رحلات الموت

[Grandma]

ارتفع عدد ضحايا مركب الهجرة الغير شرعية التي غرقت على بعد 12 كيلو من ساحل رشيد الى حوالي 160 قتيل من أصل 600 مفقودين ... في الغالب انهم جثث في قاع البحر ... رحمهم الله وصبر أهلهم ...  المأساة أصبحت تتكررولا شىء يوقفها وكأن الموت غرقا هو مطلب هؤلاء الضحايا المساكين و أهاليهم .

سألت نفسي  لماذا يجازف هؤلاء المهاجرين بحياتهم ؟!! ولماذا يلقي أهاليهم بهم الى التهلكة او في أحسن الظروف في رحلة عذاب غير مأمونة العواقب وغير معروف مصيرها ؟

بالتأكيد هي الحاجة و العوز و الفقر الشديد    

 (الفقر و المرض من وراءكم و البحر من أمامكم أين المفر )
هالني ما قرأته في هذا الـ  Post على الـ Facebook : 

( بمناسبة الحادثة المفجعة بتاعت امبارح < واللي مش اول مرة تحصل >  وهي غرق مركب مهاجرين غير شرعيين علي الحدود واللي كان جزء كبير من ركابه أطفال وناس كتير مندهشة من الموضوع وناس كتير بتظيط وكأن ده وليد النهاردة !! ... خلوني أحكيلكم تجربتي في الشغل علي الموضوع ده ولو مهتم وحابب تفهم ايه اللي بيحصل ومن امته كمل البوست للاخر ...
مابين 2012 ل 2014 تطوعت وبعدين إشتغلت في مشروع بلدنا أولى بولادنا - للحد من الهجرة غير الشرعية وده كان متعلق بالهجرة غير الشرعية للأطفال وده كان بالتعاون بين Save the Children - Egypt CO هيئة انقاذ الطفولة، برنامج مصر , YAPD Alexandria Branch وبدعم مالي من الإتحاد الأوروبي .. في بداية الشغل كنت مستغرب جدا من المصطلح وإزاي فيه أطفال تحت ال 18 سنة بيسافروا في رحلة الموت اللي بتفضل أيام في البحر وممكن يوصل وممكن يموت في الطريق لحد ما ابتدينا شغل وابتديت أنزل قري ريفية في أكتر من مكان ومن ضمنهم المحافظة اللي انا تابع ليها وأشوف قري بالكامل ولادهم مسافرين هجرة غير شرعية وبدأت أفهم الموضوع :
هم في البداية مكنوش بيسفروا الأطفال وكان اللي بيسافر الشباب الكبار في السن ويفضلوا هربانين هناك يشتغلوا في اي شغلانة ويبعتوا لاهلهم فلوس او يحالفهم الحظ ويتجوزوا وياخدوا اقامة .. مع الوقت بدأ الموضوع يضيق جدا وبدأت الدول الأوروبية تشدد الإجرائات بشكل كبير .. فبدأت تظهر حاجة جديدة ( وده من أكتر من 10 سنين ) وهو إن اللي يسافر الأطفال ... 
- طب ليه الأهالي بيسفروا الأطفال ؟؟؟ .. علشان دول الإتحاد الأوروبي مجبرة علي إستقبال الأطفال وعدم ترحيلهم لأنهم بيعتبروهم أطفال معرضين للخطر في بلدانهم مادام في السن ده وصلوا لمرحلة إنهم يسافروا بالبحر وبياخدوهم بعد التأكد من سنهم يحطوهم في دور رعاية بيتعلموا فيها اللغة والسلوك والشغلانات اللي يقدروا يشتغلوها ويكون ليهم سوق عمل فيها وبيكون ليهم مصروف يومي وأجازة أسبوعية يقدروا يخرجوا ويتفسحوا فيها وشوت أطفال منهم كتير في فيديوهات اعدتها save the children كنا بنستعين بيها في الشغل .. وشوفت أطفال منهم لما كنت مسافر روما في وقت الاجازة بتاعهم .
- الأهالي عرفوا المعلومة دي إزاي ؟؟ ... عن طريق الشباب اللي مسافرين من نفس القري لاوروبا من فترات طويلة أو عن طريق السماسرة والوسطا في العملية وفضلت تنتشر لحد ما بقت ملعومة عامة بين اهالي الارياف او المناطق المشهور فيها الهجرة . 
- عملية السفر بتتم إزاي ؟؟ .. بداية لازم نكون عارفين كويس إن عملية السفر مش رخيصة وبتكلف الطفل الواحد من 25 ل 50 ألف جنيه وفي البداية كان بيتم دفعهم كلهم بس بعد انتشار عمليات النصب علي الأهالي بقي بيتم الاتفاق علي دفع الفلوس بعد وصول الطفل لاوروبا ووالده بيمضي علي ايصالات امانة لحين الدفع ... الاتفاق بيكون بين الاهالي وبين وسيط اللي غالبا بيكون من نفس القرية اللي فيها الاطفال وف بعض الحالات اثناء شغلنا اكتشفت ان الوسيط ده ممكن يكون مدير المدرسة أو مدرس أو عمدة البلد وبيجمع مجموعة منهم ويوصلهم للسمسار اللي بيكون المنظم للرحلة وبيجمع من قري كتير علي مستوي الجمهورية مجموعات .. وبعد مايكون عنده مجموعة كبيرة تستاهل ( مابين 100 ل 300 واحد ) بيتم تجمييعهم كلهم في مكان قريب من البحر بيسموه ( التخزين أو المخزن ) ... السمسار في الوقت ده بيكون رتب أموره مع صاحب المركب اللي هتستناهم في عرض البحر ومع حرس الحدود ووقت ما بتحين اللحظة اللي تم الترتيب ليهم بياخدوا المجموعات دي ينزلوهم البحر بعد ماياخدوا منهم متعلقاتهم الشخصية كلها ( ولو المسافة بعيدة بين المخزن وبين البحر بيركبوهم عربيات نقل ويغطوهم من فوق ) .. بعد كده بيركبوا زوارق بلاستيك ويفضلوا ماشيين بيها لحد نص البحر علشان الردار ميلقطهمش .. في عرض البحر بيكون فيه مركب صيد من اللي مسموحلها بالتحرك في المياه الدولية بتاخدهم يخبوهم علي المركب في تلاجات السمك وفي الوقت ده بيكون صاحب المركب بلغ عن سرقة المركب علشان لو اتمسكوا او المركب غرقت ميتمش اتهامه في قيادة مركب مهاجرين غير شرعيين او اتهامه في قضية المساعدة والاتجار في تهريب الاطفال بشكل غير شرعي ... المركب لما بتقرب من المياه الاقليمية الاوروبية وغالبا بتكون الشواطي الايطالية بيكون قدامه اكتر من اختيار : 1- لو المركب هتقدر ترجع مصر بينزلهم علي الزوارق المطاطية تاني ويوجههم ناحية الشواطئ ويديهم مسدس اشارة لو المركب بدأ يغرق بيضربوها فخفر السواحل بيتحركوا ينتشلوهم .. 2- لو المركب مش هتقدر ترجع مصر يا اما بيفضل ماشي بيهم لحد ما يوصل للشواطئ ويكسر الشط بالمركب يا اما بيضرب اشارة استغاثة وبيتم انتشالهم كلهم عن طريق هيئات الاغاثة او خفر السواحل ) .. وبعد وصولهم بيتم استقبالهم واللي له حق اللجوء الانساني زي السوريين مثلا بيتم فصلهم لوحدهم وبتستلمهم المفوضة السامية لشئون اللاجئين مع المنظمات العاملة في المجال ده .. والي ملهوش حق اللجوء بيتم تصنيفهم بين اطفال وكبار سن وشباب وده بعد كشف العضم اللي بيحدد اعمار كل واحد فيهم لان اي مصري هناك بيوصل لو حتي عنده 50 سنة بيقولهم انه طفل ( الاطفال المؤسسات الاغاثية بتستلمهم وبيتم تجهيز ملفات ليهم .. وغير الاطفال بيتم حبسهم في مقرات احتجاز مخصصة ليهم لحين ترحيلهم لبلدانهم ) . 
- الرحلة بتكون عامله ازاي ؟؟؟ وقت الرحلة بيكون تقريبا حوالي اسبوع .. طول المدة دي بيكون لكل شخص فيهم حتة عيش وازازة مية بتتشارك فيها كل مجموعة مع بعضها .. مبيكونش فيه اغطية ليهم اطلاقا حتي لو في عز البرد لدرجة ان بعض الاطفال كان بيحكي ان كل تلاتة اربعة بيكونوا حاضنين بعض علشان يقدروا يتدفوا .. بيتم معاملتهم اقذر معاملة من المسئولين عن المركب واي حد بيعترض علي التعليمات بيتعرض للضرب والتهديد برميه في عرض المياه .. لو فيه حد مات اثناء الرحلة بيترمي في المياه بدون اي تفكير . 
- الاطفال بيحصلهم ايه بعد ما بيدخلوا دور ومؤسسات الاصلاح ؟؟ .. فيه جزء منهم بيلتزموا بالتعليمات والبرنامج اللي محطوطلهم وبيقدروا ياخدوا اقامة قصيرة بعد سنة ولا اتنين .. لكن الجزء الكبير منهم بيهربو من المؤسسات دي بسبب ان اهلهم بيكونوا سالفين الفلوس او راهنين الارض او البيت علشان يسفروهم وبيكون قدامهم خيار من اتنين : اما انهم يشتغلوا شغل شرعي وده هيكون في اعمال خلفية زي تحميل العربيات او تنظيف المحلات او العمل في مطابخ المطاعم وجزء كبير منهم بيتم اضطهادهم في المقابل عن العمل اللي بيادوه وبيتم تهديدهم من صاحب العمل انهم لو موافقوش هيبلغ عنهم فمبيقدروش يحققوا بردوا المبالغ والارباح المالية اللي هم كانوا متخيلنها من السفر .. وهنا ييتحول للاعمال الغير مشروعة زي الدعارة والمخدرات ونقل الممنوعات ودي بتحقق مكاسب عالية جدا بالنسبة له واللي ممكن ييجيبه في شهر من الشغل العادي بيجيبه في طلعة واحدة 
- ايه اللي ممكن يحصل للمهاجرين غير الشرعيين غير انهم يوصلوا للشواطي الاوروبية ؟؟ .. في حالات كتير بيغرقوا في عرض البحر نتيجة لان مراكب الصيد دي غير مؤهلة لحمل اعداد كبيرة من البشر ومعظمها بيكون خرج من الخدمة اصلا .. وفي حالات تانية الاشخاص دول بيوصولوا لشواطئ ليبيا اللي فيها نزاع ويقولولهم ان دي ايطاليا فيقوم المهاجرين ينطوا ويكملوا عوم علشان يوصولوا للشواطي فيتم اطلاق النار عليهم او يتاخدوا اسري ... وف بعض الحالات بيتم تسليمهم من السماسرة لعصابات الاتجار بالاعضاء وده حصل في حالات كتير وبيتم ابتزاز اسرهم لتحويل مبالغ مالية او يتم بيع ولادهم اعضاء .
- مننساش بردو اننا نتكلم عن ان فيه جزء من المهاجرين غير الشرعيين بيتعرضوا للاختفاء القسري علي ايد قوات الامن المصرية وده حصل كتير مع سوريين وسودانيين وفلسطنيين ومصريين . 
- طب ليه الأهالي بيسفروا ولادهم بالمبالغ الكبيرة دي بالرغم من الخطورة الكبيرة ؟؟؟ ... غالبا معظم اللي بيسافروا بيكونوا من مناطق ريفية مستوي الوعي والتعليم فيها ضعيف جدا وغالبا بيكون جزء كبير من الاطفال بيشتغل حرفة يدوية ( نجار او حداد او سباك ) فبيكون مستقبل التعليم هنا بالنسبة له ملهوش لزمة والشغل هيبقي علي قد اكله ومصاريفه .. اضافة لان المناطق الريفية دي معظم اللي بيكونوا فيها من نوعية اللي كلهم عارفين بعض فبيشوف ابن فلان سافر وبعد سنة بقي عندهم ارض وعربية فبنظرة المصري العبقري بيقول هو احسن من ابني في ايه ؟ ده ابني ازكي منه وهيجيب فلوس كتير .. حط علي ده ان سوق العمل هنا بقي صعب جدا وتحصيل فلوس بقي شبه مستحيل لو انت ابن اسرة فقيرة او حتي متوسطة الدخل .. نحط بردوا علي الاسباب هو انعدام الامل في حياة كريمة هنا فبيكون الامل هناك ولو محصلش اهو الموت هيبقي اهون من الذل اللي هنا ( وده كان تعبير من احد المهاجرين الناجين ) .غير كده بقي عندنا حاليا بلدان وقري كل بيت فيها مسافر منه شخص او شخصين .
- أشهر المناطق اللي بيسافر منها أطفال هجرة غير شرعية : 1- محافظة الغربية : ( قرية كفر كلا الباب وقرية الكرما وقرية ميت يزيد والقرشية بمركز السنطة ... قرية شبرا ملس بزفتي ... قرية ميت بدر حلاوة بسمنود ) 2 - محافظة البحيرة ( مركز رشيد .. ايتاي البارود .. دمنهور ) 3 محافظة أسيوط : ( قرية ابنوب ) ..4 - محافظة الفيوم . وطبعا فيه أماكن تانية كتير بيكون فيها هجرة غير شرعية بس الأماكن دي اللي فيها الهجرة غير الشرعية ظاهرة 
- بردو مننساش الكمية الكبيرة من اللاجئين السوريين واللاجئين من دول جنوب ووسط افريقيا والفلسطنيين اللي كانوا موجودين في مصر وسافروا بردو عن طريق البحر سواء من مصر او ليبيا واللي مات منهم أشخاص كتير .
- ايه اللي بيحصل لو المهاجرين تم القبض عليهم قبل سفرهم ؟؟؟ .. بيتم احتجازهم بشكل غير ادمي وجزء كبير منهم بيتعرض للضرب والاهانة وبيفضلوا علي الوضع ده كذا يوم ... لو عددهم صغير بيتم ترحيلهم لمحل الاقامة ولو عددهم كبير بيتم الافراج عنهم من محل القبض عليهم .
- ايه اللي بيحصل للسمسار او سواق المركب لو تم القبض عليهم في مصر؟؟؟ .. في معظم الاحيان بيكون المهاجرين مهددين انهم ميقلوش مين السمسار حتي لو اتقبض عليه معاهم علشان يعامل كانه واحد منهم ويخرج .. ولو حتي اعترفوا عليه بيكون هو له علاقات واسعة والموضوع بيتقفل مقابل شوية فلوس وخلاص .. طب لو اتعلمه قضية ؟؟؟ اخر حاجة كانت اقرتها الحكومة في الموضوع ده هو قانون مكافحة الهجرة غير الششرعية وده اقصي عقوبة فيه هي السجن المشدد اوالغرامة من 200 ل500 الف !!! 
- ليه السمسار او اصحاب المراكب بيغامروا بنفسهم في موضوع زي ده ؟؟؟ ... عمليات الصيد وتجارة الاسماك ضعيفة جدا خلال السنوات اللي فاتت وحتي لو مزدهرة جدا فمستحيل تحقق الربح اللي بتحققه عمليه تهريب المهاجرين ... يعني خلينا ناخد حادثة امبارح كمثال .. علي حسب التقديرات عدد المسافرين 600 مهاجر وعلي اضعف التقديرات كل واحد فيهم هيدفع 25 الف جنيه .. يعني مجموع اللي هيحصله صاحب المركب والسمسار والوسطا من رحلة واحدة زي دي 15 مليون جنيه ... تخيل ان ده اصعب تقدير .. طب تخيل يقدر يعمل كام رحلة في السنة !!!! 
- ليه مفيش حد بيقدر يوصل للسماسرة ولا للي مشغلين الموضوع علي مستوي الجمهورية بالرغم من سهولة ده ؟؟؟ .. لان معظم اللي شغالين في عمليات تهريب المهاجرين او تهريب البضائع حتي بيكونوا رؤس تقيله جدا ( لوائات - اعضاء مجلس شعب - رجال اعمال ) وعمليات التهريب بتحقق مكاسب مهولة يقدر ان السمسار يشتري بيها اي حد واي حاجة في دولة محققة معدلات دولية في الفساد في الاجهزة الامنية ..
- هل فيه منظمات مجتمع مدني اشتغلت علي القضية : أيوه فيه منظمات مجتمع مدني كتير اشتغلت علي القضية وكان منها منظمات دولية زي save the children , iom . UNHCR ومنظمات محلية زي جمعية الشباب للسكان والتنمية .. وفيه دعم كبير جه من الاتحاد الاوروبي لمصر لمنظمات مجتمع مدني للشغل علي القضية من ناحية التوعية وانشاء مشاريع وعمل مبادرات شبابية وتطوير للمناطق اللي فيها الهجرة ظاهرة 
- ايه اللي الحكومة عملته علشان تحارب الظاهرة ... الحقيقة مفيش اي تقدم عملته الحكومة في القضية غير بيانات وشعارات علي شوية مؤتمرات تنما خطط حقيقية او تشريعات قوية او تشديدات امنية علي الحدود مفيش . حتي افترك لما كنا شغالين علي المشروع ان كل حركة لينا كنا بنتعب علي ما نعملها بسبب التضييقات اللي الحكومة عملتها من بعد الثورة علي المنظمات غير الحكومية وخاصة اللي بتشتغل علي التمويل الاجنبي .. وكان تم تقديم اكتر من مشروع قانون للحكومة وللبرلمان لمناقشته لكن اتحط جنب اخواته علي الرف واخر حاجة شوفناها في الموضوع ده من الحكومة هو تصريحات المهندس ابراهيم محلب ولقائه مع الجانب الايطالي واللي مطلعش منها اي انتاج .
- ايه اللي المفروض تعمله الحكومة او منظمات المجتمع المدني علشان تحد من الظاهرة دي ؟؟ القضية دي تحديدا وجود حلول ليها صعب جدا جدا وده عن تجربة من الشغل 3 سنين في برنامج متعلق بييها ... لكن مش مستحيل .. كل اللي هو محتاجة هو تكثيف الجهود وتنظيمها بين المجتمع المدني اللي ممكن يشتغل علي الوعي في الاماكن الطاردة لمهاجرين غير شرعيين وعمل مشاريع تنموية دايمة فيها خاصة للاطفال اللي تحت سن ال18 سنة واللي خطر الهجرة بيلاحقهم .. وبردو تقدر تشتغل علي مراكزالتعليم والمدارس وتطويرها وتنمية العملية التعليمية لان ليها دور واثر كبير في منع الظاهرة دي وخاصة التعليم الفني ( صناعي وتجاري ) .. وبردو المجتمع المدني يقدر يشتغل علي التدريبات المكثفة المتعلقة بتطوير الموارد واستخدامها وازاي الاسرة تستخدم ال 25 الف جنبه كاقل تقدير لتكلفة تذكرة الموت في انها تعمل مشروع او استثمار صغير لابنهم جنب تعليمه او ازاي يتجمعوا كقرية مصدرة للمهاجرين ويجمعوا الفلوس ويعملوا بيها مشروعات تساهمية ( فيه حاجات تانية كتير تقدر يشتغل عليها المجتمع المدني ) 
- طب ايه اللي الحكومة والبرلمان ممكن يعملوه ؟؟؟ من واقع التجربة اقدر اقول ان الحكومة والبرلمان شركاء في الجريمة دي سواء كأشخاص تابعين ليها بيسهلوا عمليات الهجرة او بيشتغلوا فيها ومفيش اي رقابة عليهم .. او من ناحية عدم وجود تشريعات قوية متعلقة بالقضية وتفصيلاتها وتطورها كل يوم .. او عن طريق تعطيل منظمات المجتمع المدني عن اداء دورها تجاه القضية . او عن طريق الفشل الاقتصادي الذريع اللي جاب احباط للمواطنين وخلاهم وصلوا للمرحلة دي .. او عن طريق قفل المجال العام مقابل كل الاراء او الاتجاهات الجديدة او المغايرة لتوجه النظام واللي صنع حالة من اليأس أو عدم وجود أمل في التغيير أو التحسين ولو حتي علي المدي المتوسط ....
أنا رأيي إن الحكومة لو مش هتعمل أي حاجة تجاه القضية دي فعلي الأقل تسيب النشطاء والمنظمات الدولية والمحلية والباحثين يقوموا بدورهم تجاه الموضوع .. وتوقعي ان ده مش هيحصل لإن المنتفعين من ورا الموضوع ده كتير وسلطاتهم ونفوذهم كبير جدا واصل للشرطة والجيش والبرلمان والحكومة . 
ملحوظة { كل المعاومات الموجودة في البوست عن تجربة مباشرة مع القضية ومن مصادر مباشرة وناجين { 
رحم الله أبنائنا وأهلنا .. وحفظ الله الباقيين )

 

 

[suma]

  تحياتي.

الموضوع قديم جديد في نفس الوقت الجديدفيه أنني عرفت قصة المهاجر و السمسار ولم الدوله لا تجد معهم صرفة .

لكن هل فعلا الحياة في مصر مستحيلة ؟ وهل هؤلاء الشباب بذلوا من الجهد ما بذله السوري الآتي الينا بلا عمل؟؟ طيب هل لاحظتم تلك المرة انهم لأول مرة يصحبوا معهم الزوجة والأطفال لم كل تلك المجازفة؟؟ حتى لو كان احتمال الهلاك موجود؟؟؟ آلاف الأسئلة امامنا والتي بلا اجابة أيضا.

أماعن حكاية أمن الدولة والاختفاء القسري تلك لم ادلو فيها بدلوي لكن اعترف انها بعيدة عن عقلي.

  الجديد في الموضوع هو تناوله على الفيس هناك من سحب تأييده للريس وزاد انه شبه تلك الفجيعة بكارثة العبارة المشئوم ..تصوروا!!ومذيع يحتد على وزيرة الهجرة لانها لم تزورهم في المشافي!!! كل يريد ثوب البطولة ..وعجبي

        انها مأساة فعلا لكن المواجهة كيف لا ادري ؟ ولم ولن اتعاطف معهم لكن حزينة عليهم فعلا ..رحم الله من مات وكان في عون الباقي.

 

                    سومه

[أبو محمد]

21 دقائق مضت, suma said:

هل فعلا الحياة في مصر مستحيلة ؟

الفاضلة SUMA
أرجو قراءة ما وضعته الفاضلة Grandma مرة أخرى
هذه يا سيدتى ليست "هجرة" غير شرعية
إنها "تجارة" فى البشر
كيف تكون الحياة مستحيلة والهارب أو المهّرَّب من الأرياف يستطيع تدبير 25 - 50 ألف جنيه
هذا المبلغ يستطيع من دبره أن يبدأ به مشروع بجاموستين أو تلات جاموسات عُشْر
ويبدأ "يشتغل"

[suma]

والله انا فهمت ما تقصده الفاضلة جدا لكن اطلاقي عليها بهجرة غير شرعية فهو ترديدا لما يقوله ويردده اعلامنا المبجل وعليه انا تجدني ربطت بينهم وبين السوريين وبيننا زمان .....تحياتي لك

 

     سومه

[أبو محمد]

بعد التقدم بواجب العزاء والدعاء بالرحمة والمغفرة لضحايا "تجارة البشر"
هذه نظرة أخرى للموضوع .. ربما لن تروق للبعض
ولكنها - على الأقل - مبنية على أساس من متابعة الأخبار
أعتقد أن الحركه السريعه في ليبيا حولت الخطر من كونه غرب الحدود المصريه
الي كونه خطر علي جنوب أوروبا
وذلك عن طريق تحكم مصر و ليبيا في طرق التهريب لما يسمى "الهجرة غير الشرعية"
كلمة السيسي أمام الأمم المتحدة وإشارته إلى أن مصر بها خمسه مليون مهاجر
يفهمها الأوروبيون على أنهم يمكن أن يكونوا في مركز "تعبوى مؤقت" في مصر
استعدادا للانطلاق الي أوروبا
الان مفتاح صِمَام الهجرة في ملعب مصر ...و سنري قريبا رد الفعل الأوروبي لامتلاك هذا المفتاح

نقرأ اليوم عن اجتماع "أوروربى" طُرحت فيه مثل هذه الأفكار :

اقتباس

إنشاء "مدينة ضخمة خاصة باللاجئين" على الساحل الليبي

 

اقتباس

وقال أوربان إن حوالي 5.5 ملايين شخص ينتظرون في مصر دورهم للانتقال إلى أوروبا، مشيرا إلى أن غياب مثل ذلك الاتفاق "قد يأتي بمفاجأة كبيرة من هناك"

اقتباس

ولفت أوربان إلى أن كلا من "ليبيا ومصر ستكونان لاعبين مهمين في أوروبا في سنوات قريبة".

فلننتظر لنرى .. ربما أكون مخطئا
ويكون الداعون إلى فكرة تقزيم مصر والتهوين من مفاتيح قوتها هم المحقون

[Grandma]

* يجب الاخذ في الاعتبار ان  نسبة السوريين و الافارقة المهاجرين من مصر أكبر من نسبة المصريين وان تجار الموت أغلبهم سوريين يتعاملون مع مهربين مصريين 

* الاتحاد الاوروبي في عام 2015 طالب التعامل مع مراكب الهجرة الغير شرعية بقصف هذه المراكب و الحكومة الليبية رفضت ( لاحظوا انسانية اوروبا ) 

https://arabic.rt.com/news/783358-ليبيا-أوروبا-الهجرة-المتوسط/

* أعتقد ان الحل سيكون كما تفضل الفاضل ابو محمد بانشاء مدينة على الساحل الليبي او في أي مكان آخر يتفق عليه الاتحاد الاوروبي بعد أن نفذ صبره من هذه الهجرات . 

* مصر يجب ان تعاقب تجار الموت باسرع وقت حتى تمنع هذه الكوارث التي تحدث في مياهها الاقليمية تحت نظر و سمع خفر السواحل 

* سواء تعاطفنا او لم نتعاطف مع هؤلاء  المهاجرين المساكين يجب أن نبحث عن حلول لهذه المشكلة .. اهمها التوعية بمخاطر الهجرة بهذه الطريقة الغير  آمنة ، و التركيز على التعليم و ايجاد فرص عمل ومشاريع صغيرة في المناطق  التي تكثر فيها الهجرة 

أشكر الفاضلة سومة و الفاضل أبو محمد لمشاركتهما القيمة 

 

 

[Scorpion]

من موضوع : عن الهجرة أتكلم

 

 

اقتباس

 

اعزائي .. ياسو .. بنت مصرية .. سقراط... اشكركم للتعقيب الذي علقتوا به علي مداخلتي هذه .. و لكن الجانب الشخصي هنا ( وضع المغتربين منا لدي عودتهم و نظرة المعارف لهم ) ... هو جزء صغير من موضوع اكبر بكثير ... الحزن في عدم استطاعة مساعدتهم للسفر و النظرة السلبية التي تلي هذا الموقف .. ليست هي المأساة التي اريد ان نناقشها بهذا الموضوع... قد تكون مدام سلوي مست الأمر بنظرة شاملة .. و هو ما ابحث عنه ... بل الوضع في اسبانيا اكاد اجزم انه اسوأ بكثير من صقلية .. و ان كانت اسبانيا تجذب بصورة مكثفة اهل المغرب العربي بوجه عام .. فأوروبا لا تبعد عن الشاطئ المغربي إلا بـ14 كم والشاطئ الإسباني يمكن رؤيته صحوا من الشاطئ المغربي الممتد من طنجة إلى سبتة ... فتخيل عندما يكون حلمك في الجهة الأخري و تراه رؤية العين يوميآ....

اعتقد ان دور المغتربين منا يجب ان يكمن في تصحيح هذا الحلم الخاطيء... يجب ان نقنع الحالمين بالهجرة .. انه مثلما فعلنا و رحلنا جميعآ بصورة قانونية و شرعية( علي الأقل اتمني ان يكون هذا الذي حدث ) فيجب ان يكون هذا هو الطريق الوحيد و السليم للمحاولة ... يجب ان لا ننساق الي اسلوب "الفشخرة الكدابة" عند عودتنا ... فالذي سيخسر قبل الجميع هو نحن شخصيآ... و تأثير هذه "الفشخرة" قد يضيف عميل جديد لقوارب الموت التي تحمل بضاعتها من بشر .. او جثة اخري في اعماق البحر ... قد يكون نقاشنا هذا له بعض المعني في عقولنا .. نحن ( المثقفين )... قد يغير قليلآ من تفكير البعض.. و لكن المأساة تكمن في الآخرين .. هؤلاء القاطنين في الأعماق .. حيث تعشش الأمية و الخرافات في العقول ... كيف نستطيع ان نقنعهم بان لا ينجرفوا الي هذا الطريق ... كيف نستطيع ان نقنعهم بانهم لن يجدوا المن و العسل و الفتيات الشقراوات في انتظارهم بشوق اذا نجحوا و استطاعوا ان يهاجروا "تفليتة" ...

كيف .. بالله عليكم كيف و من اين يأتي الشاب منهم بالمبلغ الذي يدفعه و الذي يتراوح ما بين 3000 / 5000 دولار... الا يكفي هذا المبلغ اذا اشترك اكثر من شاب من رفقاء هذه الرحلات التعسة ... في القيام بمشروع بسيط ... محل اطعمة ... عصير قصب ... ورشة صغيرة ... اي مشروع و ما اكثرهم ...

وهكذا أصبحت الهجرة مشروعا مكلفا واستثمارا يقتضي تعبئة مصادر للتمويل من أجل تحقيقه من ديون ومن بيع للأرض والممتلكات... إلخ... هذا ما يفسر كيفية إقبال المهاجر غير الشرعي على أي عمل ( هذا اذا ما استطاع الأفلات من قبضة البحر ثم البوليس فيما بعد ) مهما كان مذلا وصعبا لأنه في كل الحالات لا يقبل أن يرجع خاوي الوفاض....

الحل ... الحل يكمن في الجانبين ... البلد المصدر الذي يجب ان يقوم بأهم ادواره و هو تحقيق فرص العمل لشبابه .. تلك القوي المعطلة ... و البلد المستقبل .. فأوربا ليست هي الضحية الدائمة .. فهناك من يرغب في استثمار تلك الأيدي العاملة التي تهبط عليه من السماء بدون اي تكليف .. فيستغلها اسوأ استغلال .. رواتب شبه معدومة ... بلا تأمينات او ضمانات ... شبه عبيد بدون اي حقوق ... فعيونهم "مكسورة"... و العقاب الجنائي لرب العمل في حالة اكتشافه بسيط ...

و لكن مثلما لخص العالم الفرنسي ألفريد صوفي إشكالية الهجرة بقوله "إما أن ترحل الثروات حيث يوجد البشر وإما أن يرحل البشر حيث توجد الثروات"

فاذا صرخت اوربا و ولولت من جيش المهاجرين الغير شرعيين الذي يغزوا اراضيها .. فاولي الحلول و ابسطها ان تستثمر قليل من مواردها في القيام بمشروعات في الجانب الآخر من البحر المتوسط .. هناك في تلك الأرض التي تصدر لهم تلك الجيوش...

 

 

[Grandma]

6 ساعات مضت, Scorpion said:

من موضوع : عن الهجرة أتكلم

 

 

 

ياااااه موضوع  الهجرة الغير شرعية مثار من سنة 2005 و لسه كأنه طازة بنار الفرن ..وبرضو مافيش  أي حلول على المستوى الدولي 

المداخلة السابقة دي بالذات قيمة جدا ... شكرا للفاضل السكوربيون على انتقاءها 

و دي أغنية جميلة  ومؤثرة بتلخص اللي نفسنا نقوله للشباب اللي بيفكر في الهجرة 

 

[أبو محمد]

حداشر سنة يا مؤمنين بنتكلم "هنا" فى المحاورات
وإذا بنا بعد حداشر سنة فى موعدنا مع القدر لنبدأ من المربع رقم (1)
لو سبت لنفسى العنان للتعليق على بعض الفيديوهات التى شاهدتها بحثا عن أبعاد رحلة رشيد إلى الموت
الجماعة المشرفين هيلغوا عضويتى على طول .. عشان كده انا رايح اتكتم واعمل فنجان قهوة بن تقيل

[White heart]

9 ساعات مضت, Grandma said:

* الاتحاد الاوروبي في عام 2015 طالب التعامل مع مراكب الهجرة الغير شرعية بقصف هذه المراكب و الحكومة الليبية رفضت ( لاحظوا انسانية اوروبا ) 

https://arabic.rt.com/news/783358-ليبيا-أوروبا-الهجرة-المتوسط/

بسيطة .... نلاحظها وماله ... تعالي كدة نشوف الأوروبيين قالوا وعملوا ايه بالظبط يومها ومن محضر الجلسة من على موقعهم الرسمي .. انظري الى تلك الفقرة تحديداً:

اقتباس

As Europeans on 23 April we decided to step up our efforts to tackle the humanitarian tragedy in the Mediterranean.

This includes also efforts to disrupt trafficking and smuggling networks.

The European Council decided to strengthen immediately the European Union presence at sea, enforcing the existing operations Triton and Poseidon. Their capacities are being strengthened by trebling the financial resources available to them and the sending of additional maritime assets.

European leaders, on that occasion, also asked me to propose actions to disrupt the business model of human trafficking networks across the Mediterranean. Let me quote the statement of the European Council on 23 April, asking "… The High Representative to undertake systematic efforts to identify, capture and destroy vessels before they are used by traffickers in accordance with international law ".

وهو ما أعادوا التأكيد عليه بعدها في أكثر من جلسة وقمة ... كما يتبين لنا وأيضاً من محضر تلك الجلسة وبالصوت والصورة كمان من على موقعهم الرسمي ... أنظري معي الى تلك الفقرة رجاء:

اقتباس

we are fighting those who trade on human life, the smugglers’ and traffickers’ networks. We are doing this together with transit countries, in partnership, and we are doing this in the Mediterranean. Our naval operation in the Mediterranean has now fulfilled the objectives of its first phase: we gathered intelligence and information on the smugglers' routes, assets and strategies. Even through this first phase, and in just five weeks, we would have been able to go after the smugglers' routes, assets and strategies. and in just five weeks, we would have been able to go after the smugglers in 16 cases, bring them to justice and capture their vessels.. That’s why I proposed to Member States, in Luxembourg last weekend, to move to phase two, in the high seas, in full respect of international law.. And I asked Member States to contribute with their assets to the mission. This is an opportunity for us to show that when we have sense of unity and urgency, we can manage to use our military tools, which we already have

But there is something I am proud of:

in these very first weeks of common action in the Mediterranean, we have saved 1,500 lives of men and woemen at sea through our operation.

ها ... ازى حضرتك؟ يا ترى لاحظتي معانا بنفسك "انسانية اوروبا" ... والا لسة محتاجة مصادر أكتر؟
نصيحة صغيرة لكِ (ولبعض الزملاء معنا) ان تقبليها او ترفضيها ومع كامل الإحترام ... قبل التورط بأى تعليق أو تكوين فكر أو رأى ما قائم على أى خبر او معلومة من مثل هذا النوع، حاولي أولاً ان تخصصي من الوقت والصبر والجهد ما يلزم للتأكد من صحتها من مصدرها الأم والأصلي -طالما انها متوفرة- وليس نقلاً عن الموقع العلاني أو غيره ... وأنا من خلال متابعتي اليوم لما قمتِ بترجمته مشكورة لبعض مشاركات العزيز RSHUSSEIN .. وموضوعه:  يوميات مغترب في انجلترا ... لاحظت انكِ باسم الله ما شاء الله متمكنة من اللغة الإنجليزية ... تماماً مثلما أعتقد انكِ لم تقصدي هنا بذلك أى شر ... ولكن الا تتفقي معي بأن دورنا هنا جميعاً في هذا الصالون الثقافي أن نجتهد لنكون على قدر المسئولية والجدية والأمانة في نقل المعلومات والأخبار من مثل هذا النوع، ومن أن هناك البعض سواء من داخل صالوننا او من خارجه ممن سيقومون بدروهم بالنقل عنا هنا وهناك ... لينقل بعدها عنهم آخرين .. الخ ... ؟

[وائل علوان]

في ٢٤‏/٩‏/٢٠١٦ at 03:03, أبو محمد said:

هذا المبلغ يستطيع من دبره أن يبدأ به مشروع بجاموستين أو تلات جاموسات عُشْر
ويبدأ "يشتغل"

بردو الجاموستين العشر 
انا مش عارف ايه حكاية الجاموس العشر معاك يا عزيزي المحترم / ابو محمد 

حضرتك كده هاتخليني افكر في الموضوع واستلفلي 30.000 جنيه واشتريلي جاموستين عشر واتغني بقى واتريش وابني العمارة 

تم تعديل 25 سبتمبر 2016 بواسطة وائل علوان

[أبو محمد]

منذ ساعة, وائل علوان said:

بردو الجاموستين العشر 
انا مش عارف ايه حكاية الجاموس العشر معاك يا عزيزي المحترم / ابو محمد 

حضرتك كده هاتخليني افكر في الموضوع واستلفلي 30.000 جنيه واشتريلي جاموستين عشر واتغني بقى واتريش وابني العمارة 

أصلك مش واخد بالك يا أستاذ وائل .. ولك العذر فى التساؤل لحداثة التحاقك بـ "محاورات المصريين"
موضوع الجاموسة العشر (يعنى الحامل) ده موضوع قديم "من ضمن الأعمال الخيرية"
فتحه الأستاذ عادل ابو زيد فى 2004  بعنوان
جاموسة عُشْر للأسرة الفقيرة
وتروح الأيام وتيجى الأيام .. واحنا قاعدين كده نتحاور زى اليومين دول
برضه فى موضوع المراكب اللى بتغرق بالحالمين
وفى عام 2007 وتحت عنوان حلقة فى مسلسل الهجرة العبيطة غير الشرعية
(وده موضوع غير اللى اقتبس منه الفاضل سكوربيون بتاع 2005)
كتبت مداخلة فيما يلى اقتباس منها
كانت أيامها الجاموسة بـ 7000 جنيه .. دلوقت بحوالى 13 - 14 ألف
لو عايز تدخل فى مشروع زى ده أنصحك لا تدخل فيه إلا إذا كان لك سابق خبرة فيه
والسبب الذى جعلنى أذكر موضوع تربية البهايم ده هو أن أغلب الضحايا المصريين من قرى مصرية
وكانت القرية المصرية زماااااااااااان هى مركز إنتاج يغذى سائر أرجاء المحروسة
إتفضل حضرتك إقرا المداخلة على مهلك يمكن تغريك بقراءة الموضوع نفسه وهو ليس طويلا
هتلاحظ بقى حاجة غريبة
إن كل شئ تمنه ارتفع وتضاعف إلا "ثمن الموت"
شوفت ازاى ؟ .. "تجار البشر" لا يقلون عن "تجار المخدرات" .. فى "الشرف والأمانة"

اقتباس

 

كلام سى السيد صحيح ... وكلام زوهيرى صحيح ...

ثم ماذا ؟

لاحظت أن هؤلاء الشباب من محافظات الأرياف .. المحافظات التى كانت فى الماضى (الذى عشت جزءا منه) مراكز لإنتاج غذاء مصر الذى كان يغنيها عن سؤال اللئيم .. كان ذلك قبل أن يعلمنا الملوك غير المتوجين أن عبارة "مصر بلد زراعى" هى دعاية استعمارية الغرض منها استمرار الإقطاع واستغلال بلدنا لإنتاج القطن الذى يحوله الاستعمار إلى أقمشة وملابس يبيعها لنا .. وقبل أن نتعلم أن نكتب فى مواضيع التعبير أن مصر بلد صناعى رغم أنف الاستعمار وأعوانه من الإقطاعيين والرجعيين .. حتى بات ابن الفلاح يخجل من نشأته ، ويحتقر دوره فى حياة مجتمعه .. وينسى أنه صاحب جميل فى أعناق أبناء الوطن .. وعندما كبر ابن الفلاح ربى أبناءه على أنهم يجب أن يتحولوا إلى أفندية ، موظفين قيمة وسيما ....

دار كل ذلك فى رأسى وأنا أقرأ الموضوع .. وفجأة تذكرت موضوعا قديما للفاضل / عادل ابو زيد فى باب التكافل الاجتماعى "جاموسة عشر للأسرة الفقيرة" .. يقترح فيه التبرع بجاموسة عشر "حامل" فهى من الممكن أن تحول أسرة معدمة إلى أسرة منتجة ذات دخل يكفيها مؤونة السؤال .. وتذكرت ذلك المثل الصينى الحكيم الذى ينصح بألا تعطى السائل سمكة ليأكلها بل علمه صيد السمك ...

"جاموسة عشر للأسرة الفقيرة"

كان الموضوع فى عام 2004 عندما كان ثمن الجاموسة العشر 3000 جنيه وكان الدخل الشهرى المتوقع من بيع لبنها هو 300 جنيه غير انتاجها لعجل كل عام ... وأضيف : غير إنتاجها من السماد الطبيعى ...

الآن ثمن الجاموسة العشر هو 7000 جنيه .. وثمن اللبن تضاعف

بحسبة بسيطة .. إذا كان الشاب الذى قرر الانتحار بالهجرة غير الشرعية قد استطاع تدبير مبلغ 70 ألف جنيه لينتحر به .. ألم يفكر فى أن هذا المبلغ يستطيع به شراء 10 جاموسات عشر ؟ وإذا كان الدخل الشهرى المتوقع فى 2004 من بيع اللبن هو 300 جنيه من كل جاموسة فهو الآن لا يقل عن 500 جنيه من كل جاموسة أى 5000 من العشرة .. بخلاف عشر عجول كل عام أو عام ونصف وإذا باع العجل عقب ولادته بشهرين تلاتة لن يقل ثمنه عن 1500 جنيه يعنى 15 ألف جنيه فى العام يعنى على أقل تقدير ألف جنيه فى الشهر .. ومن الممكن زيادة عدد الجواميس المنتجة بإدخال الإناث المولودة فى دورة الإنتاج ..

وبعد عدة سنوات يمكن البدء فى تصنيع اللبن ................

إذن .. قبل أن نلعن الظروف التى دفعتهم إلى الانتحار بالهجرة غير الشرعية .. دعونا نلعن العجول (قصدى العقول) التى فكرت فى طرح قيمة العمل جانبا وزرعت مكانها قيمة الفرار بحثا عن منجم الذهب سهل المنال على الجانب الآخر من البحر الأبيض حيث المتعة وشرب العسل وأكل العنب فى جنة إيطاليا أو اليونان ..

فلنحاول التبشير (أعرف أنها كلمة سيئة السمعة) بقيمة العمل والكسب الحلال والأكل من عرق الجبين خيرا من عسل وعنب الجنة التى على الجانب الآخر من البحر

 

 

[أبو محمد]

اعتراف:
إبراهيم الجارحى

 

نشرت من كام يوم بوست عن صديق ليا اعرفه شخصيا عمل مشروع لزراعة الفراولة فوق سطوح بيته، وقولت انه بيكسب من الشغلانة دي كويس، وطبعا كمية التريقة اللي حصلت على الموضوع كانت تاريخية يا فندم، علشان انا مفروض ابقى سلبي ولازم اقعد اولول مع السرب اللي بيقول ان مصر مفيهاش ولا فرصة عمل بديلة عن الغرق في البحر، وان مفيش مشروع بيتكلف تلاتين الف ويكسب ابدا، وان التوكتوك هو الحل الوحيد..
الحقيقة ان الصديق اللي اتكلمت عنه ده هو انا .. وكل اللي يعرفوني شخصيا يعرفوا اني مهتم بالموضوع ده وبشتغل فيه من سنين.. ايوة انا بتكلم عن نفسي..
النهاردة انا هنشر تفاصيل المشروع بالكامل وبالصور واللينكات مش علشان اثبت كلامي.. علشان انا جالي اكتر من ميت رسالة بتطلب مني تفاصيل المشروع لأن فيه ناس عرفت ان ده ممكن يتنفذ.

الموضوع: دلوقتي فيه اتجاه جديد في الزراعة اسمه الزراعة البديلة، وده اتجاه هدفه تقليل المساحة المزروعة وبالتالي مصروفات الري والخدمة في مقابل تحسين طرق الزراعة بحيث المساحات الصغيرة بالزراعة البديلة تنتج أكتر من المساحات الكبيرة بالزراعة التقليدية.. بدل ما تزرع مساحة اربعة متر مربعة علشان تجيب ميت كيلو بطاطس ممكن تزرعهم في برميل بطريقة الردم المتتابع وتجيب نفس الكمية من مساحة اقل من متر مربع وبأقل من عشرة في المية من كمية المياه والمجهود المطلوب.. بدل ما تزرع 40 شتلة فراولة في سبعة متر مربع على الأرض، ممكن تزرعهم في ماسورة بي في سي مخرمة واقفة بشكل رأسي وهتاخد مساحة اقل من متر مربع، يعني ممكن تزرع في بلكونة صغيرة حوالي 400 شتلة، يعني ما يقابل زراعة أكتر من قيراط أرض.. وبنفس الطرق المبتكرة دي ممكن تزرع طماطم وتنتج منها بكميات رهيبة من مساحة صغيرة زي ما انا عامل قدام بيتي في مساحة تلاتة متر مربع (الصورة مرفقة وهي من محصول الطماطم بتاعي السنة دي)
على حسب المساحة اللي عندك وعلى حسب طبيعة المكان ونسبة الاضاءة ممكن تحدد انت محتاج تكاليف اد ايه، وعلى حسب مواعيد الزراعة ممكن تحدد المحصول اللي هتزرعه (احنا دخلنا في سيزون البطاطس مثلا دلوقتي وتقاويها هتبقى جاهزة اول اسبوع من اكتوبر)
لما تحدد المحصول هتحدد الأدوات، وهقولك على سبيل المثال انا شخصيا عملت ايه علشان اعمل زرعة الطماطم اللي في الصور دي:
انا جبت خمسين إصيص مقاس 34 مربعين، ودول تمن الواحد فيهم تلاتين جنيه وشكلهم حلو وينفع ديكور وزينة، ورصيتهم جنب بعض ومليتهم تربة صناعية (خليط بنسبة واحد لواحد من الكومبوست والبيتموس ممكن تشتريهم من اي مشتل قريب من بيتك ودول كلفوني 300 جنيه، والعبوات والتربة حاجة بتعيش معاك سنين وممكن تزرع فيهم عشرات المرات ما دمت محافظ عليهم، يعني بنية اساسية هتفضل مش هتقتصر في حسابها على محصول واحد)، وزرعت في كل إصيص شتلتين طماطم يعني المجموع مئة شتلة تمنهم خمسين جنيه ومتوفرين برضه في المشاتل وفي منافذ وزارة الزراعة في الدقي الشتلة بخمسين قرش، وجبت كمان بخمسين جنيه سماد بلدي وسوبر فوسفات وبوتاسيوم علشان التسميد.
لما كبر الزرع شوية شديته على سلك من بتاع الأسوار كلفني 45 جنيه للكمية كلها، وخمسين جنيه للقوائم الخشب.
انا بروي الزرعة دي مرتين في الاسبوع وحجم العمل اللي اشتغلته بنفسي فيها حوالي عشر ساعات عمل وهو عمل ممتع جدا بالمناسبة.
شجرة الطماطم ممكن تطول لحد خمسة متر، يعني ممكن ترفعها على سلك بارتفاع دورين بالطريقة دي، وده معناه ان الشجرة الواحدة ممكن تجيب حوالي 25 كيلو طماطم وده حصل معايا في موسمين متتاليين.. احسبها على مهلك لحد ما اجهزلك البوست بتاع الزراعة الرأسية للفراولة اللي بتكسب أكتر من الطماطم عشر مرات حتى لو بعتها في سوق الجملة الكيلو بخمسة جنيه، وهنشر كمان تجربتي مع زراعة البطاطس بأكتر من طريقة مبتكرة وهنشر الصور بمراحل العمل كلها كمان علشان يبقى كله بالتجربة العملية
واللي محتاج تفاصيل اكتر يقولي وانا ارشده لمصادر مفيدة أو اضمه لجروب كبيرة من هواة النوع ده من الزراعة وهم بالآلاف بالمناسبة وكلهم شغالين زي الفل وبياكلوا وبيبيعوا وبيكسبوا ومحدش منهم بيروح يغرق في البحر علشان يهاجر

[أبو محمد]

دى صفحة ابراهيم الجارحى للى عنده حساب على الفيس بوك ويريد متابعة تجربته
https://www.facebook.com/GarhiOfficialPage/?ref=page_internal

بس يجب أن أعطى فكرة عنه .. عشان بعض ناس تاخدها من قصيره وبلاش تدخل عنده
دمه تقيل .. ثورى قديم .. اليومين دول "مطبلاتى"
وسابقا "كافر" فى الأيام السودة اللى عشناها من كام سنة
وهذا بوست من بوستاته .. والعينة بينة .. ولقد أعذر من أنذر

اقتباس

عندي سؤال: انت بتقول فين الشغل والفرص في البلد.. وانا برد عليك وبقولك فيه كذا ممكن يتعمل.. حضرتك زعلان مني انا ليه؟؟ هو انت ليه عايز تفرض عليا اتضامن معاك في انهزاميتك وفشلك؟؟ انت ليه عايز تضمني لقطيع الولولة والندب والعياط وشتيمة البلد اللي مش مقدرة قيمة عبقرية جناب معاليك.. فيه ناس عملت مجهود السنين علشان تكتب بوستات على فيسبوك تقول فيها انه مستحيل تعمل اي مشروع صغير.. ناس بتتعب نفسها علشان تقنع الناس ان مفيش فايدة.. انت فاكر انك لما تبعت تشتمني تبقى كدة نفيت الفكرة؟؟ انت بتحلم .. فاكر اني كدة خوفت واتهوشت وجريت استخبى تحت السرير حزنا على القهر اللي اصابني جراء نشرك لسكرين شوت قديمة كتبتها ايام ما كنت تحت تأثير الكلة؟؟ انت بتحلم .. فاكر ان لو مصر كلها وقفت على راسي علشان تمنعني ابقى ايجابي واحاول الاقي افكار مش مهم تكسب ولا تخسر ده هيخليني ابطل او اتراجع؟؟ تبقى برضه بتحلم .. يا عزيزي انا مش عايزك تتفاءل ولا عندي امل تقوم تهز طولك وتعمل شغل مفيد.. خليك زي ما انت ويا ريت كمان تلاقي فرصة تهاجر.. انا بكلم الناس اللي انت بتعصر عليهم خلاصة سوداويتك ويأسك وخيبتك التقيلة ودول لسة فيهم امل .. انت انتهيت اصلا ومن زمان كمان

 

[وائل علوان]

4 ساعات مضت, أبو محمد said:

أصلك مش واخد بالك يا أستاذ وائل .. ولك العذر فى التساؤل لحداثة التحاقك بـ "محاورات المصريين"
موضوع الجاموسة العشر (يعنى الحامل) ده موضوع قديم "من ضمن الأعمال الخيرية"
فتحه الأستاذ عادل ابو زيد فى 2004  بعنوان
جاموسة عُشْر للأسرة الفقيرة
وتروح الأيام وتيجى الأيام .. واحنا قاعدين كده نتحاور زى اليومين دول
برضه فى موضوع المراكب اللى بتغرق بالحالمين
وفى عام 2007 وتحت عنوان حلقة فى مسلسل الهجرة العبيطة غير الشرعية
(وده موضوع غير اللى اقتبس منه الفاضل سكوربيون بتاع 2005)
كتبت مداخلة فيما يلى اقتباس منها
كانت أيامها الجاموسة بـ 7000 جنيه .. دلوقت بحوالى 13 - 14 ألف
لو عايز تدخل فى مشروع زى ده أنصحك لا تدخل فيه إلا إذا كان لك سابق خبرة فيه
والسبب الذى جعلنى أذكر موضوع تربية البهايم ده هو أن أغلب الضحايا المصريين من قرى مصرية
وكانت القرية المصرية زماااااااااااان هى مركز إنتاج يغذى سائر أرجاء المحروسة
إتفضل حضرتك إقرا المداخلة على مهلك يمكن تغريك بقراءة الموضوع نفسه وهو ليس طويلا
هتلاحظ بقى حاجة غريبة
إن كل شئ تمنه ارتفع وتضاعف إلا "ثمن الموت"
شوفت ازاى ؟ .. "تجار البشر" لا يقلون عن "تجار المخدرات" .. فى "الشرف والأمانة"

 

عزيزي المحترم أبو محمد 

أسعد الله صباحك 

بالطبع انا عارف يعني ايه جاموسة عشر لاني بكل بساطة كنت وعلى مدار ثمان سنوات اعمل كمديرا لإدارة المشروعات التنموية لأحد الجمعيات الأهلية الكبرى وكان ضمن المشروعات التي أشرف عليها اشرافا مباشرا ومتابعا لنتائجها هو مشروع الجاموسة العُشر , فمتقلقش انا عارف تفاصيل الامر كويس جدا 

انا فقط كنت أداعبك عندما وجدت مداخلة حضرتك على موضوع رحلات الموت وقد وجدتك تنصح ايضا بمشروع الجاموسة العشر .

اتمنى لحضرتك يوم مشرق وسعيد ,,,

تم تعديل 26 سبتمبر 2016 بواسطة وائل علوان

[وائل علوان]

2 ساعات مضت, أبو محمد said:

اعتراف:
إبراهيم الجارحى

 

نشرت من كام يوم بوست عن صديق ليا اعرفه شخصيا عمل مشروع لزراعة الفراولة فوق سطوح بيته، وقولت انه بيكسب من الشغلانة دي كويس، وطبعا كمية التريقة اللي حصلت على الموضوع كانت تاريخية يا فندم، علشان انا مفروض ابقى سلبي ولازم اقعد اولول مع السرب اللي بيقول ان مصر مفيهاش ولا فرصة عمل بديلة عن الغرق في البحر، وان مفيش مشروع بيتكلف تلاتين الف ويكسب ابدا، وان التوكتوك هو الحل الوحيد..
الحقيقة ان الصديق اللي اتكلمت عنه ده هو انا .. وكل اللي يعرفوني شخصيا يعرفوا اني مهتم بالموضوع ده وبشتغل فيه من سنين.. ايوة انا بتكلم عن نفسي..
النهاردة انا هنشر تفاصيل المشروع بالكامل وبالصور واللينكات مش علشان اثبت كلامي.. علشان انا جالي اكتر من ميت رسالة بتطلب مني تفاصيل المشروع لأن فيه ناس عرفت ان ده ممكن يتنفذ.

الموضوع: دلوقتي فيه اتجاه جديد في الزراعة اسمه الزراعة البديلة، وده اتجاه هدفه تقليل المساحة المزروعة وبالتالي مصروفات الري والخدمة في مقابل تحسين طرق الزراعة بحيث المساحات الصغيرة بالزراعة البديلة تنتج أكتر من المساحات الكبيرة بالزراعة التقليدية.. بدل ما تزرع مساحة اربعة متر مربعة علشان تجيب ميت كيلو بطاطس ممكن تزرعهم في برميل بطريقة الردم المتتابع وتجيب نفس الكمية من مساحة اقل من متر مربع وبأقل من عشرة في المية من كمية المياه والمجهود المطلوب.. بدل ما تزرع 40 شتلة فراولة في سبعة متر مربع على الأرض، ممكن تزرعهم في ماسورة بي في سي مخرمة واقفة بشكل رأسي وهتاخد مساحة اقل من متر مربع، يعني ممكن تزرع في بلكونة صغيرة حوالي 400 شتلة، يعني ما يقابل زراعة أكتر من قيراط أرض.. وبنفس الطرق المبتكرة دي ممكن تزرع طماطم وتنتج منها بكميات رهيبة من مساحة صغيرة زي ما انا عامل قدام بيتي في مساحة تلاتة متر مربع (الصورة مرفقة وهي من محصول الطماطم بتاعي السنة دي)
على حسب المساحة اللي عندك وعلى حسب طبيعة المكان ونسبة الاضاءة ممكن تحدد انت محتاج تكاليف اد ايه، وعلى حسب مواعيد الزراعة ممكن تحدد المحصول اللي هتزرعه (احنا دخلنا في سيزون البطاطس مثلا دلوقتي وتقاويها هتبقى جاهزة اول اسبوع من اكتوبر)
لما تحدد المحصول هتحدد الأدوات، وهقولك على سبيل المثال انا شخصيا عملت ايه علشان اعمل زرعة الطماطم اللي في الصور دي:
انا جبت خمسين إصيص مقاس 34 مربعين، ودول تمن الواحد فيهم تلاتين جنيه وشكلهم حلو وينفع ديكور وزينة، ورصيتهم جنب بعض ومليتهم تربة صناعية (خليط بنسبة واحد لواحد من الكومبوست والبيتموس ممكن تشتريهم من اي مشتل قريب من بيتك ودول كلفوني 300 جنيه، والعبوات والتربة حاجة بتعيش معاك سنين وممكن تزرع فيهم عشرات المرات ما دمت محافظ عليهم، يعني بنية اساسية هتفضل مش هتقتصر في حسابها على محصول واحد)، وزرعت في كل إصيص شتلتين طماطم يعني المجموع مئة شتلة تمنهم خمسين جنيه ومتوفرين برضه في المشاتل وفي منافذ وزارة الزراعة في الدقي الشتلة بخمسين قرش، وجبت كمان بخمسين جنيه سماد بلدي وسوبر فوسفات وبوتاسيوم علشان التسميد.
لما كبر الزرع شوية شديته على سلك من بتاع الأسوار كلفني 45 جنيه للكمية كلها، وخمسين جنيه للقوائم الخشب.
انا بروي الزرعة دي مرتين في الاسبوع وحجم العمل اللي اشتغلته بنفسي فيها حوالي عشر ساعات عمل وهو عمل ممتع جدا بالمناسبة.
شجرة الطماطم ممكن تطول لحد خمسة متر، يعني ممكن ترفعها على سلك بارتفاع دورين بالطريقة دي، وده معناه ان الشجرة الواحدة ممكن تجيب حوالي 25 كيلو طماطم وده حصل معايا في موسمين متتاليين.. احسبها على مهلك لحد ما اجهزلك البوست بتاع الزراعة الرأسية للفراولة اللي بتكسب أكتر من الطماطم عشر مرات حتى لو بعتها في سوق الجملة الكيلو بخمسة جنيه، وهنشر كمان تجربتي مع زراعة البطاطس بأكتر من طريقة مبتكرة وهنشر الصور بمراحل العمل كلها كمان علشان يبقى كله بالتجربة العملية
واللي محتاج تفاصيل اكتر يقولي وانا ارشده لمصادر مفيدة أو اضمه لجروب كبيرة من هواة النوع ده من الزراعة وهم بالآلاف بالمناسبة وكلهم شغالين زي الفل وبياكلوا وبيبيعوا وبيكسبوا ومحدش منهم بيروح يغرق في البحر علشان يهاجر

مشروع محترم وتجربة محترمة طبعا 

[وائل علوان]

3 ساعات مضت, أبو محمد said:

اعتراف:
إبراهيم الجارحى

غالبية الناس اللي شوفتهم او تناقشت معهم ياعزيزي المحترم محمد لم يقل احدهم انه لا يوجد عمل 

وغالبا كل هؤلاء الشباب عاملون كادحون وكل ما هنالك انهم يبحثون عن فرصة افضل فقط 

لكن انا مش عارف ليه مصرين نتكلم عنهم كلام هم نفسهم لم يقولوه 

في فرق كبير لما اكون بتكلم عن شاب ( بلطجي او صايع ) وعايش وعاجباه حياة الرحرحة وحابب ان ابوه وامه واخواته يصرفوا عليه ولما حد يكلمه يحمل المجتمع والدولة المسئولية والنوعية دي كلنا ضدها , وبين شاب اصلا شغال وكادح وبيقعد يومه كله عشان يجيب 50 او ربما 100 جنيه وشايف ان دخله مش مقضيه فحابب يدور على  فرصة افضل , فليس من العدل ان نساوي كل هؤلاء بالنموذج الذي تحدثنا عنه 

واما عن مبلغ الـ 30.000 جنيه لا يمكن انه يعمل مشروع اه 

لكن المقصود مشروع يدر الدخل اللي الشاب محتاجه عشان يكفيه في تلبية الحد الادني من احتياجاته المعيشية والافاء بمتطلبات ومقتضيات الحياه 

وتأكيدا على نقطة مهمه جداااااااا

ان مش كل الناس تصلح للمشروعات الخاصة 

انا درست تنمية بشرية لمدة ثلاث سنوات تقريبا ومن ضمن ما درسته الانماط الشخصية ودراستي للأنماط الشخصية خلتني افهم بعض الشخصيات اللي بتعيش حوالينا وبنتعامل معاها كل يوم ومكناش عارفين نلاقي مبرر لبعض توجهاتهم او نجد تفسيرا لبعض قراراتهم في الحياه 

فهناك شخصية تجدها لا تصلح الا ان تكون شخصية انقيادية وينجح صاحبها جدا اذا عمل في مجال العمل التنفيذي , يعني ياخد الامر وينفذه , وشخصية تانية متنجحش الا لو اشتغلت وكانت هي صاحبة القرار الاوحد وهي شخصية قيادية بطبعها , وفي انواع كتير من الشخصيات اللي انطوائية واللي انبساطية  ............................ الى اخره 

وكل شخصية وليها مجالها اللي لو عرفنا احنا بنتعامل مع مين من البداية هانقدر نوظف الشخص ده في مكانه المناسب ونقدر نوجه مجهوده في الاتجاه المناسب

اللي اقصد اوصله نقطة بتكمل نقطة 

ان اولا مش شرط عشان شخص زي الاستاذ ابراهيم الجارحي عمل مشروع ونجح معاه لانه بالطبع يمتلك كل المقومات الشخصية والفنية لتنفيذ هذا المشروع يبقى شرط ان كل شاب وجبت عليه التجربة وضُمِنَ له النجاح 

ثانيا مش كل انسان يمتلك من العقل والامكانيات الشخصية ما يمتلكه الاخرون فربما انجح كموظف تنفيذي وربما انجح كعامل وربما انجح كرجل اعمال وممكن بالعمل القيادي وهكذا , فليس من العدل ان اطلب من انسان لا يمتلك مقومات امتلكها غيره فنجحوا في مجال ما ان يقوم هو ايضا بنفس التجربة , لاني مهما ضغط عليه مش هاينجح لانها ولا دماغه ولا امكانياته اصلا 

لكن ما اراه اننا ماسكين في المشروع وبعض تجارب اللي نجحوا ومسلطين التجارب دي على الشباب وبقت بمثابة الكرباج اللي بنجلدهم بيه , انا شايف ان ده مينفعش خالص وخاصة اننا (مش) قدام شباب (صايع ولا اختار قاعدة البيت) !!!!

هم شباب شغال وكادح وممكن اكتر من ناس كتير مرفهين مننا وكل اللي عملوه انهم حاولوا يشوفوا فرصة افضل ليهم مش اكتر من كده 

فكرة حضرتك تكون صحيحة جدا وادعمها معاك لو اللي راح سافر شاب محاولش يشتغل هنا واختار يبقى بلطجي وعايش على قفا الست الوالدة وحب بعد كده انه يسافر عشان السفر بالنسبة له حل سهل ولكن وبما ان شباب كتير من اللي سافروا هم اصلا شغالين ما شاء الله حرفيين وكلهم تقريبا عاملين ما يشبه المشروع الخاص يعني منفذين اللي احنا عمالين ندفعهم لتنفيذه وكل واحد فيهم شايل عدته وشغال بيها ولكن هو شخص يبحث عن فرصة افضل فقط 

فكل كلامنا انهم ناس صايعه ومش عاوزين يتحركوا فاحنا بقى بنقترح عليهم مشروعات عشان يشتغلوا وميتلككوش والكلام ده غير صحيح 

لازم نبحث في دخل الشباب وهل هي دخول مناسبة للايفاء بمقتضيات الحياه او لا 

يارب تكون وجهة النظر وصلت يارب اكون عرفت اعبر كويس عن ما اريد قوله 

اسعد الله صباحكم جميعا بكل خير 

[herohero]

شباب طماع وجشع ساب كل الفرص المتاحه للبلد وبطمعه وجشعه بيركب مراكب الموت

اهو ماتوا وريحوا وارتاحوا

شباب مفتري مش راضي ومش عاجبه الفرص المتاحة 

 

[أبو محمد]

عزيزى الأستاذ وائل
ما وضعت تجربة "الجارحى" ومعها دعوة لأن يطبقها غيره
أنا وضعتها كمثال .. والتنويعات لا نهائية
معاك إن مش كل الشخصيات تصلح لعمل مشروع "خاص"
وهناك من لا يستطيع أكثر من أن يكون "العبد المأمور"
المشكلة هى : هل يعرف هذا الشخص أنه لا يصلح لغير لهذا ؟ .. لا أظن
كل ما يعرفه هذا الشخص "المنقاد" هو أن جاره أو قريبه ركب مركب وبعد كام سنة رجع غنى
لم يسأل جاره أو قريبه ماذا فعل .. هل يدرى مثلا أنه اضطر للعمل فى تجارة المخدرات ؟
هل عرف أن جاره "القاصر" كان عنصرا من عناصر الشذوذ الجنسى ؟
كما قلت .. كل مهاجر "مخالف" ينتظره صاحب عمل "مخالف"

[أبو محمد]

3 ساعات مضت, herohero said:

شباب طماع وجشع ساب كل الفرص المتاحه للبلد وبطمعه وجشعه بيركب مراكب الموت

اهو ماتوا وريحوا وارتاحوا

شباب مفتري مش راضي ومش عاجبه الفرص المتاحة 

 

ردا على مداخلتك هذه وعلى مداخلتك تلك
أنا عملت اللى علىَّ ونبهت وحذرت
إيه اللى خلاك تقرا كلام الجارحى "الجارح" ؟
ليه تعكر صفو "مزاجك" بكلمتين زى دول ؟

 

اقتباس

عندي سؤال: انت بتقول فين الشغل والفرص في البلد.. وانا برد عليك وبقولك فيه كذا ممكن يتعمل.. حضرتك زعلان مني انا ليه؟؟ هو انت ليه عايز تفرض عليا اتضامن معاك في انهزاميتك وفشلك؟؟ انت ليه عايز تضمني لقطيع الولولة والندب والعياط وشتيمة البلد اللي مش مقدرة قيمة عبقرية جناب معاليك.. فيه ناس عملت مجهود السنين علشان تكتب بوستات على فيسبوك تقول فيها انه مستحيل تعمل اي مشروع صغير.. ناس بتتعب نفسها علشان تقنع الناس ان مفيش فايدة.. انت فاكر انك لما تبعت تشتمني تبقى كدة نفيت الفكرة؟؟ انت بتحلم .. فاكر اني كدة خوفت واتهوشت وجريت استخبى تحت السرير حزنا على القهر اللي اصابني جراء نشرك لسكرين شوت قديمة كتبتها ايام ما كنت تحت تأثير الكلة؟؟ انت بتحلم .. فاكر ان لو مصر كلها وقفت على راسي علشان تمنعني ابقى ايجابي واحاول الاقي افكار مش مهم تكسب ولا تخسر ده هيخليني ابطل او اتراجع؟؟ تبقى برضه بتحلم .. يا عزيزي انا مش عايزك تتفاءل ولا عندي امل تقوم تهز طولك وتعمل شغل مفيد.. خليك زي ما انت ويا ريت كمان تلاقي فرصة تهاجر.. انا بكلم الناس اللي انت بتعصر عليهم خلاصة سوداويتك ويأسك وخيبتك التقيلة ودول لسة فيهم امل .. انت انتهيت اصلا ومن زمان كمان