دا بجد ولا كلام افلام

[ريهام]

اسمحولى اطرح عليكم الموضوع دا واتمنى ان الرد عليه يكون صريح جدا..طبعا احنا حاليا عايشين فى مجتمع الى حدما مفتوح وقليل مننا الى وصل سن 25 سنه من غير اي تجربة حب لكن مش هى دي الفكرة الفكرة ان فى ناس عاشوا قصص حب مأساوية كتير انتهت بعضها بجرح فى المشاعر واحساس بالضعف والاهانه والاكتر من كدة فى منها انتهى بان البنت فقدت عذريتها وان مكنش كدة ممكن تكون على الاقل حد لمسها؟؟؟

يمكن تكون عملت كدة تحت اسم الحب ويمكن تكون فعلا اتظلمت لانها كانت مصدقه الشخص الى كانت مرتبطه بيه بدون الخوض فى النواحي الدينيه ومن غير منتكلم فى الحلال والحرام انا عايزة اسال سؤال لو انت بتحب واحدة بجد واكتشفت ان هى كانت مرتبطه بواحد قبل كدة وحصل بينهم اي حاجه سواء كبيرة او صغيرة هتعمل ايه وانت واثق فعلا انها بتحبك انت دلوقتى؟؟السؤال التانى ياترى فى واحد بيحب واحدة بجد وممكن يقرب منها ويلمسها ؟؟هل الى شفناه فى فيلم مذكرات مراهقة دا حقيقي وفى فيلم ويجا الجديد دا وموقف هاني سلامة كان واقعى يجماعه الموضوع دا مهم جدا بالنسبةلي لانى بفكر فية من فترة ارجوكم تحاولوا تجاوبونى....

[dr khaled]

موضوعك حلو اوي ياريهام

بالنسبه ليه فانا حبيت جامد جدا ايام الجامعه و كانت زميلتي خام جدا جدا

كانت تربيه خام وانا كنت حريص علي نجاح التجربه ونقاءها فلم يحدث شيي

و قد غالبت نفسي كثيرا و نجحت

اما بالنسبه للسؤال الثاني فهو صعب حدا

لا احد يرضي الارسباط بواحده فقدت عدريتها ((ممكن بس بعد مايحس فعلا فعلا انها ضحيه و بريئة ولازم يكن حبها واتعلق بيها)))

من الافضل ان لا تحكي المراه لزوجها عن مغمارتها و شقاوتها

شكرا علي الموضوع الظريف

[khedr]

معلهش.... ...

مناقشه الموضوع كده فيها سرعه شويه

احنا كده تركنا كل الاساسيات في موضوع العلاقات بين اي طرفين ونناقش مضاعفات او اخطاء اونتائج علاقه او قصه او جرح او كما يسمي

يهيأ لي من وجهه نظري الشخصيه...ان نبحث ونناقش

اساس العلاقات بين الطرفين

ماهو المسموح والغير مسموح

كيف تتم العلاقه ..ومدي امتدادها

ومن يحاسب تلك الاطراف ويوجهم الي الصحيح

من رأيي ان نناقش الموضوع اولا ثم نناقش النتائج

ولنستفيد من اساتذتنا واخواننا في المنتدي

لتعود الينا المفاهيم التي غيبتها وسائل الاعلام عنا ..

ونبتدي نكون ارائنا ومعتقداتنا وثقافتنا بصوره تناسبنا وتناسب اختي واخي

[se_ Elsyed]

ممكن أقول رأيي لو سمحتم ( وش واحد عايز يطنطط عشان عدا مرحلة الحب والحاجات دي ... ويالله حُسن الختام )

أولاً : مافيش حد بيحب بصحيح ويرضى أي أذى للي بيحبه ...وكلنا أو بعضنا مرينا بالمرحلة دي .. منها التسالي - إحنا قولنا بقى خلاص اللي فات مات لكن ده كان غلط بلا جدال -

ومنه الجد جداً واللي الواحد فيها كان بيخاف على حبيبته من الهوا الطاير .

ثانياً : موضوع التجاوزات في مرحل الحب وأقولها بصراحة .. بيتحكم فيها الشاب بشكل كبير لإن الشباب وخصوصاً في مجتماعتنا العربية الشرقية عنده الفرصة إنه يخوض تجارب عديدة ومختلفة وفي سن مُبكرة كمان... يعني يمكن على ما يوصل الجامعة يكون حب له إتنين تلاتة في الطريق ... ولما يوصل لمرحلة الحب الحقيقي - لا مؤخذه يا محمد يا فؤاد - ممكن الفتاة اللي حبها تكون لسه خارجه من بيتهم إمبارح لوحدها وما تعرفش الألف من النوكيا 6600..... آه ممكن حد يقولي يا عمممممم رووووووح ده كان على أيامكم يا جيل لولاكي وحرب الخليج .. أما جيل النت والميسدات والمولات والروشنة فيودوك البحر ويجبوك عطشان .... لكن أنا هنا أتحدث عن قاعدة وليس إستثناء .. فعلى أيامنا اللي هي التسعينات يعني كانت في بنات كده ... وهما دول بقى بتوع تسالي يا لب وده مش موضعنا .

ثالثاً : هناك قاعدة لازم الجميع يعرفها في حياتنا الشرقية وهي " المرأة تغفر .. لكن الرجل مُستحيل أن يغفر " سموها زي ما تسموها .. جبروت ، مجتمع ذكوري ، رجال سي السيد - لا مؤخذه يا حاج - إنما ده واقع ولا أعتقد إنه هايتغير طول ما بيجري في عروقنا الدم الحامي والغيرة .. يعني مهما وصلت درجة الحب بين الحبيبيين حتى لو كانوا متجوزين بعد قصة صراع دامي ...ومثلاً في قاعدة صفا الست حبت ترغي وقالت حاجة كده ولا كده عن الماضي .. فيبقى فتحت على نفسها باب من أبواب الجحيم لن ينغلق حتى لو تظاهر الرجل إنه أغلقه إنما من جواه هايفضل الباب موارب ... تعالوا بقى للراجل وفي نفس ساعة الصفا فضل يتكلم عن شقاوة أيام الجامعة والجل اللي كان بيدهن به شعره ويسحر به البنات .. ممكن الموضوع يتقلب بضحك وبعد كده كل واحد يروح لحاله وينسوا هما الإتنين .

رابعاً : الطرف الذي يدفع الثمن غالياً نتيجة الخطأ هو البنت بلا شك - خلوا بالكم إحنا لسه واقفين في المجتمع الشرقي وماليش دعوى بالناس الطيبين بتوع الغرب - وبالتالي حتى لو كان الحب ده صادق يبقى لازم البنت تبقى نمر ووحش كاسر ساعة الجد وتعرف دائماً إن ( معظم النار من مستصغر الشرر ) طبعاً عارفين إيه النار وإيه مستصغر الشرر يا عفاريت :D .

خامساً : من غير ما نكون إتفرجنا على ويجا ولا سيجا ولا الحاجات السافلة بتاعت إيناس الدغيدي وأمثالها واللي أعتقد إنها بتجسد فيها بيئتها الواطية فقط وليس بيئة المجتمع اللي فيه والدتي وأختي وأخواتنا جميعاً ... أقدر أقول الحمد لله إن المجتمع مازال بخير وإن الشباب والشابات غالبيتهم صالح .. والفئة المنحرفة والتي تسمح بالتساهل والفجور هي قليلة جداً ولكن دائماً البقعة السوداء هي التي تظهر بوضوح في الثوب الأبيض ... وزي ما قولنا عمر الحب ما كان هو ده اللي بيظهر في الأفلام القذرة دي واللي بتحاول تعمل غسيل مخ للشباب عشان ينجرف إلى الإنحلال .

سادساً : هناك قاعدة عامة لابد أن نؤمن بها وهي " مهما حدث فلابد للحياة أن تستمر " يعني علاقة حب شريفة إنتهت بجرح نتيجة ظروف إقتصادية أو عائلية أو أياً ما كانت ... هي ليست نهاية الدنيا طالما الإنسان لسه عايش بس لازم يبقى عنده القدرة إنه يتجاوز تلك المرحلة ولا يظل حبيس الذكريات .

سابعاً : عشان أختم بقى : نصيحة لإخوتنا البنات ومش هانصح الشباب الروش لإنه هو دلوقت اللي بينصحنا ... إوعي تصدقي كلام الأفلام والأغاني .. الحياة فيها الحلو وفيها المُر يعني كوكتيل .. فعايزة تتكيفي مع حياتك يبقى تقبليها زي ما هي كده وبلاش الرومانسية الهبلة المُفرطة ...

أول خطوبة للعبد لله كانت بنت رومانسية قوي ومن برج السرطان وأنا عملي جداً وواقعي من برج العقرب .. وماكانش في على لسانها إلا سؤال واحد " هو أحنا يا سين سين لما نتجوز ممكن يحصل كده زي ما بنشوف في الأفلام عند أي مشكلة تروح منفعل وتضربني ؟ " شوفتوا الهبل ؟ يعني لسها في مرحلة أول الخطوبة حيث تغريد العصافير وزقزقة الكناريا والورد ودستة الجاتوة اللي دفعت فيها دم قلب في كل زيارة وما كنتش بأكل منها حاجة :D وكنتاكي اللي في هليوبوليس يشهد علينا .... كل ده وهي عماله تعمل سيناريوهات لأفلام أكشن ... فكنت بأقولها يا بنتي هو أنتي هاتتجوزي فرانكشتين ولا مصاص الدماء ... والله بقى ساعة الإنفعال إنتي وحظك واللي مكتوب لك هاتشوفيه :D ومن حساسيتها المفرطة في تفسير أي كلمة أو موقف لم تستمر العلاقة أكثر من 6 شهور لإن كل يوم أقابلها ألاقيها شايله في قلبها ومتعقدة نفسياً ومش قادرة تفهم إن الحب النظري حاجة - وهو مطلوب بالتأكيد ولكنه ليس كل شيء - وإن التطبيق العملي للحب حاجة .. والإتنين لازم يكملوا بعض .. يعني ما ينفعش أروح عند بيتهم كل يوم وأقف تحت الشجرة ومعايا الربابة وأقعد أغني .. في حين إن والدها مكتفني وخانقني وطالب مني شقة تلات أوض وحمام وبوتاجاز بأربع عيون وغسالة توماتيكي توماتيكي ....

يالله عيشوا بقى وأسف للإطالة

[لخبطه]

إذا تركنا الجانب الديني في الموضوع يبقا فقد معاناه يعني أصبح مفرغ من محتواها

انا بس عايز انبهك لحاجه مهمه وهيا مش الكلام عن الجانب الديني قبل التجاوز او حتى تحريم التجاوز دا انا هكلمك عن الجانب الديني بعد التجاوز

بمعني أني ارتبط بواحده ليها تجربه سابقه وتجاوزت فيها وبتموت في اللى خلفوني

لو كانت رجعت لربها وحسيت باللى هيا عملته وكرهته وعندها النيه انها مش تكرره سواء ارتبط بي أو مش ارتبطت خلاص يبقا دا اساس سليم ينفع معاه بدايه جديده لحياه جديده ممكن تكون حياه افضل واقوى من الناس اللى بدون زلات - ان صح التعبير - لان البنت بتكون اقوى بكتير من البنتت اللى مش مرت بتجارب خالص لكن علشان هيا جايه تبرر دا أو تتركه بس علشاني يبقا ترك للأمر بدون أساس يعني زي التوبة السطحيه اللى بتنهار مع أول مغري ويستحيل دى تدوم عشرتها وانا بارتباطي بيها بنشىء حياه زوجيه على ارضيه هشه حتى لو بموت فيها

تم تعديل 7 فبراير 2006 بواسطة لخبطه

[se_ Elsyed]

إذا تركنا  الجانب الديني في الموضوع  يبقا  فقد  معاناه  يعني أصبح  مفرغ من محتواها

انا بس عايز انبهك لحاجه مهمه  وهيا  مش الكلام عن الجانب الديني  قبل التجاوز او حتى تحريم التجاوز  دا انا هكلمك عن الجانب الديني بعد التجاوز

بمعني أني ارتبط  بواحده ليها  تجربه سابقه وتجاوزت فيها  وبتموت في اللى خلفوني

لو  كانت رجعت لربها  وحسيت باللى هيا عملته وكرهته وعندها النيه  انها مش تكرره  سواء ارتبط بي  أو  مش ارتبطت خلاص يبقا دا اساس سليم ينفع  معاه بدايه  جديده  لحياه  جديده  ممكن  تكون حياه افضل واقوى  من الناس اللى بدون  زلات  - ان صح التعبير -  لان البنت بتكون اقوى بكتير من البنتت  اللى مش مرت بتجارب  خالص لكن  علشان  هيا  جايه  تبرر دا أو  تتركه بس علشاني    يبقا ترك  للأمر  بدون  أساس  يعني  زي التوبة السطحيه اللى بتنهار مع أول  مغري  ويستحيل  دى  تدوم عشرتها  وانا بارتباطي بيها  بنشىء  حياه زوجيه على  ارضيه  هشه حتى لو بموت فيها

<{POST_SNAPBACK}>

لخبطه .. إنت لخبطتني أكثر مانا متلخبط ...

أعِد .. أعِد

وأشرح واحده واحده من أول السلم .

[أسد]

بإجابة مختصرة جداً ..

وصادقة جداً ..

إذا وجد الحب الحقيقي ..

فده مش كلام أفلام ..

وجد .. وجد جداً كمان ...

أعرف تجارب حقيقية (ليست كثيرة .. ثلاث تجارب) .. حتى الأفلام لا يمكن تعملها بالرقة والتسامح والحب الموجود فيها ..

والآن عدد من الأسر السعيدة (جداً جداً) يعيشون اليوم مستمتعين بذكريات قصص حبهم الرائعة جداً جداً ..

مع التأكيد على أن تلك التجارب التي أتحدث عنها ,, كانت علاقات خالية من أي تجاوزات .. وما أعنيه أنها كانت مليئة بالحب . ومنها .. فيه تسامح عن أخطاء سابقة ..

تم تعديل 7 فبراير 2006 بواسطة أسد

[لخبطه]

بدون الخوض فى النواحي الدينيه ومن غير منتكلم فى الحلال والحرام انا عايزة اسال سؤال

إذا تركنا  الجانب الديني في الموضوع  يبقا  فقد  معاناه  يعني أصبح  مفرغ من محتواها

ريهام بتقول مش عايزين نخوض في الجانب الديني وانا بقول أنه بدون الخوض في الجانب دا يكون الموضوع غير ذي معنى

انا بس عايز انبهك لحاجه مهمه  وهيا  مش الكلام عن الجانب الديني  قبل التجاوز او حتى تحريم التجاوز  دا  انا هكلمك عن الجانب الديني بعد التجاوز

اقصد اننا مش هنتكلم عن الحلال والحرم قبل البنت ما تعمل دا أو نتكلم عن حرمته وحلاله بعد التفريط دا لكن هنتكلم عن اللى بيأمرنا به الدين بعد ما حصل اللى حصل

بمعني أني ارتبط  بواحده ليها  تجربه سابقه وتجاوزت فيها  وبتموت في اللى خلفوني

لو  كانت رجعت لربها  وحسيت باللى هيا عملته وكرهته وعندها النيه  انها مش تكرره  سواء ارتبط بي  أو  مش ارتبطت  خلاص يبقا دا اساس سليم ينفع  معاه بدايه  جديده  لحياه  جديده  ممكن  تكون حياه افضل واقوى  من الناس اللى  بدون  زلات  - ان صح التعبير -  لان البنت بتكون اقوى بكتير من البنتت  اللى مش مرت بتجارب  خالص

يعني احنا امام حالتين الحالة الاولى أني على استعداد ارتبط ببنت حصل منها حاجات زي كدا إذا البنت كانت ندمت على اللى عملته بمعني أنها تابت توبة نصوح وتوبتها دي مش لها علاقه بي يعني مش تايبه علشان خاطري انا ....... والبنت دي بتكون اقوي من البنت العاديه اللى مش مرت بتجارب خالص لان التجربة عملتها وصقلتها

لكن  علشان  هيا  جايه  تبرر دا أو  تتركه بس علشاني    يبقا  ترك  للأمر  بدون  أساس  يعني  زي التوبة السطحيه اللى بتنهار مع أول  مغري  ويستحيل  دى  تدوم عشرتها  وانا بارتباطي بيها  بنشىء  حياه زوجيه على  ارضيه  هشه حتى لو بموت فيها

الحالة التانية أن البنت تكون بتوب بس لكسب رضائي مش توبه نصوح مخلصة و التوبة دي بتكون هشه لا تصلح بداية لحياه زوجيه مهما كان حجم الحب

أي خدمه ياسي السيد ......... صحيح انا كتبت بنوع من عدم ترتيب الافكار لاني ما كنتش ضربت الشاي ابو حليب لسه لكن شوف بقا الشرح بعد الضرب شغل على ميه ببيضه

تعرف انا كنت هشرح لك بالصور علشان التوضيح اكتر :D

[ريهام]

:angry: اسمحولى اقولكم ان برضه محدش قدر يجاوبنى عن السؤال الى جوايا ومحيرنى ياجماعه لو انت بتحب واحدة بجد وبقى فى فرصه انك تلمسها هتلمسها ولا لا وهل معنى انك لمستها يعنى متحبهاش هو دا السؤال ارجوكم تجاوبينى ياشباااب دا رجاء

[مصرية الهوى]

انا هأقولك حاجه يا ريهام ..

كتير من البنات والشباب اللي يتجاوزوا الخطوط الحمراء أيام الحب والخطوبة .. ده يأثر كثيراً على مستقبل علاقتهم .. ولو استمرت قليلاً ما تستمر بعلاقة هادئة ومستقرة ... لأن الرجل بطبعه شكاك .. طيب طالما هي عملت معايا كده .. ما يمكن عملت مع واحد غيري .. واذكر فيه قصة في بريد الجمعة .. يحكي شاب عن علاقته بخطيبته اللي بيحبها وهي بتحبه .. بيقول لما كنت بألمسها وأمسك ايديها وهي تسمح لي بكده .. كنت في نفس الوقت بأفكر .. هي دي اللي هتبقى في يوم من الأيام مراتي .. وأم عيالي .. شفتي بيشك فيها وهو معاها .. امال لو سافر هيعمل ايه ؟؟ ..

انا مش هأقولك كل الشباب .. بس 99% منهم .. كده تفكيرهم ..

ده غير حكاية البنت .. اللي ادت لخطيبها كل حاجة .. بعدين لما فسخ الخطوبة .. وراح اتجوز وحده غيرها .. قالها ايه.. معلهش مش هأقدر اعيش معاك بعد اللي عملتيه معايا .. وراح اتجوز وحده حتى الخروج معاه كانت ترفض تخرج لوحدها معاه .. ويقول دي اللي اقدر اعيش معاها وانا مطمئن ..

فعشان كده نصيحة مني .. بلاش تهيني نفسك .. حتى لو كان بيموت في دباديب دباديبك .. واللي يبيع نفسه ميلاقيش حد يشتري ..

حتى لو كان خطيبك .. مش من حقه انه يلمسك .. الخطوبة فترة للتعارف .. تعرفي هو بيفكر ازاي .. وبيحب ايه .. ويكره ايه .. تحاولوا تفهموا بعض .. كده يعني ..

وكل شيء بوقته حلو ..

[الأفوكاتو]

انا هأقولك حاجه يا ريهام ..

كتير من البنات والشباب اللي يتجاوزوا الخطوط الحمراء أيام الحب والخطوبة .. ده يأثر كثيراً على مستقبل علاقتهم .. ولو استمرت قليلاً ما تستمر بعلاقة هادئة ومستقرة ... لأن الرجل بطبعه شكاك .. طيب طالما هي عملت معايا كده .. ما يمكن عملت مع واحد غيري .. واذكر فيه قصة في بريد الجمعة .. يحكي شاب عن علاقته بخطيبته اللي بيحبها وهي بتحبه .. بيقول لما كنت بألمسها وأمسك ايديها وهي تسمح لي بكده .. كنت في نفس الوقت بأفكر .. هي دي اللي هتبقى في يوم من الأيام مراتي .. وأم عيالي .. شفتي بيشك فيها وهو معاها .. امال لو سافر هيعمل ايه ؟؟ ..

انا مش هأقولك كل الشباب .. بس 99% منهم .. كده تفكيرهم ..

ده غير حكاية البنت .. اللي ادت لخطيبها كل حاجة .. بعدين لما فسخ الخطوبة .. وراح اتجوز وحده غيرها .. قالها ايه.. معلهش مش هأقدر اعيش معاك بعد اللي عملتيه معايا .. وراح اتجوز وحده حتى الخروج معاه كانت ترفض تخرج لوحدها معاه .. ويقول دي اللي اقدر اعيش معاها وانا مطمئن ..

فعشان كده نصيحة مني .. بلاش تهيني نفسك .. حتى لو كان بيموت في دباديب دباديبك .. واللي يبيع نفسه ميلاقيش حد يشتري ..

حتى لو كان خطيبك .. مش من حقه انه يلمسك  .. الخطوبة فترة للتعارف .. تعرفي هو بيفكر ازاي .. وبيحب ايه .. ويكره ايه .. تحاولوا تفهموا بعض .. كده يعني ..

وكل شيء بوقته حلو ..

<{POST_SNAPBACK}>

أعتقد أن الأخت جيجى مصيبة( ليس بمعنى كارثة) فى رأيها, و نصيحة من كبير فى السن, أتبعوا نصيحتها يا عذارى, فالمصرى الذكر يعطى لنفسه الحق فى الخطيئة, و لكنه لا يغفرها للأنثى.

تحياتى للجميع.

[se_ Elsyed]

أعتقد أن الأخت جيجى مصيبة( ليس بمعنى كارثة) فى رأيها

بصراحة أنا كده إزدادت شكوكي في جيجي ... فالكلام ده لا يصدُر إلا عن فتاة مصرية ... ومن شبرا كمان :P

[مصرية الهوى]

أعتقد أن الأخت جيجى مصيبة( ليس بمعنى كارثة) فى رأيها, و نصيحة من كبير فى السن, أتبعوا نصيحتها يا عذارى,  فالمصرى الذكر يعطى لنفسه الحق فى الخطيئة, و لكنه لا يغفرها للأنثى.

تحياتى للجميع.

<{POST_SNAPBACK}>

أعتقد أن الأخت جيجى مصيبة( ليس بمعنى كارثة) فى رأيها

بصراحة أنا كده إزدادت شكوكيك في جيجي ... فالكلام ده لا يصدُر إلا عن فتاة مصرية ... ومن شبرا كمان :D

<{POST_SNAPBACK}>

يا أسيادي .. الرجالة الشرقيين وبالذات العرب ..

طبيعتهم واحدة و بيفكروا نفس التفكير .. ( راجع رواية بنات الرياض :D )

وبيجروا وراء اللي بتقولهم لأ :D

( وش وحده حاقدة على كل الرجالة الشرقيين من اول واحد في المغرب غربا لاخر واحد في اليابان شرقا :P )

انت فين يا باتريك ؟؟ .. ياابو عينين خضرا وشعر اصفر وباسبور ازرق mfb:

جيجي .. مواليد تحت الربع ..

اي خدمة يا باشا :D ؟؟

[Alshiekh]

mfb: اسمحولى اقولكم ان برضه محدش قدر يجاوبنى عن السؤال الى جوايا ومحيرنى ياجماعه لو انت بتحب واحدة بجد وبقى فى فرصه انك تلمسها هتلمسها ولا لا وهل معنى انك لمستها يعنى متحبهاش هو دا السؤال ارجوكم تجاوبينى ياشباااب دا رجاء

<{POST_SNAPBACK}>

أحب أن أضيف لسؤال ريهام سؤال آخر:

الزواج من مطلقة أو أرملة

المطلقة أكيد كانت مرتبطة بعلاقة حب بمن طلقت منه

الأرملة أكيد كانت مرتبطة بعلاقة حب بمن كانت مرتبطة به قبل وفاته مع العلم ان فراقهم لم يكن بسبب مباشر من أى منهما.

مارأى الشباب فى الزواج من أرملة أو مطلقة؟

علما بأنى أتفهم سؤال ريهام جيدا ، فهى تتحدث عن بنت كويسة وليست سيئة الأخلاق أو التربية ، هى تتحدث عن بنت كل ذنبها انها أحبت وصدقت من تحب وانساقت وراء عواطفها ، وعلى الجانب الآخر لم يحدث الوفاق لاسباب خارجة عن ارادتها.

________________________________

من ناحية أخرى فلنناقش الموضوع الأصلى

نحن كشرقيين نتصور ان افضل النساء والبنات تربية هم أهل بيتنا أم أو أخت أو بنت ، لامانع من ذلك .

ولكننا نغفل حقيقة هامة الا وهى ان الولد والبنت خلقوا يحملون نفس القدر من الاحاسيس والمشاعر والحواس وان كانت الأنثى أكثر عاطفية من الولد.

إذن فعندما نتحدث فى مثل هذه الأمور فيجب الا نغفل دور الإثنين معا الشاب والشابة ، أو الرجل والمرأة فكلاهما له مشاعر واحاسيس ، وبما أننا نعيش فى مجتمع مختلط سواء فى المدرسة او الجامعة أو العمل فالنظرات ستتلاقى والمشاعر ستتبادل ، لاشك فى ذلك.

وبناء على نقطة تبادل المشاعر ، يجب ان يفهم كلا الطرفين أنه لايجب أن تقام اى علاقات جنسية قبل الزواج ، وكما يقول كثير من الأمريكيين ( بجد مش بهزار ) " No bed before wedding " ولكن طبعا لاحياة لمن تنادى.

وعفوا ان قلت أن البنت الغبية هى من تذهب الى شقة مع رجل ، لأن الحب يجب الا يعنى ممارسة الجنس قبل الزواج ، قد يكون بمسك الايدى على الرغم من انه مخالف لتعاليم الدين أو بالخروج فى نزهة فى أماكن عامة ، ولكن البتة لايكون داخل شقة مع رجل غريب.

قد أقبل بالزواج من مطلقة أو أرملة ، فقد فعلت ماأحله الله ، ولكن الفتاة التى سمحت لنفسها بالتفريط فى شرفها وشرف أهلها بهذه السهولة لأسباب من نسج خيالها ، فاعتقد انها قد بررت لنفسها ارتكاب الخطيئة تحت مسمى الحب ، وهو ماقد يتكرر مرة أخرى

فعلى الرغم من اننى لاأعتبر أن السؤال كان عن بنت دايرة على حل شعرها ، الا ان البنت لايجب ان تكون بالسذاجة التى توقع نفسها فى تلك الفعلة حتى ولو كانت أول مرة تخرج فيها من بيت أهلها. وأعتقد ان من فعلت معه ذلك هو أولى بها من غيره.

قد يكون حكمى قاسى بعض الشيئ ولكن هذا ماأراه.

[Folana]

-_- اسمحولى اقولكم ان برضه محدش قدر يجاوبنى عن السؤال الى جوايا ومحيرنى ياجماعه لو انت بتحب واحدة بجد وبقى فى فرصه انك تلمسها هتلمسها ولا لا وهل معنى انك لمستها يعنى متحبهاش هو دا السؤال ارجوكم تجاوبينى ياشباااب دا رجاء

<{POST_SNAPBACK}>

السلام عليكم ورحمة الله ...

اختى الحبيبة ريهام ...انا قريت موضوعك يوم الخميس ومن ساعتها مش عارفة انام ..مش من سؤالك ولكن من ردود بعض الاخوة ..متهيالى كان العزيز س.س. والاخ الفاضل لخبطة ..اعتقد كده ...

وحاقول ليه ...بس ردا على سؤالك ....من وجهة نظرى يعنى مااعرفش الشباب حيقول ..حاقولك ان الايام الغبرة اللى احنا بنعيشها دلوقت ...اكيد الشاب لو انفرد بحبيبته او ايا كانت يعنى ..طبعا حيلمسها والكلمة دى تحمل كل المعانى ومالهاش حدود ....

مش حادخل بقى فى مواضيع فرعية واحلل واقول ليه وعلشان ايه ..لكن طبعا شىء وارد جدا انه ينتهز الفرصة دى ....اما عن موقفه تجاهها بعد كده ...فبرضه مفهوم انه حيتغير ..مش على طول طبعا لكن بعد مايشبع ويزهق .....العلاقة بينهم بتكون زى جمرة النار ..طول ماهى والعة بتدفى ..لكن اول ماتيجى عليها شوية مية حتنطفى وخلاص ...

اما بقى لو بيحبها بجد ومتقى الله ومراعى حدوده ..حيتجنب اصلا الخلوة دى اللى لازم ولابد يكون انكل الشيطان موجد فيها ويباركها ..

اما ليه بقى اصابنى القلق والهلع بعد ماقريت رد س.س. ولخبطة ...لان عندى بنتين ...عايزة اقول انى مرتبطة بهم ارتباط مرضى ..يعنى مش باسيبهم ابدا من ايدى ...اوصل المدرسة وارجع من المدرسة ..لو فيه درس ولازم تكون مدرسة مش مدرس ..اوصل واقعد على الرصيف لحد مابنتى تنزل ...النادى معاهم ...هم فى مدرسة بنات ...صحباتهم يشرفونا بس هم مايروحوش لحد ..محجبات من المرحلةة الابتدائية ..ماشاء الله بيحفظوا القران على يد معلمة بتيجى البيت ....ربنا يبارك فيهم ويحفظهم ...

الزملاء بقى قالوا ..ان البنت الخام واللى مش لها تجربة هى دى اللى بيضحك عليها بسرعة ..او ان البنت المجربة بتكون اقوى ...

فهل معنى كده ان البنت المجربة ..هى المفضلة عند الشاب ؟؟؟!!!! وهل معنى كده ان بناتى لما يدخلوا الجامعة ان شاء الله حيكونوا عرضة للتسالى واللعب بدماغهم ؟؟؟

يعنى هل افكها عليهم شوية واسيبهم يجربوا ولا ايه ....انتم رعبتونى والله ..يعنى ممكن كل اللى بنعمله علشانهم ده يجى واحد ابن حلال يهده؟...ولا التربية الدينية السليمة ممكن تديهم قوة برضه وماينزلقوش الى المستوى ده ....

طب ما البنت المجربة برضه ياجماعة ...حيبقى الموضوع ده عادى جدا عندها وممكن تجرب مرة وعشرة .وتخرج من تجربة تدخل فى التانية علشان تنسى وتقولك لا ده مختلف .....ولا انا باتكلم غلط ...

حد يقول حاجة تتطمنى الله يخليكم ...

الاخ العزيز س.س.......انت ظلمت خطيبتك السرطانية ..هى كان كل املها فى الحياة انك طول النهار تقولها بحبك بحبك ...وتربط دماغها بكلمتين حلوين وخلاص ...B)

بس الحمد لله اكيد ربنا وفقك بعد مانجاك من خطيبة العواطف ;)

مصرية الهوى ............!!!!!!!!انت عرفتى تحت الربع دى منين mfb:

[مصرية الهوى]

أول حاجة : حمد الله على سلامتك يا طنط ...

أصلنا من زمان ما شفناش بعض .. ازيك ؟؟ عامله ايه ؟؟ .. وحشاني والله -_- ..

ربنا يخليك بناتك يا رب ويحفظهم لك ..

وتشوفيهم في بيت أزواجهم الصالحين اللي يقدروهم ويحترموهم ويشوفوا في عنيهم الدنيا كلها ...

بس أنا هأقولك حاجة يا طنط .. متقلقيش على بناتك أبدا .. طالما أنتي ربتيهم كده .. وأهم حاجة إنك تصاحبيهم وتصادقيهم .. وتنزلي لمستواهم وتشوفي هما بيفكروا ازاي .. بس بلاش تقفلي عليهم من كل ناحية .. وبتحسسيهم إنهم مراقبين طول الوقت .. خليها من بعيد لبعيد .. واديهم مساحة من الحرية ..

وصدقيني .. صدقيني .. البنت اللي اتربت كده .. واللي أهلها كانوا بيتقوا الله فيها .. وبيربوها عشان تبقى بنت وأم صالحة .. ربنا مش هيخيب ظن أهلها فيها أبدا ..

لو تعرفي حضرتك حكاية الغلامين اللي في سورة الكهف ، قال تعالى : ( وأما الجدار فكان لغلامين يتيمين في المدينة وكان تحته كنز لهما وكان أبوهما صالحا فأراد ربك أن يبلغا أشدهما ويستخرجا كنزهما رحمة من ربك ) .. فعشان صلاح الأهل .. ربنا حفظ لهم الكنز رحمة من ربك .. وإن شاء الله لما الأهل يبقوا ناس كويسين وربوا عيالهم على ما يرضي الله .. ربنا هيحفظ لهم أولادهم .. ويحميهم من كل شر ..

أنتي فكرتيني بأختي .. احنا كنا كده .. أنا وهي مرتبطين جداً ببعض .. وماما كانت صاحبتنا .. عمري ما شفت حد يربي زي ماما .. في كل سنوات عمرنا .. بتربينا وتعلمنا .. وكانت مديانا الثقة الكاملة في كل شيء .. عمرها ما جت تفتش في اوضتنا والا اغراضنا وده كثير بنات بيشتكوا ان امهاتهم يجيوا يفتشوا وراهم ..عمرها ما شخطت فينا قدام الناس .. عمرها ما تريقت علينا والا على حاجة احنا عملناها .. زي ما ناس كتير بأشوفهم دايما بيكسروا بخاطر عيالهم وبيتريقوا عليهم قدام خلق الله ..

حتى واحنا في ابتدائي واعدادي .. كانت ماما بتعتبرنا بنات كبار ... كل حاجه في البيت وفي ملابسها وفي شغلها بتاخد رأينا فيها ..صحباتنا يزورونا .. وبابا يودينا نزورهم .. كان بيدونا مساحة من الحرية .. ندخل نخرج .. نبات في بيت تيته لوحدنا من غير ماما .. انا واثقة ان ماما كانت بتراقبنا .. بس من بعيد جدا .. وعمرنا ما حسينا فيها .. فعشان كده الحمد لله كبرنا متربيين مش معقدين .. ودلوقتي والله العظيم أي حاجة بأجي اعملها .. لازم استشعر وجود ماما وبابا معايا .. ولا يمكن اخون ثقتهم فيا اطلاقا .. فعشان كده متقلقيش على بناتك ابدا .. البنت المتربية صح .. لا يمكن تعمل حاجة غلط .. وخصوصا حاجة من ناحية الشرف والكلام ده .. طبعا مفيش حد طاهر مطهر .. كل ابن آدم خطّأ .. بس خطأ عن خطأ يفرق ..

وبالعكس أنا حاسه إن البنت اللي مش مجربة واللي الحب الأول في حياتها هو جوزها .. هي اللي هتعيش جوزها في نعيم .. لأن مشاعرها كلها هتروح له هو بس .. والبنت الخام .. معملتش حاجه تزعل ربنا .. فلا يمكن ربنا يخذلها .. وحد يضحك عليها من اول مرة .. البنت اللي يضحك عليها .. البنت الساذجة اللي مفيش حد عندها يقولها الصح والخطأ .. مفيش حد عندها في البيت يحبها ويطبطب عليها ويشيلها في عينيه .. فعشان كده تصدق أي كلمتين حلوين تسمعهم في الشارع ..

يا جماعة أهم حاجه التربية العاطفية .. المناخ العاطفي الجيد .. المليء بالحب والاحترام والثقة من الأهل هو اللي يحمي البنت من انها تصدق الشباب اللي بيضحكوا عليها ..

ويا ريت الشباب يخافوا من ربنا وميستغلوش البنات .. عشان ميجيش حد بكرى .. ويضحك على أخته والا بنته .. ودقة بدقة .. ولو زدت لزاد السقا ..

فيه حاجة برضه .. متنسيش حضرتك تقراي الأذكار في الصباح والمساء على بناتك .. عشان ربنا يحفظهم لك ..( أعيذكما بكلمات الله التامة ، من كل شيطان وهامة ، ومن كل عين لامة) .. ( اللهم احفظهما بحفظك ، وأكلأهما اللهم برعايتك ، اللهم ولا تكلهما إلى أنفسهما طرفة أو أقل من ذلك ، اللهم ولا تجعل للحسدة ولا للسحرة ولا للشياطين عليهما سلطانا ولا سبيلا ) وغيره ..

بس فيه نقطة : حضرتك قلتي " صحباتهم يشرفونا بس هم مايروحوش لحد "

ليه ؟؟ .. طالما حضرتك واثقة من بنتك .. ليه تمنعيها انها تزور حد .. أصل النقطة دي .. انا دايما بتكلم مع الأمهات بشأنها mfb: ..

هل انت مش واثقة من الناس اللي هيروحوا لهم ؟

والا ايه اللي يخليك تمنعيهم ؟؟

وهل ده بيضايق بناتك ... والا مش فارقه معاهم ..طالما صحباتهم يجوا يزوروهم ؟..

تحت الربع B) ..

يا ستي عرفتها من العصفورة الزرقاء .. اللي بتجيب لي اخبار مصر كل يوم ;)

[se_ Elsyed]

فلانه هانم ..

هاسألك سؤال

إوعي تكوني أختي الكبيرة - أكبر مني بأربع سنين - ومتخفية وداخله تحت إسم فلانه ؟

فهي عندها نفس المرض ده برضوا ...

بنتها الكبيرة السنة دي في ثانية ثانوي .. والأخرى في 3 أعدادي ..

ولحد دلوقت بتعاملهم كبيبيهات .. لازقه لهم في المدرسة وفي الدرس الخصوصي وفي الحمام حتى mfb:

وكلنا بننتقدها في ذلك ...

فخير الأمور الوسط

يعني لا أسيب للأدولاد الحبل على الغارب ...

ولا أشده قوي لحد ما أخنقهم بالحبل وأعمل زي الدبه اللي قتلت صاحبها من كثر حبها له ..

وبالتأكيد لو تركت أولادي يتعاملوا مع مختلف مواقف الحياه بطبيعية وتلقائية تحت رقابتي وخصوصاً الأمهات اللي المفروض تبقى صديقة بناتها بالذات فعلى ما يوصلوا لسن الجامعة مثلاً هايبقى عندهم مناعة وحصانة ضد المواقف في هذا السن .

أنا مش هاتكلم عنها عن الشباب اللي بقوا مدارس وجامعات الواحد ممكن يلتحق بها لأخذ درجة الدكتوراة ... لكن كل خوفي على البنات ...

إذاً فالأم لازم يبقى عندها ثقافة التعامل مع البنت في مختلف مراحل الحياة ... فلا الخام اللي ما تعرفش الألف من كوز الدره مطلوبة ... ولا المجربة الخبرة مطلوبة ...

وكما قال الأستاذ اللمبي " الصياعة أدب مش هز أكتاف "

إوعى حد ياخد الجملة دي على إنها قباحه أو قلة أدب ..

لكن عايزين نحورها عشان تتواقف مع عصر الفيديو كلاب والمولات والميسدات ..

بمعنى إيه ... إن البنت أو الولد لازم يبقى صايع بس مؤدب ... والصياعة مش معناها شرب البانجو والقاعدة على القهاوي ... لكن زي ما بنقول في مصر إن فلان ده أو فلانه دي إدارجية .. يعني ما ينضحكش عليه بسهولة ..

يعني ما يبقاش عندي بنت في الجامعة وعندها 20 سنة يعني لو كانت عاشت من 50 سنة كان زمانها مخلفة عيال عندهم 7 ينين أيام ما كان الجواز بكوز دره وألاقيها خام ممكن أي حد يسقيها حاجة أصفره ويضحك عليها ويقولها تعالي نتجوز عرفي ونكتب ورقة على القهوة ...

أنا مش جايب الكلام ده من عندي ... أنا كنت في جامعة عين شمس اللي في العباسية .. وعارف القهوة اللي في الميدان اللي قاعد عليها عيال مسميين نفسهم محاميين وشغلانتهم طول النهار يكتبوا ورق جواز عرفي .. والواد يقوم مأجر أوضة في لوكاندة الكلوب الحُسيني وخلص الموضوع والبنت أصبحت مدام من ورا أهلها وبعد شهرين تلاتة يروح ضاربها شلوت وسايب لها العار طول عمرها .

فهل معنى كده ان البنت المجربة ..هى المفضلة عند الشاب ؟

أبداً ..

ده أنتي لو سألتي أي عيل بيحشش حتى ومقطع السمكة وديلها ولافف مع طوب الأرض وقولتي له : إنت لما تحب تتجوز .. هاتتجوز مين ؟

على طول هايرمي الجوزة اللي في إيده ويقولك : طبعاً يا مودام هاتجوز اللي تصون شرفي وتربي عيالي صح صح وما تكونش لها تجارب معملية .

[Folana]

السلام عليكم ورحمة الله .....

اخوانى وزملائى الاعزاء ..اولا احب اقولكم ان مناقشتكم وحشتنى والله ..ثانيا باشكركم على ردودكم ...

