الإيجارات القديمة

[Grandma]

كلنا عارفين ان قانون الايجارات القديم هو أحد مظاهر الظلم الاجتماعي الواقع على أصحاب العقارات في مصر..  المبالغ اللي بيحصلوها من ايجار عمارتهم مضحكة ما تشتريش كام كيلو  فاكهة ..  عقود الشقق عجيبة  لا تنتهي حتى بوفاة المؤجر  ..عقود مجحفة  عمرها ما حصلت في أي مكان في العالم  .. للأسف المواطن اتعود  على  الاوضاع الغريبة دي بالتدريج حتى أصبحت عرف وحق أصيل له .. ورغم ذلك ما نقدرش نغير الوضع دا فجأة لإن فيه ناس فعلا دخلهم بسيط ولا يستطيعوا مع هذا الغلاء انهم يدفعوا إيجار أعلى من اللي اتعودوا  عليه  و خططوا ميزانيتهم على أساسه  .. أي تغيير للوضع العجيب دا  بيعتبر تهديد للأمن و الاستقرار و السلم الاجتماعي .. ومع ان كلنا نعلم ان ثلاث ارباع الشقق ( إيجار قديم )  مقفولة او مستخدمة كمخازن للكراكيب .. لكن لازم نعترف بصعوبة اجازة قانون يعطي الحق لملاك العمارات بانهاء العقود القديمة إكراما لربع المواطنين الغير قادرين وليس لهم مأوى سوى هذه الشقق  .. و زي ما بيقولوا  ( لجل عين تكرم مدينة )

طيب ايه الحل و  نعمل ايه في الاشكالية دي ؟  وازاي ممكن الاوضاع الغريبة و الغير عادلة دي تتصلح ؟  
الحل لازم يكون بالتدريج 

_  اول حاجة في تصوري  لازم نسن  قانون يمنع توريث الشقق المؤجرة .

 _ ثانيا نوحد القيمة الايجارية لجميع الشقق الايجار القديم بحيث نزود قيمة  الايجار حسب الحي اللي بتقع فيه الشقة  ونراعي ان  الزيادة تلائم ( الزمان و المكان وجيب المؤجر ) يعني مثلا شقة في الزمالك ايجارها كان 2 و 3 جنيه لا اعتقد هيكون فيه  مشكلة  بالنسبة للمؤجر  لو اترفع الايجار  ل  200 جنيه .. كل الاطراف هتكون راضية... اما يجار الاتنين جنيه في الاحياء الشعبية فهيرتفع لعشرين جنيه فقط .. اعتقد ان دا عدل .. وفي نفس الوقت نلتزم بالا ترتفع  قيمة اي ايجار قديم عن 400 جنيه .. وهي قيمة اتصور انها اقصى ما يمكن ان يدفعه مؤجر بدون معاناة في الاحياء الراقية وهي أفضل من العشرة وعشرين جنيه ايجار  بالنسبة لمالك العمارة او ورثته .
 
_ اهم نقطة هي  اصدار قانون ينص على هدم اي عقار ( إيجار او تمليك )  يزيد عمره عن 100 سنة ما عدا المباني الاثرية 

القانون دا  مش هيحل مشكلة الملاك فقط وانما هيحل مشكلة دولة  :

_ هدم العقار القديم وبيع الأرض هيعوض المالك و ورثته  تلقائيا عن السنوات الظلم السابقة
 
_ هيحل مشكلة الاسكان .. لان الاراضي هينزل سعرها و بالتالي هينزل سعر الشقق_ اللي اتصور انها هترجع لقوانين  الايجار تاني  _ لانها محددة بفترة زمنية .

_  هنوفر مساحات وسط المدن  وفي اماكن استراتيجية مما يتيح للدولة شراء بعض هذه الاراضي حسب حاجتها  لعمل توسعات او حدائق عامة او انشاء كباري واصلاح البنية التحتية و رفع  كفاءتها .
_ هنحسن ونجدد الشكل الجمالي للمدن  باستمرار وبما يلائم العصر ونتخلص من مشكلة العشوائيات والمباني القبيحة و المتهالكة . 

_  الاهم اننا هنحافظ على حياة المواطنين وسلامتهم و آدميتهم بمباني جديدة اساسها سليم . واتصور ان لازم يكون فيه لجنة مختصة توقع بصلاحية العمارة للسكن ومطابقتها للمواصفات  ... يعني مافيش عمارة تتسلم عالطوب الاحمر ولا عمارة 6 ادوار بدون اسانسير ... وعمارة لاصقة في عمارة بدون مسافة قانونية تفرضها الدولة ... الخ 
 
* مهم أوي  ان الدولة تفرض  مواصفات خاصة  لتشطيب  العمارات اللي بتقع على السواحل بحيث ان واجهاتها لا تتأثر بالرطوبة و الاملاح و يفرضوا كمان الوان موحدة للواجهات  لاننا بلد سياحي وما يصحش القبح اللي بنشوفه دا في بعض الواجهات للعمارات اللي بتقع على الكورنيش  .. العمارات دي عنوان بلدنا  والمقاهي تحتها لازم تكون بمواصفات خاصة جدا . 

آديني حليت أزمة الاسكان آهو بجرة قلم .. فين المشكلة بقى في التنفيذ ؟ 

[suma]

تحياتي:

  حبيبتي يبدو حضرتك تتحدثين عن المدينة الفاضلة. كلام جميل وحلول في الإمكان العمل بها لكن؛ وآه مما يأتي بعد لكن تلك!

   هل تعلمين أن المباني القديمة أخذت حقها من الحديد والأسمنت ومتانة الأساس مما يجعلها تتفوق على المباني الحديثة بمراحل ؟!

 من رأيي أن المشكلة لن تحل دفعة واحدة .أولا المباني التي تم تأجيرها من قبل الحكومة ومؤسساتها لابد من النظر إليها أولا إنها كثيرة جدا وإيجاد حل لها يؤدي إرضاء قليل للورثة.

انا شقتي ايجار قديم والمالك كان جار لنا قبلا وأعلم تمن الارض وكيف بنيت وكان سعيد جدا لما انتقلنا عنده  ورحل المالك وجاء الورثة وبيني وبينهم ود والحمد الله ...طلبت من الجيران المقربين أن نحن نزيد الايجار أو نضاعفه وجدت هجوما علي غريب مع أن إيجار شقة ثلاث حجرات لا يشترى به ساندوش  من مؤمن..تخيلوا !!قررت ان ازيد انا الإيجار الضعف عندما يأتي وقت الدفع لاني ادفع مقدما سنتين أو ثلاث دائما..مع علمي أن الجيران سيغضبون .

هو لو حصل حصر للشقق التي لم تفتح من سنوات وخير اصحابها بين الترك او الاقامة بها مع زيادة الايجار .ممكن به ارضاء بعض الشيء....

لو كان يمكن عمل حسابا لأصحاب الإيجار القديم نصيبافي الشقق التي تبنيها الدولة..يمكن حل يرضي بعض الشيء ايضا .

   وعلى فكرة وقت السكن لم يكن هناك ظلما للمالك ..كان العرض هكذا والطلب ايضا   اتذكر في بيت ابي كان الساكن لما يترك الشقة قبل نهاية الشهر بكثير كنا نغضب لأنها ستمكث شهرا بدون إيجار.والحين هناك سكان خرجوا واشتروا ارض وبنوا ومع ذلك الشقق تحت أيديهم. هو ده الظلم ذاته.

  ماعلينا أن الصورة الجميلة التي ذكرتيها هنا تصلح للمدن الجديدة حيث الأرض والتخطيط من جديد ..ده من عجائب البشر تكون البناية عريقة وجميلة الشكل لكنها سوداء من الخارج من تراب الطريق والعادم و...و..ثم لايمكن ان يدفع المستأجر مليمالعمل صيانة لها ..

الخلاصة إنه اهمال من الدولة لأنها ارجأت تلك المشكلة ومن السكان أيضا ..يبقى الإبن متزوج وعنده شقة وعندما يمرض أبواه ينتقل ليعيش معهما لتكون الشقة من نصيبه  ..سبحان الله.

 

 

                سومه

 

[Scorpion]

600 جنيه خلو رجل

[Grandma]

13 ساعات مضت, suma said:

 

  حبيبتي يبدو حضرتك تتحدثين عن المدينة الفاضلة.

ياريت و الله يا ست سومة تبقى المدينة الفاضلة لكن انا باتكلم عن حلول وقوانين واقعية وسهل تطبيقها 

13 ساعات مضت, suma said:

كلام جميل وحلول في الإمكان العمل بها لكن؛ وآه مما يأتي بعد لكن تلك!

   هل تعلمين أن المباني القديمة أخذت حقها من الحديد والأسمنت ومتانة الأساس مما يجعلها تتفوق على المباني الحديثة بمراحل ؟!

حضرتك عندك حق المباني قديمة أمتن و أجمل من الحديثة ولكن لا مفر من  قانون يسن هدم القديم خصوصا القبيح و الآيل للسقوط و المتهالك .. اما الأثري و القيم بيتم تجديده وصيانته مع المحافظة على روحه القديمة وجمالياته .. دا بيحصل في كل العالم وعندنا قصر عابدين و المنتزة وفندق سيسل بالاسكندرية خير مثال 

13 ساعات مضت, suma said:

انا شقتي ايجار قديم والمالك كان جار لنا قبلا وأعلم تمن الارض وكيف بنيت وكان سعيد جدا لما انتقلنا عنده  ورحل المالك وجاء الورثة وبيني وبينهم ود والحمد الله ...طلبت من الجيران المقربين أن نحن نزيد الايجار أو نضاعفه وجدت هجوما علي غريب مع أن إيجار شقة ثلاث حجرات لا يشترى به ساندوش  من مؤمن..تخيلوا !!قررت ان ازيد انا الإيجار الضعف عندما يأتي وقت الدفع لاني ادفع مقدما سنتين أو ثلاث دائما..مع علمي أن الجيران سيغضبون .

مش كل الناس زي حضرتك يا ست سومة .. كل عمارة ممكن تلاقي ساكن عنده ضمير زي حضرتك و ممكن ما تلاقيش .. دا حتى السكان مش بيدفعوا الصيانة مع ان هما  المستفيدين منها مش المالك .. لكن لو المالك اهمل العمارة وحصل كارثة لا قدر الله هو اللي هيروح في سين وجيم 

13 ساعات مضت, suma said:

لو كان يمكن عمل حسابا لأصحاب الإيجار القديم نصيبافي الشقق التي تبنيها الدولة..يمكن حل يرضي بعض الشيء ايضا .

ما أعتقدش ان صاحب عمارة ممكن يسكن في سكن الدولة وهو عنده مِلك .. دا غير انه مش هياخد السكن ببلاش .

13 ساعات مضت, suma said:

وعلى فكرة وقت السكن لم يكن هناك ظلما للمالك ..كان العرض هكذا والطلب ايضا  

انا موافقة حضرتك ان اصحاب العمارات القديمة اكيد استردوا تمن عماراتهم .. لكن الارض مازالت ملكهم .. والاهم انهم لما بيجوزوا ابنائهم بيضطروا  يشتروا لهم شقق بمبالغ باهظة بينما المؤجرين بيورثوا شققهم لابنائهم .. طب دا يرضي مين ؟ ظلم بيّن .

13 ساعات مضت, suma said:

اتذكر في بيت ابي كان الساكن لما يترك الشقة قبل نهاية الشهر بكثير كنا نغضب لأنها ستمكث شهرا بدون إيجار.

هههههههه تمام .. ووالدتي اخبرتني انهم كانوا بيبخروا الشقق علشان تسكن  ودا اللي خلاهم ما يفكروش يكتبوا مدة لعقود الشقق .. بس دا مش معناه ان المؤجر يستولى على الشقة مدى الحياة .. ويورثها كمان .

13 ساعات مضت, suma said:

والحين هناك سكان خرجوا واشتروا ارض وبنوا ومع ذلك الشقق تحت أيديهم. هو ده الظلم ذاته.

أغلب المصريين  حاليا عندهم شقتين .. واحدة تمليك ساكن فيها و الثانية ايجار مقفولة  .

13 ساعات مضت, suma said:

ماعلينا أن الصورة الجميلة التي ذكرتيها هنا تصلح للمدن الجديدة حيث الأرض والتخطيط من جديد ..ده من عجائب البشر تكون البناية عريقة وجميلة الشكل لكنها سوداء من الخارج من تراب الطريق والعادم و...و

لو اعطينا مُدنا القديمة لمهندس ياباني هيخليها جنة .. المدن الجديدة متخططة جاهزة ومافيهاش صعوبة بس يارب يحافظوا عليها .. الامور غير مبشرة بالخير .. المشكلة في المدن القديمة و المزدحمة .. ازاي تتحول لمدن جميلة وسياحية .. هنا يأتي دور المهندس المبدع و الفذ .

13 ساعات مضت, suma said:

الخلاصة إنه اهمال من الدولة لأنها ارجأت تلك المشكلة ومن السكان أيضا

الاهمال و التأجيل عقدتنا .. متى يبدأ الحل ؟ 

تحياتي لحضرتك ست سومة 

[Grandma]

8 ساعات مضت, Scorpion said:

600 جنيه خلو رجل

قرأت موضوع حضرتك المشوق أستاذ سكوربيون  .. يا سلام فين أعضاء زمان ومناقشاتهم القيمة و اللذيذة 

انا نسيت موضوع  خلو الرجل دا خالص عموما مش قصتنا .. لكن والله مش  بنطالب المؤجرين  بقيمة ايجار  ما كانوا يدفعونه في السبعينات مثلا ونضربه في 200 ضعف وهي القيمة الحالية تقريبا ولو انها زادت الان عن ايام ما حضرتك طرحت الموضوع...احنا مش طالبين غير قليل من الانصاف .. يعني لو مالك العمارة مسك في ايده الفين جنيه في نهاية  الشهر نقول كويس أوي . 

ومع ذلك انا موضوعي بيركز في الاساس على نقطتين 

_ عدم توريث الشقق الايجار 

_  و لابد من سن قانون يلزم بهدم العمارات القديمة 

مش هنحتفظ بالمباني المتهالكة كنوع من الذكريات زي ما بنحتفظ بالشقق وداخلها الكراكيب برضو كذكريات  في النهاية مصر كلها هتبقى مدينة بشعة بكراكيبها . 

انا عارفة قيمة القديم بس مش لدرجة نحتفظ بكل حاجة وزي ماهي من مئات و الاف السنين . 

احنا لا عارفين نحافظ على آثارنا ولا عارفين نجدد ونبقى متطورين .