مقترحات لموضوعات المطبخ

[Folana]

السلام عليكم ورحمة الله ........

استاذنا الفاضل س.س .....اولا باحب اشكر سيادتك على اهتمامك وردك خصوصا فى موضوع عدد الصفحات ...اما غير ذلك فانا باعتذر لانى ماعنديش القدرة ولا الموهبة فى انى افند الحروف واحللها وارد عليها ...

حضرتك بس اقرا رقم واحد فى مداخلتك واللى بتقول فيها كفاية 65 صفحة واكثر ...وانا كنت بسال فعلا عادى هل هو كده كفاية ولا ايه ..يعنى مش داخلة مع سيادتك فى مشاحنة ولا اسلوب احراج وفحم فى الكلام ولا الحاجات دى خالص ...

بالنسبة لنقطة انك بتداعب بودا ..فبرضه ده شىء مالهوش وقفة عندى و لا تعليق لانى ماكنتش باتكلم بالنيابة عن بودا ..انا حبيت اوضح نقطة تخصنا كلنا ..اننا مش بندور على بطولات ولا حاجة لان سبب اننا سبنا الموقع الاول كان برضه حاجة بتحوم حول النقطة دى ...علشان كده انا علقت بس ..ومتهيالى ماحدش بيكتم حاجة فى قلبه ولا محتاج محامى يتكلم بالنيابة ...انا عارفة انك بتتكلم بطيبة ووضوح ومافيش معانى تانية مستخبية وماتقصدش انك تزعل حد بكلامك علشان كده انا حبيت اوضح وارد برضه عليك ...

والله يا اخى الفاضل ..انت مفصص كل الكلام ومش عارفة احصر الرد بتاعى فى ايه بالظبط ...

احنا اختصارا يعنى ..لا بنتكلم بغضب ولا عداء ولا حاجة والله يعلم اننا او ان انا يعنى علشان ماحدش يقولى اتكلمى عن نفسك ..باقدر كل الاعضاء وباحترمهم ومش باحب حد فيهم يزعل من حد ...

احنا زعلنا فى الاول لما لاقينا المواضيع اتشالت من غير مانعرف ايه السبب لكن لما الاستاذ الفاضل عادل تكرم ووضح مشكورا ..وافقنا على اقتراحه بس حبينا نطلب من الادارة انها تضع فى الاعتبار الرابطة اللى بتربطنا بس كده ..لكن لا فيه تحفز ولا حاجة

وفى النهاية انا باعتذر ان كنت اسأت اختيار الالفاظ او توضيح المعنى اللى يخلى الاخ الفاضل س.س ينفعل ويغضب كده كما هو واضح فى ردوده .....

تم تعديل 19 يناير 2006 بواسطة folana

[وليد صفوت]

أعزائى ...

الموضوع شايف انه سهل خالص...

و شايف ان رأى س س و رأى مدام فلانة ممكن يتعمل ....

س س قال ان الموضوع يتقفل على كده و يتفتح موضوع ( أطلب أى وصفة على بالك تلاقيها قدامك 2 ) و بنفس الأسلوب و بنفس الطريقة...

و إقتراح مدام فلانة و هو فتح موضوعات مثبتة تحمل أنواع الوصفات ( وصفات الحلويات - وصفات الفراخ - اللحوم - المكرونة - ..... الخ ) فى موضوعات مُثبتة و مُغلقة بها وصلات تؤدى الى الموضوعين الأصليين ...

اللى هما : أطلــب أى وصفــة على بالــك , تلاقيهــا قدامــك

و الجزء الثانى منه إن شاء الله ....

و ممكن أنا أديكم مثل :

موضوع مثبت و مُغلق يحمل فقط وصلات لوصفات اللحوم ..

وصفات البطاطس

صينية البطاطس فى الفرن

سلطة البطاطس بالمايونيز

البطاطس المحشية

Baby potatos

و هكذا بالنسبة لبقية الوصفات ....

كلها توضع فى مواضيع منفصلة و مغلقة بحيث لا تحتوى إلا على الوصفات فقط ....

أما عن الوقت .. فمن السهل جداًَ فعل ذلك . حيث يقتصر دور المتطوع لفتح هذة المواضيع على تصفح الموضوع الكبير ( أطلب أى وصفة على بالك تلاقيها قدامك ) و نسخ الوصلات بتاعت المداخلات فى الموضوعات المستقلة المثبتة المغلقة ,و اللى ممكن يكتبها أى عضو فى أى وقت و يتم تثبيتها من قبل الإدارة ..

