يا موظفينك يا كوريا

[se_ Elsyed]

خبر قرأته من يومين ولم اتمالك نفسي من الضوحك - مش الضحك -

قال إيه .. خير اللهم اجعله خير بعض الشركات والمصانع في كوريا الجنوبية سمحت لموظفينها ييجوا يوم في الإسبوع بملابس النوم .. عشان يقضوا على الروتين والملل ويبقى في جو من الأُلفت ( مين جاب سيرة أُلفت هنا ؟ :D ) وبيقولك ياخويا إن الموظفين بقى تفننوا في الملابس دي .. واللي جه ببجاما مُزركشة .. واللي جه ولابس الزعبوط على راسه زي عم حسن فايق في فيلم شارع الحب .. واللي جت ولابسه إسم الله على مقامك ... إحم إحم أندر وير ولا مؤخذه :D

فقلت ما بدهاش ... إقدح زينات فكرك يا أبو الأسيان وأفقعهم واحد مقال ساخن تُهاجم فيه الحكومة الكورية الخليعة لعلها ترتدع وترجع عن قرارها - بس محتاج حد يترجم لهم المقال ده باللغة السينسيكريتية عشان يفهموه - ....

ولو إني ماخبيش عليكو القرار مفيد لبعض الناس خصوصاً إنه هايخلق نوع من التلاحم الوظيفي ... يعني هاتلاقي الموظفين بقوا يحبوا بعض أكثر .. وألتحموا ببعض وبقى فيه بينهم مشاعر وأحاسيس مختلفة وماحدش هايكره التاني .. كما إنه هايخلق أيضاً نوع من التلاحم الجماهيري من جموع المواطنين مع الموظفات قصدي الموظفين اللي بيخدموهم ويفنوا عمرهم في الخدمة العامة لدرجة إنهم ما بيلحقوش يغيروا هدومهم من كثر حبهم في الشغل .. والواحد اللي ما كانش بيطيق يسمع إسم مؤسسة حكومية من عذاب الروتين وفوت علينا بكره يا سيد .. فدلوقت هايتشجع وتلاقي المواطن الشقي من دول رايح من النجمه المؤسسة عشان قال إيه يسلم على الموظفات .. قصدي الموظفين اللي جايين بعبلهم وهما لسه صاحيين من النوم :P .. وهايتمنى إن الموظفين يقولوا له فوت علينا بكره وبعده وبعده ومش بعيد يروح يسكن جنبهم :angry2:

بس بيني وبينكم الناس الكوريين بتوع الهيونداي والسامسونج دول رايقين والأفكار دي تلائمهم تماماً .. أما أحنا فبالصلاتو عالنبي نايمين خلقه ومش محتاجين يوم ننام فيه في الشغل ..لإنك للو دخلت برجلك اليمين الشركة من دول تلاقيهم نايمين ومترصصين جنب بعض ولا كإنك في أوضة نوم جماعية ... لكن بيني وبينكم الفكرة حلوه للرجالة يومش مُكلفة ، يعني الواحد يقوم الصبح يروح ضارب البيجاما المخططة على الطاقية اللي من نفس نوع ولون قماش البيجاما على الشبشب أبو صباع وخلصت العملية .. اما لو كان موظف درجة أولى وريتش يروح مطقم الترينك سوت ( على رأي اللمبي ) ، وطبعاً هانعمل حساب المديرين فما فوق ودول طبعاً نتوقع ييجوا بالروب دي شامبر والشبشب الفرو - اللي نفسي ومُنى عيني أشتري واحد زيه وأفضل رايح جاي به في الشقة عشان أحس إني أرُستقراطي بس مش بالعه عشان بيدي على حريمي - ..

لكن لو الموضوع ده إتطبق عندنا و جه ناحية الموظفات الستات .. فيبقى على جُثتي واللي هاشوفها رايحه الشغل الصبح وراكبه الأتوبيس بــــ إحم إحم ...ملابس النوم .... هاجرجرها من شعرها وأرميها بره الأتوبيس وأجيب جوزها وأضربوا قلمين على قفاه .. آه يعني مش أدخل الشركة من دول وكإني داخل محل لانجيري ..

