أنسحابى جه فى وقته!!!!!!!!!!!!

[عمرو منير]

قررت أنا" عمرو منير" أحد الأعضاء الجدد فى المنتدى وأنا بكامل أرادتى وبكامل قواى العقلية أن أنسحب للأسف من منتدى محاورات المصريين وهذه أسبابى

1: مش عارف ليه اللى بكتبه مش لاقى أى صدى فى المنتدى لدرجة أن فوق ال3موضوعات ملاقتش أى رد يوحد الله ويبل ريق اليتيم العبد لله , للدرجة دى موضوعاتى دمها تقيل ومش لقيا قبول من زوار المنتدى مع أنى بيتهيألى أن مبكتبش أى كلام فمعظم مشاركاتى ياقصص قصيرة يانقد ادبى وفنى ياسياسة

2: بالرغم من حالة العزلة اللى الواحد عايشها فى المنتدى تلاقى ناس تانى موضوعاتهم على أدها -لا أقصد التقليل لا سمح الله- ومع ذلك تلاقيها أستبقلت ردود بالصفحات ومش بالقطارة زى العبد لله .

3:أنا ممطلبش الصدقة المعنوية لكنى عايز أعرف أيه نوع الموضوعات اللى بتعجب الناس فى المنتدى مش عشان أسايرهم لكن عشان أعرف أذا كانوا من نفس سكتى والا لأ.

كلمة أخيرة ........

خسارة كان نفسى أكمل معاكوا لكن مفيش نصيب , وقبل ماأمشى عايز أشكر كل اللى شجعونى هنا زى bentmasria وزىviolinking

وتحية خاصة الى sherief abdelwahabاللى عجبنى تفكيره جدا جدا

والسلام عليكم.

عمرو منير 18\1\2006

[مصرى]

لا أعتقد يا عزيزى عمرو أن 16 مداخلة هى القدر الكافى للحكم عليك أو الحكم علينا .. فأرجو أن تعطى نفسك والأعضاء فرصة

وأسعدنى مطالعة مساهماتك وأعجبنى بشكل خاص موضوعك حول "رجل القلعة" والمغزى منها وأرى أنك تمثل اضافة جيدة للمحاورات :D

[khedr]

الاخ الكريم....عمرو

موضوعك فعلا في وقته ..بس مش الانسحاب ...لأ

كيف تقرأ المحاورات.......بالضمه علي التاء مره .....والاخري بالفتحه علي التاء

الاولي:بالضمه علي التاء

هذه تتبع حسب كل منا واهتمامته وفهمه للمواضيع التي تطرح

اي ان هناك مواضيع قد لا اكون افهم فيها بالقدر المناسب فلا اعتقد عندما اتد خل لا يكون لي مناسبه.

.يعني مثلا ..لما الاستاذه العزيزه بنت مصريه تكتب ويرد عليها مثلا اخونا الكريم دووفي فلا تجد من نفسك الاانك تستمتع بما بينهم من محاورات

عندما يكتب استاذنا الكبير الافوكاتو فلا تملك الا..ان تهز رأسك فقط بالموافقه

هذه امثله لا للحصر حتي لا اغمض حق الاخرين....لان بصراحه هناك مواضيع وكتابات لاخوه فعلا تشدك من البدايه من اسم الذي يكتب..

نرجع لموضوعنا ..انت وانا بنقرأ لاسم الوضوع ..او محتواه...او الكاتب..وهذه مع مرور الوقت بتقدر تقيمها

وانا معك ان فيه مواضيع كتيره بتعدي ..من غير تعليق مناسب لحجم الموضوع واهميته

ومواضيع قد تكون في رأيي او رأي احد المتحاوريين لا يتناسب مع حجم التعليقات التي تتم عليها ..وده يرجع لا اهميه المواضيع نفسها .

.وعلي سبيل المثال ايضا هناك الاستاذ سيد يوسف بصراحه مواضيعه دسمه وعميقه وتحتاج الي تأني قبل ان تحاول الرد ..وتلاقي المواضيع ابتدت تكتر وترد علي ايه والا ايه....

وبعدين فيه مواضيع تواكب الوقت والزمن يعني الواحد ما ينفعش الواحد يكتبها بعد الوقت بتاعها

وفيه مواضيع بتنزل في وقت فيه موضوع علي الساحه هواللي مسيطر علي كل المجريات ...يعني المواضيع دي لها ظروفها

نأتي الي التي تكتب بالفتحه علي التاء..وهي(تقرأ....

علشان الموضوع كده طول وما حدش يقرأ كتير...هي كلمه بسيطه

نوعيات المواضيع لها دور كبير في الذي نقرأه...وانت طبعا سيد العارفين الواحد ايام مكان يشتري الجرنال ..

ايه اول صفحه كان يبتدي بيها ,,وكده يعني ..اظن دي في معظمنا وعادات القرأه عندنا

عموما انت ذكرت اسماء في المشاركه يا اخي دول لوحدهم يكفوك علي الاستمرار والتشجيع

اخيرا..عارف بقي انا اعطيت لنفسي حق الرد ليه......................!!!!

اولا..علشان ما تزعلش ونفقد اخ كريم وعزيز

ثانيا..لقيت عدد اللي قرأوا الموضوع يمكن اكتر من 9 ولم يرد احد...ودي عاده مصريه من ايام قدماء المصريين....ولسه الوقت بدري ومش هانظلم احد

لاتتركنا وكن معنا وشارك وحاور..وسدد في مواضيع ومره يرد عليك ومرات ارد انا وانت

[tarek_almeghallawy]

الاخ العزيز عمرو منير

أنا زيك جديد على المحاورات

لكن أنا مش معاك في الانسحاب

قول اللي عندك وأجرك على الله

أقول اللي عندك بدون انتظار الردود

التجربة تستحق الاستمرار

من النادر أن تجد مثل هذه الباقة المنتقاة على غير ميعاد في مكان آخر

الطيور على أشكالها تقع..خلي وقعتك على مثل هذه أشكال

المحاورات المصرية مش ها تقدر تقفل مخيخك

[الرافعي]

الأخ العزيز عمرو

السلام عليكم

اهدا وصلى على النبي ، وبالراحة يا عم صبرك علينا شوية

يا سيدي الكريم ...

لماذا نكتب ؟؟ وهل نقيم ما نكتب بالإقبال على ما كتبنا فقط ؟ ولماذا نحن هنا أصلاً ؟؟

أرجو أن تفكر في هذه الأسئلة بهدوء وروية، وأعط لنفسك فرصة تقرأ فيها الموضوعات والمداخلات للآخرين وتتداخل فيها وتضيف رأيك الذي هو قيم من وجهة نظرنا فمن أتى هنا وانضم لهذه الجمع لم يأت لتضييع وقت أو ليبحث عما يملؤ فراغه، فالكل مشغول، والناس هنا مهتمة ومليئة ولديها الكثير لتفيد به الآخرين أيضاً -مثلك أنت أيضاً- فلا تحرمنا من خيرك وتحرم نفسك من خير غيرك.

حاول أن تنوع موضوعاتك وتنوع الموضوعات التي ترد عليها او تتداخل فيها ، فلا تحصر نفسك في زاوية محددة.

تخيل إن معلم جزار ثقافته متواضعة مثلي ، لا يحسن الشعر ولا النثر ولا الزجل ولا حتى الدجل، فهل يمكن له أن ينقد قصيدة للأخ شاعر الرومانسية أو مهيب أو الأخت الكريمة مصرية ...

أنى لي بموهبة فؤاد حداد وصلاح جاهين وأحمد فؤاد نجم حتى أنقد صفاء في أزجالها القوية ...

لكن ممكن تلاقيني في زاوية المدبح مثلاً (هاحاول تأسيسها بس أتفاهم مع الإدارة بعد رش اللحوم والذي منه عشان يوافقوا) :blush:

أصبر يا عزيزي، وخللي نفسك طويل، والتمس للناس الأعذار فالفترة السابقة كانت فترة هدوء وركود للعيد وخلافه، كما أنك تلاحظ كثرة عدد المنضمين،

فالتمس للناس الأعذار، وأولهم العبد لله، يعني لسه طالعين من قضية تموين، وربنا يستر علينا جميعاً.....

صباحك نادي إن شاء الله

أخوك المعلم حلاوة العنتبلي

[bibo]

:blush: B)

سمة العصر:

القرار قرارك...........زشارك باختيارك

للعبور لــ ................... :D B)

تحياتى

[الرافعي]

:blush:  B)

سمة العصر:

القرار قرارك...........زشارك باختيارك

للعبور لــ ................... B)  B)

تحياتى

<{POST_SNAPBACK}>

عروستي :D

[emadiab]

يا استاذ عمرو

انسحاب ايه اللى بتتكلم عنه

تعرف انك مش العضو الوحيد اللى بيعانى من نفس مشكلتك

و لو كل واحد فكر بالطريقة دى و انسحب لأنه حس ان مفيش اهتمام او صدى لموضوعاته رغم اهميتها يبقى كده منتدى المحاورات حيصفصف يا دوب على خمسين عضو بالكتير

طبعا انا عارف ان عدم الإهتمام ده بيخلى الواحد يتخلى عن حماسه للموقع مهما كانت عزيمته قوية و كمان بيخليه يفكر فى نظرية المؤامرة

لكن انت ذكرت جملة بتقول فيها رغم عزلتى فى المنتدى

اهو انت قلتها العزلة احد الأسباب اللى بتخلى اسمك يعدى قدام عيون المحاوراتية و غيرهم مرور الكرام يعنى لازم تقرا مواضيع الناس التانية و ترد ردود لها فاعلية و اهمية من هنا الناس اللى كتبتن المواضيع دى حتحس بالإمتنان والتقدير ليك و يوم ما يلاقوا اسمك على موضوع حيضغطوا على اللنك و يفتحوه تلقائيا من غير تفكير و حيقروه كمان حتى لو كنت بتقول ريان يا فجل اما حكاية الردود دى بقى حسب التساهيل

يعنى لو الموضوع كان من ضمن اهتمامات الشخص اللى بيقرا و حالته المزاجية و وقته اذا كان يسمح ليه بالرد و طبعة شخصيته و حاجات تانية ان لسه معرفتهاش

يعنى الحكاية مرتبطة بالعامل النفسي و الإجتماعى اكتر من اى حاجة تانية عايزك تحط ده فى اعتبارك و تعمل بنصايح اللى قبلى ( الأستاذ حلاوة و طارق و ميدو و متسمعش كلام بيبو )

و لأن العبد لله اكتر واحد اتقالتله النصايح دى و معملش بيها فهو بيعانى من نفس مشكلتك و فكر اكتر من مرة يعمل زيك و اعتقد ان هو ده افضل و قت انسحب فيه مش كده برده ؟؟

على فكرة انا برده بنشر اشعار و قصة يتيمة محدش بيرد عليها غير تقريبا نفس الأسامى اللى انت قلتها واضح ان الإدارة معينة ناس فى لجنة سرية للإستقبال و تطييب الخاطر ( انا بهزر طبعا )

رجائى ليك يا عمرو باشا عيد النظر فى موضوع الإنسحاب و متنساش تعدى على البروفيل بتاعى و تاخد ايميلى عشان انا يهمنى انى اتكلم مع اى حد لأنى قربت اتجنن من كتر الكلام مع نفسي

[الآسر]

عزيزي عمرو

لماذا أنت يائس هكذا؟

هل كل النجوم يولدون نجوما .. وهل كل المشاهير يرزقون بالشهرة بدون تعب؟ .. بالطبع لا .. انت تريد أن تكون نجما

وان تكون موضوعاتك ذات تأثير فعال في المنتدي

وهذا سيتأتي لك بالعمل الجاد الهادف

والمواضيع المنتقاة الجديدة

والصبر

نعم عليك بالصبر ولا تهرب

اذا تركت المنتدي سأعتبر هذا هروبا

ولك أن تقرر !!

[kokowawa1979]

إيه ياعم عمرو الحكاية !!!

ماتاخدش الموضوع بالحساسية دي

في بعض الأحيان تلاقي مواضيع لبعض الإخوة الأفاضل من من ( حلوة دي ) أو ممن لهم باع طويل في المنتدى يقومون بفتح موضوعات قد يكون نصيبها من الردود لاشيئ ومع ذلك يستمرون في الكتابة بلا زعل أو حساسية ولو انت تابعت جميع التوبيك المفتوحة في المنتدى للاحظت أن الكثير منها لاتوجد له ردود لأن في اعتقادي أن بعض من يكتبون يقومون في كثير من الأحيان بتغطية الموضوع من كافة جوانبه وبالتالي لايعطي فرصة للآخرين للتعليق على نقطة ما في الموضوع لأنه قد قام بتغطيتها بالطبع !!!

فأرجو أخي الفاضل ألا تأخذ الأمور بهذه الحساسية !!!

وبعدين شفت التوبيك اللي انت فتحته رد عليك فيه إخوة أفاضل قد إيه :blush:

[أبو محمد]

أخى عمرو

أنا اشتركت من كام يوم فى المنتدى ... وجاء قرارى بالاشتراك بعد زيارات عديدة للمنتدى .. فوجدته يضم أخوة من الوزن التقيل (فكريا) ... أعرف أسماءهم .. ولا يعرفوننى ... أقرأ مشاركاتهم وأستمتع بها دون أن يدرى أحدهم حتى بوجودى ... لذلك سجلت اشتراكى فى المنتدى .. لم أقم بطرح أى موضوع حتى الآن .. ولكن قمت بالمشاركة بالرأى فى بعضها .. فوجدت استقبالا حسنا من البعض (على رأسهم سى السيد) .. وواجهت اليوم هجوما من أحدهم .. واجهته بكظم الغيظ وقلت "سلاما" .. يعنى مش مجرد عدم رد ولكن هجوم من نوعية "خذ يا عدو الله" ... ومع ذلك لن أنسحب .. وفى نفس الوقت لن يجرنى أحد إلى مهاترات شخصية لايسمح بها سنى أو عقلى ... وأنت كما يبدو شاب حساس ...فلا تكن لينا فتعتصر ولا صلبا فتنكسر ... وأنا لا أرى أنك تعرضت لمحولة عصر أو محاولة كسر ... فلماذا الانسحاب ؟؟؟؟؟؟؟

[geny]

:)

انت لحقت تقعد عشان تمشى

يا راجل

طب اصبر لغاية ما تعدى ال20 مشاركة

يكونوا بيوزعوا جوايز ولا حاجه

بص هيا عموما دى سمة فى كل المنتديات انك تبقى جديد وطبيعى هتحس بالغربة واغلب مواضييعك ان ماكنتش كلها مش هتلاقى عليها ردود

بص منتدى جامعتنا مثلا

اول ما اشتركت فيه قليلا انك تلاقى رد على اى موضوع

حتى دلوقتى وبالنسبة ان الوضع بالنسبه لى فى المنتدى هناك تغير واصبحت ضمن الاعضاء الاساسيون للمنتدى

الا هناك بعض الموضوعات لا تلقى ردا

خلاصة الكلام

اصبر وثابر

فكل العباقرة بدءوا من الصفر

ومن صعد سريعا لم يلبث الا وسقط مثلما صعد

اتمنى ان تتراجع عن قرارك :wub:

[abdo]

ياعزيزي :شارك واكتب 000فرغ مافي عقلك000عبر عن رأيك 000سجل موقفك000

دون افكارك000 لاتبالي بعدد من قرأ000 ولا بعدد من شاركك في الموضوع0000قد يكون هذا شيئا محبوبا ولكنه ليس كل شيء

والا فعليك بالمنتديات الحافلة بالردود من قبيل :-شكرا لمرورك 000 عفوا 000فينك ياراجل 0000بارك الله فيك0000شرفتنا000وخلاف ذلك من الردود التي لا تقدم ولا تؤخر ولكنها تحسب كردود في احصائيات هذه المنتديات

او عليك بالموضوعات المثيرة للجدل وهي كثيرة :تفتح موضوع وتقعد تعد الردود0000وتتفرج علي المعارك الجدلية ولا مانع من ان تولعها بكلمتين كلما شعرت ان الموضوع بدأ يبرد000 00ولا اعتقد ان هذا هدف في حد ذاته

ياسيدي أكتب واكتب واكتب فالكتابة ادمان

تحياتي