اما بالنسبة لطريقة نسخ المداخلات اللى تحوى الوصلات ...

المقادير : ( مرة من نفسى :blush: ) :

1- انظر الى المداخلة اللى تحوى الوصفة .

2- ستجد رقم مسلسل لكل مداخلة فى أعلى المداخلة على اليسار ( على نفس السطر اللى مدون عليه تاريخ المداخلة على اليسار : مشاركة #241 )

3- إضغط على الرقم المسلسل الخاص بالمداخلة التى تريد ان توردها كوصلة .

4- ستجد نافذة صغيرة تُفتح أمامك فيها الـAddress أو الوصلة منسوخة جاهزة .

5- زيادة تأكيد إضغط على Ctrl + C أو إعمل Copy للوصلة تانى.

الطريقة :

إفتح موضوع جديد فى باب المطبخ عنوانه بسيط و سهل و مباشر ( كلمتين و بس ) فى شكل أشبه بالقواميس كده ... يعنى مثلا :

وصفات البطاطس

وصفات اللحوم

طرق عمل السمك

و هكذا ..........

بدون أى سلامات أو تحيات لأن الموضوع أصلاً هيتقفل فمش هتلاقى حد رد على سلاماتك B) .. إخبط الوصلات ورا بعضاها و را بعضها و طبعاً أنت أكيد فاتح صفحة تانية فيها موضوع ( أطلب أى وصفة على بالك ) بتتصفحها و كل لما تلاقى مداخلة ليها علاقة بالصنف اللى انت كاتب عنه إنسخ الرابط أو الـAddress و إلزقه على طول فى موضوعك ....

بس خد بالك من حاجة مهمة .... انا مثلا و انا بتصفح الموضوع بحثاًُ عن وصفات البطاطس لقيت مثلا :

طريقة عمل صينية السمك بالبطاطس ...

هنا أعمل ستوب , لأن الصنف أصلاً مش بطاطس ده سمك .... و ممكن آراء تانية تقول لأ إلزق الوصفة برضو زى ما شركة جووووجل بتعمل و تلزقلك أى موضوع له علاقة بالكلمة اللى كتبتها ....

مهما كان أسلوب تصفح العضو و بحثه عن المداخلات اللى تحوى الوصفات .. فده أسهل بكتيييييييييييييير من ان المشرف العام ( لوحده ) يقوم بفصل الوصفات كل وصفة لوحدها ... و طبعاً هيضطر للإلحاق أى تعليق قد يحوى أى فائدة أو إضافة للوصفة ........ و بعديييييييييين يفهرسهم تااااااااااااااااااانى أبجدياً ..

أيه رأيكم دام فضلكم ؟؟؟؟

عن قذنكم .. انا جعت من اللى قريته فى الموضوع ... ربنا يمسيك بالخير يا استاذ بودا , جوعتنىىىىىى :D

[وليد صفوت]

نسيت أقول حاجة مهمة بقى تانية :

أحلى ميزة فى حكاية نسخ الوصلات دى هى انك مش بتفصل المداخلة عن سياقها لألألأ خااااااااااالص ...

المداخلة موجودة و كل التعليقات اللى عليها موجودة برضو تحتها و كل اللى بيحصل ان اللينك بينقلك على المداخلة مباشرة بحيث ان الصفحة تعمل Load على المداخلة مباشرة بحيث تكون قدام عينيك على طووووووووول .. بدل ما تدور عليها فى الصفحة .. و ممكن بعد ما العضو يقرأ المداخلة ... ممكن يقرأ أى تعليق عليها ممكن يفيده ...

هه ؟

إيه رأيكم ؟

[bodda]

عفوا للصديق العزيز Violinking

مع احترامى لكل ما قلت

ولكن والله العظيم انا ما اعرف اعمل اللى انت قلته ده علشان اجيب وصفه

لكن برضه ماعنديش اى مانع بس نسيب الموضوع زى ماهو ماشى

واللى يفهم فى الحكايه دى ينسخ منه ويعمل اللى يفيد

بس بدون حذف شئ من الموضوع الاصلى

حاسس انى باعيد نفس الكلام لعاشر مره

انا اسف

[وليد صفوت]

عفوا للصديق العزيز Violinking

مع احترامى لكل ما قلت

ولكن والله العظيم انا ما اعرف اعمل اللى انت قلته ده علشان اجيب وصفه

لكن برضه ماعنديش اى مانع بس نسيب الموضوع زى ماهو ماشى

واللى يفهم فى الحكايه دى ينسخ منه ويعمل اللى يفيد

بس بدون حذف شئ من الموضوع الاصلى

حاسس انى باعيد نفس الكلام لعاشر مره

انا اسف

<{POST_SNAPBACK}>

انا معاك يا استاذ بودا .. كلامك صح ...

الموضوع يمشى عادى مافيش مشكلة ...

بس اى موضوع كبير بيتعمل له جزء تانى و ممكن تتأكد من كلامى لو فتشت شوية فى المواضيع القديمة هتلاقى موضوعات زى لغتنا الجميلة للفاضلة لايت هاوس معمول له ثلاث اجزاء تقريباً , و كل جزء كان أصغر من الموضوع ( أطلب أى وصفة على بالك ) ....

يعنى نفتح جزء تانى مافيهاش حاجة و موضوع جديد و نكمل فيه بنفس الأسلوب المحبب اللذيذ و كل اللى علينا إحنا (و اقصد اى عضو يعرف ينسخ الوصلات ) انه يفتح موضوعات زى ما كتبت من شوية و يلزق فيها روابط للوصلات و انا عن نفسى هبدأ فى الموضوع ده النهاردة إن شاء الله ... و بس خلاص ! :blush:

إيه رأيك ؟

[se_ Elsyed]

يا مدام فلانه .. الله يخليكي بلاش موضوع " يا أيها الذين أمنوا لا تقربوا الصلاة "

أنا برضوا قولت الموضوع كبر وكفايه كده ؟... وأخدت بعضي وقولت سلامو عليكم ؟!!!!

يا ستي أنا قولت إني بأقترح غلق الموضوع لحد كده .. ونفتح جزء ثاني بنفس الإسم لسهولة التصفح وعشان الطلبات ما تبقاش مُكررة لإن من الصعب الواحد يفِر ستين ولا سبعين صفحة وما شكى منه بعض الزملاء الأفاضل بأنهم تعبوا من البحث في الموضوع .. أنا نفسي بأعاني منه .. والموضوع لا يتعلق بفنيات ولا تكتيكات ولا غيره ..

على العموم حصل خير

وأنا آسف لو كان كلامي إتفهم غلط ..

[bodda]

الصديق العزيز سى السيد

ياريت بلاش الحساسية دى واحنا اولا واخيرا اصدقاء و هواه

وبنحاول نساعد بعض ... كلِ فى مجاله

وحل الصديق Violinking جميل

وهو انه هايحاول مشكورا عمل طريقة للبحث

تسهل على المتصفح الوصول لما يريد

تحياتى

[se_ Elsyed]

أولاً : يبدو إن كثيرون لم يقرأوا عنوان الموضوع ده وهو ( مقترحات ) .. وبالتالي إحنا داخلين هنا عشان نتناقش .. هات وخد يعني بمناسبة الماتش بتاع النهاردة .

ثانياً : ده وعد مني إن ما فيش مساس هايتم بخصوص الموضوع الرئيسي ، وأي حد - مش مهم مُشرف أو غيره - يريد أن يبدأ في الفهرسة فليفعل وله جزيل لاشُكر .

وتحياتي للجميع

وقوم حضر لنا لقمه نتغدا بها يا بودا ( على حساب مدام فُلانه اللي طيرت الحجرين من دماغي :ninja: )

[Folana]

السلام عليكم ورحمة الله ....

والله انا باخاف من نشيد لا مساس ده ..ربنا يستر ..

الاخ الفاضل س.س. كل اللى حصل سوء فهم من احدانا ووضحه كلانا ...

كده الامور تمام وكتر خيرك ...اللى عايزة اضيفه بس مش لحضرتك لوحدك ولكن للمحاوريين جميعا ..علشان بس نبقى متحكمين اكتر فى انفعالتنا واحنا بنتحاور ...نراعى بس اننا بنكتب حروف صماء ..يعنى ماحدش شايف وجه الطرف الاخر وهو بيكتب ..هل بيكتب كلام يزعل وهو مبتسم على اساس انه بيهزر ..ولا بيكتب وهو ساخر ولا ايه ...متهيالى هو ده السبب وراء معظم المشاحنات ..لاننا بنقرأ حروف بس وكل واحد بيفهمها حسب حالته النفسية وقت تلقيه الموضوع ..وممكن يكون ده غير المقصود خالص ...فارجو اننا ندى نفسنا فرصة بس لمعرفة نية الطرف الاخر او قصده قبل مانشرع فى الهجوم عليه وتعليقه من رجليه ....

سى السيد ...انت من ضمن ناس كتير جدا بأعتز بمعرفتهم وبيرسموا البسمة على وجوهنا ..ومااحبش اننا نقف قدام بعض فى المحاكم .....حقك على ياسيدى لو كنت طيرت لك الحجرين ...حابعت لك شوال حجارة من العمارة اللى بتتبنى قدامنا ...

وادى راسك اهى ...طــــــــــرررررررررراخ :ninja: (مع تحيات فلانة ابو الروس )

بودا ....انا شايفة انك بعت القضية :angry:

ربنا مايدخل شيطان بينا ياجماعة ...وكفاية الشياطين اللى مربينهم عندنا ....

[وليد صفوت]

وادى راسك اهى ...طــــــــــرررررررررراخ  :ph34r: (مع تحيات فلانة ابو الروس )

:wub:

<{POST_SNAPBACK}>

[se_ Elsyed]

ربنا مايدخل شيطان بينا ياجماعة

<{POST_SNAPBACK}>

قصدك مين بالشياطين يا ست فُلانه ؟ :ph34r:

أنا جاي أهدي النفوس بس ..

-----

حصل خير يا ستي وإذا كان على الحجرين فيعوضوا .. بس إدعي لنا نكسب ماتش ليبيا النهاردة .. أحسن أجي أقلبها كحلي على الكل كليلة بُكره :wub:

----

بودا ....انا شايفة انك بعت القضية

أنا قولتك لك مراراً وتكراراً إن بودا بيهرب مع أول طاسة طايرة ما سمعتيش كلامي .. ( وش حسن بابور الجاز في فيلم لعبت الستات )

[bodda]

طبعا مابعتش القضيه ولا حاجه

انا متهيالى قلت موافق على اى حل والمهم عدم المساس بالموضوع

واذا كان فتح الموضوع بجزء تانى دون قص الاول يعتبر بيع

يبقى بلاش منها خالص

و مش انا اللى :

قولتك لك مراراً وتكراراً إن بودا بيهرب مع أول طاسة طايرة ما سمعتيش كلامي

ياما رمينا ورا ضهرنا ولا همنا

تم تعديل 20 يناير 2006 بواسطة bodda

[شاعرالرومانسية]

اخوانى واحبائى الكرم .. ( جميع اطراف الحوار ..) من مطبجية ومشرفين

اولا انا بعتذر بشدة عن عدم مشاركتى فى الحوار والمناقشات السابقة والذى خارج لظروف خارجة عن ارادتى ...

ثانيا .. وطبعا بعد ما اصبح الحوار شبة منتهى .. وقد طار ماطار ( ياترى مين اللى اتعور بس عشان نعمل الواجب ..)

اشكر جميع الاطراف على اسلوب الحوار الديموقراطى والذى اعتقد انه كان فى صالح الموضوع بصفة خاصة والمنتدى بصفة عامة

حيث اوضح للجميع طبيعة العلاقة التى تربط الاعضاء ببعضهم البعض من جه .. وبمشاركاتهم من جة اخرى

وكذلك اظهر لنا رغبة وحرص السادة المشرفين الاجلاء ( حلوة الاجلاء دى مش كدة ... معلش اصلى سامع ان فية انتخابات قريب..)

وذلك على تسهيل وتنظيم موضوعات المنتدى وتيسير الامور على الاعضاء لضمان الاستفادة الكاملة.. ورب ضارة نافعة

واحب ان اسجل فقط بعض الملاحظات على ماسبق .. وذلك لمجرد تسجيل الرأى وليس لفتح باب المناقشة

* هذا الباب له معزة خاصة عندى ومنفذ كما قال عزيزى بودا لى بوجة خاص وللجميع بشكل عام لممارسة هوايتهم ..

* تحول هذا الباب بمضى الوقت من مجرد باب للوصفات المطبخية الى قاعة حوار وتواصل بين افراد مصريين وغير مصريين

ومن مختلف البلدان يجمعهم موضوع حوارى اصيل وهو الطبخ والوصفات وان تفرع منه ردود فرعية تؤكد معانى الود و الحب

المتبادل بين جميع الاخوة المشاركين.. واصبح الموضوع اشبة بقاعة مصرية اصيلة بكل ما فيها من دفء وحب وود

وساعد على ذلك تواجد مجموعة من الاعضاء على مستوى عالى من الاحترام والاخلاص والوفاء لكل ماهو مصرى

* وبالتالى اصبح الموضوع اكبر من كونة موضوع خاص بالطبيخ والوصفات واصبح الحفاظ على هذة العلاقات الحميمة

اهم - من وجه نظرى - محاولة تنظيم وتسهيل عملية الوصول للوصفات ( والتى تتبعها منتديات عدة ..ولكن ليست بها مثل تللك العلاقات )

* لا انكر ان التفكير فى اسلوب تنظيمى يسهل على الاعضاء الوصول لطلاباتهم من وصفات هو امر هام ولكن بشكل لايأتى على حساب جوهر الموضوع

* ان تتم مناقشة ذلك فى باب شئون المحاورات مع القائمين على الموضوع (واذين قاموا بجهد لايستطيع احد ان ينكرة خلال الفترة الماضية )

للوصول لحل هو امر غاية فى الديمقراطية ..

ولكن اعتقد ان المشكلة تفاقمت عندما نجد ان اتخاذ القرار وتنفيذة جاء قبل الوصول لحل من خلال تللك المناقشة

والتى تم فتحها فى الاصل من قبل احد اعضاء المطبخ " الاخت فولانة "

* جميع اقتراحات الاخوة الافاضل.. فولانة.. وام البنات .. وفنسر.. وسى السيد..

حلول منطقية وقابلة للتنفيذ ... ولكن

بعد فبولها من جميع الاطراف

وفى النهاية .. وكما ذكرت .. فرب ضارة نافعة

وادام الله علينا نعمة النقاش والتحاور والخلاف فى الرأى ..

ولكن بدون ان يفسد الود بيننا eey::

[Eng_Willo]

ايه دة كلة...... دة المطبخ طلع له شعبية كبيرة اوى, بجد انتوا شكلوكوا كدا هتخلونى البد فى باب المطبخ على طوول مع انى بينى و بين المطبخ دة طار بايت و كباية الشاى و فنجان القهوة اللى بحاول اعملها بنفسى غصب عنى.

الى الامام يا سيدات المحاورات ,,,عايزين جيل من ربات البيوت بجد مش اسم بس.

[Folana]

اخوانى واحبائى الكرم .. ( جميع اطراف الحوار ..) من مطبجية ومشرفين

المشرفين الاجلاء .. ورب ضارة نافعة

وان تفرع منه ردود فرعية

واصبح الحفاظ على هذة العلاقات الحميمة

* لا انكر ان التفكير فى اسلوب تنظيمى

امر غاية فى الديمقراطية ..

ولكن اعتقد ان المشكلة تفاقمت

*.. فولانة.

حلول منطقية وقابلة للتنفيذ ...

بعد فبولها من جميع الاطراف

وفى النهاية .. وكما ذكرت .. فرب ضارة نافعة

وادام الله علينا نعمة النقاش والتحاور والخلاف فى الرأى ..

ولكن بدون ان يفسد الود بيننا eey::

<{POST_SNAPBACK}>

:) :D :happy:

طب والله العظيم الرجل ده بيتكلم صح ...مادام بيقول كلام كبير كده انا مش فاهماه ومادام قال فلانة يبقى بيتكلم صح .....

اقول ايه بس ..شاعر وبيعرف ازاى يمسك بزمام الكلمة (هى زمام دى يعنى حزام برضه ؟؟؟)

كلامك زين والله يا اخى العزيز حسن وانا حاكلم الناس الكبيرة تمسكك وظيفة مستسار المطبخ الكانونى ..وسيبك من الشركة بتاعتك اللى حتفضل تأكل من عمايل ايديك بلوشى .... :D

اخى الفاضل فيولين كنج ....انا باشكرك جدا على مجهودك الرائع ..وفعلا احنا مش عارفين الفكرة دى كانت غايبة عننا فين ..هم دول شباب مصر فعلا .... :wub:

اخى العصبى محمود المليجى ....الشيطان ده واحد صاحبى انت ماتعرفهوش :D

صباح الفل ........... :D

تم تعديل 21 يناير 2006 بواسطة folana

[وليد صفوت]

مدام فولانة , ميرسى كتير :) :D

بس همتكم معانا , لو فاكرة حضرتك أى وصفة و مكانها كان فى أى صفحة فى الموضوع الأول , إفتحى موضوع بنوع الوصفة و إنسخى اللينك هناك على طول ... و لو مش عارفة الطريقة يكفى تبعتيلى رسالة خاصة برقم الصفحة اللى فيها الوصفة و انا هتصرف , و نفس الكلام لعزيزى بودا و شاعر الرومانسية و كل حبايبنا فى باب المطبخ ... :wub:

هو فين ريهـــام ؟؟ :happy:

[Folana]

السلام عليكم ورحمة الله ............

