فين فلوس التأمينات الإجتماعية يا حكومة ؟

[se_ Elsyed]

في غمرة الأحداث المتلاحقة في مصر من إنتخابات رئاسية هزلية .. إلى إنتخابات برلمانية دامية ... إلى تغييرات وزارية مزاجية جمالية ... أقدمت الحكومة في ظلام الليل الدامس على إرتكاب جريمة سرقة مُنظمة كانت تخطط لها منذ عشرات السنين وتم تأجيل ساعة التنفيذ إلى وقت يكون الشعب فيه في دوامة ولا يعلم فيها رأسه من رجليه ..

وقد حانت الساعة بالفعل ..

أما الجريمة يا سادة فهي جرمية سطو مُسلح على اموال التأمينات الإجتماعية الخاصة بموظفي الدولة وموظفي القطاع الخاص ... واللي الموظف بيطفح الدم طول عمره عشان لما يطلع معاش يلاقي قرشين يصرف منهم على نفسه وعياله بعد ما بيكون خلاص لا يصلُح للعمل والمفروض .. دا المفروض إنه يجني ثمار شقاة وعمله وتعبه .. وياريتها بتبقى أموال طائلة أو مبالغ تعيشه عيشه مرتاحه إلا إني والله العظيم والله على ما أقول شهيد أعرف ناس أفنوا عمرهم في خدمة الغُز .. قصدي الحكومة وعملوا بجد وإخلاص لمدد تزيد عن 25 عاماً - أشغال شاقة - ولما أُحيلوا إلى التقاعد كان معاشهم 200 أو 250 جنية ... يعني لا مؤخذه ما يجيش ثمن قميص وبنطلون لشاب روش .. أو ثمن خروجة الناس بتخرجها هي وعائلتهم عشان يشموا شوية هوا .... وهؤلاء المساكين اللي بالملايين مُطالبين إنهم يدفعوا إيجارات منازلهم .. ومصاريف تعليم أولادهم وعلاجهم وكسوتهم وأكلهم وشربهم واللحمة اللي بقت بـ 35 جنية بالعضم والشغت .. من هذا المبلغ ..

ولإن الحكومة ماشية معانا بمبدأ " الضرب في الميت حلال... مصفي " فقد قامت في أخر تعديل وزاري بإلغاء وزارة التأمينات وضمها إلى وزارة المالية ....

طب حد يقولي وإيه يعني .... إنتوا لا بيعجبكوا العجب ولا الصيام في رجب ؟

مش أحسن من وزارة طويلة عريضة في شارع ريحان إسمها وزارة التأمينات اللي دايماً وزراءها ستات - مش صدفة من مبارك وحكوماته ولكنها مخطط على أساس إن الست بتبقى مِنكسرة وبتسمع الكلام - .. يا أخي إحمدوا ربنا وإعتبروها ضغط مصاريف وتوفير في الأيام السودا اللي موريها لنا مبارك وألاوده ؟

أقول له حاسب يا حبيبي إحنا مش قاعدين على مصطبة أبويا الحاج بسطويسي وبنشرب شاي وبناخد وندي في الكلام ...

فلما تعرف إن وزارة التأمينات الإجتماعية هي من أغنى الوزارات في مصر هي ووزارة الأوقاف ...

ولما تعرف إن الحكومة ومبارك بالذات كانوا بيعملوا محاولات مستميتة من زمان عشان يستلفوا الفلوس دي عشان يدارو على خيبتهم وعجزهم لكن لم تفلح تلك المحاولات ...

ولما تعرف إن وزارة المالية في تعريف مهامها ببساطة هي اللي بتقوم بتدبير ميزانيات الوزارات والمحافظات والمشاريع ..

يبقى لما نضم التأمينات للمالية يابا الحاج بسطويس هايبقى إيه ؟

الله ينور عليك

هايبقى أبويا عند أبوك ... وأخويا عند اخوك ... واللي في جيبي في جيبك .. والمليان يكب على الفاضي ...

طب وفلوس الناس بتوع المعاشات ؟

يا عم يحلها ربنا ... عيب يا حاج دي أمانة في رقبتنا .. وإنت عارف إننا خير من يصون الأمانات ... إذا كانت البلد بحالها ومالها في رقبتنا من 25 سنة وكنا خلال تلك الفترة شايلنها في نينا ... حتى شوف عنينا بقت معمسة وحمره إزاي ؟

وعلى فكرة أحمد نظيف في أول خطاب له أمام مجلس الشعب بعد تشكيل الوزارة الجديدة أكد إن فلوس التأمينات أمانة عند الحكومة والحكومة ملتزمة بها ...

هأو أو أو

يعني يابا الحاج سلموا القُط مفتاح الكرار ...

ومليارات التأمينات الحكومة هاتشتغل بها في البورصة ... يعني لو القُطن إنضرب في البورصة يبقى فلوسك راحت يا حاج .. وهي كده شغلانتنا دي مكسب وخسارة ... و يبقى ممكن عبد الصمد أفندي وأم الخير هانم ياخدوا معاشهم أخر الشهر ... رز ومكرونة وسكر قوالب وفرختين ماركة إنفلونزا الطيور ....

وحسبنا الله ونعم الوكيل عن كل ساكت عن الحق ...

أسف للإطالة .. وأقرأوا معي هذا الخبر في الجمهورية اليوم

العزالي : قانون غالي يهدد بكارثة اجتماعية

كتب هشام البسيوني:

أكد عبدالمنعم العزالي رئيس النقابة العامة للعاملين بالصناعات المعدنية الهندسية أن النقابة لن تتنازل عن القضية المرفوعة ضد الحكومة لفصل التأمينات عن وزارة المالية حفاظا علي حقوق أصحاب المعاشات.

قال: إن من يتهمنا بالمزايدة يسعي للبقاء في كرسي الوزارة علي حساب العمال.. انتقد العزالي تصريحات د. يوسف بطرس وزير المالية خلال اجتماعه واعضاء لجنة القوي العاملة بمجلس الشعب حول نية الحكومة إعداد مشاريع قوانين جديدة للتأمينات يستفيد من معاشها المسن فقط..أكد أن ذلك يهدد بكارثة اجتماعية لأنه عند وفاة المستفيد ستنهار أسرته ولن يكون أمام أفرادها سوي الانحراف.