عزيزى المحاوراتى ( لازم تسكت !!)

[emadiab]

لازم تسكت

اوعى اشوفك يوم بتحلم

او بتنادى بالحرية

او بتبص بعينك فوق

لعالم مليان انسانية

اخضع

اركع

ارضى بذلك

و ان رفضت صرخة فى حلقك

اخنقها

واياك تتكلم

لازم تسكت

ايه يعنى لو قهرك دهرك

او خنجر مغروس فى ضهرك

و الخنجر كان خنجر اخوك

ماهو ياما يا مسكين قتلوك

و ياما اخوانك خانوك

ليه دلوقتى بتتألم

لازم تسكت

اقتل فى قلبك حنينك

ادفن فى الوحل جبينك

و اشرب فى خوذة عدوك

نخب عرضك

اللى انتهك قدامك

و اكتب بدم اخ بعته

وثيقة استسلامك

خلينى اضحك يا شاطر

على شجبك واستهجانك

سكت وقت الكلام

جبان و وهمك خانك

حتعيش وتموت متفرج

و عمرك ما حتتعلم

لازم لازم تسكت !!

تم تعديل 19 يناير 2006 بواسطة emadiab

[se_ Elsyed]

معليش يا عماد .. إنت تقصد المحاوراتيين كمصريين بشكل عام ولا مجموعة الزملاء الموجودين ؟

[وليد صفوت]

معليش يا عماد .. إنت تقصد المحاوراتيين كمصريين بشكل عام ولا مجموعة الزملاء الموجودين ؟

<{POST_SNAPBACK}>

نفس السؤال موجه و كاتب العمل لازم يقر و يعترف ... :ninja:

[emadiab]

ياساتييييييييييير يارب هو احنا لحقنا نبدأ التحقيق ده انا حتى لسه اهلى مدوروليش على محامى شاطر يطلعنى من الورطة دى بس انا بقى حطلع عنيد و دماغى ناشفة و مش حقول اى حاجة الا بعد ما تقروا القصيدة وتقولولى رأيكم و تقروا و تعترفوا هى حلوة و لا مش حلوة

[وليد صفوت]

مش موزونة و دمها تقيل ده لو انت كاتبها للأعضاء هنا

و حلوة و لذيذة لو انت كاتبها عموماً للمواطن المصرى

مع تحيات فايولن كينج ... ناكد فنى و سمسار عكارات

[emadiab]

عزيزى فيولين كينج

انا بجد بجد مش فاهم انت قصدك ايه

ممكن تفهمنى اكتر وتوضحلى

[وليد صفوت]

عزيزى فيولين كينج

انا بجد بجد مش فاهم انت قصدك ايه

ممكن تفهمنى اكتر وتوضحلى

<{POST_SNAPBACK}>

انا كلامى مش محتاج توضيح يا صديقى .. انت اللى كلامك محتاج توضيح , ده اللى انا قلته انا و س س :wub:

و سيبك من مداخلتى اللى فاتت مدام انت مش بتقبل اى تهريج ...

[ابن بلد]

الاخ عماد

القصيده جميله وتنبىء بشاعر جميل زى قصيدته

لكن المرادفات رغم بساطتها الا انها مباشره اوى وافقدتنى كقارىء الاستمتاع ببذل ادنى مجهود فى التفكير او البحث عن وجهه نظرك او حتى استخرج وحهه نظر اخرى تلائم موضوع القصيده

مهم جدا اخى عماد فى اى عمل فنى سواء شعر او لوحه فنيه اومسرح او او او ان يتقبل او يتحمل العمل الفنى اكثر من وجهه نظر حتى يزداد جمالا فى الطرح وليتناسب مع اختلاف الثقافات......تلك اشكاليه يقع فيها الكثير وانا واحد منهم......

ارجو الاتفهم انى اريدك ان تكتب الغازا شعريه ونحتار فيما تقصده... واكيد انت فاهم انا اقصد ايه بالظبط ...... تمنياتى بالتواصل فى الكتابه لانك شاعر موهوب اوى....وتحياتى