رد سين سين الأديب على إجتهادات الأخ مُهيب

[se_ Elsyed]

لا ريب إن إبننا مهيب هو مشروع شاعر له مستقبل باهر حتى وإن لم يكن قد درس الشعر .. وسر إبداعه هو إنه بيقول ويرسم ما يشعر به .. وبالتالي أعتقد من وجهة نظري إن كل محاولاته الشعرية أو حتى النثرية هي عبارة عن تجارب خاضها بالفعل وبالتالي أيضاً فهي نابعة من القلب ..

دي كانت إستهلالات لزوم الشيء ..

لكن بقى ييجي لحد تأليف القصص البوليسية والإثارة والتشويق .. أقف له بالسِنجه وأقوله إستوب يا ريس .. إنت كده داخل حارة سد وجاي تبيع الميه المعدنية في حارة السقايين ...

يابني المجال ده له ناسه ...

فأنا راضي ذمتكو .. يرضيكو اللي بيعملوا فينا ده في القصة بتاعت " عملية المحاورات "

أولاً إختيار العنوان فيه غموض وتلميحات مش ظريفة .. لإن ممكن حد يتسأل ويقول : عملية إيه ؟ بواسير ولا زايدة ولا لحميه ؟

دي حاجة

الحاجة التانية إن البيه بقى له أكثر من أربع حلقات ما قالش جُملة مُفيدة وعمال ياخدنا من البطحا لجنينة مول لبهو أحد الفنادق وإحنا وراه زي الأطرش في الزفة ولم يُعطينا هِنت عن اللي عايز يقوله .. ويا خوفي يطلع في الأخر هو مش عارف عايز إيه ...

ولو إفترضنا جدلاً إنه كمل القصة .. فبالله عليكو ... دي قصة يشتريها واحد مُنتج ويدفع فيها فلوس ويعملها فيلم سنيماوي ؟

وبعدين فيلم إيه ده اللي هايقع تلات أيام والجمهور مش عارف هو جاي هنا ليه ...

لذا فقد قررت أن أرد عليه بالمثل وأعرفه كيف يتم قلوظة القصص البوليسية .. وكيف يتم عمل تحبيشة سنيمائية من الحاجات اللي بتعجب الجمهور والنقاد والمُنتجين وحتى بتوع الفشار اللي بيقفوا قدام السيما ...

بسم الله نبدأ ...

[se_ Elsyed]

مغامرات سين سين الرهيب .. ومعاه جيجي ومُهيب

المكان : أحد الإجنحة الملكية بأحد فنادق الخمس نجوم بأحد المُدن الكبرى بالسعودية بأحد بلدان الخليج ( حلو كده ؟ أظن ما فيش إثارة وغموض أكثر من كده )

الزمان : أحد أيام الإسبوع .. الساعة 6 المغرب ( على أساس أكون قيلت شويه العصرية )

يجلس سين سين في أحد أركان الجناح وأمامه علبة سيجار كوبي فاخر .. ومع إنه ما بيدخنش إلا إنه قد خلص على العلبة من باب الإستخسار على أساس إنها كادو من الفُندق .... وفجأتون .. آن آن آن تيييييييييش .. يدق باب الجناح .. ويهب سين سين واقفاً .. ويسحب الموتريليوز من جيب سترته الأقحوانية قائلاً : ميععععععععععن ؟ فيرد صوت بالخارج : الرووم سيرفيس يا فندم .. إحنا جبنا لسعادتك الغدا زي ما طلبت ... فيجلس ثانيةً هادئاً ويسمح للنادل بالدخول .. فيدخل النادل دافعاً أمامه عربة مثل عربة الكُشري وعليها ما لذ وطاب من المأكولات الخفيفة المسماه بسناكس ( ربع عجل بلتو مشوي ، إتنين ديك رومي محشي بالفريك ، دكرين بط متزغتين .. إلى جانب السلطات والمُقبلات ) فيجلس البطل متربعاً ويبدأ في إلتهام وجبته السريعة ... وبعد هُنيهة يدق الباب .. فينزع ورك الديك من فمه ويصيح بصوتاً مجلجلاً : ميييععععععن ؟ فيرد صوت نسائي ناعم : أنا جيجي يا معلم ... فيفتح لها سين سين الباب ويدور بينهم هذا الحوار :

