أنا عصبي: أولع في نفسي؟!

[Sherief AbdelWahab]

الشخص العصبي ..

هناك منا من هم عصبيون بطبيعتهم ، يسهل استثارتهم .. ويصعب عليهم إلغاؤها ، قد يضعهم ذلك في مشاكل ليسوا على قدر مواجهتها ..

كيف يمكن للعصبي أن يسيطر على عصبيته ؟ وكيف يمكن لمن حوله احتواء العصبي والتعود على عصبيته؟

خلص الكلام

[se_ Elsyed]

لقد لمست الوتر الحساس يا شريف يا بني

وإذا كنت لسه أعزب وبتقول كده ... أصبر لما تتجوز وهاتعرف عصبيتك دي هاتوديك فين ...

للأسف وأقولها بصراحة إني من هذا الحزب المنيل العصبي اللي يسهُل إستثارته وبدل ما أصلح في نفسي .. بأطلب من اللي حواليه إنهم هما اللي يصلحوا نفيهم ويستحملوني وياخدوني على قد عقلي ... :wub:

أكاديمياً ونظرياً بقى لو جينا للحقيقة ..

طالما الواحد في عادة مهببه زي كده وهو متأكد ... يبقى لازم يدرب نفسه بالتدريج على التحلي بالهدوؤ والصبر ما أمكن ( قول لنفسك يا فالح )

[MZohairy]

زاناكس !!!!!

أقراص زاناكس المهدئه

خدت قرص يوم وفاة والدي رحمه الله ورغم حبي الشديد له وحزني الشديد عليه الا اني كنت فرحان للغايه وهادي جدا

ده الحل الوحيد اليومين دول صدقني!

[أسد]

الموضوع عندي مختلف شوية ..

فأنا كنت عصبي جداً .. أثور لأقل الأشياء .. وأغضب بشدة ..ودمي يغلي ... وأهدأ بعد فترة طويلة .. ......... جداً ...

مارست على نفسي برامج تدريبية حتى أعلم نفسي كيف أسيطر على أعصابي .. وأكبح جماح ثورتي . .. وأوقفها حيثما هي بدون أن تخرج مني ....

نجحت .. بالرغم من معاناتي حين يحدث ذلك من آلام شديدة في أسفل ظهري .. وركبتاي .. وإرتفاع في ضغط الدم ... مع زيادة في إدرار البول ..

واستشرت طبيباً .. وقال أن هذه أعراض طبيعية ...

وبالتدريج .. بدأت تقل نوبات غضبي إلى فترات متباعدة جداً ..

ولكن ..

وآه من لكن ..

حينما أغضب .. وأثور ..وهذا الآن نادراً ...

ماعدت أنفع بشئ ..

أثور ثورة عارمة .. أحياناً أخاف على نفسي .. أو أخاف على من حولي مني ...

أحياناً أكاد أن أرتكب حماقات . وأقول كلاماً .. أندم عليه .. ولكني في كل مرة لا أتردد في أن أعتذر عنه ...

لم أرتكب خطأ جسيم حتى الآن ولكن ربنا يستر ..

في النهاية ... بابقى فعلاً مش عارف أعمل إيه ..

أولع في نفسي ولا إيه ..

العظيمة الرائعة زوجتي .. تتحملني وتتفهمني لأقصى الحدود ... وتساعدني على الهدوء .. وساهمت بقدر كبير جداً على أنني الآن أفضل مائة مرة مما سبق ..

في النهاية ..

يجب أن تدرب نفسك على ألا تغضب ..

وكررها كثيراً لنفسك .. قائلاً ...

لا تغضب

[Sherief AbdelWahab]

ياريت المسألة كانت عل زاناكس.. ما كانش حد غلب..

نختلف في نظرتنا للشخص العصبي ، فمنا من يعتقد أنه مريض ، ومنا من يعتقد أن هذه طباعه ، منا من يطالبه بأن يغير نفسه أو ينتحر ، ومنا من يطالب بمنحه فرصاً يستحقها كغيره ..

