بسلامته بيخطب

[أبو حميد]

منقولة من موقع عشرينات

أنس محمود - عشرينات

المشهد الأول يصف أشارة مرور متوقفة لمدي يومين بمناسبة الخطبة

*(ملاكي القاهرة – فيات 132)

الراديو: إذاعة القاهرة الكبرى – برنامج ربات البيوت

هي: ما تعلي الراديو شوية يا محسن، موش كفاية الوقفة المهببة اللي احنا واقفينها من ساعة دي؟

هو: حاضر يا علية.. بس متشتميش الوقفة..

هي: يعني يا ربي احنا ذنبنا إيه بس نتركن عشان خطبة بجنابه في المناسبة المهببة

هو : ملناش ذنب، بس متشتميش المناسبة

هي: اسكت أنت، أنا بشتم الخطبة

الراديو: ودي وصفة هايلة لشربات الخطوبة، بنقدمها لكل زوجة عشان تقدمها في خطوبتها!

*(تاكسي – ريتمو- أجرة القاهرة)

الكاسيت: مبخافش وأنت عارف – شعبولا

السائق: الواحد لو يعرف أنه هيخطب النهاردة، كان حاسب الزباين بالساعة موش بالمسافة..

الراكب: وهو يا اسطى العطلة دي عليك لوحدك، ما انا كمان متعطل، يلا.. ربنا يزيحه..

السائق: هو ايه ده؟

الراكب: البرد... البرد اللي على صدري يا اسطى.. أصلي رايح أم المصريين عشان اكشف واخد علاج تبع التأمين..

السائق: والبيه شغال ايه

الراكب: بعيد عنك... قاضي!

شعبولا: إيييه إيييه إيييه

*(جمرك 88 الطائف – فيات 128)

الكاسيت: سنخوض معاركنا معهم

هو: الحمد لله، فزنا والقلق انتهى

هي: انتهى، ما هو بسلامته رايح يخطب، وكلنا متعطلين بسببه

هو: الصبر، المهم اننا اثبتنا وجودنا وكسبنا

هي: ماما كلمتني وفرحانة قوي باداءنا في البطولة

هو: متنسيش أن تفوقنا على الاهلي كان صعب، واتحاد جدة رغم انه نادينا الا انه بقاله فترة موش في المود

الكاسيت : ونعيد الحق المغتصب.. وبكل القوة نردعهم

*ملاكي (جدا) القاهرة – 76 – جيب شروكي

سي دي عمرو دياب الجديد

هو: ما توسع يا حمار، هو انا لازم اخبطك عشان تتعلم تسوق

هي: اهدى شوية يا تاكي، انت عارف الشارع كله واقف

هو: سيبك إنتي يا سوسن، انا اللي مصبرني المناسبة السعيدة، بابا كان هيروح فيها لو كان اتقلش

هي: وهو بسلامته يقدر يخطب من غير وجوده، هي الخطبة تحلى إلا بوجود الأكابر

هو: عندك حق، وولاد الأكابر كمان، هو احنا شوية في البلد

عمرو دياب: حفظت كل كلامك صم.. تحب أسمع؟

*(تحت الطلب – 2477 منوفية)

الراديو : نجوم أف أم

هو: تفتكري هنوصل؟

هي: لازم نوصل، لاني موش قادرة استحمل، ولإني كمان موش هولد في الشارع

هو: لو ولد هسميه جمال

هي: ولو بنت هسميها تشريفة

هو: موش كنا سافرنا ولدتي جنب مامتك

هي: يا حبيبي ما أنت فاكر من سنة لما سافرنا كفر مصيلحة، الخطبة اللي فاتت كانت قافلة الطريق وولدت عند كريمة الداية

هو: اهي الخطبة دي كمان قفلت الطريق، معاكي رقم كريمة

برنامج يوم: لازم الأب يكون قدوة للأطفال، عشان الولد سر أبوه، ولو ابوه سره انفضح، الواد هتبقى سيرته على كل لسان..

(تاكسي – أجرة جيزة)

الكاسيت: ألبوم الحزب الوطني في مصلحتك

الراكب : قلتك بلاش اكتوبر

السائق: وهو احنا عندنا غيره يا بيه.. ده هو اللي ساترنا

الراكب: يا اسطي ده طلع مقلب

السائق: صبرك بس، شوية والحال هيمشي

الراكب: الحال موش هيمشي طول ما اكتوبر موجود

السائق: الصبريا بيه، الكوبري في مرحلة اصلاح، ولازم نستحمله

الراكب: ما هو برضه بقاله سنين طويلة لما اتخنقنا

السائق: هو مين ده؟

الراكب: أكتوبر يا اسطى

الراديو: يبقى انت اكيد اكيد في مصر

سور الكوبري

هي: انا موش فاهماك يا اخي، ايه بس اللي ينزلنا من العربية

هو: يعني انت شايفاها ماشية قوين انا قلت ننزل نقف جنب العربية لحد ما بسلامته يخلص الخطبة

هي: ده أنت رايق قوي

هو: نفسي اقعد فوق السور

هي: اقعد يا حبيبي، بس اوعى تقع

هو: ولا اقع، هموت يعني، ولو مت، ساعتها ابقي خلي بالك من العيااااااااااااااااااال!

