الخصوصية على الانترنت !!

[مصرية الهوى]

الأسبوع اللي فات قرأت رواية دان براون " الحصن الرقمي " كان يتكلم عن وكالة اسمها " وكالة الأمن القومي" وأن هذه الوكالة تملك كمبيوتر ضخم من ملايين المعالجات اسمه الترانسلتر ، وتكلم عن إطلاعهم على كل ما يوجد في الانترنت ، حتى معلومات الأشخاص العاديين ، من أجل مكافحة الإرهاب .. على حد قولهم !!

أنا لا أعرف إذا كان بالفعل هناك هذه الوكالة ، وهل كلام الكاتب عنها حقيقة أم محض خيال ..!!

لكن ما يهمني هنا .. نقطة الخصوصية في الانترنت ..!!

هل بالفعل هناك رقابة كاملة لكل شيء في الانترنت ..

هل فعلاً أن ايميلات الأشخاص العاديين مراقبة ؟؟ .. ويتم الإطلاع عليها من قبل مؤسسات استخباراتية ..!!

يعني مثلاً CIA أو أي وكالات استخباراتية أخرى تراقب كل شيء في الانترنت .. حتى إيميلاتنا و دردشاتنا .. !!

التليفونات أعتقد أنها مراقبة بالتأكيد .. ولو من مخابرات داخلية .. والنت كذلك .. بالتأكيد أنه مراقب داخلياً ..

لكن على مستوى دولي .. هل فعلاً مراقب .. كل شيء ... كل شيء ؟؟

حتى لو أتكلم مع صاحبتي على MSN مثلاً :rolleyes: ..

طيب ... لو تركنا المراقبة على مستوى دولي ..

أعتقد أن كل شيء أصبح مكشوفاً في النت ..

اختراق كمبيوترات الناس العاديين .. أصبح سهلاً من قبل ناس عاديين أيضاً ..

وعشان كذا أنا لا أترك أي شيء خاص على الكومبيوتر ..

سرقة الايميلات .. وقراءة محتوياتها .. أصبح عملاً سهلاً ..

البريد الخاص في المنتديات .. مكشوف أيضاً ..

باختصار .. الخصوصية على النت مجرد كذبة :unsure: ..

لا يوجد شيء خاص بك على النت ..

كلمة private أو personal لا محل لها من الإعراب في عالم النت ..

قلت ماشي .. يا CIA .. رحت فتحت الفولدرات اللي على ايميلاتي .. وقعدت أقرأها ..

ما هي أكيد الـ CIA قرياها كلها :D ..

وفسطت من الضحك .. هيلاقوا ايه يعني .. خناقات مع صاحباتي ..

والا دردشات مع بنات خالتي .. كلها عملنا ايه ورحنا فين .. :D

يعني هيعوزوا مني ايه ..

ما يسيبوني في حالي بقى :) ..

( وحده واثقة ان CIA مهتمة بيها .. ماورهاش شغل غيرها :) )

ياجماعة قولوا لي اعمل ايه ..

طالما كل حاجه متراقبة ..

هأتعامل ازاي مع بن لادن ..

أصله باعت لي من كم يوم يقولي اتعاون معاه ..

وانا لسا مبعتلوش خايفة أحسن CIA تكون بتراقبني ..

أصلي من كم يوم كل ما اخرج من البيت بشوف واحد لابس نضارة سوداء B) ..

ومعاه جريدة مخرومة .. وبيمشي ورايا ..

لا بجد والله ..

ما رأيكم في موضوع الخصوصية على النت ؟؟

[wagdi]

الأخت جيجي...

أه فيه وكالة الأمن القومي، وده موقعها...http://www.nsa.gov....خشي وملي عنيكي...

وأه بيتجسسوا على كل حاجة...أو بعنى أصح يقدروا يتجسسوا على كل حاجة...إنترنت تليفونات موبايلات...كله...

بس طبعاً مش كل ما بتكتبي حاجة على النت فيه واحد قاعد بيقراها...بس بتتخزن علشان لو إحتاجوها يلاقوها...

وطبعاً فيه triggers ممكن تخلي المراقبة تبدأ أوتوماتيكياً... يعني مثلاً أرفعي سماعة التليفون وقولي مجموعة كلمات زي: أسامة - قاعدة - قنبلة - أمريكا - بوش...تضمني إن المايكروفون معاكي وإن المكالمة بتتسجل...

