ممكن تساعدوني فى إختيار موضوعات للنشر

[ريهام]

بسم الله الرحمن الرحيم

اولا احب احيكم على المنتدى الجميل دا لانه بجد فى مواضيع متنوعة وحلوة كتير انا عضو جديد هنا اسمي ريهام وعندي 20 سنه انا كنت طالبة مساعدتكم اذا سمحتوا انا محررة في جريدة في محافظة الشرقيه انا اصلا بدرس اعلام وبكتب فى الجريدة دي اسمها البلاغ انا كنت بتمنى لو ممكن تساعدونى فى اختيار المواضيع الى مكن اكتبها فى الجريدة دي كمان لو فى حد عنده مشكلة او قضية ممكن تكون موضوع صحفي كويس اتمنى انه يبعتهولى انا عارفه انى بطلب طلب غريب لكن دي مساعدة لية في بداية حياتى واتمنى انى اكون عند حسن ظن اي مواطن هيساعدنى وشكرا جدا لكل الى اهتموا بية

تم تغيير العنوان ليعبر عن المحتوى

تم تعديل 3 فبراير 2006 بواسطة عادل أبوزيد

[se_ Elsyed]

مرحباً بالزميلة الصحفية ريهام ..

على فكرة أنا أيضاً من محافظة الشرقية ومن بلد بين الزقازيق ومنيا القمح ولكن إدارياً هي تبع منيا القمح .

بالنسبة للمواضيع .. عندك المنتدى مليان .. إدخلي وعبي زي مانتي عايزه - بس حقوق الطبع محفوظة ولازم تكتبي إنها منقولة من منتدى محاورات المصريين .. للأمانة يعني -

وده هايبقى حسب ميولك .. يعني لو بتكتبي في السياسة يبقى عندك باب لاسياسة الداخلية ومحاربة الفساد .. إلخ ... بس بلاش إنتخابات الرئاسة لإن المولد إنفض ..

ولو بتكتبي في موضوعات عامة متنوعة يبقى عندك باب المواضيع الجادة وباب الأسرة والطفل والموضوعات الخفيفة ..

حددي إنتي ميولك وممكن نساعدك في إختيار المواضيع .

[لخبطه]

الأخت ريهام أهلا بيكي في محاوارات المصريين

وبالنسبه للمساعده اللى بتطلبيها فحابب أقولك على شىء ومهم وهو أنك المفروض هتكوني صحفيه وعلشان تكوني صحفيه ناجحه لازم تكون موضوعاتك وليده خيالك وفكرك يعنى أنتى اللى تخلقي الفكره ودا طبعا نتيجه تأثرك باللى حواليكي يعني وانتى في الشارع لو شوفتي أي حاجه فكري فيها بعقل الصحفيه وانتى هتلاقي مليون موضوع ينفعوا للكتابه و على النت ملايين المواضيع لكن هيكون غير مفيد ليكي نقل موضوع معين لكن تقدري مثلا تخلى خبر معين مفتاح لموضوعك لو فكرتي في الخبر وفي مدلولاته بروح وعقل الصحفيه ........... وبتوع الصحافة بيقولوا ليس الخبر أن يعض الكلب رجلا لكن الخبر ان يعض الرجل كلباً والمقصود واضح طبعا موفقه ان شاء الله

[المدهش]

أهلاً بك أيتها الصحفية الواعدة ..أنا كمان عضو جديد في المنتدى ..وسعيد جدا بالمشاركة فيه ..ويسعدني مساعدتك فأنا أعمل بالصحافة منذ سنوات طويلة وخريج إعلام القاهرة قسم صحافة ، وأعمل الان في إحدى الجرائد الخليجية ، لذلك فليس هناك أي نوع من المنافسة وعندي بالفعل أفكار كثيرة لكني لا أعمل الآن في مصر حتى أنفذها..وإليك الفكرة الأولى ..يمكنك عمل تحقيق خفيف بمناسبة موسم الامتحانات عن الطرائف والغرائب التي يكتبها بعض الطلاب في أوراق الاجابة وذلك بالاتصال بعدد من أساتذة الجامعات وسؤالهم عن أغرب ما قرأوه في أوراق إجابات طلبتهم..

لمزيد من التواصل راسليني على هذا العنوان البريديREFAT20032003@YAHOO.COM

[ريهام]

انا متشكرة قوي لكل الى اهتموا وردو علية بس انا حبيت اوضح حاجه للخبطة الى قال انى المفروض انا الى ادور وهو فعلا معاه حق انا كصحفية الفروض انا الى ادور عن الخبر لكن انا لما اشتركت فى المنتدى وطلبت المساعدة دا كان طريقه بدور فيها على الاخبار لكن مش معنى كدة ان دي طريقتى الوحيدة انا اقصد انها احدى الطرق مش كلها اتمنى ان قصدي يكون واضح وبشكره برضه على انه حب يلفت نظري للمعلومه دي اما عن الصحفى (المدهش)انا فعلا عجبنى قوي الفكرة الى حضرتك طرحتها واتمنى انى اقدر انفذها وانا بعد اذنك اخدت اميلك عشان اقدر استفيد من خبرتك كرجل اعلام..بالنسبة بقى se elsayd فانا بشكره جدا على الدعم دا واتمنى بجد انى اكون عند حسن ظن الجميع لانى فعلا نفسي ابقى حاجه كويسه فى يوم من الايام....

[Almaistrow]

تحيتى الى جميع من بالمنتدى (محاورات المصريين)

وانا عضو جديد اوى وسعيد بانضمامى بة وتحية خاصة للاعضاء الشراقوة

وبالنسبة للاخت الصحفية((ريهام)) وبما انها من المحافظة وللاخ / سى السيد بعد اهدائى لة التحية

اتكلم عن محافظة الشرقية واخص الزقازيق العاصمة:

اتمنيت من ربنا فى مرة من المرات يوعدنا بمحافظ خريج فنون جملة او تطبيقية او تربية فنية وهنا فهمتم مااقصد لان المدينة خالية تماما من الناحية الجمالية نهائيا ولخبطة مرور ولخبطة طرق اليس هذ الموضوع يستاهل. المدينة لاتقع على نيل مثلا كالمنصورة او مصيف على بحركمحافظات كثيرة على الاقل نعوض هذا فى الناحية الجمالية .حبيت اشارك براى شخصى واشكركم جميعا وتحية وسلام

[وليد صفوت]

أهلاً و سهلاً بالأخت العزيزة ريهام ....

مرحباً بيكى و أتمنى لكى و للأعضاء الجدد Almaistrow .... و المدهش إقامة طيبة بيننا ... :blush:

طبعاً البيت بيتك و ممكن تختارى أى موضوعات تكتبى منها , و أعتقد ان باب الموضوعات الجادة و الموضوعات الخفيفة سيكونان بداية طيبة لكى .....

إختراى ما تشائين و لكن للأمانة - كما قال لكى سى السيد - يجب كتابة انه منقول من المحاورات ....

اتمنى لكى كل التوفيق .... :blush:

[عادل أبوزيد]

بسم الله الرحمن الرحيم

اولا احب احيكم على المنتدى الجميل دا لانه بجد فى مواضيع متنوعة وحلوة كتير انا عضو جديد هنا اسمي ريهام وعندي 20 سنه انا كنت طالبة مساعدتكم اذا سمحتوا انا محررة في جريدة في محافظة الشرقيه انا اصلا بدرس اعلام وبكتب فى الجريدة دي اسمها البلاغ انا كنت بتمنى لو ممكن تساعدونى فى اختيار المواضيع الى مكن اكتبها فى الجريدة دي كمان لو فى حد عنده مشكلة او قضية ممكن تكون موضوع صحفي كويس اتمنى انه يبعتهولى انا عارفه انى بطلب طلب غريب لكن دي مساعدة لية في بداية حياتى واتمنى انى اكون عند حسن ظن اي مواطن هيساعدنى وشكرا جدا لكل الى اهتموا بية

تم تغيير العنوان ليعبر عن المحتوى

<{POST_SNAPBACK}>

الفاضلة ريهام

أولا هنا فى محاورات المصريين الكثير من الموضوعات التى يمكننى أن أقترحها عليك و ربما موضوعك هذا فتح أمامى فكرة من أجل الأعضاء الجدد (حوالى 550 عضو) و نستطيع جميعا أن نشارك فيه عن طريق تصفح و إختيار بعض الموضوعات القديمة أو فلنقل الموضوعات الجيدة مع ملخص مختصر لمحتوى الموضوع و لنسمى هذا الموضوع مختارات شخصية من محاورات المصريين.

ما سبق كان إستهلالا لابد منه

أعدت قراءة موضوعك و عندى عدة تساؤلات عن طبيعة الموضوعات التى يسمح لك بالكتابة فيها أو التى تريدين الكتابة فيها هل تريدين أفكار لموضوعات جديدة ؟ هل يمكنك الكتابة فى السياسة ؟ هل موضوع مثل خميس و البقرى قد يستهويكى و قد يجذب إهتماما كبيرا و من خلاله تستطيعين قول الكثير و فى نفس الوقت أنت فى أمان لأنك تكتبين تاريخ لايذكره أحد

خميس و البقرى البداية الحقيقية - بداية السقوط هى زرع الخوف تحت الجلد

ليتك تحادثينا ببعض التفاصيل ....

و أدعو الله أن يوفقك

[منتديات]

أهلا بكِ في المنتدى..

