أنفلونزا الطيور فى مصر (2)

[عادل أبوزيد]

اذا دخلت الانفلونزا مصر هتكون كارثه بكل المقاييس

لاعلاج هينفع ولاحكومه هتعمل

خطه مكافحه  

سؤال سقراطي خبيث

هل يمكن ادراج هذا المرض تحت مسمى حرب بيولوجيه

ملحوظه

انا ضد نظرية

المؤامره ولكن

مع نظرية

الغباء المستحكم والحكم بطريقة المهلبيه وتكتيك عك وربك يفك

سقراط

<{POST_SNAPBACK}>

فعلا دخلت أنفلونزا الطيور رسميا مصر

و رد الفعل الرسمى أشبه ما "بسيدة إشتعلت النيران فى طاسة القلية" أو هو نوع من الهلع و الإنفعال العصبى الذى تم نقله للشارع.

صدرت الأوامر - أو هكذا قيل - بإغلاق محلات الفرارجية و عدم الذبح إلا فى مجازر مرخصة و عدم نقل الطيور من محافظة إلى أخرى و إغلاق بورصة الدواجن فى بنها

هذه الأوامر تعنى ببساطة القضاء على صناعة الدواجن فى مصر !!!! هل هذا هو المقصود أو الحل ؟؟؟

كنت على التليفون من دقائق مع الفاضل أحمد محمود و هو يؤكد لى أنه أنه لا يوجد مشاكل من أكل الطيور و أن المرض لا ينتقل عن طريق الأكل و أن شكل لحم الطيور المصابة يمكن تمييزه بالعين المجردة !!!!

هذا الكلام لم أجده على أى من وسائل الإعلام المصرية الرسالة الواضحة و المعلنة أن الحكومة تقوم بعملها و لا تنزعجوا ...........

ماذا يعنى هذا ؟؟ و ألف علامة إستفهام من عندى

يتبع

[عادل أبوزيد]

الوضع الحالى يعنى القضاء الكامل على صناعة الدواجن !!

هل يمكن أكل الدواجن الآن ؟ بالطبع لا طبقا للرسالة الإعلامية الموجهه للشعب المصرى

إذا كانت الإجابة بالإيجاب فيتطلب الأمر صدور بيان رسمى يذاع و تكرر إذاعته من محطات الإذاعة الرئيسية يحوى ما معناه عدم وجود خطورة من تناول الدواجن كطعام للإنسان و ليت يكون من الممكن أن يكون ذلك بصوت السيدة سوزان مبارك أو بإسمها أو بصوت وزير الصحة أو بإسمه

بإختصار مطلوب تعبئة قومية بعدم خطورة أكل الدواجن مع التأكيد أن الدواجن المصابة يتم التخلص منها بطريقة آمنة

دعوة السيد رئيس الوزراء أن الأمر تحت السيطرة و دعوته للمواطنين بالإطمئنان ليست أكثر من "طق حنك" ما لم تصل رسالة واضحة جازمة إلى "عم بركات البواب"

إذا لم يكن هناك خطورة من أكل لحم الدواجن فيجب إعلان ذلك بكل وسائل الإعلام التى تصل إلى كل " عم بركات البواب"

[dr khaled]

بدات اشعر بهلع لخاطر طرا بنفسي بعد سماع ان المرض قد وصل الي فرنسا

بالطبع الدوله ستقوم بالاحتياطات و ستقوم باعدام الطيور

ولكن هل ستقوم بدفنها

ام سيقوم بعض رجال الاعمال المصريين الفهلويه باستيراد هده الدواجن واهو معدة المصريين بتهضدم الزلط

هل تتدكرون كارثه اللبن المشع

[se_ Elsyed]

الموضوع دخل مرحلة الخطورة ... والخطورة الشديدة الآن .. وإذا لم تتعامل معه الحكومة بحرفية وضمير فستكون كارثة مُحدقة بمصر وفي رأيي الشخص لابد للحكومة أن تقوم بعمل الآتي :

1- العمل على مشاركة رجال الدين الإسلامي والمسيحي في حملة توعية المواطنين حيث أنهم أقرب لرجل الشارع من الحكومة وأسهل للوصول إليه .

