيبة اللي بتتلزق ف كل خبر يجيلنا من هنا وهناك

جاءنا من مصادر مطلعة بأن ... !!!

وقد خصتنا مصادر عليمه بأن .. !!!

وأفادت مصادر ذات صلة بأن .. !!!

مين المصادر دي

مين الناس دي

يعني مثلا خبر بيتكلم عن مشاكل داخل بيت آل مبارك !!!

يبقى مين المصادر المطلعه

يمكن الخدامه !!

قالت للواد المكوجي اللي واعدها بالجواز

والمكوجي قال للجريدة

:D

خبر بيقول لك مثلا : الريس شتمه بامه وتف ف وشه !!

طب مين المصادر المطلعه

هل الريس !!

طب يمكن المشتوم شخصياً !!!

طب يمكن كبير الياوران كان بيلمع أكر و رامي ودن ورى الباب

غُلبت وغلب حماري

جرايد المعارضه هرتنا - مصادر مطلعه -

غندك مثلا .. جرنال الشعب عنده بسم الله ماشاء الله

مصادر مطلعه ف كل خرابه ف العالم

طب ياخلق متخلوا حد من مصادركو المطلعة

يحط له المسدس ف فنجان الشاي ونخلص منه بقى ونرتاح

هو احنا غاويين وجع قلب !!!

أنا عندي مثال صغير وطازة

النهارده ف موقع " المصريون " على الشبكة

لقيت الست (مصادر) نقلت لهم رقم فانلة (تشيني) الداخلية !!

المصريون الالكترونية

مش بس الورق اللي معاه !!

بص كده ..

واسمع رأيك ..

بعد الفاصل

:blush:

تم تعديل 15 يناير 2006 بواسطة هادي

[لخبطه]

أنا فعلا بحتار في اللفظ دا وتحديدا من صحف المعارضه الى معروف عنها ضعف الامكانات وعدم النفوذ وبحس أنه نوع من الإثاره ليس أكثر والدليل إن كتير أوي من الأخبار المنشوره ومرجعيتها لمصادره طالعه (اقصد مطلعه ) لا يتم تأكيدها بأي حال بعد مرور الوقت الغريب أن بعض المرات تصادف أنه يكون الخبر حقيقي بس في الغالب بيكون خبر عام وتلاقي الجريده من دول تهلل لنفسها وتقول مش قولنا ياجماعه قولنا ولالا :lol:

[Sherief AbdelWahab]

هذه المرة سأنقل الموضوع عن إذنك يا هادي لمناقشات الإعلام نفسها..

الموضوع مش بس في الوضع اللي انت قلت عليه..

تعبير "مصادر مطلعة" مستخدم بشكل ضمني في المدرسة البكرية والمدرسة الحمودية .. وناس كتير فعلاً عايزة تعرف الناس دي بتجيب أخبارها دي منين.. ومن أنهي عفريت بالضبط؟

خلص الكلام

[Sherief AbdelWahab]

أول ما المرء يسمع كلمة "مصادر مطلعة" ، بتيجي في دماغه شوية أفكار:

1-دة إكليشيه بيحطه الصحفي عشان يثبت لنا ببساطة إنه واصل ، وإن له علاقات كبيرة ومتشعبة حتى في مراكز صنع القرار..

2-دة صحفي شاطر بيعرف يجيب الخبر من بين أسنان الأسد المرعب "نياااااااا" :blush: ، أو حتى بيعرف يفبرك الأخبار كويس بشكل يدخل عليك وعليا..

3-دي توقعاته هو ، أو أمنياته هو ، أو استنتاجاته هو ، وحب بصنعة لطافة يجيبها بصيغة خبرية .. لفتاً للنظر..

4-الخبر المسبوق بـ "مصادر مطلعة" جايز يكون خبر موجه ، وجهه "أصخاب المخل" لرئيس التحرير عشان يوصله للناس ، لغرض في نفس يعقوب..

واحد من الأفكار اللي فاتت ، أو أكثر على الأقل دة اللي بيقفز لذهننا لما بنيجي نناقش الإكليشيه دة ..

