سأخلي طرفي من كلية الطب- دا اذا كان لي طرف أصلا

[ابن بطوطه]

تسمحولي افضفض

وإن كنت أعرف أن عندكم ما يكفي وزياده

سأحكي لكم ما دار في اليومين السابقين في كلية الطب جامعة المريخ ( كما نسميها تندراً)

توشك فترة الأمتياز على الأنتهاء (الحمد لله) ومطلوب الآن إنهاء الأوراق اللازمة (عادي جداً)

طيب مطلوب إيه؟ تاخد استمارة إخلاء طرف من شؤن الطلاب و استمارتين تانيين من شئون الأطباء وتجمع توقيعاتهم ( ما فيش مشكله و إن لم أكن من هواة جمع التوقيعات)

تعالو اتفضلوا شوفوا مين المطلوب يوقعلي بإني المذكور أعلاه خالي طرفه

الحسابات

الاستحقاقات

الجزاءات

المخازن ( أحسن نكون واخدين شاي أو سكر من عندهم مثلاً)

الشئون القانونية

الخزينة ( الغريب أن الخزينه دي غير الخزينه اللي بناخد منها المرتب دي واحده تانيه خالص تخص المرضى والمستشفى وما الى ذلك )

مراقبة العهد ( بدون تعليق)

التأمين الصحي

التوريدات ( ما حدش يسألني يعني إيه دي !! أنا ما أعرفش)

المكتبه ( منطقي جدأ، الغريب بس أنه الأمتياز ليس لهم حق الاستعاره و احنا اصلاً كنا عملنا اخلاء طرف أول السنه لما استلمنا امتياز ... بس يمكن زيادة تأكيد)

المعامل ( يكونوا مثلا سلفونا ميكروسكوب ولا دورق!!!)

المدن الجامعية (سواء سكنت او لا)

المكتبة المركزية ( إشمعنى أنتو يعني)

فاضل بس عم سعيد عامل المدرج، الراجل ماحبش يتقل علينا الله يعمر بيته

كله ده كوم واللي يفرسك أنه والله العظيم كل هذا الأتوجراف العظيم من التوقيعات ليس له أدنى قيمه. قولوا ليه؟

كل واحد تروح عنده ( دا بعد ما تكون سألت طوب الأرض عليه و لفيت السبع أو تمن دوخات) يوقعلك بإيده اليمين و الشمال ماسكه كوباية الشاي و عينه على زميله اللي جنبه بيحكي معاه و مش شايفني أصلا )

طول عمري أسمع عن أن الواحد ممكن يتغاظ تنفجر مرراته بس عمري ما سمعت عن الكلام ده لا في الباطنه ولا في الجراحه

النهارده بس حسيت أنه ممكن، أقولكم اللي حصل

قالوا لازم نعمل اخلاء طرف من بنك ناصر الاحتماعي ( ليه؟ مش ليه؟ ما فيش داعي للدخول في نقاشات)

المهم خدت بعضي وتركت زمايلي في الاستقبال ( ربنا يستر و ما يحصلش مرور وناخد جزاء - مزوغ في مهمة رسميه) و ركبت و رحت أدور على بنك ناصر ده فين المهم بعد السؤال وصلت و دخلت لقيت الدنيا زحمه موت إشي قروض على إشي معاشات على ما اعرفش ايه، المهم قعدت أسأل : أنا دكتور أمتياز و مطلوب مني إخلاء طرف، و من مدام ناديه للأستاذ محمد و أخيرأ لحد الاستاذ فتحي ، الراجل طلع زوق، أتفضل يا دكتور من فضلك صور الورقه دي و هاتها، رحت صورتها و جبتهاله مضاها و ختمها و سأترك لكم نص الخطاب هلشان تعرفوا ليه مرارتي كانت حتنفجر

بنك ناصر الأجتماعي

السيد/ إلى من يهمه الأمر

يرجى الاحاطه أن شهادة إخلاء الطرف الخاصة بالخريجين من حملة المؤهلات العليا وفوق المتوسطة قد تم إلغاؤها منذ أكثر من 10 سنوات وذلك بناءاً على قرار الجهاز المركزي للتنظيم والإدارة ورئاسة بنك ناصر الإجتماعي.

أما بخصوص حملة المؤهلات المتوسطة فلا يخضعون لهذا النظام.

ولا يوجد أي تعاملات مع البنك للسيد/ د.فلان الفلاني

و تفضلوا بقبول فائق الاحترام

[mAs]

هاهاهاهاها...

تلاقيهم عرفوا انك ابن بطوطة الأصلي، فقالوا نلففه السبع بحار..أصدي السبع دوخات..

(الله يجازيك...كان حيجيلي سكتة قلبيه من كتر الضحك..أةةةةةةةة يا قلبي..مع الاعتذار لحكيم)

[الأفوكاتو]

أرحب بالدكتور إبن بطوطة,

و الآن, و قد أصبحت على مشارف الحياة الروتينية, البيروقراطية, أستحلفك بالله أن لا تستعمل هذه الأساليب أينما كان موقعك فى المستقبل.

لقد ضاعت مصر بسبب الروتين, و لا نريد ضياع ما تبقى منها, إذا كان هناك ما تبقى منها, فى ظل الحكومة الرشيدة الحالية .

تحياتى, و تمنياتى بوقت ممتع معنا.

تم تعديل 10 فبراير 2006 بواسطة الأفوكاتو

[الاسكندرنى]

ميزة مصر كل حاجه ممكنه بس خالى نفسك طويل طويل طويل طويل

كل حاجه ممكنه بس تكون نعرف تلعب بمرجيح المولد

كل حاجه ممكنه بس لازم نكون صاحب شركة بن برزيلى لانك محتاج تعزم على قهاوى كتير