مصرية الهوى ...على فكرة انا ولعت فى طنط دى ..خلاص العفريت خدها معاه وهو ماشى ... :D ..كلامك كله جميل ...بس عايزة ارد على سؤالك انا ليه مش باوديهم عن حد ...لانى مااعرفش ايه اللى حيكون فى المكان ده ....يمكن صاحبتها لها اخ ...ويمكن صاحبتها عايزة تخدم اخوها وتزن فى ودن البنت ..ويمكن ويمكن حاجات كتير ...انا فى غنى انى افكر فيها اصلا ....وبالمناسبة ..بنتى الكبيرة كانت بتتصل بواحدة زميلتها ..ورد باباها قالها دى نايمة ..وبعدين اتصل تانى وقالها ماتبقيش تتصلى ببنتى تانى قالت له ليه قال لها كده وخلاص ..جت لى بنت منهارة طبعا وبتحكى لى وعلى فكرة احنا اصحاب جدا ..انا وهى واختها ووالدهم ..كل حاجة بنتناقش فيها كلنا ...المهم ..انا طبعا دمى فار وجريت على التليفون اتصلت بالرجل ..وبعد مناقشة طويلة ..قلت له انت حر فى بنتك بس انا عايزة اعرف خطأ بنتى علشان افهم ايه اللى بيدور ..قالى اصل بنته بتعرف ولد ..وبتتصل به وكل ما باباها يسالها مين على التليفون تقوله دى صاحبتى ..على بنتى يعنى ...طبعا الرجل صعب على وقفلت ...

عايزة اقول ان دى عينة من الاصحاب ..ومعظم اصحابها كده ...كل واحدة لها عيل بياخد مصروفه من ابوه وعامل فيها بوى فيرند ..وهى بتحكى لى عليهم ...اوديها فين بقى بالله عليك ؟؟...هم يجييوا عندى انا شايفة بيعملوا ايه واعرف اسيطر على الامور ..

اخى العزيز س.س.....قبل كل شىء قال فيه صحيح اغنية للست المبجلة نانسى عفرت اسمها سى السيد؟؟......ناس لها بخت ........ماحدش حيعرف يكلمك تانى طبعا مادام طلعت الكارنية العجرمى ...

والله يشرفنى طبعا انه يبقى لى اخ عصبى زيك كده ..بس انا اكبر منك بحوالى سبع سنين- ده فى حالة انك عندك 25 سنة مش كده ؟- اما لو عندك 34 فبرضه انا اكبر بتلات شهور بس :P - ..دور كده فى اخواتك لو حد ناقص يبقى انا ...

والله يااخى الفاضل ..ده انا يوم فيه ويوم مافيش احلم انهم تاهوا منى ...باقولك عايزة اتعالج :rolleyes:

انا باتكلم معاهم كتير جدا وباباهم نفس الشىء ...واقعد اشرح وافسر كل تصرف ..لدرجة انهم بيضحكوا ويقولولى عرفتى الحاجات دى منين ..:happy:..مش بارد طبعا عليهم :) ;)

هم مش هبل يعنى ..بس انا باخاف جدا عليهم ...وباقول لما يدخلوا الجامعة يبقى ربنا يسهل بقى واشوف حاقدم معاهم فى مكتب التنسيق ولا ايه

انا حاسة انهم حياخدونى مرة مكان بعيد ويسيبونى هناك ويرجعوا هم ...

بس الزمن ده يخوف ....ومابقاش فيه امان ...ربنا يحميهم واولادكم جميعا .....

تم تعديل 11 فبراير 2006 بواسطة folana

[ريهام]

انا مقتنعة جدا بالكلام الى قالته مصرية الهوى فان الرجل الشرقى بيغفر لنفسه بس...لكن احنا ليه مبنغفرش للانثى هل لان عذريتها بتنتهى من مرة واحدة والراجل معندوش حاجه زى كدة وليه الراجل مبيسالش نفسه قبل ميتجوز ياترى الى انا هتجوزها دي محدش لمسها قبلى الى اقصده ان مادام فى واحد بيسمح لنفسه ان يلمس واحدة وبعد كدة يسبها ماهى اكيد هتواصل حياتها باي شكل ويمكن تتجوز وطبعا الى هيتجوزها دا مش عارف حاجه اقصد ان احنا بنفسنا بنينا جوانا سور كبير من عدم الثقه لافى نفسنا ولا فى البنت الى بنحبها عارفين ليه مش بس باسم الحب لا لاننا فقدنا دينا ومبادءنا وفقدنا معانى حلوة كتير انا الموضوع دا كان يهمنى جدا انى اعرف اراء اكبر عدد ممكن لانى اعرف تجربه حية قدامى عانت من الموضوع دا وكان كل ذنب البنت انها فعلا فعلا كانت بتحب بجد لكن احنا بقينا فى زمن مبيعترفش باى نوع من المعانى الحقيقية......

بالنسبة لمدام folanaانا مقدرش اقولك بناتك ممكن يكون مصيرهم ايه لكن انا متاكدة انك لو زرعتى جواهم الدين الحقيقي والمبادئ الجميلة وبقوا مقتنعين بيها من جواهم انشاء الله ربنا هيحفظهم لان الناس الى كدة ربنا مش هيرضالهم البهدله لكن لازم يكون فى نوع من الحرية عشان لما يدخولو الجامعه ميتصدموش بواقع عمرهم ماشافو قبل كدة....وربنا يحفظهم لك يارب

[nancy]

ريهام انت لسة صغيرة ومتعرفيش اننا فى مجتمع عندة انفصام فى الشخصية

يعنى لما الولد يغلط يبقى ولد ودى تجارب ولما البنت تغلط نعلقها فى المشنقة

والولد لما يعرف واحدة ويفضل يجرجرها لحد ما تقع ويرجع يقول دى قليلة الادب مش هو الى قليلل الادب والضمير

والراجل الى عاوز واحدة خام يتجوزها وبعدين يبص على الى مش خام

كل مفهمنا غلط وبصراحة مجتمع عاوز الحرق

علشان يجدد افكارة

لازم يكون مقياسنا الانسان ويحكمنا العقل الى جانب الايمان بوجود حب صادق ممكن يتخطى التفهات دى