خلص الكلام

[هادي]

والله يا استاذ " لخبطة " انت عندك كل الحق

الموضوع اصبح فعلا لخبطه

يعني مجرد طفنيص .. لعى رأي اخواننا ف لبنان

بكش يعني بالمصري

الاستاذ الصحفي المعارض

والجريدة المحترمة

مش عاوز يطلع خايب ادامنا احنا الشعب الغلبان

اللي ليل ونهار فالق حضرته نفوخنا بالكلام على لساننا

مع إننا لم نعطه تفويض بذلك

لكن تقول ايه !!!

مش عاوز يطلع خايب ادامنا

عاوز يتكلم باسمنا ويقول لنا : انا عنتر زمانه

وجبت الديب من ديله

ولبست النحلة الفستان !!!

عرفت ونخربت وقرقضت ورى الخبر

لغاية مجبته من جذوره

شفت بقى يامواطن ياغلبان

بذمتك مش انا مُعارض حلو !!!

وتلاقي الجريده من دول تهلل لنفسها وتقول مش قولنا ياجماعه قولنا ولالا

قلت يا عم

قولتوا ياسيادنا

هو احنا نعرف نقدم رجل ولا نأخر رجل من غيركوا

ده انتوا سيادنا برضه

زي ما الحكومة بتتعامل معانا بمنطق أبوي

الحكومة بابا اللي يعرف مصلحتك يا مواطن ياطايش !!!

برضه المعارضة بابا .. ويمكن ماما

واهو كله بيعرف مصلحتك

لكن انت !!!

مستحيل

يا مواطن يا أرعن !!

نفسي ييجي يوم

افتح عيني

الاقي كل صحف المعارضة اختفت !!

بداية من المعارضة على طريقة (( آل بكري ))

والمعارضة على طريقة .. عادل افندي حمودة .. قدس الله سره

وطبعا الحيزبون روزا مستحيل ..

عشان كده مش راح احلم انها تختفي من حياتي

شفت أنا واقعي ازاي

ومش مواطن طايش ارعن ..

ربنا يهديكي يا حكومة

وربنا ياخدك يامعارضة يا وحشة !!

[هادي]

القريب الى القلب

الاستاذ شريف عبد الوهاب

يا باشا انت تنقل من غير استئذان كمان

مش عارف ليه يأ أخي .. ياحس انك محترم

ف صمتك

وف كلامك

ربنا يزيدك ويكرمك

انت مش مفروض تمسك مشرف باب

ده انت مفروض تبقى مشرف باب وشباك وشيش و كله .. ومشرف عام كمان

وبخصوص النقاط الاربع

أنا بدي أسألك سؤال صغنون

هوا الناس دي .. بتحترم نفسها ؟!!! :wub:

يعني عم حمودة مثلا و انكل بكري و أمثالهم

لما بيصحى من النوم

ويبحلق ف مراية الحمام

بيحس انه مصدق نفسه ؟

سؤال بيراودني ساعات

ومش لاقي له اجابه

مرة اتخبلت ف عقلي

وراسلت جريدة الشعب

تعقيبا على مقال نصه (مصادر مطلعه)

فرد علي الصحفي المحنك بكلمات من قبيل الثورة و الطغيان

فرديت عليه وقلت له نص اصحابي ومعارفي بينفضوا ودانهم منكوا خلاص

فقال لي انت مغرور وجاهل !!!

شفت ياعم الاستاذ

المعارضه الرشيدة

اللي بتتكلم باسمي واسم ابويا وعيلتي ليل نهار

معندها صبر تسمع صوتي

يكونش صوتي وحش !!!

[khedr]

اخونا المعارض الحلو(هادي باشا سابقا)

هي كلمه ..عمرك شفت قطه ..وفار..اصحاب غير توم وجيري

والا...حمامه وغراب يتجوزوا الاعند استاذنا الكبير نجيب الريحاني

والا شفت معارضه وحكومه زي بتوعنا دول الا عندنا

مش الدنيا سبع عجايب ..ضيف التامنه..

مصادر مطلعه...يقصد بها=..مصادر مطلعه عينينا احنا...لكن الاختصار للمساحه

[Sherief AbdelWahab]

عزيزي هادي:

القريب الى القلب

الاستاذ شريف عبد الوهاب

يا باشا انت تنقل من غير استئذان كمان

مش عارف ليه يأ أخي .. ياحس انك محترم

ف صمتك

وف كلامك

ربنا يزيدك ويكرمك

انت مش مفروض تمسك مشرف باب

ده انت مفروض تبقى مشرف باب وشباك وشيش و كله .. ومشرف عام كمان

:wub: B) :P :P :D :D :wub: :wub:

الكلام دة كتيييييييييييييييييييييير على شخصي المتواضع ، والله العظيم أنا غلبان..

