مع الرئيس مبارك ... مش هاتقدر تغمض عينيك

[se_ Elsyed]

بصراحة بعد 25 سنة سجن .. قصدي حُكم - تأبيده يعني عدم اللامؤخذه - أنا حاسس إني عايش في عصر من عصور بِم بِم ....

فاكرين مصنع لبان بم بم اللي كان بيثبتنا وإحنا صغيرين وبيقدم لنا جوايز - على الورق بس - وعمرنا ما شفنا منه جايزة ... لدرجة إني قضيت نيفٌ وعشرون عاماً أكل لبان وأجمع في ألبومات إني أكسب علبة عصير من غير شفاطة حتى ... ما حصلش ... وإكتشفت في الأخر إن الحاج علي بِم بِم أكلني الباوظة وعدم اللامؤخذه لزقني على قفايا وأخد فلوسي وخلع ...

بس الشهادة لله وعشان ما دخلش النار .. إن الرئيس مبارك عصره كله هدايا ومفاجآت... يعني تلاجات غسالات تليفزيونات .. شرابات فانلات... وأخيراً شهادات ... آه شهادات ما تستغربوش مانا جايلكوا في الكلام ... حد يقول تعالى بسرعة أحسن أنا واقف على السلم في الضلمة وبأخاف من القطط ...

خدوا الخبر - الإسود ده - وبعدين نكمل

جردية المسا 13 فبراير

التعديل التشريعي .. هدية مبارك للتيسير علي أهالي ضحايا العبَّارة

15 يوماً فقط لاستخراج شهادات الوفاة للمفقودين..بدلاً من سنة

السفير سليمان عواد: الرئيس أمر بسرعة صرف التعويضات

كتب جمال أبوبيه:

تتقدم الحكومة إلي مجلسي الشعب والشوري علي وجه السرعة وفي ضوء توجيهات الرئيس مبارك باقتراح بتعديل علي قانون الأحوال الشخصية لخفض المدة التي يتم احتسابها لاعتبار المفقودين في الحالات الخاصة لحوادث الطائرات والسفن. حتي يمكن لذويهم استخراج شهادات الوفاة وإعلام الوراثة من سنة إلي 15 يوماً فقط. بما يكفل الإسراع في استلام المستحقات لأهالي الضحايا.

بِم بِم ... بيقدم جوايز ... بيقدم جوايز ...

جوايزنا كثير ... وهديانا أكثر

مع الريس مبارك ... هانغرقكوا ... هدايا ... وهانفطسكو .... من الضحك ... وهانموتك ... من الإنبساط ....

الجايزة الأولى .... خشبة ميت هدية لأول 10 متوفيين في أول كارثة قريبة ..... هــــــــــــــــييييييييييييييه ( دي أصوات الجماهير )

الجايزة الثانية ........ 5 شهادات وفاة سريعة الذوبان لأول 5 متوفيين في أول كارثة قريبة ........ لوووووووووولي ( دي أم أبراهيم بتزغرط من فرحتها )

الجايزة الثالثة ....... 3 جنازات تنطلق من عمر مكرم مروراً بتُرب الغفير لأول 3 هايروحوا فطيس ( يا لهوووووووووووي ياما ... ده صوت ام عبدو المعددة )

وهكذا تتوالى المفاجأت في عصر فخامته ..... يا سلام على فخامته وحلاوة فخامته ... يعني الراجل مموتنا ومش مخلي نفسنا في حاجة ...

أنا بأحب الراجل ده قوي ... قوي ... مووووووووت

[MZohairy]

:D

حزر فزر

ايه هي الأغنيه اللي حكتبهالكوا في مداخلتي الجايه ردا على سي السيد؟؟؟؟؟؟؟؟؟

حزر فزر

حغششكوا

أغنيه للفنان هاني شاكر قدمها في احتفالات 6 أكتوبر 1986

ايه هي؟

حزر فزر والجدع اللي يعرفها ليه جايزه زي بمبم كده

وعملنا مسابقه كبيره كبيره جايزتها الأولى عربيه

عربيه

عربيه

ما هي الأغنيه؟ :P

[se_ Elsyed]

:D

حزر فزر

ايه هي الأغنيه اللي حكتبهالكوا في مداخلتي الجايه ردا على سي السيد؟؟؟؟؟؟؟؟؟

:P

<{POST_SNAPBACK}>

يا عم إرحمنا بقى ... كرهتني في شاني هاكر .. وفي مبارك .. وفي مصر وفي الكل كليله ...

يابا الحاج زُهيري مش هاتبقى إنت والأغاني الوطنية علينا .. حرام عليك إحنا أتنفخنا وبقينا على 45 درجة ..

تحذير رسمي

لو لزقت اي أُغنية هنا يا زهير .. انا هاركبك أول عبارة من عبارات السلام الوان واي وهابعتك على مصر .. إنت وأغانيك عشان أدفن تُراثك الوطني معاك .... وخلي السمك بقى يجيله بلهارسيا من الأغاني الوطنية دي .

[MZohairy]

رغم أنف الكارهين !

أقدم لكم حل الفزوره!!

اغنية الفنان هاني شاكر الخالده!!!

يا معلي راية الحرية

يا مقوي الوحده الوطنيه

غالي علينا وجوه عنينا

يحميك ربي لمصر ولينا

عشت يا غالي

جبينك عالي

باراده حره مصريه

واراده حره وطنيه

شكرا شكرا شكرا :P

وللأسف محدش فاز بالجايزه!

عربيه 124 معدل موديل 1972

خيرها في غيرها

[tarek_almeghallawy]

رغم أنف الكارهين !

أقدم لكم حل الفزوره!!

اغنية الفنان هاني شاكر الخالده!!!

يا معلي راية الحرية

يا مقوي الوحده الوطنيه

غالي علينا وجوه عنينا

يحميك ربي لمصر ولينا

عشت يا غالي

جبينك عالي

باراده حره مصريه

واراده حره وطنيه

شكرا شكرا شكرا :P

وللأسف محدش فاز بالجايزه!

عربيه 124 معدل موديل 1972

خيرها في غيرها

<{POST_SNAPBACK}>

يا عم الحاج زهيري

ربنا يكرمك

عايزين بس نعرف

أنت مزاجك عنب كده على طول ليه

1.هل لأنك بتاكل عنب كتير؟

2.هل لأنك مهاجر كندا وها تعتق من الكفيل؟

3.هل لأنك مناسب التوانسة؟

عايزين بس نعرف سر الخلطة

الله يخليك بلاش تجاوب بأغنية

[se_ Elsyed]

عايزين بس نعرف سر الخلطة

أنا الوحيد اللي عارف سر الخلطة بحكم إقترابي من المطبخ .... وسامحني يا زُهيري هافتن عليك يمكن ترتدع عن أغانيك الفاسدة

الأخ زُهيري يا جماعة مقدم على وظيفة كعضو في المجالس المتخصصة ... فالحزب اللاوطني إشترط عليه إنه ينشر الرذيلة ... قصدي الأغاني دي وسط الشباب وخصوصاً صغار السن اللي زيينا .. ويحببهم ويحنن قلبهم على الحزب اللاوطني ... وقالوا حتى لو زُهيري فشل في إستقطاب كل الشباب فيكفينا جزء منهم يبقى مُدمن اغاني وطنية ويصدق اللي بيتقال ..

بس هيييه

[MZohairy]

أنا بتاع حزب وطي؟

أقصد وطني؟ :P

أعوذ بالله

اخص عليكم!

ياريتكم كنتوا شتمتوني أحسن

أنا أكتر واحد بيكره جميع الأحزاب في مصر

وعلى رأسهم الوطني

والخلطه يا طارق حبعتهالك في رساله خاصه!!!!!

وبالنسبه لسي السيد....

أهديلك دي

الله معاك ومعاك قلوبـــــــ........................................أي :D :D

أي ;) :D

خلاص كفايه ضرب

كفايــــــــــــــــــــــــــــــــــــــــــــــــــــــــــــــــــــــــــــ

ـــــــــــــــــــــــــــــــــــــــــــــــــه ;)

[الاسكندرنى]

انت يا زهيرى متضربش لوحدك ابدا ( فرفيروا انا جاى)

خد ديه بقه

مصر مصر يا احلى اسم ى الوجود يا مصر

نعيش لمصر و نموت لمصر

[مصرى]

طيب ايه رأيكم فى الإعلان عن مسابقة فى الموالسة .. مشيها موالسة حفاظا على الحياء العام .. ونقدم هنا الموضوعات المرشحة للجايزة الأولى

أبدأ بالمانشيت الرئيسى للجمهورية (الاثنين 13 فبراير 2006)

د.نظيف في ندوة "التنمية البشرية":

لم نقصر في حادث العبارة.. وإشادة دولية بإنقاذ 388 راكباً

الوصـــــــــــــــــــــــلة

أرشح الدكتور نظيف للجائزة الأولى فالراجل يوالس بألف قتيل دون أن يهتز له جفن ولا حتى رمش عينه :P

يكذب بعيون مفتوحة

اشادة دولية .. إمتى وفين وإزاى مش مهم .. لأن الحاجات دى طبعا سرية :D

تصوروا نجاة 388 من 1419 بنى آدم على العبارة يعنى نسبة القتلى 73 % من إجمالى الركاب حاجة كده أكثر من أصوات الناخبين فى الاستفتاء أياه .. ورغم كده يقول إشادة دولية .. ابن الإيه :D

[Alshiekh]

فقط للتذكير

هل تعلمون أن رأى الفقهاء فى موضوع المفقود ينقسم الى قسمين :

القسم الأول : وهو المفقود الذى لايظن فيه الهلاك ، أى يعتقد ان الفقود أو الغائب لايزال على قيد الحياة وانه لم يرجع لانشغاله بتجارة أو سياحة أو الأسر أو أى شيئ آخر لايغلب عليه الهلاك والموت ،

هناك رأيان فى هذه الحالة ،

أحد الرأيين يرى أنه لايقسم ماله ولاتطلق إمرأته حتى يبلغ عمره 120 (مائة وعشرون عاما ) فإن كان عمره وقت انقطاع خبره خمسون عاما ، يجب الإنتظار سبعون عاما أخرى.

الرأى الثانى ، أن يبلغ 90 ( تسعون عاما ) بمعنى اذا انقطع خبره وعمره خمسون عاما ، وجب الإنتظار اربعون عاما أخرى.

القسم الثانى : المفقود أو الغائب والذى يغلب فيه ترجيح الهلاك بسبب غرق مركبه فنجا بعض الناس ولايعلم مصير البعض الآخر ، أو من خرج لصلاة العشاء ولم يرجع أو فقد فى الصحراء ولايعلم ان كان حيا أم ميتا ، فى هذه الحالة لايقسم ميراثه ولا يعتبر ميتا إلا بعد 4 ( أربع ) سنوات ، ولاتطلق زوجته إلا بعد أربعة سنوات من وقت تاريخ ابلاغ الامام أو القاضى ، مضافا اليها مدة عدة المتوفى عنها زوجها ، وإن كان هناك رأيا آخر بعدم جواز طلاقها أبدا ، إلا أن سيدنا عمر بن الخطاب أقر بالأربع سنوات بدءا من وقت ابلاغ الامام أو القاضى.

تم تعديل 13 فبراير 2006 بواسطة Mohammad

[se_ Elsyed]

زملائي الأعزاء .. أصداقائي الأفاضل

يُسعدني أن أتقدم إلى مسابقة الموالسة ..متمنياً أن أفوز بالجائزة الأولى أياً كانت إن شالله لو أبوس راس الريس زي ما عمل حسام حسن

موضوعي هايوكن رياضي وخبر لسه مصطاده طازه من الجمهورية :

أخيراً.. اعترف حياتو

التنظيم المصري الهائل تفوق علي بطولات أوروبا

أسامة صقر

حرص الكاميروني عيسي حياتو رئيس الاتحاد الأفريقي لكرة القدم قبل مغادرته القاهرة أمس عائداً لبلاده بعد انتهاء بطولة كأس الأمم الأفريقية.. علي توجيه خطاب شكر من قبل الكاف للرئيس مبارك وللجنة المنظمة والتي أظهرت مصر بوجه حضاري.. جاء ذلك خلال حفل الاستقبال ودعوة العشاء التي وجهها المهندس حسن صقر رئيس المجلس القومي للرياضة وحضره حياتو والمهندس هاني أبوريدة رئيس اللجنة المنظمة وبعض أعضاء مجلس ادارة اتحاد الكرة.

وقال حياتو إن سعادتي لا توصف بأن رئيس اللجنة المنظمة هو ذاته عوض الاتحاد الأفريقي وما تحقق من نجاح سيعود علي الكاف.. وقال: لقد سحبت البطولة البساط من تحت أقدام كل البطولات الافريقية السابقة وحتي البطولة الاوروبية الأخيرة بالبرتغال سواء تنظيميا أو فنيا وحتي جماهيريا خاصة وان استاد القاهرة حقق رقما قياسيا من الحضور الجماهيري لم يسبقه أي استاد آخر في العالم.

لا تعليق ...

[last_Samurai]

الناس مش لاقيه تأكل وده بيعمل الاعيب

كان فيه مقال زمان بيقول مبارك اما مسك الحكم قال الكفن ملوش جيوب

حسنى مبارك هو اللى سرق الكفن

طبعا اللى كتب كده الله يرحمه

إحم إحم

تم التعديل بواسطتي

سي السيد

تم تعديل 13 فبراير 2006 بواسطة se_ Elsyed

[se_ Elsyed]

موضوع فكرة شهادات الوفاة اللي تفتق ذهن مبارك عنه بيفكرني بقصة غريبة قوي - من إختراعي -

ذات مرة جاء لفيف من الناس يشتكوا لمسئول كبير في الدولة وبيقولوا له : " يا فندم الكوبري اللي على أول طريق صلاح سالم وإنت داخل على الدائري بيحصل عليه حوادث كثير قوي وناس كثير بتروح فطيس كل يوم "

فراح الراجل بكل أريحيه - يعني إيه البتاعه دي ؟ - راح إخترع حل هُلامي خزعبلي لا يخرج إلا من واحد دماغه كبييييييره وفاضييييييييه فقال لهم : خلاص إحنا نهد الكوبري ونعتقل المدعو صلاح سالم ونخلي الطريق الدائري نص دائري ( طـاء نق تربيع على 2 ومعانا خمسه )

فحبيبنا وقائدنا وأبونا مبارك بدل ما يجد حل للمصايب والكوارث التي أصبحت تنهال على رؤسنا ويدفع ثمنها الأبرياء من عماير بتقع وقطارات بتتفحم وسفن بتغوص وطيارات بتقع وناس بالزوفة بتموت في حوادث الطرق وأمراض وسرطانات بتاكل في جتت المصريين أكل النار في الهشيم .. راح قايل لهم : ( خلاص إنتوا هاتوجعوا دماغي ليه ... المواطن المصري اللي يفيص في أي مصيبة من دول إعتبروه ميت حتى قبل الأربعين )

وبكده لا نتعب في التدوير عليهم .. ولا نخلي فرق إنقاذ تتعب نفسها ولا يحزنون ...

وأعتقد إنهم قريباً هايستصدروا تشريع مكمل لهذا وينص على " وحتى إذا ظهر المتوفي اللي أعتبرته الدولة ميت بعد 15 يوم وأستخرجت له شهادة وفاة .. فإنه يُعامل كمتوفي ويُطلق عليه لقب المرحوم فلان ) يبقى المرحوم فلان راح المرحوم فلان جه ...

وبكده يبقى إكتملت خطة مبارك الخمسينية في القضاء على الشعب المصري بأكلمه بعد أن أثبت إنه شعب مضاد للكسر وشعب مقرف بصراحة ... فلا بيحوق فيه زيت شلجم ولا فراخ توفيق عبد الحي ولا ألبان أطفال صُنعت في معامل تشيرنوبل وعالم زي الرُز ما بيخلصوش من كتر الحوادث ..

يبقى الحل ياولاد .. إنا إحنا ندفنهم بالحيا ... وجميعنا نعتبر أموات في نظر الحكومة حتى لو أثبتنا العكس ... هو أحنا هانعرف أحسن من الحكومة .... فمن يقدر على إستخراج شهادة ميلاد يقدر على إستخراج شهادة وفاة وفي نفس القاعدة كمان ...