شحاتة المعسل

[mohameddessouki]

… شحاتة المعسل

هنا شقلبان……محطة إذاعة حلاوة زمان

يسر الإذاعة…وميسركوش

وبهذه المناسبة….وما بندعكوش

نقدم إليكم….. ولا تقرفوش

شحاتة المعسل… بدون رتوش

شنبدر سماسرة بلاد العمار

معمر جراسن للعب القمار

وخارب مزارع…وتاجر خضار

وعقبال أملتك…أمير الجيوش

متقدرش تنكر تقول معرفوش

ما تقدرش أيضا تقول ما سمعوش

شحاتة المعسل ..حبيب القلوب

يزيل البقع.. والهموم والكرب

يأنفس..يأفين..يبلبع حبوب

ويفضل يهلفط ولا تفهموش

وتفهم ما تفهم دا ميهمناش

لان أنت فاهم وعامل طناش

ح تنكر وتخلف ح أقول لك بلاش

حتتعب دماغنا وتتعب كمان

• * *

هنا شقلبان محطة إذاعة حلاوة زمان

لان المخبى ظهر واستبان

وكل المسائل بدت للعيان

وطلعت حكاوي ونزلت كمان

عن التهريبية وعن كيت وكان

وعن محسوبية وعن ألعبان

ظهر في المدينة كأنة طوفان

وغرق مراكب وسوح غيطان

وبعض المراكب ح تغرق كمان

وأزمة مساكن وأزمة أمان

وعالم بياكل في عالم جعان

وريحة مؤامرة في جو المكان

مخطط خيانة مع الأمريكان

لدبح العشيرة وحرق الجيران

وفيه ناس بترغرى ولازم بيان

كما ابلغونا جميع الودان

لهذا وذاكا ..وتكلم كمان

نقدم إليكم عروسة وحصان

شحاتة المعسل ..وهذا البيان

• * *

هنا شقلبان محطة إذاعة حلاوة زمان

بسم الله

سلام عليكم

وسلمون وموز

وأما المسائل فهنجف ولوز

فيا اخواتى إليكم بياني كما هو آت

• * *

جميع المسائل ..تمام التمام

وكل الكلام دا ..مجرد كلام

فصبرا جميلا ولا تقلقوش

وشغل الضغاين أنا ما اقبلوش

ما فيش اى حاجة

على الطلاق والعتاق بالتلاتة

ما فيه اى حاجة

وقدر كمان أن فيه حاجة ما فيش اى حاجة

مالوش لازمة الكلام واللجاجة

وعيب أن عيل يسوق السماجة

ويعمل لي باللو.. ويعمل ديباجة

أنا بطبعي ضد السماسرة الكبار

بحكم المنافسة وحكم الجوار

لكن مش ف طبعي انى اعمل فضيحة

لواحد زميلي هبش صفيحة

ما كل الزمايل بتهبش صفايح

وكل اللي جاى مش زى اللي رايح

فيا أيها الشعب صهين تفلعص

مساء التنفس مساء الروايح

………

كلام عن السماسرة كلام عن دعارة

حاجات مش صحيحة ..جمل مستعارة

وعايزين يخلوا البلد اردغانة

وعايزينى اسيب البلد من زمان

وأنا مش حا سلم و اسيب الأمان

ولا بالبوليس والنيابة كمان

فيا أيها الشعب كمل جميلك

وصبرا والزم حتيجى المصارى

وتاكل وتشرب تبع ما يأتيك

وتغرق في البحر العبيد والجواري

وترسم حياتك حسب ما يرائيلك

وتملا الحواري فساقي وقصارى

تسبح بحمدك وتشكر جميلك

وفضل الزبالة وطفح المجارى

ختاما سلاما وآخر كلاما

ضرورا يسود الهدوء والوئاما

فماذا و إلا ح اطربقها واللا

واهرب فلوسي وأسافر قواما

سلام عليكم وسلمون وموز

بصفتي رئيسا .. وأبا.. وجوز

(من قصيدة لأحمد فؤاد نجم باسم بيان هام )