ج ج : خير يا معلم .. جايبني على ملا وشي من القصيم في ساعة زي دي ليه ؟ ده أنا من لهوجتي سبت حلة المحشي عالنار وركبت عربيتي الماي باخ ( مش دي سينفونية للأديب العالمي بيتهوفين برضوا ؟ ) وجيت جري

س س : أقعدي الأول كُل لك لقمة وبعدين نتكلم .

ج ج : إن شاللة تسلم يا سيد المعلمين .. أنا ضربت كيس كُشري في إستراحة على الطريق .

س س : أبداً ... يمين بالله لأنتي واكله حاجة

وهنا تحاول ج ج أن تمد يدها على المائدة العامرة بتلك الأصناف .. فيصيح س س غاضباً : إنتي رايحه فين ؟.. ده الأكل الدايت بتاعي .. أما أكلك إنتي فهاطلبهولك حالاً .. ويطلب سين سين مطعم الفندق : هات يا بني هنا في الجناح رقم 13 رُبع كبسة وعليه رشه خفيفة طبيخ .... فيمتعض وجه ج ج وتتمتم بعبارات وألفاظ غير مفهومة ..

ج ج : إنما ما قولتليش برضوا .. خير يا طير .. وراك إيه المره دي ؟

س س : إصبري على رزقك لحد ما مهيب يوصل .. زمانه في الطريق .

ج ج : هي فيها مهيب ؟ يبقى مصيبه من مصايبك بتاعت كُل مره ... إعمل حسابك أنا أخر مرة كنت هاتقفش وأروح في داهية لما خططت وتكتك لسرقة غسيل الجيران اللي قدامنا .. وكنت لسه يادوب بأقص الحبل من هنا ومن هنا إلا والوليه صاحبة الشقة تروح صاحية من النوم .. وأول ما شافتني راحت طابقه في زُمارة رقبتي ومسكتني من شعري وفضلت تصوت .. ولولا إني سلكت نفسي وسيبت لها ضفيرة من بتوعي .. كنت زماني في سجن القناطر دلوقت ... وقبلها بشهر برضوا ومن تحت راسك كانت رجلي هاتتكسر لما نطيت من فوق سطوح رابع دور .. لما سيادتك رسمت لي خطة سرقة عشة الفراخ بتاعت خالتي .. والفراخ فضلت تكاكي والبط يرد عليها وكإنهم في أوبرا عايدة .. راحت جتتي إتلبشت ونطيت من فوق السطح قبل الجيران ما يتملوا عليه .... فالله لا يسئيك أنا وليه ومكسورة الجناح .. سيبني في حالي ربنا يسترها معاك .

س س : إنت بتنبشي في الماضي ليه يا سمارة .. قصدي يا ج ج ؟ إطمنني خالص ... العملية المرة دي نضيفة 100 % وهاتاكلي منها مهلبية بدل المحشي بتاعك ده .

ج ج : خليك ورا الكداب .

س س : بتقولي حاجة يا ج ج ؟

ج ج : لأ أبدأ يا ريس .. ده انا بأكُح ...

وهنا يصل مُهيب بسيارته الكرسيدا 92 المُعدل اللي كانت في الأصل ليموزين ... ويهرول صاعداً إلى الطابق الثالث عشر ثم يطرق باب الجناح طرقشاً موجعاً ...

يُتبع

[tarek_almeghallawy]

يا فتاح يا عليم يارزاق يا كريم عالصبح

الناس اللي بتقوم من النوم تضرب قصص بوليسية عالريق

وبتتسلى بتميس وجلابة يعني جملتين وقطمة تميس وشطين ولحسة جلابة

هو فيه ايه ياجدعان

ايه اللي دخل الاخ ارثر كونان دويل بتاع شرلوك هولمز دا عندنا

وكمان الاخت اجاثا كريستي... دول اعضاء جدد عندنا

مين اللي بدأ موضوع البوليسية ده

وبعدين بقت شوطة

وجيجي المسكينة مهيصة داخلة في كل القصص

رايحة القصيم جاية من القصيم

وحبال غسيل بتتسرق وفراخ وبط

وكله كوم وفنادق ال5 نجوم اللي بقت مرطرطة في القصص دي كوم تاني

طب خليك واكعي خليها شقق مفروشة ولا حتي استراحة

ما علينا خلينا صابرين للآخر

[مهيب]

أنا مش عارف والله القصة بتاعة العملية مضايقاكم ليه ؟؟ ماقلنا من البداية انها أسماء مستعارة من قبيل الصدفة البحتة ... ده بالاضافة لأن الموضوع خطير جدااااا ... لا يمكن السكوت عليه ...

أما عن التشويق ... فده شيء طبيعى ... مهو لازم حبة شطة ... وحبة صبر برضه ... أمال ... مش كده ولا ايه ؟؟؟

أما عن موضوع انى مقلتش جملة مفيدة ... أوعدك من كل قلبى يا س س .. ان الحلقة الجاية هيكون فيها كل الحقيقة ... كاملة ... علشان الأحداث سخنت منى جدا ...

أما موضوع البوليسية اياه ... يا راجل ... دى تقدر تقول عليها فانتازيا ... لكن مفيش بوليس خالص ... بذمتك أنا جبت سيرة بوليس ؟؟؟

كرسيدا كانت فى الأصل ليموزين !!! ماشى يا عم .. خد راحتك ... واتريق على عربية حق زول ...

[مصرية الهوى]

ههههههههههه .. والله انكم رهيبيين يا تسالي :D ...

على فكرة أنا لسا شايفه الموضوع دلوقتي ..

وشفت كلمة "يتبع" .. بس دلوقتي عدى 10 أيام ..

ليه يا س س هو أنت ومهيب متفقين عليا .. أنكوا تبدوا مواضيع أكون أنا البطلة (نيكول كيدمان :P )..

وبفرح وازغرت واتجهز للتصوير وكل حاجه ..

وبعدين متكملوهاش ..

أنا هأعيط :D

يا فتاح يا عليم يارزاق يا كريم عالصبح

الناس اللي بتقوم من النوم تضرب قصص بوليسية عالريق

وبتتسلى بتميس وجلابة يعني جملتين وقطمة تميس وشطين ولحسة جلابة

هو فيه ايه ياجدعان

ايه اللي دخل الاخ ارثر كونان دويل بتاع شرلوك هولمز دا عندنا

وكمان الاخت اجاثا كريستي... دول اعضاء جدد عندنا

مين اللي بدأ موضوع البوليسية ده

وبعدين بقت شوطة

وجيجي المسكينة مهيصة داخلة في كل القصص

رايحة القصيم جاية من القصيم

وحبال غسيل بتتسرق وفراخ وبط

وكله كوم وفنادق ال5 نجوم اللي بقت مرطرطة في القصص دي كوم تاني

طب خليك واكعي خليها شقق مفروشة ولا حتي استراحة

ما علينا خلينا صابرين للآخر

لا متقلقش عليا يا طارق ..

أصلي متعودة على المشاوير ومسك الخطوط السريعة ..

سرداد مرداد ( يعني رايح جاي :D ) على الرياض .. اخرتها الويك اند اللي فات .. كنت جايه أتطمن على مقر العملية .. بس للأسف نقلوه .. وهما مبلغونيش ..

وكنت مستنيه عزومة في المطعم البرازيلي ( بلاش الصيني عشان منتقفش) والا اقلها يا مال الشام ..

في الاوقات دي فعلا تكتشف ان الصديج وقت الضيج :D

بس متنساش يا طارق وانت تأكل خبز تميس تجيب معاه جبنة المراعي ..

من بلدنا وتفهم ذوقنا ..

جربها بالتميس

:D

أنا مش عارف والله القصة بتاعة العملية مضايقاكم ليه ؟؟ ماقلنا من البداية انها أسماء مستعارة من قبيل الصدفة البحتة ... ده بالاضافة لأن الموضوع خطير جدااااا ... لا يمكن السكوت عليه ...

أما عن التشويق ... فده شيء طبيعى ... مهو لازم حبة شطة ... وحبة صبر برضه ... أمال ... مش كده ولا ايه ؟؟؟

أما عن موضوع انى مقلتش جملة مفيدة ... أوعدك من كل قلبى يا س س .. ان الحلقة الجاية هيكون فيها كل الحقيقة ... كاملة ... علشان الأحداث سخنت منى جدا ...

أما موضوع البوليسية اياه ... يا راجل ... دى تقدر تقول عليها فانتازيا ... لكن مفيش بوليس خالص ... بذمتك أنا جبت سيرة بوليس ؟؟؟

كرسيدا كانت فى الأصل ليموزين !!! ماشى يا عم .. خد راحتك ... واتريق على عربية حق زول ...

ليه بس كده يا مهيب المهيب .. أنت زعلت :D ؟؟

الحكاية مش مضايقانا ولا حاجه .. حد يطول انه يبقى بطل ومنقذ للعالم ..

يا سيدي بفتح الموضوع يجي 30 مرة في اليوم عشان أشوف اخر التطورات ..

بس انت مش معبرنا

:D

كمل يا س س .. والا هأجي انسف المقر ..

وقد اعذر من انذر

:D

[se_ Elsyed]

نكمل

س س : إيه يا مهيب إتأخرت ليه ؟ بقى لنا ييجي 3 أيام منتظرينك .

مهيب : معليش يا معلم اصل الطريق كان كله لبش ولِجان .. وأضطريت أعمل حركات تموين ( تمويه ) عشان أهرب من الشرطة .

س س : حمد الله عالسلامة .. تعالى كُلك لقمه ..... أنا جايب رُبع كبسة مرشوش لأختك ج ج أقعد وسم الله وأضرب معاها الربع ده .

مهيب : خير يا معلم .. عندك مصيبة إيه المرة دي ؟

س س : إنت حقيقي يا مهيب صعبان عليه .. وعايز أنطأك فوق فوق فوق فوق ... وتقب بقى على وش الدنيا وتجيب حته لامبورجيني أو حتة مايباخ من الحراج زي ج ج .

مهيب : البؤين الحمضانين دول سمعتهم منك 100 مرة .. وكل مرة أتخيل نفسي فوق فوق فوق وبعدين أقع على جدور رقبتي ... وطبعاً العملية الأخيرة بتاعت الستاليت لسه معلمة على جتتي .

ج ج : إيه ده ؟ إنت بتعملوا عمليات من ورايا ... فيها لا أخفيها يا بني آدميين .

مهيب : المعلم يا ستي ديك النهار لقيته بيتصل بيه بعد الفجر ويقولي إن إحنا داخلين على عملية هاتتكلم عنها وكالة ناسا نفسها ... قلت له خير يا معلمه ؟ هانسرق مكوك الفضاء ديسكفري ونشغلة على خط العُليا - دله ؟ ولا هانطلع بعربيتنا نعترض محطة الفضاء مير ونحجزها عندنا ونطلب فدية 3 مليون دولار ؟ قال لي : أهم وأخطر وأكبر .. فقلت له غُلب حماري .. خلص وإنجز ... قالي رسمت لك خطة ما تخرش الميه وهاخليك تقشط أطباق الدشات اللي فوق سطوح العمارة بتاعتنا ... صدقته ومشيت وراه . وأتسحبت بعد نص الليل فوق السطح ولسه بأفك أول طبق إلا وأُفاجأ براجل ومراته من السكان وطالعين فوق السطح وراح الراجل سألني بصوت تخين : بتعمل إيه فوق السطح في ساعة زي دي ياد ؟ قلت له بأصلح الدش يا معلم .. قالي بنفس الصوت : دش ؟ّّّ ده أنا هادش رقبتك دلوقت ... صوتي يابت يا عزيزة ... ولموا عليه الدُنيا لولاش سعادتك طلعت وخلصتني من إيدهم وقلت ده الواد البنغالي اللي جبته يصلح لي الدش ...

فأبوس إيدك يا معلم سين سين .. سيبني أعيش اليومين اللي بقيين لي في حياتي سليم .

س س : المرة دي العملية هاناكل من وراها مهلبية بالزبيب يا هوبه .

ج ج : شوقتنا يا معلم ... إرغي وخلص وإدخل في التفاصيل .

س س : أنا رسمت لكم خطة هانقشط بها محل كنتاكي اللي فى شارع جامعة الدول العربية بالمهندسين .

مهيب : إشمعنى يعني .. وليه الشحططة دي ؟ ما كنتاكي مالي الدنيا هنا ؟ وبعدين ليه نبوظ علاقتنا بالدول العربية ونسرق المحل اللي بيغذيهم وموجود في شارعهم ؟

ج ج : عشان خاطري أسكت يا مهيب .. وخليه يجيب أخره ... كمل يا محلمه .

س س : إنت وج ج هاتعلموا عرسان لسه متجوزين جداد وهاتكبسوا على المحل .

مهيب : حاسب يا ريس ... أنا مش موافق على الجوزاة دي .. أنا لسه صغير ومش عايز أندفن بدري بدري .

س س : يا أخي إتلهي وإنت تطول .. على الأقل دي هاتبقى مراتك وكفيلتك في نفس الوقت .

ج ج : لأ يا سين سين .. أنا مش ممكن أتجوز من ورا بابا ... وبعدين لسه في حاجات كتير ما أشترتهاش زي ملايات السرير والحلل التيفال .. وبعدين فستان الفرح ... ده آيلي صعب يزعل مني

س س : ما تصلو عالنبي إنت وهيه .. هو أنا بأقولكو إتجوزوا عرفي .. ده كده وكده ياخوانا .. إنتي مش ياختي عايزة تبقى نيكول كدمان ؟.. وإنت ياخويا مش طول عمرك مصدع دماغي وبتقولي إنك كنت بتمثل في فريق الكشافة ... يالله ورونا شطارتكو على مسرح الحياة .

ج ج : صح .. عندك حق يا معلم .. طب إيه رأيك انا جاتني فوكيرة دلوقت إنما تجنن .. انا هاخد شريف ونُهى ولاد أختي واعمل إنهم ولادي ومُهيب أبوهم ونكبس على كنتاكي كإنني عيله .

س س وهو يجز على أسنانة : لو سمحتي يا ج ج فكينا من تفانينك .. واحده شكلها بيبي فيس وعندها بالكثير 18 سنة ... لحقت إمتى تجيب عيلين أصغير واحد فيهم عنده 9 سنين ... أنا قلت لسه متجوزين يعني لسه متجوزين ... ومن غير مناقشة .

مهيب : بس يا ج ج خلي المعلم يكمل .

س س : إنتي يا ج ج هاتطلبي واحد تشيكن كومبو مع سفن آب .

ج ج : ما تمشيها ميرندا برتقان يا معلم ينوبك ثواب .

س س : لا حول ولا قوة إلا بالله .. ما تيجي تخططي إنتي وأروح أنا ؟

ج ج : سفن سفن يا معلم ... أهو حاجة تخلي الواحد يهضم .

س س : وإنت يا مهيب هاتطلب واحد زينجر سوبريم سبايسي .

مهيب : والبواسير يا معلم ؟

س س : بتقول إيه ؟ .

مهيب : قصدي الحاجات الحراقة دي بتتعبني يا معلم وانا مش ناقص مشاكل .. مشيها ساندوتش إورديناري عشان خاطري .

س س : يا حبيبي مش لازم أكشف كل أوراقي قدامك وأقولك إن الزينجر سوبريم بياخد وقت في تحضيره على ما يحبشهولك بالشطة .. نكون إحنا قشطنا المحل .

ج ج : طلبنا الطلبات .. وبعدين يا معلم .

س س : هاتبلطجوا وما ترضوش تدفعوا الحساب على أساس الطلبات مش عجباكو ... طبعاً عُمال المحل هايتلموا عليكوا وينزلوا فيكو ضرب .. في نفس اللحظة دي أكون أنا عامل فيها شاويش دورية وأقوم داخل محجز ونازل فيكو ضرب إنتو الاتنين وأحط الكلبشات في إيديكو وواخد كل اللي في المحل على القسم واحرز الخزنة بتاعت الفلوس كمان .. في الطريق نروح مكتفين العمال ورميينهم بره العربية .. ونخلع إحنا بالغلة ... إيه رأيكو في بنات أفكاري ؟ .

ج ج : أنا مش شايفه أي بنات يا معلم .. كل اللي شايفاه إن أنا ومهيب هانكل ضرب ماكلهوش حرامي ظبطوة بيسرق جذم الناس اللي بتصلي .

مهيب : طب وتفتكر نصيبنا أنا وج ج يا معلمه هايكفينا علاج في القصر العيني نتيجة الضرب المُبرح اللي هانكله من العيال بتوع المحل ومن سعادتك كمان ؟

تمت .

[مصرية الهوى]

مهلبية ايه يا عم اللي قرفتنا بيها

قال مهلبية قال

دنتا موركش غير الكبسة والفراخ .. لحد ما ريشنا وبدينا نكاكي طول الليل :o

وبعدين تعال هنا ايه اللي يضمنا انك هتدينا نصيبنا .. ومش هتأكل حقنا علينا !!

بس نرجع برضه ونقول انك المعلم وكبير العيلة .. واللي ملوش اول ملوش اخر .. واللي مفيهوش خير لأهله مفيهوش خير للناس :angry2: ..

فاحنا يعني ملزمين اننا ناخدك على قد عقلك ونسمع كلامك .. مش قلنا كبيرنا بقى ,

بس ايه يا معلم ..

ده انت لو لفيت الدنيا كلها مش هتلاقي أجدع مني أنا ومهيب .. رقبتنا يا بيه .. بس انت فتح مخك معانا وعايزين افكار جميلة .. فكرة حبل الغسيل .. وضفيرة من ضفايري راحت .. وقولنا مش مشكلة تتعوض .. دي الموضه اليومين دول الكاريه الفرنسي ..

وعشة الفراخ .. ورجلي ورمت وقعدت بعدها أسبوع متجبسة .. وقولنا مش مشكلة .. فداك نفسي يا عشة الفراخ ..

وثلاثة الاثافي .. لما ورطت مهيب مع بنهاوي وعزيزة فوق السطوح .. والراجل كان هيضيع مننا في ليلة دخلته .. يالهوووي الناس هتقول علينا ايه !!

بس أنا أقولك حاجه يا معلم .. سيبك من كنتاكي .. خلينا نقشط .. بتاع ده اسمه ايه .. محل بتاع لب ومكسرات في شارع جامعة الدول .. خلينا نسرقه هو أحسن .. نروح أنا ومهيب نعمل فيها عرسان عايزين نشتري ملبس وحاجات كده عشان هنفرقها على المعارف و الجيران في سبوع البيبي ونقعد ساعة نختار ونتلكك ونحاول نعمل مشكلة وصوتنا يعلي وكده .. واقوم انا مطلعة المطواة اللي معايا .. تقوم انت الشاويش تدخل المحل على صوت الخناقة .. بس الله يخليك مش عايزين ضرب جامد .. بعدين تكلبشنا وتاخدنا على العربية ونكمل المشوار ..

بعدين تيجي الشرطة الحقيقة وتوقف العربية وتنزلنا احنا التلاتة .. انا بقى هأعمل فيها وحده ندلة وأقول ايه :wub: :

والله يا باشا أنا ما أعرفهم .. أصلهم خطفوني وأنا كنت بأتمشى مع أهلي في شارع جامعة الدول .. أنا جايه هنا سياحة .. ودوني السفارة السعودية .. يرضيك يا باشا إنهم يتعدوا على سياح .. يرضيك ياباشا إنهم يبوظوا السياحة .. أنا عايزه أقابل وزير الداخلية والسياحة هأحكيلهم على اللي يحصل !!

انتو بقى هتكملوا المشوار معاهم وانا اروح للسفارة السعودية ..

هناك بقى بعد ما اشرب القهوة والتمر وواكلم اهلي واروق كده :) .. ضميري هيأنبني أكيد .. ومش هأنسى الكبسة والفراخ اللي كانت بينا ( العيش والملح بس بالسعودي :o ) .. اروح داخله على السفير السعودي وأقوله :

داخله على الله ثم عليك .. أبطلبك طلب .. تكفى نفذه لي .. تكفى ترى تكفى تهز الرجاجيل :o .. يقوم هو يقولي : لبيه .. أمري .. سمي.. ابشري .. طلباتك يا بنت الديرة :) ،،

أقوله : عندي اثنين صحابي أنا كفيلتهم حصلتلهم مشكلة كده .. عايزه تتكفل تخلصها مع البوليس المصري .. يا سيدي الشغل واقف هناك لو مخرجوش في ظرف يومين .. الدنيا كلها هتبوظ في الرياض يا طويل العمر ..

وتأخذ العدالة مجراها .. ويسلموكم ليا .. ونسافر على أول طيارة للرياض ..

والشرر يتطاير من عيونكم .. بس متقدروش تعملوا حاجه عشان الناس اللي حوالينا

بس اللي خايفه منه فعلا .. ربنا يستر من اللي هيحصل لي لما نرجع المقر في البطحاء ..

:rolleyes:

---------------------------------

س س .. روق كده .. ماشي ؟؟!!

والله يسترك شوف لنا الواد مهيب اختفى فين ..

الشغل بقى له اسبوع واقف .. واحنا ورانا عيال عايزين نربيها ..

[se_ Elsyed]

]أقوله : عندي اثنين صحابي أنا كفيلتهم حصلتلهم مشكلة كده .. عايزه تتكفل تخلصها مع البوليس المصري

..

على جثتي يا جيم جيم ...

النقطة دي بالذات على جُثتي

إيه حرام عليكو بقى ..

ده أنا بني أدم من دم وعضم

هايبقى كفيل هنا .. وفي بلدي كمان ...

ده أنا حاسس بعد العمر ده كله في السعودية لما أنزل أستقر في مصر هأنشر الإعلان التالي في جريدة الأهرام :

" شاب لديه خبرة لا بأس بها في الإدارة يبحث عن كفيل يستظل تحت ظله ويحفظ جواز سفره عنده عشان ما يضيعش " :rolleyes:

[nancy]

استاذ سين سين حضرتك بتالف على طرقة ساعة لقلبك بتاعة زمااااااااااااان

مش عرفة اناحسة انك تشبة الممثل احمد عبد الله

بس منكرش الكلام يضحك رغم انة مش راكب على بعضة ومدخل فية كتيرمن حياتك فى الغربة الى واضح انها طويييلة جدا وباينة فى اسلوب الكتابة

معلش ياجيجي انت سعودية بجد ولا عندك نص مصرى لان اسلوبك مصرى (مرة واحدة )

[se_ Elsyed]

ا

مش عرفة اناحسة انك تشبة الممثل احمد عبد الله

)

الاول مين احمد عبد الله ؟

انا اعرف الخواجه بيجو وابو لمعه والمعلم شكل ونبيه المدقدق

---

يا نانسي باشا انا لست مؤلفاً ولكني اتجمل واكتب ما يدور في عقلي وبأبقى مبسوط ان زملائي في المحاورات بيقرأوا الكلام ده ويتبسطوا

[shahd]

سين سي الأديب الرهيب اضحك الله سنك وامتعنا بما تكتب دائما

[مهيب]

أقولك أنا بقى مين أحمد عبدالله يا (محلمة) .. أقولك و على وشى ابتسامة طقل قدر يمسك ذلة على مدرس الجغرافيا اللى مطلع عينه ... أحمد عبدالله ده الشهير بميكى ماوس .. و هو للعلم و الاحاطة ميكى ماوس الحقيقى ييجى جنبه مارلون براندو أو حسين فهمى ... وانا الحقيقة فرحان جدا لتعليق الاخت الزميلة الفاضلة نانسى الى خلانا نفرح فيك شوية .. هىء هىء هىء ... ضحكة صفاء الخبيثة ما أجملها

بس على العموم عاجبنى موت اللى انت كاتبه ... و ماشى يا عم .. و حياتك عندى لاخللى طانط كوندى تقع فى غرامك يا س س ... وماتعرفش تسربها خالص ... ايه رأيك بقى ؟؟؟

مهيب

[الرافعي]

أقولك أنا بقى مين أحمد عبدالله يا (محلمة) .. أقولك و على وشى ابتسامة طقل قدر يمسك ذلة على مدرس الجغرافيا اللى مطلع عينه ... أحمد عبدالله ده الشهير بميكى ماوس .. و هو للعلم و الاحاطة ميكى ماوس الحقيقى ييجى جنبه مارلون براندو أو حسين فهمى ... وانا الحقيقة فرحان جدا لتعليق الاخت الزميلة الفاضلة نانسى الى خلانا نفرح فيك شوية .. هىء هىء هىء ... ضحكة صفاء الخبيثة ما أجملها

بس على العموم عاجبنى موت اللى انت كاتبه ... و ماشى يا عم .. و حياتك عندى لاخللى طانط كوندى تقع فى غرامك يا س س ... وماتعرفش تسربها خالص ... ايه رأيك بقى ؟؟؟

مهيب

وإن كانت المسألة ليست مهمة، إلا أن اسمه عبد الله أحمد عبد الله

[nancy]

معاش يا استاذ مهيب انا حبوظ فرحتك انا مقصدش ميكى موس الى كان بيتكلم ديما عن توجومزراحى والكسار ونجيب الرحانى

لا انا اقصدر الممثل الى عمل دور المخبر فى فيلم مخبر ومواطن وحرامى بس يمكن غلط فى الاسم ومقصدش شخصية المخبر انا اقصد الممثل الى بيادى الدور علشان محدش يدايق سين سين على حسى انا مليش دعوة ولا اية ( يا محلمة)

[مهيب]

وحياتك انتى يا نانسى لا هتبوظى فرحتى ولا حاجة ... صلاح عبدالله ميفرقش كتير و برضه يأدى الغرض مع س س ... صلاح عبدالله المخبر ... الايه يا س س ؟؟ المخبر ..

لازالت الفرحة تتدفق و تفيض ... و لازال التشفى يمتد بى الى آفاق لم يكن ببالغها .. ولا زالت الضحكة الخبيثة تجلجل داخل أروقة الروح ... هىء هىء هىء

مهيب (بفتح الميم و كسر الهاء وليس مُهيب كما يدعى الأخ س س )

[se_ Elsyed]

... صلاح عبدالله ميفرقش كتير و برضه يأدى الغرض مع س س ... صلاح عبدالله المخبر ... الايه يا س س ؟؟ المخبر ..

ماشي يا مهيب بفتح العين وتسيكن الواو .. بقى أنا شبه صلاح عبدالله يا يا يا ... ربنا يسامحك .

وإنت كمان يا نانسي إستني عليه لما أحشر إسمك في اي قصة جاي وأخلص تاري منك ..

عيلة الباهجوري ما يسيبوش تارهم واصل ..

[nancy]

يادى المصيبة انت مصر تفرح فى الراجل حتى لو قلت علية حسين فهمى برضوا حتلاقى حاجة تغيظة بيها

[se_ Elsyed]

يادى المصيبة انت مصر تفرح فى الراجل حتى لو قلت علية حسين فهمى برضوا حتلاقى حاجة تغيظة بيها

أنا بعون الله لو مش خايف على شعور ناس مُعينه هنا - واخد بالك يا مهيب بفتح الكاف وكسر الرجل وركز على كلمة شعور قوي .. ودي مشتق منها شعر - كنت حطيت صورتي ... لكن منعاً للمقارنات وكده مش هاعملها ...