بداية شيء جميل أن نرى إعلامية من إعلاميات المستقبل حريصةً على أن تطوّر نفسها بنفسها، وأن تستشير الناس لمعرفة القضايا التي تمسّ احتياجاتهم..

بخصوص مواضيع هذا المنتدى، فلا أنصحك بأن تنقلي منه (أعني لا تدخلي موضوعا ما ثم تنقلي ما فيه من مشاركات) ، لأنّك حينئذ تقتلين موهبتك بالنقل من آخرين، فضلا عن صعوبة الرجوع للكاتب حين حاجة جهة تحقيق مثلا أن تتحقق من معلومة معينة، اللهم إلا إذا قررت تخصيص موضوع عن منتدى حوارات المصريين:angry2:..

المواضيع التي يمكن لي أو لغيري اقتراحها كثيرة ومتعددة، لكن ثقي تماما أنّ المواضيع هي التي ستفرض نفسها عليكِ عبر المواقف والتجارب في الحياة، قد تتعرضين لموظفة غلسة في مصلحة حكومية، فتجدين نفسك لا إراديا تتجهين لعمل تحقيق عن آراء المواطنين وتجاربهم مع المصالح الحكومية، ليس للتشهير بتلك الموظفة، وإنما لإطلاع الرأي العام –وقطاع الموظفين منهم بطبيعة الحال- على مشاعر الآخرين إزاء ما يواجهونه، مع عرض نماذج إيجابية وسلبية..

في الواقع مهنة الصحافة-أعني مهنة المتاعب كما يحلو للبعض تسميتها- سلاح عظيم ووسيلة كبرى في تحقيق الأهداف النبيلة طالما كان الصحفيّ ملتزما بالقيم الدينية والضوابط القانونية والمثل الأخلاقية..

قد تقومين بإجراء تحقيق صحفي عن قطار متهالك، فتتحرك الجهات المسؤولة لتدارك الوضع، فيكون لك الأجر والثواب من رب العباد، قد تثيرين قضية لمجموعة من الناس هضمت حقوقهم ، فيكون ذلك سببا بعد الله لإرجاع الحقوق لأصحابها..

وعموما ربما لو أفدتِنا بـطبيعة موضوعات الصحيفة، أو طبيعة الموضوعات التي تودّين الكتابة فيها، فلأمكن للسادة والسيدات هنا –وخصوصا أهل الشرقية – أن يقترحوا مواضيع تختارين منها ما يناسبك..

وتقبلي تمنياتي لك بالتوفيق.

[MZohairy]

والله ياأخت ريهام ان مصر مفيش أعجب من مواضيعها

ابدا

وده من أعجب المواضيع اللي الواحد ميلاقيش زيه ابدا:

أحوال الحاصلين على المركز التاني والثالث في انتخابات رئاسة جمهورية مصر العربية

الثاني رسب في دخول مجلس الشعب ثم حصل على عضوية في السجون المصرية لمدة 5 سنوات

والثاني تم طرده من حزبه وتم عزله من رئاسته

والله موضوع حيكسر الدنيا

بس احتمال تصبحي يوميا على الأستاذ أيمن نور !!!!! :angry2:

[ريهام]

بسم الله الرحمن الرحيم

انا متشكرة جدا لكل الى شاركنى برأيه بصراحه مكنتش متخيلة ان ممكن حد يهتم بموضوعى دا اصلا خصوصا ان دي اول مرة اشترك فيها في اي منتدى ..انا كنت طلبت منكم مساعدة صغيرة بس انتو بجد خلتونى اتشجع اكتر وبقى عندي رغبة اقوى انى احاول ابقى حاجه كويسه فى المجال دا بس ياريت تدعولى ..

[khedr]

هي دي فعلا قيمه المحاورات واهدافها

الافكار الجديده الاراء المختلفه التي يحترم كل منا الاخر

الخلافات التي لا تخرج عن كون كل منا يعبر عن فكر واعتقاد قابل ان يناقش مع الاخرين ويعود الي الاخرين

الجميع اهلا بكم

الاخت الكريمه ..اعتقد لو ان كانت الجريده في داخل المحافظه الشرقيه

ركزي اكثر علي المحافظه نفسها ..تاريخها ..موقعها ..صناعاتها ...زراعتها.. الادب والادباء بها ...وهكذا كما ترين مواضيع خاصه لاهل المحافظه وايضا للاخرين الذين يريدون ان يعرفوا عن المحافظه

و ايضا المشاكل التي تواجه الناس في المحافظه وخصوصيتها بالنسبه للمحافظه او عموميتها مع باقي المحافظات

وبعد ذلك لكي الحق في المواضيع العامه حسب اهميه الموضوع وارتباطه بالمحافظه او ارتباطه بالناس بصفه عامه ..

و املُنا في الكلمه الصادقه المعبره عننا حميعا