مشرف عام ، صعب.. لأن المواضيع كتيرة ، والداخلين الجدد كتروا ، ربنا يزيد ويبارك..

أما مشرف باب ، أو غير مشرف ، فأنا سعيد بتواجدي بينكم جميعا في المحاورات على أي شكل ولون..

نيجي بقى لموضوع إيميلات الصحفيين..

بالمناسبة ، أموت وأعرف ليه الصحفي من دول بيحط إيميله؟ ، وهل سيادته بيعرف يفتحه ولا لأ..

راسلت بريد الأهرام غير مرة ، فأعاد لي الرسالة..

راسلت صحفاً مستقلة إلكترونياً لأستبين عن بعض الأشياء ، وغلبت أحايله ، ميردش ، أقوله ياعم ، ميردش ، أقوله يا سيدي .. ميردش.. أعمل له إيييييييييه؟

حتى في مقالات قليلة كتبتها يوماً من الأيام في إحدى الصحف الإلكترونية ، تركت إيميلي .. ولم يراسلني عليه أحد!

العزيز ميدو:

سأفرد بعد قليل في موضوع مستقل مساحة للكلام عن صحف المعارضة والصحف المستقلة .. وأنتظر مشاركتك ومشاركة الجميع فيه..

خلص الكلام

[عروس البحر]

السلام عليكم

انا عضوة جديدة فى المنتدى يعنى من حوالى اسبوعين

ودى اول مشاركة لى ....... وكنت الوقت اللى فات بستمتع بمشاركتكم الرائعة

واللى دفعنى للمشاركة هو رأى الاستاذ هادى بالنسبة لجريدة الاسبوع و (آل بكرى)

الجريدة دى هى المفضلة بالنسبة لى وكمان مصطفى بكرى بحترمه جدا

ليه بقى بتهاجمه ممكن اعرف ليه ؟؟؟

يمكن انت تعرف حاجة انا معرفهاش

ارجو التوضيح؟؟

وايه جرايد المعارضة اللى انت بتثق فيها؟؟؟

[هادي]

أرحب بالاخت الفاضلة (عروس البحر)

مع إن الصورة مختلفة شوية :D

واتمنى لك إقامة سعيدة بين اخوتك وأخواتك في هذا المنتدى الطيب

والذي يتميز بتنوع وجهات النظر حول مواضيع هامة

ومع ذلك .. فهو يتمتع بروح عالية من الود بين الاعضاء

أختي الكريمة

لك الحق أن تحترمي مصطفى بكري

ولكني ..

لا أجد نفسي ميالا نحو احترام الرجل

لماذا ؟

دعينا نتجه مباشرة إلى جريدة (الاسبوع)

ولن اغوص في تاريخ الرجل حتى أكون عملياً

وسندخل إلى موقع الجريدة على الشبكة لنجد التالي :

http://www.elosboa.com/elosboa/issues/460/1000.asp

جريدة الاسبوع

طريق الباحثين عن الحقيقة (هنعديها ونعتبرها ديباجه مطلوبة)

في مقال افتتاحي بعنوان

(المارينز العرب) يقول أ.بكري

- بعد فقرات وفقرات من الكلام الثوري الذي تجرعناه سنين عددا -

يقول ..

لقد جري حوار مطول بيني وبين الرئيس بشار نشر بعضه في صحيفة 'الأسبوع' العدد الماضي، وكل ما أستطيع التأكيد عليه أن سوريا ماضية باتجاه تحقيق الإصلاح السياسي والاقتصادي والاجتماعي في البلاد وفقا لأجندة وطنية تعكس قيم المجتمع السوري وحاجياته بعيدا عن المطالب الغربية التي تستهدف تفتيت الأوطان وخلق الفتن والتوترات وفتح الطريق أمام صراعات الداخل وصولا إلي تمزيق الكيان الوطني لحساب الأقليات.

يا أختي الكريمة

أفهم أن نحارب الامريكان ونكشف مخططهم ونلعنهم ف كل كتاب

لكن .. صحفي .. مثقف .. واعي .. طليعي

يقول الكلام ده عن النظام السوري !!! يبقى عايش معانا

أنا لي أصدقاء من سوريا كثيرين وكثيرين جداً

ومن أطياف اجتماعية وثقافية واقتصادية متباينة

كلهم يجمعون على لعن الاسد الكبير والصغير ف كل كتاب !!!

وعم بكري عاوز يحشر ف دماغي الصغنن

انه ليس بالامكان أبدع مما كان

عرفتي ليه مش باحترم هذه النوعية من المعارضة الزائفة

لأنها بتكرس لحكم الظالم إلى الأبد

على طريقة .. هنصلح أهه .. وحده وحده يامواطن .. مهلك علينا شوية

موت وعيالك تموت واحفادك تموت ف انتظار الاصلاح .. مش مهم

بس هيحصل اصلاح .. لا تستعجل !!!

وفقرة اخرى تليها من المقال ..

وفي هذا الإطار فقد أكد الرئيس بشار أن هناك قانونا جديدا للأحزاب في الطريق وأن حوارا يجري في كافة المؤسسات السياسية والشعبية للوصول إلي صيغة تضمن السماح لكل القوي والفعاليات الوطنية بأن تتواجد علي المسرح السياسي من خلال القانون المقترح.

وهناك أيضا اتجاه لإيجاد آلية للدفاع عن حقوق الإنسان ومراقبة أية انتهاكات تضمن تقنين أوضاع منظمات المجتمع المدني العاملة في هذا المجال وتفتح الطريق أمام دور فاعل لمجلس الشعب والهيئات المعنية في الدفاع عن حقوق الإنسان

انا لاني شايل المرارة وحاطط مرارة فيل

فأكيد مش راح استحمل أكتر من كده ..

من هذه النوعية السمجة من الخطاب الهابط في معناه وفحواه

هل الصحفي بيرص كلام جنب بعضه وخلاص

كلام شكله حلو وطعمة هباب وقطران

هل المثقف الثورجي .. مطلوب منه يدجل علينا عشان يركب مرسيدس !!

عارفه بكري نصير الغلابة ده مرتبه كام !!

بلاش دي ..

انا حضرت له ندوة ثقافية من كام سنة

حسيت انه زي (عبد الرحمن الابنودي) أصبح بيسترزق من ورى اللهجة الصعيدي

بيشد بيها تعاطف الناس .. كأنه بيقول أنا منكوا اهوه !!!

والحقيقة هو نسينا ونسي اللي خلفونا من بدري

الابنودي باع عطيات اللي كتبت السيرة الهلالية بخط ايديها !!

ولبس بدله سبور واتجوز البت البيضا !!

وبكري .. علاقته بالصعيد .. اي ميل .. فقط لاغير

بلاش دي ..

النهارده جرنال زي الشعب شايف ان صدام هو صلاح الدين اللي الكل باعه !!

معقول عشان بنكره الامريكان .. ننسى الايام السودة في ظل الدكتاتور

هو الاسلام جه عشان نقلب الباطل حق .. ولا عشان العدل يطال الجميع !!

بلاش دي ..

الاسد الصغنن ده .. جه لحكم بلد ضخم زي سوريا إزاي

صار له خمس سنوات .. وصل بسوريا لفين ..

ولو فضل – زي مولانا – اكتر من عشرين سنة .. هيوصل بيها لفين

يا اختي الكريمة

بكري ممكن يكون بيصدق اللي بيكتبه

لكن انا مش مجبر أصدق بكري ولا أخوه ولا اصحابه ولا الاسبوع كلها

ولا جميع احزاب المعارضة وجرايدها اللي بالشكل ده

النوع ده مش هييجي من وراه خير

مش معقول نستبدل دجل بـ دجل من نوع آخر

ده باختصار سبب هجومي على كل هذه النوعية

ولا أقصد بكري باسمه وشخصه

فهو يمثل لي حالة من العقم الفكري تصيب طبقة كاملة من رجال الصحافة

سنجدهم في روزا / الجمهورية / الوفد / الدستور / الاحرار / المصريين وغيرها

وتقبلي تحياتي وتقديري لشخصك الكريم

تم تعديل 19 يناير 2006 بواسطة هادي

[Alshiekh]

فهو يمثل لي حالة من العقم الفكري تصيب طبقة كاملة من رجال الصحافة

سنجدهم في روزا / الجمهورية / الوفد / الدستور / الاحرار / المصريين وغيرها

<{POST_SNAPBACK}>

والله حديثك ذو شجون يا أخ هادى ،

ولكن

صحف المعارضة لاغنى لنا عنها ، فهى على الأقل تكشف جانبا من مساوئ النظام والتى لاتقترب منها صحفنا القومية من قريب أو بعيد.

