عندما دعبست في المحاورات !!

[مصرية الهوى]

صباح القشطة ومربى الفراولة

:D

أول حاجه أنا احترت احط الموضوع فين .. في شئون المحاورات والا فين ..!!

لأني قلت شئون المحاورات .. حاسه إنه منتدى مهم :D ..

واللي كاتباه أنا .. تقدروا تقولوا كلام بيني وبين نفسي عن المحاورات :angry: ..

فقلت احطه في شئون المحاورات ورزقي على الله ..

ولو المشرفين الكرام شافوا إنه مش مكانه هنا .. يشوطوه للمكان المناسب !!

الأسبوع اللي فات .. قعدت قعدة محترمة في المحاورات .. يعني جبت القهوة والشاي والشيشة ( مش ليا :D .. للمعلم B) )

وهاتك يا دعبسة ..

فتحت .. مش هأقول كل .. مستحيل .. بس فتحت مواضيع كثيرة جداً .. وقعدت اقرأها ..

بس اكتشفت حاجات ..

اكتشفت إنه كان فيه ناس أساتذة بيكتبوا ... لهم وزن وثقل .. بس مبقوش بيكتبوا دلوقتي .. !!

يا ترى ايه السبب ؟؟!! ..

يمكن يكون مشغول .. بس مفتكرش إن الشغل هيمنع من المشاركة ولو كل فين وفين ..

وخصوصاً إن النت أصبح عند الكثير شيء رئيسي في جدول الأعمال اليومية ..!!

يا ترى يمكن زهق .. بس الزهق غالباً .. فترة وتعدي !!

أكيد كل واحد له ظروفه .. وهو أعلم بها ..

بس بصراحة النقطة دي لفتت نظري ..

بس حقيقي .. غيابهم خسارة !!

ومن اكتر اللي لفتوا نظري ... كاتب ظريف جدا اسمه حشيش :D .. بجد كتاباته وكصصه كانت ظريفة جدا ..

نقطة تانية .. كان فيه مواضيع جامدة جداً .. بس لم تأخذ حقها من الأخذ والرد ..

وفيه مواضيع .. كان نفسي أكتب فيها ....

بس أغلب المواضيع قديمة جداً .. وحسيت إني لما هأكتب فيها وأرفعها .. مشاركتي ستكون بلا لون ولا طعم ولا رائحة :ninja: .... مع انها مواضيع عامة .. لا تختص بزمان محدد ..

يعني حسيت زي .. على رأي المثل " كل شيء بوقته حلو ".. مش عارفه .. !!

مع انه ساعات بقرأ مواضيع يرفعها بعض الأخوة .. وأفرح اوي انه رفعها واشكر له هذا الرفع ..

حاجه تانية .. شفت كتير مشاركين جدد ياما .. بدأوا بدايات جيدة ..

بس دلوقتي بقى ملهمش أي اثر !!

لقيت برضه مواضيع لم تكتمل ..

كنت عايزه أرفعها عشان أشخط في اللي كاتبها B) ..

وأقوله لو سمحت كمّل ..

متسيبناش كده .. مش عارفين النهاية .. !!

بس مش عارفه ليه .. حسيت ....

إن المحاورات زمان كانت أحلى .. يمكن اتهيألي كده .. لأني قريت موضوعات حلوة كان بينها مسافات زمنية بس أنا قريتها في وقت واحد ..

فتهيألي إن المحاورات زمان كانت أحلى .. ويمكن إنه احنا دايماً بنشوف إن الماضي كان أحلى ..!!

يمكن !!

وأرجوكو .. محدش يفهمني إني بقلل من قيمة المحاورات دلوقتي .. لا والله ..

بالعكس ..!!

بس الحاجه اللي ندمت عليها فعلا إن انا ما سجلتش من زمان في المحاورات :D ..

لأني كنت بعرفها من زمان .. واتابعها بشكل متقطع ..

يلا .. مافات الا الشر ..

ســــــــلام ..

[theblackpirate2005]

الخبر صحيح المحاورات زمان كانت حاجه ودلوقتى بقت حاجه تانيه

والله يرحمه حشيش كان اخ عزيز علينا كلنا بس بقى هو اللى ركب دماغه وانتقل لصفوف المعارضه ضحكوا عليه برغيف مربى راح جرى ساب المنتدى وغير ولائه

وانا شايف انك نشيطه قوى وممكن تحلى مكان اى واحد من الناس الكبار اللى سابوا المنتدى ومشيوا

مش هطول عن كده بالتوفيق ان شاء الله ليكى ولكل الاعضاء

[مى محمد]

عزيزتى جيجى......مساء العسل يا عسل

انتى عندك حق فى كل الكلام اللى قولتيه... لكن المنتدى فى الفترة الاخيرة انضم اليه وجوه جديدة تنبأ بكل خير.... و أنتى منهم.... اسمحيلى اقولك انك دماغ عالية جدا :D

و فكرة اعادة احياء المواضيع المتميزة فكرة رائعة جدا....و أنا من مؤيديها....

اقولك على اقتراح....بعد ما اخلص امتحاناتى...كل واحدة فينا تمسك منتدى...و تعيد احياء المواضيع الحلوة اللى فيه.....ايه رأيك؟؟ :ninja: :angry:

تحياتى و لكل اعضاء المحاورات...

[الأفوكاتو]

مستقبل مصر فى يد الشباب.

شدوا حيلكم يا شابات, و يا شبان,

و ربنا يقويكم, و ترجعوا للمحاورات بريقها, الذى ربما خفت أحيانا, و لكنه لم ينطفئ حتى فى أحلك اللحظات.

تم تعديل 22 يناير 2006 بواسطة الأفوكاتو

[بنت شعنونة]

بما اني عضوة قديمة "نوعا ما" ;)

ارفعي الموضوع اللي يعجبك

و صدقيني

لو مش من اول مرة

من التانية ها تلاقي صاحب الموضوع بيرد عليكي

وكدا تبقى كسبتي ثوابين

الأول بمعرفة الناس بالموضوع

و التاني ب عودة الناس القدامى

لعل وعسى! :blink:

[Diab]

سلام عليكم

بيتهيألي يا جيجي أن موضوع الأجيال الجديدة دي من سنة الحياة والواحد لما بيكبر بيحن دايما للماضي عشان بيحس بالدفء لما يفتكر الناس الي شاركت معاه في مواضيعه و أعطت جزء من وقتها عشان خطره لذلك فهو يشعر بالأمتنان لهم و يشعر بالغربة من new members

تــــــحــــــيــــاتــــــــي لأخــــــــــوانــــــي

تم تعديل 22 يناير 2006 بواسطة Diab

[se_ Elsyed]

سلام عليكم

بيتهيألي يا جيجي أن موضوع الأجيال الجديدة دي من سنة الحياة والواحد لما بيكبر  بيحن دايما للماضي عشان بيحس بالدفء لما يفتكر الناس الي شاركت معاه في مواضيعه و أعطت جزء من وقتها عشان خطره لذلك فهو يشعر بالأمتنان لهم و يشعر بالغربة من new members

تــــــحــــــيــــاتــــــــي لأخــــــــــوانــــــي

<{POST_SNAPBACK}>

ديـــــــــــاب .. يا ديـــــــــاب ( وش محمد أبو سويلم في فيلم الأرض وهو بينده على دياب لما البقرة غرقت في الساجية )

هي دي الخُلاصة بالظبط اللي إنت قولتها ... يسلم فُمك

فمجتمع النت هو جزء من الحياة وبالتالي لازم يتطور زيها .. وإحنا بيبقى في إيدنا نخليه حلو أو بالعكس .

[mnman]

انا جيت مين بيقول فين منمان!!! :wub: :ninja:

[الأفوكاتو]

فين منمان؟

لقد وجدناك, و لكنى ما زلت أبحث عن اصدقاء طالت غيبتهم.

أين أنت يا إخناتون المنتدى؟

أين أنت يا مدام سلوى؟

أين أنت يا سقراطنا؟

أين أنت يا دكتور شوشانك؟

أين أنت يا سكوربيون؟

أين أنت با إبن مصر؟

أين أنت يا أخى أرابيسك؟

القائمة طويلة, و أحتاج مساعدة لإكمالها.

تم تعديل 23 يناير 2006 بواسطة الأفوكاتو

[عروس البحر]

مصرية الهويه انا معاكى فى موضوع احياء المواضيع القديمة

لانى عضوة جديدة وماعنديش وقت اقرا كل اللى فات

لكن انتى بقى فيكى الخير نقي لنا المواضيع الحلوة واحنا انشاءالله نشارك معاكى

عندك مثلا المخرج حسين كمال لما اعاد قصة ريا وسكينة فى مسرحية لشادية وسهير البابلى كلنا حبناها اكثر من الفيلم

وكمان اثار الحكيم لما اعادت نحن لانزرع الشوك........ كانت رائعة

بس اوعى تعملى زى جالا فهمى لما اعادت فيلم( بريتى وومن)........ كرهتنا فى الفيلم

[khedr]

المحاورات...... ..وشئون المحاورات

اصبح الموضوع نتكلم فيه بشده ..وبكثره هذه الايام

واعتقد من وجهه نظر..انه شئ جميل اننا نجلس مع انفسنا لمناقشه امورنا

وكما قال الاخوه ...هناك فعلا تغييرات تحس انها تزحف علي المحاورات واسلوبها ومواضيعها واشخاصها.

.وهذه كما قال الاخوه سنه الحياه .. .. . (التغييـــــــــــــــــــــــــــــــر)

ولكن مايهمنا هو ان لاتبتعد المحاورات عن الثوب الذي من اجله كلنا هنا والهدف منها

موضوعات كثيره....... تعرض يوميا ..

وموضوعات جميله..... لا تحتاج الي رد بل الي ردوود..

.موضوعات قديمه........ لم نستطع ان نلحقها في وقتها ولكن عندما نتذكرها نتكلم ونتحاور فيها....

كثره المشتركين..

.كثره المواضيع...

وقت المتحاورين....

اعتقد هي السبب في التأخير قليلا في الردوود....

عموما المحاورات بنا ولنا ومنا

دعبست(كلمه مصريه صميمه...منين عرفتيها...اعترفي.............؟)

أكاد اشك في نفسي ...لاني أكاد اشك فيكي

[Folana]

فين منمان؟

لقد وجدناك, و لكنى ما زلت أبحث عن اصدقاء طالت غيبتهم.

أين أنت يا إخناتون المنتدى؟

أين أنت يا مدام سلوى؟

أين أنت يا سقراطنا؟

أين أنت يا دكتور شوشانك؟

أين أنت يا سكوربيون؟

أين أنت با إبن مصر؟

أين أنت يا أخى أرابيسك؟

القائمة طويلة, و أحتاج مساعدة لإكمالها.

<{POST_SNAPBACK}>

السلام عليكم ورحمة الله .....

استاذنا الفاضل الافوكاتو .....

والله كانك تقرا افكارى ..انا كمان كنت عايزة اسأل عن كل المجموعة دى ...بالاضافة للزميل الفاضل مهندس بحيرى ..كنت باحب اقرا مواضيعه جدا .....

اظن اننا الحمد لله اطمئنينا على شاوشانك ..انا بالاحظ اسمه موجود مع الاعضاء ..لكن مش باقرأ له اى مداخلات ...لعل المانع خير ...واتمنى انى اجد مداخلات جميع الزملاء والزميلة العزيزة سلوى واستمتع بكل كلمة مكتوبة منهم .....

ولكم التحية ..........