ايه هي عيوبك ياتري؟؟؟؟

[Reham]

الموضوع بإختصار باين من عنوانه.....

عنيد...مغرور...عصبي....مش اجتماعي...طيب(والطيبة ماتنفعش في الزمن ده) ...شرير....بخيل.........الخ الخ الخ

يعني كل واحد يدخل ويغمض عينه ويحط عيوبه....عيبين تلاتة من بتوعه مش اكتر عشان الحسد بس.....

انتوا عارفين طبع

ومحدش يقوللي انا ماعنديش عيوب

فيه ناس هنا في المنتدي انا قدرت اكون شخصيتهم من خلال محاوراتهم

فيه ناس عصبيه جدا..... :unsure:

وفيه ناس مابتسمعش غير صوت نفسها

وفيه ناس متسرعة في الحكم ....

وفيه ناس بتتمنظر............

اتفضلوا انتوا وقولوا بقي

انا في انتظاركم

[سقراط المصري]

احيانا المشي في خط مستقيم بيكون عيب عندي او بينظر اليه على انه عيب

من اكبر عيوبي الطقوسيه

يعني لي طقوس يوميه قيدت بها نفسي وتتلازم مع

اشياء يوميه حياتيه اقوم بها وعيبها انها بستهلك وقت كبير مني

زمان كنت عصبي ودلوقت لا انا اصبحت هادى يمكن بحكم السن

اه اكبر عيب عندي ان ممكن اقول او اناقش افكاري مع مجموعه من الاغبياء وده بينتج عنه ضياع الفكره وضحك الاخرين والاحساس بالعزله

ولكن في المقابل الزمن ومرور الوقت بتثبت صدق كلامي

في اشياء بتكون ممله بدرجه فظيعه الحمدلله عندي قدر رهيب من الاطاقه على تحمل الملل ولوواحد شغال معايا وبيمل بسرعه بنختلف دايما

سقراط

[tarek_almeghallawy]

لسه يا طنط غاوية مواضيع من النوع ده

طب قولي أنتي الأول

وبعدين مين الناس اللي كونتي فكرة عن عيوبهم

طبعاً أنا مش منهم

الحمدلله أنا زي الفل مليش عيوب

كلهم كده خمسين ستين عيب ومش ها أقولهم

عندي شوية عيوب في المحاورات

يا ترى حد مشاركني فيهم

مثلاً يعني مثلاً

أحب الناس تقرأ كلامي وترد عليا... ولا يعني باكلم نفسي

وأحب أشيد بالمشرفين.. مش عارف ليه..يمتنع التعليق بخبث!!

وأحب أترقى... أصل أنا غاوي الميري

وعندي عيب محاوراتي شديد..فيه ناس بتخاف منه مش عارف ليه

أنا طموح

[MZohairy]

أنا معنديش عيوب :unsure:

باجماع الآراء mfb:

[drhusseinali]

أنا معنديش عيوب :unsure:

باجماع الآراء mfb:

<{POST_SNAPBACK}>

ادي اول عيب يا زهيري باشا

[MZohairy]

لا بجد من أهم عيوبي هو التواضع وعدم الغرور

و ده واضح من المداخله أعلاه :unsure:

[فــيــروز]

عيوب كتييييييييره ..

أهمها فى وجهة نظرى عدم مصارحة الناس بما يضايقنى منهم فى وقت مناسب .. أنا بافضل استحملهم كتييييييييير .. لدرجة انهم ممكن يتخيلوا انهم ماغلطوش فى أى حاجه .. وفجأه :D أنهى العلاقه تماما بلا أى رجعه :D

[مصرية الهوى]

ايه ده يا ريهام ؟ دي " سيرة وانفضحت " والا إيه ;) ؟؟

لازمتها ايه الفضايح يا بنتي ...

خلي الطابق مستور :D ..

طب استحملي بقى .. وجع الدماغ اللي هسببهولك ..

يلا مش مشكلة خلينا نفضفض شويا ....