هل تعمدت ان تنسى الاهرام والاخبار من الصحف التى ذكرتها؟ :D :wub:

[هادي]

الله

اخي العزيز محمد معي على الخط ..

زهرة شباب اسكندرية

ومندوبنا في بلاد أمريكا

فعلا كلامك صحيح

لا استغنى عن صحف المعارضه من هذا الجانب

وتلك زاوي صحيحة

ولابد من الاهتما بها وتنميتها والكشف عن مزيد من الفساد في حياتنا

ومحاربته بكل قوة و تحجيمه بقدر الاستطاعة

وفي هذا الجانب

تحية احترام لمن يقف خلف هذا الجهد الواعي

لكن ..

أنا اتكلم عن جانب مختلف وصحفي مختلف

صحفي يسمي صدام - أمير المؤمنين - !!!! تخيل

صحفي يثبت دعائم الدكتاتور

ويقول كله عال .. عشان بيكره امريكا !!!

هذا ما أرفضه من المعارضة وصحفها

التهويل أحيانا

و الانغماس في لعبة الحاكم أحياناً اخرى

اما عن الاهرام والاخبار

انا لم أنساهم

لكن تعرف الموضوع عامل إزاي

هو حالة من التعود لا أكثر

طلعت ف بيت كله أهلاوي .. مش معقول راح اكون الزملكاوي الوحيد

دي فيها قطع مصروف ياعمنا :wub:

فتلاقي نفسك أهلاوي بالميلاد

وكذلك الجرايد

لم أقرأ اخبار اليوم - يوم واحد - ف حياتي

عمرها ما دخلت بيتنا

مش عارف ليه !!! :D

طلعت للدنيا لقيت جدي وابويا واعمامي بيشتروا الاهرام بس

وطبعا هي مصابة بكل الامراض المزمنة التي تصيب الجرائد الحكومية

لكن لا مانع ان تقرأ فيها لكتاب لهم وزنهم

حتى لو اختلفت مع بعضهم في جزئيات ..

احمد بهاء الدين الله يرحمه

احمد بهجت

سكينة فؤاد

محمد حجازي

وغيرهم لا تحضرني الذاكرة بالاسماء الآن

تحياتي و اشواقي

[khedr]

هادي

سلمت ايديك...

معلهش اخونا العزيز طارق كان كاتب من يومين بلاش او نقل شويه من التعليقات اللي زي كده

لكن مش مجامله ..

.واكيد هنشتبك مع بعض انا وهادي بعد كده لكن في الخير وفي حدودالموضوعيه ..لكن فعلا..كلام عبر عن كل اللي جوانا ..فنقول ايه الا

سلمت ايديك

هادي انت صعيدي ...صح.

[عروس البحر]

الاخ العزيز هادى

شكرا على توضيحك

لكن انا برضه مع الرأى اللى بيقول انه لاغنى عن صحف المعارضة

لانى مش معقول اخد معلوماتى والاخبار من صحف قومية

انا فاهمة ان صحف المعارضة لها مصالح مع النظام ورجاله

علشان كده فيه خط احمر

طب نقرا ايه ؟ مش معقول اجيب جرايد صفراء اللى ظهرت مؤخرا و اللى ملهاش

غير شتيمة الريس وابنه ونظامه لكن بدون مضمون

احب كمان اعرف رأيكم فى قناة الجزيرة وما تبثه من اخبار ومدى استقلاليتها

[هادي]

أخي العزيز ميدو

طبعا في الخير سنلتقي دوماً ..

