البطالة ووقف الحال

[ابو احمدين]

البطــــــــــــــــــــــــالة

ابن الوزير لو واد غبي

ياخد له حتة ْ خصخصة

اتنين تلاتة اربعة

تنزل عليه زى المطر

طب ليه بقى

كتر الكلام والهلفطة

عن المذيع ابن المذيعة اللامعة

ممثلين ومخرجين ومطربة

لمّا ولادهم يورثوا

ويركبوا ويهـيصوا

ومش مهم الموهبة

واسمع وشوف ابن اللوا

يصبح ملازم للهوى

مادام نوى

كل الرتب متظبطة

والمستشار . .

ابنه الجميل

هــيكون وكيل

وفى النيابة ملعـبه

اماالعميد ..

ابنه الوحيد

لو كان بليد

هــيكون معـيد

طول ما الكشوف متسددة

وزارات كتير متقفلة

هيئات كبيرة متلتلة

حبل الوظايف ينفــتل

على الحفيد وع الولد

أجيال تسلم بعضها

والكيل طفح ولا اندلق

أما الوظايف الهفأ دى للحـمير

هـتعيش غفير

والطين تشيل من غير غلق

فوق السرير

كــتروا الـولاد

وفى الليمون كان العدد

دى شغلتك يا ابن البلد

(حسنين) فى (مالطا) ما اتسمع

(ومحمدين) أهو قعـد

ع البحر يوعـظ فى السمك

والدنيا فيها ده ودا

واحد مكوش ع الفرص

عايم فى بحـر الخصخصة

والتاني محسود ع النفس

من همه فى العجز اندفس

يعنى البهايم والبقر

رصيف حياتهم يفرشوا

جنب الهوامش عششوا

جوّه الزرايب والحفـر

وان فكروا يوم يطلعـوا

ويبرطعـوا

لابد حتما ينزلوا وينزووا ويرجعـوا

تاني الخرايب والنقـر

كوسة بترعى فى الوطن

والقرع هو اللى انتصر

تفضل حياتنا ملخبطة

والقِدرة فوق منها الغـطا

يرسى العـطا ع اللى عـطا

أما العـصا فلمن عـصا

واللى عـلى الفقر اعـترض

[هشام الجنيدى]

رائع جدا جدا ..........

اسلوبك فكرنى بالرائع احمد فؤاد نجم ابو النجوم واتمنى ان تزيدنا من موهبتك الرائعه ولا تبخل علينا ابدا

;) وشكرا :blink:

[إبن طيبة]

أخي الكريم أبو أحمدين

عندما يكون القلم ناقدا بإسلوب ساخر تصل الفكرة والمضمون إلي المتلقي .. فما بالك وقد زادته موهبتك جمالا ... رائع دائما أخي الكريم في طرحك ولك إسلوب تنفرد به .. سلمت يداك وسلمت .

تقديري واحترامي

[khedr]

وابن الغفير طول عمره في الطين

يعيش وياكل ويفضل من العدمانين

لا عمره اشتكي ولا قال غير حاضرين

وتسلم كتاباتك وتعيش لنا ايديك الحلوين

وابن طيبه وهشام هما اللي من بينا رادين

علي حبيبهم وزميلهم واخوهم ابو احمدين

[shahd]

هيييييييييييييييييييييه دينااااااااااا يعني لازم تقلبوا علينا المواجع :wub:

اسلوب جميل سلمت اناملك ;)

تم تعديل 25 يناير 2006 بواسطة شهد

[fayrouz]

:wub: ;)

تسلم ايديك علي الي كتبتة ابو احمدين

دة اية المواهب دي كلها ؟؟؟

بجد قصيدة جامدة جدا ;)