أما بقى الإنترنت فسعادتك الموضوع أسهل بكتير...يعني مثلاً اي حاجة وكل حاجة أي واحد وكل واحد بيكتبها في Google مثلاً بتتخزن في الdatabase بتعاتهم... حتى الإيميل من جوجل والمواقع إلى بتفتحيها... وكذلك معظم برامج الشات المعروفة... وطبعاً تخزين كل الكميات المهولة دي من المعلومات بتحتاج فلوس...والفلوس بتيجي من دعم مادي وتقني من شركات ومؤسسات عسكرية امريكية ومنها الNSA...وبالمقابل يكون لها القدرة على الحصول على تلك المعلومات...

أما عن موضوع بن لادن فمش محتاجة تقلقي...مدام هو إلى عرض عليكي التعاون معاه...إنتي تشوفي رقم تليفون الNSA من موقعهم وتكلميهم ، وهما حايحولوكي على أسامة في مكتبه هناك...

تم تعديل 31 يناير 2006 بواسطة wagdi

[مصرية الهوى]

لا بقى ده الموضوع طلع جد !!

والله العظيم حاجة تفرس :)

لا ياسيدي انا مش هأروح لهم ..

احسن يكلبشوني ومقدرش اخرج .. بس هابعتلهم ميل واقولهم

قولوا لابن لادن .. امضي ونحن مش هنمضي ورائك :rolleyes:

الحاجة الوحيدة اللي الواحد يعملها وهو مطمن . التفكير .

الا لو كانت امريكا هتعمل لنا مصيبة تشوف احنا بنفكر بايه :)

[wagdi]

الحاجة الوحيدة اللي الواحد يعملها وهو مطمن . التفكير .

الا لو كانت امريكا هتعمل لنا مصيبة تشوف احنا بنفكر بايه  :)

<{POST_SNAPBACK}>

مين قال كدة... هو أنتي لما بتفكري في حاجة مش بتحتاجي مصادر للمعلومات تبني عليها هذا التفكير...والمصادر حتبقى إيه... كتب، تلفزيون، أفلام، صحف... أما في الدول إلى زي حالتنا فالموضوع سهل لأن معظم هذه المصادر محكومة ومراقبة وتظهر ما يريدون إظهاره وتغفل ما تريد إغفاله...وبالتالي فالموضوع بيجي من المنبع إلى هو عقلك، يعني بتوجيه كل وسائل المعرفة لرسم حدود معلوماتية لعقلك لا تستطيعين الخروج عليها في تفكيرك...ولو تمردتي على هذه الوسائل فلن تجدي أمامك إلا منظمات وجماعات ذات توجه فكري معين عادة ما تكون تحت الميكرسكوب الأمني وإلى داخل فيها وإلى بيسمع لها معروف وتحت السيطرة...

نيجي بقى على دول الحرية والتعبير والديمقراطية والكلام النميس ده... الموضوع بيتم بطريقة تانية... يعني مثلاً لو إنتي عايشة في أمريكا وانا عايز اعرف إنتي بتفكري في إيه اليومين دول، أولاً أقدر أشوف كل إميلاتك وملفاتك وإلى بتقوليه في الشات والمواضيع إلى بتكتبيها وبتشاركي فيها في المنتديات مثلاً وده حيديني فكرة كويسة أوي عن شخصيتك والإتجاه العام لتفكيرك ورأيك في قضايا معينة وكدة... وبعدين حاشوف المواضيع إلى بتبحثي عنها في مواقع البحث زي جوجل وياهو وغيرها... وبعدين الكتب إلى استعرتيها من المكتبة... فلو فتحتي دلوقتي كذا موقع عن وصفة شوربة الجبنة الرومي حاعرف إنك بتفكري في هذه اللحظة إنك تطبخي شوربة الجبنة الرومي...أروح عامل سكان على حركة كروت إئتمانك البنكية حاتديني لستة بتقريباً كل إلى انتي أشتريتيه... ألاقي إنك أستعرتي كتاب "رجيم الجبنة الرومي" و"اسرار شوربة الرومي"...وكمان اشتريتي من EBAY كتاب "كيف تنقص وزنك في عشرة ايام" واشتريتي من السوبرماركت كميات كبيرة من مكونات الشوربة وفواكه ووجبات جاهزة منخفضة السعرات، واستعرتي من نادي الفيديو أفلام يغلب عليها الطابع الرومانسي والدراما الهادئة واشتريتي بنزين للعربية كذا مرة من بنزينة بجوار إحدى المتنزهات الرياضية... كل ده بيديني فكرة إنك اليومين دول تفكيرك منصب على تخسيس وزنك وإنك تتبعين رجيماً وأنك جادة في الأمر... ومش حاحط عليكي label لأنك ببساطة إنسانة عادية بتفكري في أمور حياتية بسيطة وليس من المحتمل أن شخصاً غرقان في التفكير في الرجيم وشوربة الجبنة الرومي إنه يمثل خطراً على الأمن القومي...وكل المعلومات دي بتتخزن وتحدد نمط تفكيرك وإهتماماتك... بس بقى لو مرة واحدة المعلومات إلى جايالي اظهرت تغيير فجائي في هذا النمط...يعني فجأة أصبحت الكتب التي تستعيريها من المكتبة من عينة "معجم الأنفار في جهاد الكفار" وأشتريتي فيلم "إنتصار الإرادة"، والمواضيع التي تبحثين عنها في النت من عينة "كيف تصنع قنبلة في مطبخك" و"منزلة الشهيد في الجنة"، وأظهرت حساباتك إنخفاض ملحوظ في مصاريفك على السلع والخدمات الترفيهي... ده حايديني إشارة لتحول دراماتيكي في تفكيرك...وساعتها حاحطك تحت الميكرسكوب...إما يثبت انك فعلاً متجهة إلى شئ ممكن يضر بالأمن أو إنك مجرد بتعملي بحث دراسي عن هذه المواضيع ومكتئبة حبتين...

