معرض القاهره للكتاب...

[khedr]

يفتتح اليوم معرض القاهرة الدولي للكتاب

ويستمر حتي الثالث من فبراير القادم

طبعا لا يخفي للجميع ما في هذا المعرض من فوائد

وخاصه للاخوه الذين لا يزالو مستمرين علي علاقتهم بالكتاب ...رغم الثوره الالكترونيه الذي يشهدها العالم الان

ولكن لي طلب من الاخوه المتمرسين في المعرض وكيفيه البحث فيه

لانه كما تعلمون اشبه بميدان رمسيس في اغلب الاحيان ويتوه فيه ويتعب الفرد منا حتي نصل اليما يريد

فمن عنده خبره كيفيه البحث والشراء مع توفير الوقت والنقود...نشكركم..والا ..

.سنذهب وامرنا الي الله

للجميع الدعوه....بزياره المعرض

[dr/alfa]

السلام عليكم ورحمة الله وبركاته

ننتظره بفارغ الصبر

وجدت له موقع على النت بس مش مفيد قوي هحاول ألاقيه لك .

[وائل ثابت عبد الرحمن]

السلام عليكم

نصيحتى لك يا أخ ميدو ألا تذهب فى يوم عطلة رسمية , لأنك فعلا لن تستفيد فالزحام شديد جدا , و خصوصا إن كنت بصحبة الأسرة , و عن الأثمان فلا فرق بينها و بين غيرها فى مكان أخر هذا على حسب ما رأيته فى المعرض السابق .

[وائل ثابت عبد الرحمن]

ملحوظة أخرى

حدد هدفك بمعنى انك تذهب و تعلم ماذا تريد شرائه , و لكن بالطبع الأمر لا يسلم من أنجذابك لكتاب ما , و لكن التحديد مهم جدا أيضا .

[Reham]

انا بحسدكم :D

اصلي كنت بهوي أروح معرض الكتاب ده وبستناه من السنه للسنه

حقيقي كان الواحد بيستفيد منه جدا وبيلاقي تنوع كبير في مختلف المجالات

الواحد ماكانش بيروح مره واحده بس لانه كان بيبقي زحمه جدا وكبير مش بعرف اجيب اخره في نفس اليوم

حقيقي يابختكم

وتحياتي لكم

[KANE]

ما اعتقد انه مقلق للمعرض هو الزحام مع كاس الأمم

خصوصاً ان المكانين متقاربين للغايه

[se_ Elsyed]

ما اعتقد انه مقلق للمعرض هو الزحام مع كاس الأمم

خصوصاً ان المكانين متقاربين للغايه

<{POST_SNAPBACK}>

لا أعتقد يا كين .. لإن الحكومة - ربنا يبشبش الطوبة اللي تحت راسها ويجعلها ذخراً لنا - قررت عدم فتح المعرض في أي يوم فيه مباراة لمصر بإستاد القاهرة ..

انا بحسدكم 

اصلي كنت بهوي أروح معرض الكتاب ده وبستناه من السنه للسنه

وأنا كمان يا ريهام ... وبقى لي ييجي عقد من الزمن مستحيل أجازتي تبقي ما بين يناير ومارس اللي عادةً بتبقى ميعاد المعرض لما خلاص إتجننت ...

والسنة الوحيدة اللي نزلت فيها في غير ميعادي كان في المعرض بتاع الصناعة والزراعة والحركات .. ومراتي راحت مدبساني في شوية سجاجيد على أدوات منزلية ..

مش بس كده ... شوفي ظلم الإنسان لأخيه الإنسان .. ده عشان أنا راجل زي كل الرجالة وغضنفر في بيتي وسي السيد بحق وحقيق .. فبعد ما وصلنا البيت والمدام راحت فردت البضاعة قدامها غيرت رأيها وقالت لأ الكونتراست بتاع الألوانات مش عاجيبني .. قوم ألبس وتعالى نغيرهم على السريع ...

لكن على مين ... فالإنسان موقف .. وكل واحد لو مالوش موقف في حياته ممكن يتبهدل وما يلقيش حته يقف فيها ...

فروحت حالف 100 يمين

إني لازم أكل لقمه الأول ولو حتى ساندوتس سالمون بالقوطه وبعدين نروح

من بعديها

حرمت أعدي من طريق صلاح سالم تاني وبالتالي بأطلع إمتداد كوبري ستة أكتوبر وأنزل من أي حتة بعيده عن المعرض خوفاً من السالمون لإني ما بحبوش وبيموع نفسي :blush:

[mb14]

ممكن الواحد يكتفى بمكانين بس هما الأهرام وسور الأزبكيه

الأهرام للجديد وسور الأزبكيه للقديم

لا أعتقد يا كين .. لإن الحكومة - ربنا يبشبش الطوبة اللي تحت راسها ويجعلها ذخراً لنا - قررت عدم فتح المعرض في أي يوم فيه مباراة لمصر بإستاد القاهرة ..

معلومه مفيده وشكرا يا س س

ويا ريتك تكتب لنا جدول مباريات مصر عشان الواحد مش بعد ما يتعب ويرتب ميعاد للزياره ما يبقاش حظه وحش ويكون مصر "نصرها الله " بتكون بتحارب فى معركه كرويه هامه . :ninja:

معلهش اصل اخوك ما يعرفش اى حاجه فى الكوره غير ايام الكوره الشراب فى الشارع فى المرحله الابتدائيه وبعدها اعتزلت .

[ابو احمدين]

صباح الفل عا الكل

المعرض ياجماعة من الساعة 10 صباحا حتي الساعة 7 مساءا يوميا عدا الايام اللي فيها ماتشات بالاستاد وهى 20 ، 24 ، 28 يناير يغلق المعرض الساعة الثالثة عصرا .. وتوجد كل يوم امسيات شعرية وبرامج ترفيهية وتعرض افلام سينما حديثة ومسرحيات وفنون شعبية .. ده غير التسوق وشراء الكتب وشرب الشاي والقهوة واي حاجة ساقعة في عز البرد وممكن تتمشى او تتشمس زي ماتحب .. واللي عاوز تذاكر دخول يقول وانا في الخدمة واشوفكم بالمعرض مع الشعراء .. وكل عام وانتم بخير .

اخوكم الشاعر ابواحمدين .