ممكن تسكت على الغلط علشان لقمة العيش؟

[احمد هادي]

اعزائي المصريين

عندي سؤال بسيط

ممكن تجاوبوني عليه بصراحة

او بشفافيه بس من بتوع المعلم نظيف :D

انا شاب مصري زي حالاتكم بس انا من اللي طفشوا من مصر

من ساعة ما سبت مصر من سنتين ما رجعتلهاش

انا كنت بشتغل في وظيفه ممكن تكسبك دهب

بس تكبر دماغك

تكبر دماغك بس :D ....مش تسرق :ninja:

ولاني مكبرتش دماغي اصطدمت وعملت مشاكل كبيرة

ولقيت نفسي بين اختيارين

يا اما استمر وافقد احترامي لنفسي ...

يا اما اسيبهالهم مخضرة

وقررت ...

وسبت البلد كلها وطفشت رغم معارضة كل الناس

اللي قال مجنون

واللي قال بكره يندم ويعيط

واللي قال طبعا ماهو اهله مرتاحين ومسنود

بدأت هنا بمرتب بسيط جدا- وكنت بشتغل 15 ساعة في اليوم

لكن الحمد لله انا مرتبي دلوقتي ضعف مرتبي في مصر - قبل ما ارميلهم استقالتي اللي ما قبلوهاش - 60 مره

اي والله العظيم 60 مره - ولله الحمد

ملحوظه انا مرجعتش مصر مش لاني مبحباهش - بالعكس -ابسلوتلي - علي راي اللمبي

انا لو دخلت مصر ممكن معرفش اخرج بسبب اني معرفش موقفي من الوظيفة ايه

ومعنديش تصرح عمل

وباسبوري مكتوب فيه الوظيفه القديمة

فيه واحد ممكن يسأل ؟؟

وده من حقه ...

انت بتحكي قصة حياتك ليه ؟

هو احنا ناقصينك ؟

ممكن ارد

انا بس بقول لكل واحد شايف حاجة غلط وساكت عشان لقمة العيش

أوعي تخاف

( ومن يتق الله يجعل له مخرجا ويرزقه من حيث لا يحتسب)

تم تغيير العنوان ليعبر عن محتوى الموضوع

تم تعديل 19 فبراير 2006 بواسطة عادل أبوزيد

[احمد هادي]

اعزائي المصريين

نسيت السؤال

ممكن تسكت عن الغلط عشان خايف علي لقمه العيش؟

تم تغيير العنوان ليعبر عن محتوى الموضوع

تم تعديل 19 فبراير 2006 بواسطة عادل أبوزيد

[المدهش]

لا

[Hammer]

دا يعتمد علي نوع الخطأ ..

يعني إذا كان هذا الخطأ يتبع الحرام و الامانه و المسلمات الاخلاقيه ... فلا و ألف لا .

بس ساعات الواحد بيشوف ناس ثورجيه تتدخل في اللي مالهاش فيه أو في أمور لا تتبع إختصاصتها أو تتناقش مع مديرينها بطريقه تفتقد للباقه حول أخطاء تخص سير العمل , بل أن بعضهم قد يبجث عن عمل أخر لانه يري أن خطه العمل بها أخطاء .

الواحد في الحالات دي يقول رأيه بمنتهي اللباقه و التحسس للالفاظ .. و في حاله عدم قبول هذا الرأي .. تكون المرجعية دائما هي :

The Boss always right.

مش علشان هو فعلا اللي صح علي طول .. لأ ... علشان هو اللي بيشيل النتائج وحده .

[عادل أبوزيد]

فى كل النظم هناك تسلسل إدارى حتى فى مؤسسة الأسرة التى يرأسها الأب و يتبع ذلك دائما تسلسلا للسلطة و المسئولية.

و فى كل المؤسسات الناجحة - بما فيها الأسرة - تجد أن الرئيس أو المسئول الأعلى عنده دائما صورة أوضح عن سير العمل و عن الضوابط و المحاذير و هو غير مطالب بإذاعة هذه الضوابط و المحاذير تبريرا لقراراته الإدارية.

و لكن سير العمل فى كل المؤسسات - بما فيها الأسرة - يتطلب وجود ضمانات لسير العمل بطريقة سليمة و أن المسئول الإدارى فعلا عنده صورة واضحة عما يجرى و هنا يظهر أيضا ما يسمى حالات الضرورة القصوى و فيها يستطيع أصغر مسئول أن يصل إلى اكبر رأس فى المؤسسة ليبلغة بخطورة موقف ما دون أن يعتبر ذلك إخلالا بتسلسل خطوط السلطة و المسئولية.

ما سبق كان تنظيرا لسير العمل فى أى مؤسسة - بما فيها الأسرة - لكن هناك قواعد يلزم الأخذ بها من أجل النجاح تلك القواعد تتمثل فى إختيار الأفراد و المسئولين و قد يأخذنا هذا للحديث عن المدير الناجح و لكنى هنا أعرض لنقطة واحدة.

على المدير أن يحرص على تناغم العمل بمعنى أن يعى أن بعض التصرفات التى تبدو خروجا على مقتضى العمل السليم عليه أن يبيعها - يقنع بها - من هو أقل منه وظيفيا بلا إخلال بالحزم الإدارى.

الموضوع قد يحتاج إلى مزيد من الحوار ..... و قد لاينتهى الحوار إذا دخلنا فى مسائل الأخلاقيات و ما تعتبره أخلاقيا وواجبا لازما و ما لا تراه المؤسسة كذلك

[se_ Elsyed]

من غير تصريحات عنترية أو شعارات حنجورية ..

آه ممكن أسكت لو الغلط أكبر مني وشايف إني مش هاقدر أصلحه ..

---

لي صديق لسه متعين بقى له سنة في أحد الإتحادات الرياضية المصرية بعد ما لف على شغل لما رجليه دابت .. ومن خلال أداءه لعمله وعشان لسه جديد وحامي .. أكتشف طبيخ في المسائل ... فراح طالع لرئيس مجلس إدارة الإتحاد وقال له على كل حاجة .. راح الرجل بمنتهى رحابة صدر قايل له : لو عايز تاكل عيش يبقى لازم تطنش وتسكت ...

بس أهم حاجة إن الواحد ما يبقاش مشارك في الطبيخ ده .

[مصري المصري]

احساسي عندما أسكت عن الخطأ أني مشارك فيه .. ونظراً لكثرة الأخطاء في العمل وحتى لا أجد نفسي أحارب طواحين الهواء ..

فالإجابة : نعم .. ممكن أسكت عن الغلط اللي أشوفه قدامي .. لكن بشرط ألا أكون متورطاً فيه ..

أما إذا تم جر رجلي إليه .. فيا روح ما بعدك روح .. فلن أضيع ديني في سبيل لقمة العيش ..

تحياتي لك .

[زيزو]

مع إحترامي للجميع، الساكت على الحق شيطان أخرص.

والخطأ يكبر ويتفشي بسبب قوة حزب الفساد وجرئته، وضعف وجبن الشرفاء.

طبعًا لا ينبغي محاربة الخطاء بسذاجة... أسكت في الأول حتى تحصل على ما يقوي موقفك وتستطيع عن طريقه مواجهة الخطأ. نسبة الشرفاء في مصر مازالت أكبر من نسبة الفاسدين، ولكن هناك سذاجة عند الشرفاء وقلة حيلة.

مَّن كَانَ يُرِيدُ ثَوَابَ الدُّنْيَا فَعِندَ اللّهِ ثَوَابُ الدُّنْيَا وَالآخِرَةِ وَكَانَ اللّهُ سَمِيعًا بَصِيرًا

يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَى أَنْفُسِكُمْ أَوِ الْوَالِدَيْنِ وَالْأَقْرَبِينَ إِنْ يَكُنْ غَنِيّاً أَوْ فَقِيراً فَاللَّهُ أَوْلَى بِهِمَا فَلا تَتَّبِعُوا الْهَوَى أَنْ تَعْدِلُوا وَإِنْ تَلْوُوا أَوْ تُعْرِضُوا فَإِنَّ اللَّهَ كَانَ بِمَا تَعْمَلُونَ خَبِيراً

يَا أَيُّهَا الَّذِينَ آمَنُواْ كُونُواْ قَوَّامِينَ لِلّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللّهَ إِنَّ اللّهَ خَبِيرٌ بِمَا تَعْمَلُونَ

وَلا تَكْتُمُوا الشَّهَادَةَ وَمَنْ يَكْتُمْهَا فَإِنَّهُ آثِمٌ قَلْبُهُ وَاللَّهُ بِمَا تَعْمَلُونَ عَلِيمٌ

[Guest النسر المصري]

لما ابتديت عملي في مجالي كنت بحاول ارضي جميع الاطراف كل ماشوف غلط او ريحة حاجة معفنة

واقول لنفسي ياواد خليك مطننننش

وهوب ماقعدش في الشركة اكتر من شهرين

واورح لتانية

وبردو اخرس ومطننننش

لحد لما اشتغلت في شركة كبيرة عالمية قولت لا بقى انا مش هاطنش انما هشارك في العفانة وهبقى تعلوب نتن

وفعلا استمريت في شغلي لحد لما استقلت

عارفين استقلت لية؟؟؟؟

علسان ريحتي فاحت اوي اوي

بس مين اللي قرف من ريحتها؟؟؟

أنا

أنا وبس

وكلوا كان بيصقفلي ...ليه بقى ....عشان كنت انا أمكر واحد فيهم

كرهت نفسي وكرهت الشغل وكرهت حياتي من وراهم

لكن استقلت واشتغلت مع استاذ عظيم

لكن ياحبة عين امه ...راجل اهبل وطيب....والناس كانت بتخدعه وهو بيصدقهم العبيط

لكن وحيتك على مين

كانوا أقوى جهاز محاسبي في مصر

بل من غير ذكر أسماء دول نفسيهم اللي بعملوا الموازنة السنوية لفندق هيلتون في مصر

ورغم ان شغلي في الجرافيك والرسم

إلا اني افشتهم وفضحتهم ونشرتلهم الغسيل القذر أمام المدير

لحد لما اتصفوا

إلا رئيسهم!!!!!!!

دة كان عجيب جدا بقى....لكنه الغريب انه احترمني؟؟؟!!!

ازاي...بيقول قال اية سبع البورمبة

انو على مدار خمسة واربعين سنة خبرة ماحدش قدر ولا هقدر يضحك علي

لكن انت يابني اكتر واحد قرب مني

بس عاوز انصحك نصيحة لوجه الله....مفيش مصيدة في الدنيا تقدر تنشل السمك الكبير

وخليك عايم بدل ماتتاكل

لكن لان الدروشه كانت واكله قلبي على الاستاذ الطيب المدير ...رحت قايله ...وحياتك لربيلك حيتان تاكلك انت واللي وراك واللي قدامك...في تحد صارخ لما الراجل بقى هيتجنن مني

وفعلا ماقدرتش عليه...بس اللي عرفتوا اني الراجل الطيب مشاه بس بعد سنه واضطر انه يخسر كتير عشان يمشيه

ولكن من يومها وانا مشكلوني الشركات

لا يمكن ادخل شركة الا وانا منظف مناخيري

واشمشم على العفانه فين وافضحها

وبعد سبع سنين شغل

انا مشتغلتش الا في مكانين

مما يدل على نجاحي

والخطة هي واحدة

شمها

دوقها

زووقها

اكشفها وريحها

والخطة دي اسمها اقلب الطربيزة..علي نافوخ النتنه عزيزة

وانت اللي هاتبقى كسبان

فلوس وعمارات مكفآت حسنات احترمات شهرات..عوضا عن الحلويات والقشطات والزبدات والشيكولاتات

والاهم انك بتتسلى احلى تسلاية وتبقى حياتك مفعمة الاحداث

بس انت اقلب التربيزة وادعيلي

وجعلوا عامر

[Guest sofy]

لاء طبعا كله الا الكرامة

[Howayda Ismail]

للاسف فى ايامنا دى اللى بيعمل شهم ويواجه الخطأ او يحاول يكشف عنه

حاجة من اتنين ياما يتنقل من مكانه لوظيفة اقل شأن كعقاب او انه يتوصم بتهمة اخلاقية كرشوة او خلافه

ولذلك كتير من الناس بتخاف وبتسكت على خطا زملائها فى العمل خوفا على لقمة عيشها وده موجود بكثرة فى

الجمارك والمحليات واحيانا السجل المدنى يعنى اماكن حيوية بها مصالح ملايين وبكده الساكت عن الحق