وطبعاً كل ده بيتم أوتوماتيكياً بواسطة برامج متفوقة جداً وكمبيوترات ضخمة جداً...

والشاهد إن ما تفكري فيه وتظني ان لا أحد يمكن أن يعرفه هو في الواقع سهل جداً في إستنباطه والمهم من وجهة النظر الأمنية ليس فيما تفكرين فيه تحديداً وإنما نمط هذا التفكير ومقدار وإتجاه التحولات فيه...

[tarek_almeghallawy]

حرام عليك يا أستاذ وجدي

أنت قفلتها علينا مفيش مفر

أمال ليه ما عرفوش إن البرجين ها يطيروا

وليه ما عرفوش فين أسلحة الدمار الشامل

وليه ما عرفوش أن أحمد الجلبي ضحك عليهم

وإذا كان بن لادن عندهم برضه الزرقاوي وعزة إبراهيم عندهم

والأسلحة الذكية اللي بتنزل في بلد تانية

وهيك......وهيك

ربنا الحافظ

[wagdi]

حرام عليك يا أستاذ وجدي

أنت قفلتها علينا مفيش مفر

أمال ليه ما عرفوش إن البرجين ها يطيروا

وليه ما عرفوش فين أسلحة الدمار الشامل

وليه ما عرفوش أن أحمد الجلبي ضحك عليهم

وإذا كان بن لادن عندهم برضه الزرقاوي وعزة إبراهيم عندهم

والأسلحة الذكية اللي بتنزل في بلد تانية

وهيك......وهيك

ربنا الحافظ

<{POST_SNAPBACK}>

يا سيدي بالراحة عليا...:blush:

ومين قال إنهم ماكنوش عارفين إن البرجين حايطيروا...

ومين قال إنهم مش عارفين إن مافيش أسلحة دمار شامل أصلاً...

ومين أحمد الجلبي ده.؟؟؟ :blush:

ومين قالك إن الاسلحة الذكية دي ذكية...لأنك لو عايز توصفها بدقة يبقى نقول أسلحة ذكية تجريبية....يتم إستخدامها لأول مرة في قتال فعلي.. وليه دايماً الأسلحة الذكية لما بتغلط تقوم نازلة على مبنى الجزيرة أو تقتل مراسلين صحفيين...ليه لما بتغلط مابتنزلش على اي خرابة...

وأخيراً بالنسبة لبن لادن والظواهري وصدام فأنظر كده وتمعن مين إلى إستفاد من تصرفاتهم في النهاية...

وعلشان ماتفهمنيش غلط أنا لا أتبنى نظرية المؤامرة في كل شئ ولا ما اشرت حضرتك إليه هو موضوعنا هنا...

فالأخت جيجي كانت تتسأل عن مدى تعرض خصوصياتنا للأجهزة الإستخبراتية والأمنية...وانا شاركت برأيي المتواضع على هذا السؤال تحديداً... ولم أتعرض لكيفية توظيف هذه المعلومات لأغراض أستراتيجية...

زي الشطرنج كده... هي بتسأل الحصان ممكن يتحرك كده؟ فانا بأقولها أه ممكن...لكن لم أقل لها إن الحصان لو إتحرك كدة مع وجود باقي القطع في المواضع الفلانية وقطع الخصم في المواقع العلانية ممكن يؤدي بعد كذا خطوة لمكسب أو خسارة...

تحياتي...

[مصرية الهوى]

ياخرااشي ..

كل ده ..

بس والله تفكير عبقري ..

أنا هأستخدمه مع الناس اللي حواليا .. واكتشف هما بيفكروا بإيه ..

عشان يخافوا مني :blush:

بس والله يا أستاذ وجدي .. اسمح لي احيي حضرتك على معلوماتك القيمة

وعلى تفكيرك العبقري ماشاء الله :wub: ( عيني عليك باردة :blush: )

[tarek_almeghallawy]

مع الاعتذار لجيجي

الله يخليك يا أستاذ وجدي اوعى تزعل مني

والله ما أقصد اختلف معاك

كل الحكاية مش عايزين نضخم فيهم لحد ما يسدوا علينا مجال الرؤية

الجلبي أو الشلبي اللي أوهم بوش بحكاية أسلحة الدمار الشامل وبعدين شال كل المعلومات وراح بيها إيران وقلبت عليه أمريكا بعد ماكان حليف وصديق شخصي

أعلم جيداًأنهم لا يحتاجون إلى من يوهمهم وعارفين بيعملوا إيه

الصواريخ الذكية مش كلها ذكية ...فاكر الصواريخ اللي انضربت على العراق من البحر الأحمر كان عندها حول ووقعت في السعودية

ولا قنابل كهوف تورا بورا اللي شفطت الهوا من الكهوف وقضت على القاعدة

أنا مش مختلف معاك طبعاً الحصان ممكن يتحرك كده لكن العساكر الغلابة لو مرصوصين صح مش ممكن الحصان يتحرك من مكانه وإلا يتاكل

تقديري وتحياتي وإعجابي بطريقة تفكيرك المنظمة والمركزة

واوعى تزعل مني

[wagdi]

الله يخليك يا أستاذ وجدي اوعى تزعل مني

والله ما أقصد اختلف معاك

<{POST_SNAPBACK}>

يا راجل ياطيب زعل إيه بس ده إحنا بنهزر... ربنا مايجيب زعل يارب...

وبعدين ما نختلف يا سيدي...يعني هو إحنا حانختلف على إيه يعني...:blush:

أهو كله كلام مصاطب عن اسلحة لا نمتلكها وتكنولوجيا لا نعرفها وأناس لا إحنا فهمينها ولا ناويين نفهمها... :blush:

سيبك إنت....قول يا باسط...

[wagdi]

الأخت جيجي....

ربنا يكرمك بلاش استاذ دي... :blush:

انا كل إلي حيلتي 29 سنة ولسة مكملهم الأسبوع إلى فات...

ومحادش عبرني وقال لي كل سنة وأنت طيب...

:blush:

أينعم مش حاطط تاريخ ميلادي...بس برضه مايمنعش... :wub:

[الأفوكاتو]

كل سنة و أنت طيب يا أخى وجدى.

و عقبال مئة عام و نيف. :blush:

تم تعديل 2 فبراير 2006 بواسطة الأفوكاتو

[مصرية الهوى]

الأخت جيجي....

ربنا يكرمك بلاش استاذ دي... :sad:

انا كل إلي حيلتي 29 سنة ولسة مكملهم الأسبوع إلى فات...

ومحادش عبرني وقال لي كل سنة وأنت طيب...

:blush:

أينعم مش حاطط تاريخ ميلادي...بس برضه مايمنعش... mfb:

<{POST_SNAPBACK}>

أول حاجه كل سنة وأنت طيب .. والهدية في السكة :P انت هات العنوان بس ..

ثاني حاجة 29 :wub:

أكيد بتهزر :blush:

ما أنا افتكرتك في مقام الحاج الوالد .. يعني حاجة وخمسين كده ;)

مش عارفه ليه :D

[last_Samurai]

فيه حاجه اسمها SNIFERING

وللعلم ان عمليه التجسس على الاشخاص على الانترنيت مبقتش صعبه واللى اقدر اقوله

مره سـالوا بيتر نورتون وهو احد خبراء التشفير فى العالم

لوعاوز تحمى خصوصيتك من التجسس تعمل ايه

قال احط جهازى فى مكان مش متصل بالنت

وشكرا