إنهيار البنيان

[Grandma]

الابداع  هو التفوق و المهارة في عملية الخلق او اعادة الخلق 
يُقال فلان مبدع أي انه ابتكر شيئا جديدا بمهارة شديدة وغالبا ما يكون المبدع متفرد في موهبته  
الابداع يحتاج الى  موهبة و خيال و اسع و حس مرهف وذكاء متقد ومهارة استثنائية 
يستمد المبدع قيمته من مقدار فائدة ما قدمه  للبشرية 
الابداع كما أصنفه نوعان ، ابداع فني و ابداع علمي  
الابداع الفني يشمل الموسيقى والغناء و الرسم و النحت و التصوير و الشعر وكل فنون الأدب كما يشمل فن المهارات اليدوية .
حضارات الأمم يشكلها الابداع الفني بكل فروعه فكلما ارتقت فنون الأمة ارتقى شعبها و حضارتها  .
أما الابداع العلمي فيشمل كل ما هو متعلق بالعلوم ، كعلوم الطب و الهندسة و الفيزياء و الكيمياء و علم الكون و الفضاء و الجيولوجيا ... الخ 
الابداع العلمي له مستويات اولها الخيال وهو صفة بشترك فيها مع الابداع الفني ، ثم التجربة والملاحظة التي تؤدي الى تكوين النظرية  وهنا قد  يتوقف العالم ويقتصر ابداعه على التوصل الى  نظرية علمية قد تفيد غيره من العلماء المعاصرين له أو علماء المستقبل  مثال على ذلك نظرية انشتاين ونظريته ( النسبية )
   و يمكن ان يصل العالم  الى مستوى أعلى من الابداع فيبتكر شيئا جديدا كاختراع المصباح الكهربائي  و آلة الطباعة  و الكمبيوتر و غيرها من الاختراعات التي تدين لها البشرية بتطورها و بقاءها .
الابداع العلمي رغم انه فكرو انتاج فرد لكنه يعتمد على  العمل الجماعي سواءعلى المستوى النظري او العملي فكل عالم يعتمد على نظرية عالم قبله يطورها او يطبقها ويحولها الى واقع  ملموس ثم يأتي من بعده ليطور انتاج من قبله  وهكذا تسلم الاجيال بعضها بعضا شعلة العلم .  
مقياس تقدم الامم العلمي  ُيقاس بما تقدمه تلك الامم للبشرية من علم ومدى مساهمتها في تطور التاريخ الانساني 
 

نستنتج مما سبق أن الابداع الفني هو روح الامة و الابداعي العلمي هو جسدها بدون احدهما لا يكتمل البنيان و بنقص احدهما تعتل الامم تشيخ  وتمرض ثم تفنى .

من المؤسف اننا ابتلينا في الوطن العربي كله مؤخرا بنوعين من البشر :
نوع منكر وكاره للابداع الفني وعلى أحسن تقدير يرى الفن في مرتبة أدنى من سائر العلوم الانسانية ،

  ونوع غير مبالي بالعلم و البحث العلمي و بقيمة الابداع ولا يسعى له  .

فكيف سيستقيم البنيان ؟!!

 

[أبو محمد]

طب ما هو كده تبقى الخيبة على الجنبين
يعنى فيه توازن اهو .. فكيف سينهار البنيان
أنا منتظر لأنى حاسس إن للموضوع كمالة

[Grandma]

12 ساعات مضت, أبو محمد said:

طب ما هو كده تبقى الخيبة على الجنبين
يعنى فيه توازن اهو .. فكيف سينهار البنيان
أنا منتظر لأنى حاسس إن للموضوع كمالة

حلوة حكاية التوازن دي ... ما خطرتش على بالي 

الموضوع مالوش كمالة ...كمالته هتكون من خلال المداخلات 

حضرتك يعني شايف اننا مادام أهملنا التعليم و احتقرنا الفن يبقى كدا حصل توازن ومجتمعاتنا العربية هتستمر 

انا شايفة اننا بندمر نفسنا بنفسنا  لان نتيجة اهمال الجانب العلمي و الثقافي و الفني نشأ عندنا عقول خاوية و نفوس مريضة أدت الى تكوين جماعات ارهابية انتشرت في كل بقعة من بقع وطنا العربي و اصبحت كالخلايا السرطانية التي تنتشر في الجسم وهتدمره ودا حصل امام عيونا في العراق و سوريا و ليبيا و مأساة اليمن و انقسام السودان و عصابيات لبنان كلها برضو وليدة الجهل . بضعفنا اصبحنا عجينة طرية في يد الغرب بيشكلونا ويشكلوا منطقتنا مزاجهم . مش عارفة التوازن السلبي بتاعنا هينقذنا ازاي ؟!!

[أبو محمد]

3 ساعات مضت, Grandma said:

حلوة حكاية التوازن دي ... ما خطرتش على بالي 

الموضوع مالوش كمالة ...كمالته هتكون من خلال المداخلات 

حضرتك يعني شايف اننا مادام أهملنا التعليم و احتقرنا الفن يبقى كدا حصل توازن ومجتمعاتنا العربية هتستمر 

انا شايفة اننا بندمر نفسنا بنفسنا  لان نتيجة اهمال الجانب العلمي و الثقافي و الفني نشأ عندنا عقول خاوية و نفوس مريضة أدت الى تكوين جماعات ارهابية انتشرت في كل بقعة من بقع وطنا العربي و اصبحت كالخلايا السرطانية التي تنتشر في الجسم وهتدمره ودا حصل امام عيونا في العراق و سوريا و ليبيا و مأساة اليمن و انقسام السودان و عصابيات لبنان كلها برضو وليدة الجهل . بضعفنا اصبحنا عجينة طرية في يد الغرب بيشكلونا ويشكلوا منطقتنا مزاجهم . مش عارفة التوازن السلبي بتاعنا هينقذنا ازاي ؟!!

لا أقصد إطلاقا إن مثل هذا التوازن (فى الخيبة) ممكن ينقذنا
إنما بيؤدى إلى حالى استقرار (فى الخيبة برضه) إلى أن يقضى الله أمرا كان مفعولا
وأقصد أيضا أننا عندما نحاول إصلاح الحال المايل .. فلا يصح أن نهتم بإقامة جانب ونهمل الآخر
الإبداع والعلم هما جناحا "طائر النهضة"

مش عايز ضرب

[Grandma]

في 9/29/2016 at 19:15, أبو محمد said:

لا أقصد إطلاقا إن مثل هذا التوازن (فى الخيبة) ممكن ينقذنا
إنما بيؤدى إلى حالى استقرار (فى الخيبة برضه) إلى أن يقضى الله أمرا كان مفعولا
وأقصد أيضا أننا عندما نحاول إصلاح الحال المايل .. فلا يصح أن نهتم بإقامة جانب ونهمل الآخر
الإبداع والعلم هما جناحا "طائر النهضة"

مش عايز ضرب

و اللهِ انا كنت هكتب عن الجناحين اللي لازم تحلق بهما أي دولة ناجحة و افتكرت طائر النهضة سكت 

عمر حضرتك أطول من عمري 

 

[أبو محمد]

11 دقائق مضت, Grandma said:

و اللهِ انا كنت هكتب عن الجناحين اللي لازم تحلق بهما أي دولة ناجحة و افتكرت طائر النهضة سكت 

عمر حضرتك أطول من عمري 

 

ولا يهمك .. إكتبى زى ما انتى عاوزة .. طال عمرك

[Grandma]

15 ساعات مضت, أبو محمد said:

ولا يهمك .. إكتبى زى ما انتى عاوزة .. طال عمرك

طال عمري !!  شكل الجوجل ارث شغال الله ينور ... ما علينا 

نكمل زي ما انا عاوزة 

انا مهتمة  في الموضوع دا بالذات بالجانب الاخر اللي هو الابداع الفني 

ليه ؟

لاني حاسة ان الناس مستهونة بيه و دا أدى الى اهمال تدريسه في المدارس 

و بالتالي اصبح عندنا دواعش صغننين بيكرهوا الفن و شايفين انه حرام 

مامتهم و باباهم بيقولولهم الفنانين دول ناس وحشين و هيدخلوا النار

ولو ظهرت موهبة فنية على الأولاد و حلم شاب او فتاة ان الفن يكون مهنته ...

يعترض الاب و الام :  (فن ايه يا واد بلاش مسخرة )

واذا كانوا متفاهمين ومتفتحين  شوية يبقى الفن و الهواية جنب الدراسة ...يعني تبقى دكتور او مهندس او صيدلي الاول

و بعد كدا ممكن نسمحلك ترسم ، تعزف ، تغني ولا تمثل المهم تبقى دكتور فنان او مهندس فنان 

لكن الفن وحده ما ينفعش ؟؟ ليه لانه حاجة مش محترمة في بلادنا 

اوعى يكون قدوتك محمد رمضان ولا عمرو دياب 

- من مشخصاتي لمغنواتي يا قلبي لا تحزن ...واحد بلطجي و التاني بيتنطط زي  فرقع لوز 

ولا اوعى تشخبط على لوحة وتعملي فيها فنان ... النوعية دي بالذات من الفن مش بتأكل عيش 

- ماليش انا دعوة بالاجانب و اللي بيعرضوه في اللوفر و الهرميتاج احنا لنا ثقافتنا وهما ثقافتهم 

هما يتسمروا قدام اللوحة بالساعات و يدفعوا  فيها ملايين دي ناس عبيطة مالناش دعوة بيهم 

- بتقول ايه يا واد ؟  عاوز تنحت تمائيل !!! اللهم أحفظنا يارب ..دا كقر بَين 

- طيب لما هو كفر يا بابا ليه عمرو بن العاص اما دخل مصر ما حطمش التماثيل و المعابد ؟ هو ما شافهومش ؟

طيب واذا هو ما شافهومش ولا دولة من دول الخلافة الاسلامية اللي اتعاقبوا على مصر شافوهم وكسروهم قبل ما يفتنوا المصريين  في دينهم ؟ 

- امشي يا واد من قدامي بلا لغو فاضي

- وانتي يا بنت عاوزة  ايه انتي كمان ؟ تغني يا فضيحتنا في العيلة و بين الجيران ...هنودي وشنا  منهم فين ؟

تقفي على المسرح تتقصعي و تتمايصي 

 تكونيش فاكرة نفسك ام كلثوم .. امشي يا بنت انجري عالمذاكرة بلا قلة حيا 

قال فن قال 

جتكم البلاوي في اللي مربينكم