ما علينا ... أنا على السريع كده ألفت إسكتش بأتخيل فيه مصلحة حكومية في اليوم بتاع البيجامات ده .. وأتمنى إنه يعجبكم :

نلتقي بعد الفاصل ( لمزيداً من الساسبينس )

[Scorpion]

بما ان ساسبينس ابو السيد بيخللي الواحد ينام .. فانا اتسحبت للصالون عنده و سحبت اول ورقة لقيته مخربش عليها شوية كلام ... و لو ما كملش ... حضطر اطلع باقي الحلقات ....

سكوربيون الشهير باللهو الخفي :rolleyes:

- ايه الهرجلة دي يا استاذ سامي ... انت فاكر نفسك فين .. ازاي يا فندي تيجي المصلحة ببدلة و كرافتة .. انت فاكر نفسك فين ؟

- آسف يا حضرة المدير ... بس مجبر والله .. كنت سهران طول الليل في بدلة بارتي ... و جيت من الحفلة عالشغل طوالي .. مالحقتش اروح البيت اغير ...

- دي مشكلتك يا استاذ ... لأ و كمان حالق دقنك ...مخصوم منك عشر تيام .... ( ثم متلفتآ حوله ) ... هي مدام فتحية لسه ما جاتش و الا ايه ؟

- لأ يا فندم وصلت .. بس في الحمام ...

- هو كل مرة ادور عليها الاقيها في الحمام ... لما تبقي تخرج ابقي ابعتهالي بالميزانية يا بهجت ...

- حاضر يا فندم

ما ان يخرج حتي تظهر فتحية من وراء دولاب الملفات ...

- يا لهوي يا لهوي ... طب اخش عليه بالجزمة البوت ازاي ... ده ايه الهم ده ... و النبي يا نادية سلفيني القبقاب ...

- نعم يا أختي ... هو انا كنت خلفتك و نسيتك ...

- طب المنديل ابو اوية بتاعك يا سهام ... ابوس ايدك .. اهو يتلهي فيه و ما يخدش باله من الجزمة...

ترمي سهام المنديل ابو اوية بزهق واضح و تتناوله فتحية بسرعة و تثبته فوق رأسها ثم تتناول دوسيه الميزانية و تتجه الي غرفة المدير ...

- ايه يا فتحية .. انتي حتقدمي الميزانية للمدير في دوسيه ...

- طب اعمل ايه يا بهجت ؟

- لفيها في جرنان و اخلصي ... احنا مش ناقصين النهارده .. ده باين عليه متزربن و اليوم مش حيفوت ....

يتبع

[مصرية الهوى]

الله ..

ياريتني كنت كورية :rolleyes: ..

عشان لما اصحى متأخرة .. مقعدش البس واتزوق والذي منه .. بالبيجامه والشعر المنكوش اروح الكلية ..

ومحدش يقدر يقولي تلت التلاتة كم ؟؟ ;)

ربنا يخليك ياعمو سكوب ..

اصلنا اتحرقنا من ساسبينس ابو السيد ده ;)

تم تعديل 24 فبراير 2006 بواسطة مصرية الهوى

[Reham]

ايه ده كله ايه ده كله ياسي السيدبيه

كل ده ساسبينس

تعبنا وحياة السيد الوالد

نزل الاسكتش بدل مانزل بأغنية ولا أعلان

انت حر

وقد أذعر من أذنر

[se_ Elsyed]

نزل الاسكتش بدل مانزل بأغنية ولا أعلان

لأ أُغنية لأ ... وخصوصاً أغاني زُهيري الحمضانة ...

شكراً يا سكوب ... وعمولتك محفوظة ... عدي على الكاشير خد لك صابونة .

---------------

نبدأ الأسكيتش

أنعور أفندي : Joud Morning شِله .... هــا عاملين إيه النهاردة ؟ .... يا عبدو فين الفطار الكومبليه بتاعي يا ولد ؟

عبدو ( الفراش ) يدلف إلى المكتب مرتدياً جلباباً مخططاً وطاقية بنفس لون الجلباب : صباح الخير يا إكسلنس .. أنا جهزت لحضرتك الفطار . عصير الفلات فوت اللي بتشربه على الريق .. والعيش المدور اللي شبه البرشام .. وقالب زبدة بلدي .

