مين الوطن..الأرض ولا البشر؟!

[المدهش]

مين الوطن؟!

ألحس ترابك يا وطن

وانسى اللي شفته من عفن

والذل على ايد جلاديك ..

اللي ابتديت من ظلمهم

أتبرى من جنسيتي..

واندم على يوم ولادتي فيك

وأتمنى اهاجر زي باقي صحبتي..

ولا إني أعيش ولا لحظة ليك ..

دي القسوة أهون لما تيجي من الغريب

والغربة مرة بس أوحش منها الاغتراب

وكتيرة جدا أسئلة مالهاش جواب

إزاي أحبك وانت مش بتحبني

وعايزني أركع للمامة وانحني

ودموعي لسه م الوجع بتهزني

لا انا ابن جاحد ولا ابويا ضحى بالضنا

محتار أنا ..

محتار انا ألحس ترابك يا وطن

ولا أخبط الراس العجوزة في الحجر

قلبك حجر.. ناسك حجر

متحنطين من عهد خوفو مش بشر

خايفين وراضعين الهوان

ومكتفين حتى اللسان

ألحس تراك يا وطن

ولا أخبط الراس العجوزة في الحجر يمكن تلين..

وتسكت الصوت اللي موت ضحكتي قبل الأوان

مين الوطن.. الأرض والطين والفضا ولا البشر

لو كانت الأرض الوطن..

يبقى انا بصراحة من ده وطن علشان ماليش ولا شبر فيه

يبقى البشر..

مين م البشر..

الأغنيا.. والأوليا.. ولا الغلابة والغجر

الشقيانين.. الغلبانين ولا اللصوص ولا النًور ..

أيوه الوطن هوه البشر

المنقوشين فوق الحجر

والمسخوطين زي الحجر

مجنون... انا

لو كنت أفخر بالحجر

مجنون... أنا

لو كنت أدافع عن حجر

لا انا إبن جاحد.. ولا أبويا ضحى بالضنا.. محتار أنا