مشارك فى الجريمة رغم انفه وده اللى مرجع البلد ورا وساب الفساد ينهش فينا

نفسى الناس تفوق ومتخفش لان الرزق بايد ربنا واللى يشوف غلط يقول عليه حتى ولو من غير مواجهة

او ذكر اسمه او يضر نفسه

[جسار]

منذ ثلاثة سنوات تقريبا طلبت نقلى من القسم الذى اعمل به ونقلت الى قسم التفتيش الادارى

بأحدى مديريات الحكم المحلى وكنا ثلاثة فقط فى هذا القسم ومهمتنا التفتيش على الاقسام والفروع

وبالذات فى الحضور والانصراف والغياب والاذونات وخلافه ، وتصادف نقلى مع تعيين مدير عام جديد

للمديرية ، وفى خلال الاربعة أشهر الاولى كانت لى كثير من الصولات والجولات وقمت أنا وزميل آخر

بشن العديد من الغارات المفاجئة على تلك الاماكن وبالذات المعروفة بالتسيب والانحراف وعن حق

وليس عن باطل طالت الجزاءات العديد من المخالفين ، وبالطبع كانت هناك مقاومة شرسة من رؤساء

الفروع لعملنا والاستغاثة بالسيد الوكيل والذى كان متواطئا معهم فى منظومة الفساد ، وأنتظم

العمال والموظفون وكان مجرد ذكر اسم التفتيش يجعلهم يتمسمرون فى اماكنهم لايغادرونها حتى

تأتى ساعة الانصراف الرسمية ، ثم وجدنا ان الريس كان يتحسس طريقه فى تلك المدة الفائتة

ولحد ما عرف طريق الاكتاف ونزل فيها نهش وهبر وطبعا مش لوحده لان اللى ياكل لوحده يزور، وفلوس

الحرام اللى بتتنهب من مقاولى القطاع الخاص بيبقى طعمها حلو قوى فى فم الفاسدين

المهم اننا وجدناه تغيرت معاملته وبدا فى اهمال تقاريرنا ومذكراتنا ويؤشلر بكلمة (حفظ )

حاول زميلى الأستنجاد بضابط معرفة فى امن الدولة وشكا له الوضع فما كان من الاخير ألا انه

أتصل هاتفيا بالمدير وبعد تهديده بكلمتين فارغين طلب منه خدمة لاحد اقاربه !!

طيب أيه العمل ؟ هل نخوض فى التيار مع الفاسدين ونخالف ديننا وضمائرنا ، كما أن الشرفاء

بصفة عامة بيبقوا خايبين ما بيعرفوش اساليب الحواة والقرداتية بتاعة اخواننا الفاسدين

يعنى حتى ولو جه على نفسه ودينه وضميره مش حيعرف يعمل السبوبة اللى بيقولوا عليها

واما الطريق الآخر فكله مشاكل وحرق دم وخسارة على طول الخط لانه وبصراحة مطلقة المناخ

العام اصبح كله فاسد وبكثافة منقطعة النظير ، وأى سلطة للرقابة أما ان البعض من افرادها

انخرط فعليا فى هذا المناخ أو انهم بلا سلطة فعلية كالاخوة مفتشى الجهاز المركزى للمحاسبات

وأهتديت الى حل توفيقى تلفيقى ، الاماكن اللى بافتش عليها أتصل بهم قبلها بحوالى ساعة يقدروا

فيها يلموا الارانب المزوغة ويدخلوها العشة ، وأذهب أليهم ألاقيهم كلهم مترصصين وفاشخين بقهم

على الآخر فى بلاهة والدفاتر مظبطة والتصاريح تمام ، وقلت لهم أنا باعمل كده علشان لا احرجكم

ولا أحرج نفسى ، فى وقت التفتيش مطلوب شوية انضباط وبعد ما امشى من عندكم ان شاء الله تقلعوا

هدومكم وترقصوا زى الهنود الحمر ....حقيقى لما فربت من الناس بدات اتعاطف معهم فالمرتبات

والاجور ضعيفة للغاية واللى ما بيمدش أيده للحرام بيحاول يشتغل أى عمل اضافى لمواجهة اعباء

المعيشة وكفاية عليهم مصاريف الدروس الخصوصية وسلم لى على النزاهة ...