سؤالي هنا هو : قبل أن نطالب أي شخص عصبي ، زي حالاتي وزي كتير غيري ، بالتغيير ، هل لدينا مساحة لتحمله وتشجيعه على أن يتغير؟

خلص الكلام

[مصرية الهوى]

( إنما العلم بالتعلم ، وإنما الحلم بالتحلم ، وإنما الصبر بالتصبر)

يعني فكرة تغيير الإنسان العصبي لشخصيته واردة ، بس محتاجة همة وصبر وإرادة ورغبة ذاتية نابعة من داخل الإنسان في تغيير نفسه ..

حط لنفسك خطة .. يعني مثلاً أنا هأطبق الخطوات دي لمدة يوم .. فشلت عدها .. لمدة يوم برضه .. نجحت حطها ليومين .. بعدين تلاتة .. بعدين اسبوع .. عشرة أيام .. وهكذا ..

ودايما حط في بالك ( انما الحلم بالتحلم ) .. والحلم صفة يحبها الله ورسوله ..

أول حاجه .. الواحد لما يقعد مع نفسه لما يجي ينام مثلاً .. ويشوف ايه اللي نرفزة النهارده وخلاه يزعق ويصرخ في اللي حواليه .. هنكتشف إن تلاتة أرباع الأسباب .. كانت هايفة .. اه والله يا جماعة .. أسباب مكنتش تستاهل كل الصراخ اللي عملانه .. وإنه لو كنا حاولنا نمسك نفسنا .. كنا هنقدر .. فعشان كده أوعد نفسك إنك هتحاول تمسك نفسك بكرى ..

أول ماتشوف حاجة قدامك تنرفزك .. قول " أعوذ بالله من الشيطان الرجيم " .. والله العظيم يا جماعة وزي ما الرسول صلى الله عليه وسلم قال فيما معنى الحديث الشريف .. لما شاف واحد متنرفز أعرف كلمة لو قالها لذهب ما به .. فعشان كده حاول أول ما تتنرفز تقول " أعوذ بالله من الشيطان الرجيم " ..

برضه حاول كمان .. إنك تسيب المكان .. قد متقدر .. متقعدش في المكان اللي اتنرفزت فيه .. عشان تمنع نفسك في التمادي في الغضب .. ولو مقدرتش تخرج حاول تغير قعدتك لو كنت واقف اقعد .. وحاول انك متشوفش اللي نرفزك .. برضه حاول إنك متتكلمش قدر الإمكان ..عض على لسانك وشفايفك اوي .. لأن الواحد لما بيكون متنرفز بيقول كلام يخليه يندم مليون ألف مرة انه قال كده .. وقت لا ينفع الندم .. فعشان كده الواحد بيزعل من نفسه جداً لأنه بيزعل ناس بيحبهم .. عشان اتكلم وهو متنرفز ..

حاول برضه إنك تتوضئ لأن الغضب زي النار لا يطفئه إلا الماء ..

ولو الوضوء صعب .. اغسل وشك على الأقل ..

كمان فكّر في عواقب الغضب الصحية على المدى الطويل .. ضغط دم .. قلب .. مش عارفه ايه .. الخ ..

وتذكر نصيحة الرسول صلى الله عليه وسلم لما واحد قاله أوصني قال: ( لا تغضب وردد مراراً قال لا تغضب)

مش عارفه انا حاسة انه غلط الواحد ياخد مهدئات عشان الغضب ..

يعني هيأخد مهدئات طول العمر ..

دي عادة وحشة في الإنسان .. لازم يقتلعها من جذورها .. بالصبر وقوة التحمل ..

انت بس حط في بالك إنك تقدر تغير نفسك .. وهتنجح في تغيير نفسك ..

وصدقني ان شاء الله هتنجح .. لو ساعدت نفسك بنفسك ..

والله يساعد أولئك الذين يساعدون أنفسهم ..

وحاول برضه تستعين باللي حواليك عشان يساعدوك ..

وصدقني هتقدر .. لو أردت ذلك !!

ولو خلاص شايف مفيش أمل ..

لترين بنزين وعود كبريت ..

وقابلني على صفحة الحوادث ..

:blush: :blush:

[MZohairy]

والله أغلبنا مرضى!

على فكره

المريض النفسي مش لازم يمشي يحدف الناس بالطوب وشايل ايرال تليفزيون في ايده

كتير جدا مكتئبين ومحبطين وعندهم اعراض مرضيه نفسيه ومبيتعالجوش

الزاناكس حيريحك

اسمع كلامي

بس تبطله بالتدريج مش مره واحده

يعني لو بتاخد قرصين يوميا

خليهم قرص لمدة 3 او 4 ايام

وبعدين نص

وبس حتبقى آخر مزاج وحتستغرب أوي من الناس الغريبه اللي بتتنرفز دي!!

[achnaton]

شريف ..أوعى يا بنى من القرارات الفرديه الوحشة دى .. تولع فى نفسك إزاى .. كده لوحدك ..

طب إستنى لما نزهق احنا منك .. ونعلنها كده بالميكروفونات .. وبكده تكون ريحتنا أحنا .. ويبقى لك عند ربنا ثواب

احنا الوقت مش زهقانين منك وعاوزينك جنبنا .. وشوفلك قرطاس لب أبيض أوقرطاس ترمس .. واقعد على شاطئ النيل .. قدام برج الفساداللى فى ماسبيروا .. حتبص تلاقى نفسك بعد دقائق ..بترمح وانت بتضحك على الخيبة اللى عايشها غيرك فى البيوت أمام شاشات التلفزيون ومن شاف بلاوى الناس هانت عليه بلوته ...

تم تعديل 2 أكتوبر 2006 بواسطة achnaton

[nemr111]

اللى يولع فى نفسه يموت كافر اوعى تعملها و اذا كنت عاوز يتولع فيك ، انزل البلد و شوف الشوارع و الاسعار فى المحلات ها تولع لوحدك من غير ما حد يعملها فيك و تموت شهيد يا عم

صحتك بالدنيا

و سلامتك

[صفاء]

لقد لمست الوتر الحساس يا شريف يا بني

وإذا كنت لسه أعزب وبتقول كده ... أصبر لما تتجوز وهاتعرف عصبيتك دي هاتوديك فين ...

أما تتجوز هاتهدى خالصصصصصصصصصصصصصصصصصصصصصص

هاتصاب بالخرس المنزلى

يعنى اللى هاييجى يكلمك هاتقول له :

حمنا حمنا ميييين :P

اطمن

تم تعديل 2 أكتوبر 2006 بواسطة صفاء

[khedr]

أحياناً أكاد أن أرتكب حماقات . وأقول كلاماً .. أندم عليه .. ولكني في كل مرة لا أتردد في أن أعتذر عنه ...

وهذا ما يجعلك تفكر الف مره قبل ان تغضب

وتمسك نفسك وتدوس ...وتدوس

وتدوس انت عليها بدلا من ان يدوس غيرك عليها

بكثره اعتذراتك

وفقدانك الاصدقاء والاعزاء

ونفسك ايضا

وقاك الله ووقانا شر الغضب

[eltayer]

العملية مختلفة عندي خالص

علي العكس تماما

من الصعب إثتثارتي

بمعني انا بحب الناس العصبية موت وخصوصا الرخمين منهم

يعني ش،ف صفتين ،لا احلي ولا اجمل

احب اضايقهم انرفزهم اطلعهم عن شعورهم وبعدين اسكت

طبعا هو دمه يغلي مش عارف يعمل ايه

يقوم ينرفزني

انا اساسا مبترنرفزش خالص حتي لو مت قدامي بل بالعكس باضحك من كتر مهو عاوز ينرفزني

والحكايه دي قوتها قوي اثناء الكليه

شله الاصدقاء بتاعتي كن بنتضرب كتير قوي علي ان ننرفز الناس بس محدش يقدر ينرفزنا

لحد مواحد صحبي ادم الحكايه دي

كان يتصل باي رقم بالتليفون وينرفز اي حد يرد عليه ويعيني الراجل ولا الست اللي ترد عليه يبقو عوزين يولعوا فيه وفي نفسهم

