تقدر تتغير ؟؟؟

[احمد هادي]

اعزائي رواد المنتدي

عندي سؤال مهم

حبيت آخد رايكم جميعا فيه

هل الانسان يقدر يغير من نفسه ؟

يتخلي عن عاداته السيئه و يتخلص من عقده ويبقي انسان مختلف

بشرط انه ميكونش مضطر للتغيير ده

يعني ببساطه يتغير عشان هو عايز يتغير مش عشان مضطر يتغير

انا بطرح السؤال ده لاني بصراحة بقيت اخاف علي نفسي

لاني عجزت اني اغير حاجات كتيره كان نفسي اغيرها

صحيح مع التدريب نجحت في تغيير جوانب محدده

بس لسه في جوانب كتيره مش قادر اغيرها

هل الانسان كل ما يكبر في السن يصعب عليه انه يتغير

طيب واي عمر هو عمر القدره علي التغيير

عايز اعرف وجهة نظركم وتجاربكم

قدرت تتغير ؟؟؟

[سقراط المصري]

 

هل الانسان يقدر يغير من نفسه ؟

يتخلي عن عاداته السيئه و  يتخلص من عقده ويبقي انسان مختلف

بشرط انه ميكونش مضطر للتغيير ده

<{POST_SNAPBACK}>

نعم ممكن نغير من انفسنا نظريا اما عادتنا فتحتاج جهد كبير ولكن ممكن تغيرها للافضل

هل الانسان كل ما يكبر في السن يصعب عليه انه يتغير

طيب واي عمر هو عمر القدره علي التغيير

<{POST_SNAPBACK}>

نعم السن او كبر السن يعوق عملية القدره على التغيير

مرحلة ماقبل العشرين هي افضل مرحله للتغيير او كسر ثوابت

وعادات خاطئه

ولكن والاهم طالما وجدت نيه خالصه للتغيير فلازال هناك رصه ي جميع

المراحل العمريه ويفضل التغيير ببطىء مثل عامل البناء الذي يبني سلالم فهو يبني سلمه ثم يتاكد من متانتها وبعد ذلك يقف عليها ويبني اخرى وطبعا كل ذلك في الاتجاه لاعلى

[سهيلة]

اولا احييك على فكرة الموضوع

احمد هادي مشاركة بتاريخ اليوم, 10:58 AM

  اعزائي رواد المنتدي

عندي سؤال مهم

حبيت آخد رايكم جميعا فيه

هل الانسان يقدر يغير من نفسه ؟

يتخلي عن عاداته السيئه و يتخلص من عقده ويبقي انسان مختلف

بشرط انه ميكونش مضطر للتغيير ده

من رايي ان الانسان لو عندة ارادة وعزيمة انو يغير صفة من صفاتو او عادة من عادات حياتو السيئة

هيقدر يتغير

بس هيحتاج مجهود مش للتغيير بس

ولكن

للمداومة على هذا التغيير

والاخيرة هية اللى بتحتاج المجهود

عشان كدة لازم تتغير بالتدريج لو كانت عادة ف حياتك زى التدخين مثلا

لو اقلعت عن التدخين مرة واحدة اكيد مش هتصبر كتير وترجع لة تانى

لازم باللتدريج

هحكى لك حكايتى انا مع التغيير

انا كنت مش مداومة على الصلاة خالص يعنى انا طول اليوم برة فكنت اصلى بس لما اكون ف البيت ومش كل الاوقات

ولما حاسبت نفسى وقررت اتغير واداوم ع الصلاة

نصحونى وقالولى اول اسبوع ف المداومة هوة اصعب حاجة

يعنى لو قدرتى ما تفوتيش ولا فرض ف الاسبوع الاول يبقى نجحتى بنسبة

90%

وفعلا اصبحت من يومها عادة ما اقدرش استغنى عنها و من اهم طقوس حياتى

ودى دعوة للمداومة ع الصلاة

(

احمد هادي @ Mar 1 2006, 09:58 AM)

هل الانسان كل ما يكبر في السن يصعب عليه انه يتغير

انا اعتقد انو الارادة والعزيمة ما لهومش حدود ولا سن وممكن يكسروا اى عاءق

امامهم حتى ولو كان الزمن

المهم الواحد يقتنع بالتغيير

ويا ريت ننظر لعيوبنا ونحاول نغيرها قبل ما ننظر لعيوب الاخرين

[عصفور طاير]

برافو عليكي يا سهيلة..

ممكن الواحد يتغير فعلا لو أراد وكان عنده دافع قوي للتغيير..

والإمام البصيري قال:

النفس كالطفل ان تهمله شبَّ على حب الرضاع وان تفطمه ينفطمِ

يعني ممكن تتغير يا عم هادي.. اطمن

تم تعديل 1 مارس 2006 بواسطة عصفور طاير

[Th!nk]

فعلا موضوع التغيير ده محير يا أخ أحمد

أنا أفكر فى هذا الموضوع بأستمرار وما لا أفهمه هو نقطة معالجة خلل بشىء به خلل!

فعندما نريد معالجة مشكلة ما فنحن نبحث عن شىء يعمل بصورة جيدة من أجل معالجة الخلل...

لكنى لا أفهم كيفية معالجة مشكلة بشىء به مشكلة أصلا!

فأذا حاولنا تطبيق ذلك على موضوع نفس مريضة بها عيب أو خلل (وكل أنسان به نقاط ضعف لا يعلم عددها ألا الله) فكيف تعالج النفس خلل تعانى منه... وكيف تتخلص منه وهى تتصرف من خلاله... فاهم قصدى

أذا من اجل العلاج لابد من أيجاد مصدر خارجى يساعدنا للتخلص من العيب...

ويكون كل ما نفعله هو وجود رغبة شديدة فى التغير ومحاولات مضنية متكررة للتخلص من الخلل ونقاط الضعف وفى نفس الوقت الأبتهال لله تعالى بأن ينعم علينا بهذا التغيير... فالنفس المعيوبة لا يمكنها أن تعالج نفسها بنفسها لأن هذا العيب هو صفة من صفاتها وجزء منها... ولذلك يكون التغيير هو نعمة ينعمها المولى عز وجل على من صدق مع نفسه ومع الله... ولن يكون هناك تغييرا ألا للصادقين البازلين للجهد الحقيقى... فالتغيير ليس سهلا ويتطلب جهدا وصبرا لكنه كما أوضحت ممكن جدا للصادقين مع أنفسهم...

أذا فالعمل والأعتماد على النفس المعيوبة لعلاج العيب لن يصلح خللا... وكذلك الدعاء والأبتهال وحده لن يعالج عيبا... ويكون التغيير بالأثنين معا...

[noureldonia]

السلام عليكم و رحمة الله وبركاتة

أنا كمان زي زي الجميع كنت معتقدة انوا صعب اغير من صفاتي السيئة السلبية و كنت معتقدة انو كل يوم بيعدي عليا بيحط حاجز بيني و بين التغير بس أكتشفت بعد طبعاً مع قرأت للدكتور إبراهيم الفقي كتابة ( قوة التحكم في الذات ) أنوا للأسف احنا إلي بنوهم نفسينا بأنوا مستحيل التغير وانوا كل ما الشخص يكبر يبقي اصعب . مع العلم انوا الدكتور ابراهيم لم يتطرق في كتابة إلي مسالة السن إطلاقا و إليك السبب الرئيسي في جعلك غير قادر علي التغير . ( الموضوع كلة يتعلق بالعقل الباطن للإنسان ) .

إليك هذا المثال : إذا اعتبرنا الغقل الحاضر للإنسان هو معد برامج الكمبيوتر وإن العقل الباطن هو عقل الكمبيوتر فلو معد البرامج غذي الكمبيوتر بالرسائل الأتية : انا صعب اتغير انا كل مكبر الصعوبة في التغير هتكون أكبر ........ فإن إلي هيظهر علي شاشة الكمبيوتر هو تلك الرسائل السلبية لأن العقل الباطن للإنسان لا يعقل الأشياء ولكن ببساطة بقوم بتخزنها كما هي ويقوم بتكررها فيما بعدد لا أكثر ولا اقل فلو حدث انوا رسالة اتبرمجت لمدة طويلة و لمرات عديدة فأنها بتترسخ في عمق العقل الباطن ولا يمكن تغيرها ولكن يمكن استبدالها ببرمجة أخري جديدة

وعلي هذا الأساس بنعتقد انوا صعب التغير ومش بنتغير انا جربت الموضوع دة بدات ادي لعقلي الباطن رسائل جديدة ايجابية بدل السلبية إلي انا كنت مقتنعة بيها ........انو انا مسيطرة علي انفعالتي (مش هسيطر) لا مسيطر دة لازم يكون اسلوب الحوار بينك و بين العقل الباطن انك مسيطر ، قوي ، قادر ، معندكش مستحيل ....وكانت سعادتي الكبري بجد أول ما لمست التغير و إلي حوالي لمسوة جرب اكيد هتحس بالفرق .

[احمد هادي]

وهنا لنا وقفه

يا نور

يا نوووور

هل تعتقدي ان اقتناع الشخص بقدرته علي تغيير نفسه

كافي في حد ذاته

للانسان ان يتغير

يعني مع كامل احترامي ليكي وللأخ الفقي

مش شايفه ان الموضوع اعقد من كده شويه

انا معاكي ان الاقتناع بالقدرة علي التغيير شئ مهم

لكن اعتقد برضه

انه مش كافي لوحده

لو عنده ( الفقي) خطه

بخطوات محدده

يا ريت نعرفها منك

ولو انتي شخصيا عندك خطة

يبقي البركة فيكي

انا في الانتظار

تحياتي

تم تعديل 8 مارس 2006 بواسطة احمد هادي

[noureldonia]

السلام عليكمورحمة الله وبركاتة

صدقني يا أحمد حتي أنا كنت مفتنعة زيك تماما بأنو التغير صعب بل مستحيل بس فعلاً لما قرات للدكتور اقتنعت بكلامة وبدات في التنفيذ لقيت انوا مفيش حاجة اسمها صعب احني إلي بنخلي الصعب صعب وفي حاجة مهمة بتخلي الواحد يصدق انوا صعب التغير عدم صبرة علي التغير نفسة هديك مثال ممكن تطبقة علي كل حاجة زي واحد تخين عاوز يخس يبدأ يتيع نظام غذئي معين عدي اسبوع أتنين ملقاش تغير في نقفسة يبدأ يمل دة حالنا في اي حاجة في حياتنا إذا مفيش صبر علي التغير يبقي كان إلي بتعملوا ملوش لازمة.

أولا بداية الخطة دة كلها او مفتاحها الصبر و الألتزام في انك هتتغير يعني مهما لو طال الوقت بيك علي سبيل المثال في انك عاوز تخس يبقي تصبر في موضوع انك تخس مش هتخس بين يوم وليلة ولا شهر ولا اتنين دة لنفسك فترة زمنية معقولة والتزام في انك هتاكل بعتدال .

الخطة إلي وردت في كتاب الدكتور هي الاتي :

1. دون أعتقاد سلبي بيحد من قدراتك ويحول بينك وبين استخام امكانيتك الحقيقة .

2.دون خمس اشياء سلبية نتحثك لك نتيجة هذا الأعتقاد .

3.اغمض عينك وتخيل انك انتقلت لمدة سنة في المستقبل ومازلت باعتقادك السلبي ...... لاحظ الألم الذي يسببة لك هذا الأعتقاد .

4.تخيا انك وصلت إلي خمس سنوات في المستقبل ومازال معك نفس الاعتقاد السبلبي

5. تخيل انك وصلت عشرة سنين في المستقبل بنفس الاعتقاد لاحظ كيف يقيدك ويسبب لك كثير من الألم.

6.أرجع إلي الوقت الخالي افتح عينك وتنفس بعمق ثلاث مرات .

-كدة احنا اتكلمنا عن احساسك باعتقاد السلبي هيكون اية واثرة عليك مع الوقت الطويل نفس التمرين هطبقة بس بانك تغمض عنيك وتتخيل الفوائد اللي هتحسلك بعد متتحول من سلبي لإيجابي بعد سنة و خمسة و عشرة وتحس بشعور السعادة و الأنتصار للي وصلتة .

إليك بقة عملية تغير التفكير او الاعتقاد السلبي نفسة :

1.دون خمسة مصادر علي الاقل يمكنها ان تساعدك علي احداث تغير فيك زي مثلا ( إمكانيتك وقدراتك ، مين ممكن يساعدك علي القيام بالتغير دة )

2. دون علي القل خمس مشاكل ممكن ان تواجهاك وانت تحاول التغير

3. دون علي القل ثلاث حلول لكل مشكلة .

4. أغمض عنيك وتخيل نفسك باعتقادك الجديد لاحظ سلوكك وشعورك نتيجة التغير .

5. افتح عينيك تنفس بعمق ردد خمس مرات " انا قادر علي التغير ، أنا اثق في نفسي وفي قدرتي علي النجاح "

6. ودة اهم حاجة انك تبدا في تنفيذ الخطة قم ببناء ثقتك في نفسك علي التغير واستبدل اي اعتقاد سلبي الي ايجابي ثق في انك تستطيع تحويل اي ضعف الي قوة ..... ثق في انك تكون وتملك وتعمل اي شيء ترغب فية .

اما انا فاضافة الي استمراري علي تلك الروشتة الي بجد صدقني مع التزام وصبر بتجيب نتيجة مزهلة كنت بتبع تمرين تاني ، بجيب ورقة وقلم وكل يوم اكتب مائة مرة انوا الحاجة السلبية الي فية مش هعملة وبالفعل مش بعملة لانوا برمجت عقلي الباطن بالشيء اللي انا عاوزة اعملة والموضوع دة نجح معيا جدا ،،،،،،،، جرب وهتشوف النتيجة

واع\رني علي الخطاء الأملأئية انشاللة المرة الجاية هتقل و هراجع الي بكتبة :huh: