اسافر ولا ما اسافرش

[Ahmed Saeid]

السلام عليكم جميعا 

انا سعيد جدا اني لقيت الموقع ده وسعدت اكتر لما شفت الاعضاء وهيا بتتفاعل مع بعض وبتساعد بعض واتمنى انكم تساعدوني وتتفاعلوا معايا 

انا عايز اخد رأي حضراتكم في موضوع بيمثلي حياه او موت 

 

انا مهندس مدني حديث التخرج بتقدير جيد جدا ونزلت تدريب كذا مرة وكنت باشرف ع الموقع لوحدي استلم واتعامل مع العمال وعندي خبرة بسيطة في الموضوع ده، الحمد لله اخدت اعفا من الجيش وبدأت ادور على شغل هنا في مصر ولفيت على المكاتب وبعت سيرتي الذاتية وللاسف مفيش نصيب ومقفله معايا جامد. بدأت افكر في موضوع السفر وكلمت واحد صاحبي في دبي يعملي تأشيرة سياحة 3 شهور عشان اجي ادور على شغل وهوا شجعني وقالي ان الشغل متوفر وان شاء الله هلاقي بس انا خايف اسافر واترفض عشان حديث تخرج.

دلوقتي انا عايز اعرف هل شركات الهندسة في دبي بتطلب مهندسين حديثي التخرج وايه الحد الادنى للمرتبات ولا لازم لازم يكون معايا خبرة؟ 

طيب لو سافرت ايه افضل طريقة ادور بيها على شغل هل انزل الف على الشركات بنفسي او ابعت على الانترنت؟ 

بالنسبة للحياة هناك انا عارف انها غالية بس مش عارف اجيب معايا فلوس قد ايه عشان يكفوني 3 شهور علما باني هاسكن في سكن مشترك؟ 

انا سمعت ان لازم يكون معايا الف دولار كاش عشان اعرف اطلع من مطار القاهرة ولازم عشان تأشيرة السياحة احجز تذكرة ذهاب و عودة فهل ده صحيح؟ 

 

شكرا لوقت حضراتكم واتمنى ماتبخلوش عليا بمعلوماتكم

[Sharif Ragab]

و عليكم السلام ورحمة الله وبركاتة 

موضوع الخبرة هو الي بيحدد المرتب يعني ما تخفش لو معندكش خبرة هتلاقي شغل بس المرتب بيكون ضعيف و نصيحة دور علي شركات دبي تكون لها افرع رئيسية في دبي 

المرتب عشان تعيش علي الاقل 5 الي 6 الف درهم و سكن مشترك و بعدين احسن لك تاخد الخبره و بعدين تقدر تتنقل براحتك في الخليج كله 

عشان تقدر تعيش مدة ال3 شهور يبقي معاك علي الاقل 9 الف درهم 

و ربنا يوفقك الي الثواب 

 

شكرا