الحب و الإرتباط أيهما يأتى اولا ؟؟؟؟؟؟؟؟؟؟؟؟؟؟؟؟؟

[emadiab]

شوف يا عزيزى العضو وعزيزتي العضوة .. لو عندكم اى اجابة جاهزة لسؤالى ارموها ورا ضهركم واقروا موضوعى وعيشوا فى الواقع المصرى

طبعا انا مش محتاج اقول ان سن الزواج بقى مرتفع عند الشباب ونسبة العنوسة بقت مرتفعة بين البنات فى وطننا العربى يعنى يوم ما حيتقدملك شاب مناسب يا بنتى احسنلك تقبليه وترضي بنصيبك و اهو ضل راجل ولا ضل حيط الوضع ده اكيد احسنلك من كلام الناس عليكى و كلمة عانس اللى شايفاها فى عيونهم اما لو سيادتك ناوية تتجوزى اللى بتحبيه ده لو موجود انسان عاجبك اصلا يبقى حتستنى كتير قوى ويمكن متحضريش فرحك اصلا لأنك وقتها مش حتكونى على وش الدنيا عشان تشوفيه

و انت يا حبيبى يا اللى عايز تتجوز حبيبتك .. انت ناسي انك مقشفر و مش عارف حتى تلاقى عش العصفورة و دايما بتتضرب لما تقف فى طابور العيش .. اوعى تكون مصدقها يا عبيط لما قالت انها حتستناك لحد ما تكوم نفسك .. مش قولتلك يا بنى .. ده انت طلعت نمرة .. اهى اتجوزت اول واحد لقيته مستعد انه يشيل رغم انها كانت بتحبك لآخر لحظة (فى حياتك طبعا مش حياتها).. بس شافت مصلحتها اول ما جت فى بالها كلمة عانس .. مش ناوى انت كمان تتلم يا حبيبى و تشوفلك واحدة تراعيك و انت يا حبة عينى مموت روحك فى الشغل ليل نهار عشان تأمن مستقبلك و مستقبل تعيسة الحظ اللى حتتجوزك .. بس يا ترى انت فاضي تدور على واحدة فيها المواصفات اللى انت عايزها .. دى يا عم مش موجودة غير فى اوهامك انت وبس .. لكن بص للواقع مش حتلاقى غير الموجود و انت اصلا مش فاضي تنقى عروستك .. احسنلك تكلم حد يشوفلك بنت الحلال وياريت تتساهل فى طلباتك و بلاش الاطة .. و لو مش عايز يا سيدى خد اول بنت حلال تعجبك .. حقولك ايه يعنى .. بس متقعدش بقى تقوللى احبها لأن البنت كده حتقلق و ممكن تخاف ان الموضوع يتفشكل .. لأ يا سيدى خليك دغرى وقصر فترة الخطوبة و اتجوز وقضيها بقى يوم عسل ويوم بصل و سلملى على الواد كيوبيد

انا آسف لو كان كلامى السابق شديد حبتين لكنى بتكلم على الواقع و بتساءل ايه الأفضل انه ييجى الأول الحب وبعدين الإرتباط و لا مش مشكلة ممكن نرتبط و بعدين الحب حييجى مع الأيام ومش مشكلة يكون فى سابق معرفة ولا تجاذب روحى ولا اى حاجة من دى و اهو اهم حاجة اننا كنعيش كده و مش مهم لا تبات و لا نبات المهم البنات متعنسش و نريح الشباب التعبان عشان نتعبه اكتر و اهو ادينا بنكسب ثواب وبنأدى خدمة للبشرية و بنعمر الأرض

ها يا جماعة قلتوا ايه ؟؟؟؟؟؟؟؟؟؟؟؟؟؟؟؟؟؟؟

[NoorJehan]

سن الزواج بقى مرتفع عند الشباب ونسبة العنوسة بقت مرتفعة بين البنات

المهم البنات متعنسش و نريح الشباب التعبان

ليه صفه العنوسه مقترنه بالأنثى دونا عن الذكر :ph34r:

وماذا عن الذكر الذى لم يلحق بقطار الزواج، وإن كنت أستاء من هذه المسميات لإيمانى بأن الزواج قسمه ونصيب، ولكن ألم يعنس هو الآخر:wub:

وللحديث بقيه إن شاءالله

أختك هدى شعراوى :D

[Guest النسر المصري]

اية دة اية دة اية دة

اية الهزار التقيل دة يا emadiab

هو انا ناقص

يعني بتفلها في وشي كدة عيني عينك

لية ياعم الكآبة دي ....لية يعني في اية

بص انا مش عارف اذا كنت ولد ام بنت ياemadiab

لكن هافترض انك ولد من غير تحيز

انا عمري تلاتين تمتهم في ??/? اللي فات دة

وكانت لي تجربة قديمة واتكلمت فيها زمان وردوا علي كبار المحاوريين المصريين الاستاذ سي سيد..ولافوكاتو والسيدة الرائعة سلوى ..والبنت مصرية.والاستاذ مهيب..والاستاذ عادل ...وكل الكبار هنا...والصراحة آراءهم اقنعتني جداً

ولكهم باختصار آرائهم زي NoorJehan

ٍقـــــــســــــــــــــــــمة و نـــــصيــــــــــــــب

انا كنت اول ماجري في ايدي شوية فلوس قلت اتجوز ياواد واخلص بقى من العزوبية

كان عندي ?? سنه....وماليش تجارب سابقة...ومتفوق جدا في عملي

رحت رايح بلدي ...وكتبت كتابي بسرعة كدة قوام على واحدة اتعرفت عليها في شهر واحد بس

وكان اول مرة اشوفها لما رحت اخطبها

قلت في نفسي ..واحدة قمر...متفوقة دراسيا..من عائلتي...في اولى جامعة...فرق ?سنين...صغيرة..بنت ناس...عاوز اية...يبقى مش لازم تحبها .....إديــــــلوا واتجوز...رحت كاتب كتابي على امل اني اجيبها في خلال شهررين للكويت واتجوزها هنا....لكن وهيهات ...مشاكل وعدم توافق بالمرة بين الشخصيات...واتطلقنا من غير جواز في خلال سنه...وزعلت وقلت لايمكن اتجوز الا اللي بحبها بقى

رغم اني عشت خمس سنين في فنون جميلة وفشلت في تكوين ربع علاقة

وكنت بحب مع نفسي...بدعوى ان العلاقات الجامعية في حدود زمالة بس والباقي حرام...ياعين امك ..دة انت طلعت واد خايب اوي...وراحت عليك الفرص ياعين طنط ...الا مرة كنت بعدي الشارع مع واحدة زميلتي ..مسكت ايدي عشان نعدي..عدينا الشارع اللي رايح...وشي احمر وازرق وكل الالوان...استاذنت وقلتلها معلش من غير مسك ايدين...وعدينا الشارع اللي جاي...وببص جنبي بعد كدة لقيتها فص ملح ودابت...سابيتني...وكان منظري وحش بيني وبين نفسي...والبنت قلبيتني...

:happy:

المهم ماطولش عليك

من سنه كدة بس فهمت ان لايمكن تمشي على مزاجك في الجواز...ولا ممكن تمشي على مزاج حد...بس الجواز دة قسمة ونصيب...قد تصيب وتلاقي اخيارك مصيب...وقد لا تصيب وتلاقي اختيارك عجيب... حتى لو اخترت اللي بتحبها...

ومن الآخر كدة يعني مانقعدش نقول عاني ومش عارف اية وكلام فاضي...لا احنا نحاول نلاقي اللي يبقى فيه ود بين الطرفين ...وان يكون قلبك مرتاح نفسيا...واتكل على الله...وانا لحد النهاردة بحاول بنفس الطريقة الاولانية بتاعت خطيبتي الاولى...يعني مش همانع اني اتجوز واحدة زيها...بس المهم اننا احنا الاتنين نكون مرتاحين لبعض والباقي على ربنا...نصلي استخارة مرة واتنين وعشرين..وربنا هيسهلها من عندة..ياخير ونكمل

يا شر وربنا يبعدة

وربنا مايجيب شر

وانا وانت ..والعروسة....والعريس....والمعزيم....ولولوولولولولووييييي

وااااااااااء

وكدة نكون خلفنا وحياتنا سعيدة

وربنا يوفق الجميع

والسلامو عليكو.......يجعلو عامر