أنعور أفندي : فلات فوت إيه يا مكسح إنت ؟ إسمه جريب فروت يا جهول .. والعيش المدور ده عندكو هناك في باب الشعرية .. أما اللي أنا بأكله فإسمه كيزر ... إمشي يا ولد من قدامي بدل ما أحدفك قبقاب في راسك أعملك عاهة مستديمة .

عبدو : ما تعيش عيشت أهلك بقى يا أنعور أفندي وخليك زي باقي الموظفين ... أو لو مش عاجبينك روح إفتح لك شركة وخلينا نخلص ؟

أنعور : تصدق بالله إني هافتح دماغك مش هافتح شركة .. وبعدين أنا إسمي أنعور بك .. مش أفندي يا فلاح ...

روش أفندي : يا صباح الخير ياللي معانا .. الكروان غنى وصحانا ... إيه رأيكو بقى في البيجاما الروشه اللي أنا لابسها ؟ لسه شاريها إمبارح من شارع الشواربي ؟

سِماوي أفندي : جتنا نيلة في حظنا الهباب ... كل إسبوع ببيجاما شكل .. وأنا البيجاما اللي عليه وارثها من المرحوم والدي من أيام العدوان الثُلاثي ..

متصربع أفندي : يا جماعة .. يا جماعة .. الله يخليكوا ماحدش شاف فردة الشبشب بتاعتي ؟ عايز أدخل الحمام بس شكلي هايبقى وِحش وأنا بأتحنجل على رجل واحده .

مفجوع أفندي : ولد يا عبدو فين الفطار يا بني ؟

عبدو : أيوه يا مفجوع أفندي قدرة الفول على النار بتسخن وبعثت إبراهيم يجيب بستة جنية عيش وخمس حزم فجل وبجنية مخلل زي ما حضرتك أمرتني .

مفجوع : عجل يا بني الله يرضى عليك خلينا نلحق نفطر قبل الغدا .. إحنا ورانا مصالح ناس عايزين نقضيها .

وفي هذه الأثناء يمر سعادة المدير العام مُستغل بك السلحدار : صباح الخير يا افندية ؟ يا ترى نمتوا كويس إمبارح ؟

ماسح الجوخ أفندي : يا سلام يا فندم ... ده أحنا ذهبنا في سبات غطيط وكله بفضل توجيهات معاليك ... إيه ده إيه ده ؟.... الله .. أما حتت روب دي شامبر ... يا سلام هاياكل منك حتة والله يا باشا ... ولا الشبشب الفرو .. يا عيني يا عيني ... شكلة في رجل سعادتك ولا العربية الفولفو ...

مُستغل : هأ هأ ... صباحك نادي يا ماسح أفندي .. دايماً كده تحرجني بأوصافك دي .

ماسح : خدامك المطيع يا باشا .... إسُكت يا باشا أما شوفت رؤيا لسعادتك النهاردة .. إنما إيه ؟ ربنا يجعلها من حدك ونصيبك .

مُستغل : خير ... قول بسرعة يا ماسح يا بني .. ولا أقولك تعالى على مكتبي نشرب القهوة سوا .

ماسح : خير اللهم أجعله خير يا فندم ... شفت معاليك لابس أبيض في أبيض .. وداخل الوزارة في عربية بيضا ... وأنا ماشي ورا سعادتك شايل كرتونة بيض

مُستغل : كرتونة بيض ؟ ليه إن شاء الله ؟

ماسح : يا فندم ده البيض في المنام نُصره ... المهم سعادتك دخلت مكتبك البيضاوي .. ومسكت قلمك الأبيض وكنت عمال تمضي على ورق أبيض .. ولما سألت حضرتك إنت بتعمل إيه يا باشا .. قلت لي : يا نهارك أبيض مش عارف بأعمل إيه يا ماسح ؟ أنا بأوافق لك على علاوة إستثنائية يا ماسح يا حبيبي ...

---

متصربع أفندي : الساعة كام دلوقت يا خواننا .

سماوي : 12 وربع يا سيدي .. خير ؟

متصربع : لأ أصلي عايز ألحق أشرب الشاي اللي بعد الفطار عشان أروح أمضي وأروح ... الله الحمد إتعشت النهاردة .. واليوم عدى على خير .