من عيوبي ان لما حد بيسألني عن رأيي في حاجه وخصوصا لو كانت حاجه تخصه ..احاول اقول حاجه تعجبه .. بأحاول قدر الامكان مقولش حاجه تزعله .. يعني نسبة مجاملة الناس عندي زيادة شويا

وكمان بأتكسف اقول رأيي الخاص في أي أمر من الأمور لكل الناس .. ولما اكون مع ستات اكبر مني غالبا بامشي على رأيهم .. واتكسف اقول رايي ..

عيبي برضه انه صعب أقول لحد لأ .. يعني ساعات حد بيطلب مني حاجه اعملها له .. ويكون عندي شغل .. بس اتكسف اني اقول لأ ..

عندي عيب برضه اني لما ابقى بين ناس مملين .. ميعجبونيش ..

خلاص مستحيل احاول اني اندمج معهم .. او اتكلم معاهم .. الملل والضيق بيبان على وشي .. واتفضح ..

ولما يتكون عندي اتجاه سلبي تجاه اي شيء .. مقدرش اغير فكرتي عنه ابدا .. حتى مجرد المحاولة مقدرش ..

عيبي برضه الاهمال .. والتسويف .. وتأجيل الأعمال .. وتضييع الوقت ..

كمان الحالة المزاجية المتقلبة .. تلاقيني مبسوطة من الحاجة ويا سلام ..شويا واقوم قالبه الطرابيزة ومطربقة الدنيا فوق دماغ اللي قدامي ..

كمان فيه حاجه مش عارفه اذا كانت عيب والا لأ ؟؟ .. اني بحاول بقدر الامكان ان محدش يزعل مني .. بحاول اراضي كل الناس مع انه رضا الناس غاية لا تدرك.. واتنازل عن حاجات كتير عشان بس ميزعلوش مني .. وكتير الحكاية دي بتتعبني ..

برضه من عيوبي اني محبش اطلب من حد حاجه يعملها لي .. ولما اطلب بتلاقيني طول الوقت .. معلهش انا حاسه اني مضايقاك ؟؟ .. معلهش انا خايفة لااكون خدت من وقتك .. معلهش ... لحد ما اللي قدامي يزهق ويرمي الحاجه في وشي ..

برضه تأنيب الضمير عندي زايد عشرين حبه .. و كل مشاكل الدنيا بأحس ان انا المسئولة عنها ..

يلا كفايه كده النهارده .. عشان منكدش عليكم بعدين تزعلوا مني ..بعدين يأنبني ضميري :D ..

وتوهنا في المتاهه ;)

[Reham]

لسه يا طنط غاوية مواضيع من النوع ده

طب قولي أنتي الأول

وبعدين مين الناس اللي كونتي فكرة عن عيوبهم

طبعاً أنا مش منهم

الحمدلله أنا زي الفل مليش عيوب

كلهم كده خمسين ستين عيب ومش ها أقولهم

عندي شوية عيوب في المحاورات

يا ترى حد مشاركني فيهم

مثلاً يعني مثلاً

أحب الناس تقرأ كلامي وترد عليا... ولا يعني باكلم نفسي

وأحب أشيد بالمشرفين.. مش عارف ليه..يمتنع التعليق بخبث!!

وأحب أترقى... أصل أنا غاوي الميري

وعندي عيب محاوراتي شديد..فيه ناس بتخاف منه مش عارف ليه

أنا طموح

<{POST_SNAPBACK}>

[/quote

مش عارفه ليه ياطارق بيه انا بحب ادخل في نفساويات الناس كده واعرف بيحبوا ايه وبيفكروا ازاي

اصلي بحب علم النفس اوي :D

مع انني علمي

أنا معنديش عيوب :D

باجماع الآراء ;)

<{POST_SNAPBACK}>

واضح اوي يابشمهندس الكل انك من غير اي عيوب

ياكسيلانس

كل شيئ واضح

وعلي وشك يبان يانداغ اللبان

وكل شيئن انكشفن وبان

[Reham]

والله ياجيجي يابنتي مش عارفه اقولك ايه ؟؟؟؟؟

انا اللي خلاني اتكلم في الموضوع ده انني لقيت نفسي فيا حاجات كتير مش عارفة اتحكم في نفسي فيها ونفس حد يساعدني وأغيرها

عندك مثلا ....العصبية

مشكلتي الازلية من صغري ومع انني اتحسنت كتير اوي عما كنت صغيره بس برده عايزه مجهود اكتر مع نفسي

اصلي بعيد عنك عندي عرق صعيدي من بابا وتركي من ماما

والله يكون في عونهم....اللي استحملوني ساعتها واللي بيستحملوني دلوقتي

ملاحظه ان معظم عيوبك هي عيوبي بأستثناء الاهمال وتأجيل الاعمال وتضييع الوقت انا بقي عندي العكس عيوبي انني منظمة اكتر من اللازم لدرجة مرضيه وده زعل مني حماتي لما كانت بتزورني هنا......تصوري فيه حد بيضايق من النظام والنضافه ياناس...

اما الوقت فبعمل حساب كل دقيقة وثانية فيه وده بيكون علي حساب اعصابي كمان... يعني كله بيجمع علي اعصابي وربنا يستر

[NoorJehan]

الprocrastination

أو التلكؤ على ما أظن...بما يعنى يكون عندك حاجه لازم تخلصها وعارف كده بقالك 7000 شهر مثلا، وتيجى تخلصها قبل معادها بدقيقتين...

وصفه جميله للتعرض لسكتات قلبيه من كتر التوتر الذى يصاحب فعل الأشياء على آخر لحظه

مثال آخر..هناك مناسبه محتاج تشترى لها هديه وبرضه تقعد تلف وتدور على آخر لحظه وتتأخر وتثير حنق الآخرين...طب ليه مدورتش من بدرى :angry2:

.

.

جزيت خيرا يا ريهام على هذا الموضوع، فربما هى فرصه لمواجهه عيوبنا

man to man

[shahd]

لما بحب بحب بعنف ولما بكره برضه بكره بعنف

لما بزعل لا بلوم ولا بعاتب بس ببعد وما برجعش

ممكن اسامح على الأسائة بس عمري ما بنساها

اتفضحنا ولله الحمد :)

[مسافر زاده الخيال]

موضوع انساني بجد.........

من عيوبي للاسف....

1. التسويف.. يعني مثلا عندي كتب وروايات بالانقليزي المفروض اقراها لكن تمر سنين وما بعملش حاجه يعني عندي روايات من سنه 94 لغاية اليوم مقريت الا كم صفحه.

اول كتاب انقليزي علمي اشتريته سنة 97 لكن قريته وخلصت منه 2004؟؟؟(حد عنده نصيحه للعلاج)

2.ضعف الاراده.....يعني انا اعاني من زياده الوزن وكم مره فشلت في انواع الرجيم.

3.رغم اني قرأت الكثير من الكتب (بالنسبة للبيئة اللي انا منها....وبيعتبروني مثقف) لكن للاسف انا فاشل جدا في معرفة خبايا الناس وباعامل اغلبهم على اساس انهم ملائكه (ودا ضرني في شغلي بالجامد) :)

4.من اخطر عيوبي عدم معرفتي بكيفية الحفاظ على المال .........

5.الاحساس بالضياع في كثير من الاحيان وعشان كده باعتبر نفسي

(مسافر زاده الخيال)

وسلامو عليكم

[سقراط المصري]

4.من اخطر عيوبي عدم معرفتي بكيفية الحفاظ على المال .........

 

    (مسافر زاده الخيال)

  وسلامو عليكم

<{POST_SNAPBACK}>

لا تقلق يا مواطن فقط اعطي لأخيك سقراط هذا المال وانا هحفظهولك عندي في البنك بتاعي

بنك ذنبكوا على جنبوكو وابقىقابلني

سقراط مستثمر صغير ومشروع لحرامي كبير

:) :)

[مصري المصري]

الكسل .. الشديد ..

كل زملائي بمجرد ما ينزلوا في مصر يبدأوا عمل إجراءات الأجازة عشان يخلصوها بدري .. أما أنا .... وحدي أنا .... !! :D :D فآخر أسبوعين في الأجازة تلاقيني لسة بسأل الموظف على الإجراءات المطلوبة ..

حاجة تانية حجز طيران العودة طبعاً معظمكم عارفين لخبطة الحجوزات .. ومع ذلك برضه أروح أحجز آخر أسبوع في الأجازة .. والغريب أني ألاقي الحجز متأكد لوحده .. ( بالعند فيَّا ;) :D ) والناس اللي راحت بدرى لايصة ومواعيدها متلخبطة .. :blush:

معلش حاجة تالتة وخلاص .. أعتقد أني آخر واحد في مصر هيعمل البطاقة الجديدة .. :D

السؤال الذي أفكر فيه دائما ومش لاقيله حل .. يقول المثل : العصفور المبكر هو الذي يلتقط الدودة .. ممكن نقلبه ونقول : الدودة اللي تطلع مبكراً من جحرها إيه اللي يحصلها ... ؟؟ :D :wub:

وشكراً لريهام على موضوعها الجميل ..

تم تعديل 23 فبراير 2006 بواسطة مصري المصري

[Reham]

والله ياجماعة انا مش عارفة اقولكم ايه

اولا اشكركم علي مروركم :blush:

ثانيا برده بشكركم علي انكم لفتوا نظري لكام عيب كده الواحد يشوف هيصلحه ازاي في نفسه :D

[NoorJehan]

السؤال الذي أفكر فيه دائما ومش لاقيله حل .. يقول المثل : العصفور المبكر هو الذي يلتقط الدودة .. ممكن نقلبه ونقول : الدودة اللي تطلع مبكراً من جحرها إيه اللي يحصلها ... ؟؟

:excl:

ماهى الدوده لو كانت صحيت بقى بدرى شويه بدل كسلها ده (خمسه الصبح بدل الثامنه مثلا)، كانت هتتفادى العصفوره، شفت إزاى :rolleyes:

يلا أدينا بنألف أمثله لله علشان ندفع بعض للأمام ;)

أنا أيضا كنت أقعد أقول إيه الطلاب العبط الموتورين دول اللى يروحوا يشتروا كتب الكليه بدرى وأصلا السنه لم تبدأ...وبالوقت فعلا وجدت إن على أول السنه، بتخلص النسخ الرخيصه وممكن تدفع 500 جنيه فرق..

إذا، الدوده دائما على حق وبلاش الإشاعات المغرضه دى عنها ;)

ثانيا برده بشكركم علي انكم لفتوا نظري لكام عيب كده الواحد يشوف هيصلحه ازاي في نفسه

زى إيه يا ريهام، هه هه؟ (سؤال خبيث) :excl:

[nancy]

انا عيوبى

1- انى مش باعرف ارد بسرعة كلمة تكسر الى يزعلنا فى نفس اللحظة بافضل زعلانة انى مختش حقى

2- ان ضميرى يفضل يانب فيا لما اغلس على حد من غير قصد وانا فاكرة انى باهزر بس

3- ان اى حد اتكلم معاه افضل اقلب الكلام فى دماغى كتير يمكن يكون فية معنى فاتنى وخصوصا لما يكون شخص جديد عليا

4- انى باكلم نفسى جوايا كتير وافتح مواضيع للمناقشة لدرجة انى بابقى متغاظة منى واكون عوزة انام ومش عرفة اقفل دماغى

5-انى مش باعرف اجى على نفسى يعنى ممكن اعيط لو حسيت انى عوزة كدة او اضحك لو حسيت برضة مش مهم المكان ولا الزمان المهم انا حسة باية ولو قاعدة مع ناس مش عجبنى ممكن اقوم امشى من غير مبررات او توضيح يعنى ممكن يتقال عليا شخصية باردة

كدة كفاية خلى الباقى ليه :sad:

[عصفور طاير]

Reham  Feb 22 2006, 12:54 AM 

أصلي بعيد عنك عندي عرق صعيدي من بابا وتركي من ماما

والله يكون في عونهم....اللي استحملوني ساعتها واللي بيستحملوني دلوقتي

يا ريهام بصراحة كتر خيرك انتي اللي استحملتي الصعايدة والعثمانلية مع بعض.. دول يا بنتي راسهم أنشف من بعض.

شهد  Feb 22 2006, 11:58 PM 

لما بحب بحب بعنف ولما بكره برضه بكره بعنف

لما بزعل لا بلوم ولا بعاتب بس ببعد وما برجعش

ممكن اسامح على الأسائة بس عمري ما بنساها

مسافر زاده الخيال  Feb 23 2006, 02:21 AM 

-من اخطر عيوبي عدم معرفتي بكيفية الحفاظ على المال

-ضعف الاراده.....

-الاحساس بالضياع في كثير من الاحيان

nancy   Feb 26 2006, 06:21 PM 

انى مش باعرف اجى على نفسى يعنى ممكن اعيط لو حسيت انى عوزة كدة او اضحك لو حسيت برضة مش مهم المكان ولا الزمان المهم انا حسة باية ولو قاعدة مع ناس مش عجبنى ممكن اقوم امشى من غير مبررات او توضيح يعنى ممكن يتقال عليا شخصية باردة

والله يا شيخين كأنكم بتتكلمو عني.. ولكن نفسي بس أكون زي نانسي في الجزء الأخير.

أما جيجي

مصرية الهوى  Feb 22 2006, 12:26 AM 

فأعتقد إن الأسهل إنك كنتي تقولي المميزات أحسن.. إيه جلد الذات دا كله.. والله أحييكي على صراحتك العنيفة جدا مع نفسك، وإنك عارفة تحطي إيدك على عيوبك.

أما أنا فأعتقد أن عيوبي برضه كتيرة جدا.. منها على سبيل المثال فقط.. إني شخصية اكتئابية، يعني ممكن أغنية أو مقطع موسيقي أو بيت شعر أو مشهد في الشارع يغير مودي تماما ويخليني سوداوي ومش عارف أخلص من الحالة دي طول اليوم.

والحاجة التانية إني في الشغل صبور لدرجة إني بتخنق من نفسي، يعني ساعات باحس إني عايز اتخانق مع نفسي، وبالفعل باتخانق، بسبب إني ممكن اشتغل عشر ساعات متواصلة من غير ما أقوم من مكاني، في حين إن مش كل الشغل مطلوب مني، لكني ورطت نفسي في تحمل مسئوليتة.

تالت حاجة ـ وطبعا مش الأخيرة ـ إني أصعب حاجة على نفسي إني أقول إني عملت كذا أو أمدح نفسي أو أطالب حتى بحقي.. فأنا أكتر واحد في الدنيا ممكن يشتغل ببلاش لأني محرج اتكلم في الفلوس.

رابع حاجة إني لا أعي أي معنى للفلوس على الإطلاق، يعني الله جاب الله خد الله عليه العوض، وعمري ما حسيت إن صرفت كتير أو ضيعت اللي معايا، رغم إني باضيع من غير ماعرف أنا ضيعتهم في إيه أصلا، ولا أعرف عدد الفلوس اللي في جيبي غير لما أكون مفلس بس.

وأخيرا وليس آخرا.. أنا غير إجتماعي.. يعني ممكن أقعد في مكان عشر سنين من غير ماعرف اللي فيه، إلا عدد محدود جدا من الناس، وباعرفهم بعد وقت طويل كمان.

عاجبكم كده.. أديني قلت والأمر لله.

تم تعديل 1 مارس 2006 بواسطة عصفور طاير

[Th!nk]

عيبى الأساسى هو أننى أعيش لنفسى فقط

ومن واقع هذه التجربة تعلمت أنه الذى يعيش لنفسه فقط هو أتعس أنسان فى الدنيا . هذا غير أنه بيعيش صغير ويموت صغير... لكن أعتقد أننى أبذل بعض المحاولات للتغيير... وأن شاء الله تجيب نتيجة...