انا بقيت مدمن حوارات المصريين

[Eng_Willo]

من تقريبا سنة وانا قاعد فى امان الله بادور على حاجة فى جوجل لقيت قدامى لينك لمحاورات المصريين.....ايه اللى جابه قدامى,معرفش مع ان معظم الحاجات اللى بعمل search عليها كلها هندسية.

فى الحقيقة انا افتكرته منتدى زى اى منتدى تانى تافه و الناس اللى فيه دماغها فاضية, المهم قولت لنفسى يا واد اجمد و ماتخافش و توكل على الله.

توكلت على الله و دخلت برجلى اليمين و انا مستحلف لأى حد هايف اشوفه قدامى,

فوجئت بحاجة مكنتش متخيل انى هالاقيها على الانترنت فى يوم من الايام.

منتدى محاوراتى مصرى محترم و كل الناس اللى موجودة فيه ناس على قدر كبير جداً من العلم و الذكاء و اللباقة يتناقشون في هدوء ...... يبحثون المشكلة من جميع وجهات النظر و يحاولون التوصل لحل لها.مش بتاع خناقات زى منتديات تانية بمجرد ما واحد يقول فى مشكلة فى بلد كذا تلاقى الناس كلها بتشتم و خلاص.

منتدى عاقل لا يدع للخلافات الجانبية مجال فالخلاف فى وجهات النظر لا يفسد للود قضية.

منتدى و هو ليس بالمنتدى فهو عبارة عن اسرة كبيرة تتحاور فى الظروف المحيطة بالمصريين بالداخل و الخارج, مشاكل الشباب .......الخ

المهم فضلت تقريباً 4 شهور عبارة عن متفرج صامت ادخل كل يوم اقرأ الموضوعات المطروحة فى ابواب المناقشات الجادة زى التعليم, السياسة الداخلية.........., اضحك فى ابواب الابتسام....من الاخر لقيته موقع اسرى كامل به كل ما يتعلق بشؤن الاسرة المصرية.

المهم قولت لنفسى يللا بقى يا واد ايه اللى منعك تسجل فى المحاورات لحد دلوقتى, توكلت على الله برضه و بدأت اكتب بياناتى فى صفحة التسجيل لكن تقريباً كان فيه مشكلة فى تسجيل الاعضاء ففضلت وراه لحد ما اخيراً بقيت عضو محاوراتى محترم.

دلوقتى انا مش عارف اقولكوا انا بقيت عامل ازاى..انا ادمنت المحاورات بجد,بقيت افتح موقع المحاورات قبل ما اقرا الميل . و اصلا انا بكره الكتابة بالعربى على الكيبورد عشان بطىء اوى فيها و دة بحكم تعاملى الطويل مع الانترنت بالانجليزى لكن بالرغم من كدة بقيت بشارك بالعربى مهما كلفنى من تعب.

انا دلوقتى بقيت مدمن محاورات بس دة بجد احلى ادمان.

ياريت بقى يا جماعة تقولولى هو انا المدمن الوحيد اللى هنا وللا فيه حد تانى؟؟؟

(مع الاعتذار للفظة ادمان بس اعتقد انها هنا كلمة حميدة)

منتظر الردود

[abofasad]

ياريت بقى يا جماعة تقولولى هو انا المدمن الوحيد اللى هنا وللا فيه حد تانى؟؟؟

ومين سمعك

[fayrouz]

انا عضوة جديدة هنا ..........بس عندي خبرة متواضعة في موضوع المنتديات دة

وبردو عرفت الموقع هنا لما كنت بعمل search :ph34r: :wub:

لكن موضوع الادمان دة لسة شوية

لما اخد شوية ع الموقع :D ;)

[صفاء]

شكلى هاخد الدكتوراة فى محاورات المصريين :ph34r:

ذنبى فى رقبتى وفى المنتدى

انا بقى كنت بقرأ رباعيات صلاح جاهين ولقيت رابط المنتدى

دخلت ومش عارفه ومش عاوزة اخرج :wub:

[وليد صفوت]

انا كنت بشارك يوم إمتحانى :ph34r:

يعنى بيبقى عندى إمتحان كمان ساعتين فى الجامعة و ادخل أشارك :wub: :D

عاوزين عقاقير مهدئة للإدمان ده يا جماعة ;)

[Eng_Willo]

و مين سمعك يا violinking انا كنت ساعات بروح من الكلية جرى على البيت عشان افتح الموقع.

و ياريت تبقى تقوللى لو لقيت اى دواء مهدىء للادمان دة. :happy:

[se_ Elsyed]

نصيحة لكل شاب ولكل فتاة ..

إوعوا تمشوا في سكة شم الكوله ومضخ الأفيون . والبلاوي دي

فمُحدثكم كان شاباً يافع البُنيان .. عريض المنكبين .. وكان شعري أصفراً ووشي أبيضاً ... إلى أن مشيت في هذه السكة البطالة

ولم أستمع لنصائح بابا وماما وتيته ..

وكانت النهاية إني بقيت كده

لكن بالإرادة والعزيمة بقيت كده

أي نعم هاتلاقي عيني مبرقه شويه وخلقتي لسه مشلفطة .. لكن أنا ماشي في العلاج بإنتظام وبقيت أشم في شرابات إخواتي بس .

-------

كلنا كنا كده يا ويلول .. لكن بكره تكبر وتتخرج وتبقى مُشرف وتحس سعتها إنك بتجني ثمار إدمانك ... ( إيه رأيك في البؤين دول ؟ )

[Eng_Willo]

كلنا كنا كده يا ويلول .. لكن بكره تكبر وتتخرج وتبقى مُشرف وتحس سعتها إنك بتجني ثمار إدمانك ... ( إيه رأيك في البؤين دول ؟ )

<{POST_SNAPBACK}>

جامدين موت :happy:

[khedr]

ادمان

..مين هنا بيتكلم

ياواد....يا ميدو

هات لي شمه محاورات

اتس...اتس...اتس

تم تعديل 21 يناير 2006 بواسطة medeokhedr

[Folana]

السلام عليكم ورحمة الله ....

الزميل الفاضل ويلو...(صح كده الاسم ).....انا عايزة انصحك لله ..واحكى لك حكاية واحد صاحبنا اسمه ابو صلاح ...بس ده ادمن شرب الكولونيا ...وصورته دى اخر صورة الاخ س.س... عارضها علينا ...

سى السيد ..انت لقطت الصورة دى لابو صلاح امتى ؟؟؟ هو لسه برضه؟؟؟....ربنا معاه ...الا بالمناسبة مافيش اخبار عنه ؟...ماكانتش وصفة كولونيا دى اللى جابته ارض ارض ....

وللزميل ويللو ...احب اقول انى اصلا مش من هواة قاعدة الكرسى امام شاشة الكمبيوتر ...لكن دخلت احد المنتديات وكنت ضيفة خفيفة جدا يعنى كل فين وفين لما ادخل ..ماعجبنيش خالص ..لان تلاقى مثلا واحدة بتقول انا باحط سكر على الشاى ..وخلاص ...تفضل بقى تقرأ فى تلات اربع صفحات ..شكر وتبجيل ..واحدة تقولها تسلم ايدك ياحلوة ..ترد صاحبةالموضوع ..انت اللى احلى ..تقوم ترد عليها التانية تقولها ..لا انت اللى احلى وحلة ..واحلى قصدى ...ونفضل على كده ..لحد ماتنسى ايه كان الموضوع اصلا ..وتفاجأ فى الاخر باللى بيقول .انا باقول تسلم ايدك انت وانت اللى احلى ..على الطلاق ياشيخة انت اللى احلى ...

عرفت المنتدى هنا عن طريق انسانة باحبها فى الله وهى اوشا ..ولاقيتنى على استعداد اقضى نص النهار اكتب واقرأ.....ناس جميلة ومتفاهمة ..كل عضو له فكر مميز وباتعلم منهم كلهم كل يوم حاجة ....

فاهدأ بالا ...كلنا فى حب المنتدى عباسية .....(وش عبد الوارث عسر فى فيلم شباب امرأة)

مرحبا بك بيننا .........

[fayrouz]

للدرجادي ؟؟؟ :happy:

[nemr111]

مصر الكلمة و المعنى ,, خيلك حريص و لا تقول امتى و اشمعنى

لا تبص لجمال و لاتحسد علاء و تقول ما كنش القصد و المعنى

خليك طاير فى السما و اطلع لسقف الكون و اصرخ و سمعنى

صوت دعوتك للى خلقنا و اركع له بالقلب و الكلمة و المعني

و اوعى تكون فاكر حضرتك ، ان فرعون قاعد فاضي و بيسمعنى

لأه ، اصل جنابه قاعد يفكر ازاى يعمل طابور يجمعك و يجمعنى

و عاوز يقول لينا يابنى انت انا عليا الاوامر و انت عليك تطيعنى

[Eng_Willo]

السلام عليكم ورحمة الله ....

الزميل الفاضل ويلو...(صح كده الاسم ).....انا عايزة انصحك لله ..واحكى لك حكاية واحد صاحبنا اسمه ابو صلاح ...بس ده ادمن شرب الكولونيا ...وصورته دى اخر صورة الاخ س.س... عارضها علينا ...

سى السيد ..انت لقطت الصورة دى لابو صلاح امتى ؟؟؟ هو لسه برضه؟؟؟....ربنا معاه ...الا بالمناسبة مافيش اخبار عنه ؟...ماكانتش وصفة كولونيا دى اللى جابته ارض ارض ....

وللزميل ويللو ...احب اقول انى اصلا مش من هواة قاعدة الكرسى امام شاشة الكمبيوتر ...لكن دخلت احد المنتديات وكنت ضيفة خفيفة جدا يعنى كل فين وفين لما ادخل ..ماعجبنيش خالص ..لان تلاقى مثلا واحدة بتقول انا باحط سكر على الشاى ..وخلاص ...تفضل بقى تقرأ فى تلات اربع صفحات ..شكر وتبجيل ..واحدة تقولها تسلم ايدك ياحلوة ..ترد صاحبةالموضوع ..انت اللى احلى ..تقوم ترد عليها التانية تقولها ..لا انت اللى احلى وحلة ..واحلى قصدى ...ونفضل على كده ..لحد ماتنسى ايه كان الموضوع اصلا ..وتفاجأ فى الاخر باللى بيقول .انا باقول تسلم ايدك انت وانت اللى احلى ..على الطلاق ياشيخة انت اللى احلى ...

عرفت المنتدى هنا عن طريق انسانة باحبها فى الله وهى اوشا ..ولاقيتنى على استعداد اقضى نص النهار اكتب واقرأ.....ناس جميلة ومتفاهمة ..كل عضو له فكر مميز وباتعلم منهم كلهم كل يوم حاجة ....

فاهدأ بالا ...كلنا فى حب المنتدى عباسية .....(وش عبد الوارث عسر فى فيلم شباب امرأة)

مرحبا بك بيننا .........

<{POST_SNAPBACK}>

الفاضلة فلانة:

مع حضرتك حق ف ان الناس هنا كلها جميلة و متفاهمة و فعلاً انا اتعلمت و لسة بتعلم منهم الكثير و الكثير.

انا كنت قولت انى قعدت فترة عبارة عن متفرج فقط بس حضرتك ماتتصوريش فى الفترة دى انا حسيت باٍيه...بجد انا حسيت انى اعرفكوا كلكوا من زمان,,و فى كل مشاركة بكتبها ببقى حريص جداً فى اللى بكتبه عشان محدش يزعل أو يقول دة واخد عليا أوى كدة ليه من الاول مع انى قريت معظم الموضوعات و المشاركات من الاعضاء...بجد انا سعيد جداً انى انضميت للأسرة الهايلة دى و يارب اقدر اكون عضو فعال فيها.

و فعلاً انا حاسس ان حضرتك معاكى حق فى تسمية المنتدى بالعباسية لأنه ملىء بالاشخاص العقلاء في زمن الجنون و التفاهة و الهيافة حيث اصبح المجنون عاقل و العاقل مجنون.

[se_ Elsyed]

مصر الكلمة و المعنى ,, خيلك حريص و لا تقول امتى و اشمعنى

لا تبص لجمال و لاتحسد علاء و تقول ما كنش القصد و المعنى

خليك طاير فى السما و اطلع لسقف الكون و اصرخ و سمعنى

صوت دعوتك للى خلقنا  و اركع له بالقلب و الكلمة و المعني

و اوعى تكون فاكر حضرتك ، ان فرعون قاعد فاضي و بيسمعنى

لأه ، اصل جنابه قاعد يفكر  ازاى يعمل طابور يجمعك و يجمعنى

و عاوز يقول لينا  يابنى انت انا عليا الاوامر و انت عليك تطيعنى

<{POST_SNAPBACK}>

طب مش أحسن تنقل الكلام ده في باب الشعر

[se_ Elsyed]

سى السيد ..انت لقطت الصورة دى لابو صلاح امتى ؟؟؟ هو لسه برضه؟؟؟....ربنا معاه ...الا بالمناسبة مافيش اخبار عنه ؟...ماكانتش وصفة كولونيا دى اللى جابته ارض ارض ....

<{POST_SNAPBACK}>

إسكتي بقى يا فُلانه ما تفكرنيش ..

إحنا فقدنا شاب من خيرة الشباب بسبب الكولونيا واللي بيتكلينو ..

عامة تلاقي أبو صلاح مزنوق في الإمتحانات دلوقت وهاييجي زي الفريرة .

[Advisor]

.....

..

..احب اقول انى اصلا مش من هواة قاعدة الكرسى امام شاشة الكمبيوتر ...لكن دخلت احد المنتديات وكنت ضيفة خفيفة جدا يعنى كل فين وفين لما ادخل ..ماعجبنيش خالص ..لان تلاقى مثلا واحدة بتقول انا باحط سكر على الشاى ..وخلاص ...تفضل بقى تقرأ فى تلات اربع صفحات ..شكر وتبجيل ..واحدة تقولها تسلم ايدك ياحلوة ..ترد صاحبةالموضوع ..انت اللى احلى ..تقوم ترد عليها التانية تقولها ..لا انت اللى احلى وحلة ..واحلى قصدى ...ونفضل على كده ..لحد ماتنسى ايه كان الموضوع اصلا ..وتفاجأ فى الاخر باللى بيقول .انا باقول تسلم ايدك انت وانت اللى احلى ..على الطلاق ياشيخة انت اللى احلى ...

<{POST_SNAPBACK}>

ما ذكرته الفاضلة نموذج للفرق بين regulated sites و ال non-regulated sites و أذكر فى بدايات الإنترنت لم يكن هناك من ال regulated sites إلا compuserve و كان غالى جدا - و مازال - حيث تجدين كلاما معقولا و مهذبا و فيه حوار جاد فى كل الموضوعات عامة.

ما سبق كان إستهلالا لابد منه

أرحب بكم جميعا

و قد أوحى لى هذا الموضوع بفكرة موضوع تأخرنا فيه كثيرا و ألا هو موضوع للترحيب بالأعضاء الجدد و التعريف بمحاورات المصريين و تاريخ محاورات المصريين و رسالة محاورات المصريين

و قبل كل هذا تقديم أعضاء أو قل من يستطيع من أعضاء محاورات المصريين و أيضا تقديم لقواعد الحوار هنا.

أدعو جميع الأعضاء القدامى أن يستعدوا للقاء 460 عضو جديد تم تسجيل عضويتهم خلال شهرى ديسمبر و يناير حتى اليوم 21 يناير 2006 ( هناك 70 عضو لم يقوموا بتفعيل عضويتهم بعد)

تم تعديل عدد الأعضاء الجدد

تم تعديل 22 يناير 2006 بواسطة عادل أبوزيد

[مصرية الهوى]

أنا بقى اللي عرفني على المحاورات تيته فلانة ..

كنت دايما بجي الاقيها قاعده على الكمبيوتر .... أقولها تيته أنتي بتعملي ايه :wub: ؟؟ ..

تقوم شاخطة فيا وتقولي امشي من قدامي ملكيش دعوى :D ..!!

بس تيته زي العسل ربنا يشهد انا باحبها قد ايه :wub: ..

ايوى ياباشمهندس ..

شكلك دعيتلي زي ما اتفقنا .. لأن الحمد لله امتحاناتي كانت كويسة

الحمد لله النهارده خلصت امتحانات وخلصت التيرم المتعب ده ..

عارف انا عملت ايه ايام الامتحانات ؟؟

لأن الارادة عندي زيرو :sad: ..

قمت قفلت على الكمبيوتر في الدولاب واديت ماما المفتاح .. قلتلها حتى لو تشوفيني هأمووووت .. متدنيش المفتاح ..

بقيت وانا ماشية بقول انترنت .. محاورات .. انترنت .. محاورات

كل حاجه قدامي بقيت بأشوفها على شكل كيبورد والا ماوس ..

mfb:

يلا الحمد لله إن شاء الله بكرى نكبر ونعقل ونبطل إدمان

:lol:

[عادل أبوزيد]

أرحب بكم جميعا

و قد أوحى لى هذا الموضوع  بفكرة موضوع تأخرنا فيه كثيرا   و ألا هو  موضوع للترحيب بالأعضاء الجدد و التعريف بمحاورات المصريين  و تاريخ محاورات المصريين  و رسالة محاورات المصريين

و قبل كل هذا تقديم أعضاء أو قل من يستطيع من أعضاء محاورات المصريين   و أيضا تقديم لقواعد الحوار هنا.

أدعو جميع الأعضاء القدامى   أن يستعدوا للقاء  460 عضو جديد تم تسجيل عضويتهم خلال شهرى ديسمبر و يناير حتى اليوم 21 يناير 2006  ( هناك 70 عضو لم يقوموا بتفعيل عضويتهم بعد)

رجاء المرور على حفل إستقبال الأعضاء الجدد

حيث نرحب بالأعضاء الجدد و الذين وصل عددهم اليوم إلى 464 خلال شهرى ديسمبر و يناير و نرحب بمقترحاتكم و مشاركاتكم فى هذا الإحتفال .

[Eng_Willo]

عارف انا عملت ايه ايام الامتحانات ؟؟

لأن الارادة عندي زيرو  :wub: ..

قمت قفلت على الكمبيوتر في الدولاب واديت ماما المفتاح .. قلتلها حتى لو تشوفيني هأمووووت .. متدنيش المفتاح ..

بقيت وانا ماشية بقول انترنت .. محاورات .. انترنت .. محاورات

كل حاجه قدامي بقيت بأشوفها على شكل كيبورد والا ماوس ..

mfb:

يلا الحمد لله إن شاء الله بكرى نكبر ونعقل ونبطل إدمان

:lol:

<{POST_SNAPBACK}>

انتى كدة ارادتك زيرو؟؟!!!!!

طب انا اعمل ايه اللى مقدرتش اقفل الكمبيوتر او ابعد عن المحاورات حتى :wub:

دة انا كنت بارجع من الامتحان على المحاورات عدل :sad: عشان انسى الطلاسم اللى شوفتها فى الامتحان يعنى ادمان برضه... :D

اما موضوع نبطل الادمان فمعتقدش ان ليه حل غير ان الواحد مننا يشتغل 24 ساعة فى اليوم......دا انا فى مرة كنت مسافر انا و صحابى و طبقت يومين برة البيت و لما رجعت حاولت انام و مقدرتش تفتكروا ليه؟؟؟

عشان كنت عايز اشوف ايه الجديد انهاردة فى المحاورات و فعلاً منمتش غير بعد ما قريت كل اللى انا عايزه. :D

بقيت وانا ماشية بقول انترنت .. محاورات .. انترنت .. محاورات

كل حاجه قدامي بقيت بأشوفها على شكل كيبورد والا ماوس ..

انا كل ما تخيل شكلك كدة افطس من الضحك,,,دة انتى حالتك مزمنة بجد.بس ما تقلقيش انا فى طريقى انى اونسك فى مستشفى الامراض العقلية.