معلش ياجماعة احنا اتصالحنا أه ...لكن الحق مايزعلش ولا ايه ...بقى بالصراحة كده وعلى بلاطة ..فيه حاجات ناقصة من المطبخ الاولانى ..ايوووووون فيه حاجات ناقصة ..

ومعلش بقى علشان فيه حاجات بتضيع انا عايزة اعمل محضر ..احضرنا ياباشمحضر المليجى لو سمحت ...بقى انا كنت ناوية والنية لله انى اساعد اخى الصغير فيولين كنج وانقل الاكلات وارقام الصفحات وهو يتصرف ..لكن فوجئت ..ايوه فوجئت ..(اكتب عندك )..ان اول صفحة كلها متشالة ..حتقولى لى لا ..حاقولكم متشالة ..والصفحة الاولى دلوقت كان ترتيبها التانى ....الصفحة الاولى اللى باتكلم عنها كان فيها وصفة القرنبيط المقلى ..ووصفة الكانيلونى ...هل ..باقول هل اتكلوا مثلا ..لو حد اكلهم يبقى بالهنا والشفا ..اما لو حد اخدهم معاه وهو مروح ..يبقى عايزينهم تانى علشان ننزلهم فى الفهرس ......

طلب تانى بقى ....كنا نتمنى ان الوصفات اللى خرجت من الموضوع ياريت تدخل تانى لان فيها كلام غير الوصفات برضه ..ومادام الموضوع اتقفل يبقى لن يضر بشىء رجوعها ..وفى الحالة دى انا ممكن اتنازل عن المحضر ....

واقفل المحضر فى سعته وتاريخه .......................

[Advisor]

نجح الفاضل فيولين كنج فى التوصل لطريقة عملية لبناء أرشيف وفهرس لوصفات الطعام ووضع فى باب المطبخ عدة موضوعات مع روابط لعدد من الوصفات.

ما زلت أرى - من وجهة نظر المستخدم - أنه من الأفضل أن يوجد موضوع لكل وصفة يجمع الوصفة و أى مناقشات أو محاورات حولها حتى بعد مرور فترة من الزمن.

تم إعادة الوصفات التى كان قد تم فصلها فى موضوعات مستقلة.

[Folana]

السلام عليكم ورحمة الله ..........

أستاذنا الفاضل الكريم ...انا بأشكر سعادتك مرتين ....الاولى لاستجابتك السريعة ..والثانية احب اشكرك فيها بصفة شخصية لتواجدك بينا ...قد ايه الانسان بيشعر بضيق افقه لما يجد الطرف الاخر بيمتاز بسعة الصدر ورجاحة العقل ....اتمنى اننا مانكونش تعدينا حدود اللياقة مع سعادتك ومش باقول كده .. باعتبارك الادفايزور ..لا خالص ...لكن باعتبارك انسان ...واخ كبير واب روحى للكثير من الاعضاء ....(خايفة اقول لكل الاعضاء زى ماحضرتك عارف بقى ;))

ربنا يديم المحبة ويعزنا دايما .............

[شاعرالرومانسية]

استكمالا لراى الاخ فيولين كنج ... والتى لقت قبولا عاما

تم عمل عدة موضوعات باسماء المجموعات الرئيسية ( لحوم / فراخ / اسماك / خضروات / وصفات شعبية )

وبداخل كل موضوع اللينكات الخاصة بالوصفات التى تندرج تحتة واسم كاتبها ..

وللتسهيل ، انا اخذت من اول صفحة فى الموضوع الرئيسى ووصلت لحد صفحة رقم 20 ..

لو حد عاوز يصنف ممكن يبدأ من صفحة 21 ويضيف الوصلات

الخاصة بكل وصفة تحت الموضوع المناسب

وللجميع وافر الشكر والامتنان ..

وربنا يديم الود والمحبة ;)

تم تعديل 21 يناير 2006 بواسطة شاعرالرومانسية