وبالفعل .. جذور العائلة الكريمة من الصعيد

:D

مفيش حاجة بتستخبى ف البلد دي

:happy:

الاخت الكريمة "عروس البحر"

هذا ما أرفضه من المعارضة وصحفها

التهويل أحيانا

و الانغماس في لعبة الحاكم أحياناً اخرى

<{POST_SNAPBACK}>

هذا الوضع ينطبق على قناة الجزيرة

وزيادة حتة كمان .. !!!

لأن الجزيرة مستحيل تمس حكام قطر

هنقول عشان الخط الاحمر والاخضر .. ماشي

بس ليه مفيش الخط ده مع حكام ورؤساء دول عربية واسلامية واجنبية اخرى !!

يمكن دول ولاد تسعة ودول ولاد سبعة

طب واحنا ولاد إيه ... !!!

ملناش حق عليهم

ملناش حق عن كل رجال الاعلام في عالمنا العربي

حق المواطن

حقي إني أعرف الخبر الصحيح

وبدون إيحاء

وبدون غمز ولمز

وبدون غسيل عقول المشاهدين

وبدون توجيه الخبر والتحليل على مزاج الحاكم الهمام الذي يوحى إليه من السماء

فكل حاكم من دول مقدس !!

وكل منبر إعلامي من دول هو فرعون وجوبلز

الحتى الزيادة اللي عند الجزيرة

هي علاقتها بأمريكا ومشروعها

إيه الكلام العجيب ده

لأ

نقعد ونقلع الكرفته اللي خنقانا دي ونلبس الجلابية ونتكلم براحتنا :)

شوفي ياست الكل

لما طلعت الجزيرة كنت شديد الاعجاب بيها

خطوة جريئة الى الأمام في طين الاعلام العربي الراكد

تكنولوجيا

حرفية

مواعيد

التزام

ثم بدأت مصيبة .. بدعة .. اسمها برامج حوارية

فرحت وقلت عال

هنعرف نتكلم ونتحاور مع بعض

طبعا لقيت حال مثقفينا لا يسر عدو ولا حبيب

مش مهم

يهمني هنا القناة نفسها .. الجزيرة ..

ابتدأت تبان سوءات وعورات القناة

لأنها في الاخير إبننا .. منتج من بلادنا .. ده فكرنا ودي طريقتنا

سقط من نظري الكثير من مقدمي البرامج فيها !!

واهتزت صورة القناة المفعمة بالأمل المشرق

ثم بدأت حرب الخليج الاولى

ثم الثانية

وكلما مر الوقت .. يظل نفس السؤال يلح على خاطري

ماهي علاقة تلك القناة بأمريكا ومشروعها العظيم الذي ينص على

((لابد للعرب أن يبلعوا اسرئيل بالعافية ويخلعوا عباءة البترول لأنهم لايستحقوها))

طبعا عنوان المشروع من عندي

والحقيقة خرجت بنتيجة بتقول

الجزيرة بتنفذ المشروع ده .. سواء عن علم و وعي .. أو جهل و هطل فكري

شوفي شرايط تنظيم القاعدة !!

القناة الوحيدة في العالم اللي بتستلم شرايط التنظيم !!!

واحد بيخبط ف عز الليل ويحطها أدام الباب

زي الافلام العربي زمان .. لما البطلة تتخلص من الطفل أمام باب الملجأ أو المسجد أو العيلة الغنية ، ويصبحوا الصبح .. هيه لقينا نونو !!! أو هيه لقينا شريط بن لادن !! إيه العته المغولي ده !!! الخلق دي عاوزه تدخل ف عقولنا إيه !!؟

ولا مرة بيعكشوا الواد اللي بيسلم الشرايط

ويلهفوه جوز اقلام رايح جاي .. يخلوه يقر جاب الشرايط دي منين !!؟

باختصار شديد ..

المشبوه داخل الجزيرة .. ومايتم في الخفاء

أضعاف الواضح للعيان

وطبعا البديل ليس الصحف الصفراء

البديل .. صعب حبتين ..

ان كلنا نتعب شوية عشان نوصل للخبر الصحيح والتحليل الصحيح

ونستقى من كذا مصدر

حتى الصحف الاسرائيلية لابد نهتم بيها ولا نهملها ونسقطها من حسابنا

ساعات بتقول الحقيقة ، وبتقولها قبلينا ، وبتقولها بدون تزويق

بأقول ساعات

احترامي وتقديري للجميع