تعالوا نفكر بعض باحلي أيام حياتنا

[احمد هادي]

يقال والعهده علي الرواه ان اول 6 سنوات من حياة الانسان تحدد جزء كبير من ملامح شخصيته

بل قال البعض الآخر اول سنتين

ما علينا

المهم ان دي احلي ايام حياتنا من وجهة نظري المتواضعة

وكثيرا في عز المواقف الصعبة والحرجه بل والحاسمة في حياتي

تقفز امامي ذكريات الطفوله في مصر والسعوديه

ما زلت اذكر حلقات جرندايزر - دايسكي وكوجي وبلاكي وزوريل

مازلت اذكر لهفتي يوم الاربع علي قراءة ماجد

مازلت اذكر ميكي وسمير وتان تان وميكي جيب وسوبر ميكي

مازلت اذكر الحديقة العامه في بريده يوم الجمعة بعد الصلاه

ما زلت اذكر مدرساتي الجميلات اللي كنت بحبهم مس أمال لطفي ومس نسل شاه ( كانت من اصل تركي )

مازلت اذكر لعب الكره علي رصيف شارع مدرستنا في نادي كسح فسح الرياضي

مازلت اذكر كيف كنت اخبي الغاز المغامرين الخمسه داخل الكتب واعمل نفسي بذاكر

ياتري في عزالمسؤليات والالتزامات والاحباط والغربه و والضغوط والقلق اللي ممكن يكون كتير منا عايشه اليومين دول.........

لسه فاكر ايه من ذكريات طفولتك ؟

تعالوا نفكر بعض باحلي ايام حياتنا

[khedr]

معقوله

محدش عايز يرد

نستني كمان

لما نصحصح ...

[se_ Elsyed]

بالنسبة لي أحلى أيم حياتي كانت الفترة من سن الطفولة حتى نهاية المرحلة الثانوية ...

لإنها كانت مرحلة أكل ومرعى وقلة صنعه ..

لا مسئوليات

ولا وجع دماغ

ما فيش خُبث ومكر

إنسان عايش بالفطرة لسه

يفعل ما يريد كيفما يُريد اللهم إلا من شوية المُذاكرة اللي قبل الإمتحانات

هيييييه ... الا ليت الطفولة تعود يوماً

[عصفور طاير]

أحلى الأيام اللي عشتها يا عم هادي كانت من أربع سنين فقط.. قبل ما أسافر مملكة الإنسانية (السعودية سابقا)، وده لأني كنت في الوقت ده باحب أجمل بنت في الوجود.. على الأقل من وجهة نظري.. ولما سخر القدر كعادته، سافرت أنا وتزوجت هي..

دا اعتراف على رؤوس الأشهاد في ساعة صفا، أول مرة أعملها في حياتي.. ولكني لما فكرت في سؤالك عن أجمل أيام حياتي، فلم أتذكر سوى هذه الأيام، فقررت أن أعترف لها بهذا الجميل.. سقاها الله من أيام خوالٍ

[فــيــروز]

الشتاء طويل على من لا ذكريات له .. الحمد لله على الذكريات الحلوه التى يتشبّث بها الانسان فى اوقاته الصعبه لتعينه على مواجهتها و تملأه بالأمل فى الغد ..

من أجمل الذكريات لدىّ اجتماعاتنا الاسريه زمان فى بيت جدّتى .. أولاد خالاتى و احنا و اللعب فى الشارع طول النهار ثم العوده للبيت و التجمّع على مائدة العشاء

و لمّتنا ايام الدراسه و الرغى اللى مش بيحلا غير ساعة المذاكره و ستين موضوع يتفتحوا فى نفس واحد و الضحك من تحت لتحت امّا كان حد فينا يقع تحت ايد جدى الله يرحمه عشان يذاكر له و يبتدى يبستف فيه بضعف لغته :D

يااااااااه .. ألا ليتها دامت :)

[se_ Elsyed]

ساعات باسأل نفسي : هو ليه اللي فات بس هو اللي حلوه وبنتمنى يرجع تاني ؟ ليه مشالحاضر أو المستقبل ؟

مع إن الحمد لله الواحد صابر وراضي ( مع الإعتذار لجورج و صوف ) :lol:

[احمد هادي]

ساعات باسأل نفسي : هو ليه اللي فات بس هو اللي حلوه وبنتمنى يرجع تاني ؟ ليه مشالحاضر أو المستقبل ؟ 

مع إن الحمد لله الواحد صابر وراضي ( مع الإعتذار لجورج و صوف )  :lol:

<{POST_SNAPBACK}>

عارف ليه يا بو السيد

لان اي مرحلة في حياة الانسان مهما كانت صعبة وقاسية لا تخلو من شيء جميل .

والانسان بطبعه بيحاول ينسي الصعوبات والمعاناه مادامت خلاص مرت

وبالتالي اللي بيفضل معاه هو الذكريات الحلوة بس

في ناس كتيرة عاشت ايام حرب 73

وشافت معاناه رهيبه

بس دلوقتي بيفتكروها كذكريات عزيزة علي قلبهم

لكن لما كانوا في وسط النار

ما كانوش بيشوفوها كده

كمان لما بتخرج من الصوره بتشوفها اوضح

وبتحط كل شئ في حجمه الحقيقي

وده ما بيحصلش غير بعد ما تمر المرحلة بحلوها ومرها .

[احمد هادي]

كلما ازداد المستقبل غموضا .....كلما ازداد الماضي بريقا

[White heart]

احمد هادي كتب:

ما زلت اذكر مدرساتي الجميلات اللي كنت بحبهم مس أمال لطفي ومس نسل شاه ( كانت من اصل تركي )

:)

بالنسبة لذكرياتى الدراسية فى مرحلة الطفولة ... هل تصدق اننى ايضا مازلت أتذكر مُدَرستى فى مرحلة الحضانة فى إحدى المدارس الفرنسية ( الفرير ) !

كان اسمها مدموازيل " مارسيل " و كانت عيونها زرقاء ... و أعتقد اننى مازلت أتذكرها بل و أتذكر مكانى تحديدا بالفصل ربما ليس فقط لجمالها :wub: و لكن لحرصها على وضع بعض " النجوم " الملونة اللامعة فى كراسات المجتهدين أمثالي :P ... على الرغم اننى لن أنسى اننى حدث و قمت عندما طُلب منا كتابه أسامينا بإحدى الورقات اننى قمت بغش اسم من كان بجانبي ::) :D و كانت فضيحة بجلاجل :D و أذكر أيضا الأستاذ " وديع " مدرس التربية الفنية الذى كان له حجره كاملة عبارة عن متحف يضُم أعمال الطلبة الفنية ( رسومات و تكوينات و تشكيلات من كافة المواد) سواء القدامى أو المعاصرين .. بل أذكر اننى نلت شرف أن تحصل إحدى أعمالي على مكان لها ضمن باقى الأعمال و كانت عبارة عن مركب كبير نسبيا صنعته كاملا من أعواد المصاصات البلاستيك البيضاء التى كنت أجمعها ! :)

و لن أنسى كيف انه فى ذات الأيام و كنت مسئولا عن ضرب الجرس الكهربائي للإعلان عن الفسحة و الذى كان زراره يقع فى وسط كوريدور طويل جدا ... يومها كنت جالسا بالفصل لمتابعه إحدى الحصص العادية، و عادة عندما يحين ميعاد الفسحة يشير الى الأستاذ أو الأستاذه و يأذن لى بالذهاب .. ولكن ما حدث يومها ان هذا الأستاذ نسى و لم يلحظ تأخره فى الإشارة لى، و عندما تنبه الى ذلك طلب منى الإسراع بضرب الجرس... و بالفعل انطلقت مسرعا لتنفيذ المهمة المنوطه لى ........ و أثناء ركضى فى هذا الكوريدور اللعين سمعت من ينادى بأسمى عاليا، و عندما التفت رأيت من بعيد مشرف الدور Frère Patrick الذى صرخ بالفرنسية أن أحضر اليه فورا ... وعندما ذهبت اليه فاجأنى بصفعة قوية :sad: و هو يسألنى لماذا أركض بهذا الشكلن و عندما حاولت إجابته و عيناى تتغرغر بالدموع .. أفهمنى و لو لا يحق لك الركض بالردهة بهذا الشكل و حذرني من تكرار ذلك، و أمرنى بالذهاب لضرب الجرس سيرا و ليس ركضا !!! منتهى الرحمة و الذوق مش كدة؟؟ :lol:

و كم كنا نضحك كثيرا على مدرس اللغة العربية ( الأستاذ جمعة ) و عبارته الشهيرة " تأمل يا مقمل " :D أثناء قرأته إحدى القصص ... و كيف كان يغمض عينيه ( للنوم ) أثناء انهماكنا فى حل التمارين.

بالمناسبة هذا الموضوع يذكرنى بموضوع مشابه كنا قد تناولناه سابقا:

مواقف وطرائف - لكل منا مواقف لا ينساها

و هناك هذا الموضوع أيضا:

ما هو اكتر موقف محرج اتحطيت فيه؟

تم تعديل 4 مارس 2006 بواسطة White heart

[khedr]

دائما ايام رمضان

وخصوصا في الارياف

وساعه الاذان ...

قبل استعمال الميكروفانات ..

كنا نري المؤذن وهو يصعد اعلي الجامع..ويؤذن... ..

وننطلق بعدها ونجري

هيييه هييه هيييه ....الفطورالفطور....افطر ياصايم

حتي نصل الي بيوتنا

وبعد الافطار الفوانيس اللي بالشمع ....وحالو يا حالو

والكنافه البلدي اللي الفرن بتاعها بيولع بالحطب والبوص

والف ليله وليله وصوت زوزو نبيل الساحر ..والخيال الجميل

اه...

ومع المسحراتي ليلا نلف معه لنوقظ اهل القريه النائميين

لم يكن هناك تلفزيون للصبح ولا دش فاضح ولا كهرباء ملعونه

ايام

ايام

ايام

[noureldonia]

انا كمان احلي ايام عمري كانت ايام الطفولة مع اني كنت طفلة شقية جداًجداًجدااااااااااااااااااااااااً بشكل يخلي اهلي يخاف علي مستقبل بنتهم مع العلم انو مع باية مرحلة المراهقة اتحولت إلي شخصية مختلفة تماما مع فا مش مصدقة موضوع انوا طفولتك برسم ملامح المستقبل مرة من كتر ما ازعجت مدرس في المدرسة و انا في ابتدائي عيط المدرس :D بجد مدرس اللغة العربية عيط وسط كل المدرسين :D و مش كدة و بس دة كمان قرر يقدم استقالتة و منعوة اصحابوا لأن انسي هذا اليوم ابدا شكل المدرس وهو بيعيط مني :D هههههههه كانت بجد احلي ايام انا من رائ يا هادي انك تعمل موضوع عن كوارث الطفولة الكوارث او المواقف المضحكة إلي مش ممكن ننساها ابدأ اعتقد انوا مش هنبطل ضحك يومها :D

[مهيب]

المدرس عيط منك ؟؟ و فرحانة يا نور ؟ ... ياااااااه ... فعلا صدق من قال ان عالم الأطفال مالوش أى علاقة من قريب أو من بعيد بالبراءة ... بشىء من الخيال أقدر أشوف المدرس المرهف الحس ... المغلوب على أمره ... اللى الحياة شافت ان المتاعب اللى مرمية عليه مش كفاية فقررت تهديه ببنوتة عفريتة ... وصلته لمرحلة الانهيار و العياط ... ما علينا ...

بالنسبة ليا كانت أحلى أيام حياتى فترة الاعدادية ... و مدرسة الخيرية ... و أيام التفوق اللذيذ ... أوائل الطلبة .. يااااااااه ... و فصل 2/1 كان أشطر و أشقى فصل فى المدرسة كلها ... و كانوا المدرسين عارفينا واحد واحد ... مانساش أبدا الأستاذ فؤاد عزيز مدرس الانجليزى و هو بيقولنا بابتسامة اعجاب : "أشطر و أشقى ناس فى المدرسة ... أهو أنا أحب كده .. بتتشاقوا براحتكم .. وبتعملوا مشاكل زى مانتو عاوزين ... لكن عمر مافى حد يقدر يكرهكم علشان شطار ... أوائل المدرسة بقى ... أنا أحب كده"

اييييييييييه كانت أيام .. ياترى الناس دى راحت فين ... اللى سافر و اللى هاجر .. و اللى بقى دكتور فى الجامعة ... و اللى .. و اللى ... لكن تفضل الذكريات ...

[Lembic]

حد هنا كان فى مدرسة المنار فى اسكندرية؟

[se_ Elsyed]

كمان لما بتخرج من الصوره بتشوفها اوضح

وبتحط كل شئ في حجمه الحقيقي

وده ما بيحصلش غير بعد ما تمر المرحلة بحلوها ومرها .

بقى عايز تفهمني يا أحمد يا هادي .. إن لما أيام مبارك تخلص - ده إن ما خلصناش إحنا قبل ما يخلص هو - ويبدأ عهد جمال مبارك .. هاييجي اليوم الذي نجلس فيه أمام المدافيء ( ياء وهمزة مش نون ... بلاش شُغل التُربية ده :D ) وفي يد كل منا علبة زبادي ونترحم على تلك الأيام - السودا - الجميلة أيام ما كان كيلو اللحمة بـ 35 جنية .. وخط فودافون الدقيقة فيه بجنية وخمسة وسبعين وكيلو البرتقان أربع برتقانات بس ؟

أشك في ذلك :D

فكما قال الفيلسوف اليوناني القديم ( الأيام السودا .. بتبان من أولها )

[MZohairy]

أحلى أيام حياتي

يوم ولادة ابني لؤي :D

و يوم ولادة بنتي لجين :D

[احمد هادي]

كمان لما بتخرج من الصوره بتشوفها اوضح

وبتحط كل شئ في حجمه الحقيقي

وده ما بيحصلش غير بعد ما تمر المرحلة بحلوها ومرها .

بقى عايز تفهمني يا أحمد يا هادي .. إن لما أيام مبارك تخلص - ده إن ما خلصناش إحنا قبل ما يخلص هو - ويبدأ عهد جمال مبارك .. هاييجي اليوم الذي نجلس فيه أمام المدافيء ( ياء وهمزة مش نون ... بلاش شُغل التُربية ده :D ) وفي يد كل منا علبة زبادي ونترحم على تلك الأيام - السودا - الجميلة أيام ما كان كيلو اللحمة بـ 35 جنية .. وخط فودافون الدقيقة فيه بجنية وخمسة وسبعين وكيلو البرتقان أربع برتقانات بس ؟

أشك في ذلك :D

فكما قال الفيلسوف اليوناني القديم ( الأيام السودا .. بتبان من أولها )

والله يا بو السيد

ده يتوقف علي اللي جيمي ناوي يعمله فينا :D :P

وياخوفي يا خوفي ( يا بدران) ده اللي يحصل :D :D

ساعتها هبقي افكرك

ده لو كنا لسه عايشين

وما مامتناش بحسرتنا او (بحصبة الزواحف :D ) -وباء متوقع ظهوره مع نهايه 2010

[سهيلة]

احلى ايام حياتى

ياة فى ايام كتير حلوة

يوم بطاقة التنسيق بتاعة الكلية وصلتنى وانى دخلت الكلية اللى انا عايزاها

ايام الكلية كلها ماعدا ايام الامتحانان طبعا

اتذكر التهريج بتاع البنات وقعدات البنات ف المدينة الجامعية للفجر الرغى والنميمة والضحك للصبح والصحبة الحلوة

والمقالب

ايام لا تنسى

[Lembic]

حد هنا كان فى مدرسة المنار فى اسكندرية؟

أيه يا جدعان! محدش هنا إسكندرانى؟ :huh:

[nancy]

مش عرفة اقول اية زيكم كلكم احسن وقت هو وقت عدم وجود مسؤليات وزكريات المدرسة بس انا مكنتش شطرة فى المدرسة وكانت بتشغلنى اهتمماتى بالقراءة والرسم فى كل الكتب الموسيقى كنت باعزف على الكمان

والاهتمام بالتليفزيون ومصيبة اكبر التحليل يعنى تحليل كل الامور والبحث فى تصرفات الناس دة من وانا فى اولى اعدادى فكنت خيبة فى الدراسة فمش باعرف استمتع بوقت الحصص فكان كل همى ازوغ من الحصص او ابوظها او اوصل المرس انى يتردنى من الحصة لو معرفتش اخد اذن علشان ابقى مسؤلة عن كل النشاط يعنى انا الى مسكة الاذاعة والشرطة المدرسية وارسم كل لوحات المدرسة وادرب على الكمان وادرب الفريق على الاغانى والعزف يعنى برة الفصل ملكة وجواه ولا حاجة لدرجة انى وانا فى اولى اعدادى فكرة انى عندى انفصام فى الشخصية ازاى اكون مبدعة وعديمة النفع فى نفس الوقت

وافكارى كانت بتخلينى محسش بسعادة عدم المسؤلية لانها كانت بتشتغل ازيد من الطبيعى

انما اجمل سنة اولى ثانوى كانت دمار شامل مفيش مذاكرة وفى مدرسها بعيدة باخد ترام ساعة ومسائى يعنى ابقى فى البيت ومحدش موجود ماما وبابا فى الشغل وانا اعلى الرديوا واغنى الصبح وانزل قبل المرسة بساعة اقابل اصحابى البنات نمشى شوية ونركب الترام شوية فى المدرسة اسيب الحصص كالمعتاد وارجع البيت واروح انام بقى مانا مفهماهم انى ذاكرت الصبح وبعدين اقراء فى سريرى الى فى الدور الى فوق لانة كان بدروين فميشفنوش وفكرنى نايمة

طبعا احساس انى فصلة على الاخر دة كان جميل

[tmtm]

أجمل أيام حياتي بصراحة أيام الجامعة... :sad:

لأني نزلت مصر بعد طوول غربة وعيشت فيها خمس سنين من أجمل سنين عمري اتعرفت فيها على الناس وعرفت قد ايه انا كنت مفتقدة

مظاهر الحياة والاجتماعيات الجميلة وسط أهلي وناسي وعرفت طعم كل مناسبة وكل عيد الناس في مصر بيخلوه احتفال كبيير وكنت مذهولة بكل شيء في مصر mfb:

قد ايه الحياة فيها جميلة برغم كل الصعوبات بس مجرد احساسي اني في بلدي ووسط أهلي دة كان عندي بالدنيا ومافيها.....

ناسها شوارعها حواريها...كل حتة فيها بتوحشني.... :wub:

وللأسف بعد ماخلصت الجامعة رجعت للغربة تاني بحكم وجود أهلي في دبي :P .....بس بحلم في يوم أرجع لمصر تاني وأعوض كل لحظة ماعيشتهاش فيها.... :D