هي: مدحت، قلتلك حاسب تقع يا حبيبي، مدحت، إلحقوني..

- يالا يا مدام، عربيتك موقفة الطريق، خلونا نمشي، موش هنفضل واقفين في مكاننا على طول!

*بتاع جرايد تحت الكوبري

- مانشيت رئيسي بجريدة الفجر القاهرية: عدد خاص بمناسبة خطوبة جمال مبارك

- الدستور : زفة أسطورية من الزاوية (بيت العروسة) لمصر الجديدة (بيت العريس) تشل المرور لمدة يومين

- الأهرام : البورصة تنتعش بعد الخطبة المباركة

- الأخبار: نظيف ينفي أن تستقيل الحكومة بعد الخطية

- مايو: صفوت الشريف والعادلي والشاذلي والألفي والدراملي يهنأون العريس

- روزاليوسف : جمال أعاد البسمة لوجوهنا بعد فوز الإخوان المؤلم

- آفاق عربية: الخطبة في الإسلام

- إخوان أون لاين: ارفع رأسك يا جمال، ولا تقبل يد عروسك

- عشرينات: بسلامته بيخطب!

تم نشر هذه المقالة في 21/12/05 قبل خبر الخطوبة المباركة

[أبو حميد]

دي بقى لسه جديدة بعد خبر الخطوبة نفس الموقع كاتب جديد

البراء أشرف - القاهرة:

مشهد رقم واحد:

مبارك في صالة بيته، يجلس على سجادة صلاة بشكل علم مصر، ويمسك في يده مصحف، وعلى الأرض نسخة من قانون الضرايب الجديد، تركز الكاميرا على الساعة التي تشير عقاربها إلى الرابعة AM، ويعلو صوت مبارك بالتسبيح..

مبارك: يا رب، يا رب الواد جمال ربنا يهديه كدة ويكمل نص دينه، ويارب أشوف ابنه ييجي يصلي معايا العصر ونبقى أنا وهو أكيد في مصر.. يا رب أشوف ابنه بيشجع معايا مصر في بطولة كأس أفريقيا 2030.. يا رب..

صوت الباب يفتح، ويدخل جمال وهو يمشي مترنح..

مبارك: إنت جيت يا حبيبي

جمال: إحم.. بابا.. إنت إيه اللي مصحيك لحد دلوقتي.. إنت موش وراك حكم الصبح، كدة تروح الرئاسة متأخر..

مبارك: يا ابني.. أنا من ساعة ما حكمت البلد دي وأنا موش شايف شكل النوم، الأمانة اللي في رقبتنا تقيلة قوي، يلا بقى عشان تيجي تشيل معايا الحمل

جمال (وهو يقبل قانون الضرايب): ربنا يخليك لينا يا بابا

مبارك: يا أبني بقى موش ناوي تعقل وتكمل نص دينك

جمال: وهو أنا عرفت أجيب النص الأولاني

مبارك: بتتريق حضرتك، طيب اتفضل أدخل أوضتك، محروم من لجنة السياسات لمدة أسبوع، ومفيش مؤتمرات ولا مناكفة مع عمك صفوت غير لما تتجوز، يلا أمشي من وشي، جتكوا نيلة.. مليتوا الحزب

جمال: والله ده ظلم

مبارك: بتبرطم بإيه يا ابن الـ......

* مشهد رقم اتنين:

أمام الجامعة الأمريكية، الطريق واقف، عربات مصفحة على اليمين والشمال، يقف جمال في وسط الشارع أمام باب الجامعة، يرتدي بنطلون جينز وتيشيرت أخضر مكتوب عليه "فكر جديد"، ونضارة شمس مرسوم عليها صورة مبارك، وفي فمه لبان سحري اللي لونه بيتغير..، تخرج من البوابة بنت برنزية اللون، واسمها خديجة، واحتمال تبقى خطيبته في المشهد الجاي...

جمال: أنا..

خديجة : اشمعنا..

جمال : طالب القرب

خديجة : يا سم

جمال : والنبي أنا موش نقصاني حاجة، مال وجمال ولجنة سياسات، وقريب هجيب موبايل 6600، ويمكن أغير عربيتي على آخر الصيف..

خديجة : باباك يعرف إنك هنا

جمال : لو سمحتي.. أنا ليا شخصيتي المستقلة، وعندي عقدة أوديب..

خديجة : تقدر تروح تكلم باباي

* مشهد رقم تلاتة:

منزل العروسة، صوت سارينة في الشارع، تخرج خديجة من غرفتها إلى الصالة، وهي تصرخ..

خديجة: وصل يا بابا وصل

باباها: بس يا بنت إختشي، واضح إن عريسك متريش

خديجة : سامع يا بابا سامع، يا حلاوة سارينته

باباها : خلي سعدية تفتح الباب

...

جمال : الحقيقة يا عمي.. أنا جاي أصلح غلطتي، وأطلب القرب من بنتك

باباها : معندناش بنات للجواز

جمال : ليه يا عمي

باباها : مينفعش تيجي لوحدك، لازم أبوك يكون معاك

جمال : هجيبه حالا..

* مشهد رقم أربعة:

نفس سجادة الصلاة، ومبارك يجلس نفس الجلسة، يدخل جمال وهو ينهج

جمال: بابا، حبيبي.. شوف بقى... أنا جايبلك خبر حلو

مبارك : إيه يا ابني.. الـ88 بتوع الإخوان غرقوا في العبارة

جمال : لا .. حاجة أحلى

مبارك : العبارة لسه مغرقتش

جمال : لأ أحلى

مبارك : إيه، حركة (كفاية) بقت جماعة محظورة

جمال : لأ يا بابا.. أنا نويت أصلح غلطتك

مبارك : (ينزل بيده على وجه جمال).. جتك نيلة، وهو حد يعرف يصلحها.. يا أبني أنا غلطت مع الشعب كله

جمال : لا يا بابا، هصلح غلطتي أنا وأتجوز

مبارك : يا ما انت كريم يا رب..

* مشهد رقم خمسة:

بيت العروسة، الأب وبنته ومراته وجمال وأبوه وأمه وأخوه وعيال أخوه ومراته، و..كمال الشاذلي..

جمال : الحقيقة يا عمي..

باباها : عارف يا أبني، السيد محسن ممتاز من المخابرات كان هنا من شوية، وفهمني كل حاجة

مبارك : طيب، حيث كدة أحب أقول إننا هنجيب السجاد وطقم المعالق و..

باباها : يا باشا إنت تأمر.. أنا بس كنت عايز أسأل العريس بيشتغل إيه..

مبارك : بيشتغلنا يا حبيبي..

* مشهد رقم 76:

قناة دريم، فيلم الدعاية لحملة جمال الانتخابية لفترة رئاسة عاشرة، يجلس جمال وبجواره خديجة

جمال : عجبني فيها إنها بدأت معايا من البداية وأنا لسه موظف صغير في لجنة السياسات، ودلوقتي برضه مستحملاني وأنا مشغول بهموم الوطن.

خديجة : كان روش قوي، يا ما اتمشينا مع بعض على كورنيش نهر الراين، وكان بيقبض أول ما أتجوزنا مليونين بس، لكن أنا كنت شاطرة وكنت بعرف أوفر، وبعدين زمان كان المليونين دول يقدروا يفتحوا بيت كويس، لكن الحمد لله ربنا فتحها عليه من وسع..

*ندخل بقى بصوت المرحومة نانسي عجرم، في اغنيتها الخالدة، أطبطب .. أدلع..

(قطع)

* شوية ملحوظات للجمهور:

العبد الفقير لله كان أول من توقع أن تتم خطوبة جمال قريبا، وذلك في موضوع منشور باسم "بسلامته بيخطب"على عشرينات، وهذا بالطبع لا يعني أن جمال مبارك خطب تنفيذا لرغبتي، يا جماعة جمال شاب برضه ومن حقه إنه يعف نفسه..

بالنسبة للصورة الموجودة بأعلى فلها قصة، ذلك أن سياسة عشرينات التحريرية تضع قواعد معينة لنشر صور البنات، وبما أن الصورة الموجودة لخطيبة جمال غير مكتملة الأوصاف (هي طبعا مكتملة الأوصاف الجمالية) لكن نقصد الأوصاف المطابقة للسياسة التحريرية لعشرينات فقد وضعنا لوجو عشرينات على الأجزاء الـ(....) من صورة خطيبة جمال المصونة ووالدتها، وكل خطوبة وإنتم.. مصريين!