تمام يا فندم : حاصرنا إنفلونزا الطيور

[se_ Elsyed]

لحد إمتى هايفضل هذا الأسلوب الغبي والفكاهي المتناقض موجود في معالجة الأزمات المصرية من قِبل المسئولين والإعلاميين

بصوا معايا كده العنوان المُستفز بتاع أهرام النهاردة :

أجهزة الدولة تحاصر وباء إنفلونزا الطيور

ظهور الإصابات في ست محافظات وإعداد ‏56‏ مدفنا صحيا

نظيف يطمئن المواطنين‏..‏ ومجلس الوزراء يقرر جدولة ديون أصحاب المزارع

إزالة عشش الأسطح وأبراج الحمام وتعويض المضارين من الفقراء

توفير ‏2,5‏ مليون جرعة دواء خلال أيام بالمستشفيات الحكومية

يوم لتناول لحوم الدواجن بمشاركة الفنانين والإعلاميين

دعا الدكتور إبراهيم الكرداني نائب المدير الإقليمي لمنظمة الصحة العالمية لمنطقة شرق المتوسط إلي اختيار يوم لتناول الدجاج بمشاركة العديد من نجوم الفن والمجتمع والرياضة ورجال الإعلام والمواطنين‏,‏ وذلك لطمأنة المواطنين‏,‏ وحماية صناعة الدواجن في مصر‏.‏

بدائل من اللحوم بمحلات الوجبات الجاهزة

أكد أصحاب محلات الوجبات السريعة أن مبيعاتهم ستتأثر بشكل كبير‏,‏ بعد الإعلان عن ظهور بعض حالات إنفلونزا الطيور‏.‏ قالوا إنهم غير قلقين‏,‏ حيث استعدوا عقب الإعلان عن ظهور المرض في الدول المجاورة وتوقع وصوله إلي مصر ـ للتحول إلي إعداد وجبات بديلة من اللحوم‏.‏

هذا وقد دار الحوار التالي بين معالي وزير الصحة السيد المحافظ الدكتور حاتم الجبلي وفخامة جناب نيافة السيد الرئيس القائد محمد حسني مبارك :

حاتم : تمام يا باشا الأمور تحت السيطرة وحاصرنا الفيروس الجبان في عشة فراخ بمنطقة أمبابة وجاري التعامل معه .

القائد : عفارم يا حتومه .. مش عايز الجبان ده يفلت من إيديكو .. عايزين نعرف العالم كله مين هما المصريين .. وإذا كنا هزمنا الكونغو وليبيا وساحل العاج في الكاس الأخيرة فهاييجي حتت فيروس زي ده يمرمط بكرامتنا الأرض ومش هانعرف نهزمة من غير ضربات جزاء كمان ؟

حتومه : معاش ولا كان يا باشا .. إحنا قدها وقدود .. وبإذن الله قريباً هانخلي فخامتك والمدام تطلعوا على شاشة التلفاز ومعاكو الأعلام وتشاوروا بعلامات الإنتصار على الفيروس الحقير .. ولو إن ... آ آ أ ...

القائد : في إيه يا حاتم إتكلم أنا مش ناقص أهلك ؟

حتومه : : أنا شامم ريحة مؤامرة صهيونية حقيرة على مصر وإنهم هما اللي بعتوا الفراخ المضروبة دي عشان يخلصوا علينا ..

القائد : : يا أخي إتلهي علي عينك وأسكت ... مؤامرة إيه وبطاطس إيه ؟ إسرائيل يابني ملبوخه في اللي بتعلموا فيها حماس وحزب الله ومش فاضيه لنا .. وبعدين يابني أنا راجلهم أساساً ومستحيل يضروني ...

حتومه : : ربنا يطمن قلبك طمنتيني يا كبير .

القائد :: بأقولك يا حاتم .. أنا عايزك تلم كام وزير على كام مسئول من على القهوة وتعملوا شــــو قدام الناس .

حتومه : : من عيني .. رقبتي يا ريس .. ده أنا ممكن أعمل شو ولا شاكيرا في زمانها .

القائد :: : نضف مخك يا حاتم شاكيرا إيه ومادونت إيه .. هو انا قلت لك إعمل عرض إستربتيز .. يابني أنا عايزك تلم شوية المقاطيع دول وتجيبوا طرابيزة سفرة كبيرة عليها فراخ محمرة على فراخ بانيه على سكلوب على فراخ مسلوقه - عشان لو حد عنده كليسترول - وتنزلوا أكل أمام عدسات التلفاز عشان تطمنوا الناس ..

حتومه : : بس يا باشا .. آ آ آ

القائد : : بس إيه ؟ أيوه أيوه عارف .. هاتقولي فرضنا الفراخ كانت مضروبة .. ما تخافش أنا عامل حسابي وهاخلي رجالة الفكر الجديد في الحزب يظبطوا القاعدة ويجيبوا لكم فراخ بلاستيك كده وكده يعني ..ويعملوا مونتاج للشو بحيث تبانوا كإنكم بتلغوا فراخ بحق وحقيق .

حتومه : : ربنا ما يحرمنا من أفكار فخامتك النيرة .. يا مستتنا .. يا مغذينا .. إنت أجدع من أبويا

القائد : : يالله يا حتومه ربنا معاكو وعايزك تبلغني أول بأول بتطورات الوضع .. وأول ما تهجموا على العشة تبلغوني عشان أضرب شوية المكياج على الصبغة السودا وأطلع أديها واحد بيان هام للشعب .. الشعب وحشني قوي يا حتومه وبقى لي ييجي إسبوع ماطلعتش على التليفزيون وخايف الناس تنسى شكلي .

حتومه : : بعد إذن سعادتك يا باشا.. مش المفروض برضوا جمال بيه وماما سوزان هانم يشاركوا في العملية دي عشان يلمعوا صورتهم قدام الشعب

القائد : : يعني عايزهم يعملوا إيه يا حتومه ؟ يطلعوا يكاكو للشعب عشان يعجبهم ؟

حتومه : عثل ياخواتي .. وعهد الله عثل .....حلوه يا باشا .. طول عمرك دمك خفيف .. لأ مش قصدي .. يعني ماما سوزان ممكن تطلع تمثل دور ست بيت مصرية غلبانة مش لاقية تشتري جناح فرخه وشايلة شنطة خضار بلاستيك وواقفه عند الفرارجي عادي خالص وبتشتري فرخيتن عتاقي ومش خايفة من أي إنفلونزا ...

القائد : : وطبعاً الفرارجي ده هايكون إبني وفلذة كبدي جيمي ؟

حتومه : يا سلام عليك يا باشبوش بتفهمها وهي طايرة ولا أجدعها طير مُحلق بأجنحتة .. مانت طيار أشاساً .... وكل ده يا باشا هايكون في أستوديو من إستدوديوهات هوليود الشرق مدينة الإنتاج الإعلامي .

القائد : : وأنا موافق .. ده المدام هاتفرح قوي .. أصلها عايشه في دور ممثلة صاعدة وصدقت نفسها من ساعة ما كانت شايلة العلم وعماله ترفرف ... وأنا فعلاً محتاج أحشر جيمي في أي بلوه والسلام عشان الناس يقتنعوا به .. ربنا يجعل في وشك القبول يا حتومه .. أما لو حصل يا حتومه وجيمي مسك الكرسي بدالي .. ندرٍ عليه والندر دين .. لأعينك باشتمرجي الوحدة الصحية في كفر طهرمس ... وشوف إنت بقى التهليب اللي هاتهلبه من الوحدة الصحية .. يعني هاتعدي .

حتومه : ربنا ما يحرمنا من كرم سعادتك .. ونفحات فخامتك ... بعد إذنك هاروح أعيط على جنب .. من التأثر .

[se_ Elsyed]

تمام يا فندم جاري إحكام الحصار

أول إمبارح الوباء كان في 3 محافظات ... إمبارح في 7 ... النهاردة في 9 محافظات ...

يعني خطتنا يافندم هي توسيع نطاق الحصار لكي يسهُل التعامل مع الفيروس ...

نم وأرتاح وعيش حياتك يافندم ..

[MZohairy]

مالك يا دوبل سين؟ :D

ليه واخد الموضوع باستخفاف و بتنصح نصايح.. ممششه...؟

انت لو مريت ..بطريق.. ولقيت كام ست ... سمان.. بيشتروا طيور حتتريق عليهم؟

لازم تنصحهم :blush:

وتقولهم ان الواحده لو دعكت الدجاجه ب فرخ.. صنفره حتبقى تمام التمام

حسستني انك لاعب كوره و جاتله ..شوطه.. في راسه ففقد اتزانه

اقعدوا قعدة صفا كده واسمعوا الراديو وانا النهارده حهديلكم أغنية ..قالوا البياض أحلى ولا السفار أحلى

وللأطفال أغنية ...كوكو واوا

ولو شفت حد من بتوع الاشاعات دول متخليهوش يكمل كلامه واشتمه وقوله ...بس ط رمه عشان يبطل اشاعات

الرجاء نشر الرساله لتعميم الفائدة..... بالنقر.... على زر send

شكرا :wub: