غربة المصريين الى متى تدوم.....اين تنتهى حدودها

[nemr111]

مأساة حقيقية يعيشها المصرين .. المقيمين بالخارج .. بالرغم من ارتفاع الدخل و تفاوت نسب المدخرات فى تحقيق الاحلام.. الا انه هناك كابوس يجثم على صدورهم و خاصة من امضى سنوات العمر و شبابه .. و انجب خلال اقامته اولاده .. الذين ارتبطوا بالبلد المقيم فيه .. فكانت مصر هى بلد الاجازات و الأيام الصيفية الجميلة .. و للأسف مصر لا تساعد اولادها .. فى العودة فمن يعود من بلاد مستوى الاحترام لحقوق الانسان يفوق بلاده .. ناهيك عن التعامل بين الناس قد وصل لدرجة الصفر و اصبحت المنافع الشخصية هى لغة العصر فحينما يعود المهاجر من الغربة تجد اتوبيسات من المهنئين بعودته طمها فى الهدايا .. أما اذا كان جلف و لم يحضر معه الهدايا .. حينما يسافر يكون وحيدا فى صالة المطار كمن فقد والديه..

السؤال المطروح .. هل الغربة و العيش فى الذكريات الجميلة عن مصر .. افضل .. أم العودة و الاستقرار فى البلد مع واقعية كوابيس الحياة و رزالة الظروف هى الانسب لمن سافر و عاش خارج مصر...

[yasser6666]

اخي نمر111

صدقني خليك بره علي طول احسن وقول الحمدلله انك بتقدر تنزل اجازات وبتشوف اهلك وناسك يعني مش محروم نهائيا من مصر

ثانيا حضرتك بتسأل ليه مصر مش بتساعد أولادها للعودة

والله ضحكتني ياراجل...انت كمان عايزها تساعدهم يرجعوا...طب مش لما تخلص من السبعين مليون اللي عندها تبقي تدور علي غيرهم

اذا كانت تنفر الموهوبين والعلماء من ابناءها ولسان حالها يقول لهم في كل زيارة (عايز تفضل محترم خليك بعيد)

يعني بالعقل شخص زي العالم زويل بتاع النانو ثانيةأو الباز بتاع ناسا يرجعوا يعملوا ايه؟

بلاش أنا وانت وغيرنا نرجع نعمل أيه وليه وعشان مين وبكام؟

نصيحتي لك حافظ علي دينك وجذورك أينما كنت ولا يهم أين انت؟

ملحوظة: بص كده علي توقيعي وانت تعرف

.

[last_Samurai]

أؤيدك اخى yasser6666

[mohmaher]

منطقي برده كلام ياسر ...

مع التشديد على موضوع الحفاظ على اقامة الدين و تربية الأولاد تربية اسلامية صحيحة.

انا كل سنة بانزل مصر في اجازتي باكون فرحان أوي في الأول ... و ممتعض جدا في الوسط ... و هاموت أسيبها في الأخر ... :D

[se_ Elsyed]

في موضوع بنفس المعني ده وبه مداخلات قيمة بصراحة

إمتي هانرجع بقى .. دي بقت حاجة تقرف

[dr_nile]

لا

انا فى نفس الوضع اعيش فى السعوديه واتمنى العودة لمصر حتى ولو بدون مدخرات

انا لااشعر بالامان

تخيلوا لا امان هنا

هل هى غريبه؟؟؟؟؟؟؟؟

من خمس شهور اقفلت الشركه اللتى اعمل بها مكتبها فى السعوديه ولانها شركه مصريه نصبت على الوكيل ورفض ان يتركنا حتى ان نعود الى مصر بدون اى اموال

لم نساله الا العوده فقط ورفض الامر

هل هذا هو الامان؟؟؟

[نفسي احبها]

نصيحتي لك حافظ علي دينك وجذورك أينما كنت ولا يهم أين انت؟

ده احلى كلام .... وازيد عليه في نهاية السطر ....... طالما انت خارج مصر .......

اوووووووووووووووف

والله العظيم انا خايف من اليوم اللي راح ارجع فيه .

ياريت كان الأمر بأيدي كنت مت أنا وعيالي بره

شعور جميل انك تحس إنك إنسان ومش بس ، لا ، ومحترم ، ومش بس كده ، ومفيش حد بيحاول يسرقك ولا ينصب عليك ولا يبتزك

ولا يبهدلك و و و و و و و و و و و و و

فضفضة مخنوووووووووووووووووووووووووووووووق

[se_ Elsyed]

والله العظيم انا خايف من اليوم اللي راح ارجع فيه .

ياريت كان الأمر بأيدي كنت مت أنا وعيالي بره

كلام جارح ولا يُعبر إلا عن شعور صاحبه فقط

ما أبشع شعور الإنسان بإنه يعيش في هذه الحياة بلا جذور ولا وطن

يا راجل ده اللي بيبقى من الأرياف أو الصعيد وبيشتغل في القاهرة بيبقى بيعد الأيام عشان يرجع مسقط رأسه خميس وجمعه

حيث الأمان والدفء

وبيبقى عايش في القاهرة اللي هي جوه بلده ومش محتاجه باسبور ولا تأشيرة عشان يخرج ويدخل ومع ذلك حاسس بغربه

الفلوس مش كل حاجة في الدنيا

وأرجع وأقول إن إحنا المغتربين نُمثل الإستثناء .. أما القاعدة فهم الموجودين في مصر

أنا عن نفسي لن أكون مرتاح في تُربتي لو ماندفنتش في بلدي مش بلدي جمهورية مصر العربية ولا القاهرة حيث أعيش وتعيش عائلتي الصغيرة لأ .. على فكرة أنا مولود في القاهرة وأتربيت فيها وبابا الله يرحمه نزح إليها في الخمسينات .. لكن بلدي تبدأ من محافظة الشرقية اللي فيها مقابر أجدادي قبل بيوتنا ومستحيل حد يتوفى في العيلة ويندفن براها ...

أنا أترقب اليوم الذي سأعود فيه إلى بلدي حيث الأمان .. والإعتراف بالجمِيل والتقدير ..

آه الواحد هنا يتقلد منصب كويس ودخل مادي والحمد الله ... لكن لا أمان .. ولا إعتراف بالجميل .. ولا شعور بالإنتماء ...يكفي إن إسمك أجنبي بالرغم من إنك عربي ومسلم كمان زيهم ...

أتحدى واحد مغترب يقول لي إنه بينتمي لكيان إقتصادي أو لشركة بيشتغل فيها وبالتالي ممكن يقف جنبها لو مرت بمشاكل مالية ..

في حين في مصر أنا لو بأشتغل في بقالة وحابب الشغل ده .. أقسم بالله مستعد أشتغل من غير فلوس لو عديت عليهم ظروف مش ولابد .

مع إحترامي لكل إخوتي الفلسطينيين اللي هم زملاء وجيران وإخوة .. ونسأل الله العلي القدير أن يفك كربهم ويُعيد لهم أرضهم اللي هي أرضنا كلنا ...

إسألوا أي حد فيهم كده شعورك إيه وإنت عندك أموال مُكدسة بس عايش في الشتات .. وتبقى عايش في بلد لا أنت مواطن فيها ولا أنت عارف ترجع بلدك ....

أرجو أن نفكر جميعاً في كلمة وطن ونتدبر معانيها ... مين هنا في الكويت ؟

إسألوا كده الناس اللي مكتوب في جوازات سفرهم " بدون " وبيسمهوهم " البدون " يعني لا هو كويتي ولا يهودي حتى .. حاجة كده مالهاش وجود .. ولا يدخلون ضمن أي إحصائيات ....

دي مش أشعار ولا كلام واحد شبعان

لكن مصر ليست حُسني مبارك وليست الهليبة ولا ممدوح إسماعيل ...

فكل دول إلى زوال .. ولكن تبقى الأرض ويبقى النيل ويبقى خير مصر وتبقى الجذور ويبقى العيش والملح اللي طعمه في مصر أطعم من الأكل في مطاعم مكسيم ...

يا راجل هل في إنسان في الدُنيا يتمنى يعيش جوه مُستشفى مُعقمة وهواها حلو وأكلها صحي وأرضيتها نضيفة ؟

اهو إحنا في الغُربة كإننا في مستشفى بالظبط .... حياة بلا طعم

عايز أعرف إحساس أي مُغترب إيه لما يلاقي إبنه الصغير إبتدى يتكلم بلكنة أهل البلد التي يعمل بها .. حتى مع إحترامنا لهم جميعاً لو كانوا بيتكلموا عربي ؟

[ايهاب سالم]

نصيحتي لك حافظ علي دينك وجذورك أينما كنت ولا يهم أين انت؟

ده احلى كلام .... وازيد عليه في نهاية السطر ....... طالما انت خارج مصر .......

اوووووووووووووووف

والله العظيم انا خايف من اليوم اللي راح ارجع فيه .

ياريت كان الأمر بأيدي كنت مت أنا وعيالي بره

شعور جميل انك تحس إنك إنسان ومش بس ، لا ، ومحترم ، ومش بس كده ، ومفيش حد بيحاول يسرقك ولا ينصب عليك ولا يبتزك

ولا يبهدلك و و و و و و و و و و و و و

فضفضة مخنوووووووووووووووووووووووووووووووق

إنت عايش فين يا "نفسي أحبها" ؟

[نفسي احبها]

نعم

الحقيقة المرة المستفزة ...

تجعل الآخرين تشعر بإحساس مختلفة عما يكمن في صدورهم....

يجعلهم يستخرجون مفردات وإحاديث وأهات غير التي يحدثون أنفسهم بها ....

فهل هو اللاوعى ، أم الأمل والأحلام المطحونة ، ام رغبات مكبوتة وأمنيات لم ولن يعد لها وجود ، إلا شعارات مهلهله ،

(((((((((((((((((((

كلام جارح ولا يُعبر إلا عن شعور صاحبه فقط

ما أبشع شعور الإنسان بإنه يعيش في هذه الحياة بلا جذور ولا وطن

وما هي طعم الحياة التي يعيشها ملايين من المصريين في اعماق الجذور والوطن بالذل والهوان والقهر والقمع و و و وو و و و وقول لبكره ..

ما هذه الحياة .....

يا راجل ده اللي بيبقى من الأرياف أو الصعيد وبيشتغل في القاهرة بيبقى بيعد الأيام عشان يرجع مسقط رأسه خميس وجمعه

حيث الأمان والدفء

أي دفء وأمان في مكان الأب المصري والأم المصرية مطحونين حتى الجامعيين وأعلى من الجامعيين ( إلا اصحاب السكك المفتوحة )

مطحونين 18 ساعة عمل دؤوب وطحن وسكر وضغط وامراض القلب من اجل مصاريف (آآح مم ننا هو) فقط وإذا مرض طفل

يامصيبة دووووقي ، اقل حاجة 100 جنية كشف الجزار ، وقيمة الدواء اللي بكره وقريب قوي مفيش اي حد راح يقدر يشتريه .....

طيب ده لو عنده 4 او 5 عيال ، دفء ايه ووطنية ايه وولاء ايه .....

ارجوكم ((((((((( هل انا باتكلم من خلال الواقع ... ولا بأهلفط ... ولا الناس اللي انا باشوفهم دول من كوكب تاني .....

غالبية الشعب المصري هكذا مطحون .... من اجل فاتورة الطعام والشراب الملوث وفاتورة الكهرباءوالميه ، ومصاريف المدارس

وشكراً على كده ، وجميعة علشان يخلي العيال يصيفوا .

ويرجع البيت ينام زي كيس المخدة علشان يقوم من النجمة يركب نفس السقية ،

فلا يجد وقت ليذاكر لهذا ، ولا يقوم بترتبية وتقويم هذا ، ولا ولا ولا ولا ولا ولا ...............

((((((((((((((((((((((((( أليست هذه حال ملايين من المصريين )))))))))))))))))))))))))))))))) ولو عرضت عليه السفر تفتكر راح يقولك ايه ؟؟؟!

(((((((((((((((((((((( أهذه الحالة هي الحياة الطبيعية للإنسان ))))))))))))))))))))))))))))))))

وفي المقابل ...................... ما هذا ...................

اهناك دول وأراضي وحياة أخرى ..... ينام فيها الإنسان 8 ساعات ، ويعمل فيها 8 ساعات ، ويرتاح 8 ساعات ليدير شئون أسرته وحياته ...

معقول ..... اهناك دول وأرضاي وحياة أخرى تحترم الإنسان بشكل غير هذا الذي نسمع عنه ، اهناك اهناك اهناك ................وانت اعلم بالباقي .

الفلوس مش كل حاجة في الدنيا

نعم انا معك ..................... ولكنها اهم حاجة ..................................

بعد الصحة والستر

أما القاعدة فهم الموجودين في مصر

أما هذه القاعدة ........ بالله عليك إلا تتفق معي ........ أن هناك ملايين من الشباب على المقاهي وغيرهم ، والذين مرتباتهم هي قيمة مشتريات أي مغترب

عندما يذهب للسوبر ماركت في المرة الواحدة .............

كلهم مستعدون للهروب من هذه البلد ..... أخي العزيز انت شخصياً لديك من هذه القصص المئات والمئات .

وكل منا لديه القصص بالمئات والمئات من حالات الهروب هذه ........... لماذا بالله عليك ............. أمن أجل الدفء والوطنية والشعارات التي

مزقت أمعائنا ، وسممت عقولنا .... وأصبح لا يستخدما إلا أصحاب السكك المفتوحة و و و و و و و

وما الفرق اذا مت في مصر أو خارج مصر ....................... الموت واحد ....

ولكن الحياة تختلف .... فهناك فرق في أن تعيش ذليل مقهور عطشان مطحون .........................

عن أن تعيش انسان محترم تستطيع ان توفر لك ولأهل ومن تعيلهم المتطلبات الأساسية للحياة .... ولا تمد يدك للآخرين ...

فالدين يقتل صاحبه بالليل ويذله بالنهار .... وياليت الدين من اجل مهمة صعبة ، ولكن من أجل لقمة العيش ، التي استخسرتها فينا النظام والحكومة .

أنا أترقب اليوم الذي سأعود فيه إلى بلدي حيث الأمان .. والإعتراف بالجمِيل والتقدير ..

اتعجب واكد يغمي عليه من العجب عندما اسمع هذه المقاولات .....

يحمل شوقاً وحنيناً ..... لأرض مصر ...... وينتظر اليوم الذي يعود حيث الأمان ..... والاعتراف بالجميل والتقدير .

إذا لماذا خرجت ... اليس هذه متناقضات ...

اليس من الوطنية والولاء والاعتراف بالجميل والتقدير ... البقاء في هذه الأرض وعدم الخروج منها والكدح فيها ......

أليس تراب أرضك أولى بالعرق والجهد والخبرة و و و و و

بدلاً من تراب الغربة

إذا لماذا نتركها ونهرب بعشرات السنين ، ونقول اه ياأمي وحشاني ................. يالله من بر ...............

وعندما يمتلاء الجيب بالدولارات وينتفخ الرصيد وتمتلاء البطون بما لذ وطاب .... ويرتاح البال ...

نفكر في السياحة والوطنية ، ونقول مصر أم الدنيا وياسلام عليكي يامصر ......

ياتري ... عندما هرب ملايين الشباب ... ماذا كان تفكيرهم والتأشيرة في جوازاتهم ، وهم في المطار إلى بلاد الغربة وإلا الحلم .

قسم بألا عودة ........... ( سمعنا ورأينا ذلك ) وتحقق ذلك .

شعور بالنشوة والفرحة ( رأيت ذلك في أعينهم ) فلقد انفرجت فرجة للضوء بدلاً من سنوات الظلام الحالكة التي لن تنقشع ....

خوف من الفشل والعودة ( إلى السجن مرة أخرى ) ......

دموع فرحة ( وكأنه يخرج من السجن بعد 25 سنة )

ما هذا .... أكل هذا وطنية ... أكل هذا من جراء الإنسانية والآدمية التي شبعوا منها على أرض المحروسة ...

((((((( أما مسألة الشتات والوطن وبدون )))))))))))))))

أنا أريد أن أعيش أنسان ، وهذا من حقي ، أريد أن اكون آدمي ، وهذا من حقي وحق أولادي ، وحق الجميع ...

أين ......... في أرض ......

ووطني وولاء للأرض التي تحتضنني وترعاني وأشعر فيها بالإنسانية والاحترام و و و و و و و

وإذا كانت الغربة مثل المستشفى ............. فلماذا يهرب الناس إليها تاركين العز وراهم .. تاركين الوطنية لغيرهم ، تاركين الولاء يطحن ويعبأ حبوب

نستوردها للخارج ، لنأخذها ، حتى نقول ولاء وطنية ولاء وطنية .....

بل ويستقرون فيها عشرات السنين ، ويزحفون على أكفهم وعلى أيدهم ومناهم الأكبر والأعظم نيل جنسيات هذه المستشفات ... لماذا بالله عليك اخبرني

أما انا مجنون ..... او هم المجانين .....

أليست امنية ملايين المغتربين غير الحاصلين على جنسية ......... الحصول على الجنسية الكندية والأمريكية والأسترالية والسوسرية والسويدية و و و و و

إي جنسية ما عدا المصرية ................. لماذا ... ولاء .... وطنية ... حباً في أرض الوطن الذي سقاهم الولاء حبه حبه ...

لكن مصر ليست حُسني مبارك وليست الهليبة ولا ممدوح إسماعيل ...

مصر ....... هي حسنى مبارك والهيليبة والحرامية والمرتشون والنصابون والمحتالون وهناك الوووووووووووووووووووف

من ممدوح إسماعيل ................ ام اننا سنغلق أعيننا ونصفق للوطنية ................

عايز تقولي ان أعضاء مجلس الشعب بيقتلوا بعض من اجل عيون الشعب الخضرة ، وجمال منظرهم ...

عايز تقولي أن أعضاء مجلس الشعب والشعوري و و و و و و و و بيدفعوا الملايين في الانتخابات من

اجل عم عبدو المسكين وحق في الأكل النظيف والميه النظيف والأقل المعقول وحق ابنه في العمل

وحق أولاده في التعليم المحترم و و و و و و و ..............طبعاً لا ...

ده عصابه بالدستور وكل مسؤول على كرسيه اصبح بداخله جين ومسخ من رئيس العصابة

هي ده بقى مصر ......... وانت أعلم مني بمئات القصص وآلاف القصص التي تختصر لك رأي هذا ...........

إذا أيهما أرحم ................... أرض ملوثة وسماء وملوثة وماء وملوث وأحلام مطحونة ودواء مفيش و و و و و و و كله مفيش مع القهر والظلم والكرباج

أم هذه المستشفيات المعقمة التي تملاء الأرصده بـ .......................

هناك ملايين يحلمون بهذه المستشفيات ويدفعون من اجلها بالآلاف ، وبداخلهم قسم إلا عوده ....... ممكن كسائح فقط ... وهناك اقسم بألا يكون سائحاً

فالسياحة في أوروبا ارخص وانظف ...

تحملني اخي الكريم ..

فأنا بأفضفض ومخنووووووووووووووووووووووووووووووووووووووووووق

تعرف لو كان معايا جنسية تانية ...سويدية مثلاً ، والله كنت راح اكلمك على الوطنية والولاء .. ومصر الطفولة والبراءة وريحة الشوارع والذكريات

والنيل والرجولة في الجيش ، والدفاع عن التراب اللي بنسفه في الجنيهات الحكومية القاتلة ...

وان مصر فيها خير ، وان مصر مش حسني مبارك ولا ممدوح إسماعيل ، والانتخابات ميه ميه ،

والفرج جاي على ايد ابنه إن شاء الله ،

ومفيش تهريب لكونتنارات لحمة فاسدة 80 مليون طن لحمه فاسدة للبطون الوطنية .

ومفيش ومفيش ومفيش .... ده كل اللي بيسافر بره دول كلهم خونه ، خان الوطن والولاء خان المدرسة الإبتدائية والإعدادية والثانوية والجامعة

خانوا بنت الجيران وهربوا ....

وان الموظف المصري أجدع موظف على وجه الأرض ،

وان المؤسسات الحكومة . سيستم ولا في الأحلام ، احترام ولا في الأدغال ،

المستشفيات المصرية . احدث تكنولوجيا ، الدواء مجاني ، افظع طقم تمريض ممكن تشوفه عينك ، لحد ما تستفرغ معدتك ومعدة حديقة الحيوانات كلها .

المطارات ، أحدث مطارات في الدنيا ، واحترام مفيش بعد كده في المطار من أول اللواء ممكن تتف عليه ويحترمك وما يقدرش يفتح بقه معاك . عارف ليه لانه في خدمتك ..... ممكن يقلبك ويحتجزك 8 ساعات وحصلت ، ولو فتحت بقك ، تسمع أحلى كلام في الدنيا والآخره ..... وممكن بالفاكس اهلك في البيت يدخلوا السجن

علشان حضرتك فتحت بقك ............ طبعاً انا مش قصدي عليك أيها القارئ عفواً ................. سامحني .

الشرطة والمؤسسات الأمنية ........... وسع واوعى تتكلم ......

الزراعة ، أضخم رقعة زراعية على وجه الأرض بسبب يوسف والي والعصابة .

مفيش محاولات لتسميم وحرق القطن ... انت بتصدر قطن ...

مفيش محاولات لتقليل رقعة زراعة القمح .. علشان الأباطرة يستوردو قمح ..... والاستيراد ده اكل عيش الغلابة .

حتى الغزل والنسيج للبيع .... لكنك خلاص اكتفيت من صناعة بواجير الجاز والأبر الخاصة بها .....

الصناعة ، الباشا قالي كل يوم مصنع يعني 1000 مصنع في 6 سنين ، يعني في السنة 300 وحاجة مصنع .... شفت أكتر من كده .

ده أمريكا واتخن بلد في أوربا استحاله تبني 1000 مصنع في 6 سنين ، استحالة تبني 300 مصنع في السنة ...

احنا بقى الباشا قال لنا 1000 مصنع في 6 سنين ، وبالبق المليان . حاضر سمعاً وطاعاً .... وراسك في التراب العزيز ... سفوا ياجماعة وقول شكراً .

شفت اكتر من كده احترام للعقلية المصرية التي تم تصميمها وبرمجتها . ومسخها .

اووووووووووووووووووووووووووف

اللهم ادم علينا مستشفيات الغربة ولا تحرمنا منها ................ اللهم لا ترجعني إلى هذه البلد مرة أخرى

هذا هو دعائي دائماً ............

اللهم آمين .

مخنوووووووووووووووووووووووق

[se_ Elsyed]

لا تعليق

فلا آمل

وهنيئاً لك بوطنك الجديد

[نفسي احبها]

نعم

اسأل الله أن يجعله وطني

ولا أعود للمستنقع مرة أخرى

فلقد سئمت مثل ملايين الممسوخين

فلا رغبة عندي في الحياة في وطن مسموم الهواء والماء والعقلية والنفسية والنظام

لا رغبة عندي في ان اعيش مطحون مذلول مقهور

وهذا حقي وحق كل إنسان عاقل ان يكره الأرض المسمومة

وينتمى بعقله وقلبه وبدمه إلى الأرض الذي تحترمه وتحتضنه

والحمد لله رب العالمين على هذه النعمة ، اللهم لا تحرمنا منها ، ولا ترجعنا إليها مرة أخرى هذه المسمومة