2- عمل حملات إعلامية توعوية مُبسطة من شخصيات لديها قبول لدى الشعب المصري وعدم الإكتفاء بالإعلان على الفضائيات فقط فليس كل فرد في الشعب المصري لديه ستالايت .. كما إن الحملة موجهه أساساً للبسطاء من مُربي الدواجن المنزلية ثم إلى التجار .

3- التعامل بتوازن مع أصحاب المشكلة وليس من منطلق الأمر والنهي والغرامات والحبس وما إلى ذلك من بطش وبالتالي دفع تعويضات مناسبة وفورية - مش كلام زي كل مره - للضاحايا الذين سيدفعون ثمن إعدام ثرواتهم بأيديهم ... وإذا لم تفعل الحكومة ذلك وفوراً بجدية فلنتوقع حيل وآلاعيب مُختلفة من مربي الطيور تحت مبدأ " علي وعلى أعدائي "

4- وضع خطة فورية للتعامل مع الأزمة في حالة لا قدر الله إنتقل الوباء إلى البشر والبُعد عن التصريحات الفارغة التي تعودنا عليها مثل هذا التصريح الوارد في صُحف اليوم وزارة الصحة:

الإصابة البشرية مستبعدة .. و80 ألف علبة "تاميفلو" احتياطي للعلاج

شيء مُستفز ويدل على جهل تام .

5- شيء أخر مهم جداً جداً وهو ضرورة تدخل الحكومة بشدة وبمنتهى العنف ضد مستغلي الأزمة من تجار اللحوم الجشعين وتطيبق قانون الطواري عليهم لرفعهم أسعار اللحوم بدون سبب إستغلالاً للأزمة ..

أنا يومياً على إتصال بعائلتي في مصر وقال لي أخي بالأمس بإنه في يوم واحد رفعت محلات الجزارة سعر كيلو اللحمه ليصل إلى 35 جنية كحد أدنى !!!!! ولسه

يرضي مين ده ؟ والغلابة اللي كانوا بيجيبوا الفرخة بـ 10 ج ويعيشوا عليها يومين تلاتة يعملوا إيه دلوقت ؟!! إذا كان مرتب موظف الحكومة ما يكفيش ثمن 3 كيلو لحمه في الشهر ؟ أما السمك فهو من ضمن السلع الرأسمالية في مصر واللي ما يقدرش عليها غير ذوي المال والجاه .

لك الله يا مصر

[Abofady]

عاوزين تفهمونا ان الحكومة خايفة علينا .. طب بأمارة ايه ؟ ادينى سبب واحد .. انا مش مصدق كل الكلام اللى المسئولين بيقولوه , دا جايبين كتاب بشلن وقاعدين يقروا , اغسل يديك قبل الاكل , ماتلعبش فى الفراخ الميته , حط الفرخة فى درجة حرارة 70مئوية ( اصل خالتك بعضشى عندها ميزان حراره) دا فى الفلاحين بيزغطوا البط , وخالتك فكرية اللى بتبيع الفراخ فى سوق الاربعاء لازم تزغط الحيوان (بط,,وز,حمام,فراخ) قبل ما تروح السوق وليس لها اى علاقة بالراديو او التليفزيون او القنوات الفضائية , مين اللى هيقولها بالمصيبة اللى احنا فيها , وهى هتصدق ؟.... هتقولك الفراخ زى الفل,دا انتوا اللى عيانيين , خلى المحافظ ولا وزير الصحة يروخ ياخد الفراخ منها وهى تاكله , الحكومة بتعالج المشكلة بمبدأ ( استر يارب ) ويجب عليها تعويض هؤلاء الغلابة وبزياده شوية , اما عن نفسى مش واكل فراخ خالص لانى ببساطة مش مصدق كلام الحكومة الكذابة .

[se_ Elsyed]

أتفق معاك يابو فادي بإن الحكومة حتى الآن تتعامل مع الأزمة بمبدأ " أمين الشرطة " اللي رايح يقبض على واحد مجرم أو على الأقل هايغرمه 10 آلاف جنية لو لقى عنده فرخه عتقيه مربيها فوق السطوح ...

وهذا ما يُنذر بكارثة ...

فالبعض يقول بإن لازم تكون هناك تضحيات .. دي قضية أمن قومي يا عالم ..

أما الوضع بالنسبة لمن أيديهم في النار فسيقولون - وإذا كنت أنا منهم فسأقول وأفعل ذلك - فليذهب الأمن القومي إلى الجحيم إذا كنت أنا لوحدي اللي هادفع الثمن ...

تعرفوا ليه ؟

- صرح السيد المحافظ الدكتور عدلي حسين محافظ القليوبية - التي تُنتج 75 % من إنتاج الدواجن في مصر وبها البورصة الرئيسية بالجمهورية - بإنه سيتم دفع تعويض وقدرة 15 ألف جنيه لكل تاجر تضرر من إعدام الدواجن اللي عنده .... بصوا الحتة اللي جاية دي - وسنعتبره قرض طوييييييل الأجل ..... وأنا بقى أقول له لا مؤخذه يا سيادة الوزير المحافظ ياللي قاعد تحت المكيف وبتشرب توركيش كوفي ... الـ 15 ألف ملطوش بتوعك ما يجيبوش أواني ( مساقي ) بيحطوا فيها ميه للفراخ في أصغر مزرعة تربية دواجن ... لإن سيادتك عارف إن الإستثمارات الموجوده في مجال تربية وتجارة الدواجن تبلغ 17 مليار جنية مصري ويعمل فيها 2 مليون مصر .

- تعالوا بقى نشوف إمبارح الهند اللي بيركبوا الأفيال وبيعملوا لنا سنجام وهما يهيبوا بعض عملت إيه .... صرحت الحكومة الهندية بإنها ستقوم بإعدام نصف مليون دجاجة للحد من إنتشار الوباء .. وستقوم الحكومة بدفع مبلغ وقدره واحد دولار تعويض مقابل كل دجاجة يتم التخلص منها .... دول الهنود .... هـــا واخدين بالكوا من أبو 15 ألف جنية ؟

- ولو جيينا بقى لواحد فلاح كل ثروته تتمثل في شوية فراخ وبط وحمام يملكهم في حوش البيت وقلنا له يا حاج دي قضية أمن قومي ولازم تحرق الحاجات اللي عندك دي بدل ما تموت من الفيروس ... فالراجل بمنتهى الأريحيه هايقول .. لأ أموت أحسن وأهي تعددت الأسباب والموت واحدٌ ... لإن الحكومة بغباءها المعتاد – مش جديد عليهم - ما فهمتش عقليته وراحت تهز طولها وتقوله تحب تموم بالسم ولا نولع فيك ... يعني كله موت ...

- في حين الحكومة لو طلعوا بني آدميين مره واحده في حياتهم الفانية وعوضوا الناس بالعدل بتاع ربنا وطلعوا صادقين معهم فهايلاقوا كل تعاون منهم .

- كمان التجار الي عندهم مزارع تربية دواجن واللي إتخرب بيتهم خراب مستعجل وكل مزرعة فيها 30 أو 40 عامل شغالين وفاتحين بيوت وفجأة كلهم لقوا نفسهم في الشارع .. يروحوا لمين دول ؟

- وعم إسماعيل اللي عنده محل فراخ وبط وبيتعامل كريدت مع التجار وفجأة الحكومة شمعت له المحل ولا قدر يسدد البلاوي اللي عليه ولا قدر يصرف على كوم اللحم اللي وراه وكل هم الحكومة إنها تحاصر الوباء المنتشر .. شوفوا لي حل وأنا راضي ذمتكم وهاوافق على أي حاجة عشان عم إسماعيل يعيش هو وعياله .

- وليه الحكومة مركزة لحد دلوقت على الفراخ مع إن كل الطيور المنزلية وطيور الزينة بتُصاب بالفيروس ؟

- إنتوا عارفين إن في مصر أسواق خاصة متخصصة في تجارة حمام الزينة بيصل حجم التعامل فيها لآلآف ولا أُبالغ إذا قلت ملايين الجنيهات واللي راح سوق السيدة عائشة اللي في القلعة هايعرف أنا باتكلم عن إيه ... وأنا كنت في المرحلة الثانوية وأوائل الجامعة غاوي فقر قصدي غاوي تربية حمام زينة وكان عندي غيه – مش عشه – فوق السطح بتاع بيت العيلة وبأطلع أطير الحمام الصبح والمغرب وكنت مستثمر فيه مبالغ مش بطالة بمقاييس الثمانينات وعندي تتقلع لي عيني وماحدش يقرب من ثروتي ... مع إني كنت بسريايه صغيرة أمام الحيتان اللي كانوا بيربوا الحمام بالآلآف ومنها سلالات نادرة عالية الثمن جداً جداً لدرجة إني لما ماكنتش أقدر أشتري نوع عاجبني فكنت بأشتري بيض للفقس وأخد البيت اللي تحت الحمام اللي عندي وأسرقه من غير ما يحس وابدلة بالبيض جيد السلاله ... يعني كأني سرقت عيال نضيف وشكله حلو وجبته لواحده تاني ترضعه LOOOOL ... الناس دي تعمل إيه يا حكومة ومين هايعوضها ؟

ومين أساساً هايتلفت لقضايا أمن القومي إذا كانت قوميته وبلده هما أول ناس بيسرقوه ويلهفوا حقوقه ؟

[Abofady]

شفيت غليلى والله ياسى السيد , عموما احنا برضه زمل فى تربية الحمام , واول مرة رحت فيها سوق السيدة عيشه وانا بقى جاى من الفلاحين , لقيت حمام حلو كتير , مراسلات على حلبى ,على شقلباظ على قطاوى لزوم الاكل . وكنت راجع من بره ومعايا فلوس كتير, المهم اشتريت , فادى صغير وفرحان ويعبى فى الاقفاص ويحط فى العربية , وكنت شارى شقة جديده فى القاهرة ومفيش فيها اى عفش , دخلت اعمل شاى , وفادى فتح شباك البلكونة , وانت عارف الباقى, الكل طار, و لقيت فادى جاى بيقول انهض يابابا فيه جوز وحش مبيطرش (القطاوى).

تصدق بالله انا لااستطع ان اقف جوار زوجتى وهى تذبح الفراخ او الحمام , يااخى بيصعبوا عليا , صحيح باكل حلو , لكن الذبح لالا.تخيل هذه الثروة العظيمة الناس بترميها فى الشوارع , الحكومة ماعندهاش مجازر كفاية . امبارح فى التليفزيون سمعت واحد من الغربية بيقول المجازر بتاخد 275قرش على دبح وتنظيف الفرخة , لسه التكييس والتغليف والنقل , ومحدش بيشترى . هذا اقل درس تواجهه الحكومة ,فالوباء معروف من كام شهر ولم يتحرك احد,وهذا دليل على ان الامور ماشية معانا بالستر وببركة دعاء الوالدين , امال لو دولة اعتدت علينا لا قدر الله هنعمل ايه , هنشوف الهرجلة اللى الحكومة واقعة فيها الان , ولما هما مش عارفيين اى حاجة فى اى كلام عاملين رجالة علينا ليه , دا الهنود طلعوا احسن مننا , انا رأيى ان وزير الصحة والزراعة يستقيلوا بقى علشان العملية مش ناقصة يكفى العبارة