وهو يقلهم بكل برود اعصاب انت متنرفزين ليه

والدرس ده لو يعرفه العصبي مكنش اتعصب

بمعني واحد شكل اللي رد علي التليفون

لو قفل الخط من اول المكالمه مكنش اتنرفز خالص وكان ممكن نرفز اللي اتصل بيه

اي العصبي انسان بيحب النرفزه ويحب يتنرفز علطول

ودي شكل البنت اللي بتحب تتعاكس في التليفون

اول متكلمها وتنبسط تعمل مؤدبة وتقلق لو مسكتش هقفل السكه

عاوز تكسفهي تقلها يعني لو سكت هتسبيها مفتوحه ولا ايه

اي يتمنعني وهنا الراغبات

كلام ينرفز صح

اي حد بيترفز بجنون انا في الخدمه سواء لو عاوز يتنرفز او يتعالج دابل فيييييييييس علاج ومرض

انا في الخدمة

الطاير

[نانو]

انا بيتهيئلي موضوع العصبيه ده

محتاج مجهود ذاتي و دعم خارجي

فعلا لازم يكون فيه حد قريب منك يساعدك انك تعرف تتجاوز اللحظات ديه

انا بقولها عن تجربه

انا جوزي كان عصبي جدا...و كنا في بدايه حياتنا بيحصل مشاكل كتير بسبب العصبيه لاني انا كمان عصبيه

لكن لقيت انه مش هينفع كده و كان عليا التغير فورا....

و بدات اقلب كل موضوع فيه عصبيه بتهريج....و غالبا هو بيبقي في اوج عصبيته اول ما يرجع من الشغل

و خلاص عرفت معاده فبقيت انا اعمل حسابي و ارسم ابتسامه ولو صفره (احيانا يعني) و مجرد ما يبدا يتنرفز اقلب الموضوع تهريج بس بطريقه لطيفه و الا تقلب بالعكس او احسسه بطريقه كلامي ان الموضوع ابسط من كده

و مره علي مره بيحس ان الموضوع ما يستاهلش لغايه ما خفت كتير جدا عدد مرات النرفزه و حدتها.... و بقي اول ما يفكر يترنفز يلاقي نفسه بيضحك من تعبيرات وشي.... و اللي هيشوفه مني لو اتنرفز

صدقني سيبك من الناس اللي بتقولك بعد الجواز هتتنرفز ......بالعكس...ده انت هتبقي هادي جدا :)

اقصد هتلاقي ان اشاء الله حد يعينك علي الموضوع ده

[أبو زياد]

أعجبتنى مقولة أحد المشايخ :

إذا غضب الإنسان أسلم قيادة لسانه للشيطان

وكما قال رسولنا الكريم (ص) :

ليس الشديد بالصرعة و لكن من يملك نفسه عند الغضب

رمضان كريم و قد جعله الله ترويضا لنفوسنا على كثير من مشاكلها فله الحمد و الشكر

[salma]

هو في ايه

مين هيولع في مين

انا رايي ان الغضب و العصبيه ليه اسباب كتير قوي

و نصيحه مني قبل ما تبدأ في الصراخ و احمرار العنين و الهستيريه

عد لحد عشرين

خد نفس عميق

ممكن ساعتها تنسي اصلا الموضوع كان ايه

قول في نفسك اللي عصبني ده ميسواش انا صحتي الاهم

عايز تجنن اللي غاظك

خلييييك باااااااااااااااارد

الحياه مليانه بكل اللي يضايق و يزعل و لو الانسان استسلم يبقي البقاء لله

تذكر ان الصبر و الهدوء من اجمل الاشياء و ان الرسول عليه الصلاه و السلام وصانا الا نغضب

ثم ان اللي هياخد اي دوا خليه عارف انه هيبقي مدمن اكيد وهنيجي نزوره في المصحه

عشان كده معروف ان الدكاتره النفسيين بعضهم مش كويس لانه بيوصف الدوا و عارف ان المريض هيدمن

لما تغضب اقرأ قرأن

هيهدي نفسك و يطيب خاطرك

[Lembic]

هو في ايه

مين هيولع في مين

انا رايي ان الغضب و العصبيه ليه اسباب كتير قوي

و نصيحه مني قبل ما تبدأ في الصراخ و احمرار العنين و الهستيريه

عد لحد عشرين

خد نفس عميق

ممكن ساعتها تنسي اصلا الموضوع كان ايه

قول في نفسك اللي عصبني ده ميسواش انا صحتي الاهم

عايز تجنن اللي غاظك

خلييييك باااااااااااااااارد

وصفة هايلة جدا بجد، بس مش عارف ليه بعد شوية من قرائتى لها إفتكرت مشهد عبد المنعم مدبولى وهو بيعالج المريض "الاوزعة" وخلاه يمش ويقول "أنا مش قصير .. أنا طويل وأهبل ..أنا مش قصير .. أنا طويل وأهبل".

أرجو عدم أخذ كلامى على إنه إستخفاف برأيك .. هذه فقط خاطرة والله.. نهارك فل :unsure:

[abo 3ali]

بمناسبه العصبيه فدى اعتقد ان ليها خلفيات وراثيه و ناتجه برضه من البيئه اللى اتربى فيها الانسان و بعدين لاختياره . يعنى ايه لاختياره . انا شايف ان البنى ادام نفسه هو اللى بيختا و بيتكيف و بيبقى عاجبه انه يكون عصبى و مصدر ازعاج او رعب او اهتمام للاخرين . معرفش ده رايئى

لكن استحاله الحياه تمشى بالعصبيه المطلقه او بالبرود المطلق . لكن فى حاجات ساعات لازم تخليك عصبى غصب عنك و صعب انك تمسك نفسك لكن تبص على التوتال انت هادى ام بارد ام عصبى ام سريع التاثر .. طيب الدرس النبوى البليغ فى الغضب معظمنا عارفينه لو قاعد اقف و لو واقف اقعد او قوم اتوضا او سيب المكان

المشكله عندى هى برودى الشديد و هدوئى الاشد فى مواجهه المواقف المختلفه بس مش معنى كده انى تمبل او معنديش احساس . بالعكش هى مدرسه انت اللى بتختارها و قرارك بياثر عليك طول عمرك .. تحب تكون هادى و بارد و تخلى اللى ادامك يتنرفز و لا تحب تكون نار و حريقه و تاكل فى اعصابك .. نقى انت و اتحمل تبيعيه قرارك

انا مراتى عصبيه و على طول بتتنرفز بس من جوه طيبه و قلبها ابيض و ده اللى الواحد يبص عليه . انا بالنسبه لها ماساه حياتها لانى بارد جدا و هادى جدا .. طيب لو احنا الاتنين عصبين كنا اطلقنا بعد اسبوع . و لو احنا الاتنين باردين الحياه مالهاش طعم و مفهاش سبايسى . قصدى اقول ان الاتنين لازم يكونوا موجودين طالما وجدت الحياه علشان البلانس يحصل ..

العصبيه بتضر صاحبها و صحته و بتخسره حاجات كتير و ناتجه عن عدم تحكم فى الاعصاب

الهادى و البارد من بره الطف بكتير بس ساعه لما تحتاج عصبيه و زغيق و صوت عالى حاضرين يا ابويا بس بكنترول و هو ده الذكاء

[Lembic]

العصبيه بتضر صاحبها و صحته و بتخسره حاجات كتير و ناتجه عن عدم تحكم فى الاعصاب

الهادى و البارد من بره الطف بكتير بس ساعه لما تحتاج عصبيه و زغيق و صوت عالى حاضرين يا ابويا بس بكنترول و هو ده الذكاء

إشطة يا باشا :closedeyes: